MURU OFUNJEDHA 33
Venyathi-iwa muukwani unooni-a udhivela, zelu noleva rima wa Nlungu
“Unodha kala venyathi-iwa muukwani.”—MAYIR. 24:15.
NYUMBO 151 Iye Adzaitana
VINOFUNA I-YO FUNJEDHA *
1. Mwasiwa ngwani Yohova utopanducha ingumi?
VAHORA inango Yohova akalecha ekene. Mbwenye liye kaadhiona kala ekene; mwaimbarimbari liye ngokwakwanela mmakalelo othene. Angalive e-no Nlungu utoira masaka-edho ira atu enango takaena ingumi thitho naimwerumweru. Modhaleliwa na dhivelo, Yohova atoroma panducha vyongo.—Salimo 36:9; 1 Ju. 4:19.
2. N’nga Yesu vambo-i naangelo tavivwide a-vi na mwasa wa vyopanducha vya Yohova?
2 Voroma, Yohova utopanducha mwanee Yesu. Ira alabe vambo-i na liye: Dhela mwa Yesu “vyongo vinango vyothene vyatopanduchiwa,” vinango mwaaliwa mba mamiliyau aangelo. (Akol. 1:16) Wa Yesu ali vyova-a imwerumweru injinji kaana ngari yolaba vambo-i na Babee. (Sang. 8: 30) Thitho pyovweya ira angelo takaena imwerumweru. Aliwa tatoona nametwiwa vyongo vyothene vyaira Yohova na Yesu vabasa liwa nlukulu lopanducha dhulu na ilambo yavathi. N’nga angelo tavivwa a-vi? Aliwa “tatokuwa thitho nomva-a titimi-o” mwari mopanduchiwa ilambo yavathi, mo-okaikela, aliwa tatodhowanave irana vyevi vakadha yongo ile Yohova yamari-a liye panducha. Mwaimbarimbari angelo tatokaana imwerumweru tangaoni ira panduchiwa wa yongo yofuneya vinjinji, vailambo yavathi yavathi, panduchiwa waatu. (Yobo 38:7; Sang. 8:31, madhu achindo) Vayongo ili yothene yopanduchiwa itooni-a dhivelo na zelu dha Yohova.—Salimo 104:24; Aroma 1:20.
3. Movwelana na lemba la 1 Akoritiyo 15:21, 22, n’nga sembe ya Yesu inonirumeli-a n’ni?
3 Yohova afuna ira atu takalengao dhowa nodhowa vailambo yobaleya ile yapanduchidhe liye. Mbwenye Adamu na Eva katamvwele Babiwa waudhivela tatodawa, voi e-no madao na wukwa utogwela atu othene. (Aroma 5:12) N’nga Yohova audhimbinuchile a-vi mwasuo? Vanduli va vyodawa, liye atoonga ira unofuna aombole atu. (Maro. 3:15) Liye angamvelele Mwanee Yesu, ninga yoombolana, vyevyo vyangarumeli-idhe ira a-ima othene a Adamu na Eva taode thathuliwa wu madawo na wukwa. Kadha mutu utokaana ngari yosakula mlambela Yohova nowachela ingumi yo-omala.—Juwau 3:16; Aroma 6:23; muleri 1 Akoritiyo 15:21, 22.
4. Pivyofuka viivi vinofuna wakuliwa va yofunjedha yeyi?
4 Yolanyedha yoonga venyathi-iwa muukwani inodhi-a vyofuka vinango. Mwaifwanafwani-o, vinoodeyadi ira atu akwide dhavenyathi-iwa muukwani? N’nga i-yo ninodha athuulela abali-u na axamwali-u anofuna dhavenyathi-iwa muukwani? Chiimwerumweru iivi inofuna i-yo dhakaana va hora inofuna venyathi-iwa atu akwide? N’nga venyathi-iwa muukwani unonifunji-a n’ni voonga vyaudhivela, zelu na leva rima wa Yohova? Dhoweni nitapanye vakadha yongo va vyofuka vyevi.
VINAODEYE A-VI IRA VENYATHI-IWA MUUKWANI WIIREYE?
5. Mwasiwa ngwan’ni ninoonga ira venyathi-iwa muukwani unodha ireya mwapama thitho mwadodoliso?
5 Paradaizoni, Yohova unodha indi-edha basa Mwanee ira adhaodhe venyathi-a mamiliyau na mamiliyau aatu. Mbwenye ninooda onga ira atu okwa othene katinodha venyathi-edhiwa vahora imbo-ive. Mwasiwa ngwan’ni? Mwasiwa ngoi akala ira atu othene availambo yavathi anovenyathi-edhiwa vahora imbo-ive ilambwila vanodha kala mikangano minjinji. Mbwenye Yohova kanairana vyongo mo-ovisaka-edha pama. Liye utoidhiwa ira vakale rendele unofwanelela saka-edha vyongo vyothene mwadodoliso. (1 Akor. 14:33) Alabanga na Yesu ira apanduche dhulu na ilambo yavathi, Yohova ali oidhiwa thitho odhievi-a; liye asaka-edha ilambo yavathi mwavang’ono na vang’ono vaora yenio ali a-anapanduche atu. Thitho Yesu unodha sazi-edha ifwanafwani-o voirana vyongo ninga Babee vale vanafuna liye dhalaba naatu va hora ya Arumagedo ira adhasaka-edhe ilambo mwapama vofuna wachela atu anofuna dhavenyathi-iwa muukwani.
Anofuna dhavulumuwa va khondo ya armagedo tanodha funji-a atu anofuna dhavenyathi-iwa muukwani vyoonga Umwene wa Nlungu thitho makundo oonga vya Yohova (Onani ndima 6) *
6. Movwelana na lemba la Mayirelo 24:15, n’nga tigulu liivi linofuna thangani-iwa naatu ale anofuna dhavenyati-iwa muukwani?
6 Atu ale anofuna dhavulumuwa va khondo ya Arumagendo tanodha kaana basa linjinji ira talilabe funji-a atu ale anofuna dhavenyathi-iwa vya Umwene wa Nlungu thitho novwela malamulo. Mwasiwa ngwan’ni vyevi pyofuneya? Mwasiwa ngoi atu anjinji anofuna dhavenyathi-iwa tanodha kala “o-olongomana.” (Muleri Mayirelo 24:15.) Atu “o-olongomanao” tanodha kaana vyongo vinjinji ira taodhe chinja vaingumi yiwa nowachela maraeli-o a kuto wa Kristu. Kathuulelani vang’ono mabasa ana i-yo thangani-avo funji-a imbarimbari mamilyau aatu ale a-amwidhi Yohova. N’nga vakadha mutu unokaana namafunji-e Bibilya, ninga vinoireya malamboano? N’nga atu anofuna dhavenyathi-iwa muukwani tanodha gawedhiwa mipingo thitho ira tafunji-iwe ira tafunji-e atu enango anofuna dhavenyathi-iwa vanduli viwa. Ninofwanela dedi-edha ira nione. Vinoidhiwa i-yo pyoi komoni wa Utongi wa vyawa mili wa Kristu, “ilambo yavathi inodha dhala naatu ommwidhiwa Yohova.” (Esaya 11:9) Ninodha kaana basa nlukulu mwari mwa vyawa mili, mbwenye basalo to-orucha!
7. Mwasiwa ngwan’ni atu a Nlungu tanodha kaana tangaranga vofunji-a atu anofuna dhavenyathi-iwa muukwani?
7 Vari va Utongi wa vyawa mili wa Kristu, atu othene anomlambela Yohova vailambo yavathi tanofwanela dhowanave irana machinjo vaingumi yiwa ira taode imdhiveli-a liye. Vamwasa wen’na, atu othene tanodha kala atangaranga vofunji-a atu ale anofuna dhavenyathi-iwa muukwani, namwasa oira aliwa tatoidhiwa ira tanofuneela thindhi vinjinji ira mutu aodhe i-yachi makalelo othakala no-arela makundo a Yohova. (1 Pe. 3:8) Mo-okaikela, atu avenyathi-iwile muukwani tanodha fwanelela vigumani-a na gulu lodhievi-a la Yohova, thitho vilimbi-edha ira tafwanye ivulumuchiwa.”—Afil. 2:12.
N’NGA I-YO NINODHA ATHUULELA ABALI-U NA AXAMWALI-U ANOFUNA DHAVENYATHI-IWA MUUKWANI?
8. Mwasiwa ngwan’ni ninororomela ira ninodha azindiyela axamwali-u naabali-u anofuna dhavenyathi-iwa?
8 Vamyasa dhinjinji, ninooda onga ira ninodha athuulela abali-u na axamwali-u anofuna dhavenyathi-iwa mukwani. Dhoweni nitapanye vyongo vinli. Yoroma, nathuulela atu ale tavenyathi-iwile muukwani ndulimu, vinooneya ira Yohova unodha venyathi-a atu movwelana makalelo ana aliwa ta-anakwe, venango nionge ira nakove imbo-ive, vyoira vimbo-ive na mathuulelo mambo-ive. Thuulelani ira Yesu alandani-idhe ukwa na irulo, thitho venyathi-iwa muukwani na venyathi muuiruloni. (Mat. 9:18, 24; Juwau 11:11-13) Mutu avenyathi vogona, unokalave wen’ne ninga vyali liye a-anagone, liye unokaana maoneelo mambo-ive thitho mathuulelo mambo-ive. Muone ifwanafwani-o ya Lazaro, liye vyakwide liye amadhi malambo man’nai, manungwee tatoroma vunda. Yesu angamvenyathi-idhe arongolee tatomzindiyela, thitho Lazaro atowazindiyela arongoleyao.—Juwau 11:38-44; 12:1, 2.
9. Mwasiwa ngwan’ni anofuna dhavenyahti-iwa katinodha venyathi-iwa na mathuulelo olongomana venango tutu lolongomana?
9 Kathuulelani mwasa wanambili. Yohova unolanyedha ira mu paradaizo kavali unofuna dhaonga ira: “Miyo ndinaabulela.” (Esaya 33:24; Aroma 6:7) Eeni anofuna dhavenyathi-iwa anodha venyathi-iwa na manungo o-okaana marenda. Mbwenye aliwa katinodha kala olongomana, aakale ira mbaabalinyu venango axamwalinyu tavenyathi-iwa na tutu lolongomana nyo kamwaode azindiyela. Vinooneya ira muutongi wa vyawa chikwi wa Yesu Kristu atu tanodha chinjeyanga mwavang’ono navang’ono ira takale olongomana, mwa vyawa chikwi baa-i Yesu unodha mmweli-edha Umwene Babee. Mwa vyawa vyevi Umwenula unodha kala wangakwakwaneli-edhile ifunelo yee thangani-avo atu othene kala olongomana.—1 Akor. 15:25-28; Apok. 20:1-3.
NJIIMWERUMWERU IIVI INOFUNA I-YO DHAKAANA MWASA OVENYATHI-IWA WAATU OKWA?
10. Nyo mwavwa venyathi-iwa waatu okwa munodhivwa a-vi?
10 Kathuulelani munofuna aliwa dhakalela vowachela abalinyu naaxamwalinyu aadhiveliwana nyo akwide tavenyathi-iwanga. N’nga nyo vahora yeniyo munodhairanga ulaa venango sangalala na mwasa waimwerumweru? N’nga nyo munodha ombanga mokuwa ira mumsimbe Yohova? Va vyongo viilivi munodha iravo imbo-i, venyathi-iwa waatu muukwani unodha wenjedhela udhivelinyu na Yohova thangani-avo Yesu Kristu, aakalanga tangaranga nooma wiwa rima i-yo kanawachele yotuva yapama ninga yen’na.
11. Movwelana na viongile Yesu va Juwau 5:28, 29, chini inofuna dhaaireela atu anofuna dha-arela makundo olongomana a Nlungu?
11 Kathuulelani imwerumweru inofuna dhakaana atu anofuna dhavenyathi-iwa muukwani voona thathuliwa vang’ono navang’ono vaumutu wawale thitho roma a-rela no avwechecha pama makundo olongomana a Nlungu. Anofuna dhachinja mofwanelela tanodha venyathi-iwela ira takaena ingumi. Atu ale anofuna dhakonda avwela Nlungu katinodha loliwa ira tadhadodomi-e rendele namakalelo apama azizi mu paradaizo.—Esaya 65:20; muleri Juwau 5:28, 29.
12. N’nga Yohova unodha araeli-a a-vi atu anofuna dhakalanga ilambo yavathi?
12 Umwenula udharoma tonga, atu othene a Nlungu tanodha roromela viongile lemba la Sanganikho 10:22; linoonga ira: “Mbamaraeli-o a Yohova anofumi-a thitho aliwa katinawenjedhelavo vyopa.” Mokami-iwa na zimu ochena tanodha kala oraeli-iwa muuzimuni venango nionge ira tanodha kala olandanana Kristu thitho tanodha kala olongomana. (Juwau 13:15-17; Aef. 4:23, 24) Siku lililothene manungwiwa tanakalenga o-okaana marenda thitho tanodha kalanga atu apama. Ingumi inodha kalanga yova-a imwerumweru vinjinji! (Yobo 33:25) N’nga thuulela venyathi-iwa waatu muukwani unooda nikami-a malambo ano?
N’NGA DHIVELO LA YOHOVA LINONIFUNJI-A N’NI?
13. Movwelana na lemba la Salimo 139:1-4, n’nga venyathi-iwa waatu muukwani unooni-a a-vi ira Yohova unoniidhiwa pama uliwethene wa i-yo?
13 Ninga muongiwile aliwa ndulimu, Yohova adhaavenyathi-a atu okwa liye unodha aweleli-edha mathuuleliwa namakalelo anaaliwa ta-anakwe, aliwa anodha kala saasawa ninga vyali aliwa ta-anakwe. Kathuulelani munofuna aliwa kalela Yohova unoodhiveliwanani vinjinji thitho liye unoovuruwanani vavyothene vinothuulela nyo vinovwa nyo vinoonga nyo na vinoira nyo, thitho liye unooda thuulela vyongo vyevi. Mwene Davide atoidhiwa ira Yohova unobala uliwethene wa i-yo. (Muleri Salimo 139:1-4.) N’nga ninofunjehavo n’ni va mwasa oonga ira Yohova utoniidhiwa pama?
14. Mwasiwa ngwan’ni tipama thuulela ira Yohova utoniidhiwa pama?
14 Thuulela ira Yohova unoidhiwa pama uliwethene wa i-yo, unonikami-a ira na-akaengana mathuulelo manjinji. Moi a-vi? Kathuulelani ira Yohova unoubalani vinjinji liye unodhiveliwana makalelwinyu apama anouiri-ani nyo kala mutu ofuneya wa liye. Liye unoing’anechecha makalelo avaingumi yinyu anouiri-ani nyo kala ninga vili nyo. Pyapama idhiwa vyevyo munoona a-vi! Ngumwasiwa kaninofwanela vionanga ira nili okene. Dambo namaminutu aliothene, Yohova unosaka ndhila yofuna ira anikami-e.—2 Limb. 16:9.
N’NGA NINOFUNJEDHAVO N’NI VA ZELU DHA YOHOVA?
15. N’nga idedi-edho yovenyathi-iwa atu muukwani inooni-a a-vi zelu dha Yohova?
15 Tuchiwana ukwa unooda kala futi yanguru. Atu anotongiwana Satana ano-indi-edha basa ova ukwa vofuna akanyi-edha venango nami-a afwiwa ira talabenga vyongo vya-aidhi aliwa pama. Mbwenye vyotuchana vyevyi kavina nguru navang’onovene wa-iyo. Nitoidhiwa ira akala amwidani-u tanipa Yohova unooda niweleli-edha ingumi. (Apok. 2:10) Ninororomela ira aliwa katinaode nisusi-a wa Yohova. (Aroma 8:35-39) Pyovweya ira Yohova ngwazelu voniva-a idedi-edho yovenyathi-iwa muukwani! Dhela mwaidedi-edho yen’na Yohova unooda kumi-avo futi inonyiindela Satana vahora imbo-ive yeniyo thitho unooda niva-a nguru yonikami-a ira niode vivunela weo uli: Limba rima o-otekenyeya.
N’nga vyosakula vi-u vinooni-a ira ninonyindela vilanyedhile Yohova ira unodha samalela vyorambulela vi-u vyaututuni? (Onani ndima 16) *
16 N’nga munofwanela dhifuka vyofuka viivi, n’nga vyowakula vinyu vinaukami-eni a-vi idhiwa ira munomnyindela Yohova?
16 N’nga amwidani a Yohova tautuchani ira taupeni nyo munodha ira a-vi? Munodha nyindela vilanyedhile Yohova ira unodha uvenyathi-ani muukwani? Ndhila yofuna idhiwela ira munomnyindela Nlungu kudhifuka ira: ‘N’nga vosakula vyongo ving’ono ndinooni-a ira ndinomnyindela Yohova?’ (Luka 16:10) Venango munodhifuka ira: ‘N’nga makaathedho a ingumi yanga ndinororomela ira nda-ela Umwene valimburo loroma ndinomnyindela Yohova ira unosamalela vyorambulela vyanga vyaututuni?’ (Mat. 6:31-33) Akala murumenle ira ee vyofuka vyevi, munooni-a ira munororomela Yohova thitho muli okozeya va yowesedhiwa iliyothene inofuna ufiedhelani.—Sang. 3:5, 6.
N’NGA LEVA RIMA WA YOHOVA UNONIFUNJI-A N’NI?
17. (a) N’nga venyathi-iwa waatu muukwani unooni-a a-vi leva rima wa Yohova? (b) N’nga i-yo ninaoni-e a-vi ira ninosimba leva rima wa Yohova?
17 Yohova u-ela dambo na hora yoira adhamali-e vyongo vyailambo yawalila. (Mat. 24:36) Liye kanodha kala o-oleva rima ira adhamali-e vyongo vyailambwila hora ya-anakwakwane. Masiki angalive ira liye unofunechecha ira adhavenyathi-e atu okwa, liye unodhowanave kala oleva rima. (Yobo 14:14, 15) Mbwenye liye unodedi-edha ira ifiye hora yofwanelela ira aaweleli-edhe ingumi atu akwide. (Juwau 5:28) Mo-okaikela leva rima wa Yohova unonifunji-a vyongo vinjinji. Kathuulelani vi: Dhela moleva rima wa Yohova atu anjinji tatokaana hora yofuna chinyuwa vyodawa viwa “thangani-avo i-yo.” (2 Pe. 3:9) Yohova unofuna ira atu anjinji takaena ngari yowachela ingumi yo-omala. Va mwasa wen’na ninofwanela oni-a ira ninosimba mwasa oleva wee rima. Moi a-vi? Voira munaodele i-yo vosaka atu ali okozeya mofwanelela ira tawachele ingumi yo-omala voakami-a mdhiveliwana Yohova namlabela. (Mayir. 13:48) Mwandhila yen’na aliwa anooda kaana maraeli-o dhela moleva rima wa Yohova ninga vite i-yo.
18. Mwasiwa ngwan’ni ninofwanela kala oleva rima naatu enango?
18 Yohova anoidhiwa ira ninodha kala olongomana komoni wa vyawa chikwi. Ngumwasiwa fiedhela weo, liye unodha kalave oleva rima thitho unodha kala okozeya levelela vyodawa vi-u. Wen’na ngumwasa mbo-i wapama oira niing’anenga vyapama waatu enango thitho ira niode kala oleva rima waaliwa. Onani ifwanafwani-o ya rongola mbo-i “man’ne atoroma rucheya thitho kaana vyosukwali-a fiedhela afwanyeyanga vamigumanoni.” Rongolula aongile ira: “Vyevyi vyali vyorucha vinjinji wa miyo vyongo vyathuulela i-yo ira nilabe banjani mwi-u kavyaodeile.” Masiki angalive ee-no i-yana waudhivelula alive oleva rima wa man’nee liye atomnyidela Yohova thitho kawelele nduli saasawa ninga vine Yohova rongolula kaaing’anechecha nyarwa dhagumanana aliwa malo moira ee-no liye aing’anechecha vyongo vyapama vyaira man’ne, liye aongile ira; mananga uutokaana makalelo odabwi-a vinjinji liye dambo lililothene unodhilimbi-edha ira awelelemo. Ifwanafwani-o yei inoonga funeya okala oleva rima na banja li-u thitho naabali-u ampingoni enao anovilimbi-edha ira tamali-e vyorucha viwa!
19. N’nga nikalenga osakula irana n’ni?
19 Yesu vamo-i naangelo tali aimwerumweru vinjinji ilambo yavathi vyapanduchiwa aliwa. Kathuulelani mwemo munofuna aliwa dhakalela aimwerumweru vailambo yavathi vadhakala atu olongomana enao anodhiveliwana mlabela Yohova. Kathuulelani imwerumweru inofuna dhakaana osakuliwa anofuna dhatonga vambo-i na Kristu dhulu munofuna aliwa vivwela taona maraeli-o a basa liwa lokami-a atu. (Apok. 4:4, 9-11; 5:9, 10) Kathulelani mukalanga ilambo yoi mi-odi dha nyarwa dhitochinjeya kala mi-odi dhaimwerumweru, yoi marenda sukwala thitho ukwa a-kalaove. (Apok. 21:4) Vodedi-edha fiya wa dambo leli kalani okozeya vosazi-a dhivelo zelu na leva rima wa Yohova, mwaira ee-no kamunodha luza imwerumweru mo-obala nyarwa dhinogumanana nyo. (Tiy. 1:2-4) Mwaimbarimbari nitokaana myasa injinji yifuna msimbela Yohova mwasa olanyedha ira “utokala venyathi-iwa muukwani”!—Mayir. 24:15.
NYUMBO 141 Moyo Ndi Wodabwitsa
^ ndima 5 Yohova ngu Baba waudhivela, oidhiwechecha vyongo thitho oleva rima. Ninooda ona makalelo enala a-kala dhela mu vyongo vipanduchile liye baa-i, mbwenye mwa vyongo vile vilanyedhile liye ira unodha venyathi-a atu muukwani. Yofunjedha yei ninodha ona vyongo vile vinokaikela i-yo vamwasa ovenyathi-iwa muukwani. Thitho ninodha ona mule munasazi-edhe i-yo kala adhivelo noidhiwa thitho kala oleva rima ninga Yohova muoni-idhe liye voira unodha venyathi-a atu muukwani.
^ ndima 59 IRUTHIRUTHI VATHAKURU: Mutu mmbo-i wa ziza la indio ikundu ya Amerka akwide mu vyawa mazana ndulimu avenyathi-wanga mu Utongi wa Kristu vyawa chikwi. Bali mmbo-i avulumuwile vakhondo ya Armagedo akalanga waimwerumweru vomfunji-a mutu wa ziza la indio avenyathi-iwile muukwani wenuo unofuneela wachela maraeli-o a yoombolana na Kristu.
^ ndima 61 IRUTHIRUTHI VATHAKURU: Bali ammwandalanga boisee ira kanalabe hora injinji fiedha nama-iyu wari wa malambo oyeva sumana lelo, liye unommwandela boisee ira ma-iyu amalambo oyeva sumana lelo utokaana mabasa ovwelana na mlambela Yohova. Vaikundu inango balula uli okozeya laba hora injinji ma-iyu enango ovi-a kalavo mabasa ofuneya mombaranya.
