1. Muloñadi Yehova chaleñeleliyi yuma yikweti wumi?

MPINJI yimu Yehova wadiña kankawindi. Ilaña watiyileña wudi wanyi. Wadiña nayuma yejima yakumutiyisha kuwaha. Hela chochu, wakeñeleña nindi yileñaleña niyena yikaliku nawa yidiluñisheña. Dichi kukeña kwamuletesheli Yehova kutachika kuleña.—Mas. 36:9; 1 Yow. 4:19.

2. Yesu niañelu elili ñahi chelili Yehova yaleñi yuma yikwawu?

² Chatachi, Yehova waleñeli mwanindi, Yesu. Dichi kuhitila mudi Mwanindi, “dimwaleñeleliwu yuma yejima” kushilahu niañelu. (Kol. 1:16) Yesu wazañaleli kuzatila hamu naTata yindi. (Yish. 8:30) Añelu niwena azañaleli. Adiña kwoku mpinji yaleñeleñayi Yehova niMukalawenu windi, Yesu, mawulu nimaseki. Añelu elili ñahi? Chelili aleñi maseki “hiyakudikuwa nakuzañalala” nawa chakadi nikujina, atwalekelihu kumushimeka Yehova hayuma yaleñeliyi kushilahu tuhu niantu. (Yoba 38:6; Yish. 8:31) Yileñaleña yejimiyi yamwekeshaña nawu Yehova wukweti kukeña nimaana.—Mas. 104:24; Rom. 1:20.

3. Neyi chinamwekeshiwu ha 1 Akorinda 15:21, 22, mulambu wefutu danyiloña daYesu wenzununa njilanyi?

³ Yehova wakeñeleña nindi antu ashakameña haya nyaaka hamaseki. Ilaña chelili Adama naEva adikañi naNzambi, hiyatwesheli cheñi kushakama haya nyaakaku. (Rom. 5:12) Yehova welili ñahi? Washimwini chakamwinayi antu ejima. (Kutach. 3:15) Yehova wafuukwilihu kuhana ifutu danyiloña kulonda damwini anyana kaAdama naEva kunshidi nikufwa.  Kuhiñahu wetejeli muntu himuntu kufuukulahu kumukalakela kulonda akekali nawumi wahaya nyaaka.—Yow. 3:16; Rom. 6:23; tañenu 1 Akorinda 15:21, 22.

4. Malwihwinyi itukuhanjekahu muchinu chibaaba?

⁴ Kudi malwihu amavulu itunateli kudihula kutalisha hachikaninu chaNzambi chakusañula afu. Chakutalilahu, kusañuka kwatela kwakekala ñahi? Komana twakayiluka antaña jetu neyi anayisañuli? Kusañuka kwakatuletela ñahi muzañalu? Nawa kutoñojoka chikupu hakusañuka kukutukwasha ñahi kwiluka kukeña kwaYehova, maana nikudiwunjika kwindi? Tuhanjekenu hanawa malwihu.

5. Muloñadi chitwatela kukuhwelela netu antu hiyakayisañula hampinji yoyimuku?

⁵ Mpinji yakasañulañayi Yehova antu kuhitila mudi Mwanindi, hitwatela kukuhwelela netu akayisañula ejima hampinji yimuku. Muloñadi? Muloña neyi heseki hekala antu amavulu mumpinji yimu, hanateli kwikala kukala. Nawa Yehova helaña yuma mukuluwañeshaku. Weluka nindi hakwila nawu kwikali kuwunda, yuma atela kuyila mukutelela. (1 Kor. 14:33) Yehova wamwekesheli nindi wukweti maana nawa wadiwunjika mpinji yazatileñayi naYesu hakuleña iseki henohu kanda yaleñi antu. Yesu niyena wakamwekesha yilwilu yoyimu muChiyuulu chaYaaka Ikombakaji hampinji yakazatañayi nawantu akapuluka haAmagedoni kuwahisha iseki kulonda akatambwili antu akasañulañawu.

6. Kwesekeja naYilwilu 24:15, anyi akekala hakachi kawantu akasañulawu kudi Yehova?

⁶ Chuma chasweja kulema, antu akapuluka haAmagedoni akadizishaña antu akasañulawu kutalisha haWanta waNzambi niyuma  yakeñañayi Yehova. Muloñadi? Muloña antu amavulu akasañulawu akekala hakachi kawantu ‘abula kuloña.’ (Tañenu Yilwilu 24:15.) Atela ntahi kuhimpa yilwilu yawu kulonda akaheteli mwifutu danyiloña daKristu. Toñojokenu hamudimu wakekalaku wakudizisha chalala mamiliyoni awantu abula kwiluka chuma chidi chejima hadi Yehova. Komana muntu himuntu akamudizishaña neyi chitunakudizisha antu Bayibolu makonu? Komana awa antu amaha akekala muyipompelu kulonda akayidizisheña chakudizisha antu akasañuka hanyima yawu? Tuneluki wanyi, twatela kuhembelela. Hela chochu, tweluka netu hakumana kwaChiyuulu chaYaaka Ikombakaji daKristu, “iseki dejima dakawanina kumwiluka Yehova.” (Isaya 11:9) Twakadiluñisha nanyidimu yayivulu mwikombakaji dayaaka.

7. Muloñadi antu jaNzambi chikatwalekelahu kudakamena hampinji yakadizishañawu antu akasañuka?

⁷ Muchiyuulu chaYaaka Ikombakaji daKristu, anyana kaYehova ejima aheseki akatwalekahu kuhimpa yilwilu yawu kulonda akamuzañalesha yena. Dichi wejima wawu akadakamenaña wumu namukwawu hampinji yikakwashañawu antu akasañuka kuhimpa yilwilu yawu yatama kulonda akashakameña kwesekeja nanshimbi jaYehova. (1 Pet. 3:8) Chakadi nikujina antu akasañuka akamona antu jaYehova chadizozawu nichiyakatwalekahu kuhimpa yilwilu yawu kulonda kumuzañalesha Yehova nawa akadifukulaña hamu nawu.—Fwi. 2:12.

8. Muloñadi chitukutoñojokela netu antu akeluka antaña jawu akasañulawu?

⁸ Kudi yuma yayivulu yikuletesha tukuhweleli netu antu akayiluka antaña jawu akasañulawu. Yakutalilahu yawantu asañwiliwu kunyima yamwekeshaña nawu Yehova wakasañula antu kulonda akamwekaneña neyi chamwekeneñawu, chahosheleñawu nichatoñojokeleñawu henohu kanda afwi. Anukenu nenu, Yesu wesekejeli kufwa nakukaama mutulu nawa wesekejeli kusañuka nakuhinduka mutulu. (Mat. 9:18, 24; Yow. 11:11-13) Neyi antu anahinduki mutulu, mmwekenu yawu, nhoshelu yawu niyitoñojoka yawu yahimpikaña wanyi. Shinshikenu chakutalilahu chaLazaru. Mwahitili mafuku awana kufuma hafwiliyi nawa mujimba windi watachikili kutoka. Ilaña chamusañwiliwu kudi Yesu, ahela jindi amwilukili nawa hadaha niyena wayanukili.—Yow. 11:38-44; 12:1, 2.

9. Muloñadi antu akasañulawu chakabulilawu kushikena kwikala nayitoñojoka ninyijimba yawanina?

⁹ Yehova wakanini nindi kwosi muntu wakahosha muchiyuulu chaKristu nindi: “Ami nakataku.” (Isa. 33:24; Rom. 6:7) Antu akasañulawu akekala akola kumujimba. Hela chochu, hiyakashikena kwikala awaninaku. Neyi ashikena kwikala awanina, chakayikalila antaña jawu kuyiluka. Chinamwekani neyi muChiyuulu chaKristu chaYaaka Ikombakaji, antu ejima akawaninaña chovu-chovu. Chakamana Yaaka Ikombakaji, Yesu wakahana Wanta kudi Tata yindi. Haniyi mpinji, Wanta wakekala wela dehi yuma yejima yakeñeleñayi Yehova kwila, kushilahu nikubalumuna antu kwikala awanina.—1 Kor. 15:24-28; Chim. 20:1-3.

10. Kusañuka kukayitiyisha ñahi?

¹⁰ Fwikijenu chichakekala hakudimona cheñi nawantu itwakeña. Komana muzañalu wumwakatiya wukayiletesha kuseha tahindi  kudila? Mwakazañalala nakumushimeka Yehova natumina? Chakadi nikujina, mwakasweja kumukeña Tata yenu wukweti kukeña niMwanindi analeteshi kukekali kusañuka.

11. Kwesekeja namazu aYesu adi haYowanu 5:28, 29, yumanyi yikamwekena antu amwovwahilaña Nzambi?

¹¹ Fwikijenu muzañalu wakatiya antu akasañulawu chakavuulañawu wuntu wawu wawukulu nakushikama kwesekeja nanshimbi jaNzambi. Antu akahimpa yilwilu yawu, akashakama haya nyaaka muParadisa. Ilaña antu akadikaña naNzambi hiyakayiteja kushakama muParadisaku.—Isa. 65:20; tañenu Yowanu 5:28, 29.

12. Munjilanyi mwakayikiswilawu antu ashakamaña hamaseki kudi Yehova?

¹² Mpinji yakayuulaña iwu Wanta, antu jaNzambi ejima aketeja mazu adi haYishimu 10:22 nawu alala, akwila nawu: “Nkisu yaYehova yaheteshaña muntu, habombelañaku kukalaku.” Chineli spiritu yaYehova yikayikwashaña, antu jaNzambi akaheta kuspiritu, dikwila nawu, akekala neyi Kristu nawa akekala awanina. (Yow. 13:15-17; Efwe. 4:23, 24) Ifuku nifuku akekalaña akola kumujimba. Chihandilu chikawaha chikupu. (Yoba 33:25) Hanu dinu kutoñojoka chikupu hakusañuka kunateli kuyikwasha ñahi makonu?

13. Kwesekeja naMasamu 139:1-4, kusañuka kukamwekesha ñahi nawu Yehova watwiluka chikupu?

¹³ Neyi chitwahanjeka hakusambila, Yehova wakayisañula antu, akekala neyi chadiñawu hakusambila. Toñojokenu munatalishi ichi chuma. Yehova wayikeña nankashi chakwila wamonaña nikwanuka yuma yejima yimwatoñojokaña, chimwatiyaña, yimwahoshaña niyimwelaña. Dichi neyi yela nindi yayisañuli, wukuyifuntisha neyi chochimwadiña. Mwanta Davidi welukili nindi Yehova watwiluka wejima wetu hamuntu-hamuntu. (Tañenu Masamu 139:1-4.) Twatiyaña ñahi neyi twiluka netu Yehova watwiluka chiwahi?

14. Twatela kutiyaña ñahi neyi tunakutoñojoka chikupu chatwilukayi Yehova?

¹⁴ Neyi tunakutoñojoka chikupu chatwilukayi Yehova, bayi twakamaku. Muloñadi? Anukenuña nenu Yehova watwakamenaña nakashi. Watumonaña wejima wetu nindi twalema kudi yena. Wanukaña yuma yejima yatumwekenaña muchihandilu yaletesha twikali neyi chitudi. Chumichi chatukundejaña hama. Bayi tutoñojokaña netu tudi kankawetuku. Mpinji yejima Yehova wudi nanetu nawa nakukeña kutukwasha.—2 Kushi. 16:9.

15. Kusañuka kwamwekeshaña ñahi nawu Yehova wukweti maana?

¹⁵ Kuchiina kufwa hichitwa chafwana nankashi. Antu ayuulañawu kudi Satana achinishaña antu nawu akuyijaha kulonda eli chuma chanelukiwu nawu chatama. Ilaña hiyakutwesha kutuchinisha kulonda twili chuma chatamaku. Tweluka netu neyi ayilumbu jetu akutujaha, Yehova wakatusañula. (Chim. 2:10) Twakuhwelela chikupu netu, kwosi chuma chikwilawu chinateli kutukañesha kumukalakela Yehovaku. (Rom. 8:35-39) Yehova wamwekesha chikupu nindi wukweti maana hakutwinka kuchiñeja kwakusañuka. Muloña wakusañuka, twatiyaña wanyi woma neyi antu jaSatana atuchinisha nawa kwatukwashaña kwikala ashinshika kudi Yehova.

16. Malwihwinyi imwatela kudihula, nawa ñakwilu yenu yikuyikwasha ñahi kwiluka chimwamukuhwelela Yehova?

¹⁶ Neyi ayilumbu jaYehova ayichinisha nawu akuyijaha, komana mukumukuhwelela  Yehova nenu wakayisañula? Muneluki ñahi nenu mukumukuhwelela? Njila yimu hikudihula nenu, ‘Komana namwekeshaña nami namukuhwelela Yehova nimutuyuma twanyanya tunafuukulaña?’ (Luka 16:10) Dihulenu cheñi nenu, ‘Komana chihandilu chami chamwekeshaña nawu nakuhwelela muchikaninu chaYehova chakuñakamena muyuma yinakankili neyi nitwamijaku Wanta windi?’ (Mat. 6:31-33) Neyi mukwakula nenu eña, mukumwekesha nenu chalala mwamukuhwelela Yehova nawa mukudiloñesha kushinda kweseka kwejima kukwinza.—Yish. 3:5, 6.

17. (a) Kusañuka kwamwekeshaña ñahi nawu Yehova wadiwunjika? b) Tunateli kumwekesha ñahi kusakilila hakudiwunjika kwaYehova?

¹⁷ Yehova wafuukula dehi ifuku nimpinji yakajilumunayi kanu kaayi katama. (Mat. 24:36) Wukudiwunjika kushika tuhu nimpinji yatoñolayi. Wafwilaña kusañula afu, ilaña wadiwunjika. (Yoba 14:14, 15) Nakuhembelela sampu mpinji yatoñolayi yakuyisañula yinashiki. (Yow. 5:28) Kudi yuma yayivulu yikuletesha tumusakilileña Yehova hakudiwunjika kwindi. Toñojokenu hachumichi: Hamuloña wakudiwunjika kwaYehova, antu amavulu kushilahu tuhu ninetu, tudi nakukooleka “kwakubalumuka munyichima.” (2 Pet. 3:9) Yehova nakukeña nindi antu amavulu akekali nawumi wahaya nyaaka. Dichi tumwekesheña netu twasakililaña hakudiwunjika kwindi. Munjilanyi? Kuhitila mukuzata hanakumini ñovu jetu kukeñakeña antu adi “nanyichima yashinshika yakukeña kwikala nawumi wahaya nyaaka” nikuyikwasha kulonda amukeñi Yehova nawa amukalakeleña. (Yilw. 13:48) Kuhiñahu, niwena akwikala nakuchiñeja neyi kutukweti kwakwikala nawumi wahaya nyaaka muloña wakudiwunjika kwaYehova.

18. Muloñadi chitwatela kwikalila adiwunjika kudi akwetu?

¹⁸ Yehova wakadiwunjika kushika tuhu nichakamana Yaaka Ikombakaji sampu tunekali awanina. Yehova wakatwalekahu kutwanakena nichakamana Yaaka Ikombakaji. Dichi, ninetu twatela kumonaña yuma yayiwahi mudi akwetu nikwikala adiwunjika nawena. Talenu chakutalilahu chamuhela wukweti nfumwindi watachikili kwakama chikupu  nawa yaleka nikupompa. Wahosheli nindi: “Chumichi chankalilili chikupu. Yuma yitwakeñeleña kwila muchihandilu chetu hamu neyi chisaka, yahimpikili.” Hela chochu, iwu muhela watwalekelihu kwikala wadiwunjika. Washindameneni hadi Yehova nawu hazeyeliku. Kufwana Yehova, hashili maana hakukala kwanfumwindiku, ilaña washili maana hayilwilu yayiwahi yanfumwindi. Wahosheli nindi: “Nfumwami wukweti yilwilu yayiwahi nawa natachiki kuleka kwakama chovu-chovu.” Mwatela kwikala adiwunjika kudi antu amuchisaka hela amuchipompelu anakweseka kushinda kukala kunakumonawu.

19. Chumanyi chitwatela kufwila kwila?

¹⁹ Yesu niañelu azañaleli chelili iseki adileñi. Fwikijenu muzañalu wakatiyawu hakumona heseki hadi hohu antu awanina, amukeña Yehova nawa anakumukalakela. Fwikijenu muzañalu wakatiyawu antu akaya mwiwulu nakuyuula hamu naKristu hakumona antu anakuhetela mumudimu wawu. (Chim. 4:4, 9-11; 5:9, 10) Nawa fwikijenu muzañalu wutwakekala nawu chakela kukata, chineñi nikufwa jinamani dehi. (Chim. 21:4) Dichi twalekenuhu kumwimbujola Tata yenu wukweti kukeña, maana nawa wadiwunjika kushika tuhu niniyi mpinji. Neyi mwila mwenimu, mukwikala namuzañalu hichikweti muloña nakukala kumunakumonaku. (Yak. 1:2-4) Twasakililaña hachikaninu chaYehova chakwila nawu “kwamba kekala kusañuka.”—Yilw. 24:15.