1. Ang’o momiyo Jehova nochueyo chuech mamoko?

NITIE kinde ma Jehova ne ni kende. To mano ne ok omiyo obedo gi kuyo. Ne omor nikech ne en gi gik moko duto ma ne odwaro. Kata kamano, Nyasaye ne gombo mondo chuech mamoko bende oyud ngima kendo gibed ma mor. Herane nochwale mi ochako chuecho.​—Zab. 36:9; 1 Joh. 4:19.

2. Yesu kod malaike nowinjo nade sama Jehova ne chueyo gik moko?

² Mokwongo, Jehova nochueyo Wuode. Kae to, kokalo kuom Wuode ma kayono, “ne ochue gik mamoko duto,” moriwo nyaka malaike tara gi tara. (Kol. 1:16) Yesu ne mor ahinya tiyo kanyachiel gi Wuon-gi. (Nge. 8:30) Malaike bende ne mor ahinya. Ne gineno achiel kachiel ka Jehova kod Yesu ma ne en Jatich Molony chueyo polo gi piny. Malaike nonyiso nade ni ne gimor? Ne ‘gikok matek gimor’ sama ne ochue piny, kendo kaka Jehova ne dhi nyime gi tij chuech e kaka gin bende ne gimedo pamo gi mor, to moloyo ka ne ochue dhano. (Ayub 38:7; Nge. 8:31) Gik ma Jehova nochueyo duto nyiso herane kod riekone.​—Zab. 104:24; Rumi 1:20.

3. Kaka oler e 1 Jo-Korintho 15:21, 22, rawar mar Yesu yawo yo mane?

³ Jehova ne dwaro ni dhano odag gi mor e piny ma jaber ma nosechueyo. To ka ne Adam gi Hawa ong’anjo ne Wuon-gi ma noherogi, richo kod tho nodonjo e piny. (Rumi 5:12) Jehova nokawo okang’ mane? Mapiyo piyo, nowacho kaka nodhi reso oganda dhano. (Cha. 3:15) Noloso chenro mar rawar mondo obi ogol nyikwa Adam gi  Hawa e tuech mar richo kod tho. Mano ne dhi yawo ne ng’ato ang’ata ma dwaro tiyone yor ngima ma nyaka chieng’.​—Joh. 3:16; Rumi 6:23; som 1 Jo-Korintho 15:21, 22.

4. Gin penjo mage ma wadwaro nono e sulani?

⁴ Singo ma Nyasaye osingo ni obiro chiero jomotho miyo wabedo gi penjo moko. Kuom ranyisi, dibed ni ibiro chier ji e yo mane? Be wabiro ng’eyo wedewa gi osiepewa sama ochiergi? Ere kaka chier biro kelonwa mor? To ere kaka paro matut e wi chier nyalo miyo wamed bed ma mor gi hera mar Jehova, riekone, kod horuokne? We wanon ane penjogo.

5. Ang’o momiyo en gima kare wacho ni ok bi chier ji riat?

⁵ E kinde ma Jehova biro tiyo gi Yesu e chiero ji tara gi tara, nenore ni ok obi chierogi giduto riat. Ang’o momiyo wawacho kamano? En nikech ka ji omedore e piny apoya kamano, mano nyalo kelo chochni mang’eny. To Jehova ok nyal timo gik moko e yo ma ok ochanore. Ong’eyo ni mondo kue obedie, nyaka ket chenro maber. (1 Kor. 14:33) Jehova Nyasaye nonyiso rieko kod horuok sama ne otiyo gi Yesu e loso piny e yo mochanore ka pok ochueyo dhano. Yesu bende biro nyiso kidogo e kinde lochne mar higni aluf achiel sama obiro tiyo gi joma biro tony e lweny Har–Magedon e loso piny, mondo joma biro chier obi oyud gik ma dwarore e ngima.

6. Ka luwore gi Tich Joote 24:15, moko kuom joma Jehova biro chiero gin jomage?

⁶ Gima duong’ moloyo en ni biro dwarore ni joma otony e Har–Magedon opuonj joma ochier mondo ging’e  Pinyruodh Nyasaye kod gik ma Jehova dwaro ni jotichne otim. Ang’o momiyo? En nikech thoth joma ibiro chier gin “jo ma ok kare.” (Som Tich Joote 24:15.) Biro dwarore ni gitim lokruok mang’eny mondo e ka giyud ber mar misango Kristo. Parie kaka puonjo ji tara gi tara ma ok ong’eyo Jehova biro bedo tich mang’eny! Be ibiro puonj ng’ato ka ng’ato yore kaka watimo gi jopuonjre Muma e kindewagi? Be ibiro migi kanyakla ma gidhiye mondo giyud tiegruok ma biro konyogi puonjo joma ibiro chier bang’gi? We warit wanane. Gima wang’eyo gadier en ni giko loch Kristo mar higni aluf achiel biro yudo ka ji duto e piny ngima ong’eyo Jehova. (Isa. 11:9) To mano doko dich kod mor ma wabiro bedogo e higni aluf achielgo!

7. Ang’o momiyo jotich Nyasaye biro kecho joma ochier ma gibiro puonjo?

⁷ E kinde loch Kristo mar higni aluf achiel, nyithind Jehova duto e piny kae biro dwarore ni otim lokruoge mang’eny e ngimagi mondo gimore. Omiyo, giduto gibiro kecho joma ochier sama gikonyogi loyo nyawo ma gin-go mondo gidag ka luwore gi chike Jehova. (1 Pet. 3:8) Onge kiawa ni joma ibiro chier biro yudo ka yotnegi ng’iyo gi jotich Jehova mobolore ma bende biro bedo ka ‘tiyo matek ne warruok margi.’​—Fil. 2:12.

8. Ang’o momiyo wanyalo wacho ni joma biro romo ne wedegi gi osiepegi mochier biro ng’eyogi?

⁸ Nitie gik mang’eny ma miyo wanyalo wacho ni joma biro romo ne wedegi gi osiepegi mochier biro ng’eyogi. Kuom ranyisi, ka luwore gi chier ma nosetimore kinde mokalo, nenore ni Jehova biro miyo joma ochier del ma chal gi ma ne gin-go, kendo gibiro wuoyo kaka ne giwuoyoga ka ne pok githo; bende, gibiro paro mana kaka ne giparoga. Par ni Yesu nopimo tho gi nindo, kendo nopimo chier gi chiewo. (Mat. 9:18, 24; Joh. 11:11-13) Sama ng’ato ochiewo koa e nindo, donge ochaloga mana kaka nochal ka pok nochako nindo? To be pache lokorega nikech koro oa nindo? Par ane ranyisi mar Lazaro. Odiechienge ang’wen nosekalo nyaka notho, kendo ringrene nosechako tow. To ka Yesu nochiere, nyiminene nong’eye mayot, kendo en be nong’eyogi.​—Joh. 11:38-44; 12:1, 2.

9. Ang’o momiyo joma ibiro chier ok bi golnegi richo sama ochiergieno?

⁹ Jehova osingo ni e bwo loch Kristo, onge ng’ato ang’ata ma biro wacho ni: “Atuo.” (Isa. 33:24; Rumi 6:7) Kuom mano, joma ibiro chier ibiro mi del ma onge tuoche kata ng’ol moro amora. Kata kamano, ok bi golnegi richo mana gikanyono. Ka po ni ogolnegi richo, ginyalo ruenyo wedegi gi osiepegi. Nenore ni dhano duto ibiro golnegi richo mosmos e kinde loch Kristo mar higni aluf achiel. Yesu biro dwoko ne Wuon-gi Pinyruoth mana bang’ higni aluf achielgo. Mano biro yudo ka Pinyruoth osetieko tije duto, moriwo nyaka golo ne dhano duto richo.​—1 Kor. 15:24-28; Fwe. 20:1-3.

10. Chier biro miyo iwinj nade?

¹⁰ Parie mor mibiro bedogo sama umosoru gi watni kata osiepni moro moa chier. Be mor ma kamano biro miyo inyier koso iil ma pi wang’i chuer achuera?  Be ibiro muoch gi wende mipakogo Jehova? Gima wang’eyo gadier en ni chier biro miyo imed hero Wuonu ma ni e polo ma dewowa kaachiel gi Wuode ma noyie thonwa mondo wayud ngima.

11. Ka luwore gi weche Yesu ma yudore e Johana 5:28, 29, joma kare ma luwo chike Jehova biro yudo ang’o?

¹¹ Parie mor ma joma ochier biro bedogo sama gisechako weyo kido maricho ma ne gin-go chon kendo dak ka luwore gi chike mag Jehova! Joma biro timo lokruogego biro yudo chier mar ngima, ma en thuolo mar dak nyaka chieng’ e Paradiso. To joma biro tamore luwo chike Jehova ibiro tieki mondo kik githag jowetegi e Paradiso.​—Isa. 65:20; som Johana 5:28, 29.

12. Ere kaka Jehova biro guedho ji duto ma biro dak e piny?

¹² E bwo loch mar Pinyruoth, jotich Nyasaye duto biro neno adiera mar weche ma yudore e Ngeche 10:22 ma wacho niya: “Gueth mag Jehova e ma kelo ne ng’ato mwandu, kendo ok omedie lit.” Roho mar Jehova biro konyogi mi gimed bedo gi kido ma chal gi mag Kristo kendo gichop kama koro gionge gi richo moro amora. (Joh. 13:15-17; Efe. 4:23, 24) Kaka odiechieng’ kodiechieng’ medo kalo, e kaka dendgi bende biro medo bedo gi teko. To mano kaka ngimano nobed ma mit! (Ayub 33:25) Kata kamano, ere kaka paro matut kuom chier nyalo konyi sani?

13. Ka luwore gi Zaburi 139:1-4, ere kaka chier biro nyiso ni Jehova ong’eyowa maber?

¹³ Mana kaka waseneno, e kinde ma Jehova biro chiero ji, obiro dwokonegi paro kod kido ma ne gin-go ka ne pok githo. Par ane tiend wachno. Jehova oheri e okang’ malach ma wiye ok nyal wil gi gik miparo, kaka iwinjo e chunyi, gik miwacho, kod mitimo. Omiyo, ka ochieri, obiro dwokoni pachi, kiti, kod timbeni duto. Ruoth Daudi nong’eyo kaka Jehova ong’eyo ng’ato ka ng’ato kuomwa. (Som Zaburi 139:1-4.) Ng’eyo ni Jehova ong’eyowa maber jiwowa nade?

14. Ng’eyo kaka Jehova ong’eyowa maber jiwowa nade?

¹⁴ Ok onego waluor sama waparo kaka Jehova ong’eyowa. Nikech ang’o? Par ni Jehova dewowa ahinya. Oneno ng’ato ka ng’ato kuomwa kaka ng’at makende. Odich gi gik moko te ma timore e ngimawa. To mano kaka wachno hoyowa! Onge sa moro amora monego wapar ni wan kendwa. Seche duto Jehova ni e bathwa komanyo yore ma dokonywago.​—2 We. 16:9.

15. Ere kaka chier nyiso rieko mar Jehova?

¹⁵ Tho en achiel kuom gik madongo ma jowasigu nyaloga bwogogo ji. Joma ni e bwo loch mar Satan bwogoga ji gi tho mondo gichun ji onyisgi weche osiepegi ma ling’ ling’ kata mondo ji okwed yie margi. Wan to ok waluor sama obwogwa gi tho. Wang’eyo ni kata ka jowasikwa onegowa, Jehova biro chierowa. (Fwe. 2:10) Wan gadier chuth ni onge gimoro amora ma gitimonwa ma nyalo pogowa gi Jehova. (Rumi 8:35-39) To mano kaka Jehova nonyiso rieko maduong’ kuom miyowa geno mar chier! Kokalo kuom chier, Jehova biro mayo Satan achiel kuom gik madongo motiyogo e  bwogo ji. Bende, geno mar chier miyo wabedo gi chir makende ma kata weche tek manade.

16. Gin penjo mage minyalo penjori, to dwoko michiwo nyalo konyi nade ng’eyo okang’ migenogo kuom Jehova?

¹⁶ Ka jowasik Jehova obwogi gi tho, be ibiro yie keto ngimani e lwet Jehova? Ere kaka inyalo ng’eyo ka mano e gima ibiro timo? Yo achiel en kuom penjori niya: ‘Be yiero matindo ma atimoga odiechieng’ kodiechieng’ nyiso ni ageno kuom Jehova?’ (Luka 16:10) ‘Be kit ngimana nyiso ni ageno kuom singo mar Jehova ni obiro miya gik ma achando ka aketo Pinyruodhe obed mokwongo?’ (Mat. 6:31-33) Ka idwoko penjogo duto ni ee, mano nyiso ni igeno kuom Jehova kendo iikori ne tem moro amora minyalo romogo.​—Nge. 3:5, 6.

17. (a) Geno mar chier nyiso nade horuok mar Jehova? (b) Ere kaka wanyalo nyiso ni wamor gi horuok mar Jehova?

¹⁷ Jehova oseketo odiechieng’ sie kod sa mobiro kethoe piny marachni. (Mat. 24:36) Ok obi rikni timo mano ka pok kindeno ochopo. Ogombo chiero jomotho, kata kamano, pod ohore. (Ayub 14:14, 15) Orito nyaka kinde mowinjore ochopi e ka ochier jomotho. (Joh. 5:28) Nitie gik mang’eny momiyo onego wabed ma mor gi horuok mar Jehova. Par ane: Nikech Jehova hore, ji mang’eny, moriwo nyaka wan, waseyudo thuolo mar ‘loko chuywa waa e richo.’ (2 Pet. 3:9) Jehova dwaro ni ji mang’eny kaka nyalore oyud thuolo mar dak nyaka chieng’. Omiyo, wanyisuru ni wamor gi horuokne. E yo mane? Kuom timo kinda e manyo joma ‘chunygi ni kare ne ngima mochwere’ kendo konyogi mondo giher Jehova kendo gitine. (Tich 13:48) Mano biro miyo gin be giyud ber ma waseyudo nikech horuok mar Jehova.

18. Ang’o momiyo dwarore ni wahore gi jowetewa?

¹⁸ Jehova biro hore kodwa nyaka e giko loch Kristo mar higni aluf achiel, e ka wachop kama wan joma onge richo chuth. Sama pok kindeno ochopo, pod obiro dhi nyime weyonwa richowa. Kuom adier, wan gi gimomiyo onego waket pachwa kuom kido mabeyo ma jomamoko nigo kendo wahore kodgi. Par ane  ranyisi mar nyaminwa moro ma jaode nochako bedo gi tuo mar parruok mokalo tong’, kae to bang’e oweyo dhi e chokruok. Owacho kama: “Wachno ne litna. Gik moko duto ma ne wasechano ni ne wadhi timo kaka joot nolokore ataro.” Kata kamano, e kindeno duto, nyaminwano nohore gi jaode. Noketo geno kuom Jehova, kendo chunye ok nool. Mana kaka Jehova, noketo pache kuom kido mabeyo ma ne jaode nigo, to ok gik maricho ma notimo. Nyaminwano wacho kama: “Jaoda nigi kido mabeyo ahinya, kendo sani otemo kar nyalone mondo oduog e wang’e mosmos.” To mano kaka dwarore ni wahore gi joodwa kata jo kanyaklawa ma temo matek mondo ginyagre gi pek ma giromogo!

19. Ang’o monego wang’ad e chunywa?

¹⁹ Yesu gi malaike ne mor ahinya ka ne ochue piny. Parie kaka gibiro mor ahinya sama gibiro neno ka piny opong’ gi joma onge richo, joma ohero Jehova, kendo ma tiyone! Parie kaka Jokristo mowal ma koro biro locho gi Kristo e polo biro bedo ma mor sama gineno kaka tich ma gitimo kelo ne dhano modak e piny ber mogundho! (Fwe. 4:4, 9-11; 5:9, 10) Parie bende kaka ngima biro chalo ka koro pi wang’ ma ne wachueroga nikech rem, tuoche, kuyo, kod tho koro olokore mor lilo! (Fwe. 21:4) Sama warito guethgo duto, ng’ad e chunyi ni ibiro dhi nyime luwo ranyisi mar Jehova Wuonu ma jahera, ma riek, kendo ma hore. Kitimo kamano, ibiro siko kimor ma kata tembe olwori manade. (Jak. 1:2-4) To mano kaka wagoyo ne Jehova erokamano maduong’ kuom singo momiyowa niya: “Chier nobedie”!​—Tich 24:15.