1. Engvângin nge Jehova’n nunna neite chu a siam?

A TIRIN Jehova chu amah chauhvin a awm a. Nimahsela, mal nia inhriatna a nei lo. Ani chu kawng engkimah a famkim a ni. Pathian chuan nunna nei thil dang pawh awm se tih a duh a. Hmangaihna avângin Jehova chuan chûng nunna neite chu a siam ṭan a ni.—Sâm 36:9; 1 Joh. 4:19.

2. Engtin nge Isua leh vântirhkohte chuan Jehova thil siamte chu an ngaih?

² A hmasa berin, Jehova chuan a hnathawhpui tûr a siam a. Chu a Fa tîr hmangin finna nei thil siamte pawh tiamin, “engkim siam a ni a.” (Kol. 1:16) Isua chu a Pa nêna thawh dun theihna chanvo hlu a neih avângin a lâwm hle. (Thuf. 8:30) Chu bâkah, Pathian vântirhkohte pawhin lâwmna tûr chhan an nei a. Chûng vântirhkohte chuan Jehova leh a Mi Themthiam Isua’n lei leh vân an siam lai chu an hmu a ni. Engtin nge an chhân lêt? Leilung din a nih laiin “an au” va, Jehova kut chhuak hnuhnûng ber mihringte pawh tiamin, Jehova’n thil a siam zawh apiangin an au zawm zêl ang tih chu rinhlelh rual a ni lo. (Job. 38:7; Thuf. 8:31) Chûng thil siam tinte chuan Jehova hmangaihna leh finna an târ lang a ni.—Sâm 104:24; Rom 1:20.

3. Korinth thawn khat 15:21, 22-a târ lan angin, Isua tlanna inthawina chuan eng nge min neihtîr theih?

³ Jehova chuan mihring chhûngkua chu leilung mawi tak a siamah chuan chatuana nung tûrin a duh a. Mahse, hmangaihna nei tak an Pa laka Adama leh Evi an hel khân, sual leh thihna chuan lal angin leiah ro a rêl ta a ni. (Rom 5:12) Engtin nge Jehova’n a chhân lêt? Mihringte chhan chhuak tûrin hma a la  nghâl a ni. (Gen. 3:15) Sual leh thihna ata Adama leh Evi thlahte chhuah zalên theitu tûr tlanna chu buatsaih a tum ta a. Tichuan, a rawngbâwl thlangtu zawng zawngte hnênah chatuana nun theihna a pe a ni.—Joh. 3:16; Rom 6:23; 1 Korinth 15:21, 22 chhiar rawh.   

4. He thuziakah hian eng zawhnate nge kan ngaihtuahho vang?

⁴ Mitthite kaitho leh tûra Pathian thiltum chuan zawhna tam tak a tichhuak a. Entîr nân, thawhlehna chu engtin nge a thlen mai theih? Kan hmangaih thi tawhte an lo thawhleh hunah anni chu kan hre thei ang em? Eng kawngtein nge thawhlehna chuan hlimna min thlen ang? Engtin nge thawhlehna chungchâng ngaihtuahna chuan Jehova hmangaihna, finna, leh dawhtheihna avânga kan lâwmna chu a tihpun theih? Chûng zawhnate chu a mal malin i lo ngaihtuahho vang u.

5. Engvângin nge mite chu a rualin an rawn tho vek lo vang tia kan beisei theih?

⁵ Jehova’n a Fapa Isua hmanga mi maktaduai tam tak a kaihthawh hunah a ruala tho vek tûrin kan beisei tûr a ni lo. Engvângin nge? Leilunga mihringte pun thutna chuan buaina a thlen mai theih vâng a ni. Chu bâkah, Jehova chuan ruahmanna fel tak awm lo leh a buai zâwngin thil a ti ngai lo. Remna tluantling awm tûr chuan ruahmanna fel a awm a ngai tih a hria a. (1 Kor. 14:33) Mihringte a siam hmaa an chênna tûr leilung buatsaih tûra Isua nêna an thawh dun lai pawhin a fingin, a dawhthei hle a ni. Chutiang bawkin, Isua pawhin Kum Sâng Rorêl chhûngin Armageddon-a dam khawchhuakte nêna tho lehte chênna tûra leilung an buatsaih hunah chûng miziate chu a lantîr ang.

6. Tirhkohte 24:15-a sawi angin, Jehova kaihthawhte zîngah tute nge tel ang?

 ⁶ A pawimawh ber chu, Armageddon-a dam khawchhuakte chuan tho lehte chu Pathian Ram leh Jehova thil phûtte chungchâng an zirtîr a ngai ang. Engvângin nge? Tho leh a tam zâwk chu “mi fel lote” zînga mi an nih dâwn vâng a ni. (Tirhkohte 24:15 chhiar rawh.) Krista tlanna hlâwkpui tûr chuan inthlâk danglamna tam tak an siam a ngai ang. Jehova chanchin la hre lo mi maktaduai tam takte hnêna A chungchâng thutak zirtîrna hnain a ken telte chu han ngaihtuah teh. Tûn laia mite hnêna Bible zirna kan neihpui ang hian, mi tinin mi mala zirtîrna an dawng ang em? Chûng lo tho lehte chuan kohhran lawina bîk neiin, an hnua lo tho lehte chu an zirtîr lehchhâwng ang em? Chûngte hre tûr chuan kan nghah phawt a ngai a ni. Mahse, Krista Kum Sâng Rorêl tâwpah chuan, “leilung hi LALPA hriatnain a khat zo vek dâwn,” tih erawh kan hre chiang a ni. (Is. 11:9) Kum sângkhat chhûng chuan hnathawh tûr kan ngahin, kan va hlim dâwn tak êm!

7. Engvângin nge Pathian mite chuan tho lehte an zirtîr hunah lainatna an neih ang?

⁷ Krista Kum Sâng Rorêl chhûngin, Jehova lei lam fate chuan amah tilâwm tûra inthlâk danglamna an siam zawm zêl a ngai ang. Chuvângin, anni chuan sual tih châkna hneh tûr leh Jehova tehnate mila nung tûra tho lehte an ṭanpui laiin lainatna dik tak an nei ang. (1 Pet. 3:8) Chûng lo tho lehte chuan ‘mahni chhandamna thawk chhuaktu’ tûr ve tho, Jehova chhiahhlawh inngaitlâwm takte chu an ngaina ang tih rinhlelh rual a ni lo.—Phil. 2:12.

8. Engvângin nge mitthi tho leh hmuaktute chuan an hmangaih takte chu an hre thei ang tih beisei chu inâwm tak a nih?

⁸ Mitthi tho leh hmuaktute chuan an hmangaih takte chu an hre thei ang tih beiseina tûr chhan tam tak a awm a. Entîr nân, Bible-a chhinchhiah thawhlehnate ṭanchhanin, Jehova chuan tho lehte chu an thih hma lawka an hmêl lan dân, thusawi dân, leh ngaihtuah dân angin a kaitho leh dâwn tih kan beisei thei a ni. Isua’n mitthite chu muhîl nên a khaikhin avângin, thawhlehna chu muhîl kaihthawh ang a ni ang tih hre reng ang che. (Mt. 9:18, 24; Joh. 11:11-13) Muhîl tuemaw a rawn thawh leh hian, a mut dâwna a hmêl lan dân leh thusawi dân mai bâkah, a hriatna ngai bawk neiin a rawn tho leh a ni. Lazara chunga thilthleng hi han ngaihtuah teh. A thihna ni li lai a nih tawh avângin, a taksa chu a chhe ṭan tawh a. Mahse, Isua’n a kaihthawh khân a farnute’n an hre nghâl a, Lazara pawhin anni chu a hre chiang hle.—Joh. 11:38-44; 12:1, 2.

9. Engvângin nge mitthi tho lehte chu rilru leh taksa ṭha famkima an rawn thawh nghâl loh vang?

⁹ Jehova chuan Krista rorêlna hnuaia awm tu mahin: “Ka dam lo ve,” tia an sawi tawh loh tûr thu a tiam a. (Is. 33:24; Rom 6:7) Chuvângin, mitthi tho lehte chu hrisêlna ṭha neiin a rawn tho leh ang. Mahse, ṭha famkim erawh an ni nghâl lo vang. An ṭha famkim nghâl a nih chuan, an hmangaihte’n anmahni an hre thiam lo thei ang. Mi zawng zawng chu Krista Kum Sâng Rorêl hun chhûngin zawi zawiin an ṭha famkim chho dâwn niin a lang. Isua chuan kum sâng tâwpah chauh Lalram chu a Pa hnênah a pe kîr leh ang. Chutih hunah chuan, ṭhat famkimna dinhmuna mihringte hlân kai pawh tiamin, Lalram chuan a tih tûrte a hlen tawh ang.—1 Kor. 15:24-28; Thup. 20:1-3.

10. Engtin nge thawhlehna chuan a nghawng ang che?

¹⁰ Hmangaih takte lo hmuah chu engtiang nge a nih dâwn tih han mitthla teh. I hlimna  chuan a tinui dâwn che nge i mittui a titla dâwn? Jehova chunga i lâwm êm avângin amah chawimawiin hla i sa ang em? Thil pakhat chiang tak mai chu, thawhlehna thilpêk ropui tak avângin mite ngaihsaktu kan Pa leh mahni hmasial lo a Fapa chungah hmangaihna thûk tak kan nei ngei ang tih hi.

11. Johana 5:28, 29-a chhinchhiah Isua thusawi angin, Pathian tehna felte mila nungte chuan eng malsâwmna nge an dawn ang?

¹¹ Thihna ata tho lehte’n an mihring hlui hlîp thla a, Pathian tehna felte mila an nun huna an hlim dân tûr chu han mitthla teh. Chûng inthlâk danglamna siamtute chu Paradis-ah chatuanin an nung thei ang. Mahse, Jehova chuan inthlâk danglam duh lotute chu Paradis-a nun zawm zêl a phal lo vang.—Is. 65:20; Johana 5:28, 29 chhiar rawh.

12. Eng kawngin nge leia mi zawng zawngte chuan Jehova malsâwmna an dawn ang?

¹² Lalram rorêlna hnuaia awm Pathian chhiahhlawh zawng zawngte chuan: “LALPA malsâwmna chuan a tihausa ṭhîn a, lungngaihna a belhchhah ṭhîn lo,” tih Thufingte 10:22-na thu a dikzia an hmu ang. Jehova ṭanpuinain, thlarau lamah tihhausakin an awm ang, chu chu Krista anna an nei chho telh telhin, an ṭha famkim chho telh telh ang tihna a ni. (Joh. 13:15-17; Eph. 4:23, 24) Nî tinin an chak chho telh telh ang a, mi ṭha zâwk an ni bawk ang. Chutih huna nun chu a va hlimawm dâwn tak êm! (Job. 33:25) A nih leh, thawhlehna chungchâng chhût ngunna chuan engtin nge tûnah a ṭanpui theih che?

13. Sâm 139:1-4-na nêna inmilin, engtin nge thawhlehna chuan Jehova’n min hriat chianzia a târ lan?

¹³ Kan sawiho tawh angin, Jehova’n mitthite chu an thih hmaa an hriatnate leh an mize ngaite neiin a kaitho leh ang. Chumi awmzia chu han ngaihtuah teh. Jehova chuan a hmangaih êm che avângin, i ngaihtuah dân te, rilru vei zâwng te, thusawi dân te, leh thiltih dân zawng zawngte chu a chhinchhiah vek a. Chuvângin, kaihthawh a ngaih hunah, i hriatna te, rilru put hmang te, leh miziate chu awlsam takin a neihtîr leh thei ang che. Lal Davida chuan Jehova’n mi mal tin min ngaihsakzia chu a hria a. (Sâm 139:1-4 chhiar rawh.) Jehova’n min hriat chianzia hriatthiamna chuan eng kawngin nge tûnah min nghawng theih?

14. Jehova min hriat chianzia ngaihtuahna chuan eng kawngin nge min nghawng ang?

¹⁴ Jehova min hriat chian dân kan ngaihtuah hian, kan thlaphâng tûr a ni lo. Engvângin nge? Ani chuan min ngaihsak tak zet a, kan zaa min ngaihhlut ṭheuh bâkah, kan nun nghawngtu thiltawnte chu uluk taka a chhinchhiah vâng a ni. A va thlamuanthlâk tak êm! Engtik lai mahin mal niin kan inhre tûr a ni lo. Jehova chuan min awmpui reng a, min ṭanpuina tûr hun remchâng a zawng reng a ni.—2 Chro. 16:9.

15. Engtin nge thawhlehna chuan Jehova finzia a târ lan?

¹⁵ Thih hlauhna chu râlthuam hlauhawm tak a ni a. Setana thununna hnuaia awmte chuan mite chu an ṭhiante, a nih loh leh an rinna phatsantîr theih nân chu râlthuam chu an hmang a. Mahse, chu râlthuam chuan kan chungah thiltihtheihna a nei lo. Kan hmêlmate’n min tihlum a nih pawhin, Jehova’n min kaitho leh ang tih kan hria a. (Thup. 2:10) Jehova nêna kan inlaichînna tichhe tûrin tih theih engmah an nei lo tih kan ring tlat a ni. (Rom 8:35-39) Thawhleh beiseina chuan Jehova finzia a va tilang chiang tak êm! Chu thawhlehna hmanga Setana râlthuam thiltithei ber zînga pakhat chu hman tlâk lohva a chantîr rualin, tihchhiat rual loh huaisenna min neihtîr bawk a ni.

16. Eng zawhnate nge kan inzawh ngai a, a chhânnate aṭangin Jehova kan rinchhanzia engtin nge kan hriat theih?

 ¹⁶ Jehova hmêlmate’n tihhlum tuma an vau che a nih chuan, Jehova tân inhuam takin i nun i chân ngam ang em? I chân ngam ang tih engtin nge i hriat theih? Hriat theih dân kawng khat chu, ‘Nî tina ka thu tlûkna siamte hian Jehova ka rinchhanzia a târ lang em?’ tia inzawh hi a ni. (Lk. 16:10) Zawhna dang leh chu, ‘Pathian ram ka zawng hmasa a nih chuan, ka mamawhte min ngaihsak tûra Jehova thutiamte chu ka ring tih ka nun dân hian a târ lang em?’ tih hi a ni thei ang. (Mt. 6:31-33) Chûng zawhna pahnih chu ‘Aw’ tia kan chhâng a nih chuan, Jehova kan rinchhanzia kan lantîr tihna a ni ang a, kan hmachhawn tûr eng fiahna atân pawh kan inbuatsaih tihna a ni bawk ang.—Thuf. 3:5, 6.

17. (a) Thawhlehna chuan Jehova dawhtheihna chu engtin nge a târ lan? (b) Jehova dawhtheihna chu kan ngaihlu tih engtin nge kan lantîr theih?

¹⁷ Jehova chuan he khawvêl suaksual tak a tihtâwpna tûr hun leh nî chu a ruat tawh a. (Mt. 24:36) Chumi hun a thlen hma chu dawhtheihna lantîrin hma a la rih lo vang. Mitthite kaihthawh chu a châk hle a; mahse, dawhtheihna a lantîr a ni. (Job. 14:14, 15) Chûng mite kaitho tûra a hun ruat a thlen hma chu a nghâk rih a ni. (Joh. 5:28) Jehova’n dawhtheihna a lantîr avângin lâwmna tûr chhan ṭha kan nei a. Han ngaihtuah teh: Dawhtheihna a lantîr avângin, keimahni pawh tiamin, mi tam tak chuan ‘simna’ hun remchâng an nei a. (2 Pet. 3:9) Mi a tam thei ang berin chatuan nunna an neih chu a duh a ni. Chuvângin, dawhtheihna a lantîr avânga kan lâwmzia i lantîr ang u. Engtin nge kan lantîr ang? “Chatuana nun duhna rilru dik tak” pute chu ṭhahnemngai taka zawngin leh Jehova hmangaih tûr leh a rawngbâwl tûra ṭanpuina hmangin kan lantîr thei a ni. (Tirh. 13:48, NW) Chutianga kan tih chuan, anni pawhin Jehova dawhtheihna chu an hlâwkpui ve thei ang.

18. Engvângin nge mi dangte chunga dawhtheihna kan lantîr ang?

¹⁸ Jehova chuan ṭha famkim kan nih theih nân kum sângkhat chhûng dawhthei takin a nghâk rih ang. Chumi hun a thlen hma chuan kan sualte ngaihdam chu a inpeih reng bawk. Chutiang a nih chuan, keini pawhin mi dangte ṭhatna lai zawn a, an chunga dawhtheihna lantîrna tûr chhan kan nei tih a chiang a ni. Unaunu thiltawn hi han ngaihtuah teh, a pasal chuan lungkhamna nasa tak a neih avângin inkhâwmte  a bânsan ṭan a. Unaunu chuan: “Ka tân tawrh hrehawm tak a ni a. Chhûngkua anga kan thiltumte chu a chhe zo vek a ni,” tiin a sawi. Mahse, chutih hun chhûng zawng chuan, hmangaihna nei tak kan unaunu chuan a pasal chungah dawhtheihna a lantîr a. Jehova a rinchhan tlat avângin a beidawng ngai lo. Jehova angin, hun kal tawha harsatnate ni lovin, a pasal ṭhatna laite chu a ngaihven tlat zâwk a. Ani chuan, “Ka pasal hian mize ṭha tak tak a nei a, a lungkhamnate hneh thei tûrin theih tâwp a chhuah a ni,” tiin a sawi. Dinhmun harsa takte chingfel tûra theih tâwp chhuahtu kan chhûngte, a nih loh leh kohhrana unaute chunga dawhtheihna lantîr chu a va pawimawh tak êm!

19. Eng tih nge kan tum tlat ang?

¹⁹ Isua leh vântirhkohte chu leilung siam a nih ṭan khân an hlim hle a. Jehova an hmangaih avânga a rawngbâwltu mi ṭha famkimte’n leilung an luah khat an hmuh huna an hlim dân tûr chu han mitthla teh. Krista nêna vâna rorêl tûra lei ata tlante chuan an hnathawh chu mihringte’n an hlâwkpui tih an hmuh huna an hlim dân tûr pawh han mitthla bawk teh. (Thup. 4:4, 9-11; 5:9, 10) Lungngaihna mittui chu hlimna mittuia thlâk a nih a, natna te, hrehawmna te, leh thihna meuh pawh chatuana a awm tawh lo huna nun nawm dân tûr pawh han mitthla teh. (Thup. 21:4) Chumi hun a thlen hma chuan, hmangaihna, finna, leh dawhtheihna nei tak kan Pa chu entawn i tum tlat ang u. Chutianga kan tih chuan, eng ang fiahna pawh tâwk mah ila, hlimna kan nei reng thei ang. (Jak. 1:2-4) “Thawhlehna a awm ang,” tih Jehova thutiam avângin kan va lâwm tak êm!—Tirh. 24:15.