1. Kifer Zeova inn kree tou kitsoz?

O-KOUMANSMAN, Zeova ti tousel. Me Li pa ti santi Li tousel. Zeova pa bizin personn pou ki Li ere. Kanmem sa, Zeova ti anvi ki lezot osi viv ek ki zot ere. Alor, dan so lamour, Zeova inn koumans kree tou kitsoz.​—Ps. 36:9; 1 Zan 4:19.

2. Ki Zezi ek bann anz ti resanti kan Zeova ti kree tou kitsoz?

² Pou koumanse, Zeova ti kree so Garson, Zezi. Lerla, ansam avek so Garson, Zeova inn kree “tou seki existe dan lesiel e lor later,” parmi ena bann anz. (Kol. 1:16) Zezi ti bien kontan travay avek so Papa. (Prov. 8:30) Bann anz osi ti ena boukou rezon pou zot zwaye. Zot ti la kan Zeova ek Zezi ti fer lesiel ek later. Kouma zot ti montre ki zot zwaye? Kan later ti forme, bann anz ti kriye ansam dan lazwa. Ek zot ti kontign loue Bondie kan zot ti trouv Zeova kree tou bann lezot kitsoz, sirtou bann imin. (Zob 38:7; Prov. 8:31, not.) Dan sak kreasion Zeova, nou trouv so lamour ek so sazes.​—Ps. 104:24; Rom. 1:20.

3. Dapre 1 Korintien 15:21, 22, ki kitsoz bann dimounn kapav gagne gras-a sakrifis Zezi?

³ Zeova ti anvi ki bann dimounn viv pou touletan lor sa zoli planet ki Li ti kree la. Me kan Adan ek Ev ti rebel kont Zeova, pese ek lamor ti rant dan lemond. (Rom. 5:12) Kouma Zeova ti reazir? Deswit, Li ti pran bann dispozision pou sov bann imin. (Zen. 3:15) Zeova ti prevwar pou donn so Garson an sakrifis, pou ki bann desandan Adan ek Ev libere ar pese ek lamor. Lerla, Zeova ti pou kapav  donn lavi eternel tou bann dimounn ki swazir pou servi Li.​—Zan 3:16; Rom. 6:23; lir 1 Korintien 15:21, 22.

4. Ki kestion nou pou examine dan sa lartik-la?

⁴ Ena boukou kestion ki nou kapav poz noumem konsernan rezireksion. Par exanp, ki pou arive kan pou ena rezireksion? Eski nou pou rekonet bann ki pou resisite? Kouma rezireksion pou rann nou zwaye? Ek kouma rezireksion montre lamour, sazes, ek pasians Zeova? Anou examinn sa bann kestion-la.

5. Kifer nou kapav dir ki tou bann dimounn pa pou resisite anmemtan?

⁵ Gras-a so Garson, Zeova pou resisit bann milyon dimounn, me kitfwa Li pa pou resisit zot tou anmemtan. Kifer nou dir sa? Parski si popilasion later ogmante enn kout koumsa, sa pou fer dezord. Ek Zeova pa fer nanye an dezord. Li kone ki, pou ki ena lape, bizin ena lord. (1 Kor. 14:33, NW) Zeova ti ena sazes ek pasians kan Li ek Zezi ti prepar later pou ki bann dimounn viv lor la. Alor, pandan Regn Mil An, nou kapav sir ki Zezi pou manifeste sa de kalite-la kan li pou prepar later pou bann ki pou resisite ansam avek bann dimounn ki pou travers Armagedon.

6. Dapre Zistwar Bann Apot 24:15, kisannla pou form parti bann ki pou resisite?

⁶ Me pou ena enn travay pli inportan ankor pou fer. Bann ki pou travers Armagedon pou bizin ansegn bann ki pou resisite konsernan Rwayom Bondie ek bann instriksion Zeova. Kifer? Parski mazorite dimounn ki pou resisite pou form parti enn group ki Labib apel “bann move.” (Lir Zistwar Bann  Apot 24:15.) Zot pou bizin fer boukou sanzman pou zot kapav gagn bann benediksion gras-a sakrifis Zezi. Mazine kouma sa pou enn gro travay pou ansegn laverite lor Bondie ar bann milyon dimounn ki pa konn nanye lor Li! Eski sak dimounn pou gagn enn kikenn pou etidie avek li, parey kouma nou fer azordi? Eski zot pou form parti bann lasanble, ek eski zot pou gagn bann formasion pou ansegn bann ki pou resisite apre? Nou pa kone. Parkont, nou kone ki alafin Regn Mil An Zezi Kris, “later pou ranpli avek konesans Zeova.” (Iza. 11:9) Wi, pandan Regn Mil An, nou pou ena boukou zoli travay pou fer!

7. Kifer bann serviter Zeova pou bizin ena konpasion kan zot pou ansegn bann ki pou resisite?

⁷ Pandan Regn Mil An Zezi Kris, tou bann serviter Zeova pou bizin kontign fer bann sanzman pou fer Li plezir. Avek konpasion, zot pou osi ed bann ki pou resisite pou lit kont zot bann move panse ek zot bann move dezir, ek pou viv an-akor avek bann prinsip Zeova. (1 Pier 3:8) Bann ki pou resisite pou trouve ki bann serviter Zeova ena limilite ek ki zot ankor pe fer bann sanzman pou fer Zeova plezir, ek sa pou pous zot pou ador Zeova ansam ar bannla.​—Fil. 2:12.

8. Kifer nou kapav dir ki nou pou rekonet nou bann fami ek nou bann kamarad ki pou resisite?

⁸ Ena plizir rezon kifer nou panse ki nou pou rekonet nou bann fami ek nou bann kamarad ki pou resisite. Parey kouma Zeova ti resisit bann dimounn dan lepase, nou kapav atann ki Li pou re-kree bann dimounn pou ki zot pans, zot koz, ek zot resanble parey kouma zot ti ete avan zot mor. Nou rapel ki Zezi ti konpar lamor ar somey, ek li ti konpar enn kikenn ki resisite ar enn kikenn ki fek lev dormi. (Mat. 9:18, 24; Zan 11:11-13) Kan enn kikenn fek lev dormi, li parey kouma li ti ete avan ki li al dormi, ek li ena bann mem souvenir. Par exanp, Lazar ti mor depi kat zour ek so lekor ti pe deza koumans pouri. Me kan Zezi ti resisit li, deswit so bann ser ti rekonet li, ek Lazar ti rapel zot.​—Zan 11:38-44; 12:1, 2.

9. Kifer bann ki pou resisite pa pou gagn enn lekor ek enn lespri ki parfe toutswit?

⁹ Zeova inn promet ki, dan Paradi, personn pa pou dir: “Mo malad.” (Iza. 33:24; Rom. 6:7) Alor, bann dimounn ki pou resisite pou ena enn lekor an bonn sante. Selman, zot pa pou vinn parfe deswit. Sinon, kitfwa zot bann fami ek zot bann kamarad pa pou rekonet zot. Pandan Regn Mil An Zezi Kris, li paret ki bann dimounn pou vinn parfe tigit-tigit. Alafin Regn Mil An, Zezi pou re-met Rwayom dan lame so Papa. Lerla, Rwayom Bondie pou’nn akonpli so mision ek bann imin pou’nn vinn parfe.​—1 Kor. 15:24-28; Rev. 20:1-3.

10. Ki to pou resanti kan bann dimounn pou resisite?

¹⁰ Sey mazine kouma sa pou ete kan to pou akeyir to bann fami ek to bann kamarad ki pou resisite. Eski to pou plore ouswa to pou riye, telman to zwaye? Eski to pou sant bann sante pou loue Zeova? Enn kitsoz to kapav sir, se ki to pou resanti enn gran lamour pou to Papa Zeova ek so Garson pou sa zoli kado  ki zot inn donn twa la, setadir rezireksion.

11. Dapre Zan 5:28, 29, ki pou ariv bann dimounn ki obeir Bondie?

¹¹ Sey mazinn lazwa ki bann dimounn ki pou resisite pou gagne kan zot pou sanz zot personalite ek obeir Bondie! Bann ki fer sa bann sanzman-la pou kapav viv pou touletan dan Paradi. Parkont, Zeova pa pou les bann dimounn ki rebel kont Li afekte lape ki pou ena dan Paradi.​—Iza. 65:20; lir Zan 5:28, 29.

12. Kouma Zeova pou beni bann imin?

¹² Kan Rwayom Bondie pou diriz later, tou bann serviter Bondie pou trouve ki Proverb 10:22 li vre. Sa verse-la dir: “Se benediksion Zeova ki fer enn kikenn vinn ris, ek Li pa azout okenn douler avek sa.” Gras-a lespri sin Zeova, pep Bondie pou kapav imit bann kalite ek personalite Zezi pli bien, ek zot pou vinn parfe. (Zan 13:15-17; Efe. 4:23, 24, NW) Sak zour, zot lasante, ek zot personalite pou vinn pli bon. Sa lepok-la, lavi pou extra zoli! (Zob 33:25) Asterla, anou reponn sa kestion-la: Kouma rezireksion montre lamour, sazes, ek pasians Zeova?

13. Kouma Psom 139:1-4 montre ki Zeova konn nou bien, ek kouma rezireksion pou montre sa?

¹³ Kouma nou’nn gete avan, kan Zeova pou resisit bann dimounn, zot pou ena mem personalite ek mem souvenir ki zot ti ena avan zot lamor. Reflesi lor seki sa inplike: Zeova telman kontan twa ki Li remark ek rapel tou to bann panse, to bann santiman, seki to dir, ek seki to fer. Ek lerla, si Li pou bizin resisit twa, fasilman Li pou kapav resisit twa parey kouma to ti ete avan. Lerwa David ti kone ki Zeova konn bien sakenn parmi nou. (Lir Psom 139:1-4.) Kan to kone ki Zeova konn twa sa kantite-la, ki to resanti?

14. Ki nou resanti kan nou reflesi lor kantite ki Zeova konn nou?

¹⁴ Eski nou bizin trakase ki Zeova konn nou sa kantite-la? Non. Kifer? Parski Zeova gagn nou traka, ek Li pa konsantre Li lor nou bann erer. Sakenn parmi nou ena valer devan so lizie. Li rapel tou bann kitsoz ki finn inflians nou dan nou lavi. Sa vremem rasir nou! Fode zame nou panse ki nou tousel. Sak zour, sak minit, Zeova akote ar nou ek Li rod bann lokazion pou ed nou.​—2 Kro. 16:9.

15. Kouma rezireksion montre nou sazes Zeova?

¹⁵ Kan bann dimounn gagn per lamor, zot bann lennmi kapav servi sa laper-la pou fors zot fer bann kitsoz ki zot pa ti pou fer normalman. Nou bann lennmi kapav servi sa laper-la pou fors nou pou trayir nou bann kamarad ouswa pou fer bann move kitsoz. Me sa bann menas-la pa marse ar nou. Nou kone ki si nou bann lennmi touy nou, Zeova pou redonn nou lavi. (Rev. 2:10) Ninport ki kitsoz zot fer nou, nou sir ki zot pa pou kapav fer nou aret servi Zeova. (Rom. 8:35-39) Lesperans rezireksion vremem montre nou sazes Zeova, pa vre! Lesperans rezireksion donn nou kouraz pou res fidel ar Zeova ek pou pa per kan bann lennmi menas pou touy nou.

16. Ki bann kestion to kapav poz tomem, ek kouma to bann repons pou ed twa pou kone si to ena konfians an Zeova?

¹⁶ Si bann lennmi menas pou touy twa,  eski to ena konfians ki Zeova pou resisit twa? Kouma to kapav kone si to pou ena konfians an Zeova dan sa moman-la? To kapav demann tomem, ‘Dan mo lavi toulezour, eski mem dan mo bann ti desizion mo montre ki mo ena konfians an Zeova?’ (Lik 16:10) Zeova promet ki Li pou pran twa swin si to met so Rwayom an premie. Alor, to kapav osi demann tomem, ‘Dan fason ki mo servi mo letan ek mo larzan, eski mo montre ki mo ena konfians dan sa promes-la?’ (Mat. 6:31-33) Si to reponn wi pou sa de kestion-la, sa montre ki to ena konfians an Zeova ek ki to pre pou fer fas ar ninport ki difikilte ki kapav arive.​—Prov. 3:5, 6.

17. (a) Kouma rezireksion montre nou pasians Zeova? (b) Kouma nou kapav montre nou rekonesans anver Zeova pou so pasians?

¹⁷ Zeova inn fini deside ki zour ek ki ler Li pou detrir sa move lemond-la. (Mat. 24:36) Li pa pou perdi pasians ek azir avan ler. Li ena enn gran dezir pou resisit bann mor, me Li ena pasians. (Zob 14:14, 15) Li pe atann bon moman pou Li resisit zot. (Zan 5:28) Nou ena bann bon rezon pou nou rekonesan anver Zeova pou so pasians. Reflesi lor la: Gras-a pasians Zeova, boukou dimounn inn gagn letan pou “repanti,” ek parmi zot, ena nou osi. (2 Pier 3:9) Zeova anvi ki pli boukou dimounn posib gagn lavi eternel. Alor, anou montre ki nou rekonesan anver Zeova pou so pasians. Kouma nou kapav fer sa? Se kan nou fer nou maximum pou rod bann dimounn ki ena enn “bon kondision leker pou gagn lavi eternel” ek nou ed zot pou kontan Zeova ek servi Li. (Zist. 13:48, NW) Lerla, parey kouma nou, zot osi zot pou kapav gagn bann bienfe gras-a pasians Zeova.

18. Kifer nou bizin ena pasians anver lezot?

¹⁸ Avek pasians, Zeova pou atann ziska lafin Regn Mil An Zezi pou nou vinn parfe. Me ziska ki sa arive, Li dispoze pou pardonn nou bann pese. Alor, nou bizin swiv lexanp Zeova ek rod bann zoli kalite ki lezot ena. Nou bizin osi ena pasians anver zot. Anou get lexanp enn ser. So misie ti gagn bann kriz langwas ek li ti aret al renion. Ser-la dir: “Sa ti bien difisil pou mwa. Tou bann proze ki nou ti ena pou nou fami ti tom dan dilo.” Me sa  ser-la ti kontan so misie ek li ti kontign ena pasians. Li ti kont lor Zeova ek li ti kontign ed so misie. Parey kouma Zeova, li ti res konsantre lor bann zoli kalite ki so mari ena. Li dir: “Mo mari ena bann zoli kalite ek tigit par tigit, li pe fer so maximum pou sirmont so bann langwas.” Li bien inportan ki nou ena pasians anver nou fami ek nou bann frer ek ser dan nou lasanble ki pe fer zefor pou sirmont zot bann difikilte.

19. Ki nou bizin bien deside pou fer?

¹⁹ Zezi ek bann anz ti bien zwaye kan Zeova ti kree later. Me mazine ki kantite zot pou zwaye kan later pou ranpli ar dimounn parfe, ki kontan ek ki servi Zeova! Anplis, bann ki pou regn ansam avek Zezi dan lesiel, pou extra zwaye kan zot pou trouv bann imin ki lor later pe gagn bann bienfe gras-a zot travay. (Rev. 4:4, 9-11; 5:9, 10) Mazine kouma lavi pou ete kan bann larm lazwa pou ranplas bann larm soufrans, ek kan maladi, tristes, ek lamor pou disparet net! (Rev. 21:4) Ziska ki sa zour-la arive, anou bien deside pou imit lamour, sazes, ek pasians nou Papa. Si nou fer sa, nou pou res zwaye malgre ninport ki difikilte nou fer fas. (Zak 1:2-4) Nou bien rekonesan anver Zeova ki promet nou “ki pou ena rezireksion”!​—Zist. 24:15.