1. Mwahaya bwaddi Yehova adhe aapaddusege athu?

OHUKALAWO mudhidhi Yehova aliye yeeka. Mbwenye oliye kaasegedheye mwaha okala yeeka, mwaha wi oliye dowakwanela. Podi dhigalive ndo, Yehova oofuna wi athu amodha ekalewo ni ekanne ohagalala. Vano mwaha wa odhivela, Yehova wambela wapaddusa athu amodha. — Sal. 36:9; 1 João 4:19.

2. Yesu naangero yaali avi numoona Yehova apaddusaga dhithu?

² Voobajha, Yehova ompaddusa mwanaye Yesu wihina elabege vamodha. Wodhela Yesu ‘dhihipaddusiwa dhithu dhimodha’, muwari mwa dhithu dhendha ehipaddusiwa matxikwi ni matxikwi aangero. (Col. 1:16) Yesu ahihagalala vanlubale mwaha olaba naababe. (Pro. 8:30) Dhahikalawo dhithu dhaahagalaliha angero. Aliwa yahimona Yehova ni mwanaye Yesu namalaba a thotho epaddusaga elabo yodhulu ni elabo yavati. Angero nuwona yerile ddi? Elabo yodhulu ni elabo yavati epaddusiwaga aliwa ‘yokuwa yobaga mada’, mohanganyedha aliwa yowera ndo kadda ethu Yehova amarihiye opaddusa. Angero yahihagalala yamoniliwa Yehova ampaddusaga muthu. (Jó 38:7; Pro. 8:31, nota.) Kadda yopaddusa yatonyihedha odhivela ni thotho dha Yehova. — Sal. 104:24; Rom. 1:20.

3. Ninga munawogela 1 Coríntios 15:21, 22, mukutho erilena Yesu onnadhana mareeliho baani?

³ Yehova afunile wi athu ekalege malabo matene mwilaboni yavati. Teto Adawu ni Eva omurugunuwela Babiwa oodhivela, mwaha wa yeyo athu atene ovalihiwa yothega ni okwaga. (Rom. 5:12) Ki nuwindo, Yehova erile ddi? Vano yothega egavolowe mwilaboni oliye owoga ethu afuniye werana wihina awobole athu muuthegani. (Gén. 3:15) Oliye ere onvaha mwanaye Yesu ninga yowobola, mwaha wa yeyo, ahima a Adawu ni Eva yere woboliwa muuthegani ni muukwani. Kadda muthu ere okanna oneti wosakula omulabela Yehova ni wakela egumi  yahinamala. — João 3:16; Rom. 6:23; Omwileri 1 Coríntios 15:21, 22.

4. Yohudhera ela nnawakule makoho baani?

⁴ Mpaganyo wovenyihiwa muukwani onodhana makoho owinjhiva. Motajhiha, dhinandeye addi athu ovenyihiwa muukwani? Nnere owedha wanona amudhihu ni akwihu yavenyihiwa muukwani? Ohagalala baani nnakanihuna athu yavenyihiwa muukwani? Ovenyihiwa muukwani winanihudhiha ddi wodhela odhivela, thotho ni ovilela wa Yehova? Nnere wawaakula makoho ala.

5. Mwahaya bwaddi nigawogaga wi ovenyihiwa muukwani onereye vang’no-vang’ono ni makalelo owegeredheya?

⁵ Yehova anere omulabihedha mwanaye wihina aavenyihe muukwani matxikwi ni matxikwi aathu. Mbwenye iyo podi owoga wi anookwa kinavenyihiwe atene mudhidhi emodhave. Mwahaya bwaddi nigawoga ndo? Mwahaya bowi, athu atene yinjhivana mudhidhi emodhave mwilaboni, kawinaakale wiwanana. Teto Yehova kannerana dhithu kwangwanya-kwangwanya. Oliye ohunona wihina okalevo murenddele dhinohoweleya dhithudha dhikale dhowiwanana. (1 Cor. 14:33) Mudhidhi alabaga ni Yesu, epaddusaga elabo yodhulu ni yavati, Yehova aali a thotho ni oovilela, ni ahinathi wapaddusa athu, oliye oopaddusa elabo yavati vang’no-vang’no. Yesu anere watajhiha ababe aalabaga naale enaavulusiwe vakoddoni ya Armajedo wihina yegeredhe elabo yavati wi yawakele ale enaavenyihiwe.

6. Ninga munawogela Atos 24:15, anaavenyihiwe muukwani baani?

⁶ Ale enaavulusiwe va Armajedo enere werana dhithu dhathima: Aliwa enere wahudhiha ale enaavenyihiwe muukwani dhithu wodhela Omwene wa Mulugu ni malamulo  aye. Mwahaya bwaddi eyo enakale ethu yofuneya? Mwahaya bowi, athu enaavenyihiwe muukwani, owinjhiva baale ‘ohogowa murima.’ (Omwileri Atos 24:15.) Ala ohogowa murima enere ohowela osaddula egumiwa wihina yakele mareeliho enadhela mwaha wa mukutho erilena Kiristu. Wubuwele mabasa enakalewo owahudhiha matxikwi ni matxikwi aathu ehimunonne Yehova. Ki vano, kadda muthu anaavenyihiwe anere okanna muthu anaamuhudhihege ninga enapadduwa peeno? Ale enaavenyihiwe enerege othomeliwa mulogo ni ohudhihiwa wihina yahudhihege athu amodha enavenyihiwege? Kannonile. Ethu nnonilihu sowi, omagomihedho wonamathonga wa Kiristu wa yaka 1 000 ‘mwilaboni munere odhala enonelo ya Yehova.’ (Isa. 11:9) Nnere okanna mabasa owinjhiva muwari mwa yaka 1 000, mbwenye mabasaya enakale oohagalaliha.

7. Mwahaya bwaddi mulogo wa Mulugu enerege waweddela thagaraga yahudhihaga ale enaavenyihiwe muukwani?

⁷ Muwari mwa yaka 1 000 wa onamathonga wa Kiristu, adhari a Yehova velaboni yavati enere ohowela osaddulagave egumiwa wihina emudhivelihege oliye. Mwaha wa yeyo, atene enerege waweddela thagaraga ale enasuzehegiwa, mwaha wi ehinona wihina kahi yokweya osaddula egumi, ohiya werana dhithu dhabure, weragana ndhe dhinamudhivela Yehova. (1 Ped. 3:8) Mohanganyedha ale enaavenyihiwe muukwani enere okanna efunelo yokala epaddi ya mulogo wa Yehova, eniilebihedhege ‘osayela makalelo owivulusa.’ — Fil. 2:12.

8. Mwahaya bwaddi nigawogaga wi anookwa yavenyihiwa amudhiwa enerege owedha wanona?

⁸ Mwaha wa dhithu dhohiyana-hiyana iyo podi owoga wihina, nnerege owedha wanona amudhihu ni akwihu enaavenyihiwe muukwani. Nubuwelaga ovenyihiwa muukwani Yehova eriliyena mundduli, enakala ninga Yehova anere wavenyiha athu ni ekalelo emodhave yanniwana mudhidhi ehinakwe, obe nere, enaavenyihiwe ni mwili, mawogelo ni mubuwelo mmodhave. Wubuwele wi Yesu aliganihe okwa ninga ogona, ovenyihiwa muukwani ninga ovenyihiwa mukoveni. (Mat. 9:18, 24; João 11:11-13) Muthu anagona avenyihiwa oliye anakala mmodhave ninga aaliye ahinagonelevo. Kovaye ni yubuwelo yaye enakala emodhave. Kamubuwele Lazaru, oliye aali ookwene ofiyedha malabo mannayi, ni mwili waye wahiroma ovudda. Mbwenye Yesu nuunvenyiha muukwani, arogoliye yahiwedha omunona logo-logo, teto oliye owawubuwela aliwa. — João 11:38-44; 12:1, 2.

9. Mwahaya bwaddi anookwa kinavenyihewege egali ologomanene?

⁹ Yehova ohuwoga wi mparayizu kavo anerege ‘Miyo gili muredda’. (Isa. 33:24; Rom. 6:7) Mowindo athu enavenyihiwege ni mwili wapama. Mbwenye aliwa kinavenyihiwe egali ologomanene. Yahere evenyihiwa ologomanene, podi wera we kuwande wanona amudhawo ni akwawo onadhiveliwa. Muwari wa onamathonga wa yaka txikwi wa Kiristu, podi wera athu binakaliwa vang’ono vang’ono ologomana. Vano omakuthulo wa yaka txikwi Yesu anere wawelihedha Omwene ababe. Mudhidhi yoyo onamathonga onerege ogakwanelihe dhithu dhafuneya, ni ogathukulele athu okala ologomana. — 1 Cor. 15:24-28; Apo. 20:1-3.

10. Ovenyihiwa muukwani winuuhiya ni makalelo baani?

¹⁰ Wubuwele ohagalala onakanniwena mwaha omwaakela mmudhaawo obe mukwawo  onamudhiveliwe avenyihiwa muukwani. We onere wunla obe onere oteya mwaha ohagalala? Onere wiba wihina omutamalele Yehova? Okanne ebaribari wi: ovenyihiwa muukwani winere wuthukulela wunuwiha odhivela onniwena ni Yehova vamodha ni Yesu. Dhahere dhihikala thagaraga dhewa ni opama wewa, kanakanne oneti yola wowawakela akwihu evenyihiwaga muukwani!

11. Ninga awogile Yesu va João 5:28, 29, enaapadduwe ddi ni ale enaasakule ohara malamulo owogowa a Mulugu?

¹¹ Wubuwele ohagalala enakanne ale enaavenyihiwe muukwani mwaha ohiya mweddelo wa wale vang’ono vang’ono ni ethukulaga mweddelo muxa wapama oniwanana ni efunelo ya Mulugu! Ale enaasaddule egumiwa mowiwanana ni efunelo ya Mulugu enere ovenyihiwa wihina ekanne egumi yahinamala. Teto ale ehinafune osaddula egumiwa ninga Yehova anafuniye kinavolowe mparayizu. — Isa. 65:20; omwileri João 5:28, 29.

12. Yehova anaarelihe addi athu enafuna okalaga velaboni yavati?

¹² Omwene wabajha othonga, nlogo na Mulugu nnere orumedha ele anawoga Provérbios 10:22: ‘Bi mareeliho a Yehova enadhana orela ni kinuwenjhedhedha makathamiho.’ Nnikavihero na muzimu wotxena adhari a Mulugu enere orela epaddi yomuzimuni, obe nere, aliwa enere okala ninga Kiristu mwaha wi enakale oologomana. (João 13:15-17; Efé. 4:23, 24) Kadda labo mwili wewa onerege okala wapamene aliwa enere okala athu apama. Egumi enere okala yohagalasa. (Jó 33:25) Ki peno wubuwelela muselu wovenyihiwa muukwani onere onikavihera?

13. Ninga munawogela Salmo 139:1-4 ovenyihiwa muukwani winoniha addi wi Yehova ohumunona kadda muthu wa iyo?

¹³ Ninga nihudherihu mundduli, Yehova, anere onvenyiha muthu muukwani, ni mubuwelo ni ekalelo emodhave anniyena ahinathi okwa. Kubuwela muselu yola, Yehova anowuudhivela, bumwahaya avedaga mudhidhi wi anone onubuweliwe, onawogiwe ni oneriwe, Yehova onowanda wubuwela dhatedhene. Yahere ninga Yehova uvenyiha we muukwani oliye ere wanda wuvenyiha ni mubuwelo wawo, dhowera dhawo, kove yawo ni emuthu yawo mwamakalelo okweya. Mwene Davidi ahinona wi Yehova onoompwatha kadda muthu wa iyo. (Omwileri Salmo 139:1-4.) Nnahudheravo ddi mwaha Yehova omunona kadda muthu wa iyo pamadhene?

14. Mwahaya bwaddi sapama wubuwela wi Yehova ohunnona pamadhene?

¹⁴ Wubuwela wi Yehova ohunnona pamadhene winonikavihera okala opwaseyene. Ni makalelo baani? Onone wi Yehova onowupwatha. Oliye onodhiveliwa makalelo awo owubuwela enuweriha okala muthu athima vamentoni vaye. Yehova onowoona dhithu dhinapadduwa mwigumini mwawo dhinuweriha we okala owikomeene. Sapama onona eyo kunoonelamo? Bu mwahaya kinahoweleya wikubanyaga ninga oli weka. Eneriha, mudhidhi watene Yehova ali ni we avedaga makalelo owuukavihera. — 2 Cró. 16:9.

15. Njhehedho novenyihiwa muukwani ononiha addi wi Yehova da thotho?

¹⁵ Woova okwa podi okala murako munlubale. Athu enathongiwa ni Saddana enolabihedha woova okwa wihina yawopopihe akwiwa ohiya ndhe dhinarumedhiwa. Mbwenye iyo kannathuwathuwa ni dhothusa ndha. Nihinona wi amwiddanihu yanipa Yehova anere onivenyiha muukwani. (Apo. 2:10) Iyo nihikanna ebaribari wi aliwa kinaagujhule wandana wehu ni Yehova. (Rom. 8:35-39) Sapama Yehova okala athotho ni  onivaha njhehedho novenyihiwa muukwani. Mwaha wa njhehedho novenyihiwa muukwani Yehova onoogonjhiha murako munlubale wa saddana. Teto mwaha wa ovenyihiwa muukwani nnokanna kopolo yowiyakihedha nuuliba murima.

16. Makoho baani enahoweleya wikoha, ki dhowakula dhawo dhinukavihere onona ethu baani?

¹⁶ Amwiddani a Yehova yuthusa wi enere wupa onere ddi? Onere omuroromela Yehova ni mpaganyo waye wowuvenyiha muukwani? Makalelo onona akala ohukanna nroromelo ni Mulugu fuwikoha: ‘Dhothoma dhaaga wa dhithu dhing’ono ginowoniha wi ginomuroromela Yehova?’ (Lucas 16:10) Nikoho nimodha podi okala nna, ‘Mwigumini mwaga ginowoniha wi gahela mburo woroma omwene wa Yehova oliye anere ogivaha dhithu dhomwilini dhinagihalela?’ (Mat. 6:31-33) Akala yowakula yawo ya makoho ala menddi sowi hee, onowoniha wi onomuroromela Yehova, ni oli owiyegeredhene wa yoweha soweha enufwanye. — Pro. 3:5, 6.

17. (a) Ovenyihiwa muukwani winoniha addi wihina Yehova doovilela? (b) Nnonihe ni makalelo baani wi nnotamalela ovilela wa Yehova?

¹⁷ Yehova ohuthoma labo ni mudhidhiya anafuniye omariha elabo ela yabure. (Mat. 24:36) Oliye kanagome ovilela ni amarihe elabo ela yabure mudhidhiya ohunafiye. Podive afunaga wavenyiha anookwa oliye onovilela. (Jó 14:14, 15) Yehova annojhejhiha mudhidhi athomeliye wi aavenyihe athu muukwani. (João 5:28) Mohanganyedha, ovilela wa Yehova winonihudhiha dhithu dhowinjhiva. Kubuwela, mwaha ovilela wa Yehova athu owinjhiva ehikanna gari ‘yoothwaruwa’ vamodha ni iyoya. (2 Ped. 3:9) Yehova anafuna wi athu owinjhiva yakele egumi yahinamala. Mowindo, ntonyihedhe wi nnotamalela mwaha ovilela wa Yehova. Nnatonyihedhe ni makalelo bani? Nilibihedhaga waveda ale ‘Enna efunelo yapama yegumi,’ naakaviheraga omudhivela ni omulabela Yehova. (Atos 13:48) Mwaha wa yeyo, aliwa enere wawakela mareeliho mwaha ovilela wa Yehova ninga iyo nawakelihu.

18. Mwahaya bwaddi egahoweleya okala ovilela ni athu amodha?

¹⁸ Yehova ohunona wi nnakale ologomana omakuthulo wa yaka txikwi. Mwaha wa yeyo, oliye anerege ovilelave ni alevelelaga dhowera dhehu dhabure. Nimutajhihaga Yehova nivede woona opama enna athu amodha, nikale athu ovilela ni aliwa. Kasugwa yotajhiha ya murogola mmodha. Mamune wambela  okala othuwathuwene vano ofiya mudhidhi ohiya otugumana. Murogola ola onowoga egi: “Eyo yahiguukuliha vanlubale.” “ Dholuba dhehu nannihuna vemudhini okwangwa.” Murogola ola amudhivela mamune owoniha wi ali ovilela. Oliye omuroromela Yehova ni kamwihile mamune. Ninga Yehova ohiya wasugwa makathamiho yapadduwa baahi, murogola ole osugwa dhikalelo dhapama anna mamune. Oliye onowoga egi: “Mamunaga ohukanna dhikalelo dhapama teto oliye anna wilibihedha wihina vang’ono vang’ono ahogolowele wa Yehova.” Ekalelo ela enonihudhiha wi sathima okala ovilela ni amudhihu, vamodha ni addibila ammulogoni enilibihedha wagonjhiha makathamiho ewa.

19. Nikale owiyegeredhene wi nere ddi?

¹⁹ Yesu ni angero yahihagalala yoniliwa elabo yavati epaddusiwaga. Mbwenye aliwa enere othabwa ohagalala yoona elabo yavati edhalaga ni athu oologomana enamulabela ni enamudhivela Yehova. Wubuwele ohagalala enakanne makiristawu ethikitheliwe wi yathongege ni Yesu odhulu, yoona mareeliho a mabasa ewa velaboni yavati. (Apo. 4:4, 9-11; 5:9, 10) Winaakale ohagala okala mwilaboni muhunakale goyi mbwenye mwinaakale murenddele, mwemmo mwihinakale wibulela, kutho naari okwa. (Apo. 21:4) Ojhehaga labo nno ofiya okale owiyegeredhene wihina otajhihe odhivela, thotho ni ovilela wa Yehova. Wiyegeredha, we kunnayelele ohagalala podi yakumelela makathamiho bi makathamiho (Tia. 1:2-4) Mwebaribarene, enohoweleya omutamalela Yehova mwaha onipaganya wi ‘winere okala ovenyihiwa muukwani’! — Atos 24:15.