1. Bõe yĩng t’a Zeova naan vɩɩmã?

SASA n zĩnd t’a Zeova ra yaa a yembre. La a sũur da pa sãamd ne a sẽn da yaa a yembrã ye. A ra seka a meng ne bũmb fãa. Baasgo, Wẽnnaam da ratame tɩ bõn-vɩɩs a taab me rɩ vɩɩmã yõodo. Yaa nonglem n kɩt t’a sɩng bũmb fãa naanego.—Yɩɩn. 36:10; 1 Zã 4:19.

2. A Zeezi ne malɛgsã manesem yɩɩ wãn ne bũmb a taabã a Zeova sẽn naanã?

² Pipi, a Zeova naana a Biig a Zeezi. Rẽ poore, ne a Zeezi maasem, a ‘naana bũmb a taabã fãa,’ malɛgs milyõ-rãmbã sẽn naage. (Kol. 1:16) A Zeezi sũur da nooma a sẽn paam n tʋmd ne a Ba wã. (Yel. 8:30) Malɛgsã me sẽn yaa Wẽnnaam kom-dibli wã sũy ra noomame. A Zeova ne a tʋʋm-mit a Zeezi sẽn wa n naand saasã ne tẽngã, malɛgsã ra getame. B manesem yɩɩ wãna? A Zeova sẽn wa n naan tẽngã n sa, b sɩngame n “kaasd ne sũ-noogo.” Sãmbg kae tɩ b kell n kaasa sũ-noogo, bũmb nins fãa a Zeova sẽn naanã yĩnga, sẽn yɩɩd fãa a sẽn wa n naan ninsaalã. (Zoob 38:7; Yel. 8:31) Bũmb nins fãa a Zeova sẽn naanã pukda a nonglmã la a yamã.—Yɩɩn. 104:24; Rom. 1:20.

3. Wa 1 Korẽnt rãmb 15:21, 22 sẽn yetã, a Zeezi maoongã kɩtame tɩ d tõe n wa paam bõe?

³ A Zeova ra ratame tɩ ninsaalbã vɩɩmd wakat sẽn kõn sa tẽngã a sẽn naan tɩ yaa neerã zugu. La a Ãdem ne a Awa kɩɩsa b Ba wã, tɩ rẽ kɩt tɩ b pa le tõe n vɩɩmd wakat  sẽn kõn sa ye. Rẽ waa ne kũum bãmb ne b kambã la b yagensã zugu. (Rom. 5:12) Bõe la a Zeova maan yel-kãngã wɛɛngẽ? Tao-tao bala, a wilga a sẽn na n maan to-to n fãag ninsaalbã. (Sɩng. 3:15) A Zeova sakame t’a Biig a Zeezi na n ki tɩ yɩ maoongo, sẽn na yɩl t’a Ãdem kambã la a yagensã wa paam b mens ne yel-wẽndã la kũumã. A ra tõeeme masã n kõ ned kam fãa sor t’a yãk a sã na n maana yẽ raabã n wa paam vɩɩm sẽn kõn sa.—Zã 3:16; Rom. 6:23; karm-y 1 Korẽnt rãmb 15:21, 22.

4. Sogs-bʋs la d na n leok sõs-kãngã pʋgẽ?

⁴ Wẽnnaam sẽn pʋlem t’a na n vʋʋga sẽn ki-bã wata ne sogsg wʋsgo. Wala makre, kũum vʋʋgrã na n yɩɩ wãn to? D ned sã n wa n vʋʋge, d na n bãng-a lame bɩ? Bõe ne bõe n kɩt tɩ kũum vʋʋgrã na n kõ-d sũ-noogo? Sẽn paase, d sã n bʋgs kũum vʋʋgrã zugu, wãn to la rẽ tõe n kɩt tɩ d maneg n wilg tɩ d sũur nooma ne a Zeova, a nonglmã, a yamã la a sũ-marã yĩnga? Bɩ d leok sogs-kãensã ball-balle.

5. Bõe yĩng tɩ d tõe n yeel tɩ b pa na n naag sẽn ki-bã fãa n vʋʋg wakat-yɛnga?

⁵ D tõe n yeelame t’a Zeova sã n wa n na n kɩt t’a Biig a Zeezi vʋʋg neb milyõ-rãmbã, a pa na n naag-b fãa n vʋʋg wakat-yɛng ye. Bõe yĩnga? Bala dũniyã neb sõor na n tiig n lebga wʋsgo, tɩ wa ne zũnd-zãnd menga. La a Zeova yaool n zɩ n maan bũmb ne zũnd-zãnd ye. A miime tɩ sẽn na yɩl tɩ laafɩ zĩndi, yaa tɩlɛ tɩ bũmb fãa sigl sõma. (1 Kor. 14:33) Wẽnnaam a Zeova sẽn wa n tʋmd ne a Zeezi n na n maneg tẽngã bilf-bilf tɩ ninsaal wa tõog n vɩɩmd a zugã, a talla sũ-mare, la a tʋm ne yam. A Zeezi naamã sẽn na n kaoos yʋʋm tusrã sasa, a sã n wa tʋmd ne sẽn põs-b  Armagedõ wã tɩ b na n maneg tẽngã n paam n deeg sẽn na n vʋʋg-bã, a na n talla sũ-mare, la a tʋm ne yam.

6. Tʋʋm 24:15 wã wilgdame tɩ ãnd dãmb n na n zĩnd a Zeova sẽn na n vʋʋg b rãmbã sʋka?

⁶ Bũmb sẽn tar yõod n tɩ yɩɩd la sẽn na n põs-b Armagedõ wã na n maane. B na n zãmsa sẽn na n vʋʋg-bã tɩ b bãng Wẽnnaam Rĩungã, la a Zeova sẽn dat tɩ b maanã. Bõe yĩnga? Bala sẽn na n vʋʋg-bã sʋka, wʋsg na n yɩɩ neb nins Biiblã sẽn boond tɩ “sẽn pa-b tɩrsã.” (Karm-y Tʋʋm 24:15.) Na n yɩɩ tɩlɛ tɩ b toeem bũmb wʋsg b vɩɩmã pʋgẽ n yaool n tõog n dɩ a Zeezi maoongã nafa. Mams-y n ges-y tʋʋm-kãseng ning d sẽn na n tʋme, n sõng neb milyõ-rãmb sẽn pa mi a Zeova baa bilfã! D na n zãmsd-b-la Biiblã yembr-yembr wa d sẽn maand to-to ne nebã rũndã-rũndã wã bɩ? B na n kɩtame tɩ b tɩ naag tigimsi, tɩ bãmb me paam minim n wa tõe n zãms sẽn na n vʋʋg-b bãmb poorã bɩ? Rẽnda d gũ n gese. La d sẽn mi bala, yaa tɩ Kirist naamã sẽn na n kaoos yʋʋm tusrã sã n wa sa, rẽ tɩ ‘dũniyã gill pida ne a Zeova bãngre.’ (Eza. 11:9) Ad tʋʋm wʋsg sẽn be yamleoog n na n zĩnd yʋʋm tusrã sasa!

7. Wẽnnaam nin-buiidã sã n wa zãmsd sẽn vʋʋg-bã a raabã, bõe yĩng tɩ b na n kʋmd b nimbãanega?

⁷ Kirist naamã sẽn na n kaoos yʋʋm tusrã sasa, a Zeova nin-buiidã fãa segd n toeema bũmb kẽer b vɩɩmã pʋgẽ, n tõog n ta a Zeova yam. Dẽnd b fãa sã n wa sõngd sẽn vʋʋg-bã tɩ b bas b manesem-wẽnsã, la b sak a Zeova noyã, b na n kʋmda b nimbãanega. (1 Pɩy. 3:8) Sãmbg kae tɩ neb nins sẽn na n vʋʋgã na n dat n zĩnda ne a Zeova nin-buiidã sẽn yaa sik-m-mens rãmbã. Bãmb me na n kell n ‘maana bũmb nins b sẽn segd n maan n wa paam fãagrã.’—Fili. 2:12.

8. Bõe yĩng tɩ d tõe n yeel tɩ neb nins sẽn na n deeg sẽn na n vʋʋg-bã na n bãng-b lame?

⁸ Bũmb wʋsg n kɩt tɩ d tagsd tɩ neb nins sẽn na n deeg sẽn na n vʋʋg-bã na n bãng-b lame. Wala makre, d sã n tẽeg neb nins a Zeova sẽn vʋʋg pĩndã yelle, wõnda a Zeova na n lebs n naana nebã tɩ b yalẽ wã, b goamã la b sẽn tagsd to-to wã yɩ wa sẽn da yaa to-to bilf nand tɩ b maan kaalmã kɛpɩ. Tẽeg-y t’a Zeezi maka kũumã ne gõeem, la a mak kũum vʋʋgrã ne ned sẽn nek a gõeemẽ. (Mat. 9:18, 24; Zã 11:11-13) Ned sã n nek a gõeemẽ, a yalẽ wã la a sẽn gomd to-to wã pa toeemde, a pʋ-tẽerã me pa menemd ye. D rɩk makr ne a Lazaare. A kiime n maan rasem a naase. Dẽnd a yĩngã ra sɩnga põogre. La a Zeezi sẽn vʋʋg-a wã, tao-tao bala, a ma-bi-pogsã bãng-a lame, t’a Lazaar me bãng-ba.—Zã 11:38-44; 12:1, 2.

9. Bõe yĩng tɩ sẽn ki-bã pa na n vʋʋg ne yĩng sẽn zems zãnga?

⁹ A Zeova pʋlmame tɩ dũni-paalgã pʋgã, ned baa a ye pa na n yeel “t’a ka keem ye!” (Eza. 33:24; Rom. 6:7) Dẽnd sẽn ki-bã na n vʋʋga ne yĩns sẽn tar laafɩ. La b pa na n zems zãng zĩig pʋgẽ ye. Sã n pa rẽ, b nebã tõeeme n pa bãng-b ye. Kirist naamã sẽn na n kaoos yʋʋm tusrã sasa, wõnda yaa bilf-bilf la ãdem-biisã na n lebg neb sẽn zems zãnga. Yaa yʋʋm tusrã poor la a Zeezi na n yaool n lebs a Ba wã Rĩungã. Rẽ tɩ Rĩungã tʋma a tʋʋmdã zãnga. Wala makre, a na n sõnga ãdem-biisã tɩ b fãa wa zems zãnga.—1 Kor. 15:24-28; Vẽn. 20:1-3.

10. Sẽn ki-bã vʋʋgrã sasa, y manesem na n yɩɩ wãna?

¹⁰ Mams-y n ges-y y sẽn na n deeg y neb nins sẽn na n vʋʋgã to-to wã! Sũ-noogã yĩnga, y na n yãbame bɩ, bɩ y na n laadame? Y sũur na n yɩɩ noog hal tɩ y yɩɩl n pẽg a Zeova bɩ? Sẽn be bala, y na n nonga a Zeova sẽn yaa d Ba sẽn get d yell neerã la a Biigã sẽn nong-dã ne y sũur fãa, bala yaa bãmb maasem yĩng la sẽn ki-bã sẽn vʋʋgdã.

11. A Zeezi sẽn yeel Zã 5:28, 29 pʋgẽ wã wilgdame tɩ neb nins sẽn tũud Wẽnnaam noyã na n paama bõe?

¹¹ Mams-y n ges-y sũ-noog ning sẽn na n vʋʋg-bã sẽn na n paame, b sã n wa bas b pĩnd tʋʋm-wẽnsã n tũud Wẽnnaam noyã! Sẽn na n sak-b n toeemã na n paam n vɩɩmda wakat sẽn kõn sa. La a Zeova pa na n bas neb nins sẽn na n tõdg a raabã maanegã tɩ b wa ne zũnd-zãnd arzãnã pʋgẽ ye.—Eza. 65:20; karm-y Zã 5:28, 29.

12. Wãn to la a Zeova na n ning sẽn na n wa vɩɩmd-b tẽngã zugã barka?

¹² Wẽnnaam Rĩungã sã n wa so tẽngã, Wẽnnaam nin-buiidã fãa na n yãa Yel-bũn 10:22 goamã pidsgu. Be b yetame yaa: “Yaa Sẽn-Ka-Saab barkã n wat ne arzɛka, tɩ yɩɩr ka naag ye.” Ne a Zeova vʋʋsem sõngã sõngre, a nin-buiidã na n yɩɩ arzɛgs rãmb a tũudmã wɛɛngẽ, rat n yeel tɩ bilf-bilfã, b na n wa tõogd n dɩkda a Zeezi togs-n-taar kɛpɩ, hal n wa lebg neb sẽn zems zãnga. (Zã 13:15-17; Efɛ. 4:23, 24) Daar fãa, b keelmã na n tara paasgo, tɩ b yel-manesmã me lebgd sõma n paasdẽ. Ad vɩɩmã na n sɩd yɩɩ noog wakat kãnga! (Zoob 33:25) La d sã n bʋgsd kũum vʋʋgrã zugu, wãn to la tõe n sõng-d masã menga?

13. Sẽn zems ne Yɩɩn-sõamyã 139:1-4, wãn to la sẽn ki-bã vʋʋgrã na n wilg t’a Zeova mii tõnd hal sõma?

¹³ Wa d sẽn yã wã, a Zeova sã n wa vʋʋg sẽn ki-bã, a na n lebs n kõ-b-la b pʋ-tẽerã, la a kɩt me tɩ b yɩ wa b sẽn da yaa to-to pĩndã. Tags-y n ges-y rẽ sẽn dat n yɛɛlga. A Zeova nonga yãmb wʋsgo, hal n miẽ la a tẽr yãmb sẽn tagsde, sẽn be y sũurẽ, y sẽn yete, la y sẽn maand fãa. Rẽnd a sã n wa na n vʋʋg yãmba, na n yɩɩ nana ne-a t’a lebs yãmb y pʋ-tẽerã la y yel-manesmã, wa sẽn da yaa to-to pĩndã. Rĩm a Davɩɩd ra mii vẽeneg t’a Zeova mii tõnd ned kam fãa hal sõma. (Karm-y Yɩɩn-sõamyã 139:1-4.) Tõnd tagsg segd n yɩɩ wãna, d sẽn mi t’a Zeova mii tõnd hal sõma woto wã?

14. D sã n wa bʋgsd a Zeova sẽn mi tõnd sõma to-to wã zugu, d tagsg segd n yɩɩ wãna?

¹⁴ D sã n bʋgsd a Zeova sẽn mi tõnd sõma to-to wã zugu, d pa segd n maand yɩɩre, n tagsdẽ tɩ yaa d pãn-komsmã la a get ye. Bõe yĩnga? Tẽeg-y tɩ tõnd yell paka a Zeova hal sõma. A getame tɩ tõnd ned kam fãa tara yõod a nifẽ. A mii yɛl nins fãa sẽn kɩt tɩ d vɩɩmã yaa a soab rũndã-rũndã wa. Ad woto sɩd kengda pɛlga! D ra tol n tags tɩ d yaa d yembr ye. Wakat fãa, a Zeova bee ne tõndo, n dat n sõng-do.—2 Kib. 16:9.

15. Wãn to la kũum vʋʋgrã yaa kaset t’a Zeova yamã ka to?

¹⁵ Ned sã n zoet kũum, bɛɛbã tõe n tũnuga ne rẽ n bugs-a t’a kɩɩs a Zeova. A  Sʋɩtãan sẽn so b rãmbã tũnugda ne rẽ n pirsd nebã tɩ b zãmbd b zo-rãmba, wall b maand bũmb bãmb mengã sẽn mi tɩ pa sõma. La b pa tõe n pirs tõnd tɩ d maan woto ye. D miime tɩ baa d bɛɛbã kʋ-do, a Zeova na n wa vʋʋg-d lame. (Vẽn. 2:10) D kɩsa sɩd tɩ bũmb kae b sẽn tõe n maan n sãam tõnd ne a Zeova zoodã ye. (Rom. 8:35-39) A Zeova sẽn sõng-d tɩ d bãng tɩ sẽn ki-bã na n wa vʋʋgame wã wilgdame t’a yamã sɩd ka to ye. Ne rẽ maasem, a Zeova kɩtame tɩ kũumã rabeem sẽn yaa a Sʋɩtãan zab-te-kãseng a ye wã pa tar pãng d zugu, la a leb n kõt-d raood sõma tɩ d tõe n kell n sak-a.

16. Bõe la y segd n sok y menga, la wãn to la rẽ tõe n sõng yãmba?

¹⁶ A Zeova bɛɛbã sã n wa yeel tɩ y sã n pa sak b sẽn datã b na n kʋ-y lame, y na n teega a Zeova, n kɩs sɩd t’a na n wa vʋʋg-y lame bɩ? Y maanda wãn n bãng y sã n na n kell n teega a Zeova? Y tõe n soka y meng yaa: ‘Mam sẽn yãkd yam nins daar fãa wã, baa yel-bõonesã pʋgẽ wã wilgdame tɩ m teega a Zeova bɩ?’ (Luk 16:10) Ad sokr a to: ‘Mam sẽn vɩ to-to wã wilgdame tɩ m kɩsa sɩd tɩ m sã n deng n bao Rĩungã, a Zeova na n gesame tɩ m paam teed nins fãa sẽn yaa tɩlɛ ne-mã, wa a sẽn pʋlmã bɩ?’ (Mat. 6:31-33) Sogs-kãensã leoor sã n yaa n-ye, wilgdame tɩ y kɩsa a Zeova sɩda, la tɩ y segl n saa makr buud fãa yĩnga.—Yel. 3:5, 6.

17. a) Wãn to la kũum vʋʋgrã wilgd t’a Zeova tara sũ-mare? b) Wãn to la d tõe n wilg tɩ d sũur nooma ne a Zeova a sũ-marã yĩnga?

¹⁷ A Zeova zoe n yãka daar ning a sẽn na n sãam dũni-wẽn-kãngã. (Mat. 24:36) A pa na n yãg n sãam-a tɩ daar-n-kãng pa ta ye. Yaa sɩd t’a rata ne a sũur fãa n vʋʋg sẽn ki-bã, la a maanda sũ-mare. (Zoob 14:14, 15) A gũudame tɩ wakat ning a sẽn yãkã ta t’a yaool n vʋʋg-ba. (Zã 5:28) D bee bʋʋm n na n wilg a Zeova tɩ d sũur nooma ne-a, a sũ-marã yĩnga. Yãmb we n tags n gese: A Zeova sũ-marã yĩnga, neb wʋsgo, tõnd mensã sẽn naage, paamame n “tek yam n kos sugri.” (2 Pɩy. 3:9) A Zeova ratame tɩ neb wʋsg wa tõog n paam n vɩɩmd wakat sẽn kõn sa. Bɩ d wilg tɩ d sũur nooma ne-a, a sũ-marã yĩnga. Wãn to? Yaa d sẽn na n modg n bao neb nins sẽn “tar yam ning sẽn zems ne vɩɩm sẽn ka sɛtã,” n sõng-b tɩ b wa nong a Zeova la b tũud-a. (Tʋʋ.  13:48) Yaa rẽ la bãmb me na n paam n dɩ a Zeova sũ-marã nafa wa tõndo.

18. Bõe yĩng tɩ d segd n tall sũ-mar ne d taabã?

¹⁸ A Zeova na n talla sũ-mar n gũ yʋʋm tusrã saabẽ, n yaool n wa baoodẽ tɩ d maand bũmb fãa tɩ zems zãnga. Nand tɩ wakat kãng ta, a Zeova na n ket n kõta tõnd d yel-wẽnã sugri. Dẽnd tõnd me segd n geta d taabã zʋg-sõma wã n yɩɩda, la d maand sũ-mar ne-ba. D rɩk makr ne saam-bi-poak a ye. Yɩɩr n da namsd a sɩdã, hal tɩ lebg wa bãaga. A wa n basa tigissã kẽnde. Ad saam-bi-poakã sẽn yeele: “Ra namsda maam wʋsgo. D magbã fãa lʋɩɩ koomẽ.” Baa ne rẽ, a sẽn nong a sɩdã, a kell n talla sũ-mar ne-a. A teega a Zeova, n pa tol n koms raood n bas ye. Wa a Zeova, a gesame tɩ zʋʋg zu-loɛɛgã, n ges a sɩdã zʋg-sõma wã n yɩɩda. A yeelame: “Mam sɩdã tara zʋg-sõma wʋsgo, la a maoodame me n tõogd a yɩɩrã bilf-bilfu.” Ad sɩd tara yõod wʋsg tɩ d tall sũ-mar ne d zakã neba, la ne d tigingã neb nins sẽn maood ne zu-loeesã!

19. Bõe la d segd n yãk yam n na n maan ne d sũy fãa?

¹⁹ A Zeezi ne malɛgsã ra kɩdemda sũ-noogo, Wẽnnaam sẽn wa n naan tẽngã. La mams-y n ges-y b sũ-noogã sẽn na n yɩ to-to, b sã n wa neẽ tɩ tẽngã pida ne neb sẽn zems zãng n nong a Zeova la b tũud-a. Mams-y n ges-y neb nins b sẽn yãk tẽngã zug tɩ b na n tɩ rɩ naam saasẽ ne Kiristã sũur sẽn na n yɩ noog to-to, b sã n wa ne b tʋʋmdã sẽn nafd ãdem-biisã to-to wã. (Vẽn. 4:4, 9-11; 5:9, 10) Leb-y n mams-y n ges-y sasa ning sũ-noog nintãm sẽn na n ledg sũ-sãams nintãmã, tɩ bãase, sũ-sãams la kũum pa le beẽ wã! (Vẽn. 21:4) Nand tɩ wakat kãng ta, bɩ y yãk yam n dɩk d Ba wã sẽn yaa nonglem, yam la sũ-mar soabã togs-n-taare. Woto, y na n kell n talla y sũ-noogã makr buud fãa taoore. (Zak 1:2-4) D sũur nooma wʋsgo, a Zeova sẽn pʋlem t’a na n vʋʋga sẽn ki-bã!—Tʋʋ. 24:15.