1. ¿Nda̱chun i̱xava̱ʼa Jehová ña̱ʼa?

NI̱XI̱YO iin tiempo ña̱ kǒo nda̱a̱ ni iinna níxi̱yo xíʼin Jehová, soo va̱ása níxi̱kuni mitúʼunra. Ta kǒo nda̱a̱ ni iin ña̱ʼa níxikuma̱ní nu̱úra. Soo xi̱kuni̱ra ña̱ ná kutaku inkana ta si̱í koona. Ña̱kán, xa̱ʼa̱ ña̱ kúúmiíra ña̱ kúʼvi̱-ini ki̱xáʼara íxava̱ʼara ña̱ʼa (Sal. 36:9; 1 Juan 4:19).

2. ¿Ndáaña ke̱ʼé ta̱ Jesús xíʼin na̱ ángel tá xi̱nina ña̱ i̱xava̱ʼa Jehová ndiʼi ña̱ʼa?

² Ta̱ Jesús kúú ta̱ siʼna i̱xava̱ʼa Jehová. Tándi̱ʼi, ta̱yóʼo kúú ta̱ chi̱ndeétáʼan xíʼinra ña̱ ke̱ʼéra inkaka ña̱ʼa, tá kúú, ndiʼi na̱ ángel (Col. 1:16). Ta̱ Jesús ni̱kusi̱íní-inira xa̱ʼa̱ ña̱ ka̱chíñura xíʼin yivára (Prov. 8:30). Ta saátu na̱ ángel ni̱kusi̱í-inina xa̱ʼa̱ ña̱yóʼo, saáchi na̱yóʼo kúú na̱ xi̱ni ndáa ki̱ʼva i̱xava̱ʼa Jehová xíʼin ta̱ Jesús ndiví xíʼin ñuʼú. Ta, ¿ndáaña ke̱ʼé na̱ ángel? Nda̱sakáʼnuna Jehová tá i̱xava̱ʼara ñuʼú, ta nda̱kundeéna nda̱sakáʼnunara tá i̱xava̱ʼara inkaka ña̱ʼa, tá kúú na̱ yiví (Job 38:7; Prov. 8:31). Ndiʼi ña̱ʼa ña̱ ke̱ʼéra náʼa̱ña ña̱ kúʼvi̱ní-inira xínira miíyó ta ndíchiníra (Sal. 104:24; Rom. 1:20).

3. Nda̱a̱ táki̱ʼva káchi 1 Corintios 15:21, 22, ¿ndáaña kivi ndakiʼinyó xa̱ʼa̱ ña̱ ni̱xi̱ʼi̱ ta̱ Jesús?

³ Ña̱ xi̱kuni̱ Jehová kúú ña̱ ndiʼi tiempo ná kutaku na̱ yiví nu̱ú ñuʼú ña̱ liviní i̱xava̱ʼara. Soo xa̱ʼa̱ ña̱ va̱ása níkandíxa ta̱ Adán xíʼin ñá Eva ña̱ ni̱ka̱ʼa̱n yivána, va̱ása níkivika kutakuna ndiʼi tiempo nu̱ú ñuʼú yóʼo ta miína xíʼin se̱ʼena kuvina tá ná ya̱ʼa tiempo (Rom. 5:12). ¿Ndáaña ke̱ʼé Jehová? Kama ni̱ka̱ʼa̱nra ndáa ki̱ʼva sakǎkura na̱ ñuyǐví (Gén. 3:15). Ta ña̱ ke̱ʼéra kúú  ña̱ ta̱xira se̱ʼera ña̱ ni̱xi̱ʼi̱ra xa̱ʼa̱ na̱ se̱ʼe ta̱ Adán xíʼin ñá Eva, ña̱ va̱ʼa sakǎkurana nu̱ú ku̱a̱chi xíʼin ña̱ xíʼi̱na. Xíʼin ña̱ ke̱ʼéra ta̱xira ña̱ ná ndaka̱xin na̱ yiví kachíñuna nu̱úra ta ndakiʼinna ña̱ kutakuna ndiʼi tiempo (Juan 3:16; Rom. 6:23; kaʼvi 1 Corintios 15:21, 22). *

4. ¿Ndáaña ka̱ʼa̱nyó xa̱ʼa̱ nu̱ú ña̱ artículo yóʼo?

⁴ Íyo ku̱a̱ʼání ña̱ kúni̱yó kunda̱a̱-iniyó xa̱ʼa̱ ña̱ sandátaku Ndióxi̱ na̱ ni̱xi̱ʼi̱. Tá kúú, ¿ndáa ki̱ʼva ndatakuna?, ¿á ndakuniyó na̱ táʼanyó tá ná ndatakuna?, ¿nda̱chun kusi̱íní-iniyó tá ná ndataku na̱ ni̱xi̱ʼi̱? ta ¿ndáa ki̱ʼva chíndeétáʼan ña̱yóʼo xíʼinyó ña̱ chindayáʼviyó ña̱ kúʼvi̱-ini Jehová xínira miíyó, ña̱ ndíchi kúúmiíra xíʼin ña̱ kúee íyo inira? Ná ka̱ʼa̱nyó xa̱ʼa̱ ña̱yóʼo.

5. ¿Nda̱chun káʼa̱nyó ña̱ su̱ví iin ki̱vi̱ ndataku ndiʼi na̱ ni̱xi̱ʼi̱?

⁵ Jehová kuniñúʼura ta̱ Jesús ña̱ va̱ʼa sandátakura ku̱a̱ʼání na̱ ni̱xi̱ʼi̱. Soo sana su̱ví iin ki̱vi̱ ndataku ndiʼina. ¿Nda̱chun? Saáchi tá kamaní ná kutú nu̱ú ñuʼú yóʼo xíʼin na̱ yiví, kooní tu̱ndóʼo. Soo ña̱ kútóo Jehová kúú ña̱ viíní ná koo ndiʼi ña̱ʼa. Kúnda̱a̱-inira ña̱ va̱ʼa táxi̱n kundoo na̱ yiví xíniñúʼu viíní koo ndiʼi ña̱ʼa (1 Cor. 14:33). Jehová ni̱na̱ʼa̱ra ña̱ ndíchiníra ta kúee íyo inira tá i̱xava̱ʼara ñuʼú yóʼo, chi miíra xíʼin ta̱ Jesús loʼo tá loʼo i̱xava̱ʼanaña ña̱ va̱ʼa kundoo na̱ yiví nu̱úña. Ta saátu ta̱ Jesús na̱ʼa̱ra ña̱yóʼo ti̱xin ña̱ mil ku̱i̱ya̱ tá ná chindeétáʼanra xíʼin na̱ ka̱ku ti̱xin ña̱ Armagedón ña̱ ndasaviína ñuʼú yóʼo, ña̱ va̱ʼa kundoo na̱ ndataku.

6. Nda̱a̱ táki̱ʼva káchi Hechos 24:15, ¿ndáana kúú inkaka na̱ ndataku?

⁶ Soo ña̱ ndáyáʼviníka keʼé na̱ ka̱ku ti̱xin  ña̱ Armagedón kúú ña̱ sanáʼa̱na na̱ ndataku xa̱ʼa̱ Reino xíʼin xa̱ʼa̱ ña̱ kúni̱ Ndióxi̱ keʼéna. ¿Nda̱chun xíniñúʼu keʼéna ña̱yóʼo? Saáchi ku̱a̱ʼání na̱ ndataku koona “na̱ ke̱ʼé ña̱ va̱ása va̱ʼa” (kaʼvi Hechos 24:15). * Na̱yóʼo xíniñúʼu nasamana ki̱ʼva ña̱ íyona tasaá ndakiʼinna ña̱ va̱ʼa xa̱ʼa̱ ña̱ ni̱xi̱ʼi̱ ta̱ Cristo. Ña̱kán kooní chiñu nu̱úna ña̱ va̱ʼa sanáʼa̱na na̱ ndataku xa̱ʼa̱ Ndióxi̱. ¿Á iin tá iinna sanáʼa̱yó xa̱ʼa̱ Ndióxi̱ nda̱a̱ táki̱ʼva xa̱a̱ kéʼéyó tiempo vitin? ¿Á koo congregación na̱ ndataku yóʼo ta á xíniñúʼu ka̱ʼa̱nna xíʼinna ndáa ki̱ʼva sanáʼa̱na inkaka na̱ ndataku? Tá ná kuu ña̱yóʼo saáví kunda̱a̱-iniyó xa̱ʼa̱ña. Soo kúnda̱a̱va-iniyó ña̱ tá ná ndiʼi ña̱ mil ku̱i̱ya̱ ña̱ kaʼndachíñu ta̱ Cristo ndiʼi na̱ yiví na̱ kundoo nu̱ú ñuʼú yóʼo kunda̱a̱-inina xa̱ʼa̱ Jehová (Is. 11:9). Kooní chiñu ti̱xin ña̱ mil ku̱i̱ya̱ ta liviní kooña.

7. ¿Nda̱chun kúee koo ini na̱ ndásakáʼnu Ndióxi̱ xíʼin na̱ ndataku?

⁷ Ti̱xin ña̱ mil ku̱i̱ya̱ ndiʼi na̱ ndásakáʼnu Ndióxi̱ xíniñúʼu nasamana ki̱ʼva ña̱ íyona ña̱ va̱ʼa sakusi̱ína-inira. Xa̱ʼa̱ ña̱yóʼo, kúee koo inina xíʼin na̱ ndataku chi chindeétáʼanna xíʼinna ña̱ nasamana ña̱ ndákanixi̱nína xíʼin ña̱ kéʼéna, tasaá kutakuna nda̱a̱ táki̱ʼva kúni̱ mií Jehová (1 Ped. 3:8). Tá ná kuni na̱ ndataku, ña̱ vitání-ini na̱ ñuu Ndióxi̱ ta chíka̱a̱na ndee̱ ña̱ nasamana ña̱ kéʼéna ta sákusi̱ína-inira, saátu na̱ ndataku kuni̱na ndasakáʼnunara (Filip. 2:12).

8. ¿Nda̱chun káʼa̱nyó ña̱ ndakunivayó na̱ táʼanyó tá ná ndatakuna?

⁸ Íyo ku̱a̱ʼá xa̱ʼa̱ kúú ña̱ káʼa̱nyó ña̱ ndakunivayó na̱ táʼanyó na̱ ni̱xi̱ʼi̱ tá ná ndatakuna. Tá kúú, xíʼin ki̱ʼva ña̱ sa̱ndátaku Jehová na̱ ni̱xi̱yo tiempo xi̱naʼá kúnda̱a̱-iniyó ña̱ tá ná sandatakurana va̱ása nasamara ki̱ʼva ña̱ náʼa̱na, ni ki̱ʼva ña̱ káʼa̱nna ni ña̱ ndákanixi̱nína chi kooña nda̱a̱ táki̱ʼva ni̱xi̱yoña tá kúma̱ní si̱lóʼo kuvina. Ta saátu ná ndakaʼányó chi ta̱ Jesús ni̱ka̱ʼa̱nra ña̱ na̱ ni̱xi̱ʼi̱ tá íyo na̱ kísi̱ saá íyona, ta tá ndátakuna tá íyo na̱ ndáko̱o̱ saá íyona (Mat. 9:18, 24; Juan 11:11-13). Tá ndáko̱o̱ iin na̱ yiví va̱ása nása̱ma ta̱chína, ni ki̱ʼva ña̱ náʼa̱na ni ña̱ ndákaʼánna xa̱ʼa̱. Ná ndakaʼányó chi tá sa̱ndátaku ta̱ Jesús ta̱ Lázaro xa̱a̱ ku̱mí ki̱vi̱ kúú ña̱ ni̱xi̱ʼi̱ra, ña̱kán xa̱a̱ ku̱a̱ʼa̱n táʼyi̱ ku̱ñura. Soo ná ki̱ʼvara kamaní nda̱kuninára, ta saátu miíra nda̱kaʼánvara xa̱ʼa̱ná (Juan 11:38-44; 12:1, 2).

9. ¿Nda̱chun káʼa̱nyó ña̱ tá ná ndataku na̱ ni̱xi̱ʼi̱ kuumiíkana ku̱a̱chi?

⁹ Jehová káʼa̱nra ña̱ nda̱a̱ ni iinna va̱ása ka̱ʼa̱nna: “Kue̱ʼe̱ kúúmií” tá ná kaʼndachíñu ta̱ Jesús (Is. 33:24; Rom. 6:7). Ña̱kán, tá ná sandátaku Ndióxi̱ na̱ ni̱xi̱ʼi̱ va̱ása kuumiíkana kue̱ʼe̱. Soo ña̱yóʼo va̱ása kúni̱ kachiña ña̱ va̱ása kuumiíkana ku̱a̱chi. Chi tá saá ná koona sana va̱ása ndakuniyóna. Ti̱xin ña̱ mil ku̱i̱ya̱ ña̱ kaʼndachíñu ta̱ Cristo loʼo tá loʼo va̱ása kuumiíka na̱ yiví ku̱a̱chi. Tá ná ndiʼi ña̱ mil ku̱i̱ya̱, ta̱ Jesús ndataxira ña̱ xáʼndachíñura ndaʼa̱ yivára. Chi xa̱a̱ saxínuña ndiʼi ña̱ kúni̱ Jehová, ta iin ña̱yóʼo kúú ña̱ va̱ása kuumiíka na̱ yiví ku̱a̱chi (1 Cor. 15:24-28; Apoc. 20:1-3).

10. ¿Ndáaña kundoʼoyó tá ná ndataku na̱ ni̱xi̱ʼi̱?

¹⁰ Ná ndakanixi̱níyó xa̱ʼa̱ ña̱ keʼéyó tá ná ndikóyó kuniyó na̱ táʼanyó na̱ ni̱xi̱ʼi̱. ¿Á ku̱a̱ku̱yó? ¿Á kuakuyó xa̱ʼa̱ ña̱ kusi̱íní-iniyó? ¿Á katayó nu̱ú Jehová xa̱ʼa̱ ña̱ kusi̱íní-iniyó?  Va̱ása kúnda̱a̱-iniyó á keʼéyó ña̱yóʼo, soo ña̱ kúnda̱a̱-iniyó kúú ña̱ kuʼvi̱níka-iniyó kuniyó yiváyó xíʼin se̱ʼera chi sandátakuna na̱ ni̱xi̱ʼi̱.

11. Nda̱a̱ táki̱ʼva káchi ña̱ ni̱ka̱ʼa̱n ta̱ Jesús nu̱ú Juan 5:28, 29, ¿ndáaña ndakiʼin na̱ ndataku tá ná kandíxana ña̱ káʼa̱n Ndióxi̱?

¹¹ Ta saátu na̱ ndataku kusi̱íní-inina tá ná sandákoona ña̱ xi̱keʼéna tá ya̱chi̱ ta kixáʼana kutakuna nda̱a̱ táki̱ʼva kúni̱ mií Ndióxi̱. Tá ná kandíxana nasamana ña̱ kéʼéna ndakiʼinna ña̱ kutakuna, soo tá ná va̱ása kandíxana ña̱ káʼa̱n Ndióxi̱, va̱ása taxikara koona nu̱ú ñuyǐví livi (kaʼvi Juan 5:28, 29; * Is. 65:20).

12. ¿Ndáaña va̱ʼa taxi Jehová ndaʼa̱ na̱ kutaku nu̱ú ñuʼú yóʼo?

¹² Tá ná kaʼndachíñu Reino Ndióxi̱, ndiʼi na̱ káchíñu nu̱úra kunina xi̱nu ña̱ káʼa̱n Proverbios 10:22: “Ña̱ va̱ʼa ña̱ táxi Jehová ndaʼa̱yó kúú ña̱ ndásakúiká miíyó, ta va̱ása xóʼvi̱yó xíʼin ña̱yóʼo”. Espíritu Jehová kúú ña̱ chindeétáʼan xíʼin na̱ ñuura ña̱ ndukúikána, ña̱yóʼo kúni̱ kachiña ña̱ xa̱a̱na koona nda̱a̱ táki̱ʼva íyo ta̱ Cristo, ta loʼo tá loʼo va̱ása kuumiíkana ku̱a̱chi (Juan 13:15-17; Efes. 4:23, 24). Iin iin ki̱vi̱ ña̱ ya̱ʼa va̱ʼaníka na̱ yiví koona, ndakúníka koona ta va̱ása kuumiíkana kue̱ʼe̱, si̱íní koona (Job 33:25). Tá saá, ¿ndáaña va̱ʼa ndakiʼinyó tá ná ndakanixi̱níyó xa̱ʼa̱ ña̱ ndataku na̱ ni̱xi̱ʼi̱?

13. Nda̱a̱ táki̱ʼva káchi Salmo 139:1-4, ¿ndáa ki̱ʼva na̱ʼa̱ Jehová ña̱ xíni̱níra miíyó tá ná sandátakura na̱ ni̱xi̱ʼi̱?

¹³ Nda̱a̱ táki̱ʼva xa̱a̱ ni̱ka̱ʼa̱nyó, tá ná sandátaku Jehová na̱ ni̱xi̱ʼi̱, va̱ása nasa̱ma ña̱ ndákaʼánna xa̱ʼa̱, ta ki̱ʼva ña̱ íyona kooña nda̱a̱ táki̱ʼva ni̱xi̱yona tá kúma̱níka kuvina. Ná ndakanixi̱níyó xa̱ʼa̱ ña̱ kúni̱ kachi ña̱yóʼo. Jehová kúʼvi̱ní-inira xínira iin tá iinyó, ña̱kán kíʼinra kuenta ndáaña kúú ña̱ ndákanixi̱níyó, ña̱ ndóʼoyó, ña̱ káʼa̱nyó xíʼin ña̱ kéʼéyó. Ña̱kán tá ná sandátakura miíyó va̱ása ixayo̱ʼvi̱ña xíʼinra, chi xa̱a̱ kúnda̱a̱-inira ndáaña ndákaʼányó xa̱ʼa̱, ndáa ki̱ʼva íyoyó á ndáa ki̱ʼva ndákanixi̱níyó. Ta̱ rey David xi̱kunda̱a̱-inira ña̱ xíni̱ va̱ʼa Jehová ndáa ki̱ʼva íyo iin tá iinyó (kaʼvi Salmo 139:1-4). * ¿Ndáaña ndóʼoyó tá kíʼinyó kuenta ña̱ ndáyáʼviníyó nu̱ú Jehová?

14. ¿Ndáaña ndóʼoyó tá kúnda̱a̱-iniyó ña̱ xíni̱ní Jehová ndáa ki̱ʼva íyoyó?

¹⁴ Va̱ása xíniñúʼu yi̱ʼvíyó xa̱ʼa̱ ña̱ xíni̱ní Jehová ndáa ki̱ʼva íyoyó. ¿Nda̱chun? Ná ndakaʼányó ña̱ kúʼvi̱ní-inira xínira miíyó, ta iin tá iinyó ndáyáʼviníyó nu̱úra. Ta saátu kúnda̱a̱-inira ndáaña kúú ña̱ ndo̱ʼoyó tá ya̱chi̱ ña̱kán na̱sama ki̱ʼva ña̱ íyoyó. ¿Á su̱ví ña̱ nda̱a̱ kúúña va̱ʼaní kúniyó tá kúnda̱a̱-iniyó xa̱ʼa̱ ña̱yóʼo? Nda̱a̱ ni iin yichi̱ ná va̱ása ndakanixi̱níyó ña̱ íyo mitúʼunyó, saáchi ndiʼi tiempo íyo Jehová xíʼinyó ta íyo tu̱ʼvara ña̱ chindeétáʼanra xíʼinyó (2 Crón. 16:9).

15. ¿Ndáa ki̱ʼva náʼa̱ ña̱ ndataku na̱ ni̱xi̱ʼi̱ ña̱ ndíchiní Jehová?

¹⁵ Ndiʼiyó yíʼviyó kuviyó. Xa̱ʼa̱ ña̱yóʼo, na̱ kéʼé ña̱ kúni̱ ta̱ Ndi̱va̱ʼa xíniñúʼuna ña̱yóʼo ña̱ va̱ʼa ixandúxana xíʼin inkana ña̱ keʼéna ña̱ va̱ása va̱ʼa xíʼin na̱ migona, á keʼéna ña̱ʼa ña̱ va̱ása xíniñúʼu keʼéna. Soo va̱ása  kúchiñuna ixandúxana xíʼinyó. Chi kúnda̱a̱-iniyó ña̱ ni ná kaʼnína miíyó, Jehová sandátakuvara miíyó (Apoc. 2:10). Chi kándíxaníyó ña̱ ni nda̱a̱ ndáaka ña̱ ná keʼéna va̱ása kuchiñuna sakúxíkana miíyó nu̱ú Ndióxi̱ (Rom. 8:35-39). Xa̱ʼa̱ ña̱ káʼa̱n Jehová sandátakura na̱ ni̱xi̱ʼi̱ náʼa̱ra ña̱ ndíchiníra. Chi saá kúú ña̱ kíndaara iin ña̱ʼa ña̱ kivi kuniñúʼu ta̱ Ndi̱va̱ʼa ña̱ sayíʼvira miíyó, ta saátu ndásandakúní Jehová iniyó.

16. ¿Ndáaña xíniñúʼu ndakanixi̱níyó xa̱ʼa̱, ta ndáaña na̱ʼa̱ ña̱yóʼo?

¹⁶ Tá na̱ sáa̱-ini xíni miíyó kúni̱na kaʼnína miíyó, ¿á kandíxayó ña̱ sandátaku Jehová miíyó? Ña̱ va̱ʼa kunda̱a̱-iniyó, ná ndakanixi̱níyó xa̱ʼa̱ ña̱yóʼo: “¿Á náʼa̱ ña̱ ndáka̱xii̱n keʼíi̱ ki̱vi̱ tá ki̱vi̱ ña̱ kándíxai̱ Jehová?” (Luc. 16:10). “¿Á náʼi̱ ña̱ kándíxai̱ ña̱ taxi Jehová ndiʼi ña̱ xíniñúʼi̱ tá siʼna ña̱ kúni̱ra ná keʼíi̱?” (Mat. 6:31-33). Tá saá íyo ña̱ kéʼéyó, ña̱yóʼo kúú ña̱ chindeétáʼan xíʼinyó ya̱ʼayó nu̱ú nda̱a̱ ndáaka tu̱ndóʼo (Prov. 3:5, 6).

17. a) ¿Ndáa ki̱ʼva náʼa̱ ña̱ ndataku na̱ ni̱xi̱ʼi̱ ña̱ kúee íyo ini Jehová? b) ¿Ndáa ki̱ʼva kivi na̱ʼa̱yó ña̱ táxiyó tíxa̱ʼvi xa̱ʼa̱ ña̱ kúee íyo ini Jehová?

¹⁷ Xa̱a̱ xíni̱va Jehová ndáa ki̱vi̱ ta ndáa hora sandíʼi-xa̱ʼa̱ra ñuyǐví yóʼo (Mat. 24:36). Ni kúni̱níra sandátakura na̱ ni̱xi̱ʼi̱, soo va̱ása ndi̱ku̱n ke̱ʼéra ña̱yóʼo chi kúee íyo inira (Job 14:14, 15). Ndátura ña̱ ná kixaa̱ mií tiempo ña̱ va̱ʼaka keʼéra ña̱yóʼo (Juan 5:28). Ku̱a̱ʼá xa̱ʼa̱ kúú ña̱ xíniñúʼu taxiyó tíxa̱ʼvi ndaʼa̱ Jehová xa̱ʼa̱ ña̱ kúee íyo inira. Tá kúú, tíxa̱ʼvi ña̱ kúee íyo inira ku̱a̱ʼání na̱ yiví kúúmiína tiempo ña̱ ndandikó-inina, nda̱a̱ táki̱ʼva xa̱a̱ ke̱ʼé miíyó (2 Ped. 3:9). Ña̱ kúni̱ Jehová kúú ña̱ ku̱a̱ʼání na̱ yiví ná ndakiʼinna ña̱ kutakuna ndiʼi tiempo. Ña̱kán, ná na̱ʼa̱yó ña̱ táxiyó tíxa̱ʼvi ndaʼa̱ra xa̱ʼa̱ ña̱ kúee íyo inira, kivi keʼéyó ña̱yóʼo tá ná chika̱a̱yó ndee̱ ña̱ nandukúyó na̱ yiví na̱ ndixa kúni̱ kutaku ndiʼi tiempo, ta chindeétáʼanyó xíʼinna ña̱ kuʼvi̱-inina kunina Jehová ta kachíñuna nu̱úra (Hech. 13:48). Tasaá ndakiʼinna ña̱ va̱ʼa xa̱ʼa̱ ña̱ kúee íyo ini Jehová.

18. ¿Nda̱chun xíniñúʼu kúee koo iniyó xíʼin inkana?

¹⁸ Kúeení koo ini Jehová ta kundatura ná ndiʼi ña̱ mil ku̱i̱ya̱, chi saá kúúña va̱ása kuumiíkayó ku̱a̱chi. Nani ndátura kixaa̱ ki̱vi̱ kán, íxakáʼnu-inira xa̱ʼa̱ ku̱a̱chiyó. Xa̱ʼa̱ ña̱yóʼo, ná keʼéyó nda̱a̱ táki̱ʼva kéʼéra ta ná kotoyó ña̱ va̱ʼa ña̱ kúúmií inkana ta kúee ná koo iniyó xíʼinna. Ná kotoyó ña̱ ndo̱ʼo iin  ñá hermana. Yiíñá ki̱xáʼa kúúmiíra kue̱ʼe̱ ña̱ sándi̱ʼi̱-inira ta va̱ása níxa̱ʼa̱nkara reunión. Ñáyóʼo káchiñá: “Tá ndo̱ʼondi̱ ña̱yóʼo ni̱xo̱ʼvi̱níi̱. Na̱sama ki̱ʼva ña̱ tákundi̱ ta ndiʼi ña̱ xi̱kuni̱ndi̱ keʼéndi̱ va̱ása níkivika keʼéndi̱ña”. Soo ni saá, ñá hermana yóʼo nda̱kundeéñá ni̱na̱ʼa̱ñá ña̱ kúʼvi̱-iniñá xíniñá yiíñá ta kúee ni̱xi̱yo iniñá xíʼinra. Ka̱ndíxañá Jehová ta va̱ása níndakava-iniñá. Ta nda̱a̱ táki̱ʼva kéʼé Jehová, ñáyóʼo ki̱xáʼañá xítoñá ña̱ va̱ʼa ña̱ kúúmií yiíñá. Káchiñá: “Ku̱a̱ʼání ña̱ va̱ʼa kúúmií yiíi̱ ta chíka̱a̱níra ndee̱ ña̱ ya̱ʼara nu̱ú kue̱ʼe̱ yóʼo ta va̱ása ndi̱ʼiní-inira”. Ndáyáʼviní ña̱ kúee koo iniyó xíʼin na̱ veʼeyó á na̱ hermano na̱ yáʼa nu̱ú ku̱a̱ʼání tu̱ndóʼo.

19. ¿Ndáaña xíniñúʼu chika̱a̱-iniyó keʼéyó?

¹⁹ Ta̱ Jesús xíʼin na̱ ángel ni̱kusi̱íní-inina tá ku̱va̱ʼa ñuʼú yóʼo. Ná ndakanixi̱níyó ña̱ kusi̱íní-inina tá ná kunina ña̱ íyo na̱ yiví na̱ va̱ása kúúmiíka ku̱a̱chi nu̱ú ñuʼú yóʼo ta kúʼvi̱-inina xínina Jehová ta káchíñuna nu̱úra. Ta ná ndakanixi̱níyó xa̱ʼa̱ ña̱ kusi̱íní-ini na̱ kaʼndachíñu xíʼin ta̱ Cristo chí ndiví, tá ná kunina ña̱ ndákiʼin na̱ yiví ña̱ va̱ʼa xa̱ʼa̱ chiñuna (Apoc. 4:4, 9-11; 5:9, 10). Ta saátu, ná ndakanixi̱níyó ndáa ki̱ʼva koo ña̱ kutakuyó tá ná va̱ása kuakukayó xa̱ʼa̱ ña̱ xóʼvi̱yó chi kuakuyó xa̱ʼa̱ ña̱ kúsi̱í-iniyó, tá ná ndiʼi-xa̱ʼa̱ kue̱ʼe̱, ña̱ kúsuchí-iniyó ta va̱ása kuvikayó (Apoc. 21:4). Nani ndátuyó kixaa̱ ki̱vi̱ kán, ná chika̱a̱yó ndee̱ ña̱ keʼéyó nda̱a̱ táki̱ʼva kéʼé yiváyó, ña̱ kuʼvi̱-iniyó kuniyó inkana, ndíchi kooyó ta kúee koo iniyó. Tá ná keʼéyó ña̱yóʼo va̱ása ndiʼi-xa̱ʼa̱ ña̱ kúsi̱í-iniyó ni nda̱a̱ ndáaka tu̱ndóʼo ná ya̱ʼayó nu̱ú (Sant. 1:2-4). Táxiníyó tíxa̱ʼvi ndaʼa̱ Jehová xa̱ʼa̱ ña̱ káʼa̱nra “ña̱ ndataku na̱ ni̱xi̱ʼi̱” (Hech. 24:15).