1. Omolwashike Jehova a shiti iinima?

MANGA Jehova inaa shita sha, okwa li oye awike. Ihe ka li a sa ezaza. Jehova ka li a pumbwa omuntu gwontumba, opo ando a kale a nyanyukwa. Nonando ongawo, okwa li a hala yalwe ya kale wo ya nyanyukwa. Jehova okwa li a tameka okushita i inyengithwa kohole. — Eps. 36:9; 1 Joh. 4:19.

2. Jesus naayengeli oya li yu uvitile ngiini eshito lyaJehova?

² Tango Jehova okwa shiti Omwana Jesus. Opo nduno okwa ‘shiti iinima ayihe’ okupitila mOmwana, mwa kwatelwa iishitwa yopambepo iinandunge omamiliyona. (Kol. 1:16) Jesus okwa li a nyanyukilwa noonkondo okulonga pamwe naHe. (Omayel. 8:30) Aayengeli, oyanamati yaKalunga, oya li wo ya nyanyukwa. Opo ya li sho Jehova nOmulongi pamwe naye onkulungu, Jesus, taya shiti egulu nevi. Aayengeli oya li ya ningi po shike? Oya li ya “ligola kenyanyu,” sho evi lya shitwa. Oya li ya tsikile oku mu tanga, sho ye wete iinima ayihe mbyoka Jehova a shita, unene tuu aantu. (Job 38:7; Omayel. 8:31) Kehe shoka Jehova a shita, otashi ulike ohole ye nuunongo we. — Eps. 104:24; Rom. 1:20.

3. Ngaashi sha popiwa mAakorinto yotango 15:21, 22, ekuliloyambo lyaJesus olya ningitha shike tashi wapa?

³ Elalakano lyaJehova olya li aantu ya nyanyukilwe omwenyo sigo aluhe kombanda yevi ndyoka e ya shitila. Ihe sho Adam naEva ye mu tukulile oshipotha, uulunde neso oya tameke okupangela ombanda yevi. (Rom. 5:12) Jehova okwa li a ningi po shike? Mbalambala okwa popi shoka ta ka ninga, opo a hupithe aantu. (Gen. 3:15) Jehova okwa li ta ka gandja Omwana, Jesus, e li ekuliloyambo, opo oluvalo lwaAdam naEva lwu mangululwe muulunde neso. Okuza mpono, okwa li ta ka pa kehe gumwe  ompito a tokole ngele ote ke mu longela, Ye e ke mu pe omwenyo gwaaluhe. — Joh. 3:16; Rom. 6:23; lesha 1 Aakorinto 15:21, 22.

4. Omapulo geni tatu ka kundathana moshitopolwa shika?

⁴ Euvaneko lyaJehova lyokuyumudha aasi olya pendutha omapulo ogendji. Pashiholelwa, eyumuko otashi vulika li ka ningwe ngiini? Mbela otatu ka vula ngaa okudhimbulula oonakusa yetu uuna ya yumudhwa? Omomikalo dhini eyumuko tali ke tu etela enyanyu? Ongiini okutedhatedha keyumuko taku tu kwathele tu kale twa pandula ohole yaJehova, uunongo neidhidhimiko lye shi vulithe nale? Natu ka kundathaneni omapulo ngoka.

5. Omolwashike shi li pandunge okwiitaala kutya aantu ayehe itaya ka yumudhilwa oshita?

⁵ Sho Jehova ta ka yumudha aantu omamiliyona okupitila mOmwana, otashi vulika kee ya yumudhe ayehe oshita. Omolwashike mbela? Omolwaashoka ngele omwaalu gwaantu kombanda yevi ogwi indjipala meendelelo, otashi vulika shi ke ete evundakano. Jehova iha ningi nando iinima kaayi li melandulathano. Oku shi kutya opo ombili yi kwatelwe po, opu na okukala elandulathano. (1 Kor. 14:33) Sho Jehova Kalunga a li ta longo pamwe naJesus mokulongekidha evi manga inaa shitila ko aantu, okwe shi ningi noondunge nonethimbo. Jesus naye osho ta ka ninga pelelo lye lyoomvula eyovi, sho ta longo pamwe naamboka ya hupa puArmagedon ya longekidhile oonakuyumudhwa iinima mbyoka taya ka pumbwa.

6. Shi ikolelela kIilonga 24:15, mokati kaamboka taya ka yumudhwa kuJehova, otamu ka kwatelwa oolye?

⁶ Shoka sha simanenena, mboka taya ka hupa puArmagedon otaya ka longa oonakuyumudhwa kombinga yUukwaniilwa waKalunga nokombinga yiitegelelwa yaJehova. Omolwashike mbela? Omolwaashoka oyendji yomwaamboka  taya ka yumudhwa, “aalunde.” (Lesha Iilonga 24:15, OB-1954.) Otaya ka pumbwa okuninga omalunduluko ogendji, opo ya mone mo uuwanawa mekuliloyambo lyaKristus. Dhiladhila owala kiilonga yokulonga aantu omamiliyona mboka kaaye na ontseyo yokutseya Jehova mpoka tayi ka kala yi thike. Mbela kehe gumwe ota ka kala e na omulongi gwe, ngaashi hatu konakona naantu kunena? Mbela mboka opo ya yumudhwa otaya ka tulwa momagongalo nokudheulwa, opo ya vule okulonga mboka taya ka yumudhwa konima yawo? Katu na uushili musho. Shoka tu shi osho kutya pehulilo lyElelo lyaKristus lyOomvula Eyovi, “evi otali ka udha okutseya Omuwa.” (Jes. 11:9) Pethimbo lyoomvula eyovi itatu ka longa tuu iilonga oyindji yinyanyudha!

7. Omolwashike aapiya yaKalunga taya ka kala ye uvitile mboka ya yumudhwa uukwawo wanankali, sho taye ya longo?

⁷ Momukokomoko gwElelo lyaKristus lyOomvula Eyovi, aantu ayehe otaya ka pumbwa okutsikila okuninga omalunduluko, opo ya nyanyudhe Jehova. Onkee ano, ayehe otaya ka kala ye uvitile mboka ya yumudhwa uukwawo wanankali, sho taye ya kwathele ya ninge omalunduluko, opo ya vule okweetha po omadhiladhilo nomahalo ga puka noya vule okukala metsokumwe nomithikampango dhaJehova. (1 Pet. 3:8) Mboka taya ka yumudhwa otaya ka mona kutya aapiya yaJehova aaifupipiki notaya ka tsikila okuninga omalunduluko ‘omolwehupitho lyawo.’ — Fil. 2:12.

8. Omolwashike tatu vulu okuthika pehulithodhiladhilo kutya mboka taya ka hambelela oonakuyumudhwa, otaya ka vula oku ya dhimbulula?

⁸ Omolwomatompelo gontumba, otatu vulu okuthika pehulithodhiladhilo kutya mboka taya ka hambelela oonakuyumudhwa, otaya ka vula oku ya dhimbulula. Pashiholelwa, ngele tatu tala komayumudho ngoka ga ningwa nale, osha fa shi li ngeyi kutya Jehova ota ka yumudha aantu ye li ngaashi ya li nale, haya popi nohaya dhiladhila naanaa ngaashi nale manga inaaya sa. Dhimbulukwa kutya Jesus okwa faathanitha eso noomposi, omanga eyumuko onokupenduka moomposi. (Mat. 9: 18, 24; Joh. 11:11-13) Uuna omuntu a penduka moomposi, oha kala ta monika e li ngaashi a li nale, ha popi ngaashi shito noha dhimbulukwa iinima yomepitathimbo. Natu ka taleni koshiholelwa shaLasarus. Okwa kala a sa uule womasiku gane nolutu lwe olwa li lwa tameke okwoola. Ihe sho Jesus e mu yumudha, aamwayinakadhona oye mu dhimbulula nziya, naye okwa li wo e ya dhimbulula. — Joh. 11:38-44; 12:1, 2.

9. Omolwashike oonakusa itaaya ka yumudhwa ya gwanenena?

⁹ Jehova oku uvaneka kutya kohi yelelo lyaKristus kapu na ngoka ta ka tya: “Otandi ehama.” (Jes. 33:24; Rom. 6:7) Onkee ano, mboka taya ka yumudhwa kuusi, otaya ka yumudhwa ye na omalutu ge na uukolele. Nonando ongawo, itaya ka thikila ya gwanenena. Ngele oya kala ya gwanenena, otashi vulika kaaya dhimbululwe kaaholike yawo. Osha fa shi li ngeyi kutya pethimbo lyElelo lyaKristus lyOomvula Eyovi, aantu ayehe otaye ke enda yu uka megwaneneno. Jesus pehulilo lyelelo lye lyoomvula eyovi opo owala ta ka shunitha Uukwaniilwa kuHe. Pethimbo ndyono Uukwaniilwa otawu ka kala wa adhika wa gwanitha po iilonga yawo, mwa kwatelwa okuyumudhila aantu megwaneneno. — 1 Kor. 15:24-28; Eh. 20:1-3.

10. Eyumuko otali ke ku guma ngiini?

¹⁰ Dhiladhila owala nkene to ka kala wu uvite, sho to hambelele aaholike yoye mboka ya li ya sa. Mbela enyanyu ndyoka otali ke ku yolitha nenge otali ke ku lilitha? Mbela oto  ki imba omaimbilo taga tanga Jehova omolwenyanyu? Otatu vulu okukala nuushili kutya ohole yetu yokuhola Tate yetu omunahole nosho wo Omwana, otayi ka kola, sho ye shi ningi tashi wapa pu kale eyumuko.

11. Shi ikolelela koohapu dhaJesus ndhoka dhi li muJohannes 5:28, 29, oshike tashi ka ningilwa mboka hayi iyutha komithikampango dhaKalunga dhi li pauyuuki?

¹¹ Dhiladhila owala kenyanyu ndyoka mboka ya yumudhwa taya ka kala ye uvite, sho tayi ihula omuntu omukulu nokukala metsokumwe nomithikampango dhaKalunga dhi li pauyuuki. Mboka taya ka ninga omalunduluko ngoka, otaya ka kala nomwenyo sigo aluhe mOparadisa. Mepingathano naashoka, mboka ye li ompinge naKalunga itaya ka pitikwa ya yone po ombili ndjoka tayi ka kala mOparadisa. — Jes. 65:20; lesha Johannes 5:28, 29.

12. Omomukalo guni ayehe mboka taya ka kala kombanda yevi taya ka yambekwa kuJehova?

¹² Kohi yelelo lyUukwaniilwa, aapiya yaKalunga ayehe otaya ka mona kutya oohapu ndhoka dha popiwa mOmayeletumbulo 10:22 odhi li paushili, sho dha ti: “Eyambeko lyOmuwa olyo hali yambapaleke omuntu, [noiha gwedha ko uudhigu washa kulyo, NW].” Kekwatho lyombepo ondjapuki yaJehova, aapiya yaKalunga otaya ka kala lela ye na uupambepo uuwanawa. Ano taya ka kala ya fa Kristus notaye ke endela ko yu uka megwaneneno. (Joh. 13:15-17; Ef. 4:23, 24) Kehe esiku omalutu gawo otaga ka kala ge na uukolele shi vulithe nale notaya ka kala aantu ye li nawa. Onkalamwenyo itayi ka kala tuu yinyanyudha! (Job 33:25) Ihe okutedhatedha kombinga yeyumuko otaku vulu oku ku kwathela ngiini?

13. Metsokumwe nEpisalomi 139:1-4, eyumuko otali ku ulika ngiini nkene Jehova e tu shi thiluthilu?

¹³ Ngaashi twa zi noku shi kundathana, Jehova ota ka yumudha aantu haya vulu okudhimbulukwa onakuziwa noye na omaukwatya gawo omakulu. Dhiladhila kushoka sha hala okutya. Jehova oku ku hole noonkondo noha ndhindhilike kehe shoka to dhiladhila, wu uvite, to popi noto ningi. Onkee ano, uuna te ke ku yumudha, itashi ka kala oshidhigu kuye, e ku yumudhe ho vulu okudhimbulukwa iinima yomonakuziwa nowu na omaukwatya goye omakulu. Omukwaniilwa David okwa li e shi kutya Jehova oku na ohokwe mukehe gumwe gwomutse. (Lesha Episalomi 139:1-4.) Ohatu kala tu uvite ngiini uuna tu uvite ko kutya Jehova oku tu shi thiluthilu?

14. Otu na okukala tu uvite ngiini uuna tatu tedhatedha kunkene Jehova e tu shi nawa?

¹⁴ Uuna tatu tedhatedha kunkene Jehova e tu shi nawa, katu na okukala twa limbililwa. Omolwashike mbela? Dhimbulukwa kutya Jehova oku na ko nasha natse noonkondo, okwa tala ko kehe gumwe gwomutse e na ongushu. Oha tala kukehe shimwe shoka sha nwetha mo okukalamwenyo kwetu. Itashi hekeleke tuu! Katu na nando okukala tu uvite kutya otu li otse atuke. Jehova oha kala aluhe pamwe natse noha kala a halelela oku tu kwathela. — 2 Ondjal. 16:9.

15. Eyumuko otali ulike ngiini kutya Jehova omunandunge?

¹⁵ Okutilithwa neso oku li oshinima sha nika oshiponga. Mboka ye li kohi yewiliko lyaSatana ohaye ku longitha ya thiminike aantu kaaya kale aadhiginini kookuume kawo, nenge ye ya ningithe iinima ya puka. Ihe tse itaya vulu oku tu thiminika tu ninge iinima mbyoka. (Eh. 2:10) Otu shi kutya ngele aatondi yetu oye tu dhipaga, Jehova ote ke tu yumudha. Otwa tompwa kutya kapu na shoka taya vulu okuninga tashi vulu okuteya po uukuume wetu naJehova. (Rom. 8:35-39) Jehova ina ulika tuu kutya ye omunandunge lela, sho e tu pa etegameno lyeyumuko! Omolwetegameno ndyoka, ihatu kala twa tila aayambidhidhi yaSatana mboka  taye tu tilitha neso uuna itaatu ningi shoka taya ti. Etegameno ndyoka ohali tu pe wo uulaadhi tu tsikile okukala aadhiginini kuJehova.

16. Omapulo geni wa pumbwa okwiipula, nomayamukulo gago otaga vulu ngiini oku ku kwathela wu tseye kutya owi inekela Jehova shi thike peni?

¹⁶ Ngele aatondi yaJehova oye ku tilitha neso, mbela oto ka kala ngaa wu na einekelo kutya Jehova ote ke ku yumudha, nongiini to vulu okutseya ngele ote ke ku yumudha? Omukalo gumwe to vulu oku shi ninga, omokwiipula to ti: ‘Mbela omatokolo omashona ngoka handi ninge esiku kehe otagu ulike ngaa kutya ondi inekela Jehova?’ (Luk. 16:10) Epulo lilwe tatu vulu okwiipula olyo kutya: ‘Mbela onkalamwenyo yandje otayi ulike ngaa kutya ondi inekela meuvaneko lyaJehova lyokusila oshimpwiyu oompumbwe dhandje, ngele onda pititha komeho Uukwaniilwa we?’ (Mat. 6:31-33) Ngele eyamukulo lyoye oeeno komapulo ngoka, nena oto ulike kutya owi inekela muJehova noto ka kala wi ilongekidhila uupyakadhi kehe tawu ke ku adha. — Omayel. 3:5, 6.

17. (a) Eyumuko otali ulike ngiini kutya Jehova omwiidhidhimiki? (b) Ongiini tatu vulu okuulika kutya otwa pandula eidhidhimiko lyaJehova?

¹⁷ Jehova oku na esiku nowili yokondandalunde uuna ta ka hanagula po uuyuni mbuka wa kolokosha. (Mat. 24:36) Shoka ite ke shi ninga manga ethimbo ndyoka inaali thika. Okwi idhidhimika, nonando okwa halelela okuyumudha oonakusa. (Job 14:14, 15) Okwa tegelela euthwathimbo lye li thike, opo e ya yumudhe. (Joh. 5:28) Otu na omatompelo omawanawa goku mu pandula omolweidhidhimiko lye. Dhiladhila kwaashika: Omolweidhidhimiko lyaJehova, aantu oyendji natse twa kwatelwa mo, oye na ethimbo ‘lyokweetha po uulunde’ wawo. (2 Pet. 3:9) Jehovah okwa hala aantu oyendji ngaashi tashi vulika, ya mone ompito yoku ka mona omwenyo gwaaluhe. Onkee ano natu ulike kutya otwa pandula eidhidhimiko lye. Ongiini tatu vulu oku shi ninga? Omokukonga nuudhiginini mboka ya halelela oku ka mona omwenyo gwaaluhe noku ya kwathela ya kale ye mu hole noye mu longele. (Iil. 13:48) Kungawo otaya ka mona uuwanawa meidhidhimiko lyaJehova ngaashi tse.

18. Omolwashike twa pumbwa okukala hatu idhidhimikile yalwe?

¹⁸ Jehova ohe tu idhidhimikile noina tegelela tu kale twa gwanenena manga oomvula eyuvi inaadhi pwa ko. Manga ethimbo ndyoka inaali thika, Jehova oku na ehalo okudhima po omayonagulo getu. Onkee ano, natse otu na  okukala hatu tala kuuwanawa wayalwe noku ya idhidhimikila. Natu ka taleni koshiholelwa shomumwameme gumwe ngoka omusamane gwe a li a gwililwa po kiimpwiyu oyindji, e te etha po okuya kokugongala. Omumwameme ngoka ota ti: “Oshinima shoka osha li oshidhigu noonkondo kungame. Onkalamwenyo yetu oya li ya lunduluka inaashi tegelelwa nokatwa li we tatu vulu okuninga iinima ayihe mbyoka twa li twa hala okuninga.” Nonando ongawo, omumwameme ngoka okwa tsikile okwiidhidhimikila omusamane gwe. Okwa kala i inekela muJehova, noina sholola nando. Ngaashi Jehova, okwa kala ha tala kuuwanawa womusamane gwe, ihe hakomaupyakadhi ge. Omumwameme ngoka okwa gwedha ko a ti: “Omusamane gwandje oku na omaukwatya omawanawa noha ningi ngaashi ta vulu, opo a hwepopale.” Inashi simana tuu tu kale hatu idhidhimikile mboka ye li momaukwanegumbo getu nenge megongalo mboka taya kambadhala okusinda omaupyakadhi!

19. Oshike tu na okukala twa tokola toko okuninga?

¹⁹ Jesus naayengeli oya li ya nyanyukwa sho evi lya shitwa petameko. Ihe dhiladhila owala kunkene taya ka kala ya nyanyukwa noonkondo okumona evi lyu udha aantu ya gwanenena mboka ye hole Jehova nohaye mu longele. Mboka taya yi megulu ya ka pangele pamwe naKristus, itaya ka kala tuu ya nyanyukwa, sho ye wete aantu taya mono uuwanawa miilonga yawo! (Eh. 4:4, 9-11; 5:9, 10) Dhiladhila wo, sho omahodhi ngoka hage etwa kuuwehame taga ka pingenwa po kwaangoka genyanyu, naasho itaapu ka kala we sigo aluhe omikithi, okulila neso. (Eh. 21:4) Manga ethimbo ndyoka inaali thika, kala wa tokola toko okuholela Tate yetu omunahole, omunandunge nomwiidhidhimiki. Ngele owe shi ningi, oto ka kaleka po enyanyu lyoye kutya nduno owu li muupyakadhi wa fa peni. (Jak. 1:2-4) Inatu pandula tuu euvaneko lyaJehova ndyoka tali ti kutya “otaku ka kala eyumuko”! — Iil. 24:15.