1. Ke ka baka la’ng Jehofa a ile a bopa batho?

MATHOMONG Jehofa o be a le noši. Eupša o be a sa jewe ke bodutu. Jehofa o be a sa hloke batho ba bangwe gore a thabe. Eupša o be a nyaka gore le batho ba bangwe ba thabele bophelo. Ka ge Jehofa a na le lerato, o ile a thoma go bopa batho.—Ps. 36:9; 1 Joh. 4:19.

2. Jesu le barongwa ba ile ba ikwa bjang ka dilo tšeo Jehofa a di bopilego?

² Sa pele, Jehofa o ile a bopa morwa wa gagwe Jesu. Jehofa o ile a diriša morwa wa gagwe go bopa “dilo tše dingwe ka moka” go akaretša le barongwa. (Bakol. 1:16) Jesu o ile a thabela go šoma le Tatagwe. (Die. 8:30) Barongwa le bona ba ile ba thaba ge ba bona dilo tšeo Jehofa le Jesu ba di bopilego. Ba be ba lebeletše ge Jehofa le Jesu ba be ba bopa magodimo le lefase. Ba ile ba dira’ng? Ba ile ba reta Modimo ge a be a bopa lefase e bile ba ile ba tšwela pele ba mo reta ge a se na go fetša go bopa dilo ka moka, kudukudu ka morago ga gore a bope batho. (Jobo 38:7; Die. 8:31) Tšohle tšeo Jehofa a di bopilego di bontšha gore o na le lerato le bohlale.—Ps. 104:24; Baroma 1:20.

3. Go ya ka Bakorinthe ba Pele 15:21, 22, sehlabelo sa topollo sa Jesu se dirile gore go kgonege eng?

³ Jehofa o be a nyaka gore batho ba thabele bophelo bjo bo sa felego lefaseng le lebotse leo a ba bopetšego lona. Eupša Adama le Efa ba ile ba dira sebe. Seo se ile sa dira gore mafelelong ba hwe. Ditlamorago tšeo di ile tša wela batho ka  moka. (Baroma 5:12) Jehofa o ile a dira’ng? Ka ntle le go senya nako, o ile a tla ka tharollo. Tharollo yeo e be e le gore o be a tla diriša sehlabelo sa Jesu sa topollo go lokolla batho sebeng le lehung. Seo se be se era gore o tla nea motho yo mongwe le yo mongwe sebaka sa go ikgethela go mo hlankela gomme a tle a hwetše bophelo bjo bo sa felego.—Joh. 3:16; Baroma 6:23; bala 1 Bakorinthe 15:21, 22.

4. Re tlo araba dipotšišo dife sehlogong se?

⁴ Taba ya gore bahu ba tlo tsoga e dira gore re be le dipotšišo tše dintši. Ka mohlala, batho bao ba hlokofetšego ba tlo tsošwa bjang? Ge batho bao ba se na go tsošwa, na re tlo kgona go ba tseba? Tsogo ya bahu e tlo dira gore re ikwe bjang? Le gona tsogo ya bahu e re ruta eng ka dika tša Jehofa tše bjalo ka lerato, bohlale le go se fele pelo? Re tlo araba dipotšišo tše sehlogong se.

5. Ke ka baka la’ng re sa swanela go letela gore batho ka moka ba tsošwe ka nako e tee?

⁵ Ge Jehofa a tsoša batho a diriša Morwa wa gagwe, re ka se letele gore a ba tsoše ka moka ka nako e tee. Ka baka la’ng? Ka gobane ge batho ka moka ba ka tsošwa ka nako e tee, lefaseng go tlo ba le tlhakatlhakano. Dilo ka moka tšeo Jehofa a di dirago di na le thulaganyo. O a tseba gore e le gore go be le khutšo, go swanetše go ba le thulaganyo. (1 Bakor. 14:33) Jehofa o ile a diriša bohlale le go se fele pelo ge a be a šoma le Jesu go lokišeletša lefase gore batho ba tle ba dule go lona. Jesu le yena o tlo diriša dika tše di swanago nakong ya Pušo ya Mengwaga e Sekete ge a tla be a šoma le bao ba phologilego ntwa ya Haramagedone go lokišeletša bao ba tsošitšwego bahung dijo, diaparo le dilo tše dingwe.

6. Go ya ka Ditiro 24:15, ke bomang ba bangwe bao ba tlago go tsošwa ke Jehofa?

 ⁶ Sa bohlokwa le go feta, batho bao ba phologilego ntwa ya Haramagedone, ba tlo swanelwa ke go ruta batho bao ba tsošitšwego bahung ka melao ya Jehofa le ka Mmušo wa gagwe. Ka baka la’ng? Ka gobane bontši bja batho bao ba tlago go tsošwa, ke “ba sa lokago.” (Bala Ditiro 24:15.) Ba tla swanelwa ke go dira diphetogo tše dintši e le gore ba thabele ditšhegofatšo tša sehlabelo sa topollo le go phela ka mo go sa felego. Nagana ka mošomo o mogolo wo re tla bago le wona wa go ruta batho ba dimilione bao ba sa tsebego selo ka Modimo. Na motho yo mongwe le yo mongwe o tlo ba le motho yo a mo swarelago thuto go swana le lehono? Na bao ba tsošitšwego ba tla ya diphuthegong tše itšego e le gore ba tlwaetšwe go ruta bao ba tsošitšwego ka morago ga bona? Re tla swanelwa ke go leta gore re bone. Eupša re tseba gore mafelelong a pušo ya Kriste ya mengwaga e sekete, “lefase le tla tlala tsebo ya Jehofa.” (Jes. 11:9) Nakong yeo re tlo ba le mošomo o montši wo o thabišago wo re swanetšego go o dira!

7. Ke ka baka la’ng batho ba Jehofa ba tla ba le kwelobohloko ge ba ruta batho bao ba tsošitšwego bahung?

⁷ Mengwageng e Sekete ya Pušo ya Jesu Kriste batho ka moka lefaseng ba tla swanelwa ke go tšwela pele ba dira diphetogo e le gore ba kgone go kgahliša Jehofa Modimo. Ka moka ga bona ba tlo ba le kwelobohloko e le gore ba kgone go thuša bao ba tsošitšwego gore ba se sa ba le dikgopolo tše di fošagetšego e le gore ba kgone go phela ka melao ya Jehofa. (1 Pet. 3:8) Bao ba tsošitšwego ba tla lemoga gore batho ba Jehofa ba ikokobeditše e bile ba “šomela phološo ya [bona.]”—Bafil. 2:12.

8. Ke ka baka la’ng re kgodišegile gore re tlo tseba batho ba gabo rena le bagwera bao ba tsošitšwego bahung?

⁸ Go na le mabaka a mmalwa ao a re kgodišago gore bao ba tlago go amogela bao ba tsošitšwego bahung ba tlo kgona go ba tseba. Ka mohlala, ge re nagana ka tsela yeo Jehofa a ilego a tsoša batho nakong e fetilego, re ka kgodišega gore batho bao ba tsošitšwego ba tla be ba bolela, ba nagana le go lebelelega ka tsela yeo ba bego ba lebelelega ka yona pele ba ehwa. Gopola gore Jesu o swantšhitše lehu le boroko gomme go tsošwa bahung a go swantšha le go tsošwa borokong. (Mat. 9:18, 24; Joh. 11:11-13) Ge motho a tsoga borokong, ponagalo, dikgopolo tša gagwe le tsela yeo a bolelago ka yona ga di fetoge. Nagana ka mohlala wa Latsaro. O be a šetše a na le matšatši a mane a hwile gomme o be a thomile go bola. Eupša gateetee ge Jesu a se na go mo tsoša, dikgaetšedi tša gagwe di ile tša mo tseba. Ga go pelaelo gore le yena o ile a di tseba.—Joh. 11:38-44; 12:1, 2.

9. Ke ka baka la’ng bao ba tlago go tsošwa bahung ba ka se tsošwe ba phethagetše?

⁹ Jehofa o holofetša gore ga go na motho yo a tlago go phela ka tlase ga pušo ya Kriste yo a tla rego: “Ke a babja.” (Jes. 33:24; Baroma 6:7) Ka baka leo, bao ba tsošitšwego bahung ba tlo tsošwa ba sa babje. Eupša seo ga se re gore ba tla be ba phethagetše. Ge ba ka tsoga ba phethagetše, ba meloko le bagwera ba ka se kgone go ba tseba. Nakong ya Pušo ya Kriste ya Mengwaga e Sekete, go bonagala batho ka moka ba tla be ba phethagala ganyenyane-ganyenyane. Ka morago ga moo, Jesu o tla bušetša Mmušo go Tatagwe. Ka nako yeo, Mmušo wa Jehofa o tla be o fihleletše tšohle tšeo Modimo a nyakago gore re  di di dire go akaretša go dira gore batho ba phethagale.—1 Bakor. 15:24-28; Kut. 20:1-3.

10. Tsogo ya bahu e tlo dira gore o ikwe bjang?

¹⁰ Nagana ka tsela yeo o tlago go ikwa ka yona ge o bona ba meloko le bagwera gape. Na tsela yeo o tla bego o thabile ka yona e tla go dira gore o lle goba o sege? Na o tla be o thabile kudu moo e lego gore o tla opelela Jehofa? Re kgodišegile gore re tlo rata Jehofa Modimo le Jesu Kriste le go feta ka ge ba dirile gore tsogo ya bahu e kgonege.

11. Go ya ka mantšu a Jesu a lego go Johane 5:28, 29, go tlo direga’ng ka bao ba kwago Jehofa Modimo?

¹¹ Nagana ka lethabo leo bao ba tsošitšwego ba tlago go ba le lona ge ba leka go dira diphetogo e le gore ba kgone go phela ka melao ya Modimo. Bao ba dirago diphetogo ba tla phela ka mo go sa felego lefaseng la Paradeise. Eupša Jehofa a ka se dumelele batho bao ba sa kwego gore ba dule lefaseng la Paradeise gomme ba šitiša khutšo yeo e lego gona.—Jes. 65:20; bala Johane 5:28, 29.

12. Ke ka tsela efe bohle bao ba phelago lefaseng ba tlago go šegofatšwa ke Jehofa?

¹² Bao ba tla bego ba phela ge Mmušo wa Modimo o buša, ba tla kwešiša gabotse seo Diema 10:22 e se bolelago ge e re: “Tšhegofatšo ya Jehofa e a humiša, ga a e okeletše ka bohloko.” Ka ge moya wa Jehofa o tla be o šoma go batho ba gagwe, ba tla kgona go ekiša Jesu ga kaone ge ba dutše ba phethagala ganyenyane-ganyenyane. (Joh. 13:15-17; Baef. 4:23, 24) Letšatši le lengwe le le lengwe ba tla kaonefala gomme mebele ya bona ya tia. Bophelo e tla ba bjo bo thabišago ka nako yeo! (Jobo 33:25) Go naganišiša ka tsogo ya bahu go tla go thuša bjang gona bjale?

13. Go ya ka Psalme 139:1-4, tsogo ya bahu e tla bontšha bjang gore Jehofa o re tseba gabotse?

¹³ Ka ge re šetše re ithutile, ge Jehofa a tsoša bahu o tla dira gore dikgopolo le tsela yeo ba bego ba phela ka yona di se ke tša fetoga. Nagana gore seo se bolela eng. Seo se ra gore Jehofa o go rata kudu, ke ka baka leo a gopolago tsela yeo o naganago ka yona, o ikwago ka yona o bolelago ka yona le seo o se dirago. Ge Jehofa a go tsoša o tlo go tsoša ka tsela yeo o bego o le ka yona pele o ehwa. Kgoši Dafida o be a tseba gore Jehofa o tseba yo mongwe le yo mongwe wa rena gabotse. (Bala Psalme 139:1-4.) Re ikwa bjang ge re lemoga gore Jehofa o re tseba gabotse?

14. Re swanetše go ikwa bjang ge re nagana ka tsela yeo Jehofa a re tsebago gabotse ka yona?

¹⁴ Ge re naganišiša ka tsela yeo Jehofa a re tsebago gabotse ka yona ga se ra swanela go tshwenyega re nagana gore Jehofa o lebeletše mafokodi a rena. Gopola gore Jehofa o tloga a na le taba le rena. O bona yo mongwe le yo mongwe a le bohlokwa go yena. O gopola dilo ka moka tšeo di dirago gore re be batho bao re lego bona lehono. Ruri se se a kgothatša! Le ka mohla ga se ra swanela go ikwa re le noši. Jehofa o dula a na le rena gomme o ikemišeditše go re thuša.—2 Dikor. 16:9.

15. Tsogo ya bahu e bontšha bjang bohlale bja Jehofa?

¹⁵ Ge motho a tšhaba go hwa a ka dira dilo tšeo a bego a ka se di dire. Ke ka baka leo batho bao ba laolwago ke Sathane ba tšhošetšago batho ka lehu gore ba dire dilo tšeo ba sa swanelago go di dira. Eupša rena ba ka se kgone go re gapeletša go dira dilo tšeo  Jehofa a sa di nyakego. Re a tseba gore ge e ba manaba a rena a ka re bolaya, Jehofa o tla re tsoša. (Kut. 2:10) Re kgodišegile gore ga go seo ba ka se dirago go re thibela go ba bagwera ba Modimo. (Rom. 8:35-39) Jehofa o re bontšhitše gore o bohlale ka go re nea kholofetšo ya tsogo ya bahu! Ka baka la kholofelo yeo ga re boife ge Sathane le badirišani ba gagwe ba leka go re bolaya ge e ba re sa dire seo ba nyakago re se dira. E bile kholofelo yeo e re thuša go ba le sebete sa go dula re botegela Jehofa.

16. Ke dipotšišo dife tšeo o swanetšego go ipotšiša tšona, gomme dikarabo tša dipotšišo tšeo di tla go thuša bjang go bona gore o bota Jehofa?

¹⁶ Ge e ba manaba a Jehofa a tšhošetša gore a tla go bolaya na o tla bota Jehofa gore o tla go tsoša? O ka tseba bjang gore o tla bota Jehofa ka nako yeo? O ka dira seo ka go ipotšiša gore: “Na ka mehla ge ke dira diphetho tše dinyenyane ke bontšha gore ke bota Jehofa?” (Luka 16:10) O ka ipotšiša gape le go re: “Na tsela yeo ke phelago ka yona e bontšha gore ke holofela gore Jehofa o tla nnea seo ke se hlokago ge e ba ke etiša Mmušo wa gagwe pele.” (Mat. 6:31-33) Ge e ba karabo ya gago e le ee go dipotšišo tšeo ka moka, gona seo se bontšha gore o bota Jehofa e bile o ikemišeditše go lebeletšana le diteko ka moka tšeo di tlago go go wela.—Die. 3:5, 6.

17. (a) Tsogo ya bahu e bontšha bjang gore Jehofa ga a fele pelo? (b) Re ka bontšha bjang gore re leboga go se fele pelo ga Modimo?

¹⁷ Jehofa o beile letšatši le iri tšeo a tlago go fediša batho ba babe. (Mat. 24:36) A ka se fele pelo gomme a fediša batho bao pele nako yeo e fihla. O tloga a rata go tsoša bao ba hwilego eupša o letile ka go se fele pelo. (Job 14:14, 15) O emetše gore nako ya maleba e fihle e le gore a kgone go ba tsoša. (Joh. 5:28) Re na le mabaka a kwagalago a go leboga go se fele pelo ga Modimo. Nagana ka se: Ka ge Jehofa a sa fele pelo, batho ba bantši go akaretša le rena re hweditše nako ya ‘go fihlelela boitsholo.’ (2 Pet. 3:9) Jehofa o rata gore batho ba bantši ba tle ba phele ka mo go sa felego. Ka gona a re bontšheng gore re leboga go se fele pelo ga Modimo. Bjang? Ka go dira sohle seo re ka se kgonago go nyaka “bao ba nago le tshekamelo e swanetšego ka bophelo bjo bo sa felego” le go ba thuša gore ba kgone go rata Jehofa Modimo le go mo hlankela. (Dit. 13:48) Go swana le rena ba tla holwa ke go se fele pelo ga Jehofa.

18. Ke ka baka la’ng re se ra swanela go felela batho ba bangwe pelo?

 ¹⁸ Jehofa o a tseba gore re tlo phethagala feela ka morago ga Pušo ya Kriste ya Mengwaga e Sekete. Pele nako yeo e fihla, Jehofa o ikemišeditše go re lebalela diphošo tša rena. Re swanetše go ekiša Jehofa ka go lebelela dika tše dibotse go batho ba bangwe gomme re se ke ra ba felela pelo. Nagana ka mohlala wa kgaetšedi yoo monna wa gagwe a ilego a swarwa ke bolwetši bja go tshwenyega kudu moo a ilego a thoma go se sa ya dibokeng. Kgaetšedi yo o re: “Se se be se nkweša bohloko kudu. Bophelo bja rena bo ile bja fetoga ka pelapela gomme ra se sa kgona go dira dilo tšeo re bego re ikemišeditše go di dira.” Ka ge mosadi yo a be a rata monna wa gagwe, o ile a tšwela pele a sa mo felele pelo. O ile a ithekga ka Jehofa gomme a se nyame. Go swana le Jehofa, mosadi yo o ile a se lebelele mafokodi a monna wa gagwe gomme a lebelela dilo tše dibotse go yena. O re: “Monna wa ka o na le dika tše dibotse e bile o dira sohle se a ka se kgonago gore a fole.” Go bohlokwa kudu gore re se felele batho ba gabo rena pelo goba bana babo rena ge ba leka go fenya mathata ao ba lebeletšanago le ona!

19. Re swanetše go ikemišetša go dira’ng?

¹⁹ Jesu le barongwa ba be ba thabile ge Modimo a be a bopa lefase. Eupša nagana gore ba tla thaba gakaakaang ge ba bona lefase le tletše ka batho bao ba ratago Jehofa le go mo hlankela. Nagana ka lethabo la bao ba tsošeditšwego legodimong go yo buša le Jesu ge ba tla be ba bona batho ba holwa ke mošomo wa bona. (Kut. 4:4, 9-11; 5:9, 10) Nagana ka bophelo bja ge megokgo ya manyami e tla be e tšeetšwe legato ke megokgo ya lethabo e bile go se sa na bolwetši, bohloko le lehu. (Kut. 21:4) Gona bjale dula o ikemišeditše go ekiša Modimo yo a re ratago yo bohlale le wa go se fele pelo. Ge o ka dira bjalo, o tlo thaba go sa šetšwe mathata ao o lebeletšanago le ona. (Jak. 1:2-4) Re leboga Jehofa kudu ka ge a re tshepišitše gore “go tla ba le tsogo”!—Dit. 24:15.