1. Omokonda yatyi Huku atungila onoandyu novanthu?

PONTHYIMBI, Siovaa ankho wikeko vala kouye, mahi ankho kaliwa nounye. Siovaa kesukisile omunthu umumana ounye, ankho ukahi-ale nawa. Mahi mokonda ukahi nawa, atungu onoandyu novanthu. Ankho uhanda navo vakale nehambu. — Sal. 36:9; 1 Suau 4:19.

2. Oñgeni Sesusi no noandyu velitehelela novipuka Siovaa atunga?

² Tete, Siovaa watunga Omona wae Sesusi. Pahe Sesusi emukuatesako okutunga “ovipuka aviho ovikuavo,” okukutikinyamo onoandyu. (Kolo. 1:16) Omukanda wa Provérbios 8:30 upopia okuti Sesusi ankho uhambukilwa okuundapa na Tate yae. Onoandyu, nambo mbahambukilwe unene okutala ovipuka aviho Siovaa, Nomona wae vatunga keulu na pano pohi. Ombimbiliya ipopia okuti ‘mbakuililile nehambu’ etyi eheke liatungwa. Tuna onthumbi yokuti mbatuaileko okuhambukilwa ovipuka ovikuavo Siovaa atunga. Pahe soka oñgeni mbelitehelele etyi Siovaa atunga ovanthu? (Jó 38:7; Pro. 8:31) Ovipuka ovio aviho Siovaa atunga, vilekesa okuti una oluembia, omunongo. — Sal. 104:24; Loma 1:20.

3. Ngetyi tyipopia 1 Ova Kolindu 15:21, 22, otyilikutila tya Sesusi tyituyeka okulinga-tyi?

³ Siovaa watunga eheke opo ovanthu vakale-mo apeho.  Pahe ovo Andau na Eva avatyopola ovipuka, avehetavela ku Siovaa. Okutuka opo onkhali nononkhia ambunyingila mouye. (Loma 5:12) Oityi Siovaa alinga? Asoko kotyipuka apondola okulinga opo ayovole ovanthu. (Gên. 3:15) Asoko okuava Omona wae opo ayovole ovana va Andau na Eva konkhali no kononkhia. Pahe aveho vena omutima omuwa, vapondola okumuumbila, avakakala nomuenyo uhapu. — Suau 3:16; Loma 6:23; tanga 1 Ova Kolindu 15:21, 22.

4. Omapulo patyi maakumbululwa monthele ei?

⁴ Tyina tusoka ketutilo, tupondola okukala nolumbwe luokunoñgonoka ovipuka ovinyingi. Mongeleka, oñgeni ovanthu mavakatutiliswa? Okuti matukeveimbuka? Omokonda yatyi tupopila okuti etutilo maliketuhambukiswa? Oityi etutilo litulongesa konthele yoluembia, nounongo, noumphua-lundo wa Huku? Onthele ei, maikumbulula omapulo oo.

5. Omokonda yatyi tupopila okuti ovanthu mavakatutiliswa monkhalelo yaongana nawa?

⁵ Mokutala, ovanthu kamavatutiliswa vala monthiki ike. Omokonda yatyi tupopila ngotyo? Mokonda Siovaa uhole ovipuka viaongana nawa. Pahe soka vala inkha ovanthu vatutiliswa vala monthiki ike! Okuti kamavahangayala? Siovaa utyii okuti opo pano pohi pakale ombembwa, ovipuka vina okulihila-hila nawa. (1 Kol. 14:33) Etyi Siovaa na Sesusi vati po kuatunga ohi, vatunga katutu-katutu, vati avatungu etyi, avatungu etyi. Otyo tyilekesa okuti Siovaa omunongo iya wapwa-elundo. Sesusi nae otyo makalinga ngotyo tyina amakatumina omanima 1000. Mavakaundapela  kumwe na vana mavahupu mo Alumagedom, okutunga omaumbo, nokutaindya okulia, nomuvalo, novipuka ovikuavo pala vana mavatutiliswa. Otyo tyesukisa ounongo, noumphua-lundo.

6. Ngetyi tyipopia Ovilinga 24:15, tyihe-vaumbili va Siovaa vala, ovalie vali mavakatutiliswa?

⁶ Otyipuka tyesukisa vali matyikalinga vana mavakahupa mo Alumagedom, okulongesa vana mavakatutila konthele Youhamba wa Huku, novitumino viae. Omokonda yatyi? Omokonda ovanyingi mavakatutililswa, ovo vana Ombimbiliya ipopia okuti havaviuki-ko. (Tanga Ovilinga 24:15.) Mavesukisa okuyekapo ovituwa ovivi opo vakaleko apeho. Matukakala novilinga ovinyingi viokulongesa otyili onthumbo yovanthu vehei natyike konthele ya Siovaa. Okuti matukevelongesa ngetyi tulongesa ovalongwa vetu hono? Okuti makukakala omawaneno omu mamukalongeswa vana mavatetekela okututiliswa opo navo valongese vali vakuavo maveya konyima yavo? Onthue katutyii. Etyi twii okuti tyina Sesusi amakatumina omanima 1000, “ohi aiho maikeyula enoñgonoko lya Siovaa.” (Isa. 11:9) Tyotyili, matukakala novilinga ovinyingi!

7. Omokonda yatyi ovaumbili va Siovaa mavekesukisila okupwa-elundo, tyina valongesa vana mavatutiliswa?

⁷ Momanima oo aeho Sesusi makatumina, ovaumbili va Huku pano pohi, mavesukisa okutualako okupilulula ovituwa viavo opo vemuhambukiswe. Mavekesukisa okupwa-elundo na vana mavatutiliswa tyina valinga ononkhono mbokuluisa omayembelo avo omavi opo vaendele movitumino vya Huku. (1 Pet. 3:8) Vana mavakatutiliswa mavamono okuti ovanthu va Huku vekahi nawa, navo avahande okuliwaneka navo. Mahi ovaumbili va Huku, navo mavesukisa okutualako okuundapela eyovo liavo, tyilekesa okuti vena okutualako okulikuatesila opo vahambukiswe Huku. — Fili. 2:12.

8. Omokonda yatyi tupopila okuti matukaimbuka vetu mavatutiliswa?

⁸ Onthue matukaimbuka vetu mavakatutiliswa. Mongeleka, tutalela ku etyi Siovaa alingile pu etyi atutilisile ovanthu kohale. Wevetutilisile avakala umwe ngetyi ankho vekahi, otyipala, nondaka yatyo, avatualako okusoka ngetyi ankho vasoka. Tala okuti Sesusi waeleka ononkhia nolumphoki, etutilo elieleka nokupahulwa-po. (Mat. 9:18, 24; Suau 11:11-13) Oñgeni omunthu akala tyina amapahulwa-po? Okuti utyituka omunthu omukuavo? Utupu vali etyi ahinangela? Au. Nkhele tusokei ku Lasalu. Wakalele ononthiki ononkhuana tyankhia, olutu lwae ankho luahimbika okuvola. Mahi etyi Sesusi emututilisa, onomphange mbae avehemuimbila, nae eheveimbila. — Suau 11:38-44; 12:1, 2.

9. Omokonda yatyi tupopila okuti ovanthu kamavatutiliswa tyihena onkhali?

⁹ Siovaa wapopia okuti tyina Sesusi amatumina ohi, petupu vali ou makati “ame navela.” (Isa. 33:24; Loma 6:7) Otyo tyilekesa okuti ovanthu mavakatutiliswa nekongoko. Mahi katyilekesa okuti mavatutiliswa tyihena onkhali, mokonda ine vatutiliswa tyafuapo, ombunga yavo kamaikeveimbuka. Mokutala, ovanthu aveho mavayovoka konkhali, katutu-katutu. Omanima 1000 Sesusi matumina, mafuisapo atyiho Siovaa ahandela ovanthu neheke, okukutikinyamo okupola onkhali mouye. Pahe tyina amalingi ovipuka ovio aviho,  akondola outumini ku Tate yae. — 1 Kol. 15:24-28; Ehol. 20:1-3.

10. Oñgeni mokakala tyina venyi vamatutiliswa?

¹⁰ Utyivila okusoka kehambu mokala nalio monthiki mamulivasi no venyi vatutiliswa? Okuti mokayola ine mokatokesa ononkhuka? Okuti mohambukwa unene, ohimbika okuimbila Siovaa? Katutyii. Etyi twii okuti, ove mokapandula unene Tate yetu Siovaa, Nomona wae etyi vasoka okututilisa ovanthu.

11. Ngetyi tyipopia Suau 5:28, 29, oityi Huku makalingila vana vatutiliswa avalingi ononkhono mbokutavela ovitumino viae?

¹¹ Soka oñgeni vana mavatutiliswa mavelitehelela putyina velilula ontheto onkhulu, otyo vahimbika okuendela movitumino vya Huku. Ine valinga etyi Siovaa atuma, mavakapewa omuenyo uhapu. Mahi vana vatutiliswa, avaanye okutavela Huku, kamavakayekwa vanyone ombembwa ya vakuavo. — Isa. 65:20; tanga Suau 5:28, 29.

12. Omokonda yatyi tupopila okuti vana mavakakala pano pohi mavakapewa elao na Siovaa?

¹² Tyina Ouhamba wa Huku wamatumina eheke, aveho ovaumbili vae mavamono okuti onondaka mba Provérbios 10:22, mbupopia umwe otyili. Mbati: “Elao lya Siovaa likalesa omuhona, ngwe kayawisako oluihamo.” Ononkhono mba Huku, mambukakuatesako ovanthu vae okukala ovahona. Monondaka ononkhuavo, ovaumbili va Huku matyikevepepukila okuhetekela ovituwa vya Sesusi, mokonda katutu-katutu mavakala tyihena nkhali. (Suau 13:15-17; Efe. 4:23, 24) Aveho mavakala nehambu, avakala ovanthu ovawa! Ononthiki ambuho vapinduka-po tyelikalela netyi valangala-po. (Jó 33:25) Mahi oñgeni okusokolola ketutilo tyipondola okukukuatesako hono?

13. Ngetyi tyipopia Salmo 139:1-4, oñgeni etutilo lilekesa okuti Siovaa utwii nawa?

¹³ Ngetyi tuapopia-le, Siovaa matutilisa ovanthu ngetyi ankho vekahi, novituwa viavo, nomalusoko avo. Utyii otyo tyilekesa-tyi? Tyilekesa okuti Siovaa ukuhole unene. Umona etyi usoka, nonkhalelo ulitehelela, netyi upopia, netyi ulinga. Ngotyo, tyina ameya pokukututilisa, mekututilisa umwe ngetyi ukahi, ohinangela ovipuka aviho ankho wii-ale. Ohamba Daviti nae ankho utyii okuti Siovaa utwii nawa. (Tanga Salmo 139:1-4.) Mahi oñgeni okunoñgonoka otyipuka otyo tyipondola okutukuatesako?

14. Oñgeni tulitehelela tyina tuhinangela okuti Siovaa utwii nawa?

¹⁴ Okunoñgonoka okuti Siovaa utwii nawa, katyipondola okutusukalalesa. Omokonda yatyi? Hinangela okuti Siovaa wesuka no ove. Wekupaka momutima wae. Wii etyi ukahi, novipuka viaenda momuenyo wove. Okunoñgonoka nawa otyipuka otyo, tyitulisa omutima, hatyo? Kupondola okusoka okuti petupu ou wesuka no ove. Ononthiki mbatyo ambuho, onominutu mbatyo ambuho, Siovaa uli ponthele yove na ekukuateseko tyina wesukisa. — 2 Crô. 16:9.

15. Oñgeni etutilo lilekesa okuti Siovaa omunongo?

¹⁵ Ovanthu vokutila owoma ononkhia, tyina vahongwa okuti mavaipawa, valinga ovipuka viahasilivila. Mongeleka, valavisa omapanga avo, nokulinga ovipuka vei okuti viapenga. Mahi onthue hangotyoko tukahi,  mokonda tutyii okuti ovanthu nga vetuipaa, Siovaa metukondolela omuenyo. (Ehol. 2:10) Tutyii okuti vetupu-ale etyi vapondola okulinga opo vetuyapule ku Siovaa. (Loma 8:35-39) Wamona ounongo wa Siovaa metutilo? Satanasi uhonga ovanthu nononkhia opo valinge etyi ahanda. Mahi onthue katutavela okulinga etyi ahanda mokonda tutyii okuti ine tunkhia, Siovaa metututilisa.

16. Omapulo patyi wesukisa okulipula? Oñgeni omakumbululo atyo apondola okukukuatesako okunoñgonoka ine uyumba umwe onthumbi mu Siovaa?

¹⁶ Inkha vana veyele Siovaa vekuhonga okuti mavekuipaa, okuti moyekela omuenyo wove pomavoko a Siovaa nonthumbi yokuti mekututilisa? Oñgeni monoñgonoka ekumbululo liepulo olio? Otyipuka tyimwe upondola okulinga, okulipula okuti: ‘Okuti ovipuka ndyilinga ononthiki ambuho vilekesa okuti ndyiyumba onthumbi Siovaa?’ (Luka 16:10) Tupu soka ku etyi: Siovaa wapopia okuti matekula vana vapaka Ouhamba wae pomphangu yo tete. Pahe lipula okuti: ‘Onkhalelo ndyityinda omuenyo ilekesa okuti ndyiyumba onthumbi onondaka ombo?’ (Mat. 6:31-33) Inkha wakumbulula okuti yoo, tyilekesa okuti uyumba onthumbi mu Siovaa. Onthumbi oyo, maikukuatesako movitateka upondola okukala navio komutwe wandyila. — Pro. 3:5, 6.

17. (a) Oñgeni etutilo lilekesa okuti Siovaa wapwa-elundo? (b) Oñgeni matulekesa okuti tuapandula oumphua-lundo wa Siovaa?

¹⁷ Siovaa wakoya-le onthiki noola mahanyeko ouye uno wa Satanasi. (Mat. 24:36) Makevelela umwe atee onthiki oyo ihikapo. Namphila ahanda umwe okututilisa ovanthu, mahi wapwa-elundo. (Jó 14:14, 15) Una nokukevelela omuvo watyo opo evetutilise. (Suau 5:28) Oumphua-lundo wa Siovaa utulunda okumupandula. Nkhele soka: Onthue tuakala vala nomuvo wokulivela ononkhali mbetu mokonda Siovaa wapwa-elundo, ine hatyo? (2 Pet. 3:9) Siovaa uhanda ovanthu vatyo aveho vakamone omuenyo uhapu. Ngotyo, tulingei ovipuka vilekesa okuti tuapandula oumphua-lundo wa Siovaa. Otyipuka tyimwe tupondola okulinga, okuovola nawa vana “vahanda omuenyo uhapu” opo tuvekuateseko okuhumba Siovaa, nokumufenda. (Ovil. 13:48) Inkha tulinga ngotyo, navo mavapolo ouwa koumphua-lundo wa Siovaa ngo onthue.

18. Omokonda yatyi tuesukisila okupwa-elundo na vakuetu?

 ¹⁸ Onthue matuyovoka vala konkhali, tyina omanima 1000 amalambe. Atee onthiki oyo ihikapo, Siovaa matualako okupwa-elundo no onthue, nokutuevela ononkhali mbetu. Otyo tyitulongesa okuti no onthue tuesukisa okutala kovipuka oviwa vakuetu valinga, nokupwa-elundo navo. Tala etyi tyaenda nomphange umwe. Omulume wae ahimbika okukala notyiho otyinene, atyikala umwe ouvela. Pahe ayekepo okuenda komaliongiyo. Wati: “Tyendyihamene unene! Pahe ankho ovipuka tuapanga okulinga, viakala-po.” Mahi atualako okupwa-elundo nomulume wae, ayumbu onthumbi mu Siovaa. Tupu alingi ononkhono mbokuhetekela Siovaa, okutala kovituwa oviwa viomulume wae. Wayawisako okuti: “Omulume wange omunthu omuwa, iya katutu-katutu una nokuya.” Otyiwa tupwe-elundo novakuatate vetu, nombunga yetu tyina vena ovitateka.

19. Oityi tuesukisa okutualako okulinga?

¹⁹ Sesusi no noandyu vahambukilwe unene etyi eheke liatungwa. Mahi nii katyitavela okusoka kehambu mavakala nalio tyina vamamono pano pohi ovanthu aveho vehena onkhali, vafenda vala Siovaa. Tupu soka kehambu ovalembulwa mavakala nalio tyina vamamono okuti ovilinga vekahi nokulinga keulu, vikahi nokukuatesako ovanthu. (Ehol. 4:4, 9-11; 5:9, 10) Soka komuvo matukatokesa vala ononkhuka mbehambu, mokonda ouvela, nononkhumbi, nononkhia mbanyimuako-ale. (Ehol. 21:4) Tyina omuvo oo uhenehikepo, tualako okuhetekela oluembia, nounongo, noumphua-lundo wa Tate yetu Siovaa. Ine ulinga ngotyo, ngokala-kala ñgo novitateka, motualako nehambu. (Tia. 1:2-4) Onthue tupandula unene Siovaa etyi etupopila okuti “makukakala etutilo”! — Ovil. 24:15.