1. Mesoriẹ i Jehova ọ ma arhọ?

O VWO ọke i Jehova ọvo ọ havwiẹ. Ọrẹn, ọnana ọ lẹrhiẹ mwuomarhọ-ọ. Fọkime ọ gbare ọrẹ kizede kizede. Ọrẹn, Osolobrugwẹ ọ guọlọre nẹ awọrọ i riakpọ. Ẹguọlọ yo mwu i Jehova tuẹn emama rhọ.—Ps. 36:9; 1 John 4:19.

2. Marhẹ oma o ruẹ i Jesu ọrhẹ emakashe na kpahen emama i Jehova?

² Ọrukaro, Jehova ọ ma Ọmọyen, Jesu. Ọke oru, Jesu nọ ha userhumu riẹn ma “ekwakwa eri hẹrhẹre ephian,” tobọ te emakashe buebun obẹ odjuwu. (Col. 1:16) Oma ọ merhen i Jesu omamọ fọkiẹ uphẹn ro no lele Ọsẹ ye wian. (Prov. 8:30) Oma ọ ji merhen emakashe na fọkiẹ ewian i Jehova. Aye i mẹrẹn ọke i Jehova ọrhẹ Jesu a ma idjuwu ọrhẹ otọrakpọ na. Me yẹ aye i ruru? Aye ni “ghwiẹ abọ aye” ọke ra ma akpọ na, o vwo ẹfro-o, oma ọ ji merhen aye ọke aye e ni ewian i Jehova, maido ituakpọ ra maren. (Job 38:7; Prov. 8:31) Owuowu usuẹn emama enana i dje ẹguọlọ ọrhẹ ẹghwanren i Jehova phia.—Ps. 104:24; Rom. 1:20.

3. Sekpahen 1 Corinthians 15:21, 22, me yẹ izobo otan i Jesu o ru phia?

³ Jehova ọ guọlọre nẹ ituakpọ i riamerhen arhọ i bẹmẹdẹ uvuẹn otọrakpọ na. Ọrẹn, Adam ọrhẹ Eve ni kparehaso i Jehova, ọdandan ọrhẹ uhwu nọ ruẹ akpọ na. (Rom. 5:12) Marhẹ i Jehova ọ kpahenrhọ ye lele? Ogege, nọ kpare udjoghwẹ ro no simi ituakpọ. (Gen. 3: 15) Jehova no mwuegbe otan rọ nọ lẹrhẹ emọ Adam ọrhẹ Eve vabọ ọdandan ọrhẹ uhwu. Jehova nọ ha uphẹn rhotọre nẹ owuowọnwan ọ djẹ odjẹ rọ nọ ga ye, ji vwo arhọ i bẹmẹdẹ.—John 3:16; Rom. 6:23; se 1 Corinthians 15:21, 22.

4. Enọ egọ ye ne yono kpahen uvuẹn urhomu-ẹmro ọnana?

⁴ Enọ sansan i homaphia fọkiẹ ive Osolobrugwẹ kpahen ẹrhọmọnuhwu na. Jerẹ udje, marhẹ ẹrhọmọnuhwu na ọnọ phia lele? Ana sabu vwrurhe ihworho ọwan re vwo ẹguọlọ kpahen ra rhọmọnuhwu? Marhẹ ẹrhọmọnuhwu na ono ru rhua aghọghọ vwe ọwan? Marhẹ eroro kodo kpahen ẹrhọmọnuhwu na ono ru bọn ọdaremẹro ọwan kpahen ẹguọlọ, ẹghwanren ọrhẹ erhionrin Jehova? Jene yono kpahen enọ enana owuowu.

5. Mesoriẹ ene je roro taghene ana rhọmọ ihworho ephian ukwọgbọ?

⁵ Ọke i Jehova ọnọ nyoma Ọmọyen rhọmọ iduduru ihworho, ana sabu roro taghene orhiẹ aye ephian ya na rhọmọnuhwu ukwọgbọ-ọ. Mesoriẹ? Fọkime ẹrhọmọnuhwu iduduru ihworho ukwọgbọ ọnọ sabu suẹ ọyanghan. Habaye, Jehova o vwo ruẹ ekwakwa ye izede yanghan yangha-an. Ọye o rhe oborẹ o ruẹ ekwakwa ye lele nẹ ufuoma ọ sabu rhirhiẹ ye. (1 Cor. 14:33) Jehova o vwo ẹghwanren ọrhẹ erhionrin ọke ro lele i Jesu wian mwuegbe otọrakpọ na, nẹ ituakpọ i sabu rhirhiẹ ye. Riobarorhọ, Jesu ono dje iruemru enana phia ọke ro no suon uvwre ẹgbukpe Uriusionrin na, ro no lele ihworho ri vrẹn Armageddon wian  mwuegbe akpọ na hẹrhẹ ihworho ra na rhọmọnuhwu.

6. Lele oborẹ ọ ha Acts 24:15, ayọmo yi ha usuẹn era na rhọmọnuhwu na?

⁶ Owian ọghoghanren owu rẹ ihworho ri vrẹn Armageddon ina wian yẹ, ọrẹ aye ine yono era rhọmọnuhwu na kpahen Uvie i Jehova ọrhẹ irhi enẹyen. Mesoriẹ? Fọkime “eri vwe rhiẹ evwata” i ha usuẹn era na rhọmọnuhwu. (Se Acts 24:15.) Aye ine ruẹ ewene buebun neneyo aye i sabu mẹrẹn erere nẹ otan i Kristi. Roro kpahen owian rọ havwiẹ re ne yono iduduru ihworho ri vwe rhe i Jehova. Ana ha uyono i Baibol mwu rẹn owuowọnwan jerẹ oborẹ a ha uyono i Baibol mwuẹ inyenana? Owuowọnwan usuẹn era rhọmọnuhwu na, ono rhirhiẹ ukoko owuowu ne yonie oborẹ ono ru yono ihworho erọrọ ra rhọmọnuhwu? Ana hẹrhẹ ọke ọrana, na mẹrẹn oborẹ ọnọ phia. Ọrẹn, e rheri taghene uvuẹn oba Isuensun i Kristi ọrẹ Ẹgbukpe Uriusionrin na, “otọrakpọ na ọnọ vuọn rhẹ irherhe i Jehova.” (Isa. 11:9) Ọnana ghini ẹgbukpe uriusionrin ro vwo ewian omamerhomẹ!

7. Mesoriẹ idibo Osolobrugwẹ ine dje ọdamẹ phia ọke aye e yono era rhọmọnuhwu?

⁷ Uvwre Isuensun i Kristi na, ọsoso emọ i Jehova ine ruẹ ewene nẹ aye i sabu lẹrhẹ oma merhiẹn. Omarana, aye ephian ine vwo ọdamẹ ọreva aye ọke aye e yono era rhọmọnuhwu rhe na, nẹ aye i sabu tiẹn edandan jeghwai mọrẹn irhi Jehova. (1 Pet. 3:8) O vwo ẹfro-o, ihworho ra rhọmọnuhwu na, ine tikẹrẹ idibo i Jehova ri vwo omeriotọre, ra ji damoma rẹ aye ina “wian usimi [aye] phia.”—Phil. 2:12.

8. Mesoriẹ ana sabu ta taghene ene vwrurhe ihworho ekrun ọrhẹ igbehian ọwan ra rhọmọnuhwu?

⁸ O vwo iroro buebun ri na lẹrhẹ ọwan ta taghene ana sabu vwrurhe ihworho ekrun ọrhẹ igbehian ọwan ra rhọmọnuhwu. Jerẹ udje, fọkiẹ iyẹnrẹn ẹrhọmọnuhwu ri phia vrẹn ne, nọ họhọre taghene Jehova ọnọ rhọmọ ihworho oborẹ aye i havwọ ugboma, ẹmro ẹta ọrhẹ iroro, jerẹ oborẹ aye i havwọ bọmọke aye i ki hwu. Karorhọ taghene Jesu ọ ha uhwu dje omerhẹn, ẹrhọmọnuhwu nọ họhọ ọke ra rhọmọ ohworho nẹ omerhẹn. (Matt. 9:18, 24; John 11:11-13) Ihworho i rha rhọmọ nẹ omerhẹn, oborẹ aye i havwọ bi yẹ aye e ji rhirhiẹ, jeghwai vwo iroro aye i vwori aye i ki ye semerhẹn. Roro kpahen udje i Lazarus. Ọye o hwu te ẹdọke ẹne ne, ugboma ye o gbon ne. Ọrẹn, ọke i Jesu ọ rhọmiẹ, imizie emẹse i vwrurhe i Lazarus ogege, ọ ji karorhọ aye.—John 11:38-44; 12:1, 2.

9. Mesoriẹ ihworho ra rhọmọnuhwu ina ja rhọmọ rhẹ iroro ọrhẹ ugboma rọ gbare?

⁹ Jehova o veri taghene o vwo ohworho owuorowu rọ nọ ta taghene ọye o ‘kpomẹ’ ọke i Jesu ono suo-on. (Isa. 33:24; Rom. 6:7) Omarana, ihworho ra rhọmọnuhwu rhe ine vwo ugboma ọkpokpọ. Ọrẹn, aye i ghwai rhiẹ ihworho ri gbare ogege-e. Orhiomaran, ekrun ọrhẹ igbehian aye i sabu vwrurhe aye-e. Ọ họhọre taghene bibiesuọn yẹ ituakpọ ephian ine rhiẹ ihworho ri gbare uvwre Isuensun i Kristi na. Uvuẹn obẹta usuon na yi Jesu ọnọ rharhumu ha Uvie na rẹn Ọsẹ ye. Ọke ọrana, Uvie na ọ ha ekwakwa ephian te orugba ne, ituakpọ ephian  i rhiẹ ihworho ri gbare ne.—1 Cor. 15:24-28; Rev. 20:1-3.

10. Marhẹ ẹrhọmọnuhwu na ono ru hobọte owẹwẹ?

¹⁰ Roro kpahen oborẹ oma ono ruo ọke wu na mroma ohworho ra rhọmọnuhwu rhe. Aghọghọ wu ne vwo ọnọ lẹrhuọ viẹ gbinẹ chẹẹ? Wu na so ijoro jiri Jehova? Imwẹro owu re vwori yẹ, ene vwo ẹguọlọ okokodo kpahen Jehova ọrhẹ Jesu fọkiẹ ẹghẹlẹ ẹrhọmọnuhwu na.

11. Lele ẹmro i Jesu rọ ha John 5:28, 29, me yẹ ihworho ri nyalele irhi Jehova ine rhiẹromẹrẹn?

¹¹ Roro kpahen aghọghọ rẹ ihworho ra rhọmọnuhwu ine vwo, ọke aye i tiobọnu erharhere iruemru aye ji nyerẹn akpọ aye lele irhi Jehova. Eri ruẹ ewene enana ine rhiẹromẹrẹn ẹrhọmọnuhwu ọrẹ arhọ. Obọreva ye, a ha uphẹn rẹn ihworho ri vwa huvwele i Jehova ni fi ọyanghan rhẹ akpọ i Paradais na-a.—Isa. 65:20; se John 5:28, 29.

12. Marhẹ i Jehova ono ru ha ebrurhọ rẹn ihworho ri ha otọrakpọ na?

¹² Uvuẹn usun i Kristi, ọsoso ihworho Osolobrugwẹ ine rhiẹromẹrẹn urhomẹmro ra ya rhẹ Proverbs 10:22, rọ tare: “Ebrurhọ i Jehova yọ lẹrhẹ ohworho fe, Ọye ọ vwọ ha omiamiamo ba ye-e.” Nyoma ẹhẹn ọfuanfon i Jehova, ihworho yi ni ne fe izede ọrẹ ẹhẹn, nọyẹ aye ina họhọ i Kristi rhọ, ji rhiẹ ihworho ri gbare. (John 13:15-17; Eph. 4:23, 24) Kẹdẹkẹdẹ yẹ aye ine rhe vwo omọkpokpọ. Ọnana ọke akpenyerẹn obọdẹn! (Job 33:25) Marhẹ eroro kodo kpahen ẹrhọmọnuhwu na ono ru ha userhumu wẹn vwana?

13. Lele oborẹ ọ ha Psalm 139:1-4, marhẹ ẹrhọmọnuhwu na ono ru djephia taghene Jehova ọ dabu rhe ọwan?

¹³ Jerẹ oborẹ e yono vrẹn ne, ọke i Jehova ọnọ rhọmọ eri hwuru, ọnọ rharhumu yẹ aye oghwa iroro ọrhẹ iruemru aye i vwori bi. Roro kpahen oborẹ ọrana o mevirhọ. Jehova o vwo ẹguọlọ kpahuọn te erhirhiẹ ọ karorhọ oborẹ we roro, oborẹ wa ta ọrhẹ oborẹ we ruẹ. Omarana, orhianẹ ọnọ rhọmuọ nẹ uhwu, nọyẹ ọnọ rharhumu yọ oghwa iroro ọrhẹ iruemru wu vwori bi. Orodje David ọ dabu rhe oborẹ i Jehova o vwo ọdamẹ kpahen ọwan te. (Se Psalm 139:1-4.) Erhe rhe oborẹ i Jehova o rheri ọwan te, marhẹ ono ru hobọte ọwan vwana?

14. Marhẹ eroro kodo kpahen oborẹ i Jehova o rheri ọwan te, ono ru hobọte ọwan?

¹⁴ Ọke erhe roro kodo kpahen oborẹ i Jehova o rheri ọwan te, e vwe jẹ udu bru ọwa-an. Mesoriẹ? Karorhọ taghene Jehova ọ dabu hẹrote ọwan. O vwo ọdamẹ okokodo kpahen uruemru sansan re vwori. Ọ dabu djokarhọ ekwakwa sansan re rhiẹromẹrẹn uvuẹn akpenyerẹn ọwan. Ọnana emru urhebro dẹn! E vwe roro taghene ọwan ọvo yi havwiẹ-ẹ. Jehova ọrhẹ ọwan i havwiẹ kẹdẹkẹdẹ, ọ guọlọ izede rọ nọ hobọtua ọwan.—2 Chron. 16:9.

15. Marhẹ ẹrhọmọnuhwu na o ru dje ẹghwanren i Jehova phia?

¹⁵ Ihworho ephian a zofẹn uhwu. Ihworho ri ha otọre usun Echu, a haye gba ihworho je vwo atamwu kpahen igbehian aye yanghene lẹrhẹ aye ru oborẹ  o biomurun. Ọrẹn, aye i sabu gba ọwan ru ọrana-a. E rheri taghene evwreghrẹn ọwan i rhe kpe ọwan hwu, Jehova ọnọ rhọmọ ọwan. (Rev. 2:10) E vwo imwẹro taghene o vwo oborẹ aye i ruru rọ nọ lẹrhẹ ọwan ja ga i Jehova-a. (Rom. 8:35-39) Ẹrhọmọnuhwu na o ghini dje ẹghwanren i Jehova phia! Nyoma ọnana, a vwa rha zofẹn ọke ihworho Echu a djofẹn uhwu mwu ọwa-an, habaye ọ ji lẹrhẹ ọwan vwo uduefigbere re ne vwo atamwu kpahen Jehova.

16. Enọ ego yo fori ne wu nọ oma, marhẹ ẹkpahenrhọ na ono ru ha userhumu wẹn rhe oborẹ wu hẹroso i Jehova te?

¹⁶ Orhianẹ evwreghrẹn i Jehova i djofẹn uhwu mwuo, wu na hẹrosuiẹ taghene ọnọ rhọmuọ nuhwu? Marhẹ wu ne ru hẹroso i Jehova? Izede owu yẹ ọrẹ wu na nọ oma, ‘Orhienbro ekokamo mie bruẹ kẹdẹkẹdẹ e djephia taghene mi hẹroso i Jehova?’ (Luke 16:10) Onọ ọrọrọ ra na ji sabu nọ yẹ, ‘Irueruo akpenyerẹn mẹ o djephia taghene mi hẹroso ive i Jehova taghene ọnọ hẹrote edamẹ enẹmẹ, mi rha ha Uvie yi karo?’ (Matt. 6:31-33) Orhianẹ ẹkpahenrhọ rẹn enọ erana, ee, nọyẹ we djephia taghene wu hẹroso i Jehova, ji mwuegbe wu ne din ebẹnbẹn ephian wu rhiẹromẹrẹn.—Prov. 3:5, 6.

17. (a) Marhẹ ẹrhọmọnuhwu na o ru djephia taghene Jehova o vwo erhionrin? (b) Marhẹ ene ru dje ọdaremẹro phia kpahen erhionrin Jehova?

¹⁷ Jehova o vwo ẹdẹ ọrhẹ unọke rọ nọ ghwọghọ akpọ ọkon ọnana. (Matt. 24:36) Ọnọ kpare udjoghwẹ ọke ọrana orho te ne. O vwo omwemẹ rọ nọ rhọmọ eri hwuru, ọrẹn o vwo erhionrin. (Job 14:14, 15) Jehova ọ hẹrhẹ ọke ro serhọ rọ nọ rhọmọ aye. (John 5:28) O vwo iroro rọ soriẹ re ne vwo ọdaremẹro kpahen erhionrin Jehova. Gbe rorie: Fọkime Jehova o vwo erhionrin, ihworho buebun tobọ te ọwan i vwo uphẹn ra “ghwẹriẹ.” (2 Pet. 3:9) Jehova ọ guọlọre taghene ihworho buebun i vwo uphẹn aye ine vwo arhọ i bẹmẹdẹ. Omarana, jene djephia taghene e vwo ọdaremẹro kpahen erhionrin ọnẹyen. Izede ọgo? Nyoma ra na dabu guọlọ ihworho “ri vwo omamọ ẹhẹn ri ne vwo arhọ i bẹmẹdẹ,” ji ha userhumu rẹn aye vwo ẹguọlọ kpahen Jehova jeghwai ga ye. (Acts 13:48) Ọke ọrana,  aye ni na mẹrẹn erere nẹ erhionrin Jehova, jerẹ ọwan.

18. Mesoriẹ o fo ne vwo erhionrin kpahen awọrọ?

¹⁸ Jehova ono vwo erhionrin hẹrhẹ te oba ẹgbukpe uriusionrin na, ne ki rhiẹ ihworho ri gbare. Ne ki te ọke ọrana, Jehova o mwuegbe rọ nọ harhomu edandan ọwan. Omarana, o fori na hẹrokele i Jehova ji tẹnrovi omamọ iruemru awọrọ. Roro kpahen udje omizu ọmase owu rẹ esa ye o vwo ọfiamu ọgbogbanhon, rọ ji dobọ uyono ẹnya ji. Omizu ọmase na nọ tare, “Erhirhiẹ na ọ dare mẹ omamọ. Ame i vwa rha sabu ruẹ ekwakwa ame i guọlọ ru jerẹ ekrun ghwomara-an.” Ọrẹn udabọ ọrana, Omizu ọmase ọnana o vwo erhionrin kpahen esa ye. Ọ hẹroso i Jehova, o fiobọrhotọre-e. Jerẹ Jehova, ọ tẹnrovi ebẹnbẹn na-a, ukpomaran iruemru irhorhomu esa ye. Nọ tare, “Esa mẹ o vwo iruemru irhorhomu sansan, ọ ji damoma ro no fi obẹnbẹn ọfiamu na kparobọ.” Ọghanranren omamọ ne vwo erhionrin kpahen ihworho ekrun ọwan yanghene imizu ukoko na, ra damoma aye ine fi ebẹnbẹn kparobọ!

19. Me yo fori ne brorhiẹn yen?

¹⁹ Oma ọ merhen i Jesu ọrhẹ emakashe na, ọke re tu ma otọrakpọ na. Ọrẹn, roro kpahen aghọghọ ro no rhirhiẹ ye ọke aye ina mẹrẹn akpọ na rọ vuọnren rhẹ ihworho ri gbare, ri vwo ẹguọlọ kpahen Jehova, ra ji ga ye. Roro kpahen aghọghọ ro no rhirhiẹ ye rẹn era dẹ nẹ akpọ na, nẹ aye i leli Kristi sun, ọke aye a mẹrẹn ituakpọ ra riamerhen ewian aye. (Rev. 4:4, 9-11; 5:9, 10) Gbe ji roro kpahen oviẹ aghọghọ ro no wene oviẹ emiamiamo, emiamo, ebẹnbẹn ọrhẹ uhwu bẹmẹdẹ. (Rev. 21:4) Bọmọke ọke ọrana ono ki te, brorhiẹn wu na hẹrokele ẹguọlọ, ẹghwanren ọrhẹ erhionrin Jehova. Wu rhe ruẹ omaran, wu na sẹrorẹ aghọghọ ọnọ, o toro ebẹnbẹn wu dẹrughwaroghwu-u. (Jas. 1:2-4) Oma ọ merhen ọwan taghene Jehova o veri taghene “ono vwo ẹrhọmọnuhwu”!—Acts 24:15.