1. Wuarom wull Jehova, daut uk noch aundre läwen kunnen?

AUM Aunfank jeef daut noch mau bloos Jehova, oba hee feeld sikj nich auleen. Am fäld daut nich aun aundre, daut hee kunn schaftich sennen. Oba wäajen hee wull, daut uk aundre läwen un schaftich sennen kunnen, funk hee ut Leew aun aules to moaken (Psa. 36:10; 1. Joh. 4:19).

2. Woo dochten Jesus un de Enjel äwa daut, waut Jehova jemoakt haud?

² Daut ieeschte muak Jehova sienen Sän Jesus. Un “derch am muak Gott aules”, waut et jeft, biejlikj uk aul de Enjel (Kol. 1:16). Jesus jinkj daut scheen, met sienen Voda tooptoschaufen (Spr. 8:30). Un de Enjel freiden sikj uk. Dee kunnen daut met äare ieejne Uagen seenen, aus Jehova met sienen Bumeista Jesus toop dän Himmel un de Ieed muak. Waut deeden de Enjel dan? Dee lowden Gott doafäa. Un dee lowden am secha uk fa aul daut aundre un besonda, aus hee de Menschen muak (Hiob 38:7; Spr. 8:31). Aun aules, waut Jehova muak, wia siene Leew un Weisheit to seenen (Psa. 104:24; Reem. 1:20).

3. Waut kjenn wie derch daut Leesjelt haben, soo aus 1. Korinta 15:21-22 sajcht?

³ Jehova wull haben, daut de Menschen fa emma kunnen opp de wundascheene Ieed läwen, waut hee jemoakt haud. Oba Adam un Eva vespälden daut eewje Läwen, aus see sikj jäajen Jehova stalden. See un uk äare Nokomen  wudden eenen Dach stoawen motten (Reem. 5:12). Waut deed Jehova doamet? Hee säd fuaz, woo hee de Menschheit raden wudd, un vespruak fa een Leesjelt to sorjen (1. Mo. 3:15). Derch sienen Sän Jesus wudden Adam un Eva äare Nokomen kjennen von Sind un Doot friekomen. Dan wudd Jehova aul deejanje eewjet Läwen jäwen kjennen, waut am deenen wellen (Joh. 3:16; Reem. 6:23; läs 1. Korinta 15:21-22).

4. Waut fa Froagen woa wie ons nu unjastonen?

⁴ Wan wie doaräwa nodenkjen, waut Gott fa de Vestorwne vesproaken haft, dan kjenn wie veleicht äwalajen: Woo woat daut sennen, wan dee oppstonen? Woa wie onse Aunjehieeje wada kjanen? Äwa waut woa wie ons dan freien, wan de Doodes oppstonen? Un waut lia wie äwa Jehova siene Leew, Weisheit un Jedult, wan wie äwa daut oppstonen vom Doot nodenkjen? Dise Froagen woa wie ons nu unjastonen.

5. Wuarom kjenn wie daut sajen, daut de Vestorwne nich aula tojlikj oppstonen woaren?

⁵ Secha woat Jehova derch Jesus nich millionende Menschen opp eemol vom Doot oppwakjen. Wuarom kjenn wie daut sajen? Wiels wan doa plazlich väl mea Menschen oppe Ieed sennen wudden, dan wudd doa leicht kjennen aules derchenaunda dreien. Oba Jehova deit emma aules ordentlich, wiels hee weet, wan doa Ordnunk es, dan jeft daut uk Fräd (1. Kor. 14:33). Jehova wia jeduldich un weis, aus hee met Jesus toop de Ieed reedmuak, daut doa kunnen Menschen läwen. Un en de dusent Joa, wua Jesus aus Kjennich harscht, woat hee krakjt soo jeduldich un weis sennen, wan hee met dee toopschauft, waut Harmagedon äwaläft haben. Dee woaren dan de Ieed doafäa reedmoaken, daut de Doodes oppstonen kjennen.

6. Wäa woat no Aposteljeschicht 24:15 no uk vom Doot oppstonen?

 ⁶ Waut woat eene wichtje Oabeit sennen, waut dee doonen woaren, waut Harmagedon äwaläwen? Dee woaren deejanje, waut vom Doot oppstonen, lieren, waut daut Kjennichrikj es un waut Jehova von ons velangt. Wuarom es daut needich? Wiels de mieeschte, waut vom Doot oppstonen, woaren mank “de ojjerajchte” talen (läs Aposteljeschicht 24:15). Daut dise Menschen von Jesus sien Opfa eenen Nutzen kjrieen, motten dee sikj gaunz endren. Denkj mol han, woo väl Oabeit daut jäwen woat, millionende Menschen to lieren, waut nuscht von Jehova weeten. Woa wie dee aula eenselwies lieren, soo aus bie onse Bibelstudiums vondoag dän Dach? Woaren de Niee dan to eene Vesaumlunk jehieren? Un woaren dee doa dan utjelieet, woo dee aundre halpen kjennen, waut lota oppstonen? Daut woa wie dan seenen. Oba eent weet wie: Oppe gaunze Ieed woat “Vestentnis fa däm HARN sennen”, wan de dusent Joa to Enj sent, wua Jesus rejieet (Jes. 11:9). Daut woat eene sea drocke, oba eene scheene Tiet sennen!

7. Wuarom woaren Jehova siene Deena met dee metfeelen kjennen, waut vom Doot oppstonen?

⁷ En de dusent Joa woaren aule, waut to Jehova sien Volkj jehieren, sikj aunstrenjen motten am to jefaulen. Doawäajen woaren dee uk met deejanje metfeelen kjennen, waut vom Doot oppstonen, wan dee an halpen, jäajen schlajchte Wenschen to kjamfen un soo to läwen, aus Jehova daut fa rajcht talt (1. Pet. 3:8). Dee, waut wada toom Läwen komen, woaren seenen, daut Jehova siene Deena deemootich sent un sikj wieda aunstrenjen, sienen Wellen to doonen. Un secha wellen dee dan uk Jehova deenen (Filip. 2:12).

8. Wuarom kjenn wie sajen, daut wie deejanje wada kjanen woaren, waut vom Doot oppstonen?

⁸ Daut sitt soo, daut dee, waut de Vestorwne oppnämen, wan dee vom Doot oppstonen, äare Frind un Frintschoft wada kjanen woaren. Wuarom kjenn wie daut sajen? Daut haft biejlikj doamet to doonen, woo daut ieeschtemma wia, wan Menschen vom Doot oppstunden. Daut späat sikj soo, daut dee wada krakjt soo leet un daut dee krakjt soo räden un denkjen deeden aus ver äaren Doot. Secha woat Jehova lota uk doafäa oppkomen, daut et soo sennen woat. Un Jesus säd je, daut de Doot soo wia aus een Schlop un daut oppstonen soo, aus wan eena wada oppwakjen wudd (Mat. 9:18, 24; Joh. 11:11-13). Woo es daut, wan doa wäa schlapt un oppwakjt? Jeweenlich rät dee noch krakjt soo aus ea, un dän sitt uk soo un dän denkjt noch von aules. See wie mol, woo daut bie Lazarus wia. Hee wia aul vea Doag doot un sien Kjarpa haud aul aunjefongen to vewäsen. Oba aus Jesus am dan oppwuak, kjanden siene Sestren am fuaz un Lazarus an secha uk (Joh. 11:38-44; 12:1-2).

9. Wuarom woaren deejanje, waut vom Doot oppstonen, nich fuaz volkomen sennen?

⁹ Jehova vespruak, daut em Paradies kjeena sajen wudd: “Ekj sie nich jesunt” (Jes. 33:24; Reem. 6:7). Daut wiest, daut de Menschen eenen jesunden Kjarpa haben woaren, wan dee oppstonen. Oba dee woaren nich fuaz volkomen sennen, wiels äare Frind un Frintschoft an sest woomäajlich nich kjanen wudden. Daut späat sikj soo, daut aule Menschen en de dusent Joa soo bie sacht volkomen woaren. Un opp Enj von de dusent Joa woat Jesus sienen Voda daut Kjennichrikj trigjäwen. Dan  woat aules volbrocht sennen, waut daut Kjennichrikj doonen sull, un aule Menschen woaren volkomen sennen (1. Kor. 15:24-28; Opb. 20:1-3).

10. Woo woat daut fa ons sennen, wan de Doodes oppstonen?

¹⁰ Denkj mol han, woo daut sennen woat, wan du diene Frind un Frintschoft wada seenen kaust. Woascht du dan fa Freid lachen ooda roaren? Ooda woascht du soo schaftich sennen, daut du sinjen woascht toom Jehova lowen? Gaunz secha woascht du dan groote Leew haben fa onsen leeftoljen himlischen Voda un sienen leewen Sän, waut daut oppstonen mäajlich muaken.

11. Waut woaren dee beläwen, waut Gott jehorchen, soo aus Johanes 5:28-29 wiest?

¹¹ Woo woat daut fa dee sennen, waut doa oppstonen? Dee woat daut sea scheen gonen, wan dee sikj endren un soo läwen, aus Gott daut jefelt. Opp dee Wajch “stonen [dee] opp toom Läwen”. Oba fa dee, waut sikj jäajen Gott stalen, woat em Paradies kjeen Rum sennen, wiels doa woat aules frädlich sennen (Jes. 65:20; läs Johanes 5:28-29).

12. Woo woat Jehova aul dee säajnen, waut oppe Ieed läwen woaren?

¹² Wan Gott sien Kjennichrikj äwa de Ieed rejieet, woat jieda eena von Gott siene Deena enwoaren kjennen, woo Spricha 10:22 sikj erfelt. Doa sajcht et: “Gott sien Säajen moakt eenem rikj, eenem siene Mieej moakt daut nich mea.” Derch Jehova sienen Jeist woaren siene Deena em jeisteljen rikj woaren, wiels dee woaren emma dolla no Christus likjnen un volkomen woaren (Joh. 13:15-17; Efs. 4:23-24). Dee woaren jieda Dach mea Krauft haben un bätre Menschen woaren. Dan woat daut Läwen bloos noch scheen gonen! (Hiob 33:25). Oba woo kaun ons daut nu halpen, daut wie äwa daut oppstonen von de Doodes nodenkjen?

13. (a) Woo wiest Psalm 139:1-4, daut Jehova ons sea goot kjant? (b) Woo woat sikj daut bie daut oppstonen vom Doot utwiesen?

¹³ Soo aus wie aul jeseenen haben, woat Jehova de Menschen krakjt soo vom Doot oppwakjen, aus dee ea mol wieren. Waut jeft daut auntovestonen? Daut Jehova die soo väl räakjent, daut hee nu aul aules em Denkj helt, waut du denkjst, feelst, sajchst un deist. Bloos opp dee Wajch wudd hee die kjennen krakjt soo oppwakjen, aus du ea mol wieescht. De Kjennich David wist, daut Jehova om jiedrem eenen von ons sea bekjemmat wia (läs Psalm 139:1-4). Woo kaun ons daut halpen, wan wie doaräwa nodenkjen, daut Jehova ons sea goot kjant?

14. Woo kaun ons daut halpen, wan wie doaräwa nodenkjen, woo goot Jehova ons kjant?

¹⁴ Wan wie doaräwa nodenkjen, woo goot Jehova ons kjant, dan bruck wie ons nich Sorjen moaken. Wuarom nich? Wie weeten je, daut Jehova sea om ons todoonen es. Wie sent aula veschieden un doch räakjent hee jiedrem eenen väl. Hee weet krakjt, waut wie aul beläft haben un waut daut aun ons jedonen haft. Jeft ons daut nich väl Troost? Wie derwen ons kjeenmol auleen feelen. Jehova es emma bie ons un kjikjt, woo hee ons halpen kaun (2. Chr. 16:9).

15. Woo bewiest daut oppstonen vom Doot, daut Jehova väl Weisheit haft?

¹⁵ De Angst fa dän Doot es sea jefäadlich. Dee, waut opp dän Soton siene Sied sent, kjennen dise Angst utnutzen, om wäm  bat doa to brinjen, siene Frind to veroden ooda waut orrajchtet to doonen. Oba bie ons schauft daut nich, wiels wie weeten, daut Jehova ons oppwakjen kaun, wan onse Jäajna ons uk dootmoaken (Opb. 2:10). Wie sent ons secha, daut dee nuscht doonen kjennen, om ons von Jehova auftobrinjen (Reem. 8:35-39). Daut Jehova ons de Hopninj jejäft haft, daut de Doodes oppstonen woaren, wiest, woo väl Weisheit hee haft. Wiels wie dise Hopninj haben, woa wie nich Angst haben, wan dän Soton siene Helpa ons dootmoaken wellen. Wie woaren äwanäment sennen un Jehova tru bliewen.

16. Äwa waut sell wie nodenkjen, un wuarom?

¹⁶ Woa wie ons doaropp veloten, daut Jehova ons oppwakjen woat, wan de Jäajna ons dootmoaken wellen? Woo kjenn wie daut nu aul weeten? Wie kjennen biejlikj äwalajen: “Es daut jieda Dach aun miene Entscheidungen to seenen, daut ekj opp Jehova vetru?” (Luk. 16:10). Ooda: “Es daut aun mien Läwen to seenen, daut ekj daut ieeschte no Jehova sien Kjennichrikj sieekj un mie doaropp velot, daut hee em tieteljen fa mie sorjen woat?” (Mat. 6:31-33). Wan daut bie ons soo es, dan bewies wie, daut wie ons opp Jehova veloten, un wie woaren fa aules reed sennen, waut doa komen kaun (Spr. 3:5-6).

17. (a) Woo wiest daut oppstonen von de Doodes, daut Jehova jeduldich es? (b) Woo kjenn wie wiesen, daut wie fa Jehova siene Jedult dankboa sent?

¹⁷ Jehova haft aul krakjt bestemt, wanea hee met dise oole Welt een Enj moaken well (Mat. 24:36). Hee woat nich ojjeduldich woaren un daut Enj ea brinjen. Hee haft een Velangen doano, de Vestorwne opptowakjen (Hiob 14:14-15). Oba hee wacht, bat daut de rajchte Tiet doatoo es (Joh. 5:28). Wuarom sell wie dankboa sennen fa Jehova siene Jedult? Wiels doaderch aul väle de Jeläajenheit hauden, sikj opptomoaken un äa Läwen to endren (2. Pet. 3:9). Jehova well, daut soo väl Menschen aus mäajlich daut eewje Läwen kjrieen kjennen. Woo kjenn wie wiesen, daut wie fa siene Jedult dankboa sent? Wan wie ons sea aunstrenjen, no deejanje to sieekjen, waut “to daut eewje Läwen rajcht enjestalt” sent, un dee halpen Jehova to leewen un to deenen (Apj. 13:48, NW). Dan woat Jehova siene Jedult dee krakjt soo togood komen aus ons.

18. Wuarom sell wie met aundre jeduldich sennen?

 ¹⁸ Jehova woat uk wieda jeduldich sennen met ons un nich velangen, daut wie nu aul sellen volkomen sennen, ea de dusent Joa äwa sent. Bat dan es Jehova wellich reed ons onse Sinden to vejäwen. Doawäajen sell wie uk no aundre äare goode Sieden kjikjen un jeduldich sennen met dee. Krakjt daut deed eene Sesta, aus äa Maun eene Narfenkrankheit kjrieech. Hee haud soone groote Angst, daut hee nich mea no de Toopkomes wankt. See sajcht: “Daut wia sea schwoa fa mie. Ons Läwen endad sikj haustich un wie kunnen nich mea daut doonen, waut wie jeplont hauden.” Oba dise leeftolje Ehefru wort nich ojjeduldich met äaren Maun. See veleet sikj opp Jehova un jeef kjeenmol opp. Krakjt soo aus Jehova kjikjt see bie äaren Maun dolla no de goode Sieden aus no de Trubbels. See sajcht: “Mien Maun haft sea goode Ieejenschoften un deit sien bastet, om met siene Angst emma bäta foadich to woaren.” Daut es sea needich, daut wie met soone enne Famielje ooda Vesaumlunk jeduldich sent, waut met groote Schwierichkjeiten to kjamfen haben.

19. Waut well wie doonen?

¹⁹ Jesus un de Enjel freiden sikj sea, aus de Ieed jemoakt wort. Woo schaftich woaren dee dan nich sennen, wan de gaunze Ieed voll sennen woat von volkomne Menschen, waut aula Jehova leewen un am deenen! Un woo woat deejanje daut gonen, waut met Christus toop em Himmel harschen woaren? Dee woaren sea schaftich sennen, wan dee seenen, woo äare Oabeit de Menschen togood kjemt (Opb. 4:4, 9-11; 5:9-10). Un woo scheen woat daut nich sennen, wan de Menschen bloos noch woaren fa Freid roaren un doa kjeene Sorjen, Krankheiten un Doot mea sennen woaren! (Opb. 21:4). Bat dise scheene Tiet kjemt, well wie emma onsen leeftoljen, weisen un jeduldjen Voda nodoonen. Dan woa wie kjeenmol de Freid velieren, endoont waut doa noch komen woat (Jak. 1:2-4). Woo dankboa kjenn wie nich sennen, daut Jehova vesproaken haft, daut de Menschen “vom Doot oppstonen woaren”! (Apj. 24:15).