1. Why nao Jehovah creatim olketa samting?

LO FIRSTAEM Jehovah hem stap seleva, bat hem no lonely. Hem no needim eni man or eni samting. Nomata olsem, God laekem olketa narawan for enjoyim laef. So love nao muvim Jehovah for start for creatim olketa samting.—Sams 36:9; 1 John 4:19.

2. Hao nao Jesus and olketa angel feel abaotem olketa samting wea Jehovah creatim?

² First, Jehovah wakem Son blo hem, Jesus. Then, hem iusim datfala firstborn Son blo hem, “for wakem evri nara samting,” and for wakem tu staka spirit angel lo heven. (Col 1:16) Jesus hapi for waka witim Dadi blo hem. (Provebs 8:30) And olketa angel blo hem lo heven tu olketa hapi. Olketa barava lukim taem wea Jehovah and datfala main wakaman, Jesus, tufala wakem heven and earth. Hao nao olketa angel feel abaotem datwan? Olketa barava hapi and praisem God taem olketa lukim hem wakem disfala earth, and for sure olketa gohed for hapi lo each samting wea Jehovah creatim, especially taem hem creatim olketa man. (Job 38:6, 7; Provebs 8:31) Evri samting hia wea hem creatim hem showimaot love and wisdom blo Jehovah.—Sams 104:24; Rome 1:20.

3. Olsem 1 Corinth 15:21, 22 storyim, wanem nao iumi kasem from ransom sakrifaes blo Jesus?

³ Jehovah laekem olketa pipol for enjoyim laef olowe lo disfala planet wea hem creatim wea luk naes tumas. Bat taem  Adam and Eve disobeyim datfala Dadi wea lovem tufala, sin and dae hem barava affectim nao full world. (Rome 5:12) Wanem nao Jehovah duim? Stretawe, hem talem wanem bae hem duim for helpem olketa man. (Jenesis 3:15) Jehovah plan for givim wanfala ransom wea bae mekem olketa pikinini blo Adam and Eve for kamap free from sin and dae. Datwan bae mekem evriwan savve chus for worshipim hem and then olketa savve kasem laef olowe.—John 3:16; Rome 6:23; readim 1 Corinth 15:21, 22.

4. Olketa wanem kwestin nao bae iumi storyim lo disfala study?

⁴ Staka kwestin kamap abaotem promis blo God for resurrectim olketa wea dae finis. Olsem example, hao nao maet datfala resurrection bae hem kamap? Waswe, bae iu fit for luksavve lo olketa wea bae resurrect? Lo olketa wanem wei nao datfala resurrection bae mekem iumi hapi? And hao nao wei for ting raonem datfala resurrection hem helpem iumi for tinghae lo love, wisdom and wei wea Jehovah hem patient? Distaem bae iumi story raonem olketa kwestin hia.

5. Why nao iumi fit for sei dat wei wea pipol resurrect bae hem barava followim order?

⁵ Taem Jehovah iusim Son blo hem Jesus for resurrectim staka million pipol, luk olsem evriwan bae no laef bak lo semtaem. Why nao olsem? Bikos datwan bae mekem disfala earth kwiktaem tumas for fulap lo pipol and evri samting bae olobaot. And Jehovah no enitaem duim samting lo wei wea olobaot and no organize. Hem savve dat for peace hem stap for olowe, evri samting hem mas organize gud. (1 Cor. 14:33) Jehovah God hem wise and hem patient taem hem waka witim Jesus for isisi redyim gud disfala earth bifor olketa wakem  olketa man. So Jesus tu bae showimaot olketa semkaen wei lo Wan Thousand Year Rul, taem hem waka tugeta witim olketa wea go thru lo Armageddon for redyim disfala earth for olketa wea bae resurrect.

6. Olsem Acts 24:15 storyim, olketa hu nao bae Jehovah resurrectim?

⁶ Samting wea barava important nao, olketa wea go thru lo Armageddon bae need for teachim olketa wea bae resurrect abaotem Kingdom blo God and abaotem olketa samting wea Jehovah laekem iumi for duim. Why nao olsem? Bikos staka lo olketa wea bae laef bak hem olketa “wea no raeteous.” (Readim Acts 24:15.) Olketa bae need for changem staka samting lo laef blo olketa mekem olketa fit for kasem gud samting from ransom blo Christ. Tingim go big waka wea bae kamap for teachim staka million pipol lo truth abaotem God, bikos olketa no savve lo eni samting abaotem Jehovah. Waswe, bae iumi teachim olketa wanwan olsem hao iumi conductim olketa Bible study distaem? Waswe, olketa niu wan hia bae kasem assignment for stap lo olketa kongregeson and kasem training for teachim olketa wea bae resurrect kam bihaen? Bae iumi lukluk, iumi no savve yet. Samting wea iumi savve nao hem hao lo end blo Wan Thousand Year Rul blo Christ, disfala earth bae fulap witim pipol wea barava savve gud lo Jehovah. (Aesaea 11:9) Datwan bae hem wanfala busy taem bat evriwan bae enjoyim datfala wan thousand year!

7. Why nao pipol blo God bae showimaot olketa tingim feeling blo narawan taem olketa teachim olketa wea resurrect?

⁷ Lo taem blo Wan Thousand Year Rul blo Christ, evri pikinini blo Jehovah lo earth bae mas changem wei blo olketa for mekem Jehovah hem hapi. So evriwan bae garem wei for tingim feeling blo olketa narawan taem olketa helpem olketa wea resurrect for faet againstim wei for laek duim olketa samting wea nogud and helpem olketa for followim olketa standard blo Jehovah. (1 Pet. 3:8) Iumi sure olketa wea resurrect bae lukim hao pipol blo Jehovah olketa hambol and datwan bae mekem olketa gohed traem best blo olketa for duim samting for kasem laef.—Phil. 2:12.

8. Why nao hem fitim for iumi sei olketa wea bae welkamim bak olketa famili member and frens wea resurrect bae fit for luksavve lo olketa?

⁸ Samfala reason hem stap why iumi fit for sei olketa wea bae welkamim bak olketa famili member and frens wea resurrect bae fit for luksavve lo olketa. Wanfala reason, olsem olketa resurrection wea happen bifor, luk olsem taem Jehovah wakem olketa moa hem bae mekem lukluk blo olketa, hao olketa toktok, and tingting blo olketa for semsem olsem bifor olketa dae. Tingim hao Jesus hem sei dae hem olsem man hem sleep and resurrection hem olsem man hem wekap from sleep. (Matt. 9:18, 24; John 11:11-13) Taem man wekap from sleep, lukluk blo hem and hao hem toktok hem semsem nomoa olsem taem hem redi for sleep, and evri memory blo hem stap nomoa. Tingim example blo Lazarus. Hem bin dae for fofala day finis so body blo hem start for rotten nao. Nomata olsem, taem Jesus resurrectim hem, olketa sista blo hem stretawe luksavve lo hem, and Lazarus tu hem rememberim olketa.—John 11:38-44; 12:1, 2.

9. Why nao olketa wea laef bak bae no resurrect witim mind and body wea perfect?

⁹ Jehovah promisim hao no eniwan anda lo rul blo Christ bae sei: “Mi sik.” (Aesaea 33:24; Rome 6:7) So olketa wea laef bak from dae, bae olketa kasem moa wanfala body wea healthy. Bat olketa no stretawe kamap perfect.  Sapos olketa stretawe kamap perfect, bae olketa famili and fren no luksavve lo olketa. Anda lo Thousand Year Rul blo Christ, bae evriwan isisi kamap perfect. Then lo end blo thousand year, taem Jesus bae givim bak Kingdom lo Dadi blo hem, datfala Kingdom bae finisim evri waka blo hem, and bae mekem evriwan for kamap perfect.—1 Cor. 15:24-28; Rev. 20:1-3.

10. Hao nao bae iu feel lo taem blo resurrection?

¹⁰ Tingim go taem wea iu bae welkamim moa olketa wea iu lovem wea dae finis. Waswe, hapi blo iu bae mekem iu krae or laf? Waswe, bae iu barava hapi and singsing for praisem Jehovah? Wanfala samting wea iu savve sure hem nao, love blo iu for Jehovah and son blo hem Jesus bae barava strong bikos lo nambawan present blo datfala resurrection wea tufala givim.

11. Olsem toktok blo Jesus lo John 5:28, 29, wanem nao olketa wea followim raeteous standard blo God bae kasem?

¹¹ Tingim hao olketa wea resurrect bae hapi tumas taem olketa lusim olketa old wei blo olketa and followim olketa raeteous standard blo God. Olketa hia wea changem wei blo olketa bae resurrect for kasem laef olowe. Bat lo narasaed, olketa wea no laek for change bae God no letem olketa for stap for spoelem peace lo Paradaes.—Aesaea 65:20; readim John 5:28, 29.

12. Lo wanem wei nao olketa wea stap lo earth bae kasem blessing from Jehovah?

¹² Anda lo rul blo Kingdom, evri pipol blo God bae experiencem tru samting wea Provebs 10:22 storyim hao blessing blo Jehovah hem mekem man rich and man no savve kasem pain from datwan. Taem spirit blo Jehovah hem helpem olketa, pipol blo God bae kamap rich lo spiritual wei, wei blo olketa bae kamap olsem Christ and gogo olketa bae kamap perfect. (John 13:15-17; Eph. 4:23, 24) Each day olketa bae kamap strong pipol wea healthy and garem olketa gud wei. Datwan hem barava nambawan laef! (Job 33:25) Hao nao wei for ting raonem resurrection hem helpem iu distaem?

13. For fitim wanem Sams 139:1-4 storyim, hao nao resurrection hem showimaot Jehovah hem barava savve gud lo iumi?

¹³ Olsem iumi bin storyim, taem Jehovah resurrectim pipol, hem bae putim bak memory blo olketa and mekem olketa for garem semkaen wei wea olketa garem bifor. Wanem nao datwan showimaot abaotem Jehovah? Hem showimaot Jehovah hem barava lovem iu and hem keepim record lo evri samting abaotem tingting, feeling, wanem iu talem and wanem iu duim. So taem wea hem bae resurrectim iu, hem bae isi nomoa for hem givim bak memory blo iu, barava wei blo iu, and evri samting abaotem iu. King David hem barava savve dat Jehovah hem interest lo each wan lo iumi. (Readim Sams 139:1-4.) Hao nao iu feel taem iu savve dat Jehovah hem barava savve gud lo iu?

14. Taem iumi savve dat Jehovah hem savve gud lo iumi, hao nao datwan affectim iumi?

¹⁴ Taem iumi ting raonem hao Jehovah hem barava savve gud lo iumi, iumi shud no wari. Why nao olsem? Tingim hao Jehovah hem barava kea for iumi. Hem tinghae lo wanem nao mekem each wan lo iumi for spesol. Hem savve gud lo iumi and wanem iumi experiencem and hao datwan affectim laef blo iumi. Datwan hem barava comfortim iumi! No enitaem iumi shud feel olsem iumi stap seleva. Each minute lo evriday, Jehovah hem stap witim iumi, and hem luk for eni chance mekem hem savve helpem iumi.—Mektu Kronikols 16:9.

15. Hao nao resurrection hem showimaot wisdom blo Jehovah?

¹⁵ Wei for fraetem dae hem wanfala strongfala weapon. Olketa wea Satan kontrolem iusim datwan for forcem pipol for spoelem fren blo olketa, or for mekem olketa for duim samting wea no stret. Bat datfala weapon hem no garem paoa ovarem iumi. Iumi savve nomata olketa enemy blo iumi killim iumi dae, Jehovah bae mekem iumi for laef moa. (Rev. 2:10) Iumi trustim dat no eni samting savve spoelem wei wea iumi fren witim Jehovah. (Rome 8:35-39) Wei wea Jehovah givim datfala resurrection hope hem barava showimaot wisdom blo Jehovah. Taem hem duim datwan, hem aotem nao strongfala weapon blo Satan and lo semtaem hem givim iumi wanfala weapon wea helpem iumi for no fraet.

16. Olketa wanem kwestin nao iu need for askem iuseleva, and hao nao wei for savve lo ansa hem bae helpem iu for luksavve hao strong nao trust blo iu lo Jehovah?

¹⁶ Sapos olketa enemy blo Jehovah laek for killim iu dae, waswe, bae iu trustim Jehovah dat hem bae resurrectim iu? Hao nao iumi savve showimaot datwan? Wanfala wei hem for askem iuseleva. ‘Waswe, olketa smol disison wea mi mekem each day hem showimaot mi trustim Jehovah?’ (Luke 16:10) Nara kwestin, ‘Waswe, lo laef blo mi, mi trustim hao Jehovah bae provaedem olketa material need blo mi sapos mi putim Kingdom firstaem?’ (Matt. 6:31-33) Sapos ansa blo iu for olketa kwestin hia hem yes, then iu showimaot hao iu trustim Jehovah, and redi for olketa test wea bae kamap.—Provebs 3:5, 6.

17. (a) Hao nao resurrection showimaot Jehovah hem patient? (b) Hao nao iumi showimaot iumi tinghae lo wei wea Jehovah hem patient?

¹⁷ Jehovah hem markem finis day and hour wea hem bae finisim disfala old system. (Matt. 24:36) Hem bae gohed patient and bae hem no kwiktaem duim samting bifor datfala taem. Hem barava laek for resurrectim olketa wea dae, bat hem patient. (Job 14:14, 15) Hem weitim raet taem wea hem markem for hem mekem olketa wea dae for laef bak. (John 5:28) Iumi garem olketa gudfala reason for tinghae lo wei wea Jehovah patient. Tingim diswan, from Jehovah hem patient staka pipol and iumi tu, “garem chance for repent.” (2 Pet. 3:9) Jehovah laekem staka pipol moa for garem chance for kasem laef olowe. So iumi laek for showimaot iumi tinghae lo patient fasin blo Jehovah. Lo wanem wei? Thru lo wei for traem best for lukaotem olketa “wea showimaot  olketa laekem laef olowe” and helpem olketa for lovem hem and servem hem. (Acts 13:48) Then olketa bae kasem gud samting from patient fasin blo Jehovah, olsem iumi tu.

18. Why nao iumi shud patient witim olketa narawan?

¹⁸ Jehovah expectim iumi for perfect lo end blo wan thousand year, bat go kasem datfala taem hem bae gohed patient. Go kasem datfala taem, Jehovah bae gohed willing for forgivim olketa sin blo iumi. So iumi tu garem staka reason for luk lo positive saed blo olketa narawan and for patient witim olketa. Tingim example blo wanfala sista wea hasband blo hem safa from wei for wari and stress tumas, gogo hem stop for attendim olketa meeting. Hem sei: “Hem barava hard for mi, evri plan blo mitufala hem nomoa nao.” Nomata olsem, datfala sista hem patient witim hasband blo hem, hem depend lo Jehovah and hem no givap. Olsem Jehovah, hem luk lo positive saed blo hasband blo hem. Hem sei: “Hasband blo mi hem garem olketa gudfala wei, and isisi hem gohed for kamap gud.” Hem barava important tumas for iumi patient witim olketa lo famili or kongregeson wea traem best blo olketa for winim olketa challenge wea olketa feisim!

19. Wanem nao iumi shud disaed strong for duim?

¹⁹ Jesus and olketa angel barava hapi tumas taem Jehovah creatim disfala earth. Bat tingim hao olketa bae hapi tumas taem olketa lukim evriwan lo earth kamap perfect, lovem Jehovah and worshipim hem. Tingim hapi blo olketa wea bae rul witim Christ lo heven taem olketa lukim evriwan kasem gud samting from waka wea olketa duim. (Rev. 4:4, 9-11; 5:9, 10) And tingim taem wea tias blo hapi hem changem tias blo sorre, taem wea sik, sorre, and dae bae nomoa nao. (Rev. 21:4) Go kasem datfala taem, iumi laek disaed strong for followim example blo Jehovah, datfala Dadi wea garem love, hem wise, and hem patient. Sapos iu duim olsem, iu bae gohed hapi nomata wanem kaen test nao iu feisim. (Jas. 1:2-4) Iumi hapi tumas lo datfala promis blo Jehovah hao hem “bae mekem pipol . . . for laef bak”!—Acts 24:15.