1. Соске о Јехова створинѓа о живото?

АНГЛЕДЕР те почминел те створинел, о Јехова сине коркори. Ама адава на керѓа те осетинел пе тажно. Леске на сине потребно никој те шај те овел бахтало. Сепак, о Девел мангља јавера да те живинен хем те овен бахтале. Поттикнимо таро мангипе, о Јехова почминѓа те створинел (Пс. 36:9; 1. Јов. 4:19).

2. Сар осетинѓе пе о Исус хем о ангелија кеда о Јехова створинѓа са о буќа?

² Најпрво, о Јехова створинѓа пле Чхаве, е Исусе. Пало адава, заедно пле чхавеа, о Јехова створинѓа са о јавера буќа, сар на пример е ангелен (Кол. 1:16). О Исус сине бут бахтало со шај сине те керел бути пле Дадеа (Изр. 8:30). О ангелија да сине бахтале. Ола сине адатхе кеда о Јехова хем лескоро Вешто Градители, о Исус, керѓе о небо хем и Пхув. Сар о ангелија сикавѓе кај тане бахтале? Ола гласно славинѓе е Јехова адалеске со керѓа и Пхув, хем продолжинѓе те славинен ле кеда дикхле са о јавера буќа со керѓа, а посебно е манушен (Јов 38:7; Изр. 8:31). Са адава со створинѓа о Јехова сикавела лескоро мангипе хем лескири мудрост (Пс. 104:24; Рим. 1:20).

3. Спрема 1. Коринќаните 15:21, 22, сави можност дела е Исусескири откупно жртва?

³ Е Јехова сине ле намера о мануша те живинен вечно ки бут шужи планета која со створинѓа ла ов. Ама, кеда о Адам хем и Ева бунинѓе пе против ленгоро грижливо Дад, ола уле грешна хем муле. Исто аѓаар, са о мануша  со авена лендар тане грешна хем мерена (Рим. 5:12). Со керѓа о Јехова? Ов одма вакерѓа сар ка спасинел е манушен (1. Мој. 3:15). О Јехова одлучинѓа те дел пле Чхаве, е Исусе, сар откупно жртва те шај е Адамескере хем е Евакере чхаве те овен ослободиме таро грево хем таро мерибе. Аѓаар ка шај сине те дел вечно живото секоле манушеске со ка мангел те служинел леске. (Јован 3:16; Рим. 6:23; читин 1. Коринќаните 15:21, 22.)

4. Башо кола пучиба ка кера лафи ки акаја статија?

⁴ Иси бут пучиба со шај те пуча амен башо воскресение кова со ветинѓа ле о Девел. На пример, сар веројатно ка овел адава? Дали ка шај те пенџара амаре манглен кола со палем ка иранен пе ко живото? Сар о воскресение ка анел аменге бахталипе? Хем со сикљоваја башо е Јеховаскоро мангипе, мудрост хем стрпливост ако размислинаја башо воскресение? Те дикха акала пучиба.

5. Соске шај те очекујна кај о мануша ка воскреснинен постепено хем ко организиримо начин?

⁵ Кеда о Јехова преку пло Чхаво ка воскреснинел милиоња манушен, шај те очекујна кај сарине нане те воскреснинен ко исто време. Соске? Адалеске со, ако таро јекх пути бајрола о број е манушенгоро ки Пхув, тегани шај те овел хаос. Ама, о Јехова секогаш керела о буќа ко организиримо хем уредно начин. Ов џанела кај, те шај те овел трајно мир, мора те овел редо (1. Кор. 14:33). О Јехова сикавѓа мудрост хем стрпливост кеда заедно е Исусеа постепено спреминѓа и Пхув те шај о мануша те живинен ки лате. О Исус да ка сикавел мудрост хем стрпливост џикоте трајнена о милја берша коте со ов ка владинел. Ов ка соработинел околенцар со ка преживинен о Армагедон те шај те спреминен са со ваљани околенге со ка воскреснинен ки Пхув.

6. Спрема Дела 24:15, кој ка овел машкар адала со ка воскреснинел лен о Јехова?

 ⁶ Најважно таро са, окола со ка преживинен о Армагедон ка ваљани те сикавен адален со ка воскреснинен башо е Девлескоро Царство хем башо адава со родела лендар о Јехова. Соске? Адалеске со повише лендар ка овен дело тари група со и Библија вакерела ленге кај „нане праведна“. (Читин Дела 24:15.) Ола ка ваљани те керен бут промене те шај те овел лен корист тари е Христосескири откупно жртва хем те живинен вечно. Размислин само кобор бари бути ка овел адава те сикавен пе милиоња мануша кола со на џанена ништо башо Јехова! Дали секасаја посебно ка проучинел пе и Библија, слично сар со кераја авдиве е манушенцар? Дали адала со ка воскреснинен ка овен дело таро собранија хем дали ка овен сикавде сар те проучинен адаленцар со ка воскреснинен пали ленде? Ка мора те аџикера хем те дикха. Сепак, џанаја кај ко крајо таро милја берша со ка владинел о Христос, „и пхув ка овел пхерди пенџарибаја башо Јехова“ (Иса. 11:9). Иако ко адала милја берша ка овел амен бут бути, са адава со ка кера ка анел аменге баро бахталипе!

7. Соске е Девлескоро народо ка овел сочувствително адаленцар со ка воскреснинен?

⁷ Џикоте трајнена о милја берша, сар народо е Јеховаскоро, сарине амен ка ваљани понадари да те кера промене те шај те угодина леске. Адалеске, ка ваљани те хаљова адален со ка воскреснинен хем сочувствително ка поможина ленге те менинен пумаре погрешна мисле хем желбе хем те живинен спрема е Девлескере мерилија (1. Пет. 3:8). Сигурно, адала со ка воскреснинен ка дикхен кај е Јеховаскоро народо тано понизно хем кај понадари да керела промене те шај те угодинел е Јеховаске. Тегани, ола ка манген те обожавинен е Јехова заедно ленцар (Фил. 2:12).

8. Соске шај те очекујна кај ка пенџара амаре манглен со ка воскреснинен?

⁸ Иси амен некобор причине те мислина кај окола со ка доџакерен адален со ка воскреснинен ка шај те пенџарен лен. На пример, ако размислинаја башо адава сар о Јехова воскреснинѓа е манушен ко пурано време, шај те очекујна кај ов ка ваздел е мулен аѓаар сар со сине кратко англедер те мерен. Ола ка изглединен, ка керен лафи хем ка размислинен ко исто начин. Сетин тут кај о Исус спорединѓа о мерибе е сојбаја, а о воскресение сар о уштибе таро сојбе (Мат. 9:18, 24; Јован 11:11-13). Кеда некој уштела таро сојбе, ов изглединела исто хем керела лафи сар англедер те совел, хем на нашавела пли меморија. Размислин башо е Лазарескоро пример. Ов сине муло штар диве, хем лескоро тело почминѓа те распадинел пе. Ама кеда о Исус воскреснинѓа ле, лескере пхења одма пенџарѓе ле, хем ов сигурно на бистерѓа лен (Јован 11:38-44; 12:1, 2).

9. Соске адала со ка воскреснинен нане одма те овен совршена?

⁹ О Јехова ветинела кај нијекх таро адала со ка живинен ко рај нане те вакерен: „Насвало сиум“ (Иса. 33:24; Рим. 6:7). Спрема адава, окола со ка воскреснинен ка овел лен састо тело. Ама, ола нане те овен одма совршена. Ако би овена сине совршена, ленгере мангле ка нашти те пенџарен лен. Изгледа кај са о мануша постепено ка овен совршена џикоте трајнена о милја берша коте со ка владинел о Христос. Хем ко крајо таро адала милја берша, о Исус ка иранел о Царство пле Дадеске. Џи тегани о Царство целосно ка исполнинел пли задача, со значинела кај  ка керел совршена е манушен да (1. Кор. 15:24-28; Отк. 20:1-3).

10. Сар ка осетине тут кеда ка овел о воскресение?

¹⁰ Замислин туке сар ка осетине тут кеда ка аџикере тле најманглен. Дали ка аса или ка рове тари радост? Дали ка ове добором бахтало со гиленцар ка фалине е Јехова? Јекх бути тани сигурно — ка осетине баро мангипе спрема тло грижливо Дад хем спрема лескоро мангло Чхаво кола со керѓе амаре мангле те воскреснинен.

11. Спрема е Исусескере лафија сој пишиме ко Јован 5:28, 29, со ка овел околенцар со ка овен послушна е Девлеске?

¹¹ Сигурно окола да со ка воскреснинен ка овен бут бахтале кеда ка почминен те керен промене хем кеда ка живинен спрема е Девлескере праведна мерилија. Адала со ка керен акала промене ка шај те живинен вечно ки Пхув. Тари јавер страна, адала со ка бунинен пе против о Девел нане те овел ленге дозволимо те рушинен о мир со ка овел ко рај. (Иса. 65:20; читин Јован 5:28, 29.)

12. Сар о Јехова ка дел берекетија са околенге со ка живинен ки Пхув?

¹² Кеда ка владинел о Царство, са е Девлескере слуге ка уверинен пе кај о лафија таро Изреки 10:22 тане точна, а адатхе вакерела: „О берекети таро Јехова керела е мануше барвало, хем ко адава берекети о Девел на додајнела нисави дукх“. Адалеа со ка поможинел ленге е Девлескоро свети дух, ола ка овен барвале ко духовно поглед, а адава значинела кај ка овен са послична сар о Христос хем ка ресен џи ко совршенство (Јован 13:15-17; Еф. 4:23, 24). Секова диве ленгоро тело ка овел са посилно хем ка овен пошукар мануша. Кобор ка овел шужо о живото тегани! (Јов 33:25). Ама, сар адава со ка размислине башо воскресение ка поможинел туке панда акана?

13. Спрема о Псалм 139:1-4, сар о воскресение ка сикавел кај о Јехова бут шукар пенџарела секоле амендар?

¹³ Сар со дикхлем англедер, кеда о Јехова ка воскреснинел е манушен, ола ка сетинен пе ко буќа со случинѓе пе ленге хем ка овен о иста мануша сар со сине англедер те мерен. Размислин со значинела акава. О Јехова добором бут мангела тут со приметинела хем памтинела са тле мисле, чувствија, лафија хем постапке. Адалеске, ако би ваљани сине те воскреснинел тут, ка ове исто сар со сиан сине англедер. О цари о Давид, сине свесно кај о Јехова бут шукар пенџарела секоле јекхе амендар. (Читин Псалм 139:1-4.) Сар осетинаја амен кеда џанаја кобор шукар пенџарела амен о Јехова?

14. Сар ваљани те влијајнел упри аменде адава со џанаја кај о Јехова бут шукар пенџарела амен?

¹⁴ Кеда размислинаја башо адава кобор шукар пенџарела амен о Јехова, на ваљани те дара хем те мислина кај ов концентриринела пе ко амаре слабостија. Соске? Ма бистре кај о Јехова бут грижинела пе аменге. Секова јекх амендар тано скапоцено англо лескере јакхја. Ов памтинела са о буќа со влијајнѓе упри аменде ко амаро живото. Адава тано бут утешно! Никогаш на ваљани те мислина кај сием коркори. О Јехова тано секогаш аменцар хем мангела те поможинел аменге (2. Лет. 16:9).

15. Сар о воскресение сикавела аменге кај о Јехова тано мудро?

¹⁵ И дар таро мерибе тано бут моќно оружје. О мануша сој тане водиме таро Сатана користинена акаја дар те теринен е манушен  те издајнен пумаре амален или те керен нешто со џанена кај тано погрешно. Ама, акава оружје нане ле моќ упри аменде. Амен џанаја кај, ако амаре душмања мударена амен, о Јехова ка иранел амен ко живото (Отк. 2:10). Увериме сием кај никој хем ништо нашти те одвојнел амен лестар (Рим. 8:35-39). Чаче о Јехова сикавѓа кобор тано мудро адалеа со денѓа амен и надеж башо воскресение! Адалеске, амен на дараја ако адала со поддржинена е Сатана заканинена пе аменге кај ка мударен амен ако на кераја адава со ола вакерена. Исто аѓаар, адава дела амен храброст те ачхова верна е Јеховаске.

16. Кола пучиба ваљани те пуче тут, хем сар о одговорија ка поможинен туке те хаљове кобор доверба иси тут ко Јехова?

¹⁶ Ако адала со мрзинена е Јехова вакерена кај ка мударен тут, дали ка овел тут доверба ко Јехова кај ка воскреснинел тут? Котар шај те џане дали тегани ка овел тут доверба ко Јехова? Пуч тут: „Дали о одлуке со анава лен секова диве сикавена кај иси ман доверба ки лесте?“ (Лука 16:10). „Дали мло начин сар живинава сикавела кај иси ман доверба ко лескоро ветување кај ка грижинел пе башо мле материјална потребе ако чхивава о Царство ко прво тхан?“ (Мат. 6:31-33). Ако о одговор ко акала пучиба тано оја, тегани сикавеа кај сиан спремно баши било која неволја со ка авел (Изр. 3:5, 6).

17. а) Сар о воскресение сикавела кај о Јехова тано стрпливо? б) Сар шај те сикава кај ценинаја адава со о Јехова тано стрпливо?

¹⁷ О Јехова више одлучинѓа кеда точно ка анел крајо акале пуране светоске (Мат. 24:36). Ов нане те овел нестрпливо хем те анел о крајо англедер адава време. Иако иси ле бари желба те воскреснинел е мулен, ов тано стрпливо (Јов 14:14, 15). Ов аџикерела те авел о чачутно време те керел адава (Јован 5:28). Иси амен бут причине те ценина е Јеховаскири стрпливост. Размислин башо акава: Адалеске со о Јехова тано стрпливо, буте манушен — коте со сием вклучиме амен да — сине лен време те каинен пе (2. Пет. 3:9). О Јехова мангела те дел прилика со шај повише манушенге те живинен вечно. Адалеске, те сикава кај ценинаја е Јеховаскири стрпливост. Сар? Аѓаар со ка да амендар са те аракха околен „со исправно дикхена ко вечно живото“, хем те поможина ленге те манген е Јехова хем те служинен леске (Дела 13:48). Тегани лен да ка овел лен  корист тари е Јеховаскири стрпливост, исто сар со иси амен.

18. Соске ваљани те ова стрплива е јаверенцар?

¹⁸ О Јехова стрпливо ка аџикерел те накхен о милја берша те шај те ова совршена. Џи тегани, ов тано спремно те простинел амаре гревија. Адалеске амен да ваљани те дикха о шукар особине ко јавера хем те ова ленцар стрплива. Те дикха о пример тари јекх пхен, каскоро ром почминѓа те овен ле панична нападија хем чхинавѓа те џал ко состанокија. Ој вакерела: „Бут сине манге пхаро. Амаро живото менинѓа пе таро јекх пути, нашти сине више те кера адава со манглем те кера“. Сепак, цело адава време, акаја грижливо ромни понадари да сине стрпливо пле ромеа. Сине ла доверба ко Јехова хем никогаш на откажинѓа пе. Слично сар о Јехова, ој на мислинѓа само ко проблемија, него трудинѓа пе те дикхел о шукар буќа ко пло ром. Ој вакерела: „Ме роме иси ле бут шуже особине хем керела са те шај хари по хари те овел пошукар“. Бут тано важно те ова стрплива адаленцар тари амари фамилија хем таро амаро собрание кола со трудинена пе те икљон ко крајо баре проблеменцар.

19. Ко со ваљани те ова одлучна?

¹⁹ О Исус хем о ангелија бут сине бахтале кеда сине створими и Пхув. Ама замислин туке кобор ка овен бахтале кеда и Пхув ка овел пхерди совршена манушенцар кола со мангена е Јехова хем служинена леске. Исто аѓаар, замислин туке кобор ка овен бахтале окола со ка џан ко небо те владинен заедно е Христосеа кеда ка дикхен кобор корист ка овел е манушен таро са адава со керѓе ола баши ленде (Отк. 4:4, 9-11; 5:9, 10). Хем мислин ко адава саво ка овел о живото кеда ка рова тари радост наместо тари дукх, кеда о насвалипе, о жалибе хем о мерибе нане више те овен (Отк. 21:4). Џи тегани, ов одлучно те ове сар тло Дад о Јехова кова со иси ле мангипе, мудрост хем стрпливост. Ако кереа адава, ка ове бахтало бизи разлика саве проблеменцар боринеа тут (Јак. 1:2-4). Чаче бут сием благодарна башо адава со ветинѓа о Јехова кај „ка воскреснинел околен сој праведна хем околен со нане праведна“! (Дела 24:15).