1. Bici byarhumâga Yehova alêma obuzine?

YEHOVA âli yene erhi arhondêra alêma. Lyo Yehova aba n’obushagaluke arhalal’ilagirire oku muntu wakabirhi, al’iciyenezize yene. Cikone obuzigire bwage bwamushumya oku alême abandi lyo nabo bashagalukira obuzine.​—Enna. 36:9; 1 Yne. 4:19.

2. Gurhi Yezu na bamalahika baciyumvirhe erhi babona obulemi bwa Yehova?

² Burhangiriza Yehova alma Omugala Yezu Kristu. Kugerera oyo Mugala cusha ebindi biremwa byalemwa, mwebyo biremwa muli bamalahika boshi. (Kol. 1:16) Yezu ashagalukira olo lukengwa Ishe amuhaga. (Mig. 8:30) Bamalahika nabo bacishinga bwenene bulya erhi ebindi biremwa biba biri byalemwa, bakagibona. Erhi Yehova na Yezu balema empingu nigulu, gurhi bamalahika bayerekine oku bashagalukire ogo mukolo? Ebibliya edesire oku bacishinga bwenene, cikone bashagaluka bwenene erhi babona Nnamahanga alma omuntu. (Ayu. 38:7; Mig. 8:31) Ngasi ciguma cebiremwa bya Nnamahanga ciba ciyerekine obuzigire nobwenge bwage.​—Enna. 104:24; Bar. 1:20.

3. Bici engombôlo Yezu ahanâga yahashisize biri biganirire omu lwandiko lwa 1 Abakorinti 15:21, 22?

³ Yehova âl’ilonzize omulala gwa bene bantu gushagalukire akalamo k’ensiku n’amango hanw’igulu. Cikoki erhi Adamu na Eva bagoma, balerha ecaha n’olufû omw’igulu lyoshi. Adamu na Eva barhakacilamire ensiku n’amango bulya bâl’ibamagomera Yehova. Abana babo nabo barhondera bafâ. (Bar. 5:12) Gurhi Yehova ajijîre? Ho n’aho ayerekana gurhi anacungulemwo bene bantu lyo barhengamw’obo bujà. (Murh. 3:15) Yehova arheganya engombôlo ly’akula abana ba Adamu na Eva omu bujà bw’ecaha n’olufû. Kugerera eyo ngombôlo, Yehova aha ngasi muntu aluhûma lw’okucishoga okumukolera lyo ayish’iba n’akalamo  k’ensiku n’amango.​—Yne. 3:16; Bar. 6:23; osome 1 Abakorinti 15:21, 22.

4. Madoso gahi rhwashuzakwo mw’eci cigabi?

⁴ Hali madoso manji rhwakacidosa okubiyerekire eciragane ca Nnamahanga c’okufûla abafîre. Kwa lwiganyo: Gurhi obufûke bwayish’ijirwa? Ka rhwanahikire okumanya abantu bw’omulala gwirhu erhi balungu birhu bafîre hano bafûka? Gurhi obufûke bwayishirhushagalulamwo? Bici obufûke bwakarhuyigiriza okubiyerekire obuzigire, obwenge n’okulembera kwa Yehova? Rhuganirire idoso liguma oku lindi.

5. Bici byakarhuyemeza n’obwalagale oku abantu barhakafûkira lusiku luguma?

⁵ Amango Yehova kugerera Omugala ayish’ifûla emiliyoni y’abantu bafîre, boshi barhakafûkira lusiku luguma. Bulya gurhi? Bulya abantu bafîre boshi bamafûkira lusiku luguma, oko kwanalerha akavulindi. Yehova amanyire bwinja gurhi ayish’ijira ebintu ly’obufûke bujirwa omu murhula buzira kavulundi. (1 Kor. 14:33) Erhi Yehova Nnamahanga haguma na Yezu balêma igulu, barhalemaga byoshi caligumiza. Yezu omu myaka 1 000 y’oburhegesi bwage ayish’ikulikira omupango okubiyerekire okufûla abafîre. Omu myaka 1 000 y’oburhegesi bwage, ayish’ikola haguma na balya bayish’icunguka ivita lya Armagedoni ly’arheganya bwinja igulu lyo lihasha lyayeneramwo abayish’ifûka. Ago marheganyo gahiziremwo okurheganya enyumpa, ebiryo emishangi n’ebindi bintu omuntu akanaba alagirireko.

6. Bandi bayish’ifûlwa bayerekinwe omu lwandiko lwa Ebijiro by’Entumwa 24:15?

⁶ Abayish’icunguka ivita lya Armagedoni, bayish’ihabwa ogundi mukolo gw’okushibirira n’okuyigiriza abayish’ifûka emyanzi eyerekire Yehova, Obwami bwage n’amarhegeko gage. Bulya gurhi? Bulya bantu banji b’abayish’ifûlwa bayish’ibamwo ‘abarhal’ibashinganyanya.’ (Osome Ebijiro by’Entumwa 24:15)  Byayish’ihûna bajire mpindûlo nyinji lyo bayunguka n’engombôlo ya Yezu Kristu n’okuhâbwa obuzine bw’ensiku n’amango. Erhi wakacihâ akasanzi kw’okurhanya okubiyerekire omukolo gw’okuyigiriza eyo miliyoni y’abantu erhamanyiri bici okubiyerekire Yehova, wanahugûkwa oku akazi kayish’iba kanji. Ka ngasi muguma ayish’iba n’owage mwalimu nk’oku rhujira ene, nka rhwacifunza n’omuntu Ebibliya? Ka ngasi muguma ayish’iba n’ecage cigamba ly’akomerezibwa n’okuyigirizibwa, lyo naye ayish’iyigiriza abayish’ifûka enyuma zage? Rhwanahugûkwe ebyo byoshi mw’ago mango. Rhumanyire kone oku, okubuzinda bw’emyaka 1 000 y’oburhegesi bwa Yezu ‘igulu lyayish’iyunjula bumanye bwa Yehova.’ (Iza. 11:9) Omu myaka 1 000, rhwanabe na mikolo minja y’okujira!

7. Bulya gurhi kuli kwinja abakozi ba Nnamahanga bayish’iba n’iroho ly’obonjo amango bayish’iba bali bayigiriza abayish’ifûka?

⁷ Omu mango gw’oburhegesi bw’emyaka cihumbi, abana b’en’igulu ba Yehova bayish’ijira mpindûlo nyinji omu kalamo kabo lyo bamushagalula. Na ntyo, boshi bayish’ishagalukira ako kasanzi bulya bayish’iba bali balwisa obuzamba bwabo bw’okuba banya byaha kuhika balame nk’oku amakanuni ga Yehova ganadesire. (1 Pet. 3:8) Buzira karhinda abayish’ifûka bayish’ishagalukira bwenene oborhere bwa balya bayish’ikabayegereza, ciru akabo nabo bayish’ijira okwabo koshi lyo “bashibirira obucire bwabo bone.”​—Flp. 2:12.

8. Bulya gurhi rhwakayemera n’obwalagale oku abantu bayish’ifûka bayish’imanya bene wabo?

⁸ Hali bintu binji byakarhuma rhwayemera n’obwalagale oku byayish’ihashikana okumanya bwinja bene wirhu erhi abalungu birhu bayish’ifûlwa. Kwa lwiganyo, oku Yehova akag’ifûla abantu ba mîra, kwanarhuyemeza n’obwalagale oku abantu bayish’ifûlwa bayish’iba n’obuhashe bw’okulola, bw’okuganira n’okurhanya nka kulya banal’iyosire embere bafê. Okengere oku Yezu ashushanyize olufû n’iro, co cirhumire abayish’ifûlwa bayish’iba nk’abarhenzibwe omw’iro. (Mat. 9:18, 24; Yne. 11:11-13) Erhi bazusa omuntu omw’iro, analambule amasu, acikanûle buzinda obwenge bwage bunacib’irhondêra bwakola bwinja. Rhulolage olwiganyo lwa Lazaro. Hali ahamagera nsiku ini Lazaro afîre, kw’okuderha omubiri gwage gwal’ikola guli gwa baya. N’obo erhi Yezu amufûla, ho n’aho bali babo bamumanya buzira karhinda.​—Yne. 11:38-44; 12:1, 2.

9. Bulya gurhi abayish’ifûlwa barhay’ishibe bimana ho n’aho?

⁹ Yehova alaganyize oku omu mango gw’oburhegesi bwa Yezu ntaye wanaciderhe erhi: “Ndi mulwala.” (Iza. 33:24; Bar. 6:7) Abayish’ifûlwa bayish’iba n’omubiri mwimana. Barhakafûlwa n’omubiri mwimana ho n’aho bulya nka byakaba ntyo, bene wabo barhakacibamanya. Omubiri gwayish’iba mwimana bunyi-bunyi omu myaka 1 000 y’oburhegesi bwa Kristu. Enyuma z’aho Obwami bwa Nnamahanga bwayish’ihikiriza omukolo gwabo loshi-loshi nk’oku Yehova anal’ilonzize bibe aha murhondêro.​—1 Kor. 15:24-28; Maf. 20:1-3.

10. Gurhi wanaciyumve amango bene winyu bafîre banafûlwe?

¹⁰ Orhanye gurhi byayish’iba amango wayishiba oli wayegereza bene winyu n’abalungu bawe bayish’iba bamafûka. Kw’omwishingo wayish’iba nago ago mango ka gwanakulase erhi gwanakushagalule? Kw’obushagaluke wayish’iba nabo bwayish’ikushumya ohe Yehova irenge? Mwako kasanzi, obuzigire bwirhu kuli Nnamahanga n’Omugala bwayish’iba bunji kulusha agandi mango goshi bulya bo bayish’ifûla abafîre.

11. Nk’oku enderho za Yezu ziri omu lwandiko lwa Yowane 5:28, 29 ziyerekine, bici byayish’ihikira balya boshi banarhumikire Nnamahanga?

 ¹¹ Orhanye obushagaluke abayish’ifûka bayish’iba nabo amango bayish’iba bamaleka enkomêdu zabo za mîra n’okulama nk’oku amakanuni ga Yehova ganadesire. Abayish’ijira empindûlo zishinganine bayish’ihâbwa obulyo bw’okulama ensiku n’amango omu Paradizo. Abakayish’ilahira okulama nk’oku amakanuni ga Nnamahanga ganadesire, arhakabayemerera balama omu Paradizo lyo barhag’ishirhondezamw’obugoma.​—Iza. 65:20; osome Yowane 5:28, 29.

12. Omu njira nci balya boshi bali okw’igulu bayish’igishwa na Yehova?

¹² Omu mango gw’oburhegesi bw’Obwami bwa Nnamahanga, abakozi bage bayish’ibona okuli kw’olwandiko lwa Emigani 10:22, luba ludesire ntya: “Mugisho gwa Nnamahanga gugaza omuntu, gurhanalerha malumwa.” Yehova ayish’ikolesa iroho lyage litagatifu, lyagisha abakozi bage babe bagale, kw’okuderha oku babe bimana aka Yezu. (Yne. 13:15-17; Efez. 4:23, 24) Ngasi lusiku luja oku nkuba bayish’iba n’emisi, bayish’iba n’amagala minja n’okuba bantu binja bwenene. Orhanye obushagaluke bwayish’iba bunganaci ago mango! (Ayu. 33:25) Gurhi okukarhanya oku bufûke kwakakurhabala mwagano mango?

13. Nk’oku biyerekinwe omu lwandiko lwa Ennanga 139:1-4, kunganaci obufûke bwayishiyerekana oku Yehova aba arhumanyire bwinja?

¹³ Nk’oku ebifungo by’enyanya biyerekine, amango Yehova afûla abantu anabafûle n’obukengere bwabo, n’okubanal’iyosire koshi embere bafê. Erhi wakaciha akasanzi kw’okurhanya kuli ebyo byoshi, wanabona kunganaci Yehova aba arhuzigire bwenene. Yehova ayishi bwinja obukengere bwirhu, oku rhwali yosire, enderho zirhu, iranga lirhu n’ebijiro birhu binja rhwakag’ijira, oko koshi kuyerekine kunganaci Yehova aba arhuzigire. Kw’okuderha oku erhi Yehova akafûla omuntu agwerhe obuhashe bw’okumufûla n’obwenge bwage, n’obuhashe bwage n’oku aliyosirhe koshi. Mwami Daudi ayemire n’obwalagale oku Yehova aba amanyire bwinja ngasi muguma wirhu. (Osome Ennanga 139:1-4) Gurhi rhwakaciyumva erhi rhwakahugûkwa oku Yehova aba arhumanyire bwinja?

14. Gurhi rhukwanine rhuciyumve erhi rhwakarhanya kunganaci Yehova aba arhumanyire?

¹⁴ Bulya gurhi rhurhakwanini rhuciyumve kubi omu kumanya oku Yehova aba arhumanyire bwinja? Rhukengere oku Yehova arhuyishi bwinja kulusha okurhuba rhucimanyire rhwene. Anabone ngasi muguma wirhu oku aba wa bulagirire, kw’okuderha wago-wago. Yehova aba ahugûsirwe akalamo kirhu koshi, kw’okuderha oku aba ahugusîrwe entanya zirhu n’ebijiro birhu. Okumanya ntyo kurhuhîre omurhima bwenene! Rhurhakwanini rhukaciyumva nka rhuli rhwene omu kalamo. Ngasi lusiku, ngasi mugobe, ngasi mwezi, ngasi mwaka, Yehova anabe ali alonza gurhi akarhurhabalamwo.​—2 Nga. 16:9.

15. Gurhi obufûke buyerekanamwo obwenge bwa Yehova?

¹⁵ Okuyoboha olufû eba nka bunduki. Shetani anakolese eyo bunduki lyo ayobohya abantu bajire ebintu biri lubero n’amakanuni ga Nnamahanga, kanji-kanji erhi bakabwira omuntu oku wafâ akaba orhajijiri ntyo, ho n’aho anarhondêre adirhimana. Abantu bakolera Shetani banakolese eyo njira y’okuyobohya lyo barhuma abantu balahira abîra babo n’okulahira ebi baba bayemire n’obwalagale. Cikoki eyo bunduki erharhuyobohya. Rhumanyire bwinja oku ciru abashombanyi birhu bakahikira aha barhuniga, Yehova anarhugalulire obuzine.  (Maf. 2:10) Rhuyemire n’obwalagale oku omu byoshi bakahikira aha bajira, ntaco coshi-coshi cakarhuma rhwalahira obwîra bwirhu haguma na Yehova. (Bar. 8:35-39) Yehova ayerekine bwinja oku ali mwenge omu kurhuha obulangalire bw’obufûke! Kugerera obo bulangalire anakaba nk’ali anyaga Shetani bunduki nguma y’omu mabundiki gage mazibu-zibu. Na ntyo Yehova anarhuhe oburhwali bw’okuhagalika oboba bw’olufû.

16. Madoso gahi oshinganine ocidose na gurhi amashuzo g’ago madoso gakakurhabala omanye kunganaci oba olangalire Yehova?

¹⁶ Erhi abashombanyi ba Yehova bakakuyobohya bakubwire oku bakuniga, ka wanalangalira oku Yehova anakufûle? Gurhi wakamanyamwo erhi wanalangalira Yehova mw’ako kasanzi? Burhangiriza wanarhang’icidosa ntya: ‘Emihigo yani ebe minene erhi misungunu, k’enayerekane oku mba ndangalire Yehova?’ (Luka 16:10) Kandi wanacibi cidosa ntya: ‘K’akalamo kani kaba kayerekine oku mba ndangalire eciragane ca Yehova c’okuhikiriza amalagirire gani erhi nakahira Obwami bwage oku nafasi ntanzi omu kalamo kani?’ (Mat. 6:31-33) Erhi wakashuza neci kw’ago madoso, aho wanayerekana oku olangalire Yehova na ciru wakaja omu marhangulo gahi, orhakadundagana ciru n’ehitya.​—Mig. 3:5, 6.

17. (a) Gurhi obufûke buyerekanamwo oku Yehova aba wakulembera? (b) Gurhi rhwakayerekanamwo oku rhushagalukire okulembera kwa Yehova?

¹⁷ Yehova amanyire mangaci ashereza er’igulu lya Shetani. (Mat. 24:36) Arhakagalula ako kasanzi embere erhi akashegeze enyuma z’olusiku arheganyize oku lwo ashereza banyankola maligo. Hano ako kasanzi kanahika, ho n’aho lyo ananashereze igulu lya Shetani. Yehova agwerhe irala ly’okufûla abafîre, cikone acigendekire alembera. (Ayu. 14:14, 15) Aciri alinda akasanzi kahike ly’afûla abafîre. (Yne. 5:28) Hali bintu binji byakarhuma rhwashagalukira oborhere bwa Yehova bw’okulembera. Bici byakarhuma rhwashagalukira oborhere bwa Yehova bw’okulembera? Okubona Yehova aba n’oborhere bw’okulembera kwa rhuhire akasanzi kw’okuhikira aha “rhwaciyunjuza ebyaha birhu.” (2 Pet. 3:9) Yehova aba alonzize abantu boshi babe n’obulyo bw’okuyish’iba n’obuzine bw’ensiku n’amango. Rhwanayerekana oku nirhu rhushagalukire okulembera kwa Yehova. Gurhi rhwakayerekanamwo ntyo? Omu kulonza balya “boshi bagwerhe irala ly’okuba n’obuzîne bw’ensiku n’amango” lyo rhubarhabala nabo bazigire Yehova n’okumukolera. (Ebij. 13:48) Erhi rhwakajira ntyo, nabo rhwanabarhabala bayunguke n’okulembera kwa Yehova.

18. Bulya gurhi rhushinganine okukalembera abandi?

 ¹⁸ Yehova agendekire alembera obuzamba bwirhu bw’okurhaba bimana kuhika okubuzinda bw’emyaka 1000 y’oburhegesi bwa Kristu. Embere oburhegesi bwa Kristu burhondêre bwarhambula hanw’igulu, Yehova agendekire arhubabalira ebyaha birhu. Nirhu rhushinganine rhucihangane rhuyake okukasegeza amagosa g’abandi, na ntyo rhwanayiga Yehova omu kulembera abandi n’omu kusegeza oborhere bwabo bwinja. Rhulole olwiganyo lwa mwali wirhu muguma iba aciyumvagya kubi bwenene n’oko kwarhuma arhondera omulibuza. Buzinda iba ahikira aha arhacija oku ntimanano. Oyo mwali wirhu adesire ntya: “Ago mango, akalamo kirhu kw’omulala kaba kabi bwenene.” Cikoki, oyo mwali wirhu acihangana agendekera alembera iba. Mwali wirhu akag’ilangalira Yehova bwenene co carhumaga arhamulekaga. Aka Yehova, oyo mwali wirhu akasegeza oborhere bwinja bw’iba na ntyo ayaka okusegeza amagosa gage. Mwali wirhu ayushwîre ntya: “Omulume wani ajira oborhere bwinja anali acihangana lyo ahagalika oko kuciyumva kubi bunyi-bunyi.” Kuli kwa bulagirire omu ngasi kanga k’akalamo rhukalembera abantu bw’omulala gwirhu n’abantu bw’omu cigamba!

19. Bici rhushinganine rhuhige okujira?

¹⁹ Erhi igulu lilemwa, Yezu na bamalahika bashagaluka bwenene. Cikoki, orhanye kunganaci bayish’ishagaluka amango igulu lyayunjula bantu bimana, bazigire Yehova banali bamukolera. Orhanye bushagaluke bunganaci balya bagulagwa hanw’igulu lyo bajirhambula haguma na Yezu empingu bayish’iba nabo hano babona gurhi bene bantu bali bayunguka n’omukolo gwabo. (Maf. 4:4, 9-11; 5:9, 10) Ocib’irhanya bushagaluke bunganaci rhwayish’iba nabo hano endwala, amalibuko n’emishibo bihwa emyaka n’emyaka. (Maf. 21:4) Kurhondera ene, rhuhige okuyiga Larha wirhu omu kuyerekana obuzigire, obwenge n’okulembera. Erhi rhwakajira ntyo, rhwanagendekera rhwaba n’omwishingo, ciru rhwakaba rhuli omu kanga kazibu. (Yak. 1:2-4) Rhushagalusire bwenene rhunavuzire Yehova omunkwa okubona arhulaganyize oku “hayish’iba obufûke bw’abafîre!”​—Ebij. 24:15.