1. Ladjikɛnge Yehova ndatateyɛ ntonga lowiko?

MÁ BANGO, Yehova ayalaki ngo nyɔmɛlɛ. Koko atokaki olengedji. Nde atayalaki kaanga la djonyi dj’onto ndokotshɛ lá n’kambo nkfumɔ. Koko Ndjambe akɔpaka djɛ anto ankina mba lowiko edjinge nsaasanga la lowiko lɔkɔ. Ndjokamaka djɛ, ngo má ngandji kɛnde, ndeke Yehova ndatateyɛ ntonga.​—Yee. 36:9; 1 Dj. 4:19.

2. Wopo wɔkɔnge Yeso ny’andjelo iyoke wina wɔ Yehova ndatongaka n’kete nkina?

² Yehova atongaka ntondotondo Yeso, loyisa ndoyala kanga lokotshɛki l’elemo. Ko, ma lotshimbola lɔ Wɔnɛnde wɔ ntondo wɔsɔ, ‘n’kete nkina nfumɔ n’tongamaka,’ ndjila edjinge wamiliyɔ y’andjelo. (Kɔl. 1:16) Yeso ayalaka l’osasa efula djɛ nkamba esanga nya Papa kɛnde. (Woo. 8:30) Edjinge andjelo wayalaka l’osasa efula. Iwɔ wayalaka anto wa ntondo wa nyɛna wina wɔ Yehova nya nkambi kɛnde kɛ wɔlɔ Yeso, iyatonge olongo la looko. Ko iyananghe mo? Iwɔ wa ‘tateyɛka nfula elolo w’osasa’ wina wɔ looko ndatongama, edjinge ape l’ehamu, iwɔ wakindjɛka nyɛnyɛ osasa la djedjɛ djɛwɔ wina onkfumɔ wɔ Yehova ndatongaka n’kete nkina, pekapeka wina w’etongelo kɛnde k’ekomo, onto. (Djɔ. 38:7; Woo. 8:31, nɔtɛ) N’kete nkfumɔ djetongamisa n’tshɔ, nyɛnyɛka ngandji edjinge balo djɛ Yehova.​—Yee. 104:24; Ɔrɔ. 1:20.

3. Lá nkilika 1 Kɔrɛtɔ 15:21, 22, mbamba kɛkɔnge kowaso m’oshinga wɔ mbendo?

³ Yehova akɔpaka dj’anto nsɛna lotshinda lotshinda l’edjena kɛ wɔlɔ efula k’indatongela ntepela ente looko. Koko, wina wɔ Adama ny’Eva iyatɔmbɔkɔ te Papa kɛwɔ kɛ ngandji, totakoka nsɛna lotshinda lonkina m’ɔtɛ wɔ ovunga la nyɔyi. (Ɔrɔ. 5:12) Yehova ndananghe mo? Mbala kɛkɔ kɛmɔ, nde atepelaka wopo w’indakoke ntshungola anto. (Ewa. 3:15) Yehova alakaka djɛ mpɛyɛ wɔnande entengo oshinga wɔ mbendo djɛ ntshungola tonkana la tonkanola t’Adama ny’Eva má penkato la nyɔyi. Nghɔsɔ  ndeke okokande mpɛyɛ onto onkfumɔ w’ɔsa n’kano djɛ ndokambela lowiko l’etshinda etshinda.​—Dj. 3:16; Ɔrɔ. 6:23; wala 1 Kɔrɛtɔ 15:21, 22.

4. Weepó wɛkɔnge wohonaso nkadjimola lá djamba djɛnɛ?

⁴ Daka djɛ Ndjambe djɛ nkfundola anto ma nyɔyi mposɛka weepó ɛmɔtshi. Ndjɔmbɔmba, ekfundwelo yongonanghema wopo wɔkɔnge? Tongolembetela anto waso wina wiyongokfundɔ? Osasa wɔkɔnge isongowa m’ekfundwelo? Edjinge olakanyelo wɔkɔnge wowaso ma n’kongi djelendana l’ekfundwelo lá n’kambo djɛ ngandji, balo, edjinge bale ntshitshi djɛ Yehova? Tokokadjimola lá weepó wɛsɔ.

5. Ladjikɛnge okokaso nfɛnyɛ ente anto wangokfundjɔ wangoyala ladjɛ nkfundjɔ l’ɔnɔnghɔ edjinge ndambondambo?

⁵ Wina w’ekfundwelo, Yehova angokfundola wa miliyɔ y’anto ma lotshimbola lɔ Wɔnande. Koko tokoka nfɛnyɛ ente anto ankfumɔ wasɔ, wapangokfundɔ mbala kɛkɔ kɛmɔ. Ladjikɛnge? Ladjikɛnde, ntsha anto wambofula mbala kɛkɔ kɛmɔ lá looko, ovungusano wongoyala. Lonkina, Yehova apananghaka akambo l’ofutano, kana l’ovungusano wɔ nghɔsɔ. Nde angewake ante djɛ mvu ndjala, ngo akambo nanghema l’ɔnɔnghɔ. (1 Kɔ. 14:33) Yehova Ndjambe ɛnyɛka balo la bale ntshitshi djɛnde wina windalɔngɔsɔlaka looko ndambondambo esanga la Yeso la ntondo kɛ ntonga anto. Wopo w’ɔkɔmɔ ndeke, wina w’ɛlɔndjɛlɔ kɛnde k’Ɛnɔnyi kinunu, Yeso angoyala la balo edjinge bale ntshitshi, wina wɔ ndongokamba esanga l’anto waangowika l’Armangɛdɔnɛ, djɛ ndɔngɔsɔla looko djɛ nsangela anto wangokfundjɔ.

6. Lá nkilika Elemo 24:15, wana wangoyala l’anteyi k’anto wangokfundjɔ me Yehova?

⁶ Koko, n’kambo djoleki djonyi efula nde, ’anto wángowiká l’Armangɛdɔnɛ wangoyala ladjɛ ndjekɛ anto wangokfundjɔ akambo walendana l’Onkfumi wɔ Ndjambe edjinge kɛnɛ  kɛ Yehova alɔmbande. Ladjikɛnge? Ladjikɛnde efula k’anto l’anteyi k’asengokfundjɔ, wangoyala l’anteyi ‘k’anto wa nyɛtshi.’ (Wala Elemo 24:15.) Anto wa nyɛtshi wasɔ ladjɛ nangha etshikitano efula lá lowiko lɔwɔ dj’iwɔ mba esako weyɛ má oshinga wɔ mbendo wɔ Kristo edjinge nsɛna etshinda l’etshinda. Kokanela efula k’olemo wɔ ndjekɛ akambo wa nsɔsɔlɔ wa Ndjambe le wa miliyɔ y’anto wapewe kaanga djoyi mɔ lá n’kambo djɛ Yehova. Onto l’onto angoyala la wetsha wɔnde nyɔmɛlɛ etengo onanghaso lɔɔko kɛnɛ te ambeki wa Bible? Anto wangokfundjɔ wasɔ, wangatomaka onto l’onto l’etshumanelo kɛnde edjinge wangakfumbaka dj’iwɔ ndjotateyɛ ndjekɛ anto ankina wangokfundjɔ Bible lonkina entengo iyawekɛ? Ngo iso nkonga djɛ ndɛna. Kɛnɛ k’ewaso winɔsɔ nde, tekomo k’Ɛnɔnyi kinunu w’ɛlɔndjɛlɔ kɛ Kristo, ‘looko l’ongolola kfu la balo djɛ Yehova.’ (Iza. 11:9) Tongoyala l’elemo efula wɛ nkamba l’ila k’Ɛnɔnyi kinunu wɛsɔ, ɔsɔngo osasa wongoyala l’eleko kɛsɔ!

7. Ladjikɛnge ankambi wa Yehova iyongolakanyɛ asengokfundjɔ la djandji nkfumɔ?

⁷ L’ila k’Ɛlɔndjɛlɔ k’ɛnɔnyi kinunu kɛ Kristo, ankambi wa Yehova ankfumɔ ladjɛ nangha etshikitano dj’iwɔ ndjawolama mende. Lá nangha nghɔsɔ ndeke iyongokotshɛ la ndjandji nkfumɔ asengokfundjɔ dj’iwɔ ntshikitanyɛ nanghedji djɛwɔ djɛ nyɛtshi edjinge nsɛna lá wopo wɛlama l’ɛlɛmbɛ wɛ Yehova. (1 Pɛ. 3:8) Asengokfundjɔ wasɔ, wangosepama m’okitshakitshɛ w’ankambi wa Yehova, ‘wakindjɛ n’kamba djɛ mpanda kɛwɔ.’​—Flp. 2:12.

8. Ladjikɛnge okokaso ndjawola djɛ tongolembetela nkfumbo yɛso edjinge tolongo tɔso tóngókfundjɔ?

⁸ Tolekɔ la donga efula dj’iso nkanela ente, anto wangosangela anto wawɔ wangokfundjɔ wapangavungɛ koko wangálembetela. Ndjɔmbɔmba, ekfundwelo k’anto amɔtshi wakfundwisa ntondo, ntɛnyɛka djɛ anto wa Yehova ndongo kalɔ ntonga lonkina, wangoyala l’ɛnamelo, la yopo yɛ ntepela edjinge yopo yekanedji kɛ yimba kɛkɔ kɛmɔ ngo ngete iyayalaka ntondo k’iwɔ m’vɔ. Vungɔ ente Yeso ɛdjɛka nyɔyi l’ilɔ edjinge ekfudwelo l’onto wombowetshɔ m’ilɔ. (Mat. 9:18, 24; Dj. 11:11-13) Wina w’onto owetshɔnde m’ilɔ, nde ndjalaka ngo l’ɛnamelo kɛkɔ kɛmɔ edjinge yopo yɛnde yɛ ntepela yɛkɔ imɔ yɛ ndomboyalaka la yɛkɔ ntondo kɛnde ndjetama. Lonkina, ilɔ apadjimolaka tokanyi tɔnde kana akambo wandɛnaki ntondo kɛnde ndjetama. Tɔkɔsa ndjɔmbɔmba kɛ Lazaro. Nde avɔka l’ila k’etsho ɛnɛyi, edjinge demba djɛnde djetatɛka mpɔnda. Koko wina wɔ Yeso ndokfundola, ankaana yɛnde w’olembetelaka mbala kɛkɔ kɛmɔ, wopo wɔkɔ ndeke, Lazaro ndalembetela ankaana yɛnde ngo wina wɔkɔ.​—Dj. 11:38-44; 12:1, 2.

9. Ladjikɛnge anto wangokfundjɔ iyopango kfundjɔ l’alemba edjinge la timba tɔ djɔ?

⁹ Yehova alakaka ante l’ɛlɔndjɛlɔ kɛ Kristo, lako kaanga onto wongotepela ante: ‘Lemi ndekɔ l’olando.’ (Iza. 33:24; Ɔrɔ. 6:7) Anto wangokfundjɔ wangokalɔ ntongama lonkina l’alemba wa wɔlɔ. Koko wapangoyala djɔ ngo wina wɔk’ɔmɔ. Ntsha lako, anto wawɔ wapangalembetela. Nyɛnamaka ngete, l’Ɛlɔndjɛlɔ k’ɛnɔnyi kinunu kɛ Yeso, anto ankfumɔ wangotayalaka ndjɔ ndambondambo. Ngo l’ekomo k’ɛnɔnyi kinunu ndeke Yeso ndongokawoyɛ Onkfumi te Papa kɛnde. Lasɔ k’Onkfumi womboshiyɛ nkotshɛ n’kambo nkfumɔ djɛ Yehova ndakɔpɛ nangha, ndjila edjinge anto ankfumɔ wangoyala djɔ.​—1 Kɔ. 15:24-28; Ndj. 20:1-3.

10. L’ikanyi yɛko, ngongoyawoka ngete mo wina w’ekfundwelo?

¹⁰ Kokanela djɛ osangela boto kana tolongo tɔkɔ. Ngongoyawoka ngete mo? Ong’ɔla antɔla, kana ongolela? Ngongotshumbela nde Yehova  teembo? Lá nsɔsɔlɔ, ongoyala la ngandji k’efula te Papa kɛko k’ekilaka yimba nya Wɔnande, ladjikɛnde iwɔ nkɔkɔpaka, la wambokɔpɛyɛ opapɛyɛ wɔ wɔlɔ efula, ekfundwelo.

11. Lá nkilika etepela wɛ Yeso welekɔ lá Djɔanɛ 5:28, 29, kɛkɔnge kengokomela anto wangɔlɛmɛyɛ tɔkfɔ tɔ Ndjambe?

¹¹ Kokanela osasa wongoyala l’anto wangokfudjɔ wina wiyongotadjolaka l’onto lɔwɔ lɔ ntondo, edjinge yongeka djɛ nsɛna lá wopo w’ɔtɔnɛ la tɔkfɔ tɔ Ndjambe. Anto wangawola nangha etshikitano wɛsɔ, wangonkfundjɔ ekfundwelo kɛ lowiko, ntepela ente wangowa lotshungɔ lɔ nsɛna etshindaetshinda lá Paradiso. Koko, Ndjambe apongotshika anto wapakɔpɛ nangha etshikitano nsɛna lá Paradiso edjinge ntshita m’vu djengoyala l’eteyi.​—Iza. 65:20; wala Djɔanɛ 5:28, 29.

12. Ɛtshɔkɔ wɛkɔnge Yehova ndongɔpɛyɛ anto?

¹² Wina wɔ Onkfumi yongotateyɛ ndɔmbɔla, ankambi wa Ndjambe ankfumɔ wangɛna nsɔsɔlɔ k’etepela welekɔ lá Woongo 10:22 wetepela ante: ‘Osako wɔ Yehova ndeke I’ɔnghɔnyɛka onto, edjinge nde apakfɛ ndjolo ladjiko djɛwɔ.’ Mpeyi la wolo wɔ nyuma k’ekina kɛ Yehova, ankambi wa Ndjambe wangoyala l’okfudji lá nyuma, ntepela ente, wangoleka nfɛna la Kristo edjinge wangotafulaka ta kokele. (Dj. 13:15-17; Ɛfɛ. 4:23, 24) Loshi la loshi, alemba wawɔ wangotayalaka wɔlɔ edjinge wolo. Ɔsɔngo lowiko ndongoyala wɔlɔ! (Djɔ. 33:25) Ko wopo wɔkɔnge nkanela lá n’kongi djelendana l’ekfundwelo okokawɔ ntokotshɛ lɔɔko kɛnɛ?

13. Etengo Yeembo 139:1-4, ɛnyɛnde, wopo wɔkɔnge ekfundwelo otoshikikɛnde djɛ Yehova angotewake wɔlɔ?

¹³ Etengo sɛnaki, wina wɔ Yehova ndongokfundola anto, nde angakfundola la nanghedji djɛwɔ djɛ ntondo dj’iyayalaka la djɛkɔ la ntondo k’iwɔ m’vɔ. Kokanela ndambo lá kɛnɛ kɛ n’kambo n’tshɔ ɔkɔpande nsakisola. Yehova nkɔkɔpaka efula ndjɛko ndeke olembetelande la ndopavungɛ tokanyi tɔkɔ, wopo woyawokɛ, k’enkfumɔ kotepelɛ edjinge k’enkfumɔ konanghɛ. Djɛko ndeke ntsha nde akɔpa nkokfundola, alekɔ wɔndju lende djɛ nkokfundola ngo wopo wingayalaka ntondo. Nkfumi Davidɛ ewaki djɛ Yehova ndjewaka wɔlɔ onto onkfumɔ wɔ l’anteyi kɛso. (Wala Yeembo 139:1-4.) Oyawokaso ngete mo wina wokaso djɛ Yehova ntewaka wɔlɔwɔlɔ?

14. Ladjikɛnge isopakoke ndakiyanyɛ l’ikanyi y’ente Yehova ndjewaka k’enkumɔ kelendana laso?

¹⁴ Ladjikɛnge isopakoke ndakiyanyɛ l’ikanyi y’ente, Yehova ndjewaka k’enkfumɔ kelendana laso? Ladjikɛnde Yehova apahone ntewa l’ɔtɛ wɔ ntom’vunda la nkɔmɔ la ntɔpɛyɛ dilanyɛ, koko nde ndakiyanyɛka efula n’kambo djɛso. Nde ndɔsaka onto onkfumɔ l’anteyi kɛso l’odjito. Nde nyɛnaka k’enkfumɔ ketokomela lá lɔsɛnɔ la ketotshinda djɛ ndjala wopo woyɛso. N’kambo n’tshɔ patokeketshɛ? Totakanelake ente, tolekɔ yengenga. Wɔkɛ wila, Yehova alekɔ ngo l’iso, ladjikɛnde nde mponaka mbamba kɛ ntokotshɛ.—2 Ɛk. 16:9.

15. Ladjikɛnge ekfundwelo oyɛwɔ ilembetelo yɛnyɛ ente Yehova alekɔ la balo?

¹⁵ Ntsha anto walekɔ la wɔma wɔ nyɔnyi, iwɔ nkoka ntshindama djɛ nangha akambo wiyopakoke nangha, wina wawanawɔ djɛ ndayaka. Anto walɔndjɛma me Satana nkambaka la wɔma wɔsɔ djɛ nanghela winawɔ nyɛtshi, kana ndatshinda djɛ ntona djawo djɛwɔ. Koko iso, topawola djɛ wɔma wa nyɔyi ntoshinda djɛ ntona djawo djɛso kana ntshita ɛlɛmbɛ wɛ Ndjambe. Iso ndjewaka ente, ntsha kaanga antonyi waso wambotoyaka, Yehova angotɔpɛyɛ lowiko lonkina. (Ndj. 2:10) Toyashikikɛ ente, lako n’kambo djokokawɔ tonanghela, djekoka ntokapola la ngandji k’okaso Yehova. (Ɔrɔ. 8:35-39) Nsɔsɔlɔ, n’kongi djelendana l’ekfundwelo ntɛnyɛka papoo balo djɛ Yehova! Má lotshimbola lɔ n’kongi djɛkɔ, nde mpapolaka Satana  otá wɔnde wɔ ntokɛ ɔpɔdju wɔ nyɔyi, edjinge ntɔpɛyɛka oloko wolo djɛ ntshikala la n’kɔmano kaanga wina wɔ Satana l’anto wande otanawɔ djɛ ntoyaka.

16. Weepó wɛkɔnge wokokɛ ndawopola, edjinge ekadjimwelo wɛko lá weepó wɛsɔ okɛnyɛwɔnge?

¹⁶ Ntsha antonyi wa Yehova wambokaana djɛ nkoyaka, wɛ ongoyala la djawo ente nde angokokfundola? Wopo wɔkɔnge okokɛ ndjewa ente olekɔ la djawo n’tshɔ? Yopo imɔtshi nde, wɛ ndawopola nghɔmɛlɛ ente, ‘Akano wɔsami loshi la loshi l’akambo wa tontshintshi, nyɛnyɛka ente lemi ndekɔ la djawo te Yehova?’ (Luka 16:10) Lonkina, okoka ndawopola nghɔnɛ ente, ‘Yopo yɛmi yɛ lowiko, nyɛnyɛka djɛ lemi ndekɔ la djawo lá daka djɛ Yehova djetepela ante, nde angon’kotsheyɛ ehoba wɛmi welá demba ntsha lambohona ntondotondo Onkfumi wɔnde?’ (Mat. 6:31-33) Ntsha ombokadjimola ente, ee, mbɔ koko wɛ olekɔ la djawo te Yehova edjinge, olekɔ entshupa djɛ ndeka ehemba enkina wekokongela lá ntondo wolo.​—Woo. 3:5, 6.

17. a) Wopo wɔkɔnge ekfundwelo otɛnyɛnde djɛ Yehova alekɔ la bale ntshitshi? b) Wopo wɔkɔnge okokaso nyɛnyɛ djedjɛ djɛso te Yehova má bale ntshitshi djɛnde?

¹⁷ Yehova amboshiyɛka nshikikɛ loshi lɔ ndongotshita andja wa nyɛtshi wanɛ. (Mat. 24:36) Nde apongolekana loshi lɔkɔ kana nɔnghɔsɔla akambo lá ntondo kɛ loshi lɔkɔ. Nde alekɔ nsɔsɔlɔ la mposɛ kɛ nkfundola anto koko nde nyɛnyɛka bale ntshitshi. (Djɔ. 14:14, 15) Nde alekɔ nkonga etena kɛ wɔlɔ kɛ nde ndakawoyɛ la lɔsɛnɛ. (Dj. 5:28) Tolekɔ la donga djɛ wɔlɔ djɛ nyɛnyɛ ndjedjɛ djɛso te Yehova l’ɔtɛ wɔ bale ntshitshi djɛnde. Kokanela ndambo: Ngo ladjikɛnde Yehova alekɔ la bale ntshitshi, ndeke anto efula ndjila edjing’iso, isawa mbamba ‘k’iso ndaapɛla,’ l’evunga wɛso. (2 Pɛ. 3:9) Yehova nkɔpaka mpɛyɛ anto efula mbamba k’iwɔ mba lowiko l’itshinda. Djɛkondeke, nyɔtshɔ ntɛnyɛ djedjɛ djɛso tende. Iya wopo wɔkɔnge? Lá nangha k’enkfumɔ kokokaso nangha djɛ mpona anto ‘walekɔ entshupa djɛ djawola akambo wa nsɔsɔlɔ wapɛyɛ lowiko,’ edjinge djɛ ndakotshɛ dj’iwɔ nkɔpa Yehova la ndokambela. (Ele. 13:48) Nghɔsɔ ndeke anto wasɔ okokawɔ nyɛna bale ntshitshi djɛ Yehova entengo iso.

18. Ladjikɛnge oyɛso ladjɛ nyɛnyɛ bale ntshitshi djɛso te anto ankina?

¹⁸ Yehova apongotɔlɔmba dj’iso nkoma kokele kana djɔ la ntondo k’ɛnɔnyi kununu, nde angotɛnyɛ bale ntshitshi djɛnde lá n’kambo n’tshɔ. Djɛkondeke otimeyɛnde emvunga wɛso. Ɔsɔ alekɔ nsɔsɔlɔ elonga kɛ wɔlɔ koyɛso la djɛ mpika wiso ngo lá wekeka wa wɔlɔ wa winaso  ankina, edjinge ndjala la bale ntshitshi tewɔ. Tokolenda ndjɔmbɔmba kɛ nkaana kɛmɔtshi kɛ womɛnde atasanghanaka lonkina la nsanghanyɛ, má olando w’efula wokiyano woyalaki lande. Nde atepelaka ante: “N’kambo n’tshɔ djeyalaka wolo efula le lemi. Tokanyi t’onkfumɔ tisakanelaka lá nkfumbo kɛso totshitanaka.” Koko nkaana kɛso kɛsɔ ankindjɛka ndjala la ngandji edjinge bale ntshitshi te womɛnde. Nde ayapɛyɛka ngo le Yehova, edjinge ata pekɔ. Etengo Yehova, nde atapika wiso wande ngo l’olando wɔ womɛnde toko, koko ilaka wiso lá wekeka wa wɔlɔ wa womɛnde. Nde atepela lonkina ante, “Womɛmi alekɔ la wekeka wa wɔlɔ efula, nde nanghaka la wolo onkfumɔ djɛ nana l’olando, edjinge atálekaki olando wɔkɔ wolo ndambo ndambo.” Alekɔ djonyi efula nyɛnyɛ bale ntshitshi djɛso te boto la bɔndɔ djɛso edjinge te winaso wa l’otshumano wanana djɛ ndongela ekakasano wepomana lawɔ!

19. Oyɛso ladjɛ ndashikikɛ djɛ nangha nge?

¹⁹ Yeso nya andjelo wayalaka l’osasa wina wɔ looko ndatongama. Kokanela wopo wongoyala osasa wɔwɔ lonkina wina wɔ yongɛna looko lombolola kfu l’anto wa ndjɔ wakɔpa la wakambela Yehova. Kokanela lonkina osasa wɔ wanɛ wangotshɔ l’olongo djɛ ntɔlɔndjɛ la Yeso wina wɔ yongɛna dj’olemo wokambawɔ wɔpɛyɛ anto osako. (Ndj. 4:4, 9-11; 5:9, 10) Edjinge kokanela wopo wɔ lowiko ndongoyala wina wɔ wisɔdji w’osasa ndongɔhɛna wisɔdji w’okiyano edjinge wina wɔ elando, ndjolo la nyɔyi ndongodjipisana lotshinda lotshinda. (Ndj. 21:4) Wina wokongaso etena kɛsɔ, nyotshɔ toyashikikɛ djɛ ndjokola Yehova Papa kɛso kɛ ngadji, kɛ balo, edjinge kɛ bale ntshitshi. Ntsha tombonangha nghɔsɔ, tongotshikala l’osasa kaang’oyɛso l’ekakasano wɛkɔnge wɛsɔ. (Dja. 1:2-4) Djɛkondeke nyotshɔ tɛnyɛ djedjɛ djɛso te Yehova má daka djɛnde djɛ wɔlɔ efula djɛnɛ, enkfundwelo k’engoyala’!​—Ele. 24:15.