1. Bwakinyi Yehowa baadi mupangye bantu?

KINGI kipungo, Yehowa baadi bupenka. Anka bino tabibaadi abimwinyongosha nya. Mwanda tabaadi na lukalo lwa kwikala na ungi muntu bwa kwikala na muloo. Kadi baadi mukumiine’shi bangi bekale na muwa na muloo. Pa mwanda wa kifulo, Yehowa babangile mudimo wa kupanga.​—Mis. 36:10; 1 Yo. 4:19.

2. Yesu na ba mikeyilu abaapushishe naminyi pabitale bupangi bwa Yehowa?

² Kumpala, Yehowa baadi mupangye Mwan’aye Yesu. Kubukwashi bwa Mwana aye mbedi, “bintu bioso bibapangilwe,” mpa na binunu bya ba mikeyilu. (Kol. 1:16) Yesu baadi na muloo wa kufuba pamune na Nshaye. (Nki. 8:30) Na ba mikeyilu naamu abaadi na muloo. Abaadi panka nsaa ibaadi Yehowa na Mukata aabo Yesu abapanga eyilu na nsenga. Mushindo kinyi ubabaadi baleshe muloo? Abaadi abeele “musaase wa kusepeela” nsaa ibaadi nsenga ipangibwe, na abaadi batungunukye na kukupila bikashi bwa kantu kooso kabaadi Yehowa apanga, bikishekishe bantu. (Yob. 38:7; Nki. 8:31) Kyoso kipangwa kya Yehowa akilesha kifulo na kinangu kyaaye.​—Mis. 104:24; Lom. 1:20.

3. Bu byabadi bebileshe 1 Beena-Kodinda 15:21, 22, mulambu wa nkuulo wa Yesu aupetesha bantu kinyi?

³ Yehowa baadi akumiina’shi bantu bekale kwanka bwa looso na muloo mu mbalo ibuwa ibaadi mupangye. Anka, nsaa ibaadi Adame na Eeva batombokyele Nshabo sha kifulo, mulwisho na lufu bibatwelele pa nsenga pooso. (Lom. 5:12) Yehowa bakitshine kinyi? Musango umune, bakimbile bya kukuula bantu. (Kib. 3:15) Yehowa baadi na kya kutusha mulambu  wa Yesu bwa kukuula bana ba Adame na Eeva ku mulwisho na lufu. Pa kukita byabya, mmupe muntu ooso bulungantu bwa kumufubila na kupeta muwa wa ikalayika.​—Yo. 3:16; Lom. 6:23; badika 1 Beena-Kodinda 15:21, 22.

4. Nkonko nkinyi yatutaluula mu uno mwisambo?

⁴ Kwi nkonko ibungi yatukwete kwiyipusha pabitale mulayilo wa Yehowa wa kusangula bantu. Bu kileshesho, lusangukilo lwi nkakitshika naminyi? Atukekala na ngobesha ya kutundula baaba abakasanguka su? Lusangukilo aluketutwadila muloo mu kipaso kinyi? Na lusangukilo alwitulongyesha kinyi pabitale kifulo, kinangu na lwishinko bya Yehowa? Tutaluuleyi ino nkonko yooso.

5. Nkabingilo kinyi aketutakula mu kwamba’shi, bantu booso t’abakasanguka musango umune?

⁵ Nsaa ayikasangula Yehowa midiyo ya bantu ku bukwashi bwa Yesu, tutengyeleyi’shi, ta mboso abakasanguka musango umune nya. Bwakinyi? Mwanda kwakwa kufwima kwi byabya kwa bantu, akukatwesha kafutakanyi. Yehowa t’akitaa kintu su nkimune mu kafutakanyi nya. Auku’shi bwa’shi bantu bekale mu kufukama, abitungu bintu byooso bikale mmulongo. (1 Kod. 14:33) Yehowa baadi muleshe kinangu na lwishinko pabaadi afubu na Yesu bwa kulumbula nsenga kapelakapela kumpala kwa kupanga bantu. Yesu namu, akalesha ino ngikashi mu Bipwa kinunu nsaa y’akafubu na bantu abakapanda ku Armagedone bwa kulumbulwila baba abakasanguka bilamba, bya kudya, mashibo na bingi bintu.

6. Muyile Bikitshino 24:15, mu bantu abakasanguka, amukekala dingi ba nnanyi?

⁶ Mushindo wi buwa wabakakwasha bantu abakasanguka kwi bantu abakapanda ku Armagedone, nyi kwibalongyesha pabitale  Bufumu bwa Yehowa na miiya yaaye. Bwakinyi? Mwanda, bebungi abakasanguka nyi baaba babetamina kwi Bible bu “bashii-balulame.” (Badika Bikitshino 24:15.) Abitungu bakashintulukye bwabadya kupeta myabi ya mulambu wa nkulo wa Kidishitu bwa kwikala na muuwa wa looso. Banda kunangushena bungi bwa mudimo aukatungu bwa kulongyesha byabya byooso binunu bya bantu bya binyibinyi pabitale Yehowa. Muntu ooso abakamulongyesha Bible pa bupenka bu byabikwete kukitshika lelo uno su? Bano abakasanguka abakebatumu mu tukongye na kwibalongyesha bwabadya kulongyesha namu baaba abasanguka kunyima kw’aabo su? Tutengyeleyi, atukamono akikakitshika. Atuuku’shi kumpala kwa’shi Bipwa kinunu bya kumunana kwa Yesu bipwe, “eumbo [nsenga] adikala dyuule na kuuka kwa Yehowa.” (Yesh. 11:9) Atukekala na mudino wi bungi wa kukita mu bipwa kinunu!

7. Bwakinyi abikatungu mwilo w’Efile Mukulu uleshe baaba abakasanguka kifulo kya bu bana na bana?

⁷ Mu Bipwa kinunu bya kumunana kwa Kidishitu, abitungu bana booso ba Yehowa be pa nsenga batungunukye na kushintuluka bwa kumusankisha. Byabya, abitungu bekale na kifulo kya bu bana na bana, bwa’shi bakwashe baba abasanguka bwabadya kukambila binangu bya mulwisho na kutumikila miiya ya Yehowa. (1 Mp. 3:8) Kushi mpaka, baba abakasanguka abalamata bafubi ba Yehowa basha kwiyisha, na ‘abafubu bwa kipandjilo [kyaabo.]’​—Fid. 2:12.

8. Bwakinyi atushinkamisha’shi atukatundula bakwetu ba mu kifuko na ba kuuku betu abakasanguka?

⁸ Kwi tubingilo twi bungi atwitutakula bwa kushinkamisha’shi, baba abakakukila bantu abakasanguka, abakekala na ngobesha ya kwibatundula. Bu kileshesho, nka bu bibabidi bikitshikye bwa bantu babaabadi basangule kala, abimweka’shi mpala, ngakwilo na kipaso kya kunangushena kya bantu babakasangula kwi Yehowa, abikala’nka byabikalanga nsaa ipeela kumpala kwa’shi bafwe. Tentekyesha’shi Yesu baadi mupwandikishe lufu na tulo, na kusanguka bu kubuka ku tulo. (Mat. 9:18, 24; Yo. 11:11-13) Nsaa ayibukaa bantu ku tulo, abamwenekaa na kupushika nka bu byabekalanga kumpala kw’abo kulaala, na abalamiinaa nka myanda yabaukanga kumpala kwa kulaala. Tubandeyi kutaluula kileshesho kya Lazare. Baadi mufwe takubaadi mafuku ananka, na mbidi yaye ibaadi ibangye kunyanga. Kadi pabaadi Yesu mumusangule, ba nkashanaye abaadi bamutundule mususa umune, na Lazare namu baadi mwibatundule.​—Yo. 11:38-44; 12:1, 2.

9. Bwakinyi bantu t’abakasanguka na mbidi na binangu bipwidikye?

⁹ Yehowa mmulee’shi mu Mpaladiiso, muntu sunga ngumune t’akamba’shi: “nee na mukumbo.” (Yesh. 33:24; Lom. 6:7) Dingi, baaba abakasanguka, abakekala na mbidi ibuwa. Kadi, tabakekala bapwidikye mususa umune nya. Bisumanga, bakwabo ba mu kifuko t’abakebatundula nya. Abimweka’shi, bantu booso abakafiki bapwidikye kapelakapela mu Bipwa kinunu bya kumunana kwa Kidishitu. Ku nfudilo kwabyo, Yesu akalusha Bufumu kwi Nshaye. Paapa, Bufumu abukekala bulombashe mpángo ya Yehowa, mpa na mudimo wa kwikasha bantu bapwidikye.​—1 Kod. 15:24-28; Kibaf. 20:1-3.

10. Lusangukilo alukekala na bukitshishi kinyi kodi?

¹⁰ Banda kunangushena muloo okekala nao pokakukila bantu boodi mufule abakasanguka.  Okasepe su okadidi mwanda wa muloo? Okayimbila Yehowa misambo ya kumutumbisha nayo mwanda wa muloo su? Kushi mpaka, okekala na kifulo kikata bwa Nshobe sha kifulo na Mwan’aye mwanda wa kya buntu kya kukaanya kya lusangukilo.

11. Muyile mayi a Yesu e mu Yowano 5:28, 29, baaba abatumikila miiya ilulame y’Efile Mukulu abakapete kinyi?

¹¹ Banda kunangushena muloo aukekala nao baaba abakasanguka nsaa yabalekye bu muntu bwa kala na kwikala na nshalelo mwipushene na miiya ilulame y’Efile Mukulu. Baaba abashintuluka mu wawa mushindo, abakasanguka bwa kwikala na muwa wa looso. Ku lungi lupese, baaba abakatombokyela Efile Mukulu, tabakebatadiila bwabadya kutwela na kafutakanyi mu Mpaladiiso na kulwisha butaale nya.​—Yesh. 65:20; badika Yowano 5:28, 29.

12. Booso abakekala pa nsenga, Yehowa akebelela myabi mu mushindo kinyi?

¹² Mu Bufumu bw’Efile Mukulu, bafubi baye boso abakamono kulombana kwa mayi e mu Nkindji 10:22 aamba’shi: “Mwabi wa Yehowa nyi aupeyâ muntu bupeta, tawikalaa na twinyongoshi.” Ku bukwashi bwa kikudi kya Yehowa, bafubi baye abakekala ba mpeta mu kikudi, kwamba’shi, abakafiki nka bu Kidishitu na abende na kupwidika. (Yo. 13:15-17; Ef. 4:23, 24) Efuku dyooso, mbidi yaabo ayinyingi, na kufika bantu be buwa. Nshalelo akekala buwa bukile! (Yob. 33:25) Kunangushena ku lusangukilo akukukwasha naminyi kubanga binobino?

13. Muyile Misambo 139:1-4, lusangukilo alulesha naminyi’shi Yehowa etuuku kalolo?

¹³ Anka bu bibatukatuka mu kwibimona, nsaa ayikasangula Yehowa bantu, akebalwisha binangu byabo, na abakamweneka’nka byabekalanga kumpala kwa kufwa. Banda kunangushena pabitale byabilesha. Yehowa mmukufule ngofu mu kipaso kyadi mulamiine na kutentekyesha mushindo oobe wa kunangushena, byopusha, ngakwilo na bikitshino byobe. Byabya nsaa yakusangula, akwalusha nka byabya bibodi kumpala. Nfumu Daavide baadi auku’shi Yehowa auku ooso a kwatudi kalolo. (Badika Misambo 139:1-4.) Atupusha naminyi nsaa yatuuku’shi Yehowa etuuku kalolo?

14. Twi kupusha naminyi nsaa yatunangushena ku kipaso akituuku Yehowa?

¹⁴ Nsaa yatunangushena ku kipaso akituuku Yehowa kalolo, tatwi balombene kwikalakasha nya. Bwakinyi? Tentekyesha’shi Yehowa etupasukilaa. Ataa ooso a kwatudi na muulo. Auku kalolo myanda yoso yatukwete kufumankana nayo mu nshalelo eetu. Bino abitunyingisha ngofu! Tatwi balombene kupusha’shi twi bupenka nya. Nsaa yoso, Yehowa e’nka netu, na e peepi bwa kwitukwasha.​—2 Mya. 16:9.

15. Lusangukilo alulesha naminyi’shi Yehowa e na binangu?

¹⁵ Kutshina kwa lufu nyi muteo ukata. Bantu be ku matalwa a Satana mbalombene kwiufubisha bwa kutakuula bantu bwabadya kukitshina ba kuuku babo bi bubi sunga kwibatakula mu kukita kintu kii bubi. Kadi, tabe na matalwa a kwitutakula mu kukita byabya nya. Atuuku’shi sunga beshikwanyi netu betwipaa, Yehowa aketusangula. (Kibaf. 2:10) Twi bashinkamishe’shi, takwi kintu sunga nkimune kyabadya kukita kilombene kulwisha kipwano kyetu na Yehowa. (Lom. 8:35-39) Yehowa mmuleshe’shi e na binangu pa kwitupa lukulupilo lwa lusangukilo! Ku bukwashi bwa lusangukilo,  mmulwishe kimune kya ku bina ngoshi bikata bya Satana na kwitupa eshimba dinyingye ngofu.

16. Nkonko kinyi ayitungu’shi weyipushe, na ngaluulo yayo i nkukwasha naminyi bwa kuuka’shi we mukulupile mwi Yehowa?

¹⁶ Su beshikwanyi ba Yehowa bakulungula’shi abakyebe nkwipaa, wekala na lukulupilo’shi Yehowa akakusangula su? We kuuka naminyi’shi okulupila mwi Yehowa yaya nsaa? Kya kumpala, eyipushe’shi: ‘Bitshibilo byangataa efuku dyoso sunga byekala bipeela, abilesha’shi ne mukulupile mwi Yehowa su?’ (Luk. 16:10) We kwiyipusha dingi’shi: ‘Nshalelo aande alesha’shi ne mukulupile mu mulayilo wa Yehowa wa kulombasha nkalo yande ya ku mbidi su natuula Bufumu bwaye pa mbalo ya kumpala su?’ (Mat. 6:31-33) Su lwaluulo ku ino nkonko lwi’shi oolo, byabya abilesha’shi we mukulupile mwi Yehowa, na wekala mwilumbuule bwa kukambila lukalakashi looso lofumankana nalo.​—Nki. 3:5, 6.

17. (a) Lusangukilo alulesha naminyi’shi Yehowa e na lwishinko? (b) Mushindo kinyi watudi balombene kulesha lutumbu bwa lwishinko lwa Yehowa?

¹⁷ Yehowa mmutshibe efuku na nsaa y’akabutula uno ndumbulwilo ebubi. (Mat. 24:36) Atengyela na lwishinko mpa na apakalombana yaya nsaa. E na lukalo lwa kusangula bantu, byabya e na lwishinko. (Yob. 14:14, 15) Atengyela mpa na apalombana kipungo kya kwibasangula. (Yo. 5:28) Abitungu twikale na lutumbu bwa lwishinko lwa Yehowa. Banda kunangushena: Pa mwanda wa lwishinko lwaye, bantu bebungi, mpa n’atwe, ‘twibafikye mu kwilanga.’ (2 Mp. 3:9) Yehowa akumiina’shi bantu bebungi bapete mushindo wa kwikala na muwa wa losoo. Byabya, tulesheyi’shi twi na lutumbu bwa lwishinko lwa Yehowa. Mushindo kinyi? Pa kukita mwetu moso bwa kukimba baba “be na mashimba alombane bwa muwa wa looso,” na kwibakwasha bwabadya kufula Yehowa na kumufubila. (Bik. 13:48, NWT) Paapa, abapetela bukwashi ku lwishinko lwa Yehowa nka bu’twe.

18. Bwakinyi abitungu tuleshe bangi lwishinko?

¹⁸ Yehowa atengyela na lwishinko looso mpa na apafudiila Bipwa kinunu, kumpala kwa’shi tufikye bapwidikye. Mu kyakya kyooso kipungo, Yehowa ekala nka etufwila lusa ku milwisho yetu. Byabya, abitungu twambule kileshesho kyaaye pa kukimba ngikashi ibuwa ya bangi na kwibalesha lwishinko. Tala kileshesho kya ungi mukwetu mukashi, sha mulume babangile kwinyongola ngofu,  aaye nkuleka mpa na kutwela mu bisangilo. Amba’shi: “Bibaadi abinkalakasha ngofu. Nshalelo etu bashintulukile musango umune, na tatubaadi dingi na mushindo wa kukita byooso bibaadi abitungu’shi tukite nya.” Sunga mbyabya, uno mukashi sha kifulo, batungunukile nka na kulesha mulume aaye lwishinko. Baadi mukulupile mwi Yehowa kushii kukooka. Nka bu Yehowa, baadi mutule binangu ku ngikashi ibuwa ya mulume aaye. Amba dingi’shi: “Mulume ande baadi na ngikashi ibuwa ibungi, na baadi etatshisha bwa kukambila twatwa twinyongoshi.” Bi na muulo ukata bwatudya kwikala na lwishinko kwi bena kifuko netu sunga bena kakongye abakitshi mwabo mooso bwa kukambila nkalakashi y’aabo.

19. Abitungu twikale na kitshibilo kya kukita kinyi?

¹⁹ Yesu na ba mikeyilu abaadi na muloo nsaa ibaadi nsenga ipangibwe. Banda kunangushena muloo wabakekala nao apakekala bantu booso bapwidjikye mu nsenga ishima, bafule Yehowa na abamufubila. Nangushena muloo aukekala nao booso abakende mwiyilu nsaa yabamono bantu abapetela myabi mu mudimo waabo. (Kibaf. 4:4, 9-11; 5:9, 10) Na, nangushena nsaa ayikekala ayituuku mpolo ya muloo, pamutwe pa ya makyenga, nsaa ishayikekala dingi mikumbo, twinyongoshi na lufu. (Kibaf. 21:4) Kubanga binobino, ikala na kitshibilo kya kwambula Nshobe sha kifulo, kinangu, na lwishinko. Su bokitshi byabya, olama muloo oobe sunga ofumankana na nkalakashi i naminyi. (Shak. 1:2-4) Twi na lutumbu lukata bwa mulayilo wa Yehowa wa’shi: “Akukekala lusangukilo”!​—Bik. 24:15, Kilombeeno kipya 2014.