1. Juu ya ki Yehova waabumbile bukose?

MUSITA umo, Yehova abanga wali bunke. Inzi tabanga waali mu bulanda. Yehova takabiile kuya wali pamo ni muntu kampanda eevi aaluke ni nsaansa. Inzi, Yehova waatonene bantu baalukeko kabili baye basekeleele. Ntono yaamusonseziizie atendeke kubumba.​—Malum. 36:9; 1 Yoan. 4:19.

2. Yesu ni bamalaika baaunvuile siani musita Yehova lwaabumbile bintu binge?

² Yehova waatendekele kumubumba Yesu, Muana wakue. Kisia, kupitila Muana wakue wa kuanza, “bintu binge byonse byaabumbilue,” kubiika pamo ni mamilioni a bamalaika. (Bakol. 1:16, NWT) Yesu waasekeleele saana kubomba pamo ni Baba wakue. (Tus Maf. 8:30) Ni baana bakue Leeza, i kulanda nangue bamalaika, baasekeleele. Babanga bamweneneene musita Yehova ni Yesu, Fundi Wakue wa Miilo lubabanga babumba muulu ni kyalo. Bamalaika baakitile siani? ‘Baatendekele kubulula tupundu bakosela’ musita kyalo lukyabumbilue. Kabili baatwaliliile kumulumbania Leeza musita lubaamwene kila kintu kyaali wabumba, i nkile lwaabumbile bantu. (Yob. 38:7; Tus Maf. 8:31, bulondolozi buli pensina) Kila kimo pakati ka bebio bibumbua, kyaalangiliile ntono ni mulangue wakue Yehova.​—Malum. 104:24; Bar. 1:20.

3. Nga vilangiliile 1 Bakorinto 15:21, 22, ngeleelo ya kilubula mulandu yakue Yesu ili yakwasia siani?

³ Yehova waapangile lupua lwa bantu lusaansamukile bukose bwa loonse pa kyalo kiweeme saana kyaabumbile. Inzi Adamu ni Eva baakitile lizaambi kuli Baba wabo wantono. Pakaako, lufu ni  lizaambi byaavulunghaniizie kiswapilo kya bantu pa kyalo. (Bar. 5:12) Yehova waakitile siani? Bila kukokola, waalandile vyali wakapususia bantu. (Kut. 3:15) Yehova waapaangile kuleeta kilubula mulandu kya kubakwasia baana bakue Adamu ni Eva bafume mu lizaambi ni lufu. Pakaako waapeele kubalua muntu fuasi ya kusaakula kumubombela Weene, ni kupata bukose bwa loonse.​—Yoan. 3:16; Bar. 6:23; Soma 1 Bakorinto 15:21, 22.

4. Tuli kulondoluela biipuzio ki mu leeli lyasi?

⁴ Bulayo bwakue Leeza bwa kutuntumuna bantu bafuile, buli bwaleeta biipuzio bingi. Paange kutuntumuka kwakakitika siani? Musita wakatuntumunua bantu betu batutonene, eba, twakabeenika? Kutuntumuka kwakatuleetela siani nsaansa? Kabili, kutuntumuka kwatusambilizia ki palua ntono, mulangue, ni kupembelela kwakue Yehova? Ale kansi tulondoluele kila kiipuzio.

5. Juu ya ki kili buino kutontonkania nangue bantu tebakatuntumunua mwa kimo?

⁵ Musita Yehova lwakamubombia Yesu eevi kutuntumuna mamilioni a bantu bafuile, paange bonse te bakatuntumukila mwa kimo. Juu ya ki? Paantu kine bantu batuntumukila mwa kimo ao palia penka, pa kyalo kunti paaluka kinvulunghania. Kabili Leeza teezi kweziapo ata kaniini kukita kantu mu kinvulunghania. Amanine nangue eevi bantu bekale mu mutende loonse, bintu bipalile byapaangile buino. (1 Bakor. 14:33) Yehova Leeza waabombiizie mulangue ni kupembelela, musita lwaabombele pamo ni Yesu eevi kuteania kyalo, wabumba kamo-kamo ntaanzi ya kubumba bantu. Ni mu musita wa Buteeko bwakue bwa Miaka Elufu Imo, Yesu wakabombia enka ezio mibeele. Wakakita evio musita lwali wakabomba pamo ni bantu bakapusuka pa Armagedoni,  eevi kuteania kyalo ni kupokelela baalia bakaba kutuntumunua.

6. Nga vilandile Miilo 24:15, ni baani bange bakatuntumunua na Yehova?

⁶ Kintu kya mana saana kyakakita baalia bakapusuka pa Armagedoni, ni kusambilizia palua Bukolo Bwakue Leeza ni palua bintu biloombelue na Yehova ku baalia bakatuntumunua. Juu ya ki? Paantu bengi pakati ka baalia bakatuntumunua bakaba seemu ya bantu ‘basili bansaambu.’ (Soma Miilo 24:15.) Bakaba bakabiile kupilibuka saana eevi bakaviinde kupata mpaalo yakaleetua na kilubula mulandu kyakue Kristu ni kwikala loonse. Tontonkania palua bintu byakaba byabiikile mukati miilo ya kusambilizia kisinka palwakue Leeza ku mamilioni a bantu basimumanine Yehova. Eba, kila muntu wakaba ni kasambilizia wakue bunke, nga vituli twakita pa kusambilizia basambi ba Bibilia leenu? Eba, baalia bakasambiliziiwa bakengiziiwa mu bilonghaano ni kubeleziiwa vya kusambilizia bange bantu bakatuntumunua kisia beene? Tetumanine kine kyakaba siani. Inzi kitumanine ni keeki: Ku mpeleezio ya Buteeko Bwakue Kristu bwa Miaka Elufu, ‘kyalo kyakeezula kakiine na kumana kwakue Yehova.’ (Is. 11:9) Kakiine mu miaka elufu imo mwakaba miilo ingi ya kukita, inzi isaansamusiizie!

7. Juu ya ki bantu bakue Leeza bakalangilila nkumbu musita wa kusambilizia baalia bakatuntumunua?

⁷ Mu Buteeko Bwakue Kristu bwa Miaka Elufu, baana bonse bakue Yehova bakaba baali pa kyalo, yakaloomba bakatwalilile kukita bupilibuko eevi kumusaansamusia. Kukita evio kwakabakwasia bonse kubonvuila nkumbu bantu bakatuntumunua, musita ubakaba babakwasia kuluisia mibeele yabo ya lizaambi ni kubakwasia kukoonka mafunde akue Yehova. (1 Pet. 3:8) Bila kutwisika baalia bakatuntumunua bakeyunvua kuya baali peepi ni bantu bakue Yehova bekefiizie, ni beene bakaba ‘babombela palua bupusuko [bwabo] beene.’​—Baf. 2:12.

8. Juu ya ki kunti twalanda nangue twakabeenika batonua betu baafuile bakatuntumunua?

⁸ Kuli nsaambu ingi ya kutulengia kuzumina nangue baalia bakaba bapokelela bantu bakatuntumunua, bakabeenika batonua babo baafuile. Kwa mufuano, nga vikyali pa kutuntumunua kwakitikile kale, kunti twaswapila nangue Yehova wakabumba bantu kupia, eevi bakabe bamona, batenda, ni kutontonkania nga evelia vibaali musita uniini ntaanzi tebanafue. Languluka nangue Yesu waapalaniizie lufu ni koona tulo, kabili waapalaniizie kutuntumunua ni kukensiiwa kufuma mu tulo. (Mat. 9:18, 24; Yoan. 11:11-13) Musita bantu lubali bafuma mu tulo, bali bamona, kulanda ni kulanguluka tuntu nga evelia vibakiba baali ntaanzi tebanaone. Tontonkania palwakue Lazaro. Waakitile nsiku ina wafuile, pakaako mubili wakue waali wasyatendekele kubola. Anzia evio, musita Yesu lwaamutuntumuine, bankazi bakue baamwinikile penka palia, kabili Lazaro waabalangulukile.​—Yoan. 11:38-44; 12:1, 2.

9. Juu ya ki baalia bakatuntumunua te bakabusiiwa bali ni maano ni mibili ipuililikile?

⁹ Yehova alaile nangue mu Paradiso temuli wakalanda nangue: “Nduele.” (Is. 33:24; Bar. 6:7) Pakaako, baalia bakatuntumunua bakaba bali ni mibili yakosele. Inzi tebakabusiiwa bapuililikile. Kine babusiiwa bapuililikile, balupua babo kunti baandua kubeenika. Kimwenekele nangue, bantu bonse bakaba baya bapuililika bukebuke mu Buteeko Bwakue Kristu bwa Miaka Elufu. Ni ku mpela ya buteeko bwa miaka elufu, Yesu wakabuezia Bukolo kuli Baba wakue. Kupuako, Bukolo bwakaba bwasyafikiliziizie kila kantu kabanga katonene Yehova  kakitue na Bukolo, kubiika mukati ni kwalula bantu mu aali ya kupuililika.​—1 Bakor. 15:24-28; Nfy. 20:1-3.

10. Kutuntumunua kwa bafuile kwakakulengia kwiunvua siani?

¹⁰ Tontonkania vikyakaba musita luwakapokelela batonua bobe. Eba, nsaansa iwakonvua yakakulengia kuseka ao kulila? Wakonvua saana nsaansa ni kutendeka kwimba wamutasia Yehova? Kisinka kimo ni keeki, wakamutona saana Baba obe ali waemenana pamo ni Muana wakue asili na butani juu ya bupe bwa butuntumuko.

11. Kukoonkana ni milandu yakue Yesu ili mu Yoane 5:28, 29, ni kiki kyakakitika ku bantu bakaba bakoonkele mafunde a nsaambu akue Leeza?

¹¹ Tontonkania nsaansa yakonvua baalia bakatuntumunua musita ubakaba baya baalulula bumuntu bwabo ni kwikala kukoonkana ni mafunde a nsaambu akue Leeza. Baalia bakakita bobo bupilibuko, baketabilua kwikala loonse mu Paradiso. Inzi baalia bakamusangukila Leeza, te bakalekelelua bakavulunghanie mutende mu Paradiso.​—Is. 65:20; soma Yoane 5:28, 29.

12. Eba, bantu bonse bakaba pa kyalo bakapaalua na Yehova mu nzila ki?

¹² Mu Bukolo Bwakue Leeza, bantu bakue bonse bakemwena kisinka kya milandu ili mu Tuswalo ni Mafunde 10:22 ili yalanda eevi: ‘Mpaalo yakue Yehova i ili yamulengia muntu aaluke munoonsi, kabili Teezi kuongezia misa pamo nayo.’ Kupitila mupasi wakue Yehova wakaba wabomba pali beene, bantu bakue Leeza bakaaluka banoonsi kimupasi, i kulanda nangue, bakaba baya bakila kwaluka nga Kristu, mpaka kufikiila kupuililika. (Yoan. 13:15-17; Baef. 4:23, 24) Kila busiku, mibili yabo yakaba yakila kwaluka ni maka ni kukila kuwaama. Buikazi bwakaba bwasaansamusiizie kakiine! (Yob. 33:25) Inzi, kutontonkania palua kutuntumuka, kunti kwakukwasia siani leenu?

13. Malumbo 139:1-4, ili yalangilila siani nangue Yehova atumanine buino, kabili kutuntumunua kwakalangilila siani kintu keekio?

¹³ Nga vitwafuma mukulondolola, musita Yehova lwali wakatuntumuna bantu, wakababueziizia kutontonkania kwabo ni bumuntu bwabo nga evelia vibabanga baali ntaanzi. Tontonkania mana ya milandu ezio. Paantu Yehova akutonene saana, ali wamona ni kulanguluka bintu byonse biuli watontokania, biuli waiunvua, biuli walanda ni biuli wakita. Kine ni kukutuntumuna, wakabuezia walengeeluesie kutontonkania kobe, aali yobe ni bumuntu bobe. Likolo Daudi waali wamanine Yehova vyali wapooza maano ku kila umo weetu. (Soma Malumbo 139:1-4.) Kumana nangue Yehova atumanine buino kuli kwalengia twiunvue siani?

14. Kumana nangue Yehova atumanine buino kupalile kutulengia twiunvue siani?

¹⁴ Musita utwatontonkania nangue Yehova atumanine buino, te tupalile kunvua muenzo. Juu ya ki? Languluka nangue Yehova ali watwemena saana. Amanine aali ili yalengia kila umo weetu aye waibeleele. Ali wamona saana kila kantu kakitupata mu buikazi bwetu kakitulenga tuye twali ni bumuntu kampanda. Kakiine keekio kili kyateekia mutima! Tetupalile ata kaniini kwimona nangue tulisie bunke. Nsita yonse, Yehova ali wasaangua peepi ni fwefue kabili wakebele kutukwasia.​—2 Mil Nsi. 16:9.

15. Butuntumuko buli bwasininkizia siani nangue Yehova ali ni mulangue?

¹⁵ Kine bantu batiina kufua, baluani babo kunti babapatikizia kukita bintu bibasiizi lyonse kukita kupitila kubatinsia kubeepaya. Inzi, kine  batukitila fwefue evio, tebali na kabakitapo. Tumanine nangue kine baluani betu batwipaya, Yehova wakaba kutubuezia ku bukose. (Nfy. 2:10) Tuli ni kisinka nangue te kuli kantu ata kamo kabali kukita kali kutulamuna kuli Yehova. (Bar. 8:35-39) Kiswapilo kya butuntumuko kilangiliile kakiine nangue Yehova ali ni mulangue wa kupapia! Kupitila keekio kiswapilo, Yehova wainoona kimo pakati ka biluilo bili byabombia saana Sataana ni mu wenka ozo musita watupeela kusipa kusiviinda kutionua.

16. Ni biipuzio ki byupalile kwiipuzia, kabili byasuko kunti byakukwasia siani kumana vyumuswapiile Yehova?

¹⁶ Kine baluani bakue Yehova bakutinsia kukwipaya, eba, kunti waswapila nangue Yehova wakaba kukutuntumuna? Kunti wamana siani nangue uli kumuswapila? Nzila imo ya kukita evio ni kwiipuzia eevi, ‘Bupinguzi buniini-buniini bundinakita kila busiku bulangiliile nangue muswapiile Yehova?’ (Luk. 16:10) Kabili kunti waiipuzia eevi, ‘Eba, buikazi bwane bulangiliile nangue nswapiile bulayo bwakue Yehova bwa kumpeela bintu binkabiile kine nabiika Bukolo bwakue pa ntaanzi?’ (Mat. 6:31-33) Kine waasuka nangue een, walangilila nangue umuswapiile Yehova, kabili wakaba waiteaniizie ku buavia bonse buwakaba kusaakaana nabo.​—Tus Maf. 3:5, 6.

17. (a) Butuntumuko bulangiliile siani nangue Yehova ali wapembelela? (b) Kunti twalangilila siani nangue tuli twatasia palua mibeele yakue Yehova ya kupembelela?

¹⁷ Yehova abiikile busiku ni nsa yali wakenoonenapo keeno kyalo kikote. (Mat. 24:36) Takaandua kupembelela, kabili takaleeta mpela ntaanzi ya ozo musita wabiikile. Atonene kakiine kubusia bantu bafuile, inzi apembeleele. (Yob. 14:14, 15) Apembeleele mpaka musita upalile wa kubabuezia ku bukose ufike. (Yoan. 5:28) Tuli ni nsaambu iweeme ya kutasia kupembelela kwakue Yehova. Tontonkania kaniini: Paantu Yehova apembeleele, bantu bengi pamo ni fwefue benka, twakipata musita wa kufikiila ‘kulapila.’ (2 Pet. 3:9) Yehova atonene kine kyavindikana, bantu bengi baaluke ni fuasi ya kupata bukose bwa loonse. Kansi, tulangilile nangue tuli mukutasia kupembelela kwakue. Mu nzila ki? Kupitila kukeba kwa mute baalia bali ni “aali iweeme ya mutima palua bukose bwa loonse” ni kubakwasia bamutone Yehova ni kumubombela. (Miil Bat. 13:48, NWT) Kupuako ni beene bakanoonkelamo mu kupembelela kwakue Yehova nga fwefue benka.

18. Juu ya ki tupalile kupembelela bange?

¹⁸ Yehova wakatwalilila kutupembelela wasipiziizie  mpaka mpela ya miaka elufu ntaanzi ya kutuloomba kukita bintu mu nzila ipuililikile. Ntaanzi ozo musita ufike, Yehova ali mukweleela mazaambi etu. Pakaako, tuli ni nsaambu ya kupooza maano ku mibeele iweeme ya bange ni kubasipikizia. Tontonkania palua mufuano wakue nkazi umo. Mulume wakue waatendekele kwema saana mu maano, kupuako, waalekeele kuya ku kulonghaana. Ozo nkazi walanda eevi: “Keekio kyaankisiizie saana. Mipaango yeetu itwali nayo mu lupua yaainoonekele.” Inzi, anzia aali ezio, ozu mukazi ali ni ntono, waatwaliliile kumusipikizia mulume wakue. Waamuswapiile Yehova, kabili taatiokele mutima. Nga vili vyakita Yehova, ozo nkazi taapoozele maano ku bobo buavia, inzi waapoozele maano ku bintu biweeme byali byakita mulume wakue. Walanda eevi, “Mulume wane ali ni mibeele iweeme saana, kabili ali mukwikwinda bukebuke eevi kwaluka ni aali iweeme.” Ni kintu kya mana saana tuye twabasipikizia ao kubalangilila mibeele ya kupembelela bantu ba mu lupua lwetu ni ba mu kilonghaano kyetu bali mukwikwinda kuluisia maavia akolele!

19. Tupalile kupingula kukita ki?

¹⁹ Kisiasie kyalo kubumbua, Yesu ni bamalaika baaunvuile nsaansa. Inzi, tontonkania ezio nsaansa ibakonvua lubakamona kyalo kyaizulamo bantu bapuililikile, bamutonene Yehova kabili bali bamubombela. Tontonkania nsaansa yakonvua baalia bakaba ku muulu eevi kuteeka pamo ni Kristu musita ubakamona bantu banoonkelamo mu miilo yabo. (Nfy. 4:4, 9-11; 5:9, 10) Kabili tontonkania kusanguako, musita mensozi ali aleetua na misa luakaaluka mensozi a nsaansa, musita maluele, bulanda, ni lufu, tebikabako kabili. (Nfy. 21:4) Mu kupembelela ozo musita, pingula kumupala Baba obe wantono, ali ni mulangue kabili ali wapembelela. Kine wakita evio, wakatwalilila kuya wali ni nsaansa anzia usaakaana na maavia ki. (Yak. 1:2-4) Kakiine tuli ni nsantilo ikata saana palua bulayo bwakue Yehova bulandile nangue “kwakaba kwali ni butuntumuko”!​—Miil Bat. 24:15, NWT.