1. Náa numuu rí Jeobá niʼniwíi xúgíʼ dí rígá rá.

NIRÍGÁ mbiʼi rí Jeobá nixtáa mbáwíi, mú nditháan táku̱mu̱u̱ rí nixtáa mbáwíi. Ikhaa nigiʼdoo má xúgíʼ rí ndiyóoʼ. Mú ikhaa nindoo rí eʼwíínʼ ma̱ngaa makuwá gagi. Ngajua rí gíʼdoo nixkaxi̱i̱ maʼniwíi xúgíʼ dí rígá (Sal. 36:9; 1 Juan 4:19).

2. Xu káʼnii nikumu̱u̱ Jesús gajmíi̱n ángeles índo̱ Jeobá niʼniwíi i̱ʼwáʼ dí rígá rá.

² Timbá rí niʼni Jeobá, nindxu̱u̱ rí niʼniri̱ya̱a̱ A̱ʼdióo. Nda̱wa̱á nijmiuu Jesús maʼniwíi “xúgíʼ dí rígá” ajndu ángeles bi̱ kúwá mekhuíí (Col. 1:16). Jesús ra̱ʼkhá tháán nidxuu rí nindoo niñejunʼ ga̱jma̱a̱ mbóó Anu̱u̱ (Prov. 8:30). Ángeles nidxún wéñuʼ numuu rí ikhiin ginii kayuʼ ndiyáá índo̱ Jeobá ma̱ngaa Jesús niʼniriyaʼ mekhu ga̱jma̱a̱ Ku̱ba̱ʼ. Xóo nikumu̱ún ángeles rá. Náa Biblia naʼthí rí “nigíʼdi̱i̱ nixnáá ñawúúnʼ” mbáa nixnáá má xúʼko̱ ñawúúnʼ mambá índo̱ Jeobá niʼniwíi xúgíʼ asndu índo̱ niguámbóo niʼniwíin xa̱bu̱ (Job 38:7; Prov. 8:31). Xúgíʼ rí niʼniwíi nisngájma ngajua ga̱jma̱a̱ rí najmañuu wéñuʼ (Sal. 104:24; Rom. 1:20).

3. Xó ma eʼthí náa 1 Cor. 15:21, 22, ndiéjunʼ niyambáá rí nikháñuu Jesús rá.

³ Jeobá nindoo rí xúgínʼ xa̱bu̱ makuwa gagi kámuu mbiʼi náa  numbaaʼ mitsaanʼ rí niʼniriyaʼ. Mú, índo̱ Adán ga̱jma̱a̱ Eva túnimbu̱ún kuyáá Anu̱ún bi̱ nindoo kaʼñún, xúʼko̱ niʼni rí maguaʼdáá aʼkhá ga̱jma̱a̱ makhañún xúgínʼ bi̱ gákuwá náa tsu̱du̱u̱ Ku̱ba̱ʼ (Rom. 5:12). Mú ndiéjunʼ niʼni Jeobá rá. Mbá nacha̱ má niʼthí rí maʼni káwíin xa̱bu̱ numbaaʼ (Gén. 3:15). Niraʼwíí maxnáxi̱i̱ A̱ʼdióo mu maʼni káwíin náa aʼkhá jma̱a̱ rí nakháñúún e̱ji̱i̱n Adán ga̱jma̱a̱ Eva. Xúʼko̱ niʼni rí mambáa xa̱bu̱ ma̱ndoo maraʼwíí maʼni ñajuunʼ ikhaa mu maxtáa kámuu mbiʼi (Juan 3:16; Rom. 6:23; atraxnuu 1 Corintios 15:21, 22). *

4. Xú kaʼnii graxe̱ gúriʼña̱a̱ náa artículo rígi̱ rá.

⁴ Rí nikudaminaʼ Dios makuxi̱ín bi̱ nikháñúún naʼni rí muni mbaʼa graxe̱. Mbá xkri̱da, xkáʼnii ganindxu̱u̱ índo̱ gátuxi̱ín bi̱ nikháñúún rá. Lá muniʼnúnʼ bi̱ kuʼñúún índo̱ gátuxi̱ín ráʼ. Náá numuu rí maʼdxulú wéñuʼ índo̱ gátuxi̱ín bi̱ nikháñúún rá. Ga̱jma̱a̱ xkáʼnii eʼsngúlú mangajulú rí Jeobá nandoo kaʼyulú, rí najmañuu wéñuʼ ga̱jma̱a̱ rí naʼngo̱o̱ a̱jkiu̱u̱n numuu rí matuxi̱ín bi̱ nikháñúún rá. Guʼyáá.

5. Náa numuu nduʼyáá rí xágabiín mbá miʼtsu xúgínʼ xa̱bu̱ rá.

⁵ Jeobá majmiuu A̱ʼdióo mu makuxi̱ín mbaʼin wéñuʼ xa̱bu̱. Mú xákuxi̱ín mbá miʼtsu xúgínʼ. Náá numuu rá. Á mu natuxi̱ín mbá nacha̱ xúgínʼ xa̱bu̱ náa tsu̱du̱u̱ Ku̱ba̱ʼ xáʼni májánʼ. Jeobá tsénigu̱u̱ʼ dí xárígá awan. Ikhaa ndaʼyoo rí mu makuwáán tsímáá ndayóo marigá májánʼ awan (1 Cor. 14:33). Índo̱ Jeobá ga̱jma̱a̱ Jesús niʼni mújúnʼ Ku̱ba̱ʼ mañu mañúú mu makuwá xa̱bu̱ numbaaʼ nisngájma rí  najmañuu wéñuʼ ga̱jma̱a̱ rí naʼngo̱o̱ a̱jkiu̱u̱n. Jesús ma̱ngaa masngájma rí xúʼko̱ kaʼnii índo̱ Gáʼtañajunʼ mbá Míí Tsiguʼ índo̱ gambáñun bi̱ gákáwíín náa Armagedón muni ratháá Ku̱ba̱ʼ mu mundríguíin bi̱ magabiín.

6. Xó ma eʼthí Hechos 24:15, tsíin mangiin gátuxi̱ín rá.

⁶ Rí gíʼdoo itháan numuu muni xúgínʼ bi̱ gákáwíín náa Armagedón, rí musngúún bi̱ gátuxi̱ín ga̱jma̱a̱ numuu Reino ndrígóo Dios ma̱ngaa ikha ndrígóo Jeobá. Náá numuu rá. Numuu rí mbaʼin wéñuʼ xa̱bu̱ bi̱ gátuxi̱ín makuwíin bi̱ “túni rí jmbu” (atraxnuu Hechos 24:15). * Mu mambáñún rí nikháñu Cristo ndayóoʼ muriʼkhumijná. Muguaʼdáá wéñuʼ ñajunʼ índo̱ guʼsngún xa̱bu̱ numuu Dios. Lá muʼsngáá mámbáa xa̱bu̱ xó má eʼni xúgi̱ índo̱ nuʼsngáá numuu Biblia ráʼ. Lá miʼthúún magún náa mbá congregación ga̱jma̱a̱ miʼsngúún mu mutaruʼún bi̱ gátuxi̱ín nda̱wa̱á dí ikhiin xáʼ. Ndayóoʼ muguaʼthi̱i̱n mbuʼyáá. I̱ndó nduʼyáá rí índo̱ gámbá Raʼtáñajunʼ Míí Tsiguʼ Cristo “náa xúgi̱ ku̱ba̱ʼ marigá ku̱ma̱ ndrígóo Jeobá” (Is. 11:9). ¡Ra̱ʼkhá tháán gánigulúʼ muñajunʼ ikhú índo̱ gaʼni mbá míí tsiguʼ!

7. Náa numuu rí xa̱bi̱i̱ Jeobá makru̱ʼu̱u̱n kuyamijná índo̱ gúsngúún bi̱ matuxi̱ín rá.

⁷ Índo̱ gáʼni mbá míí tsiguʼ, xúgínʼ xa̱bi̱i̱ Jeobá mbaʼyóoʼ muriʼkhumijná mu muni rí naniguuʼ ikhaa. Ikha jngó xúgínʼ ikhiin makru̱ʼu̱u̱n kuyamijná índo̱ gumbáñuun bi̱ magabiín muniñaaʼ runi dí raʼkhí ga̱jma̱a̱ makuwíin xó má eyoo Jeobá (1 Ped. 3:8). Índo̱ bi̱ gagabi̱ín gúyáá rí bi̱ kúwá náa xuajñuu Dios ni̱ndxu̱ún xa̱bu̱ guabiinʼ ma̱ngaa rí nunimi̱jna̱ muriʼkhumijná, rúʼko̱ gáʼni rí mangiin mbuyamajkuíí Jeobá (Filip. 2:12).

8. Náá numuu rí nandoo nuʼthá dí muniʼniún bi̱ nikháñúún índo̱ gátuxi̱ín rá.

⁸ Rígá mbaʼa numuu muʼthá rí ma̱ndoo muniʼniún bi̱ kuʼñúún índo̱ gátuxi̱ín. Mbá xkri̱da, rí xóo nituxi̱ín xa̱bu̱ bi̱ na̱ʼkha̱ raʼthí náa Biblia, nakujmaa rí Jeobá mata̱nga̱a̱ maʼniwíinʼ xa̱bu̱ xó má nithi jma̱a̱ xó má nindxaʼwamíjna nakha inu makhañún. Garmáʼáan a̱jkiu̱lú dí Jesús niʼthí rí índo̱ nakháñuu mbáa nindxu̱u̱ xóo mbá ginuʼ (Mat. 9:18, 24; Juan 11:11-13). Índo̱ xa̱bu̱ ndajui̱i̱, ikháá má aʼwóo ga̱jma̱a̱ xóo edxaʼwáminaʼ xó má nákha xóó tséjkhaa gígú. Guʼyáá xkri̱da ndrígóo Lázaro. Índo̱ Jesús niʼningabi̱i̱ dí nijngoo a̱jkhu̱ mbiʼi, xuyuuʼ ni̱jkha̱ má ra̱ʼga̱. Mú a̱ngui̱i̱n núkhu niniʼniiʼ ga̱jma̱a̱ ikhaa nirmáʼáan a̱jkiu̱u̱n kaʼñúún (Juan 11:38-44; 12:1, 2).

9. Ndíjkha rí bi̱ gátuxi̱ín, xátangi̱ín xóo xa̱bu̱ jmbiin rá.

⁹ Jeobá naʼthí rí xa̱bu̱ bi̱ gakúwi̱i̱n náa gáʼtañajunʼ Cristo nimbáa xáʼthi: “Nandoo kháñuunʼ” (Is. 33:24; Rom. 6:7). Ikha jngó índo̱ Dios gáʼniwíin mbu̱júu̱ xa̱bu̱ bi̱ nikháñúún, maʼni rí xáʼniun nandii. Mú xánindxu̱ún núkhu xa̱bu̱ jmbiin. Á mu xúʼko̱ bi̱ kuñúún xuniʼniún. Xa̱bu̱ mani̱ndxu̱ún jmbiin mañu mañúú índo̱ gáxtáa Raʼtáñajunʼ mbá Míí Tsiguʼ Cristo. Índo̱ gájngoo mbá Míí Tsiguʼ, Jesús maxnáxi̱i̱ Reino ndrígóo Anu̱u̱. Ikhú Reino niʼnimbánuu káxi̱ ñajunʼ ndrígóo rí asndu xa̱bu̱ numbaaʼ niguánu mani̱ndxu̱ún jmbiin (1 Cor. 15:24-28; Apoc. 20:1-3).

10. Xú káʼnii gákumulú índo̱ gagabi̱ín xa̱bu̱ rá.

¹⁰ Atatsaʼwáminaʼ xú káʼnii gáʼni índo̱ gagabi̱ín bi̱ kuʼñúún, lá mundu̱ʼwa̱ o mumbiʼyaʼ rí nadxulú ráʼ. Lá muʼni ajmúú náa Jeobá numuu rí nadxulú wéñuʼ ráʼ. Tséʼyáálú, i̱ndó rí  nduʼyáá nindxu̱u̱ dí ra̱ʼkhá tháán gaʼndulúʼ kuʼyáá Anu̱lú bi̱ nandoo kaʼyulú ga̱jma̱a̱ A̱ʼdióo numuu rí niʼni magabiín xa̱bu̱.

11. Xó má eʼthí Juan 5:28, 29, ndiéjunʼ gugiʼníí bi̱ gátuxi̱ín á mu munimbu̱ún kuyáá Dios rá.

¹¹ Gundxaʼwámijna ma̱ngaa dí ra̱ʼkhá tháán gáʼdxuun bi̱ gagabi̱ín índo̱ guniñaanʼ xúgíʼ xóo kaʼniúún nákhá ginii mu muni xó má nandoo Dios. Bi̱ guriʼkumijná “mawaxu̱ún mu makuwá”, mú bi̱ xúnimbu̱ún kuyáá Dios xákuwa mbayuuʼ náa Ku̱ba̱ʼ mitsaanʼ (atraxnuu Juan 5:28, 29; * Is. 65:20).

12. Xú káʼnii gaʼni tsajkurámiinʼ Jeobá xa̱bu̱ bi̱ gákuwá náa Ku̱ba̱ʼ rá.

¹² Bi̱ gákuwá náa gáʼtañajunʼ Reino, xúgínʼ xa̱bi̱i̱ Dios mbuʼyáá dí naʼthí náa Proverbios 10:22 mani̱ndxu̱u̱ gajkhun: “Rí maʼni tsajkurámáánʼ Jeobá rúʼko̱ rí naʼni muguaʼdáá, ga̱jma̱a̱ tséʼni muguaʼdáá gaʼkhu”. Ga̱jma̱a̱ xi̱ʼ kaʼwu ndrígóo Dios gaʼni rí mambáxu̱u̱n itháan májánʼ gajmiún ikhaa xó muʼthá rí mani̱ndxu̱ún itháan xóo Cristo ga̱jma̱a̱ mani̱ndxu̱ún jmbiin (Juan 13:15-17; Efes. 4:23, 24). Mámbá mbiʼi mani̱ndxu̱ún itháan míjínʼ xa̱bu̱ ga̱jma̱a̱ ní xaguaʼdáá nandii. ¡Ra̱ʼkhá tháán gagi gákuwáanʼ! (Job 33:25). Mú xú káʼnii gándoo gámbáyaʼ ikháán rí mbiʼi xúgi̱ matatsaʼwamínáʼ xóo gáʼni índo̱ gagabi̱ín xa̱bu̱ nda̱wa̱á rá.

13. Xó má naʼthí náa Salmo 139:1-4, xú káʼnii gasngájma Jeobá rí naniniáanʼlú májánʼ xúgi̱ rá.

¹³ Xó má ndiʼyáá, índo̱ Jeobá gákuxi̱ín xa̱bu̱ maʼni rí marmáʼáan a̱jkiu̱ún ga̱jma̱a̱ mani̱ndxu̱ún xó má kaʼniúún nákha xóó tsékhañún. Gundxaʼwamijná ndiéjunʼ eyoo gáʼthúu̱n rúʼko̱. Jeobá nandoo kaʼyulú wéñuʼ rí ndaʼyoo ndiéjunʼ endxaʼwámijnalu, ndiéjunʼ ekumulú, ndiéjunʼ eʼthá ga̱jma̱a̱ ndiéjunʼ eʼni. Ikha jngó á mu nda̱wa̱á nakuxáanʼlú, xájyúuʼ gáʼni rí marmáʼáan a̱jkiu̱lú xó má kaʼniáánʼ ga̱jma̱a̱ xóo nindxaʼwamíjnalu. Rey David ni̱jkha̱nú ndiʼyoo rí Jeobá naniniiʼ mámbáa dí ikháanʼ (atraxnuu Salmo 139:1-4). * Xóo ekumulúʼ índo̱ nduʼyáá rí Jeobá nandoo kaʼyulú wéñuʼ rá.

14. Xóo gíʼmaa makumulúʼ índo̱ nduʼyáá rí Jeobá naniniáanlú májánʼ rá.

¹⁴ Índo̱ nduʼyáá rí Jeobá naniniáanlú májánʼ ragíʼmaa maxmiéjunlú. Náá numuu rá. Garmáʼáan a̱jkiu̱lú rí ikhaa nandoo kaʼyulú wéñuʼ ga̱jma̱a̱ ndaʼyoo rí mámbáa dí ikháanʼ nindxu̱u̱ kiejunʼ. Ma̱ngaa ndaʼyoo ndiéjunʼ eʼni dí nariʼkhu̱u̱ xóo kaʼniáánʼ. Ra̱ʼkhá tháán naʼni a̱jkiu̱lú rí mbuʼyáá rúʼko̱, nditháan ragíʼmaa makumulúʼ rí kúwáanʼ ndajkuáanʼ. Xúgíʼ mbiʼi xtáa ga̱jma̱á ni̱ndxu̱lú, ga̱jma̱a̱ ndaʼyoo má xúʼko̱ náa eyóoʼ mambáyulú (2 Crón. 16:9).

15. Ndíjkha nasngájma Jeobá rí nijmañuu wéñuʼ índo̱ niʼthí matuxi̱ín bi̱ nikháñun rá.

¹⁵ Namiñun wéñuʼ xa̱bu̱ índo̱ nduyáá rí makhañún. Bi̱ kúwá náa ñawúunʼ Gixa̱a̱ najmún rúʼko̱ mu muniuun tsiakii xa̱bu̱ mu muninduwiinʼ bi̱ nambáxu̱u̱n gajmiún o muni mbá rí nduyáá dí ragíʼmaa muni. Mú, xájmiin índo̱ nutulúʼ ikháanʼ rí muradiáánʼ, numuu rí nduʼyáá gajkhun rí Jeobá makuxáanʼlú nda̱wa̱á (Apoc. 2:10). Nduʼyáá gajkhun rí asndu  ndiéjunʼ má gúni nda̱a̱ dí gárikhoo rí mambáxulu má xúʼko̱ gajmiúlú Dios (Rom. 8:35-39). Ra̱ʼkhá tháán mitsaanʼ nisngájma Jeobá rí najmañuu wéñuʼ índo̱ niʼthí rí matuxi̱ín xa̱bu̱ bi̱ nikháñúún. Ikha jngó Gixa̱a̱ xájmaa gáʼnimíñulú índo̱ nuthi rí muradiáanʼ.

16. a) Xkáʼnii graxe̱ gíʼmaa muʼnimijna rá. b) Ndiéjunʼ gasngájma xóo eriʼña̱a̱ rá.

¹⁶ Á mu xa̱bu̱ sia̱nʼ nutulúʼ muradiáánʼ, lá makumulúʼ kuʼyáá Jeobá rí ikhaa ma gakuxáánʼ nda̱wa̱á rá. Ma̱ndoo mbuʼyáá á mu nuraximijna: “Lá nasngajmá rí naku̱mu̱ʼ ka̱yo̱o̱ Jeobá dí xóo naraʼwíí mani mámbá mbiʼi ráʼ.” (Luc. 16:10.) “Lá nasngajmá rí xóo xtáá rí nda̱yo̱o̱ gajkhun dí ikhaa má gáxnúʼ rí ndayóoʼ á mu nani ginii ñajuunʼ Jeobá ráʼ.” (Mat. 6:31-33.) Á mu natriʼña̱a̱ xúʼko̱, xtaa xawii matraʼníí asndu ndiéjunʼ má gaʼkhu o xkujndu dí gárígá (Prov. 3:5, 6).

17. a) Xú káʼnii esngájma rí naʼngo̱o̱ nagi̱ʼthu̱u̱n Jeobá dí magabiín bi̱ nikháñun rá. b) Xkáʼnii gándoo gusngájma rí nuxnáa núma̱aʼ rí naʼngo̱o̱ nagi̱ʼthu̱u̱n Jeobá rá.

¹⁷ Jeobá nigíʼ má mbiʼi ga̱jma̱a̱ hora rí maʼni gámbáa xúgíʼ dí raʼkhí dí rígá náa numbaaʼ rígi̱ (Mat. 24:36). Maski ajndu nandoo má wéñuʼ makuxi̱ín bi̱ nikháñúún, mú naʼngo̱o̱ nagi̱ʼthu̱u̱n mu xáʼni nákha xóó tséjkha̱nú mbiʼi dí ikhaa má nigíʼ (Job 14:14, 15). Nagi̱ʼthu̱u̱n maʼgánú mbiʼi rí kaʼyoo maʼni (Juan 5:28). Ma̱ndoo muxnáa núma̱aʼ numuu dí májánʼ má nindxu̱u̱ rí naʼngo̱o̱ nagi̱ʼthu̱u̱n. Mbá xkri̱da, ga̱jma̱a̱ numuu rúʼko̱ mbaʼin xa̱bu̱ nindoo nitanga̱a̱ a̱jkiu̱ún, asndu ikháanʼlu (2 Ped. 3:9). Jeobá nandoo rí mbaʼin xa̱bu̱ makuwá kámuu. Ikha jngó gusngajmá rí nuxnáá núma̱aʼ numuu rí naʼngo̱o̱ nagi̱ʼthu̱u̱n índo̱ nuʼni tsiakimijna muxkamii “xúgínʼ bi̱ nandúún makuwá kámuu” mu maʼndún kuyáá ga̱jma̱a̱ muni ñajuunʼ Jeobá (Hech. 13:48). Mu mangiin mambáñun rí Jeobá naʼngo̱o̱ nagi̱ʼthu̱u̱n.

18. Ndíjkha rí gíʼmaa maʼngo̱o̱ a̱jkiu̱lú kuʼñúún eʼwíinʼ rá.

¹⁸ Jeobá magiʼthu̱u̱n asndu gájngoo mbá míí tsiguʼ mu manindxu̱lúʼ xa̱bu̱ jmbii. Asndu ikhú maʼnigudii xúgíʼ aʼkhá ndrígúlú. Ikha jngó guʼyaridáá índo̱ nduʼyáá rí májánʼ xóo kaʼniúún eʼwíinʼ ga̱jma̱a̱ gaʼngo̱o̱ a̱jkiu̱lú kuʼñúún. Guʼyáá xkri̱da ndrígóo mbáa ndxájulú bi̱ ajmbio̱o̱ nijmúu wéñuʼ ga̱jma̱a̱ niniñuuʼ ra̱jkha̱ reunión, ikhaa naʼthí: “Rúʼko̱ niʼni magawúnʼ. Xúgíʼ awan rí niríyáxuʼ muni na̱nguá nindoo munixu”. Mú maski nigíʼnuu xúgíʼ rígi̱, ndxájulú niʼngo̱o̱ a̱jkiu̱u̱n kaʼyoo  ajmbio̱o̱. Ikhaa nikumu̱u̱ kaʼyoo má xúʼko̱ Jeobá ga̱jma̱a̱ nditháan táʼni guabaminaʼ. Xó má Jeobá, raʼkháa i̱ndó ndiʼyoo nandii dí gíʼdoo ajmbio̱o̱, ndiʼyoo dí májánʼ dí xóo nindxu̱u̱, naʼthí xóó: “Ajmbioʼ gíʼdoo mbaʼa dí májánʼ dí xóo xa̱bu̱ nindxu̱u̱ ga̱jma̱a̱ naʼni xó má eʼngo̱o̱ mu maʼni a̱jkiu̱u̱n mañu mañu”. Ra̱ʼkhá tháán gíʼdoo numuu rí maʼngo̱o̱ a̱jkiu̱lú kuʼñúún a̱ngiu̱lú bi̱ kúwá náa congregación ga̱jma̱a̱ bi̱ kuʼñúún índo̱ nunimijna ga̱jma̱a̱ mbá xkujndu gakhii rí guaʼdáá.

19. Ndiéjunʼ rí gíʼmaa muʼni rá.

¹⁹ Jesús gajmíi̱n ángeles nidxún wéñuʼ índo̱ niguma Ku̱ba̱ʼ. Atatsaʼwáminaʼ rí xóo gákumu̱ún ikhiin índo̱ gákuwá xa̱bu̱ jmbiin ga̱jma̱a̱ bi̱ nandún kuyáá Jeobá náa tsu̱du̱u̱ Ku̱ba̱ʼ. Ma̱ngaa dí ra̱ʼkhá tháán gáʼdxúún índo̱ bi̱ nixtaʼwíin mutañajunʼ gajmíi̱n Cristo índo̱ gúyá rí xa̱bu̱ numbaaʼ nambáñun ñajunʼ rí kúwá runi (Apoc. 4:4, 9-11; 5:9, 10). Atatsaʼwáminaʼ índo̱ gákuwáanʼ tsímáá, náa xárígá ga̱jmá, náa xárígá nandii, náa ní xaxmiéjunʼlu ga̱jma̱a̱ náa nditháan xákháñulúʼ (Apoc. 21:4). Rí xúgi̱ gíʼmaa mbuʼyaridáá má xúʼko̱ Anu̱lú bi̱ nandoo kaʼyulú, bi̱ najmañuu wéñuʼ ga̱jma̱a̱ bi̱ naʼngo̱o̱ a̱jkiu̱u̱n. Á mu nuʼni xúʼko̱, makuwáanʼ má xúʼko̱ gagi tséʼniuu asndu ndiéjunʼ má gaʼkhu gúraʼníí (Sant. 1:2-4). Ra̱ʼkhá tháán nuxnáa núma̱aʼ Jeobá numuu rí nikudaminaʼ rí “maguaxu̱ún xa̱bu̱ bi̱ nikháñun” (Hech. 24:15).