1. Khu ginani Jehovha a nga gira sivangwa si vbanyago?

GU VBINDRIDE tepo nyo laphe ngudzu Jehovha nari enga. Ganiolu uye a di si khali wutundzu. Gimwalo gi nga ba gi mu keneleya. Ambari ulolo, Nungungulu a di gu vbweta gu khuye vambe navo va vbanya va bwe va tsaka. Khu kotani nya lihaladzo a gu nalo, Jehovha a di pheya gu gira silo. — Ndzi. 36:9; 1 Joh. 4:19.

2. Jesu ni dzingilozi va dzipwide kharini khu kotani nya esi si giridwego khu Jehovha?

² Gupheya, Jehovha a di gira Gyanana gyaye Jesu. Khavbovbo, Jesu a di mu phasedzeya gu gira “silo satshavbo,” gupata ni dzingilozi. (Kol. 1:16) Jesu tsakide ngudzu khu gu phasedzeya Papayi waye. (Mav. 8:30) Nigu dzingilozi nidzo dzi tsakide ngudzu tepo dzi nga wona Jehovha ni Jesu na va gu gira mafu ni ndzadzi. Ginani dzi giridego gasi gu yeyedza gu khidzo dzi di tsakide? Dzi di “womba mikulungwane” ngudzungudzu tepo dzi nga wona Jehovha ni Jesu na va gu gira vathu. (Joba 38:7; Mav. 8:31.) Satshavbo sivangwa sesi si giridwego khu Jehovha so yeyedza guti gwaye ni lihaladzo a gu nalo. — Ndzi. 104:24; Rom. 1:20.

3. Kha nga si yeyedzwago omu ga 1 Vakorinto 15:21, 22, ginani egi Jehovha a hi ningidego khu kotani nya muphaso nya dzegiso wa Jesu?

³ Jehovha a di gu vbweta gu khuye vathu va vbanya kala gupindruga mafuni nyo mbure a va giredego. Ganiolu, Adhamu ni Evha kha va engisa Jehovha. Khu kharato avo ni sanana sawe kha sa kodzega gu va vbanya kala gupindruga. (Rom. 5:12) Ginani egi Jehovha a giridego? A di dzegeya gu ganeya khedzi a na tshudzisago khidzo vathu ga gighoho ni gufa. (Gen. 3:15) Jehovha a di tumbisa gu hi ninga Gyanana gyaye Jesu gasi gu hi tshudzisa gighohoni hi gi manidego ga vavelegi vathu nyo pheye. Khavbovbo a dzumeleya gu khuye muthu ni muthu a dzi hatheya oyu a na mu khozeyago. Ganiolu  a gu hatha gu khozeya Nungungulu a na mana womi nya pindrugedwa. — Joh. 3:16; Rom. 6:23; leri 1 Vakorinto 15:21, 22.

4. Siwudziso muni hi na bhulago khiso avba nya ndrima yeyi?

⁴ Khu lisine, hi ngu tshuka hi dzi gira siwudziso nya singi maningano ni gitumbiso gya Nungungulu nyo wuse vale va fudego. Khu giyeyedzo, ava va fudego va na wuswa khu ndziya muni? Ina hi na vati valongo vathu tepo va na wuswago? Guwuswa ga vale va fudego gu na hi ninga gutsaka khu dzindziya muni? Nigu guwuswa ga vale va fudego gu na hi hevbudza ginani maningano ni lihaladzo, guti ni gulaphisa-monyo ga Jehovha? Hongoleni hi bhulani khu siwudziso sesi.

5. Khu ginani si pwalago gu khodwa gu khethu vathu va fudego kha va na nga wuswa vatshavbo khu gumogo?

⁵ Tepo Jehovha a na wusago vale va fudego, kha na nga wusa vatshavbo khu gumogo. Khu ginani? Kholu a gu wusa vatshavbo khu gumogo si na garadza gu va woneleya. Nigu Jehovha kha goli wufendre. A ngu siti esi si vbwetegago gasi gu vathu va vbanya na va sasamedzidwe gwadi khu gurula. (1 Kor. 14:33) Jehovha thumiside wugengeyi ni gulaphisa-monyo tepo a nga ba a thuma ni Jesu gasi gu dongiseya mafu gasi ma khala wulanga nyo vbanye vathu. Jesu nuye gumogo ni vale va na ba va vbulugide Harimagedhoni va na thuma khu wugengeyi ni gulaphisa-monyo ndrani nya Mufumo nya 1000 myaga gasi gu dongiseya guhodza, sombo nyo ambale ni simbe silo si na gu vbwetwago khu vale va na wuswago khu gufani.

6. Guya khu Mithumo 24:15, vathu muni navo va girago gipandre nya ava va na wuswago khu Jehovha?

⁶ Mweyo nya dzindziya nya lisima eyi ava va na vbulugago Harimagedhoni va na phasago khiyo vale va na wuswago khu gufani khu gu va hevbudza lisine maningano ni Mufumo wa Nungungulu gumogo ni milayo ya Jehovha. Khu ginani? Kholu gutala nya ava va na wuswago khu gufani  vo gira gipandreni nya vale nya “sighoho mwendro nya mba lulama.” (Leri Mithumo 24:15.) Si na lomba gu va vbindrugedza silo nya singi gasi va kodza gu phasega khu muphaso nya dzegiso wa Kristo. Nga dundrugeya khu thumo hi na wu girago gasi gu hevbudza lisine maningano ni Nungungulu dzimiliyoni nya vathu va gu mba muti Jehovha ne vbadugwana. Ga tepo yoyo, ina muthu ni muthu a na gimbidzisedwa gihevbulo nya Bhibhiliya kha nga edzi hi gimbidzisago khidzo sihevbulo nya Bhibhiliya muhuno? Ina ava va na pheyago khavo gu wuswa khu gufani va na hevbudzwa va vbedza va rumedwa mabandlani gasi va ya hevbudza ava va na gu ba va ngo wuswa khu tepo yoyo? Kha hi siti, hi na siti khu tepo yakone. Egi hi gitigo khu gu guvbeyani nya Mufumo nya 1000 myaga wa Kristo, ‘litigo latshavbo li na ba li tade khu guti gwa PFHUMU Nungungulu.’ (Isa. 11:9) Hi na ba hiri ni thumo nya wukhongolo ganiolu nya gu tsakise ngudzu.

7. Khu ginani si na lombago gu khiso sithumi sa Jehovha si laphisa monyo gasi gu hevbudza vale va na wuswago khu gufani?

⁷ Ndrani nya Mufumo wa Kristo nya 1000 myaga, vathu vatshavbo si na lomba gu va simama gu vbindrugedza gilogyo gasi va kodza gu tsakisa Jehovha. Khu kharato si na lomba gu khiso vatshavbo khu tepo yoyo va laphisa-monyo gasi gu phasa ava va na wuswago gu vbindrugedza mavbanyelo nyo vivbe va nga ba vari nawo va bwe va landra nayo wa Jehovha. (1 Ped. 3:8) Ava va na wuswago va na wona gu khavo sithumi sa Jehovha vathu nyo dzi nogise va dzi garadzeyago gu vbindrugedza silo nyo khaguri gasi gu tsakisa Jehovha. Isoso si na va kutsa navo gu khozeya Jehovha. — Filp. 2:12.

8. Khu ginani hi dzitigo gu khethu hi na vati valongo vathu ni dzipari tepo va na wuswago khu gufani?

⁸ Hi na ni sighelo nya singi si hi girago hi khodwa gu khethu hi na si kodza gu vati valongo vathu tepo va na wuswago. Khu giyeyedzo, ho dundrugeya khedzi Jehovha a wusidego khidzo vathu teponi ya gale, so dzegeya gu wonega gu khiso Jehovha a na va wusa na vari ni makhalelo va nga ba vari nawo na va si gufi. Va na ba vari ni maganelelo yamamowo ni mapimiselo yamamowo. (Mat. 9:18, 24; Joh. 11:11-13) Tepo muthu a wugago khu muligovbeni, a gu wuga nari ni makhalelo yamamowo na gu dundruga satshavbo a nga ba a siti. Nga dundrugeya khu Lazaro. Gu di vbindride 4 matshigu Lazaro na fude nigu a di gu phede gu hina. Ganiolu, tepo a nga wuswago khu Jesu, vahane vaye kha va mu hanga nigu anuye a di dzegeya gu vati. — Joh. 11:38-44; 12:1, 2.

9. Khu ginani ava va na wuswago khu gufani va na gu mba wuswa na va vbelede?

⁹ Nga wona giyeyedzo nya wuvili. Jehovha a di khuye Paradhesini mwalo a na ganeyago gu khuye: “Nyi ngu dwala.” (Isa. 33:24; Rom. 6:7) Khu kharato, vale va na wuswago khu gufani va na wuswa na vari mwalo sitshetsheya. Ganiolu kha va na nga wuswa na va vbelede. Kholu va gu wuswa na va vbelede si nga gira hi si vati. So wonegisa gu khiso hi na vbeleya vbadugwanavbadugwana ndrani nya Mufumo nya 1000 myaga wa Kristo. Guvbeyani nya 1000 myaga, Jesu a na ningeya Wufumu ga Papayi waye. Khu tepo yoyo Mufumo wu na ba wu giride satshavbo esi Jehovha a nga ba a si vbweta gupata ni gu gira vathu va vbeleya. — 1 Kor. 15:25-28; Gutu. 20:1-3.

10. U na dzipwa kharini tepo va na wuswago ava va fudego?

¹⁰ Nga dundrugeya edzi si na tsakisago khidzo gu hakha muthu u mu golago a wugidego khu gufani. U na hegeleya mwendro u na liya khu gutsaka? Mwendro saye u na embeleya u zundza Jehovha khu gutsaka? Egi hi gitigo khu gu hi na tsaka ngudzu khu gu ba Jehovha ni Jesu va wuside valongo vathu ni dzipari dzathu dzi nga ba dzi fude.

11. Guya khu malito ya Jesu ma gomogo omu ga Johane 5:28, 29, ginani gi na giregago khu vale va na engisago Nungungulu?

 ¹¹ Nga dundrugeya khu gutsaka va na gupwago ava va na wuswago tepo va na vbindrugedzago mavbanyelo yawe gasi gu gira gugola ga Nungungulu. Vale va na dzumeyago gu vbindrugedza mavbanyelo va na ningwa lithomo nyo simame gu vbanya Paradhesini. Ganiolu, vale va na bombago gu landra milayo ya Nungungulu va na fuviswa gasi va si tsolopeteyi gurula gu na ba gu romo Paradhesini. — Isa. 65:20; leri Johane 5:28, 29.

12. Vathu vatshavbo mafuni va na kategiswa khu Jehovha khu ndziya muni?

¹² Tepo Mufumo wa Nungungulu wu na fumago mafu, vathu va Nungungulu va na wona lisine nya malito ma gomogo omu ga Mavingu 10:22 ma gu khayo: “Gikategiso gya PFHUMU Nungungulu gya gu resa gufuma, gambe gu dzi garadza gwathu kha gu engedzeli gilo.” Liphuvbo la Nungungulu li na phasedzeya sithumi sa Nungungulu gu dandra khu liphuvboni si vbeleya vbadugwanavbadugwana gasi si khala nga Kristo. (Joh. 13:15-17; Efes. 4:23, 24) Tshigu ni tshigu gu gyago sivili sawe si naya si vbeleya va vbanya nya mba na gitshetsheya ne gimwegyo. Wu na ba wuri womi nyo tsakise ngudzu. (Joba 33:25) Gu dundrugeya khu makategwa ma na reswago khu guwuswa ga vale va fudego si na gu phasa kharini?

13. Guya khu Ndzimo 139:1-4, guwuswa ga vale va fudego gu na yeyedza kharini gu khugo Jehovha a ngu hiti gwadi?

¹³ Kha nga hi si khumbugidego gupheyani, avo va fudego va na wuswa na va ngu gu dundruga silo va giridego na va si gufi gumogo ni makhalelo va nga ba vari nawo. Isoso so thula gu khiso Jehovha a ngu hi haladza ngudzu. Nigu khu kotani nya lihaladzo lolo, Jehovha a ngu bwe a vegedza satshavbo hi si pimisago, edzi hi dzipwago khidzo, esi hi ganeyago ni esi hi girago. Khu kharato, so lombega gu Jehovha a gu wusa, kha si na nga mu garadzeya gu gu wusa na wu gu dundruga esi u giridego na wu si gufi na wuri ni makhalelo yago gambe. Pfhumu Dhavhidhe a di gu dziti gu khuye Jehovha a ngu hiti gwadi hatshavbo. (Leri Ndzimo 139:1-4.) Wo dzipwa kharini khu guti gu khuwe Jehovha a ngu guti gwadi?

14. Ha gu dzipwa kharini tepo hi dundrugeyago khedzi Jehovha a hi tigo khidzo gwadi?

¹⁴ Ha gu dundrugeya khedzi Jehovha a hi tigo khidzo gwadi, kha hi na nga garadzega. Khu ginani? Dundruga gu khuwe Jehovha a ngu khathala ngudzu khethu. Jehovha a ngu ninga ngudzu lisima moyo ni moyo wathu. Uye a ngu siti satshavbo hi emisanidego naso guvbanyani gwathu. Nigu isoso si ngu tiyisa ngudzu! Gima hi nga pimisi gu khethu hi mwalo muphasedzeyi. Jehovha dzi emisede gu hi phasa tepo yatshavbo. — 2 Dzik. 16:9.

15. Guwuswa ga vale va fudego go yeyedza kharini guti nya gukhongolo ogu Jehovha a gu nago?

¹⁵ Gu thava gufa gu ngu gira muthu a gira silo na si dzini. Vathu va fumedwago khu Sathane va gu thumisa naphwi wowo gasi gu gurumedza vathu gu gira silo va sitigo gu khavo si vivbide. Ganiolu ethu kha hi thegeyi naphwini wowo. Kholu hi ngu dziti gu khethu valala vathu vo hi songa Jehovha a na hi wusa hi vbanya gambe teponi yi tago. (Gutu. 2:10) Hi ngu dziti gu khethu gimwalo va na girago gi na si kodzago gu hambanisa wupari wathu ni Jehovha. (Rom. 8:35-39) Guwuswa ga vale va fudego go yeyedza gu khuwo Jehovha na ni guti nya gukhongolo. Khu kharato, kha hi thavi tepo Sathane ni vaphasedzeyi vaye va hi tshanisago va vbweta gu hi songa tepo hi bombago gu gira esi va si vbwetago. Gutumba gogo go hi ninga tshivba nya gu hi simama na hi tumbegide ga Jehovha.

16. Siwudziso muni u yedego gu dzi gira nigu mihlamulo yakone yi nga gu phasa kharini guti gu khuwe u ngu tumba Jehovha mwendro ne?

 ¹⁶ Vo tshuka valala va Jehovha va gu embeya gu khavo va na gu songa, ina u na tumba gu khuwe Jehovha a na gu wusa? U nga dziti kharini gu khuwe u na si kodza gu tumba Jehovha so girega isoso? Gasi gu tugula isoso hi nga dzi wudzisa esi: ‘Esi nyi girago tshigu ni tshigu, ina si ngu yeyedza gu khiso nyi ngu mu tumba Jehovha? (Luka 16:10) Ina mavbanyelo yangu ni mathumiselo yangu nya dzitsapawu si ngu yeyedza gu khiso nyi ngu tumba gu kheni Jehovha a na nyi ninga esi si vbwetegago nyo thangisa Mufumo waye?’ (Mat. 6:31-33) Abari gu hlamulo wago avba nya siwudziso sesi i ina so yeyedza gu khiso u ngu mu tumba Jehovha nigu u dzi emisede gu emisana ni silingo si tago. — Mav. 3:5, 6.

17. a) Gitumbiso nya guwuswe ga vale va fudego gyo yeyedza kharini gu khigyo Jehovha a ngu laphisa monyo? b) Hi nga yeyedza kharini gu khethu hi ngu bonga gulaphisa-monyo ga Jehovha?

¹⁷ Jehovha vegiside litshigu a na fuvisago khilo litigo leli. (Mat. 24:36) Uye kha na nga fuvisa litigo leli na li si gu vbohi litshigu a li vegisidego. A ngu dzina ngudzu gu wusa vale va fudego ganiolu a gu laphisa-monyo a vireya. (Joba 14:14, 15) A gu vireya kala yi vboha tepo a yi vegisidego. (Joh. 5:28) Hi na ni sighelo nya singi nyo bonge gulaphisa-monyo ga Jehovha. Nga dundrugeya khesi: Khu kotani nya olu Jehovha a laphisa-monyo vathu nya vangi gupata ni ethu hi manide lithomo nyo “vbindrugedze” mavbanyelo. (2 Ped. 3:9) Jehovha o vbweta gu khuye vathu vatshavbo va mana womi nya gupindruge. Khu kharato, hongoleni hi bonga kholu a hi laphiseyago monyo. Hi nga si gira kharini isoso? Khu gu hi dzi garadza gasi gu mana vathu va dzi ‘emisedego gu hakha guvbanya nya gupindruge’ hi bwe hi va phasa gu haladza Jehovha ni gu mu thumeya. (Mith. 13:48) Ho gira isoso anavo va na phasega khu gulaphisa-monyo ga Jehovha kha nga ethu.

18. Khu ginani hi yedego gu laphiseya monyo vambe?

¹⁸ Jehovha a na vireya kala yi vbeya 1000 myaga na hi nga gu zama gu vbeleya. Kala iyoyo, Jehovha a na simama gu hi divaleya sighoho sathu. Khu kharato, gu vbwetega hi pimedzeya giyeyedzo gya Jehovha khu gu hi wona makhalelo nya yadi ga vambe vathu hi bwe hi va laphiseya monyo. Nga wona giyeyedzo gya ndriyathu nya nyamayi oyu mwama waye a nga beledwa khu madwali nya ansiedade severa nyo bwe a ema ni gu hongola mitshanganoni. Uye a di khuye: “Isoso si di gu nyi garadza ngudzu, womi wathu wu di vbindrugedza khavba ni avba khu kharato makungo yathu yatshavbo ma di bweleleya hwane.” Ganiolu ambari olu va nga ba va tshangana  ni gigaradzo gegi, mwangadzi yoyu nya lihaladzo laphiside monyo. A di tumba Jehovha nigu gima kha diga gu timiseya. Gu fana ni Jehovha, uye kha vega gupima avba nya giemo gya mwama waye ganiolu a di vega gipima avba nya silo nya sadi esi mwama waye a girago. A di khuye: “Mwama wangu a ngu dzi garadzeya gu gira satshavbo a si kodzago gasi gu hawuluga madwali yaya vbadugwanavbadugwana.” Khu kharato, si na ni lisima ngudzu gu hi laphiseya monyo valongo vathu, vandriyathu libandlani ni vale va tshanganago ni sigaradzo.

19. Ginani hi yedego gu dzi emiseya gu gira?

¹⁹ Jesu ni dzingilozi va tsakide ngudzu tepo mafu ma nga girwa. Ganiolu nga dundrugeya khedzi va na tsakago khidzo gambe tepo va na wonago mafu na ma tade khu vathu nyo vbeleye va haladzago Jehovha ni gu mu thumeya. (Gutu. 4:4, 9-11; 5:9, 10) Nga dundrugeya khu tepo hi na liyago khu gutsaka wulangani nyo liye khu gupwa guvbisa. Tepo madwali, gutshaniseka ni gufa si na gu ba si vbindride. (Gutu. 21:4) Kala iyoyo, dzi garadzeye gu pimedzeya Papayi wago nya lihaladzo, nya guti ni gulaphisa-monyo. Wo gira isoso u na khala na wu tsakide ambari wo ba u emisana ni gigaradzo nyo khale kharini. (Jak. 1:2-4) Hi ngu tsaka ngudzu khu gitumbiso gegi gya Jehovha nya ‘guwuge ga vale va fudego.’ — Mith. 24:15.