1. ¿Tuku xlakata Jehová malakatsukilh latamat?

MILH kilhtamaku akxni Jehová xʼakstu xwi, pero nikxni xʼakstu makgkatsika. Nitu xkitsankgani. Pero xlakaskin pi amakgapitsin na xlipaxuwakgolh latamat. Wa xlakata tapaxkit tlawalh pi xmalakatsukilh tuku anan (Sal. 36:9; 1 Juan 4:19).

2. ¿Tuku makgkatsikgolh Jesús chu ángeles akxni akxilhkgolh putum tuku Jehová malakatsukilh?

² Pulana, Jehová malakatsukilh xKgawasa, Jesús. Jehová maklakaskilh xapulana xkgawasa xlakata xmalakatsukilh «xlipaks ntu anan» chu nachuna tlawakgolh lhuwa ángeles (Col. 1:16). Jesús xlipaxuwa xlakata tlan akxtum xtaskuja xTlat (Prov. 8:30). Chu ángeles na xpaxuwakgo, xlakata xlakan wa tiku pulana akxilhkgolh la Jehová chu Jesús tlawakgolh akgapun chu Katiyatni. ¿Tuku tlawakgolh ángeles? Biblia wan pi «pixlanka malankikgolh» Jehová akxni malakatsukilh Katiyatni chu chuntiya xmalankimakgolh asta akxni masputulh xtamalakatsukin, wa latamanin (Job 38:7; Prov. 8:31). Putum xtamalakatsukin limasiya xtapaxkit chu xliskgalala (Sal. 104:24; Rom. 1:20).

3. Chuna la wan 1 Corintios 15:21, 22, ¿la litamakgtayayaw xtamakamastan Jesús?

³ Jehová xlakaskin pi latamanin xlatamakgolh putum kilhtamaku kKatiyatni nema xmalakatsukinit. Pero akxni Adán chu Eva ni kgalhakgaxmatkgolh xapaxkina xTlatkan, tanulh kKatiyatni talakgalhin chu linin (Rom. 5:12). ¿Tuku tlawalh  Jehová? Tunkun lichuwinalh tuku xʼama tlawa xlakata xkalakgmaxtulh latamanin (Gén. 3:15). Lakkaxwililh namakamasta xlatamat xKgawasa xlakata nakalakgmaxtu ktalakgalhin chu klinin xkamanan Adán chu Eva. Chuna xʼama kamaxki talakaskin latamanin xʼakstukan nalaksakkgo komo naskujnanikgo chu namakglhtinankgo latamat nema ni kgalhi xlisputni (Juan 3:16; Rom. 6:23; kalikgalhtawakga 1 Corintios 15:21, 22).

4. ¿Tuku naʼakxilhaw kʼuma artículo?

⁴ Tamalaknun nema tlawanit Dios pi nakamaxkipara xlatamatkan tiku nikgonita tlawa pi nalilakpuwanaw makgapitsi takgalhskinin. Akgtum liʼakxilhtit, ¿la nalakastakwanankgo tiku nikgonita?, ¿nakalakgapasaw akxni nalakastakwanankgo tiku xkapaxkiyaw?, ¿tuku xlakata lu napaxuwayaw akxni nalakastakwanankgo? chu ¿la kinkamasiyaniyan talakastakwanat xtapalh naliʼakxilhaw xtapaxkit, xliskgalala chu chuna la kgalhkgalhinan Jehová? Kaʼakxilhwi.

5. ¿Tuku xlakata tlan nawanaw pi ni watiya kilhtamaku nalakastakwanankgo putum tiku nikgonita?

⁵ Jehová namaklakaskin xKgawasa xlakata nakamalakastakwani lhuwa latamanin. Pero max ni putum watiya kilhtamaku nakamalakastakwanikan. ¿Tuku xlakata? Komo chuna xlalh, nitlan tuku xkitaxtulh. Jehová ni lakgati komo wi tuku ni lakatitum tlawakan. Katsi pi xlakata naʼanan takaksni, talakaskin lakatitum wi tuku natlawakan (1 Cor. 14:33). Jehová limasiyalh liskgalala chu pi kgalhkgalhinan akxni xla chu Jesús tsinu tsinu malakatsukikgolh katiyatni xlakata anta xlatamakgolh latamanin. Chu Jesús nalimasiya watiya umakgolh tayat akxni namapakgsinan Akgtum Mil Kata, akxni  nakamakgtaya tiku nalakgtaxtukgo kʼArmagedón xlakata nalakkaxwilikgo Katiyatni chu nakamakgamakglhtinankgo tiku nalakastakwanankgo.

6. Chuna la wan Hechos 24:15, ¿tiku na nalakastakwanankgo?

⁶ Pero tuku tlakg xlakaskin natlawakgo tiku nalakgtaxtukgo kʼArmagedón wa pi nakamasiyanikgo xlakata xTamapakgsin chu xlimapakgsin Jehová tiku nalakastakwanankgo. ¿Tuku xlakata lu xlakaskinka nawan uma? Xlakata lhuwa tiku nalakastakwanankgo, Biblia kalimapakuwi tiku «ni xaʼakgstitum» (kalikgalhtawakga Hechos 24:15). Xlakan lhuwa talakgpalit xlitlawatkan xlakata nalitamakgtayakgo xtalakgmaxtut Cristo. Xlikana pi natalakaskin natlawakan lhuwa taskujut xlakata nakamasiyanikan lhuwa latamanin xaxlikana xlakata Dios. ¿Chatunu chatunu latamanin nakalimakgalhtawakgeyaw Biblia chuna la tlawayaw uku? ¿Nakawanikan tuku kcongregación naʼankgo chu nakamasiyanikan xlakata na nakamasiyanikgo tiku nalakastakwanankgo alistalh? Talakaskin nakgalhkgalhiyaw xlakata nakatsiyaw. Tuku katsiyaw wa pi akxni nasputa Akgtum Mil Kata la namapakgsinan Cristo «katiyatni xlikana litsama nawan xtakatsin Jehová» (Is. 11:9). ¡Nakgalhiyaw taskujut nema lu nalipaxuwayaw akgtum mil kata!

7. ¿Tuku xlakata xlakskujnin Jehová nakaʼakgatekgsnikgo akxni nakamasiyanikgo tiku nalakastakwanankgo?

⁷ Putum xlakskujnin Jehová natalakaskin natlawakgo talakgpalit umakgolh akgtum mil kata xlakata namakgapaxuwakgo Jehová. Wa xlakata, tlan nakaʼakgatekgsnikgo akxni nakamakgtayakgo tiku nalakastakwanankgo xlakata talakgalhin ni nakamakgatlaja chu nalatamakgo chuna la lakaskin Jehová (1 Ped. 3:8). Akxni tiku nalakastakwanankgo naʼakxilhkgo pi xkachikin Jehová taktuju chu chuntiya tlawa talakgpalit xlakata namakgapaxuwa Jehová, uma natlawa pi xlakan na nakakninaniputunkgo Jehová (Filip. 2:12).

8. ¿Tuku likatsiyaw pi tiku nakamakgamakglhtinankgo tiku nikgonita nakalakgapaskgo xfamiliajkan?

⁸ Lhuwa tuku likatsiyaw pi tiku nakamakgamakglhtinankgo tiku nalakastakwankgo tlan nakalakgapaskgo xfamiliajkan. Akgtum liʼakxilhtit. Pulana, xlakata talakastakwanat nema kalichuwinan Biblia, limasiya pi Jehová nakatlawapara chuna la xtasiyakgo, chuna la xchuwinankgo chu chuna la xlakapastaknankgo akxni nina xnikgo. Nachuna, kalakapastakwi pi Jesús lichuwinalh pi akxni nikan xtachuna la lhtatakan chu lakastakwanankan kkalinin xtachuna la akxni lakgawankan xlakata klhtatakanit (Mat. 9:18, 24; Juan 11:11-13). Akxni latamanin lakgawankgo xlakata klhtatakgonit, chuntiya tasiyakgo, chuwinankgo chu watiya talakapastakni kgalhikgo lata akxni ankgo lhtatakgo. Kalilakpuwaw tuku titaxtulh Lázaro, akxni Jesús malakastakwanilh, akgtatita kilhtamaku xlina lata xninit, wa xlakata xtiyatliwa xlaklamaja. Pero xnatalan laktsuman lakapala lakgapaskgolh, chu xla na kalakgapasli (Juan 11:38-44; 12:1, 2).

9. ¿Tuku xlakata tiku nalakastakwanankgo chuntiya nakgalhikgo talakgalhin?

⁹ Jehová kinkamalaknuniyan pi kxtamapakgsin Cristo niti katiwa: «Ktatatla» (Is. 33:24; Rom. 6:7). Wa xlakata, akxni Dios nakamalakastakwanipara tiku nikgonita, xmaknikan nialh katikgalhikgolh tajatat. Pero chuntiya nakgalhikgo talakgalhin. Komo nialh xkgalhikgolh talakgalhin, xfamiliajkan nila xkalakgapaskgolh. Akxni namapakgsinan Cristo Akgtum Mil Kata putum latamanin tsinu tsinu nialh katikgalhikgolh talakgalhin. Akxni nasputa uma kilhtamaku Jesús namakamaxkipara  Tamapakgsin xTlat. Alistalh, uma tamapakgsin makgantaxtinita nawan xtalakaskin Dios, nema makgtanuma pi latamanin nialh nakgalhikgo talakgalhin (1 Cor. 15:24-28; Apoc. 20:1-3).

10. ¿La namakgkatsiyaw akxni nakaʼakxilhparayaw tiku lu xkapaxkiyaw?

¹⁰ Kalilakpuwaw la namakgkatsiyaw akxni nakaʼakxilhparayaw tiku lu xkapaxkiyaw. ¿Napaxuwayaw? ¿Natasayaw xlakata napaxuwayaw? ¿Lu napaxuwayaw chu asta nakilhtliniyaw Jehová? Tuku liwana katsiyaw wa pi lu napaxkiyaw xalakgalhamanina kinTlatkan chu xapaxkina xKgawasa xlakata tlawakgolh pi naʼanan talakastakwanat.

11. Chuna la wan xtachuwin Jesús nema wi kJuan 5:28, 29, ¿tuku nalipaxuwakgo tiku nalakastakwanankgo nema nakgalhakgaxmatkgo xaʼakgstitum xlimapakgsin Dios?

¹¹ Na kalilakpuwaw tapaxuwan nema namakgkatsikgo tiku nalakastakwanankgo akxni namakgxtakgkgo xamakgan xtayatkan chu nalilatamakgo xaʼakgstitum xlimapakgsin Dios. Tiku natlawakgo uma talakgpalit nalakastakwanankgo «xlakata nalatamakgo», pero tiku nalakatsalakgo xlimapakgsin Dios ni katikamaxkika talakaskin nawilikgo taʼakglhuwit kParaíso (kalikgalhtawakga Juan 5:28, 29; Is. 65:20).

12. ¿La nakasikulunatlawa Jehová putum tiku nalatamakgo kKatiyatni?

¹² Anta kxTamapakgsin Dios, putum xlakskujnin naʼakxilhkgo pi tuku wan Proverbios 10:22 xlikana: «Xtasikulunalin Jehová wa tuku tlawa pi lhuwa tuku nakgalhikan, chu xla ni kinkamaxkiyan takatsanajwat». Xlakata xtamakgtay xʼespíritu santo Jehová, tsinu tsinu nakgalhikgo xtalakapastakni Cristo chu tsinu tsinu nialh katikgalhikgolh talakgalhin (Juan 13:15-17; Efes. 4:23, 24). Chali chali tlakg tlan nalikatsikgo chu xtiyatliwakan tlakg natatliwakglha. ¡Lu napaxuwakgo! (Job 33:25). Pero, ¿la kinkamakgtayayan la uku nalilakpuwanaw talakastakwanat?

13. Chuna la wan Salmo 139:1-4, ¿la limasiya talakastakwanat pi Jehová liwana kinkalakgapasan?

¹³ Chuna la akxilhnitaw, akxni Jehová nakamalakastakwani latamanin, nakamaxkipara xtalakapastaknikan chu la xlikatsikgo akxni nina xnikgo. Kalilakpuwaw tuku kilhchanima uma. Jehová lu kinkapaxkiyan chatunu akinin, wa xlakata kuentajtlawa putum tuku lakpuwanaw, tuku makgkatsiyaw, tuku wanaw chu tuku tlawayaw. Wa xlakata, komo xkinkamalakastakwanin, ni tuwa xkinkamaxkiparan kintalakapastaknikan, kintayatkan chu tuku lakpuwanaw. Mapakgsina David liwana xkatsi pi Jehová liwana kinkalakgapasan chatunu akinin (kalikgalhtawakga Salmo 139:1-4). ¿La makgkatsiyaw akxni katsiyaw pi lu kinkapaxkiyan?

14. ¿La kilimakgkatsitkan akxni lilakpuwanaw pi Jehová liwana kinkalakgapasan?

¹⁴ Ni kililakgaputsatkan akxni nalilakpuwanaw pi Jehová liwana kinkalakgapasan. ¿Tuku xlakata? Kalakapastakwi pi xla lu kinkapaxkiyan chu xla lu xtapalh kinkaliʼakxilhan chatunu chatunu akinin. Nachuna, xla lu kuenta tlawa tuku titaxtunitaw kkilatamatkan nema tlawa pi nalikatsiyaw chuna la likatsiyaw la uku. Uma lu tlan kinkamamakgkatsiniyan. Nikxni kamakgkatsiw pi kiʼakstukan wilaw, xlakata Jehová ankgalhin kinkatawilan, chu skgalalh wi xlakata nakinkamakgtayayan (2 Crón. 16:9).

15. ¿Tuku xlakata talakastakwanat limasiya xliskgalala Jehová?

¹⁵ Pekuanikan linin lu nitlan kitaxtu. Akxni  latamanin pekuanikgo linin, xtalatlawananin fuerza kamatlawiputunkgo tuku xlakan nikxni xtlawakgolh chu kawanikgo pi nakamakgnikgo. Pero akinin ni kinkamakgapekuanan uma. Katsiya pi komo kintalatlawananinkan nakinkamakgnikgoyan, Jehová nakinkamaxkiparayan latamat (Apoc. 2:10). Liwana katsiyaw pi maski lhuwa tuku natlawakgo nila katitlawakgolh pi namakgxtakgaw Dios (Rom. 8:35-39). Jehová limasiyanit xliskgalala akxni kinkamaxkin takgalhkgalhin xlakata talakastakwanat. Uma tlawa pi nialh napekuaniyaw tuku maklakaskin Satanás chu chuntiya naskujnaniyaw Jehová.

16. ¿Tuku takgalhskinin natlawayaw chatunu akinin, chu tuku nalimasiya xtakgalhtin?

¹⁶ Komo kintalatlawananinkan nakinkawanikgoyan pi nakinkamakgnikgoyan, ¿lipawanaw pi Jehová nakinkamaxkiparayan kilatamatkan? Xlakata nakatsiyaw, kalilakpuwaw umakgolh takgalhskinin: ¿Limasiya pi klipawan Jehová tuku klaksaka chali chali? (Luc. 16:10). «¿Klimasiya la klin kilatamat pi klipawan xtamalaknun Jehová xlakata nakimaxki tuku kmaklakaskin komo pulana nakwili xTamapakgsin?» (Mat. 6:31-33). Komo nawanaw pi chuna, uma nakinkamakgtayayan natayaniyaw tuku tuwa natitaxtuyaw (Prov. 3:5, 6).

17. 1) ¿Tuku xlakata kilhtamaku nema Jehová lakkaxwilinit akxni nakamalakastakwani tiku nikgonita limasiya pi xakgalhkgalhina? 2) ¿La nalimasiyayaw Jehová pi paxtikatsiniyaw xlakata kgalhkgalhinan?

¹⁷ Jehová lakkaxwilinita kilhtamaku chu hora akxni namasputu uma nixatlan kakilhtamaku (Mat. 24:36). Maski kamalakastakwaniputuna tiku nikgonita, xla chuntiya nakgalhkgalhi kilhtamaku nema lakkaxwilinit (Job 14:14, 15). Kgalhkgalhima kilhtamaku akxni chuna natlawa (Juan 5:28). Lhuwa tuku xlakata tlan nalipaxtikatsiniyaw Jehová xlakata xla xakgalhkgalhina. Akgtum liʼakxilhtit, lhuwa latamanin kgalhikgonit kilhtamaku xlakata nalakgpalikgo xtayatkan, asta akinin chuna tlawanitaw (2 Ped. 3:9). Jehová lakaskin pi lhuwa latamanin kakgalhikgolh latamat putum kilhtamaku. Wa xlakata, kalimasiyaw pi paxtikatsiniyaw pi xla xakgalhkgalhina chu lu kaliskujwi xlakata nakatekgsaw latamanin tiku makgamakglhtinamputunkgo «xaxlikana latamat wantu xaliʼankgalhin» chu kakamakgtayaw xlakata napaxkikgo chu naskujnanikgo Jehová (Hech. 13:48). Chuna xlakan na tlan nalitamakgtayakgo pi xla xakgalhkgalhina.

18. ¿Tuku xlakata ni nakatasitsiyaw amakgapitsin?

 ¹⁸ Jehová nakgalhkgalhi asta akxni nasputa akgtum mil kata xlakata nialh nakgalhiyaw talakgalhin. Asta akxni nachin uma kilhtamaku, xla chuntiya nakinkatapatiyan kintalakgalhinkan. Wa xlakata, kastalaniw xliʼakxilhtit chu wa kaʼakxilhwi xalaktlan xtayatkan amakgapitsin chu kakalimasiyaniw pi kgalhkgalhinanaw. Kaʼakxilhwi tuku titaxtulh chatum tala puskat. Xchixku lu tsukulh lakgaputsa chu nialh alh ktamakxtumit. Xla wan: «Uma tuku ktitaxtuw lu kimakgalipuwa. Putum tuku xaklakkaxwilinitaw pi xakamaw tlawayaw nialhla xakamaw makgantaxtiyaw». Maski tuwa tuku titaxtukgolh, uma tala chuntiya limasiyanilh tapaxkit chu ni lakapala ksitsini xchixku. Lipawa Jehová chu nikxni taxlajwanilh. Xla ni kajwatiya lilakgaputsalh taʼakglhuwit, wata akxilhli laktlan xtayat xchixku. Xla wampara: «Kinchixku kgalhi laktlan tayat chu liskujma xlakata tsinu tsinu natatlani». Lu xlakaskinka ni lakapala nakatasitsiyaw kifamiliajkan o kinatalankan xalak congregación tiku titaxtumakgolh tuku tuwa

19. ¿Tuku kililakkaxwilitkan natlawayaw?

¹⁹ Jesús chu ángeles lu paxuwakgolh akxni malakatsukika Katiyatni. Kalilakpuwaw la napaxuwakgo akxni naʼakxilhkgo pi katiyatni litsama nawan latamanin tiku nialhtu kgalhikgo talakgalhin, tiku paxkikgo chu skujnikgo Jehová. Kalilakpuwaw tapaxuwan nema nakgalhikgo tiku natamapakgsinankgo Cristo anta kʼakgapun akxni naʼakxilhkgo pi latamanin litamakgtayakgo xtaskujutkan (Apoc. 4:4, 9-11; 5:9, 10). Kalilakpuwaw la nawan kilatamatkan akxni tuku la uku kinkamakgatasayan nialh katiʼanalh chu natasayaw kaj xlakata napaxuwayaw, akxni nialh katiʼanalh tajatat, talipuwan chu linin (Apoc. 21:4). Xlakata nina chin uma kilhtamaku, kalakkaxwiliw nastalaniyaw xliʼakxilhtit kinTlatkan, kalimasiyaw tapaxkit, liskgalala, chu pi kgalhkgalhinanaw. Komo chuna natlawayaw, chuntiya nakgalhiyaw tapaxuwan akxni natitaxtuyaw tuku tuwa (Sant. 1:2-4). Lu paxtikatsiniyaw Jehová pi «nalakastakuanankgoy [tiku nikgonita]» (Hech. 24:15).