1. Hikwalahokayini Yehovha a tumbuluxe vutomi?

 KU NI nkarhi lowu Yehovha a a ri swakwe. Kambe a a nga ri na xivundza. A a tiphina hi vutomi naswona a tsakile. Hambiswiritano, Yehovha a a lava leswaku ni van’wana va tiphina hi vutomi. Hikwalaho ka rirhandzu, u sungule ntirho wo tumbuluxa.—Ps. 36:9; 1 Yoh. 4:19.

2. Yesu ni tintsumi va titwe njhani loko Yehovha a tumbuluxa swilo swin’wana?

² Yehovha u sungule hi ku tivumbela mutirhikulobye. Endzhaku, u tirhise N’wana wa yena ku tumbuluxa “swilo leswin’wana hinkwaswo,” ku katsa ni tintsumi ta ntsandzavahlayi. (Kol. 1:16) Yesu u swi tsakerile swinene ku tirha swin’we ni Tata wa yena. (Swiv. 8:30) Tintsumi na tona a ti tsakile. A ti ri kona loko Yehovha ni mutirhikulobye Yesu, va tumbuluxa tilo ni misava. Xana ti angule njhani? Ti sungule ku ‘huwelela ti dzunisa’ loko ku tumbuluxiwa misava, a swi kanakanisi leswaku loko Yehovha a tumbuluxa swilo leswin’wana hinkwaswo ku katsa ni vanhu, ti ye emahlweni ti dzunisa. (Yobo 38:7; Swiv. 8:31) Ntumbuluko hinkwawo wu kombisa rirhandzu ra Yehovha ni vutlhari byakwe.—Ps. 104:24; Rhom. 1:20.

3. Hi ku ya hi 1 Vakorinto 15:21, 22, i yini leswi gandzelo ra nkutsulo ra Yesu ri swi endleke swi koteka?

³ Xikongomelo xa Yehovha a ku ri leswaku vanhu va hanya hilaha ku nga heriki eka pulanete leyi yo xonga ya misava leyi a yi tumbuluxeke. Kambe endzhaku ka loko Adamu na Evha va  tshike ku yingisa Tata wa vona loyi a a va rhandza, xidyoho ni rifu swi hangalake ni misava hinkwayo. (Rhom. 5:12) Xana Yehovha u angule njhani? U nambe a vula ndlela leyi a nga ta va ponisa hayona vanhu. (Gen. 3:15) Yehovha u hlele ku kutsula vana va Adamu na Evha eka xidyoho ni rifu. Hikwalaho, a ta endla leswaku vanhu lava hlawulaka ku n’wi tirhela va kuma vutomi lebyi nga heriki.—Yoh. 3:16; Rhom. 6:23; Hlaya 1 Vakorinto 15:21, 22.

4. Hi swihi swivutiso leswi hi nga ta swi kambisisa eka nhlokomhaka leyi?

⁴ Xitshembiso lexi Xikwembu xi hi tshembiseke xona xo pfuxa vafi, xi tlakusa swivutiso swo tala. Hi xikombiso, xana vafi va ta pfuxiwa njhani? Xana hi ta ma tiva maxaka ya hina loko se ma pfuxiwile? Ku pfuxiwa ka vafi ku ta hi tisela ntsako hi ndlela yihi? Ku anakanyisisa hi ku pfuxiwa ka vafi, swi ta endla hi tlangela rirhandzu, vutlhari ni ku lehisa mbilu ka Yehovha hi ndlela yihi? A hi kambisiseni swivutiso leswi ha xin’we xin’we.

5. Hikwalahokayini swi twala ku tshemba leswaku vanhu a va nge pfuxiwi hi nkarhi wun’we?

⁵ Loko Yehovha hi ku tirhisa N’wana wakwe a pfuxa vafi va tsandzavahlayi, hi nga langutela leswaku vanhu valavo a va nge pfuxiwi hi nkarhi wun’we. Hikwalahokayini? Hikuva loko vanhu vo pfuka hi nkarhi wun’we, ku ta tala laha misaveni naswona swi nga vanga hasahasa. Yehovha a nga si tshama a endla swilo hi ndlela leyi nga hlelekangiki. Wa swi tiva leswaku loko ku fanele ku va ni ku rhula, swilo hinkwaswo swi fanele swi endliwa hi ku hleleka. (1 Kor. 14:33) Yehovha Xikwembu u tirhise vutlhari a tlhela a lehisa mbilu loko a ri karhi tirhisana na Yesu ku tumbuluxa misava a nga si vumba vanhu. Yesu na yena u ta endla hilaha ku fanaka hi nkarhi wa Mfumo wa Gidi ra  Malembe, loko a tirhisana ni vanhu lava poneke Armagedoni va lunghekela ku hoyozela vanhu lava pfuxiweke.

6. Hi ku ya hi Mitirho 24:15, vanhu lava nga ta pfuxiwa hi Yehovha va katsa va mani?

⁶ Xa nkoka swinene, vanhu lava poneke Armagedoni va ta boheka ku dyondzisa vanhu lava pfuxiweke hi Mfumo wa Xikwembu ni hi milawu ya xona. Hikwalahokayini? Hikuva vo tala lava nga ta pfuxiwa, va ta katsa ni vanhu “lava nga lulamangiki.” (Hlaya Mitirho 24:15.) Va ta boheka ku cinca mahanyelo ya vona loko va lava ku vuyeriwa eka gandzelo ra nkutsulo ra Kreste. Ehleketa hi ntirho lowukulu swonghasi wo dyondzisa vanhu va timiliyoni ntiyiso lava nga tiviki nchumu hi Yehovha. Xana munhu un’wana ni un’wana u ta va ni mudyondzisi wakwe, hilaha hi va dyondzisaka hakona vanhu Bibele namuntlha? Xana vanhu volavo va ta hlengeletana emavandlheni lama hambaneke leswaku va ta leteriwa ndlela yo dyondzisa lava nga ta pfuxiwa endzhaku ka vona? A hi swi tivi, hi ta vona hi swona. Lexi hi xi tivaka hileswaku eku heleni ka Mfumo wa Kreste wa Gidi ra Malembe, “misava hinkwayo yi ta tala hi ku tiva Yehovha.” (Esa. 11:9) Hakunene hi ta tiphina swinene eka malembe wolawo ya gidi!

7. I yini lexi nga ta endla leswaku vanhu va Xikwembu va va ni musa loko va dyondzisa vanhu lava pfuxiweke eku feni?

⁷ Hi nkarhi wa Mfumo wa Kreste wa Gidi ra Malembe, vana va Yehovha hinkwavo va laha misaveni, va fanele va cinca mahanyelo ya vona loko va lava ku tsakisa Tata wa vona. Hikwalaho, hinkwavo va ta kombisa musa loko va ri karhi va pfuna vanhu lava pfuxiweke eku feni leswaku va cinca mahanyelo ya vona kutani va hanya hi milawu ya Yehovha. (1 Pet. 3:8) Handle ko kanakana, vanhu lava pfuxiweke ekufeni va ta swi tsakela ku tihlanganisa ni vanhu va Yehovha lava titsongahataka, lava na vona va nga ta va va ri karhi va “tirhela ku ponisiwa.”—Filp. 2:12.

8. Hi swi tiva njhani leswaku lava nga ta hoyozela lava pfuxiweke eku feni va ta ma tiva maxaka ya vona?

⁸ Hi ni swivangelo swo tala leswi endlaka hi tiyiseka leswaku lava nga ta hoyozela lava pfuxiweke ekufeni, va ta ma tiva maxaka ya vona. Hi xikombiso, loko hi xiya leswi Yehovha a swi endleke eka vanhu lava tshameke va pfuxiwa, swi tikomba onge u ta endla hilaha ku fanaka enkarhini lowu taka, u ta pfuxa vanhu va languteka, va vulavula ni ku ehleketa hi ndlela leyi a va ehleketa hayona va nga si fa. Tsundzuka, Yesu u fanise rifu ni ku etlela. (Mat. 9:18, 24; Yoh. 11:11-13) Loko munhu a pfuxiwa evurhongweni, wa ha languteka hi ndlela leyi a a languteka hayona a nga si ya eku etleleni naswona ku va ku nga cincanga nchumu eka yena. Tsundzuka Lazaro, se a swi endla mune wa masiku a lovile naswona miri wakwe a wu sungula ku bola. Kambe, loko Yesu a n’wi pfuxile vamakwavo va n’wi tivile, swi le rivaleni leswaku na yena u va tivile.—Yoh. 11:38-44; 12:1, 2.

9. Hikwalahokayini lava nga ta pfuxiwa, va nga ta pfuxiwa va nga hetisekanga?

⁹ Xiya xivangelo xa vumbirhi. Yehovha u tshembisa leswaku a nga kona munhu ni un’we loyi a nga ta va ehansi ka Mfumo wa Kreste loyi a nga ta ku: “Ndza vabya.” (Esa. 33:24; Rhom. 6:7) Hikwalaho, lava va nga ta pfuxiwa va ta va va hanye kahle emirini. Kambe a va nge nambi va va lava hetisekeke. Loko a vo pfuka va hetisekile, maxaka ya vona a ma nga ta va tiva. Swi tikomba onge vanhu va ta hetiseka hakatsongotsongo hi nkarhi wa Mfumo wa Kreste wa Gidi ra Malembe. Endzhaku ka malembe ya  gidi, Yesu u ta tlherisela Mfumo eka Tata wakwe. Mfumo wa Kreste wu ta va wu hetile ntirho wa wona, ku katsa ni ku endla leswaku vanhu va va lava hetisekeke.—1 Kor. 15:24-28; Nhlav. 20:1-3.

10. U ta titwa njhani hi ku pfuxiwa ka vafi?

¹⁰ Ehleketa hi ntsako lowu u nga ta va na wona loko u tlhela u pfuxelana ni maxaka ya wena. Xana ntsako wolowo wu ta endla leswaku u ba xikhiyana kumbe u khavaxela mihloti? Xana u ta yimbelela tinsimu u dzunisa Yehovha? Handle ko kanakana, u ta ya u n’wi rhandza ngopfu Tata wa wena wa le tilweni swin’we ni N’wana wa yena hikwalaho ka nyiko yo tsakisa, leyi va hi nyikeke yona ya ku pfuxiwa ka vafi.

11. Hi ku ya hi marito ya Yesu lama nga eka Yohane 5:28, 29, ku ta endleka yini hi vanhu lava hanyaka hi milawu ya Xikwembu?

¹¹ Ehleketa ndlela leyi va nga ta tsaka hayona vanhu lava pfuxiweke, loko va hluvula vumunhu bya khale kutani va hanya hi milawu ya Xikwembu. Lava nga ta endla tano, va ta pfuxeriwa evuton’wini. Hi hala tlhelo, lava nga ta xandzukela Xikwembu, a va nge yi voni Paradeyisi.—Esa. 65:20; hlaya Yohane. 5:28, 29.

12. Yehovha u ta va katekisa njhani vanhu hinkwavo lava nga ta va va ri emisaveni?

¹² Ehansi ka Mfumo wa Xikwembu, vanhu hinkwavo va ta vona ku hetiseka ka marito lama nga eka Swivuriso 10:22, lama nge: “Nkateko wa Yehovha hi wona lowu fuwisaka munhu, a nga engeteli switlhavi eka wona.” Hi ku pfuniwa hi moya wa Yehovha, vanhu va ta fuwa hi tlhelo ra moya, leswi vulaka leswaku va ta ya va fana na Kreste naswona va ta hetiseka hakatsongotsongo. (Yoh. 13:15-17; Efe. 4:23, 24) Siku ni siku va ta ya va kuma matimba. Hakunene hi ta tiphina hi vutomi hi nkarhi wolowo! (Yobo 33:25) Ku anakanyisisa hi ku pfuxiwa ka vafi, swi ta ku pfuna njhani sweswi?

13. Hi ku ya hi Pisalema 139:1-4, ku pfuxiwa ka vafi swi ta swi kombisa njhani leswaku Yehovha u hi tiva kahle?

¹³ Hilaha hi buleke hakona eku sunguleni, loko Yehovha a pfuxa vanhu, u ta va pfuxa va ri ni vumunhu lebyi a va ri na byona loko va nga si fa. Ehleketa hi leswi sweswo swi vulaka swona. Yehovha u ku rhandza ngopfu lerova u tiva xin’wana ni xin’wana lexi u xi ehleketaka, u xi vulaka, u xi endlaka ni ndlela leyi u titwaka hayona. Hikwalaho, swi ta n’wi olovela ku ku pfuxa u ri ni vumunhu lebyi a wu ri na byona loko u nga si fa. Hosi Davhida a a swi tiva leswaku Yehovha u hi tiva kahle hinkwerhu. (Hlaya Pisalema 139:1-4.) Ku tiva leswaku Yehovha u hi tiva kahle swi ta hi khumba njhani sweswi?

14. Ku tiva leswaku Yehovha u hi tiva kahle swi fanele swi hi khumba njhani?

¹⁴ Ku tiva leswaku Yehovha u hi tiva kahle, a swi fanelanga swi hi vilerisa. Hikwalahokayini? Tsundzuka leswaku Yehovha wa khathala swinene hi hina. Wa byi tlangela vumunhu bya hina hambileswi byi nga faniki. Wa swi tiva swilo leswi hi langutanaka na swona, leswi hi endlaka hi va ni vumunhu lebyi hi nga na byona namuntlha. Hakunene swa chavelela ku tiva leswi! A hi fanelanga hi titwa hi ri hexe ni siku ni rin’we. Mikarhi hinkwayo, Yehovha u na hina naswona u tshama a lunghekele ku hi pfuna.—2 Tikr. 16:9.

15. Ku pfuxiwa ka vafi ku swi kombisa njhani leswaku Yehovha u tlharihile?

¹⁵ Rifu a ri tiyeriwi. Vanhu lava lawuriwaka hi Sathana, va xungeta vanhu hi rifu leswaku va va sindzisa ku xavisa vanghana va  vona kumbe va va endlisa swilo leswi hoxeke. Kambe hina a hi nge swi endli sweswo. Ha swi tiva leswaku loko valala va hina va hi dlaya, Yehovha u ta hi pfuxa. (Nhlav. 2:10) A xi kona ni xin’we lexi va nga xi endlaka, lexi nga hi tshikisaka ku tirhela Yehovha. (Rhom. 8:35-39) Hakunene Yehovha u kombise leswaku u tlharihile hi ku hi nyika ntshembo wa ku pfuxiwa ka vafi! Ntshembo lowu, wu endla leswaku hi nga ha n’wi chavi Sathana hambiloko a hi xungeta hi rifu kambe hi va ni xivindzi xo tshama hi tshembekile eka Yehovha.

16. Hi swihi swivutiso leswi u faneleke u tivutisa swona naswona tinhlamulo ta swona ti ta ku pfuna njhani u tiva ndlela leyi u n’wi rhandzaka hayona Yehovha?

¹⁶ Loko valala va Yehovha va ku xungeta hi rifu, xana u ta n’wi tshemba Yehovha leswaku u ta ku pfuxa? U nga yi kuma njhani nhlamulo? Ndlela yin’wana leyi nga ku pfunaka, i ku tivutisa leswi, ‘Xana swiboho leswitsongo leswi ndzi swi endlaka siku ni siku, swi kombisa leswaku ndza n’wi tshemba Yehovha?’ (Luka 16:10) U nga tlhela u tivutisa leswi, ‘Xana mahanyelo ya mina ma kombisa leswaku ndza xi tshemba xitshembiso xa Yehovha xa leswaku u ta ndzi khathalela loko ndzi rhangisa Mfumo wakwe evuton’wini?’ (Mat. 6:31-33) Loko nhlamulo ya swivutiso leswi ku ri ina, swi vula leswaku wa n’wi tshemba Yehovha naswona u ta swi kota ku yima u tiyile loko u langutana ni miringo.—Swiv. 3:5, 6.

17. (a) Ku pfuxiwa ka vafi ku swi kombisa njhani leswaku Yehovha u lehisa mbilu? (b) Hi nga swi kombisa njhani leswaku ha swi tlangela leswi Yehovha a lehisaka mbilu?

¹⁷ Yehovha wa ri tiva siku ni nkarhi lowu a nga ta yi lovisa ha wona misava leyi yo homboloka. (Mat. 24:36) A nge heli mbilu kutani a yi lovisa nkarhi wu nga si fika. U swi langutele hi mahlongati ku pfuxa vanhu lava feke kambe u lehisa mbilu. (Yobo 14:14, 15) U yimele nkarhi lowu faneleke wu fika leswaku a ta va pfuxa. (Yoh. 5:28) Hi ni swivangelo leswi twalaka swo tlangela ku lehisa mbilu ka Yehovha. Ehleketa hi mhaka leyi: Ku lehisa mbilu ka Yehovha, ku endle leswaku vanhu vo tala ku katsa na hina, hi kuma nkarhi wo “hundzuka.” (2 Pet. 3:9) Yehovha u lava leswaku vanhu vo tala hilaha swi nga kotekaka hakona va kuma vutomi lebyi nga heriki. Hikwalaho, a hi kombiseni leswaku ha ku tlangela ku lehisa ka yena mbilu. Njhani? Hi ku lavisisa vanhu lava “kombiseke leswaku va lava ku kuma vutomi lebyi nga heriki” kutani hi va pfuna va rhandza Yehovha va tlhela va n’wi tirhela.  (Mit. 13:48) Ku fana na hina, na vona va ta vuyeriwa hileswi Yehovha a lehisaka mbilu.

18. Hikwalahokayini hi fanele hi lehisela van’wana mbilu?

¹⁸ Yehovha u ta hi lehisela mbilu leswaku hi va vanhu lava hetisekeke ku kondza ku hela malembe ya gidi. Loko nkarhi wolowo wu nga si fika, Yehovha u tiyimiserile ku hi rivalela loko hi n’wi dyohela. Hikwalaho, swa fanela leswaku hi languta leswinene eka van’wana hi tlhela hi va lehisela mbilu. Ehleketa hi makwerhu un’wana wa xisati loyi nuna wakwe a tshikeke ku ya etinhlengeletanweni ta vandlha hikwalaho ka leswi a a tshikilelekile swinene. U ri: “Mbilu ya mina a yi vava swinene. Swilo hinkwaswo endyangwini se a swi cincile.” Hambiswiritano, leswi makwerhu loyi wa xisati a a rhandza nuna wakwe, u n’wi lehisele mbilu. U titshenge hi Yehovha naswona a nga wanga mapa. Ku fana na Yehovha, u rivarile hi swiphiqo leswi a va ri na swona kutani a languta leswinene eka nuna wakwe. U ri: “Nuna wa mina u ni vumunhu lebyinene naswona wa tikarhata swinene.” Hakunene i swa nkoka ku lehisela swirho swa ndyangu mbilu kumbe vamakwerhu evandlheni lava langutaneke ni swiyimo swo tika!

19. Hi fanele hi tiyimisela ku endla yini?

¹⁹ Yesu ni tintsumi a va tsakile loko ku tumbuluxiwa misava. Kambe va ta tsaka ngopfu loko va vona misava yi tele hi vanhu lava hetisekeke, lava rhandzaka Yehovha va tlhela va n’wi tirhela. Ehleketa hi ndlela leyi lava va yaka etilweni leswaku va ya fuma na Kreste va nga ta tsaka hayona, loko va vona vanhu va vuyeriwa eka ntirho wa vona. (Nhlav. 4:4, 9-11; 5:9, 10) Nakambe ehleketa hi nkarhi lowu hi nga ta xiririka mihloti ya ntsako ntsena, loko mavabyi, gome ni rifu swi nga ha ri kona. (Nhlav. 21:4) Loko nkarhi wolowo wu nga si fika, tiyimisele ku tekelela Tata wa wena loyi a ku rhandzaka, a tlhariheke naswona a lehisaka mbilu. Loko u endla tano, u ta tshama u tsakile hambiloko u langutana ni miringo. (Yak. 1:2-4) Ha xi tlangela swinene xitshembiso lexi Yehovha a hi tshembiseke xona xa leswaku “ku ta va ni ku pfuxiwa” ka vafi!—Mit. 24:15.