1. Hikuyini Jehovha a nga maha zvivangwa zvi hanyako?

KA CIKHATI co kari Jehovha i wa hi yece. Kanilezvi i wa nga hi na ciwundza. A zvizi zvi lava ku Jehovha ava ni munhu mun’wani kasi a tsaka. Hambulezvo, Jehovha i wa lava van’wani a ku va ti buza hi wutomi. Makunu, Jehovha i no sangula ku vanga zvilo hi ku kuciwa hi lirandzo. — Lis. 36:9; 1 Joh. 4:19.

2. Jesu ni tingilozi va ti zwisile kuyini a cikhati leci Jehovha a nga vanga zvilo zvin’wani?

² Jehovha i no sangula hi ku vanga Jesu, a N’wana wakwe wa matewula. I no guma a tirisa N’wana loye kasi a vanga zvilo “zvontlhe”, a ku patsa ni tingilozi ta talela ga cima. (Kol. 1:16) Jesu i tsakile nguvhu hi ku tira ni Papayi wakwe. (Mav. 8:30) Laha ti nga wona Jehovha na Jesu na va vanga tilo ni misava, a tingilozi tonawu ti no tsaka. Ti zvi kombisisile kuyini? Ti no “kanyuluka hi kutsaka” tiba mandla, niku handle ko kanakana ti simamile tiba mandla hi ku tsaka siku ni siku legi Jehovha a nga kari a maha mitiro yakwe yo hlamalisa, nguvhunguvhu laha ti nga mu wona na a vanga munhu. (Joba 38:7; Mav. 8:31) A zvivangwa zvontlhe lezvo zvi komba lirandzo ni wutlhari ga Jehovha. — Lis. 104:24; Rom. 1:20.

3. Hi kuya hi 1 Va Le Korinte 15:21, 22, zvini lezvi a hakhelo ya ku tlhatlhisa yi mahako ku zvi koteka?

³ Jehovha i wa lava lezvaku a vanhu va hanya kala kupindzuka ka misava yo saseka leyi a nga yi maha. Kanilezvi, a cikhati leci Adhamu na Evha va nga tsika a ku ingisa a Papayi wabye wa lirandzo a ciwonho ni kufa zvi no tata misava. (Rom. 5:12) Zvini lezvi Jehovha a nga maha? I no tekela ku hlota a ndlela ya ku tlhatlhisa a vanhu. (Gen. 3:15) Jehovha i no maha makungo ya ku nyikela N’wana wakwe Jesu kota hakhelo ya kutlhatlhisa kasi a vana va Adhamu va tlhatlhiswa ka ciwonho ni kufa. Hi ndlela leyo,  zvi wa ta koteka a ku a va nyika wutomi ga pindzukelwa vontlhe lava va nga wa ta hlawula ku mu tirela. — Joh. 3:16; Rom. 6:23; lera 1 Va Le Korinte 15:21, 22.

4. Zviwutiso muni hi to bhula hi zvona ka ndzima leyi?

⁴ A citsumbiso ca Nungungulu ca ku vhuxa vafileko ci vhuxa zviwutiso zvo tala. Hi cikombiso, lava va fileko va ta vhuxiswa kuyini? A cikhati leci a maxaka ni vanghana va hina va to vhuxiwa hi ta va tiva ke? A kuvhuka ka vafileko ku ta hi nyika litsako hi ndlela muni? A kuvhuka ka vafileko ku hi gondzisa yini hi lirandzo, wutlhari, ni lihlazva-mbilu la Jehovha? A hi kambisiseni a zviwutiso lezvi hi cin’we cin’we.

5. Cini ci hi kombako lezvaku lava va fileko va nga ta vhuxiwa hi khati gin’we?

⁵ A hi nge rindzeli ku a cikhati leci Jehovha a to vhuxa vanhu va talela ga cima hi ku tirisa a N’wana wakwe a va vhuxa hi khati gin’we. Hikuyini? Hiku loku vontlhe vo vhuka hi khati gin’we zvi nga vanga vhilinganya. Kuveni Jehovha a nga tshuki a maha zvilo zva vhilinganya. Wa zvi tiva lezvaku kasi a vanhu va hanya hi kurula a zvilo zvi fanele ku mahiwa hi xaxameto. (1 Kor. 14:33) Jehovha i kombisile a wutlhari ni lihlazva-mbilu a cikhati leci a nga tira zvin’we na Jesu a longisela misava hi kutsongwani-kutsongwani kasi a vanhu va hanya ka yona. Yenawu Jesu i ta kombisa wutlhari ni lihlazva-mbilu a cikhati leci yena ni lava va to pona a yimpi ya Armagedhoni va to longisela misava kasi va amukela lava va to vhuxiwa hi ka vafileko ndzeni ka Kufuma kakwe ka 1000 wa Malembe.

6. Hi kuya hi Mitiro 24:15, hi vamani va tova cikari ka lava va to vhuxiwa hi Jehovha?

⁶ A ca lisima ka zvontlhe, lava va to pona a yimpi ya Armagedhoni zvi ta lava ku va gondzisa lava va to vhuxiwa hi ka vafileko xungetano hi Mufumo wa Nungungulu ni milayo Yakwe. Hikuyini? Hakuva a kutala ka lava va to vhuxiwa va  cikari ka “lava vo kala ku lulama”. (Lera Mitiro 24:15.) Va fanele ku cica zvotala kasi va vhuneka hi hakhelo ya kutlhatlhisa ya Kristu. Hi nga alakanyela a ntiro wa hombe wu tova kona wa ku va gondzisa lisine a vanhu va timiliyoni va nga mu tiviko Jehovha! Xana a mun’we ni mun’wani wabye i tava ni mugondzisi wakwe a ku fana ni lezvi hi fambisisako zvona a zvigondzo zva Bhibhiliya nyamutlha? Ku tava ni mabandla kasi lava va to vhuxiwa va gondzisiwa kona kasi vonawu va zvi kota ku gondzisa lava va to vhuxiwa andzhako ka vona? Zvi ta lava ku hi rindzela kasi hi zvi wona. Hambulezvo, leci hi ci tivako hiku kumbheleni ka 1000 wa malembe ya Kufuma ka Kristu, ‘a ku tiva Jehovha ku tava ku enetile misava’. (Isa. 11:9) Ndzeni ka 1000 wa malembe, hi tava ni ntiro wa hombe ni wo tsakisa kasi hi maha!

7. Hikuyini a vanhu va Nungungulu va tova ni zwela-wusiwana a cikhati va to gondzisa lava va to vhuxiwa hi ka vafileko?

⁷ Ndzeni ka 1000 wa malembe ya Kufuma ka Kristu, vontlhe a vanhu va Jehovha va ta simama ku cica zvokari kasi va mu tsakisa. Zvi ta lava ku vontlhe vava ni zwela-wusiwana kasi va vhuna lava va to vhuxiwa hi ka vafileko lezvaku vonawu va cica kasi va hlula maalakanyo ni mixuvo yo biha ni ku va vhuna ku hanya hi milayo ya Jehovha. (1 Ped. 3:8) Handle ko kanakana, lava va to vhuxiwa hi ka vafileko va ta zvi wona lezvaku a vanhu va Jehovha va ti koramisa niku va ha simama ku cica zvokari kasi ku mu tsakisa. Lezvo zvi ta va kuca ku ti patsa navo va khozela Jehovha. — Filp. 2:12.

8. Hikuyini hi rindzelako a ku tiva a maxaka ya hina ni vanghana lava va to vhuxiwa hi ka vafileko?

⁸ Ku na ni zvigelo zvo tala zvi hi mahako hi tiyiseka lezvaku lava va to vhuxiwa va ta tiviwa hi maxaka ni vanghana vabye. Hi cikombiso, hi kuya hi lezvi Jehovha a nga vhuxisa zvona vanhu cikhatini ci nga hundza, hi rindzela lezvaku i ta va vhuxa na va hi ni matshamela, mawulawulela ni maalakanyo lawa va nga hi nawo na va nga sefa. Alakanya lezvaku Jesu i fananisile a kufa ni ku etlela. Makunu, a ku vhuka hi ka vafileko zvi ta fana ni loku a munhu a vhuka hi wurongweni. (Mat. 9:18, 24; Joh. 11:11-13) Loku a munhu a vhuka hi ku etleleni i vhuka ni matshamela ya lawa a nga hi nawo a cikhati a ngaya etlela, a kupima kakwe kambe a ku cici. A hi woneni a cikombiso ca Lazaru. Ku wa hundza a mune wa masiku na a file, hikwalaho a miri wakwe wu wa sangulile ku bhola. Hambulezvo, a cikhati leci Jesu a nga mu vhuxa, a vamakabye vakwe va no tekela ku mu tiva, yenawu i va tivile. — Joh. 11:38-44; 12:1, 2.

9. Hikuyini lava vafileko va to kala ku vhuka na va hi ni mapimo ni mimiri yo mbhelela?

⁹ Jehovha i tsumbisile lezvaku paradhiseni a ku na munhu a to wula ku: ‘Ndza babya.’ (Isa. 33:24; Rom. 6:7) Hikwalaho, lava va to vhuxiwa hi ka vafileko va tava ni mimiri yiswa, yo kala zvibabyababyani. Hambulezvo, va nga ta tekela kuva vo mbhelela. Loku va wo tekela ku mbhelela, a maxaka ni vanghana vabye kuzvilava va wa nga ta va tiva. Zvi wonekisa ku a vanhu va taya va mbhelela hi kutsongwani-kutsongwani ndzeni ka kufuma ka Kristu ka 1000 wa malembe. A vanhu va tava vo mbhelela andzhako ka 1000 wa malembe ya kufuma ka Jesu, a cikhati leci a to tlhelisa Mufumo ka Papayi wakwe. Ka cikhati leco, a Mufumo wu tava wu mahile zvontlhe lezvi Jehovha a nga lava ku wu maha — a ku patsa ni ku maha ku a vanhu vontlhe va mbhelela. — 1 Kor. 15:24-28; Kuv. 20:1-3.

10. U ta ti zwisa kuyini hi ku vhuka ka vafileko?

¹⁰ Hi nga alakanyela litsako hi tova nalo hi ku tlhela hi amukela a varandzekako va hina! Xana u ta hlekelela hi ku tsaka kutani u toya hi ku rila? U ta tsaka laha ka kuza u yimbelela tisimu ta ku  dhumisa Jehovha? Leci hi tiyisekako hi cona hi leci: Hi ta mu randza nguvhu Jehovha, a Nungungulu wa hina wo khatala, ni N’wana wakwe wa lirandzo, hi lezvi va mahileko ku zvi koteka a ku a vafileko va vhuka.

11. Hi kuya hi magezu ya Jesu ma nga ka Johani 5:28, 29, zvini zvi to humelela lava va ingisako Nungungulu?

¹¹ Hi nga alakanyela a litsako va tova nayo lava va to vhuxiwa hi ka vafileko laha va toya va tlhatlha wumunhu gabye ga kale va hanya hi milayo yo lulama ya Nungungulu! Lava va to cica, va ta vhumelelwa ku hanya kala kupindzuka paradhiseni. Kanilezvi, lava va to ala ku cica mahanyela yabye, Jehovha a nga ta va tsika va hanya kala kupindzuka paradhiseni, ne ku va tsika va wonhetela kurula. — Isa. 65:20; lera Johani 5:28, 29.

12. Makatekwa muni lawa Jehovha a to nyika vanhu cikhatini ci tako?

¹² Mufun’weni wa Nungungulu, wontlhe a malandza yakwe ma ta zvi wona lezvaku a magezu ma nga ka Mavingu 10:22 lisine. Me ngalo: ‘A zvikatekiso zva Jehovha zva fumisa munhu; cima a nga engeteli wusiwana ha zvona.’ A moya wo basa wa Jehovha wu ta vhuna a vanhu vakwe lezvaku hi kutsongwani-kutsongwani va fana na Kristu ni kuya va mbhelela. (Joh. 13:15-17; Efe. 4:23, 24) Siku ni siku gi cako, a mimiri yabye yi taya yi tiya nguvhu, vava vanhu va va nene. Hakunene, a wutomi gi ta nandziha nguvhu ka cikhati leco! (Joba 33:25) Hambulezvo, u nga vhunekisa kuyini zvezvi hi ku ehleketa hi kuvhuka ka vafileko?

13. Hi kuya hi Lisimu 139:1-4, a ku vhuka ka vafileko ku kombisa kuyini lezvaku Jehovha wa hi tiva khwatsi?

¹³ Kota lezvi hi nga zvi wona kusanguleni, a cikhati leci Jehovha a to vhuxa vanhu, va ta vhuka na va tshamisile zvalezvi va nga tshamisile zvona na va nga sefa. Wa zvi tiva ku lezvo zvi wula yini? Zvi wula ku Jehovha wa ku randza nguvhu laha ka kuza a alakanya lezvi u pimisako, lezvi u ti zwisako zvona, lezvi u wulako ni lezvi u mahako. Hikwalaho, loku zvi lava ku a ku vhuxa zvi nga ta mu karatela a ku ku tlhelisela a mapimo ya wena, hanyela ga wena ni lezvi u nga tshamisile zvona. Hosi Dhavhidha i wa zvi tiva lezvaku Jehovha wa hi tiva khwatsi. (Lera Lisimu 139:1-4.) Hi ti zwisa kuyini hi ku tiva lezvaku Jehovha wa hi tiva khwatsi?

14. Hi ti zwisa kuyini loku hi ehleketa hi ku Jehovha wa hi tiva khwatsi?

¹⁴ Loku hi ehleketa hi lezvi Jehovha a hi tivisako zvona hi nga ta karateka. Hikuyini? Alakanya lezvaku Jehovha wa khatala nguvhu hi hina. I wona mun’we ni mun’wani wa hina na a hi wa lisima ka yena. I tiva a nchumu ni nchumu wu hi humelelako wutomini ga hina lowu wu mahako ku hiva lezvi hi nga zvona. Lezvo zva hi chavelela nguvhu! Hi nga tshuki hi tizwa na hi hi hoce. Contlhe cikhati Jehovha i kwalaha tlhelweni ga hina, a lavetela tindlela ta ku hi vhuna. — 2 Kro. 16:9.

15. A ku vhuka ka vafileko ku gi kombisisa kuyini a wutlhari ga Jehovha?

¹⁵ A valala va tolovela ku kurumeta vanhu lezvaku va maha lezvi va zvi lavako hi ku va dzukisela vaku loku va nga mahi va ta va daya. Loku munhu a chava kufa, a se vhumela ku maha zvilo zva ku hi tolovelo i wa nga ta zvi maha. Kanilezvi hina a zvi hi dzukisi; hakuva ha zvi tiva ku hambu loku a valala va hina va hi daya, Jehovha i ta hi vhuxa. (Kuv. 2:10) Ha zvi tiva lezvaku a ci kona va to maha ci to hi tsikisa ku tirela Jehovha ni kuva vanghana vakwe. (Rom. 8:35-39) Hi nga wona wutlhari ga hombe nguvhu legi Jehovha a gi kombisileko hi ku vhulula ndlela ya ku a vafileko va vhuka! Hi kota ya lezvo, Sathani ni lava va mu seketelako, vo ti mbhetela sikira hi ku funya loku va hi dzukisela vaku va ta hi daya loku hi nga mahi lezvi va zvi lavako! Ahandle ka  lezvo, zvi tlhela zvi hi tiyisa hlanha, hi nyima hi tiya hiku nde.

16. Zviwutiso muni u faneleko ku ti maha, niku a hlamulo wa kona wu nga ku vhunisa kuyini a ku tiva lezvaku wa mu tsumba Jehovha?

¹⁶ Loku a valala va Jehovha va ku dzukisela vaku va ta ku daya, xana u ta tsumba lezvaku Jehovha i ta ku vhuxa? U nga zvi tivisa kuyini lezvaku wa tsumba Jehovha ka cikhati leco? A yin’we ya tindlela ku ti wutisa lezvi: A zviboho zva zvi tsongwani ndzi zvi mahako siku ni siku zva komba lezvaku ndza mu tsumba Jehovha ke? (Luka 16:10) A cin’wani ciwutiso hi nga ti mahako hi leci: Xana a mahanyela ya mina ma komba lezvaku ndza tsumba lezvi Jehovha a nga tsumbisa zva ku i ta ndzi khatalela loku ndzi rangisa Mufumo? (Mat. 6:31-33) Loku a hlamulo wa wena ka zviwutiso lezvi wu hi ina, u komba lezvaku wa mu tsumba Jehovha niku u longile ku lwisana ni tixanisa leti u to kumana nato. — Mav. 3:5, 6.

17. a) A kuvhuxiwa ka vafileko ku li kombisisa kuyini a lihlazva-mbilu la Jehovha? b) Hi kombisa kuyini kubonga hi lihlazva-mbilu la Jehovha?

¹⁷ Jehovha i vekile a siku ni cikhati leci a to lovisa hi cona a tiko legi go biha ga Sathani. (Mat. 24:36) A nga ta luza lihlazva-mbilu a lovisa tiko na ci nga se chikela a cikhati leci a ci yimisileko. Wa zvi xuva nguvhu a ku vhuxa vafileko, kanilezvi wa ha simama kuva ni lihlazva-mbilu. (Joba 14:14, 15) I rindzela kala ku chikela a cikhati ca ku vhuxa vafileko. (Joh. 5:28) Hi na ni zvigelo zva zvi nene zva ku bonga a lihlazva-mbilu la Jehovha. Hi nga ehleketa hi lezvi: Hi kota ya lihlazva-mbilu la Jehovha, a vanhu vo tala a ku patsa na hina va na ni cikhati caku va “hundzuluka”. (2 Ped. 3:9) Jehovha i lava lezvaku a vanhu vo tala va kuma wutomi ga pindzukelwa. Hikwalaho, a hi kombiseni lezvaku ha li bonga a lihlazva-mbilu lakwe. Hi nga kombisa hi ndlela muni? Hi ku maha zvontlhe hi zvi kotako kasi hi hlota a vanhu lava va ‘longileko ku kuma wutomi ga pindzukelwa’ hi tlhela hi va vhuna ku randza Jehovha va tlhela va mu tirela. (Miti. 13:48) Loku va maha lezvo, va ta vhuneka hi lihlazva-mbilu la Jehovha, a kufana na hina.

18. Hikuyini hi faneleko kuva ni lihlazva-mbilu hi van’wani?

¹⁸ Jehovha i ta simama ku rindzela hi lihlazva-mbilu kala ku mbhela a 1000 wa malembe kasi hi mbhelela. Kala ka cikhati leco, Jehovha i ti yimisele ku tsetselela a zviwonho zva hina. Hikwalaho, hi fanele ku landzela cikombiso cakwe hi tlhela hi veka kupima ka matshamela ya ma nene ya van’wani ni kuva ni lihlazva-mbilu hi vona. Wona cikombiso ca makabye wo kari wa cisati,  loyi a nuna wakwe a nga sangula kuva ni kukarateka ka hombe a tlhela a nyima kuya mitlhanganweni. I wula lezvi: “Leco ci wa hi cikarato ca hombe nguvhu ka mina, a wutomi ga hina gi no cica hi citshuketi niku hi wa nga ta ha maha zvontlhe a zvilo lezvi hi nga zvi lava ku maha.” Hambulezvo, a wasati loyi wa lirandzo i simamile a ku kombisa lihlazva-mbilu hi nuna wakwe. I no tsumba Jehovha niku a nga tsikangi kutimisela. A kufana na Jehovha yena i no veka kupima ka zvilo zva zvinene lezvi a nuna wakwe a nga nazvo na ku nga hi ka cikarato. I wula lezvi: “A nuna wa mina i na ni matshamela yo tsakisa niku i maha zvontlhe a zvi kotako hi kutsongwani-kutsongwani kasi a hlula ku karateka.” Zva lisima a kuva ni lihlazva-mbilu hi lava va mahako zvontlhe va zvi kotako kasi va hlula zvikarato zvabye — lomu bandleni kutani mingangweni ya hina!

19. Zvini hi faneleko ku ti yimisela ku maha?

¹⁹ Jesu ni tingilozi va tsakile nguvhu a cikhati leci a misava yi nga vangiwa. Hambulezvo, hi nga alakanyela a litsako leli va tova nalo a cikhati leci va to wona a misava na yi tele hi vanhu vo mbhelela, lava va randzako Jehovha va tlhela va mu tirela. Hi nga alakanya lezvi va to tsakisa zvona lava va toya tilweni a cikhati leci va to vona a vanhu na va vhuneka hi mitiro yabye. (Kuv. 4:4, 9-11; 5:9, 10) Hi nga alakanya a cikhati leci hi to rila hi ku tsaka na ku nga hi kubayiseka laha a kubabya ni kubayisa ni kufa zvi to ngha zvi nga ha hi kona. (Kuv. 21:4) Na wu kari u rindzela a cikhati leco, ti yimisele a ku pimanyisa a Papayi wa wena wa lirandzo, wutlhari, ni lihlazva-mbilu. Loku u maha lezvo u ta tshama na u tsakile, hambu loku u lwisana ni zvikarato. (Jak. 1:2-4) Ha ci bonga nguvhu a citsumbiso ca Jehovha caku ‘ku tava kona a kuvhuka ka vafileko’. — Miti. 24:15.