1. ¿Andisï Jeoba ú eska japiringa tsípikua?

JARHASPTI ma tiempu enga Jeoba jandiajku irekapka, joperu no méni jandiajku pʼikuarheraspti. Méntku no ma ambe uétarhinchasïrendi. Peru ístu uékasïrendi eskaksï máteruecha niárapiringa tsípikua jingoni irekani. Ísï jimbo, uékperakua úspti eska uénapiringa kueraani ambe ma (Sal. 36:9; 1 Juanu 4:19).

2. ¿Nénaksï pʼikuarheraspi Jesusi ka ánjelicha enga Jeoba kueraapka iámu ambe?

² Orheta, Jeoba imeri Uájpani kueraspti, Jesusini. Tátsekua, Jesusini úraparini “iámendu ambe [...] kueranhasti” ka ístu uánikua ánjelicha (Kol. 1:16, Táta Diósïri Uandakua Tata Jesukristueri Aiatsperakua). Jesusi kánikua sési pʼikuarheraspti imeri Táti jingoni ánchikuarhini (Prov. 8:30). Ka ánjelichajtuksï kánikua tsípispti, jimbokaksï exespka na enga Jeoba ka imeri ambakiti ánchikuarhiri, Jesusi, kueraapka auandani ka Echerini. ¿Nénaksï xarhataspi eskaksï tsípispka? Biblia uandasïndi eskaksï ‘kʼéri ambe arhispka uinhachaparini’, ka seguiriptiksï kʼéri ambe arhini Jeobani iámu ambe jimbo enga kueraapka ka sánderia enga kueraapka kʼuiripuni (Job 38:7; Prov. 8:31). Iámu ambe enga Jeoba kueraaka, xarhatasïndi eska uékpitiska ka jánhastini (Sal. 104:24; Rom. 1:20).

3. Eska na uandajka 1 Korintu 15:21, 22, ¿para ambe marhuaski Jesusiri uarhikua?

³ Jeoba uékasïrendi eskaksï kʼuiripuecha irekapiringa para  méntkisï sési jásï planeta ma jimbo enga kueraapka. Peru engaksï Adani ka Eba nóteru kurhajchapkia imecheri Táti uékpitini, iámu Echerirhu niáraspti jarhani pekadu ka uarhikua (Rom. 5:12). ¿Ambe úspi Jeoba? Jirejiresï aianhpispti na enga pʼímutantapiringa kʼuiripuni (Gén. 3:15). Eratsespti eska íntspepiringa imeri Uájperi tsípikuani para pʼímutantaani Adaniri ka Eberi uájpechani pekadueri ka uarhikueri. Ini ambe úparini, ústi eska mándani kʼuiripu erakuaka sini marhuakua Jeobani ka irekani para méntkisï o nómbe (Juanu 3:16; Rom. 6:23; arhinta je 1 Korintu 15:21, 22).

4. ¿Ambechi exea ini jorhenguarhikua jimbo?

⁴ Tata Diosïri aiatsperakua enga tsíntskueri ambe uandajka, úsïndi eskachi kurhamarhikuarhiaka máru ambe. Por ejemplu, ¿néna úkuarhia tsíntskua?, ¿uáchi míteantaani juchari familiarichani?, ¿andisï tsíntskua uá eskachi kánikua sési pʼikuarheraaka?, ka ¿nénajtsïni jarhuatasïni tsíntskua parachi jukaparharani Jeobaeri uékperakua, jánhaskakua ka tekaantskua? Ju je exeni ini ambe.

5. ¿Andichisï eratsejki eskaksï no iámindu uarhiricha májku tiempu jimbo tsíntaaka?

⁵ Jeoba tsítantauati uánikua kʼuiripuechani imeri Uájpani úraparini. Joperu jamberi nóksï iáminduecha májku tiempu jimbo tsíntaati. ¿Andi? Jimboka no sési ambe úkuarhipiringa enga Echerirhu mátirku niárapiringa uánikua kʼuiripu jarhani. Ka Jeoba uékasïndi eska iámu ambe sési úkuarhiaka. Mítesti eska paraka pínandikua jauaka, uétarhisïnga eska iámindu ambe sési úkuarhiaka (1 Kor. 14:33). Enga Jeoba sánhani arhipka úni echerini Jesusi jingoni para kʼuiripuecha, xarhataspti eska jánhastiska ka tekaantstini. Ka Jesusijtu májkueni ambe xarhataati imani Mili Uéxurhini jimbo enga jarhuatauaka imechani engaksï tsípiti pakaraaka Armajedonirhu  paraksï ambantskantani Echerirhu para eroantani imechani engaksï tsíntaaka.

6. Eska na uandajka Ukuecha 24:15, ¿ístuksï nécha tsíntaa?

⁶ Peru sánderu jukaparhakua ambe engaksï uáka imecha engaksï tsípiti pakaraaka Armajedonirhu, jindesti jorhendaani Reinueri ambe ka Tata Diosïri juramukuecheri ambe imechani engaksï tsíntaaka. ¿Andisï uétarhia eskachi ini ambe uáka? Jimboka sáno iáminduecha engaksï tsíntaaka, jindeuakaksï imecha “engaksï malueka [o engaksï no niáraka míteni Jeobani]” (arhinta je Ukuecha 24:15). Imechaksï jatsiati para mójtakurhini paraksï úni kóntperatechani intsïnhaani tata Jesukristueri uarhikua jimbo ka irekanksï para méntkisï. Ísïsti, kʼéri ánchikuarhita máeuati jorhendaani Tata Diosïri ambe xáni uánikua kʼuiripuechani. ¿Táchanisïchi jorhendaua kʼuiripuechani ísï eskachi iásï na jorhendajka nemani Bibliaeri ambe? ¿Axanhaaksï kúnguarhikua ma jimbo ka arhistaminhaaksï paraksï ístu máteruechani jorhendaani engaksï tátsekua tsíntaaka? Jatsiskachi para erokuarhini para indeni ambe míteni. Ambe engachi kʼóru míteka, jindesti eska enga Jesusi kʼamarani jauakia Juramuni Mili Uéxurhini, iámu ‘echeri meru uiniati Jeobaeri mímixekua’ (Is. 11:9). ¡Kánikua ánchikuarhitachi jatsiaka imani mili uéxurhini jimbo!

7. ¿Andiksïsï Jeobaeri marhuaricha kurhangukuaua imechani engaksï tsíntaaka jiáni engaksï jorhendaani jauaka Tata Diosïri ambe?

⁷ Imani mili uéxurhini jimbo, iámindu Jeobaeri marhuarichaksï jatsiati para seguirini jarhani mójtakurhini paraksï jaiapanherantani Jeobani. Ísï jimbo, kurhangukuauatiksï imechani engaksï tsíntaaka jiáni engaksï jarhuataani jauaka paraksï nóteru no sési ambe eratsenia ni úni ka ísïksï irekani eska Jeoba na uéjka (1 Ped. 3:8). Engaksï i kʼuiripuecha exeaka eskaksï Jeobaeri marhuaricha kaxumbitiska ka eskaksï ístu jánguarhintaxaka mójtakurhini para Jeobani jaiapanherantani, imechajtuksï uékaati kʼéri ambe arhini Tata Diosïni (Filip. 2:12).

8. ¿Andichisï eratsejki eskaksï kʼuiripuecha uáka míteantani imechani engaksï tsíntaaka?

⁸ Uánikua ambe jarhasti engachi jimbo eratsejka eskaksï kʼuiripuecha uáka míteantani imechani engaksï tsíntaaka. Por ejemplu, exeparini imani kʼuiripuecheri enga Biblia uandajka eskaksï tsíntaspka, xarharasïndi eska Jeoba ísï tsítantauaka na engaksï jáxepka, na engaksï uandenga ka eratseni ante deksï uarhini. Ístu, ju je miáni eska Jesusi uandaspka eska uarhini ísïska komueska kʼuíni jarhani ka eska tsíntani ísïska komu tsínharhini (Mat. 9:18, 24; Juanu 11:11-13). Engaksï kʼuiripuecha tsínharhijka, májkuenksï jáxesïndi, májkuenksï uandasïndi ka útasïksï miáni jarhani ambe engaksï eratseni japka ante deksï nirani kʼuíni. Ju je exeni Lasarueri ambe. Ante de Jesusi tsítantani, ima tʼámu jurhiatikua páxaptia uarhirini, ísï jimbo, imeri kuerpu uénasptia tereni. Peru enga tsíntapkia, imeri pirembechaksï jirejiresï mítentaspti ka imajtu jirejiresï míteantaspti (Juanu 11:38-44; 12:1, 2).

9. ¿Andiksïsï no perfektu tsíntaa imecha engaksï uarhikia?

⁹ Jeoba aiatspesïndi eska Kristueri juramukua jimbo, no nema uandaaka: “Pʼamenchaxaka” (Is. 33:24; Rom. 6:7). Ísï jimbo, enga Tata Diosï ménderu íntsantauaka tsípikua imechani engaksï uarhikia, nóteruksï ambe ma pʼamenchaatia. Peru i ambe no arhikuekasïndi eskaksï jirejiresï perfektueuaka, jimboka enga ísïpiringa, imeri familiarichaksï jamberi no míteantapirindi. Peekaksï iámindu kʼuiripuecha sánhani arhiaka perfektueni imani Mili Uéxurhini jimbo enga tata Jesukristu Juramuaka.  Enga na nitamakia i mili uéxurhini, Jesusi íntskuntaati juramukuani imeri Tátini. Jiájkani, kʼamaraatia úkuarhini ambe enga jimbo uaxastanhapka i juramukua ka ístu úni eska kʼuiripu perfektueuaka (1 Kor. 15:24-28; Jaŋ. 20:1-3).

10. ¿Nénachi pʼikuarheraa engaksï uarhiricha tsíntaaka?

¹⁰ Ju je eranhaskani nénachi pʼikuarheraa ménderu exeáni imechani engachi uarhiranchaka. ¿Tsípiachi? ¿Ueraachi xáni tsípini? ¿Xánchi tsípia engachi jamberi pirekuaka Jeobani? Ambe engachi kʼóru pʼikuarheraaka, jindesti eskachi kánikua xénchaaka juchari Táti uékpitini ka ístu imeri Uájpani enga xénchpijka jimbokaksï úska eska jauaka tsíntskua.

11. Eska na uandapka Jesusi ixú Juanu 5:28, 29, ¿ambeksï niáraa jatsini imecha engaksï tsíntaaka ka engaksï uáka ambe enga Tata Diosï juramujka?

¹¹ Ístu ju je eranhaskani na engaksï xáni tsípiaka imecha engaksï tsíntaaka engaksï mójtakurhiaka ka ísïksï irekani eska Tata Diosï na juramujka. Imecha engaksï uáka ini ambe, uátiksï irekani para méntkisï Paraisurhu. Peru imecha engaksï no kurhajchaaka Tata Diosïni, nóksï jiárhitanhaati paraksï no sési ambe úni Paraisurhu (Is. 65:20; arhinta je Juanu 5:28, 29).

12. ¿Néna újchakuraua Jeoba imechani engaksï Echerirhu irekaaka?

¹² Enga Tata Diosïri Reinu juramuni jauakia, iámindu imeri marhuarichaksï exeati eska ísïska ambe enga Proverbios 10:22 uandajka: “Jeobaeri kóntperata uánikua ambakiti ambe juásïndi, ka indeni ambe jingoni no jurhasïndi kómu pʼikuarherakua ambe”. Jeobaeri espiritueri jarhuajperata jingoni, kʼuiripuechaksï sánhani arhiati ísï eratseni ka jámani eska Kristu ka sánhani arhiatiksï perfektueni (Juanu 13:15-17; Efes. 4:23, 24). Pauani pauanksï sánderu ambakiti kʼuiripu máeuati ka imecheri kuerpu sánderu uiuinhasïati. ¡Xáni engaksï tsípikua jingoni irekaaka! (Job 33:25). Peru ¿nénajtsïni marhuachesïni iásï eratsentani tsíntskueri ambe?

13. Eska na uandajka Salmo 139:1-4, ¿néna xarhatasïni tsíntskua eskajtsïni Jeoba sési míteska?

¹³ Eskachi na exekia, enga Jeoba tsítantauaka kʼuiripuechani, uáti eskaksï iámindu ambe miáuaka ka eskaksï xásï kʼuiripu máeuaka eskaksï na jásïpka ante de uarhini. Ju je eratseni ambe enga xáni arhikuekajka inde ambe. Jeobajtsïni xáni xénchasïndi mándani arhini enga jingontku jarhajka ambe engachi xáni eratsejka, pʼikuarherani, uandani ka úni. Ísï jimbo, engajtsïni tsítantapiringa, no sáni úkua jukanchapirindi úni eskachi iámu ambe miápiringa, májkueni eratseni ka ísïchi jáxeni eska ante de uarhini. Rei Dabidi mítespti eskajtsïni Jeoba sési míteska (arhinta je Salmo 139:1-4). ¿Nénachi pʼikuarherasïni míteni eskajtsïni Jeoba kánikua jukaparharasïnga?

14. ¿Nénachi jatsipirini para pʼikuarherani engachi eratsejka eskajtsïni Jeoba sési míteska?

¹⁴ Nóchi jatsiska para uandanhiani jimbokajtsïni Jeoba sési míteska. Ju je miáni eskajtsïni ima kánikua uékasïnga ka eskachi mándani arhini kánikua jukaparhakueska para ima. Ístu, sési miáxati ambe engachi nitamakuarhika ka andichisï xásï kʼuiripu máe. ¿A no eska inde ambe úsïnga eskachi no uandanhiauaka? Nóchi méni jatsiska para jandiajku pʼikuarherani jimboka Jeoba méntkisï juchantsïni jingoni jarhasïnga, jingontku jarhasïndi parajtsïni jarhuatani (2 Crón. 16:9).

15. ¿Néna xarhatasïni tsíntskua eska Jeoba kánikua jánhastiska?

¹⁵ Ima kʼuiripuecha engaksï kánikua chérhijka uarhikuani, úpirindiksï jurajkutakuarhini  ka únksï ambe engaksï imecheri ikiatspiticha arhiauaka nájkiruka ima ambeuaka enga no sési jaka. Kʼuiripuecha engaksï Noambakiti jingonika, jamberiksï uékaati májkueni úni juchantsïni jingoni peruksï no uáti ísï úni. Míteskachi eskajtsïni Jeoba tsítantaaka engajtsïni juchari ikiatspiticha niáraska uándikuni (Jaŋ. 2:10). Sésichi mítetixaka eskaksï ambe uéjki úni, nóksï uáka eskachi jurajkuaka Jeobani (Rom. 8:35-39). Jeoba xarhatasïndi eska kánikua jánhastiska engajtsïni aiachika eska jauaka tsíntskua. Indeni ambe jingoni, úsïndi eskachi no chéaka engajtsïni juchari ikiatspiticha uékaaka uándikuni ka ístu úsïndi eskachi no méni jurajkuaka Jeobani.

16. ¿Ambechi jatsiski para kurhamarhikuarhini ka ambe xarhataa ima ambe engachi mókuntaaka?

¹⁶ Engajtsïni juchari ikiatspiticha chéraska arhiparintsïni eskajtsïni uándikuaka, ¿mintsikaachi eskajtsïni Jeoba tsítantaaka? Parachi úni míteni i ambe, ju je kurhamarhikuarhini: “¿Xarhatasïni eskani mintsikasïnga Jeobani ima ambe engani pauani pauani újka?” (Luk. 16:10). “¿Xarhatasïni eskani mintsikasïnga eskarini Jeobani íntskuaka ambe engani xáni uétarhinchajka engani orheta peeraska Reinueri ambe?” (Mat. 6:31-33). Engachi mókuntaska eska jo, inde ambejtsïni jarhuataati parachi orhepani uérakuni náki uéjki tsʼéjkukuani (Prov. 3:5, 6).

17. a) ¿Néna xarhatasïni eska Jeoba tekaantstiska enga erokuarhini jaka para tsítantaani uarhirichani? b) ¿Nénachi uá xarhatani eskachi jukaparharasïnga Jeobaeri tekaantskuani?

¹⁷ Jeoba erakustia káni ka na jandora kʼamajkua ini parhakpinini enga xáni no sési jánhaskuarhini jaka (Mat. 24:36). Nájkiruka uékani jakaia tsítantaani uarhirichani, tekantaati ka asta jiáni uáti ambe ma na enga jatini uandarini jakaia (Job 14:14, 15). Ka erokuarhixati eska niáraaka ima jurhiatikua (Juanu 5:28). Uánikua ambe jarhasti engachi jimbo jatsika para jukaparharani Jeobaeri tekaantskuani. Por ejemplu, Jeobaeri tekaantskua jimbo, uánikua kʼuiripuechaksï andajkuarhisti moantani, asta jucha jamberi (2 Ped. 3:9). Jeoba uékasïndi eskaksï uánikua kʼuiripuecha niáraaka irekani para méntkisï. Ísï jimbo, ju je xarhatani eskachi jukaparharasïnga Jeobaeri tekaantskuani jánguarhintaparini exeantani imani kʼuiripuechani engaksï uéjka irekani para méntkisï ka jarhuatapariani paraksï xénchani ka marhuakuni Jeobani (Uku. 13:48). Ini ambe úparini, imechantu marhuakuauati Jeobaeri tekaantskua.

18. ¿Andichisï jatsi para tekaantskua xarhatakuani máteruechani?

 ¹⁸ Jimboka Jeoba tekaantstiska, erokuarhiati eska mili uéxurhini nitamaaka parachi niárani perfektueni. Asta jiáni jamberi, imajtsïni puáchintani jauati juchari kʼamanharhintskuechani. Ísï jimbo, ju je májkueni úni eska Jeoba ka ambakiti ambe exekuani máteruechani ka ístu tekaakuantani. Ju je exeni ambe enga nitamakuarhika pirenchi ma. Jarhasïrendiksï jurhiatikuecha enga imeri acheeti kánikua uandanhiauenga iámu ambe jimbo ka nóteru nirasïrendia tánguarhikuecharhu. Pirenchi uandantasïndi: “Ini ambe jimbo, kánikua no sési pʼikuarheraspka. Nóteruchi úspkia úni imani ambe engachi eratsetini japka”. Nájkiruka pirenchi indeni ambe nitamakuarhini japka, seguirixapti uékperakua ka tekaantskua jingoni kámani imeri acheetini. Mintsikaspti Jeobani ka no méni kuatantaspti. Ísï eska Jeoba, no solu uandanhiata ambe eratseni jarhasïrendi, sánderu sési, exesïrendi ambakiti ambe enga imeri acheeti uénga. Pirenchi uandasïndi: “Juchiti acheeti ambakiti kʼuiripu máesti ka jánguarhintaxati para sánhani arhini sési jarhani”. Kánikua jukaparhakuesti eskachi tekaantskua xarhatakuauaka juchari familiarichani o kúnguarhikuarhu anapu erachichani engaksï jánguarhintani jaka orhepani uérakuani uandanhiatechani.

19. ¿Ambechi jatsiski para jánguarhintani úni?

¹⁹ Jesusi ka ánjelichaksï kánikua tsípispti enga Echeri kueraanhapka. Ju je eranhaskani na engaksï xáni tsípiaka engaksï exeaka eskaksï Echerirhu irekaxaka kʼuiripuecha engaksï perfektueka, engaksï xénchajka ka marhuakujka Jeobani. Ka ju je eratseni na engaksï xáni sési pʼikuarheraaka imecha engaksï Kristu jingoni juramuaka engaksï exeaka eska imecheri ánchikuarhita marhuakuaxaka kʼuiripuechani (Jaŋ. 4:4, 9-11; 5:9, 10). Ístu, ju je eranhaskani na engachi irekaaka engachi nóteru ueraakia no sési pʼikuarherakua ambe jimbo, sino xáni tsípini jimboka nóteru jauakia pʼamenchakua ambe, kómu pʼikuarherakua ni uarhikua (Jaŋ. 21:4). Enga jamberi niáraka ima jurhiatikua, ju je jánguarhintani májkueni uékpini, jánhastini ka tekaantstini ísï eska juchari Táti. Engachi ísï úska, seguirinchi jauaka tsípikua jingoni irekani nájkirukachi tsʼéjkukua ambe jatsiaka (Sant. 1:2-4). Kánikuachi jukaparharasïnga engajtsïni Jeoba aiachijka eskaksï tsíntaaka uarhiricha (Uku. 24:15).