1. ¿Bin yuʼun la spasotik te Jehovae?

TE KʼALAL mato ayuk bin spasoj-a te Jehovae, stukelnax kuxul-a, pero maʼyuk bin-ora stukel la yaʼiy sba. Maʼyuk bin pasbot falta. Pero ya skʼan ya yakʼbey smulan yantik-euk te kuxinele. Ta swenta te skʼuxul yoʼtan kaj spas te bintik kuxajtike (Sal. 36:9; 1 Juan 4:19).

2. ¿Bin yaʼiyel la yaʼiy sba te Jesús sok te chʼul-abatetik te kʼalal la yichʼ pasel te chʼulchan sok te Balumilale?

² Te Jehová jaʼ nail la spas te Jesuse. Ta patil te Jesús koltaywan ta spasel te ipal chʼul-abatetik sok spisil te bintik aye (Col. 1:16). Mero tseʼel yoʼtan aʼtej sok te sTate (Prov. 8:30). Jaʼnix jich te chʼul-abatetik tseʼel yoʼtanik te kʼalal la yilik bitʼil te Jehová sok te Jesús la spasik te chʼulchan sok te Balumilale. Te Biblia ya yal «te tseʼel yoʼtan awonic» sok la yalbeyik yutsilal te Jehová. Tseʼel yoʼtanik te kʼalal juʼ ta pasel spisil, kʼaxtoxan-a te kʼalal la yichʼ pasel te ants winiketike (Job 38:7; Prov. 8:31). Te skʼuxul yoʼtan sok te spʼijil te Jehová ya xchiknaj ta ilel ta swenta te bintik spasoje (Sal. 104:24; Rom. 1:20).

3. Jich bitʼil ya yal 1 Corintios 15:21, 22, ¿bin ya jtatik ta swenta te laj te Jesuse?

³ Te Jehová la spasotik yuʼun ya xkuxinotik ta sbajtelkʼinal ta tʼujbil Balumilal. Pero kʼalal te Adán sok te Eva la  skʼaxuntaybeyik smantal te Jehová, och tal te mulil sok te lajele (Rom. 5:12). ¿Bin la spas te Jehovae? Oranax la yal bitʼil ya skoltay te ants winiketike (Gén. 3:15). La snop te ya yakʼ te sNichʼan yuʼun ya skoltay lokʼel ta mulil sok ta lajel te stsʼumbal te Adán sok te Eva. Jich la yakʼbey stsa te ants winiketik teme ya skʼan ya x-abatinik ta stojol swenta ya sta skuxlejalik ta sbajtelkʼinal (Juan 3:16; Rom. 6:23; kʼopona 1 Corintios 15:21, 22).

4. ¿Bin ya kilbeytik skʼoplal ta artikulo ini?

⁴ Te Dios yaloj te ay chaʼkuxajele, jaʼ yuʼun yaniwan jojkʼoybey jbatik, ¿bin-utʼil ya xkʼot ta pasel te chaʼkuxajele?, ¿yabal jnaʼbeytik sba te machʼatik lajem kuʼuntik te kʼalal ya xchaʼkuxajik tale?, ¿bin yuʼun bayal ya yakʼbotik stseʼelil koʼtantik te chaʼkuxajele? sok ¿bin-utʼil ya skoltayotik te chaʼkuxajel yuʼun mukʼ skʼoplal ya kiltik te skʼuxul yoʼtan te Jehová, te spʼijil sok te ya snaʼ maliywaneje? Kilbeytik te sujtibe.

5. ¿Bin yuʼun ya kaltik te maba ta jun-nax kʼajkʼal ya xchaʼkuxajik tal spisilik te machʼatik lajemike?

⁵ Te Jehová ya stuuntes te sNichʼan swenta ya schaʼkuxajtes te ants winiketike. Pero maniwan ta jun-nax kʼajkʼal ya xchaʼkuxajik tal spisilik. ¿Bin yuʼun? Melel teme oranax ya xnoj te Balumilale, ya xlaj te lamalkʼinale. Te Jehová ya smulan te lek chajpanbil spisile, melel snaʼoj te jich ya x-ayin lamalkʼinale (1 Cor. 14:33). Te Jehová la yakʼ ta ilel spʼijil yoʼtan sok slamalil yoʼtan te kʼalal kʼunkʼun la spas sok Jesús te Balumilal swenta ya xkuxinik tey-a te ants winiketike. Te Jesús jaʼnix jich ya xbajt yakʼ ta  ilel spʼijil sok slamalil yoʼtan te kʼalal ya xwentainwan ta jmil jaʼbile. Sok ya skoltay te machʼatik ya xkolik jilel ta Armajedon ta slekubtesel te Balumilal swenta ya smaliyik te machʼatik ya xchaʼkuxajike.

6. Jich bitʼil ya yal Hechos 24:15, ¿machʼatik ya xchaʼkuxajik talel?

⁶ Te aʼtel te mukʼ skʼoplal ya xbajt spasik te machʼatik ya xkolik jilel ta Armajedone, jaʼ te ya snojptesik te machʼatik ya xchaʼkuxajik tale. Ya xbajt yakʼbeyik snop te mantaliletik yuʼun Dios sok te Wentainele. Melel jteb ma spisilik te machʼatik ya xchaʼkuxajik tale, jaʼ «te machʼatic ma ba toj yoʼtanic» te ya yal te Bibliae (kʼopona Hechos 24:15). Yame skʼan ya sjeltay stalelik yuʼun ya staik lekilal yuʼun te laj te Cristoe. Jaʼ mukʼul aʼtelil te ya jkoltaytik te machʼatik ya xchaʼkuxajik talel yuʼun ya snaʼbeyik sba te Diose. ¿Ta jujuntulbal ya jnojptestik te ants winiketik jich bitʼil ya jpastik ta ora ini? ¿Yabal yichʼik albeyel banti kongregasion ya stsob sbaik? ¿Yabal yichʼik pʼijubtesel yuʼun ya snojptesik te machʼatik ya xchaʼkuxajik tal ta patile? Jaʼtome tey ya kiltik-a. Te bin ya jnaʼtike, jaʼ te «ya xnaʼbot sba te Jehová ta spahmal qʼuinal» ta slajibal te jmil jaʼbil ya xwentainwan te Cristoe (Is. 11:9). Te jmil jaʼbil ya xtale ¡kʼax bayal bin ya jpastik!

7. ¿Bin yuʼun ya xkʼot ta koʼtantik te bin yaʼiyel ya yaʼiy sbaik te machʼatik ya xchaʼkuxajik tale?

⁷ Te kʼalal yak ta kʼaxel-a te jmil jaʼbile, te j-abatotik yuʼun Dios ayto bin ya skʼan ya jeltay ta jtaleltik yuʼun ya kakʼbeytik stseʼelil yoʼtan te Jehovae. Jichme ya xkʼot ta koʼtantik te bin yaʼiyel ya yaʼiy sbaik te machʼatik ya xchaʼkuxajik te ya xbajt spasik tulan ta spasel te bin ya smulan te Jehovae (1 Ped. 3:8). Te machʼatik ya xchaʼkuxajik yame yichʼik ta mukʼ te Jehová te kʼalal ya yilik te pekʼel yoʼtanik te j-abatetik yuʼun Dios sok te yakik ta spasel tulan-euk ta sjeltayel te stalelike (Filip. 2:12).

8. ¿Yabal jnaʼbeytik sba te machʼatik lajem kuʼuntik te kʼalal ya xchaʼkuxajik tale?

⁸ Ay cheʼoxeb swentail te bin yuʼun ya kaltik te ya xbajt jnaʼbeytik sba te machʼatik lajem kuʼuntik te kʼalal ya xchaʼkuxajik tale. Jun ejemplo jaʼ te machʼatik chaʼkuxajik te ya yalbey skʼoplal te Bibliae. Te Jehová maniwan ya sjeltaybey sit yelaw, te bitʼil ya xkʼopoj sok te spensar te machʼatik lajemike. Jaʼnix jich te Jesús la yal te machʼatik lajemik jich kʼoem te wayalike, sok te chaʼkuxajel jaʼ pajal sok te ya xjajch ta wayele (Mat. 9:18, 24; Juan 11:11-13). Te kʼalal ya xjajchotik ta wayele maba ya xjelon te jsitik, te jkʼoptik sok te bintik ya jnaʼtike. Jnoptik te bin kʼot ta pasel ta stojol te Lazaroe. Kʼalal te Jesús la schaʼkuxajtese, schanebalix kʼajkʼal slajel-a, jaʼ yuʼun ayix ta kʼaʼel-a te sbakʼetale. Pero te Marta sok te María la snaʼbeyik sba ta ora te Lazaroe (Juan 11:38-44; 12:1, 2).

9. ¿Bin-utʼil ya xchaʼkuxajik tal te machʼatik lajemike?

⁹ Te Jehová ya yal te kʼalal ya xwentainwan te Cristo maʼyuk machʼa ya yal te ay ta chamel (Is. 33:24; Rom. 6:7). Jaʼ yuʼun kʼalal te Dios ya schaʼkuxajtes te machʼatik lajemike maʼyukix schamelik-a. Pero maba tojil ants winiketikix-a te kʼalal ya xchaʼkuxajik tale, te jichuke maniwan ya xnaʼbot sba yuʼun te sfamiliaike. Ta jmil jaʼbil  ya xwentainwan te Cristoe, kʼunkʼun ya xkʼatpʼujotik ta tojil ants winik. Teme tsʼakaj te jmil jaʼbile, te Jesús ya yakʼbey ta skʼab Jehová te Wentainele, melel la skʼotesix ta pasel-a te skʼanojel yoʼtan te Diose, jich bitʼil te ya xkʼootik ta tojil ants winike (1 Cor. 15:24-28; Apoc. 20:1-3).

10. ¿Bin yaʼiyel ya kaʼiy jbatik yuʼun te chaʼkuxajele?

¹⁰ Jnop kaʼiytik bin yaʼiyel ya kaʼiy jbatik te kʼalal ya jchaʼkiltik te machʼa lajem kuʼuntike. ¿Yabal x-okʼotik yuʼun stseʼelil koʼtantik? ¿Yabal stij koʼtantik ta skʼayojtayel te Jehovae? Te bin seguro ayotik yuʼune, jaʼ te ya xtal skʼuxul koʼtantik ta stojol te jTatik te kʼax lek yoʼtane sok ta stojol te sNichʼan te la yakʼik te chaʼkuxajele.

11. Jich bitʼil la yal te Jesús ta Juan 5:28, 29, ¿bin ya staik te machʼatik ya xchaʼkuxajik teme ya schʼuunbeyik smantal te Diose?

¹¹ Jnop kaʼiytik te stseʼelil yoʼtan ya yaʼiyik te machʼatik ya xchaʼkuxajik kʼalal ya sjeltay te stalelik sok te ya spas ta skuxlejalik te mantaliletik yuʼun te Diose. Te machʼatik ya sjeltay te stalelike «ya me xchaʼcuxajic yuʼun ya yichʼ scuxlejalic», yan te machʼatik ya skʼaxuntaybeyik smantal te Diose, maba ya xjilik ta Nichimal Kʼinal (kʼopona Juan 5:28, 29; Is. 65:20).

12. ¿Bintik bendision ya x-akʼbotik yuʼun Jehová te machʼatik ya xkuxinik ta Balumilale?

¹² Ta Wentainel yuʼun te Diose, spisil te j-abatetik yuʼun te Dios yame yilik te smelelil te bin ya yal Proverbios 10:22: «Te bendición yuʼun Jehová ya yacʼ cʼulejalil, soc ma ba ya yacʼ mel-oʼtan». Ta swenta te schʼul espiritu te Jehovae, kʼunkʼun tojil ants winik ya xkʼootik sok pajal ya xkʼot jtaleltik sok te Cristoe (Juan 13:15-17; Efes. 4:23, 24). Te jujun kʼajkʼal ya xkʼaxe ya xlekub te jtaleltike sok ya x-achʼub te jbakʼetaltike. ¡Ya jtatik bayal stseʼelil koʼtantik! (Job 33:25). Pero ¿bin-utʼil ya skoltayotik snopilanel ta koʼtantik te chaʼkuxajele?

13. Jich bitʼil ya yal Salmo 139:1-4, ¿bin-utʼil ya yakʼ ta ilel te chaʼkuxajel te ya snaʼbotik jbatik ta lek te Jehovae?

¹³ Jich bitʼil la kilbeytikix skʼoplale, kʼalal te Jehová ya schaʼkuxajtes te ants winiketike, ya sutbey yan buelta te spensarik sok te stalelike. Kʼuxotik ta yoʼtan te Jehová jaʼ yuʼun ya yil te bin ya jnoptik, te bin yaʼiyel ya kaʼiy jbatik, te bin ya kaltik sok te bin ya jpastike. Jaʼ yuʼun kʼalal ya schaʼkuxajtesotik te Jehová, maba wokol ya yil te ya skoltayotik yuʼun ya xjul ta koʼtantik te bin kʼax ta jkuxlejaltike. Te ajwalil David snaʼoj-a te ya snaʼbotik jbatik ta jujuntul te Jehovae (kʼopona Salmo 139:1-4). ¿Bin yaʼiyel ya awaʼiy aba yuʼun te ay akʼoplal ta yoʼtan te Jehovae?

14. ¿Bin yaʼiyel ya skʼan ya kaʼiy jbatik te bitʼil ya snaʼbotik jbatik ta lek te Jehová?

¹⁴ Te Jehová ya snaʼbotik jbatik ta lek, pero ma skʼan ya jmel koʼtantik yuʼun. Melel jnaʼojtik te kʼax kʼuxotik ta yoʼtan sok ay jkʼoplaltik ta yoʼtan ta jujuntul. Jaʼnix jich yiloj spisil te bin kʼaxem ta jkuxlejaltik, jaʼ yuʼun ya xkʼot ta yoʼtan bin yuʼun te jich jtaleltike. ¿Mabal jichuk te ya yakʼ slamalil koʼtantik-abi? Mame ayuk bin-ora jtukel ya kaʼiy jbatik, te Jehová ya sjokinotik jujun kʼajkʼal yuʼun ya skoltayotik (2 Crón. 16:9).

15. ¿Bin-utʼil ya yakʼ ta ilel te ay spʼijil te Jehovae?

¹⁵ Te ants winiketik bayal ya xiʼik te lajele. Jaʼ yuʼun te machʼatik wentainbilik yuʼun te Satanase, ya xiwtesik te ants winiketik yuʼun ya sujik ta spasel te bin chopol sok yuʼun ya yakʼik ta kʼabal te yamigotakike. Yan te joʼotike ma xiwtesotik. Jnaʼojtik te ya schaʼkuxajtesotik te Jehová teme ya kichʼtik milel yuʼun te jkontrataktike (Apoc. 2:10). Chikan bin ya spasbotik ma xjuʼ ya spitotik lokʼel ta stojol te Jehovae (Rom. 8:35-39). Te Jehová la yakʼ ta ilel spʼijil te kʼalal la yakʼ jmaliytik te chaʼkuxajele. Jich ya yakʼbotik yip koʼtantik sok maba ya jxiʼtik te lajele.

16. ¿Bintik jojkʼoyel ya skoltayotik ta snaʼel teme ay smukʼul koʼtantik ta stojol te Jehovae?

¹⁶ Teme ya yalbotik te jkontrataktik te ya smilotike, ¿yabal smukʼulin koʼtantik te ya schaʼkuxajtesotik te Jehovae? Yuʼun ya jnaʼtik, jnop kaʼiytik ini: «¿Yabal kakʼ ta ilel ta jujun kʼajkʼal te ay smukʼul koʼtan ta stojol te Jehová?» (Luc. 16:10). «¿Yabal smukʼulin koʼtan te jaʼ ya yakʼbon te Jehová te bin ya xtuun kuʼun teme jaʼ nail ya kakʼ ta jkuxlejal te Wentainel yuʼune?» (Mat. 6:31-33). Teme ay smukʼul koʼtantik ta stojole, jaʼme ya skoltayotik ta sitintayel biluk prueba (Prov. 3:5, 6).

17. 1) ¿Bin yak ta smaliyel te Jehovae? 2) ¿Bin ya skʼan ya jpastik te bitʼil yakto ta maliywanej te Jehovae?

¹⁷ Te Jehová yakʼojbeyix skʼajkʼalel te ya slajin te chopol balumilale (Mat. 24:36). Te Jehová ya skʼan ya xchaʼkuxajtesix te machʼatik lajemike, pero yak ta smaliyel te ya xkʼot yoraile (Job 14:14, 15; Juan 5:28). Ya kaltik wokol yuʼun te ya snaʼ maliywanej te Jehovae, jich ya xjuʼ ya sujtes yoʼtanik te ants winiketik jich bitʼil la jpastik te joʼotike (2 Ped. 3:9). Te Jehová ya skʼan te bayaluk machʼatik ya xkuxajik ta sbajtelkʼinal. Jaʼ yuʼun jpastik tulan ta sleel te «machʼa jich yoʼtanik te ya xkuxinik ta sbajtelkʼinal» sok jkoltaytik yuʼun kʼux ya yaʼiy ta yoʼtanik te Jehová sok te ya x-abatinik ta stojole (Hech. 13:48). Jichme ya xjuʼ ya staik lekilal yuʼun te yak ta maliywanej te Jehovae.

18. ¿Bin yuʼun ya xjuʼ ya jtʼunbeytik stalel te Jehovae?

¹⁸ Te kʼalal yak ta kʼaxel-a te jmil jaʼbile, jmulawilotikto-a, jaʼ yuʼun te Jehová ya spasbotik perdon jaʼto kʼalal ya xkʼootik ta  tojil ants winik. Ya skʼan ya jtʼunbeytik te stalele, jaʼuk ya kiltik te lekil talelil ay yuʼun te yantike sok jnaʼbeytik yoʼbolil sbaik. Kiltik te ejemplo yuʼun jtul ermana. Tsakot ta tulan mel-oʼtan te smamalale sok maba bajtix ta tsoblejetik. Te ermana jich ya yal: «Kʼax wokol la kaʼiy. Ma juʼix kuʼuntik spasel te bin jchapojtike». Te ermana spisil-ora la yakʼbey yil skʼuxul yoʼtan te smamalal sok la snaʼbey yoʼbolil sba. La smukʼulin yoʼtan te Jehová sok kujch yuʼun. La stʼunbey stalel te Jehová sok jaʼ la yil te lekil talelil ay yuʼun te smamalale. Te ermana jich ya yalxan: «Kʼax lek stalel te jmamalale sok yak ta spasel tulan yuʼun ya xlekub». Jaʼ yuʼun mero mukʼ skʼoplal te yakuk jnaʼbeytik yoʼbolil sba te jfamiliatik sok te ermanoetik te ay swokolike.

19. ¿Bin ya skʼan ya kakʼtik ta ilel ta ora ini?

¹⁹ Te Jesús sok te chʼul-abatetik akʼbot bayal stseʼelil yoʼtanik te kʼalal la yichʼ pasel te Balumilale. Jnop kaʼiytik bin yaʼiyel ya yaʼiy sbaik te kʼalal ya xnoj ta tojil ants winiketik te Balumilal te kʼux ta yoʼtanik te Jehová sok te ya yichʼik ta mukʼe. Te machʼatik ya xwentainwanik sok te Cristo jaʼnix jich lek ya xbajt yaʼiy sbaik yuʼun te ya skoltayik te ants winiketike (Apoc. 4:4, 9-11; 5:9, 10). Nopanax awaʼiy te kʼalal maʼyuk bin ya x-okʼatix yuʼun-ae, te kʼalal maʼyukix chamel, mel-oʼtan sok lajel (Apoc. 21:4). Jaʼ yuʼun ta ora ini kakʼtik ta ilel skʼuxul koʼtantik, jpʼijiltik sok jnaʼtik maliywanej jich bitʼil te Jehovae. Teme jich ya jpastike, maba ya xlaj te stseʼelil koʼtantik manchukme ya xkʼax jwokoltik (Sant. 1:2-4). Ya kalbeytik wokol te Jehová yuʼun te ay chaʼkuxajele (Hech. 24:15).