1. ¿Kʼu yuʼun oy kʼusitik la spas li Jeovae?

OY KʼUUK sjalil ti stuk toʼox kuxul li Jeovae, pe muʼyuk stuk laj yaʼi sba. Mu persauk ti oyuk buchʼu xchiʼin sventa xmuyubaje. Pe mu skʼan ti stuk noʼox jech skʼupine. Jaʼ yuʼun, oy kʼusitik lik spas ta skoj ti echʼem snaʼ xkʼanvane (Sal. 36:9; 1 Juan 4:19).

2. ¿Kʼu yelan laj yaʼi sba Jesus xchiʼuk anjeletik kʼalal oy kʼusitik yan la spas li Jeovae?

² Li Jeovae jaʼ baʼyel la spas li Xnichʼone. Laje, jaʼ xa «ta stojolal ti laj yichʼ pasel skotol» li kʼusitik oye, ti te tsakal skʼoplal li epal anjeletike (Kol. 1:16). Li Jesuse xmuyubaj tajek ti jmoj abtejik xchiʼuk li Stote (Prov. 8:30). Jaʼ jech laj yaʼi sbaik ek li anjeletike, yuʼun laj yil ta sat stukik kʼu yelan la spas vinajel balumil li Jeova xchiʼuk li bankilal j-abtel yuʼune, li Jesuse. ¿Kʼusi la spas li anjeletike? Xi chal li Vivliae: «Lik avanikuk ta muyubajel skotol li anjeletike». Jech-o la spasik jujukoj kʼalal oy kʼusi la spas li Jeovae, mas to kʼalal la spas li krixchanoetike (Job 38:7; Prov. 8:31). Skotol li kʼusitik spasojan Diose chakʼ ta ilel ti snaʼ xkʼanvane xchiʼuk ti toj pʼije (Sal. 104:24; Rom. 1:20).

3. Jech kʼuchaʼal chal 1 Korintios 15:21 xchiʼuk 22, ¿kʼusi xuʼ jtatik ta skoj ti laj yakʼ xkuxlejal li Jesuse?

³ Kʼalal la spas balumil li Jeovae, oy ox ta yoʼonton ti teuk xkuxiik sbatel osil li krixchanoetike. Pe li Adan xchiʼuk Evae la stoy sbaik ta stojolal Jeova, vaʼun och talel ta balumil  li mulil xchiʼuk lajelale (Rom. 5:12). ¿Mi te noʼox tsʼijil kom li Jeovae? Muʼyuk, la skʼel ta anil kʼuxi xuʼ skolta li krixchanoetike (Jen. 3:15). Sventa spoj lokʼel ta mulil xchiʼuk ta lajelal li yalab xnichʼnab Adan xchiʼuk Evae, la snop ti tstak talel Xnichʼon sventa xpojvane. Vaʼun, xuʼ staik kuxlejal sbatel osil mi ta xchʼunbeik smantale (Juan 3:16; Rom. 6:23; kʼelo 1 Korintios 15:21, 22).

4. ¿Kʼusi ta jkʼeltik li ta xchanobil liʼe?

⁴ Li Jeovae yaloj ti chchaʼkuxes li buchʼutik chamemike, pe oy van kʼusitik ta jakʼbe jbatik. Jech kʼuchaʼal liʼe: ¿kʼu van yelan chkʼot ta pasel li chaʼkuxesele?, ¿mi chkojtikintik li buchʼu chamem kuʼuntik kʼalal mi chaʼkuxie?, ¿kʼu yuʼun chakʼ jmuyubajeltik li chaʼkuxesele? xchiʼuk ¿kʼuxi chakʼ kiltik Jeova ti skʼanojutik tajek, ti toj pʼij xchiʼuk ti oy smalael yuʼun ta skoj ti chchaʼkuxesvane? Jkʼeltik batel.

5. ¿Kʼu yuʼun chkaltik ti mu jmojuk chchaʼkuxiik tal li buchʼutik chamemike?

⁵ Li Jeovae tstunes Xnichʼon sventa xchaʼkuxes ta smiyonal noʼox krixchanoetik. Jaʼ noʼoxe, muʼyuk van jmoj chchaʼkuxiik tal skotolik. ¿Kʼu yuʼun ti jech chkaltike? Yuʼun mi ta anil noʼox sbuset tal skotolike, muʼyuk xa smelol chkom li kuxlejale. Mu skʼupin jech li Jeovae, yuʼun snaʼoj ti skʼan xchapetuk lek li kʼusitik chichʼ pasel sventa oyuk jun oʼontonale (1 Kor. 14:33). Li Jeovae laj yakʼ ta ilel ti pʼij xchiʼuk ti oy smalael yuʼun kʼalal jmoj abtej xchiʼuk Jesus ta smeltsanel balumil yoʼ stakʼuk naklebinele. Li Jesus eke jaʼ jech chakʼ ta ilel stalelal kʼalal mi lik ajvalilajuk li ta Jmil Jabile. Yuʼun jmoj ch-abtejik xchiʼuk li buchʼutik kuxul chkomik ta Armajedon yoʼ kak xchapanik  li kʼusi chtun yuʼunik li buchʼutik chchaʼkuxiik tale, jech kʼuchaʼal snaik, sveʼelik, skʼuʼik o yan kʼusitik.

6. ¿Buchʼutik chchaʼkuxiik tal jech kʼuchaʼal chal Echos 24:15?

⁶ Pe oy to kʼusi mas tsots skʼoplal tspasik li buchʼutik kuxul chkomik ta Armajedone: chchanubtasik li buchʼutik chchaʼkuxiik tal ta sventa li smantal Dios xchiʼuk li Ajvalilal yuʼune. ¿Kʼu yuʼun? Yuʼun jutuk mu skotoluk li buchʼutik chchaʼkuxiik tale jaʼik «li buchʼutik muʼyuk tukʼike» (kʼelo Echos 24:15). Ep kʼusi skʼan sjel ta xkuxlejalik sventa stabeik sbalil ti ay chamuk ta jtojolaltik li Kristoe. Ep abtel yichʼoj sventa jchanubtastik ta smiyonal noʼox krixchanoetik ti mu xojtikinik Diose. ¿Mi ta jujuntal chkakʼbetik estudio jech kʼuchaʼal ta jpastik avie? ¿Mi chichʼik albel bu stsobobbailik xchiʼuk mi chichʼik chanubtasel sventa jaʼuk xa skoltaik li buchʼutik chchaʼkuxiik ta tsʼakale? Jaʼ to te chvinaj. Pe jnaʼojtik liʼe: kʼalal mi tsuts li Ajvalilal ta Jmil Jabil yuʼun Kristoe, «li balumile jpʼel skʼoplal chnoj ta krixchanoetik ti xojtikinik li Jeovae» (Is. 11:9). ¡Toj echʼ xa noʼox kʼupil sba li kʼusi ta jpastik vaʼ orae!

7. ¿Kʼu yelan chkiltik li buchʼutik ta jchanubtastik li ta Jmil Jabile? Albo smelolal.

⁷ Li ta Jmil Jabile, jkotoltik skʼan jechuk-o jel jtalelaltik yoʼ lekuk xilutik li Jeovae. Jaʼ yuʼun, kʼalal ta jchanubtastik li buchʼutik chchaʼkuxiik tale, chkaʼibetik smelolal ti mu kʼunuk chaʼiik yiktael kʼusitik chopol xchiʼuk ti xakʼ ta xkuxlejalik li smantal Jeovae (1 Ped. 3:8). Li buchʼutik chchaʼkuxiik tale chakʼik venta ti bikʼit yakʼoj sbaik li yajtuneltak Diose xchiʼuk ti yakal-o chakʼik persa ta sjelel stalelalik yoʼ lekuk x-ilatike. Taje jaʼ chtijbat-o yoʼontonik yoʼ xlik yichʼik ta mukʼ li Jeova eke (Filip. 2:12).

8. ¿Kʼu yuʼun chkaltik ti chkojtikintik ta anil li buchʼutik chchaʼkuxiik tale?

⁸ Chkojtikintik ta anil li buchʼutik chchaʼkuxiik tal kuʼuntike. ¿Kʼu yuʼun ti jech chkaltike? Oy jayibuk srasonal. Li buchʼutik chaʼkuxiik ta voʼnee muʼyuk jel tal spat xokonik, ti kʼu yelan chkʼopojike mi jaʼuk li snopbenike. Taje chakʼ kiltik ti jech van tspas Jeova mi chaʼkuxesvan ta jelavele. Jech xtok, li Jesuse laj yal ti xkoʼolaj ti naka chvayik li buchʼutik chamemike xchiʼuk ti xkoʼolaj kʼuchaʼal chjulavik kʼalal chichʼik chaʼkuxesele (Mat. 9:18, 24; Juan 11:11-13). Kʼalal oy buchʼu chvaye, muʼyuk chjel spat xokon kʼalal chjulave, li yechʼomal yee o li kʼusi xvul ta sjole. Kalbetik skʼoplal li Lasaroe. Xchanibal xa ox kʼakʼal xchamel kʼalal chaʼkuxesat yuʼun li Jesuse, jaʼ yuʼun lik xa ox sokuk li sbekʼtale. Pe kʼalal chaʼkuxie, ta anil noʼox ojtikinat yuʼun li Marta xchiʼuk Mariae. Li Lasaro eke muʼyuk chʼay ta sjol li xvixobtake (Juan 11:38-44; 12:1, 2).

9. ¿Mi tukʼil krixchanoetik xa ox li buchʼutik chchaʼkuxiik tale? Albo smelolal.

⁹ Li Jeovae yaloj ti muʼyuk buchʼu xi chal li ta Paraisoe: «Toj ipun» (Is. 33:24; Rom. 6:7). Li Diose tspasbe ta achʼ sbekʼtal li buchʼutik chamemike xchiʼuk muʼyuk xa ip tsutik tal. Jaʼ noʼoxe, maʼuk ti tukʼ xa chchaʼkuxiik tale. Yuʼun ti jechuke, muʼyuk van ch-ojtikinatik yuʼun li yutsʼ yalale. Yileluke, ta kʼunkʼun chijtukʼib batel jkotoltik li ta Jmil Jabile. Mi tsuts li Jmil Jabile, li Jesuse jaʼ xa chakʼbe ta skʼob Stot li Ajvalilale. Li vaʼ orae, tsutsem xa ox lek yabtel li Ajvalilal yuʼun Diose xchiʼuk  skoltaoj xa ox sventa xtukʼib li krixchanoetike (1 Kor. 15:24-28; Apok. 20:1-3).

10. ¿Kʼu yelan chkaʼi jbatik mi kʼot ta pasel li chaʼkuxesele?

¹⁰ Nopo no’ox k’u yelan chavaʼi aba mi laj avilbe sat yan velta li buchʼutik chamem avuʼune. ¿Mi ta van xatseʼin o mi cha-okʼ ta muyubajel? ¿Mi chlik van akʼejinta Jeova ta skoj ti xkuxet tajek avoʼontone? Li kʼusi jpʼel skʼoplale jaʼ ti mas to chlik akʼan li kuni Totik Jeova xchiʼuk Jesus ta skoj ti chaʼkuxesvanike.

11. Jech kʼuchaʼal chal Juan 5:28 xchiʼuk 29, ¿kʼusi tstaik li buchʼutik chchʼunik mantal ta Paraisoe?

¹¹ Jnoptik xtok kʼu yelan chaʼi sbaik li buchʼutik chchaʼkuxiik tal mi laj yiktaik li smol talelalik xchiʼuk mi lik tunikuk ta stojolal Jeovae. Li buchʼutik jech tspasike «chchaʼkuxiik sventa kuxlejal». Yan li buchʼutik tstoy sbaik ta stojolal Diose muʼyuk te chkuxiik ta Paraiso sventa mu sokesik li kuxlejale (kʼelo Juan 5:28, 29; Is. 65:20).

12. ¿Kʼuxi tskoltautik Jeova li ta Paraisoe?

¹² Kʼalal yakal tsventainutik li Ajvalilal yuʼun Diose, jkotoltik chkakʼtik venta ti melel li kʼusi chal Proverbios 10:22: «Jaʼ tspasvan ta jkʼulej li sbendision Jeovae, pe muʼyuk koʼol chakʼ tal xchiʼuk vokolil». Li Jeovae tskoltautik ta xchʼul espiritu sventa x-epaj jkʼulejaltik ta mantal, jaʼ xkaltik, mas to chkoʼolaj jtalelaltik kʼuchaʼal li Kristoe xchiʼuk chijtukʼib batel (Juan 13:15-17; Efes. 4:23, 24). Kʼunkʼun chlekub batel jtalelaltik xchiʼuk tstsatsub batel jbekʼtaltik. ¡Jun yutsil li jkuxlejaltike! (Job 33:25). Pe li avie, ¿kʼuxi tskoltautik mi la jnopbetik skʼoplal li chaʼkuxesele?

13. Kʼalal mi chaʼkuxesvan li Jeovae, ¿kʼuxi chakʼ kiltik ti xojtikinutik jech kʼuchaʼal chal Salmo 139:1 kʼalal ta 4?

¹³ Jech kʼuchaʼal laj xa jkʼeltike, li Jeovae muʼyuk chchʼaybe ta sjol li kʼusitik echʼem ta xkuxlejal li buchʼutik chchaʼkuxese xchiʼuk muʼyuk tsjelbe stalelalik. ¿Kʼuxi jnaʼojtik ti spas yuʼune? Yuʼun li Jeovae yiloj li kʼusi ta jnoptike, ti kʼu yelan chkaʼi jbatike, li kʼusi chkaltike xchiʼuk li kʼusi ta jpastik ta skoj ti skʼanojutik tajeke. Jaʼ yuʼun, mi la xchaʼkuxesutike, mu vokoluk chaʼi sventa jechuk onoʼox jtalelaltik xakʼbutik xchiʼuk ti xvuluk ta joltik li kʼusitik echʼem ta jkuxlejaltike. Li ajvalil Davide snaʼoj ti xojtikinutik lek ta jujuntal li Jeovae (kʼelo Salmo 139:1-4). ¿Kʼu yelan chkaʼi jbatik ti te sat ta jtojolaltik li Jeovae?

14. ¿Kʼu yelan chkaʼi jbatik ti te sat ta jtojolaltik li Jeovae?

¹⁴ Pe skʼan mu chopoluk xkaʼitik ti te sat ta jtojolaltik li Jeovae, yuʼun maʼuk tskʼel li jpaltailtike. ¿Kʼuxi jnaʼojtik ti jeche? Yuʼun skʼanojutik tajek xchiʼuk ep jbalil chilutik ta jujuntal. Jech xtok, yakʼoj venta kʼu yelan jtalelaltik ta skoj li kʼusi echʼem ta jkuxlejaltike. Tspat tajek koʼontontik taje. Mu jnoptik ti jtuk oyutike, yuʼun skotol ora te xchiʼukutik Jeova xchiʼuk tskʼel kʼuxi tskoltautik (2 Kron. 16:9).

15. ¿Kʼuxi xvinaj ti toj pʼij Jeova ti yaloj chchaʼkuxesvane?

¹⁵ Kʼalal oy buchʼu chichʼ albel ti chichʼ milele, xuʼ van oy kʼusitik tspas yoʼ spoj li xkuxlejale. Li buchʼutik ventainbilik yuʼun Satanase jaʼ jech tsibtasik yantik  sventa svalopatinik komel li yamigotakik o li kʼusitik xchʼunojike. Pe jaʼuk voʼotike muʼyuk chijxiʼo. Yuʼun jnaʼojtik ti chchaʼkuxesutik Jeova mi laj kichʼtik milele (Apok. 2:10). Kʼusuk noʼox xkichʼtik pasbel, muʼyuk chchʼakutik lokʼel ta stojolal li Jdiostike (Rom. 8:35-39). Ta skoj ti chchaʼkuxesvan li Jeovae, jamal xvinaj ti toj pʼije. Yuʼun muʼyuk chijxiʼo li sviniktak Satanas akʼo mi chalik ti chmilvanik mi muʼyuk la jpastik li kʼusi tskʼanike. Jech xtok, lek tsots koʼontontik chijtun ta stojolal Jeova.

16. ¿Kʼusi skʼan jakʼbe jbatik, xchiʼuk kʼuxi tskoltautik taje?

¹⁶ ¿Kʼusi van ta jpastik mi oy buchʼu chalbutik ti tsmilutike? ¿Mi ta van jpat koʼontontik ti xuʼ xchaʼkuxesutik li Jeovae? Sventa jnaʼtik mi jeche, xiuk jakʼbe jbatike: «Li jsetʼ juteb kʼusi ta jpas jujun kʼakʼale, ¿mi chakʼ ta ilel ti jpatoj koʼonton ta stojolal Jeova?» (Luk. 16:10). «Ti kʼu yelan kuxulune, ¿mi xvinaj ti jpatoj koʼonton ti chakʼbun Jeova li kʼusi chtun kuʼun mi baʼyel ta jsaʼ li Ajvalilal yuʼune?» (Mat. 6:31-33). Mi «jech», xijchie, chkuch kuʼuntik kʼusiuk noʼox ti jnuptantike (Prov. 3:5, 6).

17. 1) ¿Kʼuxi xvinaj ti oy smalael yuʼun Jeova ti yaloj chchaʼkuxesvane? 2) ¿Kʼuxi xuʼ jtojtik ta vokol ti oy smalael yuʼun li Jeovae?

¹⁷ Li Jeovae yakʼojbe xa lek «skʼakʼalil xchiʼuk yorail» sventa slajes li sbalumil Satanase (Mat. 24:36). Oy xa tajek ta yoʼonton tstij likel li buchʼutik chamemike, pe tsmala to (Job 14:14, 15). Jaʼ to mi kʼot lek yoraile (Juan 5:28). Ta jtojbetik ta vokol Jeova ti oy smalael yuʼune. ¿Kʼu yuʼun? Yuʼun yakʼoj to yorail sventa jsutes koʼontontik xchiʼuk ti jechuk spasik li yantik eke (2 Ped. 3:9). Li Jeovae oy ta yoʼonton ti xkuxiik sbatel osil epal krixchanoetike. ¿Kʼuxi xuʼ jtojtik ta vokol ti oy smalael yuʼune? Kakʼ ta koʼontontik saʼel «li buchʼutik oy lek ta yoʼontonik stael li kuxlejal sbatel osile», jkoltatik sventa skʼanik li Jeovae xchiʼuk ti xtunik ta stojolale (Ech. 13:48). Vaʼun, jaʼ jech xuʼ stabeik sbalil ti oy smalael yuʼun li Jeovae.

18. ¿Kʼu yuʼun skʼan oyuk smalael kuʼuntik ta stojolal li yantike?

¹⁸ Li Jeovae ta sjunul yoʼonton tsmala jmil jabil sventa xijpas ta tukʼil krixchano. Muʼyuk tsjalanbutik perton li vaʼ sjalile. Sventa jchanbetik stalelal li Jeovae, jaʼuk  jkʼelbetik li slekil talelal yantike xchiʼuk oyuk smalael kuʼuntik ta stojolalik. Jkʼeltik kʼusi kʼot ta stojolal jun ermana ti ipaj ta at-oʼonton smalal xchiʼuk ti laj yikta sba ta tsobajeletike. Xi chale: «Toj kʼux laj kaʼi li kʼusi la jnuptane. Jel ta jyalel li jkuxlejalkutike xchiʼuk muʼyuk xa kʼot ta pasel li kʼusi jnopojkutik oxe». Akʼo mi jech, laj yakʼ ta ilel ti skʼanoj-o li smalale xchiʼuk oy-o smalael yuʼun ta stojolal. Muʼyuk lubtsaj xchiʼuk la spat yoʼonton ta stojolal Jeova. Jaʼ la xchanbe stalelal li Jeovae, yuʼun muʼyuk la stikʼ ta yoʼonton li svokole xchiʼuk jaʼ la skʼel li kʼusi lek tspas smalale. Xi chale: «Toj lek stalelal li jmalale xchiʼuk yakal chakʼ persa sventa kʼunkʼun stsal komel li at-oʼontone». Toj tsots skʼoplal ti xkakʼtik ta ilel smalael kuʼuntik ta stojolal kutsʼ kalaltik o kermanotaktik ti yakal chil svokolike.

19. ¿Kʼusi skʼan xkakʼtik persa spasel?

¹⁹ Li Jesus xchiʼuk anjeletike xmuyubajik tajek kʼalal laj yichʼ meltsanel li balumile. Jnoptik noʼox kʼu to yelan xmuyubajik kʼalal mi laj yilik ti puro tukʼil krixchanoetik xa ox kuxulik li ta balumile, ti skʼanojik li Jeovae xchiʼuk ti chtunik ta stojolale. Jnoptik xtok kʼu yelan chaʼi sbaik li buchʼutik jmoj ch-ajvalilajik xchiʼuk Kristo kʼalal mi laj yilik ti ep buchʼutik tstabeik sbalil li kʼusi tspasike (Apok. 4:4, 9-11; 5:9, 10). Nopo noʼox kʼu yelan akuxlejal li ta Paraisoe: muʼyuk xa cha-okʼ ta skoj li avokole, muʼyuk xa buchʼu ch-ipaj, chat yoʼonton mi jaʼuk buchʼu chcham. Chlokʼ yaʼlel asat, pe ta muyubajel (Apok. 21:4). Yoʼ to ta jmalatik chkʼot ta pasel taje, kakʼtik persa xchanbel stalelal Jeova ti snaʼ xkʼanvane, ti toj pʼije xchiʼuk ti oy smalael yuʼune. Mi jech la jpastike, jun-o koʼontontik akʼo mi ep kʼusi jnuptantik (Sant. 1:2-4). Ta jtojbetik tajek ta vokol Jeova ti tstij likel li buchʼutik chamemike (Ech. 24:15).