1. Diesorọ Jihova vwọ ma arhọ?

O VWO ọke ọvo rẹ Jihova ọvo vwọ herọ. Jẹ ọ dia ọyen ọ vwọ dia ẹdia rẹ ọruvwohwo-o. Ọyen ọvo sa dia ababọ rẹ ihwo efa. Dedena, Ọghẹnẹ guọnọre nẹ ihwo efa je riavwerhen rẹ akpeyeren. Ẹguọnọ de muo vwọ ma arhọ.—Une 36:9; 1 Jọn 4:19.

2. Die yen Jesu kugbe emekashe na ruru ọke rẹ Jihova vwọ ma erọnvwọn efa?

² Ẹsosuọ, Jihova ma Jesu rọ dia Ọmọ rọyen. Ọ vwọ ma nu, Jihova vẹ ọyen da “ma kemu kemu ejobi” ji te emekashe na dede. (Kọl. 1:16) Oma vwerhen Jesu gangan rọ vẹ Ọsẹ rọyen vwọ wian kugbe. (Isẹ 8:30) Oma je vwerhen emekashe na. Ayen nabọ mrẹ Jihova vẹ Jesu rọ dia Onotu rẹ Ọwena rọyen, ọke rẹ ayen vwọ ma akpọ vẹ idjuvwu na. Kẹ, die yen emekashe na ruru? Ayen jiri Ọghẹnẹ ọke ra vwọ ma akpọ na, ayen ji jiro ọke rẹ ayen vwọ mrẹ erọnvwọn efa rọ mare, ma rho, kẹ ọke rọ vwọ ma ihworakpọ. (Job 38:7; Isẹ 8:31) Ọvuọvo rẹ emama nana eje dje ẹguọnọ vẹ aghwanre ri Jihova phia.—Une 104:24; Rom 1:20.

3. Vwo nene obo rehẹ 1 Kọrẹnt 15:21, 22, uphẹn vọ yen izobo rẹ ọtanhirhe ri Jesu rhiephiyọ?

³ Jihova guọnọre nẹ ihworakpọ riavwerhen rẹ akpeyeren vwẹ otọrakpọ rọ mare yoyovwin na rhirin bẹdẹ. Ẹkẹvuọvo, Adam vẹ Ivi ru umwemwu vwọso Jihova, ọtiọyena, ayen rha sa dia bẹdẹ-ẹ, ayen vẹ emọ rayen ki ghwẹ. (Rom 5:12) Kẹ die yen Jihova ruru? Ugege yena, ọ da ta obo ro che sivwin ihworakpọ wan. (Jẹn. 3:15) Jihova cha reyọ Jesu rọ dia Ọmọ rọyen vwo ze izobo rẹ ọtanhirhe ro se sivwin emọ rẹ Adam vẹ Ivi vwo nẹ obọ rẹ umwemwu vẹ ughwu. Ọtiọyena, kọ sa vwẹ uphẹn kẹ ohwo kohwo rọ vwọ jẹ ojẹ sẹ ọyen  cha ga Jihova ji vwo arhọ ri bẹdẹ.—Jọn 3:16; Rom 6:23; se 1 Kọrẹnt 15:21, 22.

4. Enọ vọ yen a cha fuẹrẹn vwẹ uyono nana?

⁴ O vwo enọ buebun rẹ avwanre sa nọ kpahen ive rẹ evrẹnushi rẹ Ọghẹnẹ veri na. Kerẹ udje, Mavọ yen evrẹnushi na sa phia wan? Avwanre che vughe ihwo rẹ avwanre vwo ẹguọnọ kpahen ra rhọvwọn nushi? Idjerhe vọ yen evrẹnushi na cha vwọ kẹ avwanre aghọghọ? Kugbe die yen evrẹnushi na yono avwanre kpahen ẹguọnọ, aghwanre, kugbe edirin ri Jihova? E jẹ a fuẹrẹn ọvuọvo rẹ enọ yena.

5. Diesorọ e se vwo rhẹro rọyen nẹ a cha rhọvwọn ihwo eje nushi siẹvuọvo-o?

⁵ Ọke rẹ Jihova da cha reyọ Ọmọ rọyen vwọ rhọvwọn iduduru rẹ ihwo na, avwanre se rhẹro rọyen nẹ ọ dia ọke vuọvo yen ọ cha vwọ rhọvwọn ayen ejobi nushi-i. Diesorọ e se vwo roro ọtiọyen? Kidie a da rhọvwọn ihwo ejobi siẹvuọvo, ọyena sa so oyaghan. Jẹ Jihova ru emu zighi zighi-i. Ọ riẹnre nẹ ofori nẹ e ru emu eje utute nene ọrhuẹrẹphiyotọ rere ihwo se vwo yerin vwọrẹ ufuoma. (1 Kọr. 14:33) Jihova dje aghwanre vẹ edirin phia ọke rọ vẹ Jesu vwọ frẹkotọ ma akpọ na tavwen ayen ke ma ihworakpọ. Jesu ji che dje iruemu tiọyena phia ọke rọ vẹ ihwo re wan Amagidọn vrẹ da cha wiankugbe vwọ rhuẹrẹ akpọ na hẹrhẹ otu ra cha rọvwọn nushi vwẹ Usuon rẹ Ẹgbukpe Uriorin na.

6. Vwo nene obo rehẹ Iruo Rẹ Iyinkọn Na 24:15, amono yen cha dia usun rẹ ihwo ri Jihova cha rhọvwọn nushi?

⁶ Ọ rọ ma ghanre, ihwo re wan Amagidọn vrẹ che yono ihwo ra rhọvwọn nushi kpahen Uvie rẹ Ọghẹnẹ vẹ oborẹ Jihova guọnọre. Diesorọ? Kidie ihwo ri “jẹ ọsoso ẹdia” yen che me bun vwẹ usun  rẹ ihwo ra cha rhọvwọn nushi na. (Se Iruo Rẹ Iyinkọn Na 24:15.) Ayen che ru ewene buebun rere ayen sa vwọ mrẹ erere vwo nẹ ọtanhirhe rẹ Kristi. Di vwẹ ẹwẹn roro owian rọ herọ re vwo yono iduduru rẹ ihwo re riẹn emuọvo kpahen Jihova-a. Ohwo ọvuọvo che vwo ohwo ro che yono kirobo re ruẹ uyono ri Baibol wan nonẹna? A cha ghare ihwo nana phiyọ ikoko sansan, ji yono ayen rere ayen se vwo yono ihwo efa ra cha rhọvwọn nushi? Avwanre ghwa riẹ-ẹn. Ẹkẹvuọvo, avwanre riẹnre nẹ vwẹ oba rẹ Usuon rẹ Ẹgbukpe Uriorin na, “akpọ na cha vọn vẹ erianriẹn rẹ Ọrovwohwo.” (Aiz. 11:9) A cha ghene wian owian buebun rọ cha kẹ ohwo omavwerhovwẹn vwẹ uvwre rẹ ẹgbukpe uriorin na!

7. Diesorọ ihwo rẹ Ọghẹnẹ che vwo dje erorokẹ phia ọke rayen de yono ihwo ra rhọvwọn nushi?

⁷ Vwẹ Usuon rẹ Ẹgbukpe Uriorin rẹ Kristi na, ihwo ri Jihova ejobi che rhe ru ewene rere ayen se vwo ru obo re cha vwerhọn oma. Ọtiọyena, ayen eje che dje uvi erorokẹ phia rẹ ayen vwọ vwẹ ukẹcha kẹ ihwo ra rhọvwọn nushi na vwo phi urhurusivwe re vwo ru umwemwu kparobọ, ji yerin nene iwan ri Jihova. (1 Pita 3:8) Aphro herọ-ọ, ihwo ra rhọvwọn nushi na che vwo ẹguọnọ rẹ ihwo ri Jihova re vwomakpotọ, re je “wian owian rẹ esivwo [rayen] phia.”—Fil. 2:12.

8. Diesorọ e se vwo rhẹro rọyen nẹ ihwo ri che dede ihwo ra rhọvwọn nushi na che vughe ihwo rẹ ayen vwo ẹguọnọ kpahen?

⁸ Fikirẹ iroro evo, avwanre se rhẹro rọyen nẹ ihwo ri che dede ihwo ra rhọvwọn nushi na che vughe ihwo rẹ ayen vwo ẹguọnọ kpahen. Kerẹ udje, a da vwẹ ẹro rẹ evrẹnushi re phia wanre vwo no, ọhọhọre nẹ Jihova cha rhoma ma ihwo rere ayen họhọ, ta ota, ji roro kirobo rẹ ayen ruẹ ọmọke krẹn tavwen ayen ki ghwu. Karophiyọ nẹ Jesu vwẹ ughwu vwo dje ovwerhẹn, ọ da rha vwẹ evrẹnushi na vwo dje a vwọ rhọvwọn ohwo nẹ ovwerhẹn. (Mat. 9:18, 24; Jọn 11:11-13) Ihwo de vrẹn nẹ ovwerhẹn, upho vẹ oma rayen fẹnẹ obo rọ hepha tavwen ayen ki sherhẹ-ẹn, ayen je karophiyọ obo re phiare ayen ke vwerhẹn. Roro kpahen udje ri Lazarọs. Etiyin ẹdẹ ẹne o ghwure, kọyen ugboma rọyen gbonre. Dedena, Jesu vwọ rhọvwọn nushi, Mata vẹ Meri vughire ugege yena, o muẹro nẹ Lazarọs ji vughe ayen.—Jọn 11:38-44; 12:1, 2.

9. Diesorọ ọ vwọ dianẹ ọ dia ugege ra vwọ rhọvwọn ihwo ri ghwuru na yen ayen cha vwọ dia gbagba-a?

⁹ Jihova veri nẹ, vwẹ otọ rẹ usuon ri Kristi, o vwo ohwo vuọvo rọ cha tanẹ: “Me mwọga-a.” (Aiz. 33:24; Rom 6:7) Kọyen a cha ma ugboma kpokpọ vwọ kẹ ihwo ra cha rhọvwọn nushi na. Ẹkẹvuọvo, ọ ghwa dia ugege ra vwọ rhọvwọn ayen nushi yen ayen cha vwọ dia gbagba-a. Kidie ọ da dia ọtiọyen, igbeyan vẹ ihwo rẹ orua rayen se jẹ ayen evughe. Ọhọhọre nẹ ememerha yen ihworakpọ cha rhe dia gbagba vwẹ uvwre Usuon rẹ Ẹgbukpe Uriorin rẹ Kristi na. Vwẹ oba rẹ ẹgbukpe uriorin na, Jesu kọ cha vwẹ Uvie na vwọ kẹ Ọsẹ rọyen rhivwin. Ọke yena jẹ Uvie na ru ọhọre ri Jihova gba, ji ru ihworakpọ gbagba re.—1 Kọr. 15: 24-28; Ẹvwọ. 20:1-3.

10. Mavọ oma che ru we kpahen evrẹnushi na?

¹⁰ Vwẹ ẹro roro obo rọ cha dia ọke wọ da cha rhoma dede ihwo rẹ wo vwo  ẹguọnọ kpahen. Aghọghọ na cha nẹrhẹ wọ hwẹ gbanẹ ọ cha nẹrhẹ wọ viẹ? Oma cha vwerhen owẹ te ẹdia wọ da cha suine rẹ ujiri rhe Jihova? Emu ọvo muẹro, wo che vwo ẹguọnọ ọgangan kpahen Ọsẹ wẹn vẹ Ọmọ rọyen fikirẹ evrẹnushi na.

11. Vwo nene eta ri Jesu rehẹ Jọn 5:28, 29, die yen cha phia kẹ ihwo ri ru obo re vwerhen Ọghẹnẹ oma?

¹¹ Vwẹ ẹro roro oborẹ oma cha vwerhen ihwo ra rhọvwọn nushi te rẹ ayen vwo siobọnẹ ohwo rẹ awanre na, ji ru ewene rere ayen se vwo ru obo re vwerhen Ọghẹnẹ oma. Ihwo ri ru ewene nana che vwo arhọ. Ẹkẹvuọvo, Ọghẹnẹ cha rhọnvwe nẹ otu ri ru ewene-e dia Iparadaisi na-a, rere ayen vwo jẹ oyaghan ẹsuọ phiyọ ufuoma rọ herọ.—Aiz. 65:20; se Jọn 5:28, 29.

12. Idjerhe vọ yen ihwo re cha dia akpọ na cha vwọ mrẹ ebruphiyọ ri Jihova?

¹² Vwevunrẹ Uvie na, ihwo rẹ Ọghẹnẹ eje cha mrẹ orugba rẹ eta rẹ Isẹ 10:22 rọ tare nẹ, “Ebruba rẹ Ọrovwohwo nẹrhẹ efe cha, ọ vwẹ enuebro ba-a.” Kidie nẹ ẹwẹn rẹ Ọghẹnẹ wian vwẹ oma rẹ ihwo rọyen, oyerinkugbe rayen vẹ Ọghẹnẹ kọ cha rhe ganphiyọ kọyen ayen je cha nabọ họhọ Kristi ji sikẹrẹ ogbagba. (Jọn 13:15-17; Ẹfe. 4:23, 24) Oma rayen che rhe yovwẹnphiyọ kẹdẹ kẹdẹ, ayen je cha dia omamọ rẹ ihwo. Akpọ na cha nabọ fuoma dẹn vwẹ ọke yena! (Job 33:25) Mavọ yen e vwo roro kpahen evrẹnushi na sa vwọ vwẹ ukẹcha kẹ wẹ enẹna?

13. Vwo nene Une Rẹ Ejiro 139:1-4, idjerhe vọ yen evrẹnushi na che vwo dje oborẹ Jihova nabọ riẹn avwanre ohwo ọvuọvo te?

¹³ Kirobo re djunute jovwore, ọke rẹ Jihova da cha rhọvwọn ihwo nushi, ọ cha kẹ ayen ẹgba iroro rayen rhivwin kugbe uruemu rẹ ayen vwori jovwo. Roro kpahen oborẹ ọyena mudiaphiyọ? Jihova vwo ẹguọnọ wẹn mamọ te ẹdia o wo vwo oniso je karophiyọ oborẹ vwo roro, oborẹ oma ru we, oborẹ wọ ta vẹ oborẹ wo ruẹ. Ọtiọyena, ọ da dianẹ ọ rhọvwọn owẹ, ọ cha bẹn kẹ ọ vwọ rhoma kẹ wẹ ẹgba iroro vẹ iruemu ri rhe we jovwo-o. Ovie Devid riẹnre nẹ Jihova nabọ riẹn avwanre ohwo ọvuọvo fiotọ. (Se Une Rẹ Ejiro 139:1-4.) Mavọ yen oma ru avwanre siẹrẹ e de vwo ẹruọ rẹ oborẹ Jihova nabọ riẹn avwanre ohwo ọvuọvo te?

14. Mavọ yen oma ru avwanre siẹrẹ e de roro kpahen oborẹ Jihova nabọ riẹn avwanre ohwo ọvuọvo te?

¹⁴ Siẹrẹ e de roro kpahen oborẹ Jihova nabọ riẹn avwanre te, o rhe fo nẹ udu bru avwanre-e. Diesorọ? Karophiyọ nẹ Jihova nabọ davwerhọn rẹ avwanre dẹn. O ni avwanre ohwo ọvuọvo ghanghanre. Ọ nabọ jokaphiyọ kemu kemu ro mu avwanre vwo ru erọnvwọn sansan vwẹ akpeyeren rẹ avwanre. Ọnana nẹrhẹ ẹwẹn avwanre totọ dẹn! O rhe fo rẹ avwanre roro nẹ avwanre hẹ ẹdia rẹ ọruvwohwo-o. Jihova vẹ avwanre herọ ọkieje, ọ je guọnọ cha avwanre uko.—2 Ikun 16:9.

15. Idjerhe vọ yen evrẹnushi na vwo dje aghwanre ri Jihova phia?

¹⁵ Ohwo da djoshọ rẹ ughwu, ọ sa nẹrhẹ o ru oborẹ ivwighrẹn rọyen vuẹrẹ nẹ o ru siẹrẹ a da djẹ uguegue muo. Ihwo rẹ Eshu suẹn phi oshọ nana phiyọ oma rẹ ihwo rere ayen sa vwọ gba ayen vwọ sen igbeyan yẹrẹ esegbuyota rayen. Ẹkẹvuọvo, ayen che se phi oshọ phiyọ oma avwanre-e. Avwanre riẹnre nẹ ivwighrẹn avwanre da  tobọ hwe avwanre dede, Jihova je cha rhọvwọn avwanre nushi. (Ẹvwọ. 2:10) O mu avwanre ẹro nẹ, o vwo emu vuọvo rọ sa hẹriẹ avwanre vwo nẹ ẹguọnọ ri Jihova-a. (Rom 8:35-39) Iphiẹrophiyọ rẹ evrẹnushi na dje aghwanre ri Jihova phia! Fikirẹ ọnana, oshọ rhe che mu avwanre ọke rẹ ihwo rẹ Eshu suẹn da tanẹ ayen che hwe avwanre siẹrẹ e rhe ru oborẹ ayen tare-e. Vwọba, ọ nẹrhẹ avwanre fiudugberẹ fuevun kẹ Jihova.

16. Enọ vọ yen fori nẹ wọ nọ oma wẹn, kẹ mavọ yen ẹkpahọnphiyọ rayen sa vwọ cha wẹ uko vwọ riẹn oborẹ wọ vwẹroso Jihova te?

¹⁶ Ivwighrẹn ri Jihova da djẹ uguegue rẹ ughwu mu we, wọ cha vwẹroso Jihova nẹ ọ cha rhọvwọn owẹ nushi? Mavọ wọ sa vwọ riẹn nẹ wọ cha vwẹroso Jihova vwẹ ọke tiọyena? Idjerhe ọvo wọ sa vwọ riẹn yen wọ vwọ nọ oma wẹn, ‘Erhiẹn ri mi brẹ kẹdẹ kẹdẹ djephia nẹ me vwẹroso Jihova?’ (Luk 16:10) Onọ ọfa wọ sa nọ oma wẹn yen, ‘Obo ri mi yeren akpọ mẹ wan djephia nẹ me vwẹroso ive ri Jihova nẹ ọ cha vwẹrote ọdavwẹ mẹ siẹrẹ me da vwẹ Uvie na vwọ kobaro?’ (Mat. 6:31-33) Ẹkpahọnphiyọ wẹn vwọ kẹ enọ yena da dia e, jẹ wo djephia nẹ wọ vwẹroso Jihova, ji muegbe hẹrhẹ ọdavwini kọdavwini rẹ wo se hirharoku.—Isẹ 3:5, 6.

17. (a) Mavọ yen evrẹnushi na vwo djephia nẹ Jihova vwo edirin? (b) Mavọ yen avwanre se vwo dje ọdavwaro phia kpahen edirin ri Jihova?

¹⁷ Jihova bru ẹdẹ vẹ ọke phiyotọ rọ cha vwọ ghwọrọ akpọ umwemwu nana. (Mat. 24:36) O che vwo edirin hẹrhẹ ọke ro bru phiyotọ na. O vwo owenvwe ọgangan rọ vwọ rhọvwọn ihwo ri ghwuru, ẹkẹvuọvo, o vwo edirin. (Job 14:14, 15) Ọ hẹrhẹ ọke ro fori rọ vwọ rhọvwọn ayen. (Jọn 5:28) O vwo iroro sansan re sorọ rẹ avwanre vwo dje ọdavwaro phia kpahen edirin ri Jihova. Di roro: Kidie nẹ Jihova vwo edirin, ihwo buebun, ji te avwanre ke sa mrẹ ọke vwo “kurhẹriẹ.” (2 Pita 3:9) Jihova guọnọre nẹ ihwo buebun vwo uphẹn rẹ arhọ ri bẹdẹ na. Ọtiọyena, e gbe jẹ e djephia nẹ e vwo ọdavwaro kpahen edirin rọyen na. Vwẹ idjerhe vọ? Womarẹ a vwọ davwẹngba vwọ guọnọ otu “re ve arhọ ri bẹdẹ na kẹ” je cha ayen uko vwo vwo ẹguọnọ ri Jihova je ga. (Iruo 13:48) Kẹ ayen sa mrẹ erere vwo nẹ edirin ri Jihova kerẹ avwanre.

18. Diesorọ avwanre vwo vwo edirin rẹ ihwo efa?

 ¹⁸ Jihova cha vwẹ erhiorin hẹrhẹ te oba rẹ ẹgbukpe uriorin na tavwen ọ ke rhẹro rẹ ogbagba mie avwanre. Bẹsiẹ ọke yena vwo te, Jihova vwo owenvwe rọ vwọ vwẹ imwemwu avwanre vwo ghovwo avwanre. Ọtiọyena, ofori nẹ avwanre tẹnrovi iruemu iyoyovwin rẹ ihwo efa ji vwo edirin rayen. Roro kpahen udje rẹ oniọvo aye ọvo rẹ ẹnwan mu ọshare rọyen rọ, rọ da dobọ rẹ uyono-ẹra ji. Oniọvo aye na da ta: “Ọ da vwẹ mamọ. Akpeyeren avwanre weneri kpregede, avwanre rhe se ru oborẹ avwanre jiroro rọyen jovwo-o.” Vwẹ ọke nana eje na, aye na nabọ vwo edirin rẹ ọshare rọyen. Ọ vwẹroso Jihova, oma rhọrọ-ọ. Kerẹ Jihova, ọ tẹnrovi iruemu iyoyovwin rẹ ọshare rọyen ukperẹ ebẹnbẹn na. Ọ da ta: “Ọshare mẹ nabọ vwo omamọ rẹ iruemu, ọ je davwẹngba ro vwo phi ebẹnbẹn rẹ ẹnwan na kparobọ ememerha.” Ọ ghanre mamọ rẹ avwanre vwo vwo edirin rẹ ihwo rẹ orua rẹ avwanre yẹrẹ iniọvo rehẹ ukoko na re davwẹngba rẹ ayen vwo phi ebẹnbẹn sansan kparobọ!

19. Die yen ofori nẹ avwanre brorhiẹn re vwo ru?

¹⁹ Oma vwerhen Jesu vẹ emekashe na mamọ ọke ra vwọ ma akpọ na. Ẹkẹvuọvo vwẹ ẹwẹn roro oborẹ oma cha vwerhen ayen te rẹ ayen vwọ mrẹ nẹ ihwo egbagba ri vwo ẹguọnọ ri Jihova je ga ọvo, yen vọn akpọ na. Vwẹ ẹwẹn roro oborẹ oma cha nabọ vwerhen ihwo ra reyọ nẹ akpọ na kpo odjuvwu te, ọke rẹ ayen da mrẹ ihworakpọ re mrẹ erere vwo nẹ iruo rẹ ayen ruẹ vwẹ odjuvwu. (Ẹvwọ. 4:4, 9-11; 5:9, 10) Vwẹ ẹwẹn roro ọke rẹ ameoviẹ rẹ aghọghọ cha vwọ reyọ ẹdia rẹ ameoviẹ rẹ odjadja, ọke rẹ ọga, uvweri, kugbe ughwu che vwo no bẹdẹ. (Ẹvwọ. 21:4) Bẹsiẹ ọke yena vwo te, brorhiẹn kokoroko wọ vwọ vwẹrokere Ọsẹ wẹn ro vwo ẹguọnọ, aghwanre, kugbe edirin na. Wo de ru ọtiọyen, wọ cha sẹro rẹ aghọghọ wẹn, otoro ebẹnbẹn rẹ wo hirharoku-u. (Jems 1:2-4) Avwanre kpẹvwẹ Jihova gangan vwọ kẹ ive rọyen nẹ “evrẹnushi herọ”!—Iruo 24:15.