1. Exeeni emwiirinhe Yehova opattuxa okumi?

WAAHIKHALA OKATHI Yehova aakhala awe mekhawe paahi. Hata vaari siiso, owo khaariipiwa murima. Maana khivanitthuneya Yehova okhala ni mutthu mukina wira ohakalaleke. Nnaamwi vaari siiso, Yehova aaphavela wira atthu akina akhalane okumi ni ahakalaleke. Nto okhala wira toophenta, Yehova aahipacerya opattuxa itthu.—Esal. 36:10; 1 Yoh. 4:19.

2. Yesu ni malaikha yoonenle sai vaavo yanweha aya Yehova opattuxaka itthu?

² Wanipacerya, Yehova aahimpattuxa Mwanawe wira ovareke vamosa ni yena. Nuumala-vo, omurumeelaka Yesu “Muluku òpattuxa itthu sothene” ohela muhina imilyau sinceene sa malaikha. (aKol. 1:16) Yesu aanihakalala vanceene ovara vamosa ni Tiithi awe. (Mir. 8:30) Nave, malaikha yaanihakalala vanceene. Awo yaahinweha Yehova, Mulipa-Oosuwela ovara muteko ni Yesu, apattuxaka erimu ni elapo. Malaikha ale yoonihenrye sai wira yaahihakalala? Awo “yahitthapa” vaavo elapo yaapattuxiwe aya. Moohaanyiherya, awo yaahivikaniha otthapa khula okathi Yehova aamaliha awe opattuxa khula etthu. Woonasa wene, yaahitepa otthapa vaavo yaamonale aya Yehova aapattuxaka apinaatamu. (Yobi 38:7; Mir. 8:31) Khula etthu opattunxe awe, ennooniherya ophenta ni ankhili a Yehova.—Esal. 104:24; aRom. 1:20.

3. Moovarihana ni 1 aKorinto 15:21, 22, mukuttho wa Yesu owenrye opaka exeeni?

³ Yehova aaphavela wira apinaatamu akhaleke mahiku otheene elapo yooreera aapanke awe. Masi Adamu ni Eva yaahimutthekela Yehova, nto etampi ni okhwa ohaaphwanya apinaatamu otheene. (aRom. 5:12) Eyo ennaakhoottiherya okhala mahiku otheene. Nto Yehova aapanke exeeni? Moohipisa nuumala otthekeliwa, Yehova aahihimya etthu aarowa awe opaka wira owoopole apinaatamu. (Maph. 3:15) Owo aamunivaha Mwanawe, wira ovahe okumi awe ntoko Yowoopola, nto eyo yaamwaakhaliherya anamwane a Adamu ni Eva  woopoliwa etampi ni okhwa. Nto owo aamwaavaha eparakha ya othanla omurumeela Yehova wira aphwanye okumi woohimala.—Yoh. 3:16; aRom. 6:23; mmusome 1 aKorinto 15:21, 22.

4. Mwaha ola, ninrowa waakhula makoho xeeni?

⁴ Yooleiherya ya Muluku ya ohihimuxiwa ennikumiherya makoho. Mwa ntakiheryo, woonasa wene, atthu anrowa ohihimuxiwa sai? Niireke nnoowerya waasuwela amusi ni apatthani ahu nuumala ohihimuxiwa? Mwa enamuna xeeni ohihimuxiwa onrowa aya onihakalaliha? Ohihimuxiwa onniixuttiha exeeni voohimya sa ophenta, ankhili ni opixa murima wa Yehova? Nrowe nthokorerye makoho awo.

5. Exeeni ennikupaliha wira ohihimuxiwa onrowa wiiraneya mwa enamuna yootthokiheya ni vakhaani-vakhaani?

⁵ Mparayiisu, Yehova onrowa omuruma Yesu waahihimuxa atthu imilyau sinceene. Masi ninnikupali wira atthu awo khanrowa ohihimuxiwa ekwaha emosa paahi. Mwaha wa xeeni? Mwaha woowi, akhala wira atthu valaponi animuncererya vanceene okathi omosaru, elapo esya pooti okhumelela ohiiwanana ni evutuka-vutuka. Masi muhiliyale wira Yehova khonipaka itthu mwa enamuna yoohitthokiheya. Nave Yehova onnisuwela wira, wira okhale murettele ohaana okhala-vo wiiwanana. (1 aKor. 14:33) Okathi Yehova aavara awe vamosa ni Yesu opattuxaka erimu ni elapo, Yehova aahooniherya wira ookhalana ankhili ni opixa murima, owo aapattunxe itthu vakhaani-vakhaani nuumala-vo onaapattuxa apinaatamu. Yesu onrowa omutakiha Tiithi awe okathi onrowa awe ovaraka muteko ni atthu ale anrowa woopowa okathi wa Armagedoni wira olokiherye makhalelo, ntoko oteka ipa, yoolya, ikuwo ni itthu sikina wira avahiwe ale anrowa ohihimuxiwa.

6. Moovarihana ni Miteko 24:15, ekrupu xeeni ekina enrowa ohihimuxiwa?

 ⁶ Atthu ale anrowa woopowa okathi wa Armagedoni anrowa ovaraka muteko wa faita yinceene. Muteko ene tuula: Anrowa owiixuttihaka Omwene wa Muluku ni malamulo a xariya a Yehova atthu ale anrowa ohihimuxiwa. Mwaha wa xeeni? Mwaha woowi, eriyari ya atthu anrowa ohihimuxiwa anookhala atthu ale Biibiliya onaahimya awe okhala “òtakhala murima”. (Musome Miteko 24:15.) Atthu “òtakhala murima” ahaana opaka marukunuxo manceene wira attottele mureerelo mareeliho anrowa okumiheriwa ni mukuttho wa Kristu. Vano, nkahaya muupuwele muteko ninrowa ahu okhalana wa owiixuttiha ekeekhai atthu imilyau sinceene, yaawo yahaatonko omusuwela Yehova. Niireke khula mutthu onrowa ohihimuxiwa onookhalana munna onrowa omusomihaka Biibiliya ntoko nniira ahu olelo-va? Niireke ale anrowa ohihimuxiwaka anrowa othanleliwa muloko wira yiixuttihiwe moota woowiixuttiha atthu anrowa ohihimuxiwa muhoolo mwaya? Nihaana olipelela wira noone etthu enrowa wiiraneya. Etthu ninsuwela ahu tiila: Wanikisa wa Iyaakha Ekonto Emosa sa Olamulelo wa Kristu “atthu othene a mulaponi anosareya osuwela w’Apwiya”. (Yes. 11:9) Okathi owo wa iyaakha ekonto emosa, nnookhalana muteko munceene, masi onrowa okhala woohakalaliha.

7. Xeeni atthu a Muluku anrowa aya woonaka othunku vaavo anrowa aya owiixuttihaka ale anrowa ohihimuxiwa?

⁷ Okathi wa Olamulelo wa Kristu iyaakha ekonto emosa, arumeyi otheene a Yehova anrowa opakaka marukunuxo wira amuhakalaliheke. Nto otheene aya anrowa owoonela othunku vaavo anrowa aya owiixuttihaka ale anrowa ohihimuxiwa, maana annisuwela wira vanitthuneya wiimananiha wira mutthu oxintte soolema soohiloka sihinivarihana ni malamulo a Yehova. (1 Ped. 3:8) Tthiri ale anrowa ohihimuxiwa anrowa ophavela okhala ni atthu oowiiyeviha a Yehova, yaawo anrowa wiimananihaka wira ‘yopowe’.—aFil. 2:12.

8. Itthu xeeni sinnikhaliherya woona wira nnimwaasuwela amusi ni apatthani ahu anrowa ohihimuxiwa?

⁸ Sookhala itthu sinceene sinnikhaliherya woona wira nnimwaasuwela amusi ni apatthani ahu anrowa ohihimuxiwa. Mwa ntakiheryo, niwuupuwelaka atthu yaahihimuxiwe khalai, vanikhala wira Yehova onrowa waahihimuxa atthu ntoko yaari aya ahinatthi okhwa, niire so, makhalelo a owiitho waya, muupuwelo aya ni enamuna yaalavula aya. Muhiliyale wira Yesu aahilikanyiha okhwa ni orupa, nto okathi atthu ale akhwiiye anrowa aya ohihimuxiwa, anrowa okhalaka ntoko aroovenxiwa yaarupa aya. (Math. 9:18, 24; Yoh. 11:11-13) Vaavo mutthu onvinya awe aarupa awe, onikhala ntoko aari awe ohinatthi orupa. Owo onnikhalana makhalelo ni muupuwelo aarina awe. Nkahaya nwehe ntakiheryo na Laazaro. Owo aahiviriha mahiku maxexe okhwiiye ene, nto erutthu awe yaahipacerya wuntta. Masi okathi Yesu aamuhihimunxe awe, okathi ene yoole Laazaro aahisuweliwa ni axirokorawe, nave owo aahiwuupuwela axirokorawe.—Yoh. 11:38-44; 12:1, 2.

9. Xeeni ale akhwiiye ahinrowa aya ohihimuxiwa ari ene oomalela?

⁹ Yehova ooleiherya wira Mparayiisu khuuvo onrowa ohimya wira: “Miyo ki muretta”. (Yes. 33:24; aRom. 6:7) Eyo enooniherya wira ale anrowa ohihimuxiwa anrowa okhalana irutthu sooloka ni ikumi. Masi, nlelo khanrowa okhala oomalela. Vaakhanle wira yaarowa okhala oomalela, pooti wira amusi ni apatthani aya khiyaarowa waasuwela. Vanikhala ntoko wira okathi wa Olamulelo wa Yesu Iyaakha Ekonto Emosa, apinaatamu anrowa okhala oomalela vakhaani-vakhaani. Nto wanikisa wa Iyaakha Ekonto Emosa, Yesu onoomuttikiherya Omwene Tiithi awe. Okathi owo, Omwene oniira ovanre ene muteko aya moomalela, muteko yoowo onihela muhina waattikiherya apinaatamu okhala oomalela.—1 aKor. 15:24-28; Wis. 20:1-3.

10. Ohihimuxiwa wa ale akhwiiye onrowa owiirihani exeeni?

¹⁰ Nkahaya muupuwele nwaakhelaka apatthani ni amusi munaaphenta anyu vanceene. Niireke munrowa otheyaka wala wunla mwaha wa ohakalala? Niireke munrowa wiipaka mmuxukhurelaka Yehova? Yookhala etthu munreerela anyu okupali ni murima wotheene. Etthu ene tiila: Ohihimuxiwa wa alipa-ookhwa onimuncererya omphenta wanyu Yehova ni Yesu. Maana wahaari ophenta ni oreera waya murima, atthu ale akhwiiye khiyaarowa ohihimuxiwa.

11. Moovarihana ni ele Yesu aahimmye awe Yohani 5:28, 29, exeeni enrowa owiiraneela ale anrowa otthara malamulo a xariya a Yehova?

¹¹ Nkahaya muupuwele ohakalala anrowa aya okhalana ale anrowa ohihimuxiwa. Vakhaani-vakhaani awo anrowa orulaka omutthu wa khalai ni opacerya otthara malamulo a xariya a Muluku! Akhala wira anoopaka marukunuxo awo, anoohihimuxiwa wira akhalane okumi. Masi atthu ale ahinrowa omwiiwelela, Yehova khonrowa oweemererya okela Mparayiisu maana anoohonona murettele ni wiiraana onrowa okhala.—Yes. 65:20; mmusome Yohani 5:28, 29.

12. Yehova onrowa waareeliha sai ale anikhala valaponi?

¹² Okathi Omwene onrowa aya opacerya olamulela, atthu otheene a Muluku animoona wira moolumo ari Miruku 10:22 teekeekhai, yaawo ani: “Ojaliwa w’Apwiya onniraliha: weteteya n’uvelavela khunkumiha etthu”. Nikhaliheriwaka ni ikuru sa Muluku, atthu a Yehova anrowa okhala athaaciri momunepani, eyo piiyo, okathi wotheene anrowa okhala ntoko Kristu ni anrowa otepaka okhala oomalela. (Yoh. 13:15-17; aÉf. 4:23, 24) Khula nihiku ninrowa oviraka, irutthu saya sinrowa okhala sooloka ni anrowa otepaka okhala atthu oolipa. Tthiri okathi owo, okumi onrowa okhala woohakalaliha! (Yobi 33:25) Niireke wuupuwelela ohihimuxiwa onimookhaliheryani?

13. Moovarihana ni Esalimo 139:1-4, ohihimuxiwa onooniherya sai wira Yehova onninsuwela oratteene?

¹³ Ntoko nilavunle ahu wanipacerya, okathi Yehova onrowa awe waahihimuxa atthu, owo onimwaattikiherya muupuwelo, mikhalelo ni anrowa okhala ntoko yaari aya ahinatthi okhwa. Nkahaya muupuwele ele enitaphulela aya. Yehova onnoophentani vanceene, maana onniweha itthu sotheene munuupuwela anyu, moonelo, malavulelo anyu, itthu munipaka anyu ni ookhalana owerya wa wuupuwela itthu iyo sotheene. Nto okathi onrowa awe woohihimuxani, vanoomukhweela woottikiheryani muupuwelo anyu, omutthu anyu ni mikhalelo sotheene mwaarina anyu. Mwene Davidi aanisuwela wira Yehova onnimuthokorerya khula mmosa a hiyo. (Musome Esalimo 139:1-4.) Etthu xeeni nniixutta ahu mwaha woosuwela wira Yehova onninsuwela oratteene?

14. Xeeni vari aya vooloka wuupuwelela wira Yehova onninsuwela oratteene?

¹⁴ Wuupuwela wira Yehova onninsuwela oratteene onninikhaliherya ohixanka. Mwaha wa xeeni? Muupuweleke wira Yehova onninikhapelela vanceene. Sinnimusivela mikhalelo murina anyu, seiyo siniwiirihani okhala mutthu a vameekhaaya. Nave onnuupuwela itthu sookhumelenleni mookumini mwanyu seiyo siniwiirihani okhala mutthu ntoko muri anyu. Ti vooloka osuwela eyo! Muhikhala-khale muupuwelaka wira muri mekhinyu. Maana Yehova ori ni nyuwo khula okathi wa okumi anyu wira ookhaliheryeni.—2 Wa. 16:9.

15. Nlipelelo na ohihimuxiwa nnooniherya sai ankhili a Yehova?

¹⁵ Woova okhwa kapwitthi muulupale ni ootakhala. Maana atthu ale aneettihiwa ni Satana annirumeela woova okhwa wira awiirihe apatthani ohiiwanana wala owiiriha atthu ohiya soolema saya aahiiso ele ansuwela aya wira ti yooloka. Masi kapwitthi owo khorina owerya wooniiriha opaka  eyo. Maana noosuwela wira awanani ahu yaniiva vale, Yehova onoonihihimuxa. (Wis. 2:10) Nave ninnisuwela wira khiivo etthu anrowa aya opaka enrowa onimwalanyiha ni Yehova. (aRom. 8:35-39) Tthiri ti vooloka osuwela wira Yehova okhalana ankhili mwaha woonivaha nlipelelo na ohihimuxiwa! Moohaanyiherya, orumeelaka nlipelelo na ohihimuxiwa, Yehova onnimwaakha Satana kapwitthi yoowo onimukhumela saana ni okathi omosaru onninivaha nikhaliheryo nuulupale ninnikhaliherya wiixaakiha, eyo piiyo, olipa murima wuulupale.

16. Makoho xeeni munireerela anyu wiikoha? Waakhula wanyu onrowa wookhaliheryani sai osuwela omuroromela wanyu Yehova?

¹⁶ Akhala wira awanani a Yehova anniwoopopihani wira anoowiivani, munrowa opaka exeeni? Niireke munoomuroromela Yehova mukupaliki wira onimoohihimuxani? Enamuna emosa yoosuwela akhala wira munnimuroromela Yehova ori wiikoha so: ‘Kiireke soothanla saka hata siri ene saamukhaani kinnooniherya wira kinnimuroromela Yehova?’ (Luka 16:10) Nikoho nikina munreerela anyu wiikoha tinla: ‘Kiireke moota kinrumeela aka okumi aka kinnikupali wira kahela nipuro noopacerya Omwene, Yehova onookivaha itthu sikina sinkithowa?’ (Math. 6:31-33) Akhala wira munaakhula wira “aayo” makoho awo, eyo enooniherya wira munnimuroromela Yehova ni muhiilokiherya wira nvilele soweeha sinrowa wookhumelelani muhoolo.—Mir. 3:5, 6.

17. (a) Ohihimuxiwa onooniherya sai opixa murima wa Yehova? (b) Ninrowa wooniherya sai wira ninnixukhurela opixa murima wa Yehova?

¹⁷ Yehova onnisuwela okathi ni nihiku onrowa awe opwetexa olumwenku ola wootakhala. (Math. 24:36) Yehova khonrowa ohiya opixa murima wira opwetexe olumwenku ola okathi ohinatthi ophiya. Owo onniphavela waahihimuxa atthu akhwiiye, masi nlelo onnipixa murima wira opake eyo. (Yobi 14:14, 15) Yehova onlipelela okathi wooreerela wira aahihimuxe atthu awo. (Yoh. 5:28) Tthiri ninnixukhurela vanceene opixa murima wa Yehova, maana eyo enniniixuttiha etthu yuulupale. Nkahaya muupuwele ela: Mwaha wa opixa murima wa Yehova atthu anceene ‘arukunuxa murima’, onihela muhina hiyo. (2 Ped. 3:9) Yehova oniphavela wira atthu anceene akhalane eparakha ya ophwanya okumi woohimala. Nto nihaana wooniherya wira ninnixukhurela opixa murima wa Yehova. Moota xeeni? Niimananihaka owaavya atthu otheene aniphavela “ekumi ehinimala” wira naakhaliherye omphenta ni omurumeela Yehova. (Mit. 13:48) Niira siiso, nnimwaakhaliherya atthu awo ottottela mureerelo opixa murima wa Yehova ntoko hiyo ninttottela ahu.

18. Xeeni vari aya vooloka waapixerya murima atthu akina?

 ¹⁸ Yehova onnisuwela wira ninrowa okhala atthu oomalela nuumala Iyaakha Ekonto Emosa ya Olamulelo wa Yesu. Mpakha okathi owo, Yehova onrowa onipixeryaka murima ni onilevelela itampi sahu. Nto hiyo nave nihaana oweha itthu sooloka atthu akina arina aya ni waapixerya murima. Nkahaya nwehe ntakiheryo na murokora mmosa. Iyawe murokora ole aanixanka vanceene ni aahihiya orowela mithukumano. Murokora ole onihimya so: “Eyo yaahikiwereya vanceene. Apalano naapanke ahu a emusi ahu yaahimala-mala”. Hata vaari siiso, muthiyana ole ootheliwa ni oophenta aahimpixerya murima iyawe. Owo aahimuroromela Yehova ni khaatthikenle ottuli. Omutakihaka Yehova, murokora ole khaaweha mixankiho sa iyawe paahi, masi aawehexexa mikhalelo sooloka sa iyawe. Owo onihimya so: “Iyaka ookhalana mikhalelo soolokexa, owo onniimananiha wira oxintte muxankiho awe ni onnipaka eyo vakhaani-vakhaani”. Ntakiheryo na murokora ola ninnooniherya otthuneya waya waapixerya murima atthu a etthoko ahu wala a mmulokoni mwahu, yaawo aniimananiha oxintta mixankiho saya.

19. Mulakenle opaka exeeni?

¹⁹ Yesu ni malaikha yaahihakalala vanceene okathi yaapattuxiwe aya erimu ni elapo. Vano nkahaya muupuwele moota anrowa aya ohakalala vaavo elapo yotheene enrowa aya osareya atthu animphenta ni omurumeela Yehova. Nave nkahaya muupuwele ohakalala ale oothanliwa ari ene wiirimu alamulelaka ni Kristu, vaavo anrowa aya waawehaka apinaatamu attottelaka mureerelo muteko aya. (Wis. 4:4, 9-11; 5:9, 10) Ohiya-vo, nkahaya muupuwele okhala olumwenku maithori a wunla anrowa aya oranttelihiwa ni maithori a ohakalala, owereya, iretta, oriipiwa murima, oxanka ni okhwa onrowa omalihiwa. (Wis. 21:4) Nlipelelaka ophiya nihiku nlo, mwiimananiheke otakiha ophenta, ankhili ni opixa murima wa Tiithi ihu. Mwiira siiso, khamunrowa oyeleela ohakalala wanyu hata murina ene mixankiho sinceene. (Yak. 1:2-4) Moohaanyiherya, nihaana omuxukhurela Yehova vanceene mwaha wa onileiherya wira “anohihimuwa mokhwani”!—Mit. 24:15.