1. Yihooway deˈuwaa medhdhidoy aybissee?

YIHOOWAY barkka deˈido wodee deˈees. SHin hegee I azzananaadan oottibeenna. Oonikka baynnan Yihooway ufayttana danddayees. SHin Xoossay harati deˈuwan ufayttanaadan koyiis. Siiqoy denttettin Yihooway medhdhiyoogaa doommiis.—Maz. 36:9; 1 Yoh. 4:19.

2. Yihooway harabata medhdhiyo wode Yesuusassinne kiitanchchatussi aybi siyettidee?

² Koyruwan, Yihooway ba naˈaa Yesuusa medhdhiis. Kaallidi, miilooniyan qoodettiya qoppana danddayiya ayyaana meretata gujjin, “ubbabaikka [he bayra naˈaa baggaara] merettiis.” (Qol. 1:16) Yesuusi ba Aawaara oottiyoogan keehi ufayttiis. (Lee. 8:30) Qassi Xoossaa naata gidida kiitanchchatikka ufayttiyo gaasoy deˈees. Yihoowaynne A Waanna Oosanchchay Yesuusi saluwaanne saˈaa medhdhiyo wode eti beˈidoosona. Kiitanchchati ufayttiyoogaa waati bessidonaa? Eti saˈay merettido wode ‘ufayssan ililidoosona;’ qassi wurssettan merettida asata gujjin, Yihooway medhdhido ubbaban eti ufayttidoogee qoncce. (Iyy. 38:7; Lee. 8:31) He ubba meretati Yihoowa siiquwaanne A aadhdhida eratettaa qonccissoosona.—Maz. 104:24; Roo. 1:20.

3. Koyro Qoronttoosa 15:21, 22 yootiyoogaadan, Yesuusa wozuwaa yarshshoy nuuni ay demmanaadan oottii?

³ Yihooway I medhdhido loˈˈiya saˈan asay merinawu deˈanaadan koyiis. SHin Addaameenne Hewaana Yihoowa bolli nagaraa oottido gishshawu merinawu deˈanawu danddayibookkona.  Etinne eta zeretta ubbay wurssettan hayqqana. (Roo. 5:12) Yihooway waatanee? Sohuwaara I asaa waati ashshanaakko qonccissiis. (Doo. 3:15) Addaamenne Hewaani zerettay nagaraappenne hayquwaa aylletettaappe laˈa kiyanaadan Yihooway wozuwaa giigissanawu halchchiis. Wurssettan, Yihooway ayyo haggaazanawu doorida asa ubbawu merinaa deˈuwaa immana.—Yoh. 3:16; Roo. 6:23; 1 Qoronttoosa 15:21, 22 nabbaba.

4. Nuuni ha huuphe yohuwan pilggana oyshati awugeetee?

⁴ Xoossay hayqqidaageeta denttanawu qaalaa gelidoogaa xeelliyaagan nuuni oychchana danddayiyo daro oyshati deˈoosona. Leemisuwawu, denddoy geella ayba ogiyan polettanee? Nu siiqiyo hayqqidaageeti denddiyo wode nuuni eta shaakki eranee? Denddoy nuna ufayssana ogeti aybee? Qassi dendduwaa hidootaappe Yihoowa siiquwaabaa, A aadhdhida eratettaabaanne A danddayaabaa ay tamaariyoo? Ane ha oyshata pilggoos.

5. Ubba asay issi kutti denddenna giidi nuuni naagana danddayiyoy aybissee?

⁵ Yihooway ba naˈaa baggaara, miilooniyan qoodettiya hayqqidaageeta denttiyo wode, eta ubbaa issi kutti denttenna giidi naagana danddayoos. Ayssi giikko, issi kutti keehi daro asay saˈan gujettikko, maaraa mankkaa xayana danddayees. Qassi Yihooway maari mankki baynnabaa mule oottenna. Asay sarotettan deˈana mala issibay maaran mankkan oosettana koshshiyoogaa Yihooway erees. (1 Qor. 14:33) Asay merettanaappe kase Xoossaa Yihooway Yesuusaara oottiyo wode, asawu saˈaa loddan loddan giigissiyoogan aadhdhida eranchchanne danddayanchcha gidiyoogaa bessiis. Armmageedoonappe attida asati  hayquwaappe denddiyaageeta mokkanawu koshshiyaabaa giigissiyo wode Yesuusi SHaˈu Layttaa Haaruwan etaara oottiyo wode, ikka aadhdhida eranchchanne danddayanchcha gidiyoogaa bessana.

6. Oosuwaa 24:15y yootiyoogaadan, Yihooway denttana asatu giddon deˈanaageeti oonee?

⁶ Ubbaappe aaruwan, Armmageedoonappe attiyaageeti hayquwaappe denddiyaageeta Xoossaa Kawotettaabaanne Yihooway etappe koyiyoobata tamaarissana koshshees. Aybissi? Hayquwaappe denddiyaageetuppe daroti Geeshsha Maxaafay ‘worddota’ giyoogeeta gidiyo gishshataassa. (Oosuwaa 24:15 nabbaba.) Kirsttoosa wozuwaappe goˈettana mala eti daroban laamettana bessees. Yihoowabaa aybanne erenna miilooniyan qoodettiya asaa tamaarissiyoogee ay keena gita oosokko ane qoppa. Ha wodiyan nuuni Geeshsha Maxaafaa xannaˈissiyo ogiyaadan, he wodekka issi ura xannaˈissanay issi asee? He oorattati gubaaˈetun maddabettidi etappe simmin hayquwaappe denddanaageeta tamaarissanawu loohanee? Nuuni hegaa sinttappe beˈana. SHin nuuni Kiristtoosa SHaˈu Layttaa Haaruwaa wurssettan “sa7ai GODAA eriyoogan [kumanaagaa]” eroos. (Isi. 11:9) Kiristtoosa shaˈu layttaa haaruwaa wode oottanawu keehi ufayssiya daro oosoy nuussi deˈana!

7. Xoossaa asay hayquwaappe denddiyaageeta tamaarissiyo wode qarettanay aybissee?

⁷ Kiristtoosa SHaˈu Layttaa Haaruwaa wode, Yihoowa asay ubbay A ufayssanawu laamettana bessees. Hegaa gishshawu, hayquwaappe denddiyaageeti iita qofaanne amuwaa aggidi Yihooway kessido maaraadan deˈana mala maaddanawu, eti ubbay wozanappe qarettana. (1 PHe. 3:8) Yihoowa asati banttana ziqqi oottiyoogaanne Yihoowa ufayssanawu laamettiiddi deˈiyoogaa hayquwaappe denddiyaageeti akeekananne etaara issippe Yihoowawu goynnanawu koyana.—Pili. 2:12.

8. Hayquwaappe denddiya nu so asaa yaratanne nu laggeta nuuni shaakki erana giidi naagana danddayiyoy aybissee?

⁸ Hayquwaappe denddiyaageeta nuuni shaakki erana giidi naagana danddayiyo daro gaasoy deˈees. Leemisuwawu, Yihooway asaa beni hayquwaappe denttido ogiyaappe, asay hayqqanaappe guuttaa kasetiya wodiyaagaa mala gidanaadan, he wodeegaadan haasayaanaadaaninne qoppanaadan oottidi Yihooway eta zaarettidi medhdhana giidi naagana danddayoos. Yesuusi hayquwaa xiskkuwaara qassi dendduwaa xiskkuwaappe beegottissiyoogaara geeddarssidoogaa hassaya. (Maa. 9:18, 24; Yoh. 11:11-13) Issi ura meray, A haasayaynne I hassayiyoobay I xiskkuwaappe denddiyo wodekka xiskkanaappe kase wodiyaagaara issi mala. Alˈˈaazara leemisuwaa beˈa. I hayqqoosappe oyddu gallassa gidido gishshawu musiis. Gidikkonne, Yesuusi hayquwaappe A denttido wode, A michchontti sohuwaara A shaakkidi eridosona; qassi Alˈˈaazari eta hassayidoogee qoncce.—Yoh. 11:38-44; 12:1, 2.

9. Hayqqidaageeti denddiyo wode eta qofaynne eta bollay wottiyoobi baynnaagaa gidennay aybissee?

⁹ Gannatiyan ooninne “Taani harggais” geennaagaa Yihooway qaalaa geliis. (Isi. 33:24; Roo. 6:7) Yaatiyo gishshawu, hayquwaappe denddiyaageeti payya gididi denddana. SHin eti sohuwaara wottiyoobi baynna asa gidokkona. Yaaniyaakko, eta so asaynne eta laggeti eta waayi shaakki erana. Kiristtoosa SHaˈu Layttaa Haaruwaa wode ubba asay loddan loddan wottiyoobi baynna asa gidanaba milatees. SHaˈu layttaa haaruwaa wurssettan  Yesuusi Kawotettaa ba Aawaassi immana. Asaa wottiyoobi baynnaageeta oottiyoogaa gujjin, Yihooway oottanawu koyiyo ubbabaa Kawotettay he wode polana.—1 Qor. 15:24-28; Ajj. 20:1-3.

10. Denddoy neessi aybi siyettanaadan oottanee?

¹⁰ Ne siiqiyoogeetuura zaarettada gayttiyoogee ay mala gidanaakko qoppa. Neeni ufayttada miiccaneeyye yeekkanee? Neeni keehi ufayttido gishshawu Yihoowawu sabaa mazamuriyaa yexxanee? Denddoy deˈanaadan oottida nuussi qoppiya Aawaanne siiqiya A Naˈaa nuuni wozanappe siiqanaagaa ammanettoos.

11. Yesuusi yootido, Yohaannisa 5:28, 29n deˈiya qofaadan, Xoossawu azazettiyaageeti waananee?

¹¹ Hayquwaappe denddiyaageeti Xoossawu azazettanawu giidi kase eeshshaa laammiyoogee eta ay keena ufayssanaakko qoppa. Hegaadan laamettidaageeti Gannatiyan merinawu deˈana. SHin laamettanawu koyenna asati Gannatiyaa sarotettaa mooriiddi yan deˈanaadan Yihooway oottenna.—Isi. 65:20; Yohaannisa 5:28, 29 nabbaba.

12. Saˈan deˈiya ubbaa Yihooway ayba ogiyan anjjanee?

¹² Leemiso 10:22y, “GODAA anjjoi dure kessees; i he duretettan meto walakkenna” giyoogee tuma gidiyoogaa Xoossaa Kawotettaa haaruwan ubba asay akeekana. Yihoowa ayyaanay maaddin, Xoossaa asay yaa gujji gujji Kiristtoosa milatananne wottiyoobi baynna asa gidana. (Yoh. 13:15-17; Efi. 4:23, 24) Qassi galla galla eta bollay yaa gujji gujji minnananne eti loˈˈo asa gidana. He wodee keehi ufayssiya wode gidana! (Iyy. 33:25) SHin, dendduwaabaa wotta dentta qoppiyoogee nena ha wodiyan waati maaddana danddayii?

13. Mazamure 139:1-4y Yihooway nuna loytti eriyoogaa waati bessi, qassi denddoy hegaa waati qonccissanee?

¹³ Nuuni qommoora beˈidoogaadan, Yihooway hayqqidaageeta denttiyo wode, eti kaseegaadan hassayanaadaaninne kaseegaa mala asa gidanaadan oottana. Hegee woygiyoogaakko qoppa. Yihooway nena keehi siiqiyo gishshawu neeni qoppiyo, yootiyo, oottiyoonne neeyyo siyettiya ubbabaa I akeekeesinne hassayees. Yaatiyo gishshawu, I nena denttikko, aynne metootennan ne qofaa, ne xeelaanne ne eeshshaa zaarettidi neessi immana danddayees. Yihooway nuna ubbaa huuphiyan huuphiyan loytti eriyoogaa Kawuwaa Daawiti eriis. (Mazamure 139:1-4 nabbaba.) Yihooway nuna loytti eriyoogaa nuuni akeekiyo wode nuuyyo aybi siyettii?

14. Yihooway nuna loytti eriyoogaa qoppiyo wode nuuyyo aybi siyettii?

¹⁴ Yihooway nuna loytti eriyoogaa nuuni wotti dentti qoppiyo wode hirggana koshshenna. Aybissi? Yihooway nuuyyo keehi qarettiyoogaa hassaya. I nuna ubbaa alˈˈobadan xeellees. Nu deˈuwan nuna gakkida ubbabaa Yihooway hassayees. Hegee keehi minttettiyaaba! Nuuni nurkka deˈiyaabadan mule qoppana koshshenna. Yihooway ubbatoo nunaara deˈeesinne nuna maaddanawu koyees.—2 Odi. 16:9.

15. Denddoy Yihoowa aadhdhida eratettaa waati qonccissii?

¹⁵ Asay hayquwaa yayyiyo wode, eta morkketi eta woranawu yashissidi eti oottana koyennabaa wolqqan ootissoosona. Seexaanay hariyo asati hara asay he yashshaappe denddidaagan ba laggeta kaddanaadan woy likke gidennaagaa eriyoobaa oottanaadan giddoosona. SHin, nuuni hegaadan oottanaadan  wolqqanttana danddayokkona. Nu morkketi nuna worikko, Yihooway nuna denttanaagaa eroos. (Ajj. 2:10) Eti oottiyo aybinne nuuni Yihoowawu haggaaziyoogaa agganaadan oottana danddayennaagaa ammanettoos. (Roo. 8:35-39) Yihooway dendduwaa hidootaa nuussi immiyoogan, keehi aadhdhida eranchchaa gidiyoogaa bessiis. Hegaappe denddidaagan, Seexaanaara hashetiyaageeti yootiyoobaa nuuni oottennan aggikko eti nuna woranawu yashissiyo wode, nuuni yayyokko. Qassi hegee nuuni kaseegaappe aaruwan xalidi Yihoowawu ammanettidi deˈanaadan oottees.

16. Neeni nena oychchana koshshiyo oyshati awugeetee, qassi neeni Yihoowan ay keena ammanettiyaakko eranawu zaaroti nena waati maaddana danddayiyoonaa?

¹⁶ Yihoowa morkketi nena woranawu yashissikko, Yihooway nena hayquwaappe denttanaagaa ammanettay? Neeni he wode Yihoowan ammanettanaagaa waata erana danddayay? Issi ogee nena hagaadan oychchiyoogaa: ‘Taani galla galla kuuyiyo guuttabati ta Yihoowan ammanettiyoogaa bessiyoonaa?’ (Luq. 16:10) Hara oyshay qassi, ‘Taani Kawotettaa kaseyikko aquwawu peeshshawu tawu koshshiyaabaa Yihooway kunttanawu qaalaa gelidobaa ta ammanettiyoogaa, ta wodiyaanne ta miishshaa goˈettiyo ogee bessii?’ giyaagaa gidana danddayees. (Maa. 6:31-33) Ha oyshata ee gaada zaarikko, Yihoowan ammanettiyoogaa bessadasa; qassi sinttappe nena gakkana ay paaciyawukka giigettidaagaa gidana.—Lee. 3:5, 6.

17. (a) Denddoy Yihoowa danddayaa waati bessii? (b) Nuuni Yihoowa A danddayaa gishshawu galatiyoogaa waati bessana danddayiyoo?

¹⁷ Ha iita alamiyaa awude xayssanaakko Yihooway kuuyiis. (Maa. 24:36) I danddayennan aggidi keerido wodiyaappe kasetidi xayssenna. I hayqqidaageeta denttanawu laamotikkonne, danddayanchcha. (Iyy. 14:14, 15) Eta denttanawu bessiya wodee gakkanaashin I naagees. (Yoh. 5:28) A danddayaa gishshawu nuuni Yihoowa galatiyo loˈˈo gaasoy deˈees. Ane hagaa qoppa: Yihooway danddayido gishshawu nuna gujjin daro asay ‘nagaraappe simmiyo’ wodiyaa demmiis. (2 PHe. 3:9) Yihooway daro asay merinaa deˈuwaa demmanaadan koyees. Nuuni A danddayaa gishshawu galatiyoogaa simi yaatikko bessoos. Waatidi? “Merinaa deˈuwaa demmanawu suure wozanaa koshshay deˈiyoogeeta” koyiyoogan nuussi danddayettida ubbabaa oottiyoogaananne eti Yihoowa siiqanaadaaninne awu haggaazanaadan  maaddiyoogaana. (Oos. 13:48, NW) Yaatikko, Yihoowa danddayan nuuni goˈettidoogaadan etikka goˈettana.

18. Nuuni harata danddayana koshshiyoy aybissee?

¹⁸ Yihooway nuuni wottiyoobi baynna asa gidanaadan I naagiyo shaˈu layttaa wurssettay gakkanaashin danddayan naagana. He wode gakkanaashin, Yihooway nu nagaraa atto gaana. Hegaa gishshawu, nuuni A leemisuwaa kaallidi, haratu loˈˈo eeshshatu xallaa qoppananne eta danddayana bessees. I azinay keehi unˈˈettiyoogaa doommidonne shiiquwaa shiiqiyoogaa aggido issi michchee hanotaa qoppa. A hagaadan gaasu: “Hegee tawu keehi metiyaaba. Nu deˈoy qoppennan laamettiis; qassi nuuni oottana koyido ubbabaa oottana danddayibookko.” SHin he siiqiya machchiyaa ba azinaa danddayiyoogaa aggabeykku. A Yihoowan ammanettaasu; qassi hidootaa qanxxabeykku. Yihoowaagaadan, A ba azinaa loˈˈo eeshshatu xallaa qoppaasu. A, “Ta keettaawawu keehi loˈˈo eeshati deˈoosona; qassi I unˈˈettiyoogaa loddan loddan agganawu bawu danddayettida ubbabaa oottees” yaagaasu. Metiyaabaa xoonanawu baaxetiiddi deˈiya nu soo asaa woy gubaaˈiyan deˈiyaageeta nuuni danddayiyoogee keehi koshshiyaaba!

19. Nuuni ay oottanawu murttana koshshii?

¹⁹ Saˈay koyro merettido wode Yesuusinne kiitanchchati keehi ufayttidosona. Gidoppe attin, Yihoowa siiqiyaanne awu haggaaziya wottiyoobi baynna asatun biittay kumiyo wode eti ay keena ufayttanaakko qoppa. Saluwaa biyaageeti asay eta oosuwaappe goˈettiyoogaa beˈiyo wode ay keena ufayttanaakko qoppa. (Ajj. 4:4, 9-11; 5:9, 10) Qassi waayiyaa gaasuwan afuxxiyoogee attidi ufayssan afuxxiyo wodiyan, sahoy, azzanoynne hayqoy merinawu xayiyo wodiyan deˈana deˈuwaa qoppa. (Ajj. 21:4) He wode gakkanaashin, siiqiya, aadhdhida eranchchaanne danddayanchchaa, ne Aawaa leemisuwaa kaallanawu murtta. Neeni yaatikko, nena ay metoy gakkikkonne ufayttada deˈana. (Yaaq. 1:2-4) Hayqqidaageeta denttanawu Yihooway qaalaa gelido gishshawu keehi galatoos!—Oos. 24:15.