1. Иисус тӧрт балыкчыга нени айткан ла олор бу сӧстӧрди канайып алынган?

ПЕТР, Андрей, Иаков ла Иоанн балыкчылар болуп иштеп азырангандар. Иисустыҥ: «Мени ээчий барыгар. Слерди улус тудаачы эдип салайын» — деген кычыртузын угуп, олордыҥ канайып кайкаганын сананып ийзеер де *. Бу сӧстӧрди олор канайып алынган? Агару Бичикте: «Олор бу тарый шӱӱнин артырып койоло, Оныҥ кийнинеҥ бастылар» — деп айдылат (Матф. 4:18—22). Бу чыгарган јӧп олордыҥ бастыра јӱрӱмин солып салган. Балыктыҥ ордына олор «улус туд[уп]» баштаган (Лука 5:10). Бӱгӱнги кӱнде Иисус чындыкты сӱӱп турган ачык јӱректӱ улуска андый ла кычыртула баштанат (Матф. 28:19, 20). Слер бу кычыртуны алынып, «улус тудаачылар» болуп калдаар ба?

2. «Улус тудаачы» болотон бо, јок по деп нениҥ учун јазап шӱӱп сананар керек ле мындый јӧпти чыгарарга слерге не болужар?

² Слер Агару Бичикти кандый да ӧйдиҥ туркунына ӱренип, бойоордыҥ јӱрӱмеерде солынталар эткен болороор. Је эмди слерге сӱӱнчилӱ јардыҥ јарчызы болор бо, јок по деп јӧп чыгарар керек. Слер кандый јӧп чыгарарына алаҥзып турган болзоор, санааркабагар нениҥ учун дезе бу јаан учурлу алтам деп, слер оҥдоп турган болороор. Агару Бичикте Петр, Андрей, Иаков ла Иоанн «бу тарый шӱӱнин артырып койгон» деп айдылат, је олор бу јӧпти јазап сананбай јадып чыгарбаган. Бу учуралдаҥ јарым јыл кире озо олор Иисусла таныжып, оны Мессия деп оҥдоп ийген (Иоанн 1:35—42). Слер Иегова ла Иисус керегинде кӧпти билип, кӧгӱс јанынаҥ оноҥ ло ары ӧзӧргӧ кӱӱнзеп турган болороор.  Је јарчы болотон јӧпти ӱзе немени јазап сананып алала чыгарар керек. Је бу тӧрт балыкчыга јаан учурлу јӧп чыгарарга не болушкан?

3. Слерге сӱӱнчилӱ јардыҥ јакшы ӱредӱчилери ле јарчылары болорго не болужар?

³ Иисустыҥ баштапкы ӱренчиктери балык тудатан ижин јакшы билер болгон ло сӱӱген, олор јалтанбас болгон ло бойлорын дисциплинага ӱреткен. Бу мындый кылык-јаҥдар олорго јакшы «улус тудаачылар» болуп каларга болушкан. Бу јӧрмӧлдӧ слерге сӱӱнчилӱ јардыҥ јакшы ӱредӱчилери ле јарчылары болорго не болужарын шӱӱжип ийерис.

4. Петр балык тудар ишти нениҥ учун эткен?

⁴ Петр бойыныҥ балык тудар ижин јӱк ле билезин јеткилдеерге болуп этпеген. Ол бойыныҥ ижин сӱӱген (Иоанн 21:3, 9—15). Анайда ок ол Иисустыҥ «улус тудаачы» болзын деп јакарган ижин база сӱӱй берген. Иегованыҥ болужынаҥ улам, Петр бу иште сӱреен јаан једимдерге јеткен (Ап. ижи 2:14, 41).

5. Лука 5:8—11-ле болзо, Петр недеҥ коркыган ла слерге мындый сезимдерди јеҥип аларга не болужар?

⁵ Бис Иегованы сӱӱп турганыстаҥ улам јарлайдыс. Бу сӱӱш јарлап турганыстыҥ эҥ учурлу шылтагы болот ло биске јарлап болбозыс деп, алаҥзып турган сезимдеристи јеҥерге болужар. Иисус Петрды «улус тудаачы» болзын деп кычырарда, ого: «Коркыба» — деп айткан. (Лука 5:8—11 кычырыгар.) Петр Христостыҥ ӱренчиги болуп калган кийнинде оныла не болорынаҥ коркыбаган. Ол Иисустыҥ ого ло оныҥ нӧкӧрлӧрине коркышту кӧп балык тудуп аларга болушканына алаҥ кайкаган. Петр Иисусты  кайкал эткен деп оҥдогон ла бойын оныла кожо иштеерге турбас кижи деп кӧргӧн. Слер де Петр чылап, санааркап турган болороор. Нениҥ учун дезе христиан болгон кийнинде слерди не сакып турганын билбей јадаар. Андый болзо, Иеговага, Иисуска ла улуска сӱӱжигерди тыҥыдарга албаданыгар. Бу сӱӱш слерди Иисустыҥ «улус тудаачы» болзын деген кычыртузын алынарга кӱӱнзедер (Матф. 22:37, 39; Иоанн 14:15).

6. Бисти јарлаарга база не кӱӱнзедет?

⁶ Јарлаарга кӱӱнзедип турган база бир канча шылтактар кӧрӱп ийектер. Бис Иисустыҥ: «Барыгар, ончо калыктарды ӱредигер» — деген јакарузын бӱдӱрерге кӱӱнзейдис (Матф. 28:19, 20). Анайда ок улусты «кӱдӱчизи јок койлордый тӱймеп, тозуп калгандар» ла олорго Каандык керегинде чындыкты билери сӱреен керектӱ деп оҥдоп турганыстаҥ улам јарлап јадыс (Матф. 9:36). Иегова «ончо улус аргадалып, чындыкты билип алзын деп» кӱӱнзеп јат (1 Тим. 2:4).

7. Римдегилерге 10:13—15-теги бичилген сӧстӧр јарлаар иш јаан учурлу деп канайып кӧргӱзет?

⁷ Јарлаар иш улустыҥ јӱрӱмин аргадап турган деп оҥдоп турзаас, бис бу иште туружарга кӱӱнзеерис. Балыкчы тудуп алган балыгын садып ийет эмезе кандый бир курсак белетейт. Је балыкчыга кӧрӧ, бис улусты аргадаарга «улус тудаачылар» болуп калганыс. (Римдегилерге 10:13—15 кычырыгар; 1 Тим. 4:16).

8, 9. Балыкчыга нени билер керек ле нениҥ учун?

⁸ Иисустыҥ ӧйинде израиль укту балыкчыга талайдаҥ кандый балык тударын билер керек болгон (Лев. 11:9—12). Анайда ок ого шӱӱнди кайдӧӧн таштарын билер керек болгон. Балык кӧп сабада кӧп курсакту ла ого јарагадый јерде јӱрет. А балыкчыга кандый ӧйдӧ балыктарын билер керек пе? Эйе, билер керек. Бир катап, Тымык теҥистиҥ ыраак ортолыгында иштеген миссионерде, бу ортолыкта јадып турган акала јилбилӱ куучын болгон. Бу ака оны балыктап кычырарда, миссионер: «Эртен тураныҥ тогус саадында јолугып ийек» — деп айткан. Бого ака: «Јок, мынайып неме болбос. Эмезе уйуктаар эмезе балык тудар керек» — деп айткан.

⁹ Анайып ла баштапкы чактыҥ «улус тудаачылары, «балыгы кӧп јерлерди» талдап, ары «кӧп балык» тудуп алгадый ӧйдӧ келетен. Темдектезе, Иисустыҥ ӱренчиктери айылдар сайын, саду эдип турган јерлерде, ӧргӧӧдӧ лӧ синагогаларда јарлап туратан (Ап. ижи 5:42; 17:17; 18:4). Биске де, улус качан айылында болуп турган, а качан ӧскӧ јерде болуп тургандарын билер керек. Сӱӱнчилӱ јарды канча ла кире кӧп улус уксын деп кӱӱнзеп турган болзоос, биске эпчил болуп, јарлаарга келишкедий јерди ле ӧйди талдап турар керек (1 Кор. 9:19—23).

10. Иегованыҥ организациязы бисти кандый јепселдерле јеткилдейт?

¹⁰ Балыкчыга балык тударга јарагадый јепселдер керек ле ого бу јепселдерле тузаланып билер керек. Бистиҥ јарлаар ижиске јарагадый јепселдер база керектӱ. Бу јепселдерле биске тузаланып билер керек. Иисус бойыныҥ ӱренчиктерине сӱӱнчилӱ јарды канай јарлайтанын јакшы јартап берген. Ол ӱренчиктерине нени алатанын, кайда јарлайтанын ла нени айдатанын айдып берген (Матф. 10:5—7; Лука 10:1—11). Бӱгӱнги кӱнде Иегованыҥ организациязы биске јакшы јарлаарга болужып турган јепселдерле јеткилдеп јат *. Анайда ок бисти бу јепселдерле тузаланарга ӱредип јат. Мындый ӱредӱнеҥ  улам бис јакшы јарчылар ла јакшы кӱдӱчилер болуп каладыс (2 Тим. 2:15).

11. «Улус тудаачыларга» нениҥ учун јалтанбас болор керек?

¹¹ Балыкчыларга јалтанбас болор керек. Талайдагы кӱн-ай кандый болорын билбезиҥ. Тымык талайда кенетийин јоткон боло берердеҥ айабас. Кӧп саба балыкчыларга тӱнде талайга чыгарга келижет. «Улус тудаачыларга» база јалтанбас болор керек. Бис јарлап, улуска бистер Иегованыҥ Керечилери деп айдып турзаас, биске «јоткондор» табарардаҥ айабас. Јуук улузыс удурлажар, најыларыс каткырыжып, шоодор ло кезик улус бистиҥ јарды угарга кӱӱнзебес. Је бис бого кайкабай јадыс. Иисус ӱренчиктерин бистиҥ јарды јаратпай турган улуска јарлаар деп озодоҥ айдып салган (Матф. 10:16).

12. Иисус Навин 1:7—9-ла болзо, јалтанбас болорго биске не болужат?

¹² Јалтанбас болорго не болужар? Баштапкызында, Иисус теҥеридеҥ јарлаар ишле башкарып турган деп бир де алаҥзыбагар (Иоанн 16:33; Ачыл. 14:14—16). Экинчизинде, Иегова слерди кичеер деп берген сӧзине бӱдӱмјигерди тыҥыдыгар (Матф. 6:32—34). Бӱдӱмјигер канча ла кире бек болзо, ончо ло кире јалтанбас болороор. Петр, Андрей, Иаков ло Иоанн балык тудар ижин артыргызып, Иисустыҥ ӱренчиктери болуп калганыла тын бӱдӱмјизин кӧргӱскен. Слер де најылараарга, јуук улузаарга Иегованыҥ Керечилериле Агару Бичикти ӱренип, јуунныҥ  туштажуларына јӱрӱп баштаганаарды айдып, тыҥ бӱдӱп турганаарды кӧргӱскенеер. Иегованыҥ чындык нормалары ла јӱрерге, слерге кылык-јаҥаарды ла јӱрӱмеерди солыырга келишкен болор. Бого бӱдӱмји ле јалтанбас база керек болгон. Јалтанбазыгарды оноҥ тыҥыдып турзагар, бу сӧстӧрдиҥ чынына оноҥ тын бӱдӱмјиленереер: «Сен кайдӧӧн дӧ барзаҥ, Иегова Кудайыҥ кожо болор». (Иисус Навин 1:7—9 кычырыгар *.)

13. Шӱӱп сананары ла мӱргӱӱл јалтанбас болорго слерге канайып болужар?

¹³ Јалтанбас болорго база нени эдер керек? Јалтанбас болорго мӱргӱӱр керек (Ап. ижи 4:29, 31). Иегова слердиҥ мӱргӱӱлдеригерге каруу берип, слерди качан да артыргыспас. Ол слерге болужарга јаантайын јанаарда болор. Анайда ок Иегова алдындагы ӧйдӧ бойыныҥ ишчилерин канайып аргадаганын, шӱӱп сананарга јараар. Бого коштой ол слерге уур-кӱчтереерди ӧдӱп чыгарга канайып болушканын ла јӱрӱмеерди солыырга канайып ийде-кӱч бергенин, эске алынып туругар. Бир де алаҥзыбагар, бойыныҥ албатызын Кызыл талай ажыра кечирген Кудай слерге Христостыҥ ӱренчиги болорго болужар (Чыг. 14:13). Слердиҥ бӱдӱмјигер сарнаачыныҥ бӱдӱмјизиндий ок болзын. Ол мындый сӧстӧр бичиген: «Иегова мен учун болордо, коркыбазым. Кижи меге нени эдер?» (Сар. 118:6).

14. Масаэ ле Томоё эјелердиҥ темдери слерди неге ӱредет?

¹⁴ Анайда ок јалтанбас болорго Иегованыҥ ишчилериниҥ темдери болужат. Иегова уйалчаҥ ака-эјелерге јалтанбас болорго болушкан. Темдектезе, Масаэ деген атту уйалчаҥ эје, качан да јарлап болбозым деп сананган. Ого таныш эмес улусла куучындажарга коркышту кӱч болгон. Бу ого бийик стенеге чыгарга тӱҥей болгон. Ол Кудайды ла улусты сӱӱрге сӱреен тыҥ албаданган. Масаэ, бу телекейге коркышту ас ӧй артып калган деп шӱӱп сананып, оныҥ јарлайтан кӱӱни тыҥызын деп мӱргӱген. Ол уйалчаҥ болгонын јеҥип, текши пионер де болуп иштеп баштаган. Иегованыҥ јаҥы јарчыларга јалтанбас болорго болужып турганын база бир темин кӧрӱп ийектер. Томоё деп атту эје, јаҥы ла јарчы болуп, јарлап барган тушта, баштапкы ла тураныҥ ээзи: «Иегованыҥ Керечилери ле куучындажар кӱӱним јок!» — деп кыйгырып, эжикти јабып ийген. Је Томоё эје бир де коркыбаган. Ол кожо јарлап турган јарчыга мынайып айткан: «Сен уктыҥ ба? Мен неме айткалагымда да ол мени Иегованыҥ Керечили деп оҥдоп ийген. Мен тыҥ сӱӱнип јадым!» Эмди Томоё эје текши пионер болуп иштейт.

15. Дисциплина ол не ле христиандарга ол нениҥ учун керектӱ?

¹⁵ Дисциплина јогынаҥ балыкчы кӧп балык тудуп болбос. Бир словарьда, дисциплина ол «кандый бир ишти бӱдӱрерге, бойын албадап билери» деп айдылат. Дисциплина балыкчыга эрте турарга, бастыра ишти этпегенче талайда артарга ла јаман ай-кӱнди де кӧрбӧй иштенерге керектӱ. Бис учына јетире чыдажарга ла берилген јакылтаны једимдӱ бӱдӱрерге турган болзоос, бойысты дисциплинага база ӱредер керек (Матф. 10:22).

16. Бойысты дисциплинага ӱредерге не болужар?

¹⁶ Дисциплина энедеҥ чыкканы ла берилбеген. Оныҥ учун бис јеҥил јолло јӱрерге  јадыс. Дисциплинага ӱренерге бойын тудуп билер керек. Айдарда, биске кӱч болуп турган немеге ӱренип аларга болуш керек болот. Иегова биске мындый болушты агару тыны ажыра берет (Гал. 5:22, 23).

17. 1 Коринфтегилерге 9:25—27-ле болзо, Павел бойын дисциплинага ӱредерге нени эткен?

¹⁷ Апостол Павел бойын дисциплинага ӱредип салган кижи болгон. Је ого чын керектер эдерге эди-каннын согорго келишкен деп ол сӱрлеп айткан. (1 Коринфтегилерге 9:25—27 кычырыгар.) Павел христиандарды бойлорын дисциплинага ӱредип, «ончо немени аайлу-башту этсин» деп кычырган (1 Кор. 14:40). Биске Иеговага оноҥ ло ары иштеерге, ол тоодо јаантайын јарлаарга ла улусты библиялык чындыкка ӱредерге, дисциплина керек (Ап. ижи 2:46).

18. Иегова бистиҥ ижисти качан једимдӱ деп кӧрӧт?

¹⁸ Балыкчыныҥ ижиниҥ једими кӧп балык тутканынаҥ болот. Је јарлаар иштиҥ једими канча кире кижиге Иегованыҥ Керечилери болорго болушканыстаҥ камаанду деп сананбай јадыс (Лука 8:11—15). Бис сӱӱнчилӱ јарды оноҥ ло ары јарлап, улусты ӱредип турзаас, теҥеридеги Адабыс бистиҥ ижис једимдӱ деп кӧрӧт. Нениҥ учун дезе анайып ого ло оныҥ Уулына сӧсуккурысты кӧргӱзедис (Марк 13:10; Ап. ижи 5:28, 29).

19, 20. Нениҥ учун шак ла эмди јарлаар керек?

¹⁹ Кезик ороондордо, балыкты јылдыҥ јӱк ле кандый бир ӧйинде тударга јараар. Оныҥ учун балыкчыларга анчада ла балык тудатан ӧй ӧткӧлӧктӧ тӱргендеер керек. «Улус тудаачыларга» база тӱргендеер керек. Нениҥ учун дезе бу телекейдиҥ учы коркышту капшай јууктап јат! Улусты аргадайтан ӧй чек ас артып калган. Оныҥ учун бу кижи аргадайтан учурлу иште туружатан ӧйди чӧйбӧгӧр лӧ јакшы айалгаларды сакып алар керек деп сананбагар (Эккл. 11:4)

²⁰ Эмди ле нениҥ учун јарлаар керек деп сананар. Агару Бичиктиҥ билгирлерин кӧптӧдӧр, јалтанбас болуп, бойоорды дисциплинага ӱредигер. Бастыра јердиҥ ӱстинде сегис миллионноҥ кӧп улус «улус тудаачылар» болуп калган. Олорго кожулыгар, ол тушта Иегованыҥ берип турган сӱӱнчизин слер алараар (Неем. 8:10). Иегова јарлаар иш божогон деп айтпаганча, бу иште эрчимдӱ туружарга бек сананып алыгар. Келер јӧрмӧлдӧ, биске Каандык керегинде сӱӱнчилӱ јарды јарлаарга, шӱӱп алганысты тыҥыдарга не болужарын шӱӱжип ийерис.