1. Mihadakay ci Yis to maanan satahidang to sepat mifotingay hani? Samaanay ko caˈof nangra hani?

CI Pitiro, ci Anteli, Yakop aci Yohani na mifotingay ko tayal. Cecay romiˈad, mitahidangan ni Yis cangra saan pasowal: ‘Ka pikotod takowanan, padamaen ako kamo malo milifokay to tamdaw a mifotingay,’ * maedeng fahkaay cangra itiya. Samanay ko caˈof nangra hani? Sanay ko Fangcalay Cudad: ‘Tangsolay cangra misawad to tafokod a mikotod cingranan.’ (Matay 4:18-22) Oniya saˈosi o mamifalic to kaˈorip nangra, mikitiya cowato ko foting ko lalepelen nangra, o ‘maˈoripay a tamdaw.’ (Luka 5:10 ato roma pihongyak) Anini, mihadakay ci Yis to satahidang i maolahay to soˈlinay kimad a tamdaw. (Matay 28:19, 20) Maharekayto kiso micada to satahidang ningra, malo ‘milifokay to tamdaw a mifotingay’ han?

2. ˈAyaw no malo mitosilay i, hano sasongilaˈen iso a misimsim hani? O cima ko mamisongilaˈ misimsim malo mitosilay hani? Hano mamalecad kiso ci Pitiroan ato cafay ningra misongilaˈ misimsim ngaˈ malo mitosilay hani?

² Halafinayto kiso minanam to Fangcalay Cudad alatek, hanaca iraay ko kafalic no kaˈorip. Nohatini, misimsimay kiso mamalo mitosilay hokira. Cisasaayho ko harateng iso alatek. Aka matoled, o kacisasa iso paihkalay, o kalimlaan a sasaˈosien iso konini. Sowal no Fangcalay Cudad, mihadak ci Yis to satahidang  i, ci Pitiro ato cafay ningra ‘tangsolay’ misawad to tafokod a mikotod ci Yisan. Kawra oniya pisaˈosi nangra cowa ko macalohay, ˈayaw no enem folad, mafanaˈayto cangra ci Yisan to ci Misiya cingra. (Yohani 1:35-42) Malecaday kiso cangranan alatek, adihayay ko mananamay pakayni ci Yihofaan aci Yisan a sifanaˈ, makalimayho sapiingidaw ci Yihofaan, kawra cacipinangho kiso ngaˈ misaˈosi malo mitosilay. Mihaenay, ci Pitiro ato cafay ningra hano ngaˈay malo ‘milifokay to tamdaw a mifotingay’ hani?

3. Itini maanan a sepat pakayraan padadotoc kiso a macakat, wa matongal ko kalim a micada to satahidang ni Yis hani?

³ Ci Pitiro ato cafay ningra fanekfekay matayal, iraay ko sifanaˈ, tada timoloay cangra, miˈimeray to niyah. Malo ‘milifokay to tamdaw a mifotingay’ ikor i, oniya sepat capeling padamaay cangranan malaˈosi ko demak. Oniya lalakaw wa milengo sasamaan kita itini toniya sepat pakayraan padadotoc a macakat, malo ngaˈayay a mitosilay.

4. Hano malo mifotingay ci Pitiro hani?

⁴ O mifotingay ko tayal ni Pitiro, kawra pakayra cingranan, mifoting cowa ko tayal aca, tada maolahay cingra a mifoting. (Yohani 21:3, 9-15) Ikor, malo ‘milifokay to tamdaw a mifotingay,’ maolahay to mitosilay a tayal. Itini pipadama ni Yihofa, malaˈosiay ko mitosilay a tayal ni Pitiro.—Dmak 2:14, 41.

5. Mikitini Luka 5:8-11, hano matalaw ci Pitiro hani? Ano irako mahecaday a harateng ita, ngaˈay samaan ko hademak hani?

⁵ Mitosil kita pakayniay kaolah ci Yihofaan, o sakakaay a ˈicel ita a mitosil konini. Ano maolah kita ci Yihofaan, soˈlin cowa ka ngaˈay ko niyah saan kita miharateng, cowa ko mamisawad toniya tayal. Mitahidang ci Yis ci Pitiroan pasowalay cingranan: “Aka matalaw.”  (ˈOsien ko Luka 5:8-11.) Cowa ka talaw ci Pitiro malo nisawawaan ni Kristo tahalifa to tatiihay a demak, ao maˈaraw ningra ko pidemak ni Yis to kafahkaan padama cingranan adihay ko malepelay a foting, fahkaan nanay, awaay ko tatodong no niyah malacafay ci Yisan matayal saan miharateng. Malecaday kiso ci Pitiroan a matalaw alatek, calemcem to caka pakafilo to ˈinorong no Krisciyang. Ano mahaenay, tongalen ko kaolah ci Yihofaan, ci Yisan ato tao, mihaen wa irato ko ˈicel iso, makahi micada to satahidang ni Yis, malo ‘milifokay to tamdaw a mifotingay.’—Matay 22:37, 39; Yohani 14:15.

6. Iraayho ko maanan lalangian ita a mitosil hani?

⁶ Cowa ko kaolah aca ci Yihofaan, iraayho ko roma lalangian ita a malingad mitosil. Sanay ci Yis: ‘Kalingad kamo, palanisawawaan no mako ko polong no kasafinawlan,’ makalimay kita midofdof to limoˈot ningra. (Matay 28:19, 20) Roma i, ˈalomanay tamdaw ‘masamsamay, awaay ko pitiˈeran,’ misaaliay sakafanaˈaw to kimad no Hongti Kitakit. (Matay 9:36) Mitokelay ci Yihofa mafanaˈ to soˈlinay kimad ko masakenaay a tamdaw, salikor ngaˈay malidong.—1 Timoti 2:4.

7. Mikitini Loma 10:13-15 mahapinangay ita hano masakalimlaan ko mitosilay a demak hani?

⁷ Maharateng to ngangaˈay milidong to ˈorip no tamdaw ko mitosilay tayal, matongalay ko kalim ita a mitosil. Cowa kalecad kita to mifotingay, mifoting ko tamdaw o papacakayen anca kakaenen, “milepet” kita to tamdaw o mamilidong to ˈorip nangra.—ˈOsien ko Loma 10:13-15; 1 Timoti 4:16.

8-9. O mamafanaˈ ko mifotingay to maanan hani? Misamanay?

⁸ Itini lintad ni Yis, o mifotingay no Israil mamafanaˈ to masamanay a foting ko mamalepel nangra. (Lifi 11:9-12) O mamafanaˈ cangra aicowa a mifoting. Tocerid materekay ko foting i kaolahan nira a kitiraan, ato adihayay ko kakaenen a kitiraan. Mafanaˈ to hacowa a tatokian mifoting masakalimlaan. Kinacecayay, cecay itiniay Taypingyang potipot a salikaka mitahidangay to milakowitay to riyar mitosilay malacafay a mifoting. Sanay koya milakowitay to riyar mitosilay: “Nocila papacem 9 ko toki masasoˈaraw kita.” Sanay ko salikaka pacaˈof: “Cowa ka fanaˈ kiso! Sapilepelaw to foting cowa ka itini kangaˈayan ita a toki, aitini sangaˈayay milepel to foting a toki ko piliˈen.”

⁹ Itini saka 1 hahekalan, ‘milifokay to tamdaw a mifotingay’ wa mikilim to matatodongay a toki ato kitiraan a mitosil to tamdaw. Tinakoen, o nisawawaan ni Yis tayraay i fangcalay sefi, kasaˈopoan, icifa a mitosil, pakalomalomaˈayho a milasil to ngaˈayay lihaf. (Dmak 5:42; 17:17; 18:4) Malecaday, cacipinang kita to pinangan no mitosilan a kilac, salalangien ko pinangan nangra a misalof, itini kairaan no tamdaw a toki ato kitiraan a mitosil.—1 Korinto 9:19-23.

10. O likakawa ni Yihofa patadoay kitaanan misaday to maanan lalosidan hani?

¹⁰ Sapilepelaw to foting ko mifotingay kalimlaan ko ngaˈayay lalosidan, mafanaˈho a misaka dademak. Malecaday, ano mitosil kita kalimlaan ko matatodongay a lalosidan, mafanaˈho a misaka dademak. Pakayni sasamaan malo ‘milifokay to tamdaw a mifotingay,’ ihkalay ko sowal ni Yis to nisawawaan, ano mitosil miˈorong to maanan, o manan ko hasowal, tatalacowa a mitosil. (Matay 10:5-7; Luka 10:1-11) Anini, misadayay ko likakawa ni Yihofa to Sapasifanaˈ a Lalosidan, adihayay ko ciepocay a lalosidan. * Pasifanaˈayho  ko likakawa no Kawas kitaanan sasamaan misaka dademak toniya lalosidan. Padama kitaanan masalof to inaneng a mitosil. Matongal ko pakasoˈlin ita a mitosil.—2 Timoti 2:15.

11. O ‘milifokay to tamdaw a mifotingay’ hano misaali to timolo hani?

¹¹ Misaaliay to timolo ko mifotingay, samanen awaay ko pinang to romiˈad i riyar, latekay fahal sanay ira ko faliyos. Misalafiiyayho a matayal ko mifotingay. ‘Milifokay to tamdaw a mifotingay’ malecaday misaali to timolo. Misatapang kita mitosil, pasowal to tao o Misawacayay Tamdaw ni Yihofa ko niyah, misafelitay ko paro no lomaˈ alatek, milikafay ko widang alatek, caay kakahi mitengil ko mitosilan a tamdaw. Kawra, tahalifa kita to malecaday o ‘faliyos’ a pisafelit cowa ka fahkaen kita. Maharekayto ci Yis a pasowal, malingad ko nisawawaan ningra mitosil o tatahalifa to pisafelit.—Matay 10:16.

12. Pakayni Yosuwa 1:7-9, sasamaan kita palahad to timolo hani?

¹² Sasamaan kiso palahad to timolo hani? Saka 1, pakasoˈlin to itiniay i kakarayan ci Yis mikayat to mitosilay a tayal. (Yohani 16:33; Paˈarawan 14:14-16) Saka 2, pakasoˈlin to dadimokosen ni Yihofa kiso. (Matay 6:32-34) Ano pakasoˈlin kiso toniya tosa, wa matongal ko timolo. Ci Pitiro ato cafay ningra misawad to mifotingay a tayal mikotod ci Yisan i, paihkalay to taˈangayay a pakasoˈlin. Malecaday, pasowalen iso ko paro no lomaˈ ato widang malacafay kiso to Misawacayay Tamdaw  ni Yihofa a minanam to Fangcalay Cudad halo mirienangay to saˈopo, paihkalay to iraay ko pakasoˈlin iso. Sapitooraw to moecelay palinian ni Yihofa, taˈangayay ko kafalic iso i nokaˈorip alatek, paihkalay konini to iraay ko pakasoˈlin ato timolo iso. Padadotoc kiso misaˈicel palahad to timolo, wa ngaˈay pakasoˈlin, ‘ano talacowato kiso, wa kalacafay ko Kawas iso ci Yihofa tisowanan.’—ˈOsien ko Yosuwa 1:7-9.

13. Mitolon ato midotim hano ngaˈay padama tisowanan palahad to timolo hani?

¹³ Ngaˈayho kiso midemak to maanan a palahad to timolo hani? Ngaˈay kiso mitolon ci Yihofaan, micangacang Cingranan pafeli to timolo ato ˈicel tisowanan. (Dmak 4:29, 31) O papacaˈofen ni Yihofa ko satolon iso, padotoc a midama tisowanan, cowa ko fafalahen Ningra kiso. Ngaˈay misongilaˈ a miharateng kiso, na padamaan ni Yihofa ko ˈalomanay tamdaw, na padamaay Cingra tisowanan miremo to adihayay a pasangaray, ira ko ˈicel iso midemak to taˈangayay kafalic. Na mikeridan ni Yihofa ko finawlan Ningra mitaˈlif to Kahngangay a Riyar, o papadama tisowanan malo nisawawaan ni Kristo. (Kasadakan 14:13) Mihaenay, wa ngaˈay kiso malecad o mitiliday to ˈOlic matomes ko pakasoˈlin a somowal: “Itihiay ako ci Yihofa, cowa ko mamatalaw kako. Ngaˈay ko tamdaw misamaan takowanan saw?”—ˈOlic118:6.

14. Mikitini nalifetan ni Cence aci Cei mananam iso ko maanan hani?

¹⁴ O roma pakayraan palahad to timolo i, nengnengen samanay ci Yihofa padama to halingodoay a tamdaw, malo timoloayto cangra. Tinakoan ni Cence fafahiyan salikaka. Tada halingodoay cingra, cato ka timolo mitosil to tamdaw sanay. Pakayra cingranan, pasangaray masasowal to kafahalan a tamdaw, oniya pasangar malecaday o mihawangay to ˈakawangay ˈadipel. Orato, misaˈicelay cingra mitongal to olah i Kawas ato tao, midotim to macalohay ko pakayraan anini, mitolonayho to Kawas padama cingranan makalim a mitosil. Telocto, cowato ka talaw cingra, panganganayho to miceriday misakafahay. Ngaˈayay ci Yihofa padama to faelohay mitosilay timolo a mitosil, nengnengen ko nalifetan no fafahiyan salikaka ci Cei. Sakinacecay pakalomalomaˈ cingra a mitosil i, mariˈangay koya cilomaˈay sanay miceliˈ: “Cowa kaolah kako masasowal to Misawacayay Tamdaw ni Yihofa!” Dotoc saˈicel sanay miˈedef to fawahan. Cowa katalaw ci Cei, sanay pasowal to cafay mitosil: “Matengilay iso han? Cowaho ka pasowal kako mafanaˈayto cingra to Misawacayay Tamdaw ni Yihofa kako! Tada kahemekanto!” Nohatini, o misakafahayto ko salikaka ci Cei.

15. Ano pasangar ko mitosilay a tayal i, ngaˈay kita mikitini mifotingay minanam to manan? Mihaen to demak hano masakalimlaan hani?

¹⁵ O malaˈosiay a mifotingay kalimlaan ko miˈimeray to niyah a ˈicel, mihaen ngaˈ ngaˈay ko midemakan, tinakoen pacerem a lomowad, padotoc a milaheci to demak, mihadidi to tatiihay a romiˈad. Malecaday, kalimlaan ko piˈimer to niyah, mihaen ngaˈ tahatolas a mihadidi, milahci to mitosilay a tayal.—Matay 10:22.

16. O maanan ko ngangaˈay padama kitanan palahad to miˈimeray to niyah hani?

¹⁶ Cowa ka hofochan mafanaˈayto kita a miˈimer to niyah, maolahay to sinowayay a tayal. Mihaenay, misaaliay kita to sapadama ni Yihofa. Pafeliay Cingra kitanan to fangcalay saocor, padama kitaanan tanektek midemak to pasangaray a demak.—Kalatiya 5:22, 23 ato roma pihongyak.

17. Sowal no tarokos ci Pawlo 1 Korinto 9:25-27, samanay cingra palahad to miˈimeray to niyah hani?

 ¹⁷ O tarokos ci Pawlo o miˈimeray to niyah a tamdaw, kawra mihayiay cingra “misetiˈ to tireng no niyah” ho ngaˈ midemak to matatodongay a demak. (ˈOsien ko 1 Korinto 9:25-27.) Pakalalokay cingra to tao palahad to miˈimeray to niyah, “kao masinanotay ko demak namo a maemin.” (1 Korinto 14:40) Papalahad kita to miˈimeray to niyah, ngaˈ padadotoc a mirienang to midokoay ci Yihofaan a demak, mahawpay ko picerid mitosil ato pasifanaˈ to tamdaw mafanaˈ to soˈlinay kimad no Fangcalay Cudad.—Dmak 2:46.

18. Samaan ko hademak ita, itini pinengneng ni Yihofa o malaˈosiayto a mitosilay hani?

¹⁸ O mifotingay ano adihay ko malepelay a foting o malaˈosiay, kawra, o kalaˈosi ita cowa ko hakowaay ko mapadamaay a tamdaw micada to paputisem ko piˈarawan. (Luka 8:11-15) Ano padadotoc kita a midofdof ci Yihofaan ato wawa Ningra, padotoc a mitosil pasifanaˈ to tamdaw, itini pinengneng ni Yihofa o malaˈosiayto kita.—Marko 13:10; Dmak 5:28, 29.

19-20. Hano mameten ko toki nohatini a mitosil hani?

¹⁹ Itini roma pala, itini aca pina folad a tatokian ko mihaian no mikowanay a pifotingan. Mansa, ano mamahererek ko pifotingan a toki i, ˈifowaay ko mifotingay a mifoting. Malo ‘milifokay to tamdaw a mifotingay,’ malecaday ko masiˈayaway ita a pakayraan. Mamahererekto koniya lekakawa, cowato ka hakowa ko maˈosaway a toki, oha metmeten ita ko toki a mitosil, milidong to ˈorip no tao. Aka minayar eca ka pidemak, tahinito ka sinowayan no kaˈorip ngaˈ itiya a misatapang mitosil.—Patnakay 11:4.

²⁰ Nohatiniho palahad to kaolah a mitosil, tongalen ko kacipinang to Fangcalay Cudad, palahad to timolo, palahad to miˈimeray to niyah. Kalacafayen ko 800 efan ‘milifokay to tamdaw a mifotingay’ matayl, mihaen kiso wa ngaˈay milifok to sapafeli ni Yihofa a lipahak. (Nihimiya 8:10) Seteken ko falocoˈ misarocod mirienang to mitosilay a tayal, hanaca padadotoc fanekfek tahatolas. Dotoc a lalakaw wa milengo, o maanan a tolo pakayraan padama kitanan padadotoc milasil to ngaˈayay lihaf no Hongti Kitakit.