1. Иса дөрд балыгчыны нәјә дәвәт етмишди вә онлар неҹә һај вердиләр?

ИСА МӘСИҺИН шаҝирдләри олан Бутрус, Андреас, Јагуб вә Јәһја балыгчылыгла мәшғул иди. Тәсәввүр едирсиниз, Иса онлара: «Ардымҹа ҝәлин. Бундан сонра балыг јох, инсан тутаҹагсыныз *», дејәндә онлар неҹә мәәттәл галмышдылар? Бәс бу балыгчылар дәвәти гәбул етдиләр? Мүгәддәс Китабда јазылыб: «Онлар дәрһал торларыны атыб онун ардынҹа ҝетдиләр» (Мәт. 4:18—22). Бу гәрарлары онларын һәјатыны әбәдилик дәјишди. Шаҝирдләр бундан сонра балыг јох, «адам овладылар» (Лука 5:10). Бу ҝүн дә Иса Мәсиһ һәгигәти севән сәмими-гәлбли инсанлары ејни иши ҝөрмәјә дәвәт едир (Мәт. 28:19, 20). Бәс сиз Исанын дәвәтини гәбул етмисиниз?

2. Нәјә ҝөрә тәблиғчи олмаг гәрарына ҹидди јанашмалысыныз вә бу аддымы атмаға сизә нә көмәк едә биләр?

² Бәлкә дә, сиз Мүгәддәс Китабы мүәјјән вахтдыр өјрәнирсиниз. Артыг хош хәбәрин тәблиғчиси олмаг гәрарыны вермәк вахтыдыр. Әҝәр Исанын бу дәвәтини гәбул етмәјә тәрәддүд едирсинизсә, руһдан дүшмәјин. Бир тәрәфдән, тәрәддүдүнүз бу гәрарын ваҹиблијини дәрк етдијинизи ҝөстәрир. Дүздүр, Мүгәддәс Китабда дејилир  ки, Бутрус вә әмәкдашлары «дәрһал» торларыны атыб ҝетдиләр. Амма онлар бу гәрары дүшүнмәдән вермәмишди. Онлар алты ајдан чох иди ки, Исанын Мәсиһ олдуғуну өјрәнмиш вә буна иман ҝәтирмишдиләр (Јәһ. 1:35—42). Јәгин сиз дә Јеһова вә Иса Мәсиһ һагда бу вахта гәдәр хејли билик алмысыныз вә руһани ҹәһәтдән инкишаф етмәк нијјәтиндәсиниз. Амма тәблиғчи олмаг гәрарыны јахшыҹа өлчүб-бичмәк ҝәрәкдир. Ҝөрәсән, Бутруса, Андреаса вә диҝәрләринә гәрар вермәјә нә көмәк етмишди?

3. Һансы хүсусијјәтләр јахшы мүждәчи олмағыныза көмәк едә биләр?

³ Исанын илк шаҝирдләриндә шөвг, билик, ҹәсарәт вә низам-интизам вар иди. Шүбһә јохдур ки, бу хүсусијјәтләр онлара јахшы мүждәчи олмаға да көмәк етмишди. Бу мәгаләдә арашдыраҹағыг ки, јахшы тәблиғчи олмаг үчүн бу хүсусијјәтләрә неҹә јијәләнмәк олар.

4. Бутрус балыгчылыг иши илә нә үчүн мәшғул олурду?

⁴ Бутрус балыгчылыгла аиләсини доландырмаг үчүн мәшғул олурду. Амма ҝөрүнүр, о һәм дә бу пешәни севирди (Јәһ. 21:3, 9—15). О, мүждәчилик ишини дә севди. Јеһованын көмәјилә, Бутрус бу ишин дә пешәкары олду (Һәв. 2:14, 41).

5. Лука 5:8—11 ајәләринә әсасән, Бутрусу горхудан нә иди, бәс сиз бу ҹүр һиссләрә неҹә үстүн ҝәлә биләрсиниз?

⁵ Бизи тәблиғ етмәјә илк нөвбәдә Јеһоваја мәһәббәт тәшвиг едир. Өзүмүзү тәблиғ етмәјә јарарсыз һисс етсәк дә, мәһәббәтин сајәсиндә, бу һиссә галиб ҝәлә биләрик. Иса Мәсиһ Бутрусу мүждәчи олмаға дәвәт едәндә демишди: «Горхма!»  (Лука 5:8—11 ајәләрини охујун.) Бутрусу горхудан Исанын шаҝирди олмағын өзү илә ҝәтирәҹәји чәтинликләр дејилди. О, Исанын мөҹүзәси сајәсиндә нә гәдәр чох балыг тутдугларыны ҝөрүб һејрәтләнмишди вә өзүнү онунла әмәкдашлыг етмәјә лајиг билмәмишди. Јахуд, ола биләр ки, сиз Исанын шаҝирди олмаға нәләрин дахил олдуғу һагда дүшүнәндә һәјәҹан кечирирсиниз. Онда Јеһоваја, Иса Мәсиһә вә инсанлара мәһәббәтинизи артырын, беләҹә, Исанын дәвәтини гәбул етмәк истәјәҹәксиниз (Мәт. 22:37, 39; Јәһ. 14:15).

6. Бизи тәблиғ етмәјә һансы амилләр тәшвиг едир?

⁶ Бизи тәблиғ етмәјә тәшвиг едән башга амилләр дә вар. Биз Иса Мәсиһин «ҝедин вә... шаҝирд һазырлајын» әмрини јеринә јетирмәк истәјирик (Мәт. 28:19, 20). Һәмчинин ҝөрүрүк ки, инсанлар «јазыг вә дағыныг» һалдадыр, Аллаһын Падшаһлығы һаггында һәгигәти өјрәнмәјә мөһтаҹдыр (Мәт. 9:36). Јеһова истәјир ки, һәр ҹүр инсан һәгигәт барәсиндә дәгиг билијә јијәләнсин вә хилас олсун (1 Тим. 2:4).

7. Ромалылара 10:13—15 ајәләри тәблиғ ишимизин ваҹиблијини неҹә ҝөстәрир?

⁷ Тәблиғ ишинин һәјативаҹиб олдуғуну дүшүнмәк дә бу ишдә иштирак етмәк истәјимизи аловландыра биләр. Адәтән балыгчылар балығы ја јемәк, ја да сатмаг үчүн тутур, биз исә инсанлары онларын һәјатыны хилас етмәк үчүн «тутуруг». (Ромалылара 10:13—15 ајәләрини охујун; 1 Тим. 4:16.)

8, 9. Балыгчы нәји билмәлидир вә нәјә ҝөрә?

⁸ Исраилли балыгчы билмәли иди ки, һансы балығы тутмаг олар (Лав. 11:9—12). Һәмчинин онлары һарада тута биләҹәјини дә билмәли иди. Балыглар адәтән әлверишли су шәраитинин вә бол гиданын олдуғу јерләрдә јашајыр. Бәс балығы һансы вахтда тутмағын әһәмијјәти вар? Бәли. Ҝөрүн Сакит океан адаларында јашајан бир гардаш балыг тутмағын вахты һагда нә дејир. О, хүсуси тәјинатлы мүждәчини балыг тутмаға дәвәт едәндә һәмин мүждәчи она демишди: «Сабаһ сәһәр доггузда ҝөрүшәрик». Амма гардаш белә ҹаваб вермишди: «Билирсән, бу иш неҹәдир? Биз өзүмүзә раһат олан вахтда јох, балыг тутмаг үчүн әлверишли олан вахтда ҝетмәлијик».

⁹ Ејнилә, биринҹи әсрдәки шаҝирдләр билирдиләр ки, инсанлары һарада вә нә вахт тапмаг олар. Мисал үчүн, онлар мәбәддә, синагогда, базар мејданында вә ев-ев тәблиғ едирдиләр (Һәв. 5:42; 17:17; 18:4). Биз дә тәблиғ етдијимиз әразидәки инсанлары нә вахт вә һарада тапа биләҹәјимизи билмәлијик вә ҹәдвәлимизи буна ујғун гурмалыјыг (1 Кор. 9:19—23).

10. Јеһованын тәшкилаты бизи һансы вәсаитләрлә тәмин едир?

¹⁰ Балыгчынын лазыми ләвазиматлары олмалы вә онлардан истифадә етмәји баҹармалыдыр. Ејни шеј биз мүждәчиләрә дә аиддир. Иса Мәсиһ шаҝирдләринә хош хәбәрин тәблиғи илә бағлы ајдын ҝөстәришләр вермишди. Өзләри илә нә ҝөтүрүб-ҝөтүрмәсинләр, һара ҝетсинләр, нә десинләр — һәр шеји онлара баша салмышды (Мәт. 10:5—7; Лука 10:1—11). Бу ҝүн дә Јеһованын тәшкилаты бизә хидмәт үчүн чох еффектив тәлим вәсаитләри верир *. Һәмчинин онлардан истифадә етмәјин јолуну да өјрәдиб. Бу тәлим сајәсиндә даһа әминликлә вә мәһарәтлә тәблиғ етмәји өјрәнирик (2 Тим. 2:15).

11. Нәјә ҝөрә балыгчы кими, мүждәчиләрә дә ҹәсарәт лазымдыр?

¹¹ Балыгчылар ҹәсарәтли олмалыдыр. Адәтән онлар ҝеҹә вахты балыг тутурлар, үстәлик, һава шәраити дә гәфилдән дәјишә биләр, дәниздә фыртына гопа биләр. Ејнилә, «инсан тутан» биз мүждәчиләрә дә ҹәсарәтли олмаг ҝәрәкдир. Биз тәблиғ етмәјә башлајанда вә Јеһованын Шаһиди олдуғумузу дејәндә бәзән «фыртына» илә үзләширик: аилә үзвләримиз бизә гаршы чыхыр, дост-танышымыз ришхәнд едир, инсанлар тәблиғ етдијимиз хәбәри рәдд едир. Амма бүтүн бунлар бизи тәәҹҹүбләндирмир. Чүнки Иса Мәсиһ демишди ки, шаҝирдләрини әлејһдарлары арасында тәблиғ етмәјә ҝөндәрир (Мәт. 10:16).

12. Јушә 1:7—9 ајәләринә әсасән, ҹәсарәтинизи артырмаға нә көмәк едә биләр?

¹² Ҹәсарәтә неҹә јијәләнә биләрсиниз? Илк нөвбәдә, әмин олун ки, Иса Мәсиһ бу ҝүн ҝөјдән тәблиғ ишинә рәһбәрлик едир (Јәһ. 16:33; Вәһј 14:14—16). Һәмчинин Јеһованын сизин гајғыныза галаҹағына иманынызы ҝүҹләндирин (Мәт. 6:32—34). Иманыныз нә гәдәр ҝүҹлү олса, бир о гәдәр ҹәсарәтли олаҹагсыныз. Бутрус вә әмәкдашлары Исанын ардынҹа ҝетмәк үчүн доланышыг мәнбәјини атмагла бөјүк иман нүмајиш етдирмишдиләр. Сиз дә дост-танышыныза вә аилә үзвләринизә Јеһованын Шаһидләри илә Мүгәддәс Китабы өјрәнмәјә вә ибадәт ҝөрүшләриндә иштирак етмәјә башладығынызы демәклә бөјүк иман  ҝөстәрмисиниз! Шүбһәсиз, Јеһованын салеһ нормаларына ујғун јашамаг үчүн һәјат тәрзиниздә, давранышынызда көклү дәјишикликләр етмисиниз. Бунун үчүн дә иман вә ҹәсарәт ҝәрәк олуб. Ҹәсарәтиниз артдыгҹа әмин олаҹагсыныз ки, Аллаһыныз Јеһова һәр јердә сизинләдир. (Јушә 1:7—9 ајәләрини охујун.)

13. Дуа вә Јеһованын ҝөстәрдији көмәк һагда дүшүнмәк ҹәсарәтинизи неҹә артыра биләр?

¹³ Сизә ҹәсарәтинизи артырмаға даһа нә көмәк едә биләр? Јеһоваја бу һагда дуа един (Һәв. 4:29, 31). Јеһова дуаныза ҹаваб верәҹәк вә сизи һеч вахт тәрк етмәјәҹәк. О, јанынызда олуб, һәмишә сизә дајаг олаҹаг! Һәмчинин Јеһованын кечмишдә Өз хидмәтчиләринә неҹә дајаг олдуғу һагда дүшүнүн. Јахуд елә сизин өзүнүзә чәтинликләрин өһдәсиндән ҝәлмәјә, һәјатынызда дәјишикликләр етмәјә неҹә көмәк етдијини јадыныза салын. Әмин олун ки, халгыны Гырмызы дәниздән кечирән Јеһова сизә Мәсиһин шаҝирди олмаға көмәк едә биләр (Чых. 14:13). «Јеһова мәним тәрәфимдәдир, горхмарам, инсан мәнә нә едә биләр?» — сөзләрини дејән мәзмурчу кими, сиз дә Јеһоваја бел бағлајын (Зәб. 118:6).

14. Масаји вә Томојо адлы баҹыларын һадисәсиндән нә өјрәнмәк олар?

¹⁴ Һәмчинин Јеһованын тәбиәтҹә утанҹаг инсанлара неҹә ҹәсарәт вердији һагда дүшүнүн. Масаји адлы баҹынын нүмунәсинә нәзәр салаг. О, утанҹаг иди вә дүшүнүрдү ки, инсанлара етигады һагда һеч вахт даныша билмәз. Танымадығы инсанла данышмаг онун үчүн ашылмаз дивар кими иди. Буна ҝөрә Масаји Аллаһа вә инсанлара мәһәббәтини артырмаг үчүн әлиндән ҝәләни етмәјә башлады. О, тәблиғ ишинин һал-һазырда нә гәдәр тәҹили олдуғу һагда дүшүндү вә Јеһоваја дуа етди ки, үрәјиндә тәблиғ етмәк истәјини аловландырсын. Масаји горхуларыны ашды вә һәтта өнҹүл кими хидмәт етди. Јеһова јени тәблиғчиләрә дә ҹәсур олмаға көмәк етмәјә һазырды. Томојо адлы баҹынын нүмунәсинә нәзәр салаг. Баҹы ев-ев тәблиғ етмәјә башлајанда гаршылашдығы илк ев сакини онун үстүнә гышгырараг «Јеһованын Шаһидләри илә данышмаг истәмирәм» дејиб, гапыны чырпмышды. Бу, Томојону горхутмады. Ҝөрүн о, тәблиғ әмәкдашына нә деди: «Ешитдин, онун дедијини? Һеч ағзымы ачмамыш билди ки, Јеһованын Шаһидијәм. Чох севинирәм!» Томојо һал-һазырда өнҹүл кими хидмәт едир.

15. Низам-интизам нәдир вә нәјә ҝөрә бу, мәсиһи үчүн зәрури хүсусијјәтдир?

¹⁵ Јахшы балыгчы низам-интизамлы олур. Низам-интизамлы олмаг «инсанын өзүнү ҝөрүләси иши ҝөрмәјә мәҹбур етмәк баҹарығыдыр». Балыгчы сәһәр тездән дурмаг, пис һава шәраитинә бахмајараг, балыг тутмағы јарыда гојмамаг үчүн низам-интизамлы олмалыдыр. Бизә дә бу хүсусијјәт лазымдыр ки, дөзүм ҝөстәриб ишимизи баша чатдыраг (Мәт. 10:22).

16. Низам-интизамлы олмағы неҹә өјрәнә биләрик?

¹⁶ Низам-интизам баҹарығы инсана ирсән кечмир. Үстәлик, хисләтимиз асана гачмаға мејиллидир. Интизамлы олмаг үчүн өзүмүзә һаким олмағы өјрәнмәлијик. Одур ки, бизә чәтин ҝәлән иши ҝөрмәјә өзүмүзү өјрәшдирмәк үчүн көмәјә еһтијаҹымыз вар. Јеһова мүгәддәс руһу васитәсилә бизә бу саһәдә көмәк едир (Гал. 5:22, 23).

17. 1 Коринфлиләрә 9:25—27 ајәләриндә вурғуландығы кими, һәвари Булус низам-интизамлы олмаг үчүн нә етмишди?

 ¹⁷ Һәвари Булус низам-интизамлы инсан иди. О демишди ки, Аллаһын истәдији кими давранмаг үчүн бәдәнинә «ҹәфа вериб». (1 Коринфлиләрә 9:25—27 ајәләрини охујун.) Булус башгаларыны да тәшвиг едирди ки, һәр шеји «әдәб-әрканла вә низамла» етсинләр (1 Кор. 14:40). Биз дә Јеһоваја ибадәтдән галмамаг, о ҹүмләдән мүждәчилик ишиндә мүнтәзәм иштирак етмәк үчүн низам-интизамлы олмалыјыг (Һәв. 2:46).

18. Јеһованын ҝөзүндә бизи уғурлу едән нәдир?

¹⁸ Балыгчынын уғуру тутдуғу балығын мигдарына әсасән мүәјјән едилир. Амма бизим уғурумуз Аллаһын тәшкилатына ҝәтирдијимиз инсанларын сајы илә өлчүлмүр (Лука 8:11—15). Нә гәдәр ки хош хәбәрин тәблиғиндә вә шаҝирд һазырламаг ишиндә иштирак едирик, биз Јеһованын ҝөзүндә уғурлујуг. Чүнки биз Онун вә Исанын әмринә итаәт едирик (Марк 13:10; Һәв. 5:28, 29).

19, 20. Бу ҝүн тәблиғ етмәк үчүн һансы ҝүҹлү сәбәбимиз вар?

¹⁹ Бәзи өлкәләрдә јалныз мүәјјән ајларда балыг тутмаға иҹазә вар. Бу ҹүр өлкәләрдә балыгчылар баша дүшүр ки, балыгчылыг мөвсүмү сона чата-чатда бу иши ҝөрмәк даһа тәҹилидир. Бизи дә тәблиғ етмәјә тәшвиг едән ҝүҹлү сәбәб вар: бу дүнјанын сону сүрәтлә јахынлашыр! Һәјатлары хилас едән тәблиғ ишиндә иштирак етмәк үчүн лап аз вахтымыз галыб. Одур ки, бу мүһүм ишдә иштирак етмәји јубатмајын вә ја идеал вәзијјәтин јаранмасыны ҝөзләмәјин (Ваиз 11:4).

²⁰ Инди тәблиғ етмәк истәјинизи ҝүҹләндирмәјин, Мүгәддәс Китаб билијинизи артырмағын, ҹәсарәтли вә низам-интизамлы олмағын вахтыдыр! Бүтүн дүнјада тәблиғдә иштирак едән сәккиз милјондан чох мүждәчијә гошулараг Јеһованын бәхш етдији севинҹи дадын (Нәһ. 8:10). Бу ишдә там шәкилдә иштирак един вә иш битәнә гәдәр дајанмамаға гәти гәрарлы олун. Нөвбәти мәгаләдә Падшаһлыг һагда хош хәбәри тәблиғ етмәк әзмимизи горумағын үч јолу арашдырылыр.