1. (1) ?Ndɛ benin yɛ Zezi kan kleli jue trafuɛ nnan-ɔn? (2) ?Kɛ be tili ndɛ sɔ’n, ngue yɛ be yoli-ɔ?

ZEZI i sɔnnzɔnfuɛ Piɛli nin Andre nin Zaki ɔ nin Zan be tra jue be yo i atɛ. Cɛn kun’n, Zezi seli be kɛ: “An su min su, yɛ ń yó maan amún trá sran mun kɛ be fa tra jue’n sa.” Kɛ be tili ndɛ sɔ’n, atrɛkpa’n be nuan boli be wun. ?Sanngɛ ngue yɛ be yoli-ɔ? Biblu’n se kɛ: “Be ja nun lɛ’n, be yacili alie’n ɔ nin be si lɛ, kpɛkun be suli i su.” (Mat. 4:18-22) Ajalɛ nga be fɛli i lɛ’n ti’n, be mɛn dilɛ wafa’n kacili. Afin b’a traman jue kun, ‘sran mun yɛ be wa trali be’ siɛn’n niɔn. (Lik. 5:10) Andɛ’n, Zezi yia be nga be klo ndɛ nanwlɛ’n naan be di junman kunngba sɔ’n wie. (Mat. 28:19, 20) ?A sɔli yialɛ mɔ Zezi yia wɔ kɛ a tra sran mun kɛ be fa tra jue’n sa’n nun?

2. (1) ?Ngue ti yɛ sɛ sran kun waan ɔ́ káci jasin bofuɛ’n ɔ fata kɛ ɔ bu i sin kpa-ɔ? (2) ?Ngue yɛ ɔ kwla ukɛ i naan w’a fɛ i sɔ ajalɛ’n niɔn?

² Atrɛkpa’n, a suan Biblu’n nun like w’a di le nɲɔn kun yɛ a mian ɔ ɲin nanti like nga a suan’n su. Ɔ maan siɛn’n, ɔ fata kɛ a kaci jasin bofuɛ. Sanngɛ kɔlɛ’n, ajalɛ sɔ’n i falɛ nun’n a sisi ɔ bo. Sɛ ɔ ti sɔ sakpa’n, nán ɔ sa sin bubu wɔ. Afin i sɔ’n kle kɛ a wun i wlɛ kɛ ajalɛ sɔ’n ti cinnjin kpa. I yo, Biblu’n se kɛ kɛ Piɛli nin i janvuɛ’m be tili Zezi i ndɛ’n, “be ja nun lɛ’n” be yacili be lala’m be lɛ be suli i su. Sanngɛ ɔ fataman kɛ e bu i kɛ be kplili yɛ be fali ajalɛ sɔ’n niɔn. Afin be si Zezi w’a di anglo nsiɛn tra su yɛ be si kɛ i yɛ ɔ ti Mesi’n niɔn. (Zan 1:35-42) I wafa kunngba’n, atrɛkpa’n a si Zoova nin Zezi be su ndɛ kpanngban yɛ a kunndɛ kɛ á fá ɔ wun mántan Zoova kpa ekun. Sanngɛ ka naan w’a kaci jasin bofuɛ’n, ɔ fata kɛ a bu i sin kpa. ?Ngue yɛ ɔ ukali Piɛli nin Andre nin sran uflɛ wie mun naan b’a fɛ i sɔ ajalɛ’n niɔn?

3. ?Sɛ Biblu’n nun like suanfuɛ kun waan ɔ́ káci jasin bofuɛ’n, nzuɛn benin mun yɛ ɔ fata kɛ ɔ yi be nglo-ɔ?

 ³ Zezi i sɔnnzɔnfuɛ klikli’m be fuali kpa kɛ bé bó jasin fɛ’n, kpɛkun be si wafa nga be kwla di junman sɔ’n i kpa’n. Asa ekun’n, be yoli yakpafuɛ yɛ be miannin be ɲin kpa. Nzuɛn sɔ mɔ be yili be nglo’n ti’n, be kwla boli jasin fɛ’n i kpa. Ɔ kusu sɛ a kunndɛ kɛ á bó jasin fɛ naan á sí sran’m be like kle’n, ɔ fata kɛ a yi nzuɛn sɔ’m be nglo wie. Like suanlɛ nga nun’n, é wá kán wafa nga a kwla yi nzuɛn sɔ’m be nglo’n, i ndɛ.

4. ?Ngue ti yɛ Piɛli kacili jue trafuɛ-ɔ?

⁴ Piɛli tra jue yo i atɛ naan w’a kwla niɛn i awlobofuɛ’m be lika. Sanngɛ nɛ́n i ngba-ɔ. Ɔ klo junman sɔ’n i dilɛ kpa. (Zan 21:3, 9-15) Kɛ ɔ kacili jasin bofuɛ kusu’n, ɔ kloli junman sɔ’n i dilɛ kpa wie. Zoova fanngan nun’n, Piɛli sili jasin fɛ’n i bo kpa.—Yol. 2:14, 41.

5. (1) ?Kɛ nga Liki 5:8-11 fa kan’n sa’n, ngue ti yɛ srɛ kunnin Piɛli-ɔ? (2) ?Sɛ srɛ kun e wie’n, ngue yɛ ɔ kwla uka e-ɔ?

⁵ Be diman like nga ti yɛ e bo jasin fɛ’n be yalɛ. Be nun cinnjin kpafuɛ’n yɛle Zoova i klolɛ’n. Klolɛ mɔ e klo Zoova ti’n, kannzɛ e se e wun kɛ e siman junman sɔ’n i di’n, sanngɛ e kɛn i ndɛ e kle sran mun. I nun mɔ Zezi sé Piɛli kɛ ɔ kaci i sɔnnzɔnfuɛ’n, Zezi seli i kɛ: “Nán srɛ kun wɔ.” (An kanngan Liki 5:8-11 nun.) Nán kɛ Zezi i sɔnnzɔnfuɛ kacilɛ’n kun Piɛli i srɛ ti yɛ Zezi seli i sɔ-ɔ. Sanngɛ kɛ Zezi yili atrɛ mɔ Piɛli trali juejue kpanngban kpa’n, srɛ kunnin i. Ɔ maan ɔ seli i wun kɛ ɔ nin Zezi be kwlá diman junman. Afin ɔ nin i sɔ’n fataman. I sɔ ti yɛ Zezi seli i sɔ-ɔ. Ɔ kusu kɛ a bu like kwlaa ng’ɔ fata kɛ a yo naan w’a kaci Zezi i sɔnnzɔnfuɛ’n i akunndan’n, atrɛkpa’n srɛ  kun wɔ kɛ Piɛli sa. Sɛ ɔ ti sɔ’n, klo Zoova nin Zezi nin wɔ mantanfuɛ’m be kpa tra laa’n. I liɛ’n á fúa kpa kɛ á káci Zezi i sɔnnzɔnfuɛ wie.—Mat. 22:37, 39; Zan 14:15.

6. ?Ngue ti yɛ e bo jasin fɛ’n niɔn?

⁶ Maan e kan ninnge uflɛ nga ti yɛ e bo jasin fɛ’n, be ndɛ. Cɛn kun’n, Zezi seli kɛ: “Amun wɔ, amun yo maan nvlenvle’m be kwlaa be nunfuɛ’m be kaci min sɔnnzɔnfuɛ.” (Mat. 28:19, 20) Kɛ mɔ e kunndɛ kɛ é nánti ndɛ nga Zezi kannin’n su’n, i ti yɛ e bo jasin fɛ’n niɔn. Andɛ’n, sran’m be wun “ɲrɛnnɛn yɛ be sanndi lika’n nun kɛ bua mɔ be leman sran taman be’n sa.” E kunndɛ kɛ é úka be naan be si Ɲanmiɛn i Famiɛn diwlɛ’n i su ndɛ nanwlɛ’n i ti yɛ e bo jasin fɛ’n niɔn. (Mat. 9:36) Asa ekun’n, Zoova kunndɛ kɛ sran wafawafa kwlaa be ɲan be ti naan be wun ndɛ ng’ɔ ti nanwlɛ’n i wlɛ kpa.—1 Tim. 2:4.

7. ?Wafa sɛ yɛ ndɛ ng’ɔ o Rɔmunfuɛ Mun 10:13-15 nun’n, kle kɛ jasin fɛ bolɛ’n ti cinnjin kpa-ɔ?

⁷ Kɛ e wun i kɛ jasin fɛ ti’n sran’m be kwla ɲan be ti’n, i sɔ’n yo maan e kunndɛ kɛ é bó jasin fɛ’n é klé be. E kwla fa jasin fɛ bolɛ junman’n e sunnzun jue tralɛ junman’n. Kɛ jue trafuɛ kun tra jue’n, ɔ yo i atɛ annzɛ ɔ di. Sanngɛ e liɛ’n, like nga ti yɛ sɛ é kwlá sé’n, e “tra” sran mun annzɛ e kle be like naan be kaci Zezi i sɔnnzɔnfuɛ’n, yɛle kɛ e kunndɛ kɛ be ɲan be ti.—An kanngan Rɔmunfuɛ Mun 10:13-15 nun; 1 Tim. 4:16.

8-9. (1) ?Ngue yɛ ɔ fata kɛ jue trafuɛ kun si i-ɔ? (2) ?Ngue ti-ɔ?

⁸ Zezi blɛ su’n, ɔ fata kɛ Izraɛlifuɛ kun m’ɔ ti jue trafuɛ’n ɔ si jue wafa ng’ɔ kwla trɛ i’n. (Sau. 11:9-12) Asa ekun’n, ɔ fata kɛ ɔ si nzue’n i lika nga jue’m be sɔnnin lɛ kpa’n. Kpɛ sunman’n, ɔ le nzue’n i lika nga jue’m be klo i kpa’n. Kpɛkun nzue’n i lika nga aliɛ o lɛ’n, lɛ yɛ jue’m be ta kɔ-ɔ. Blɛ nga jue trafuɛ’n kɔ jue tralɛ kusu’n, ɔ ti cinnjin wie. Cɛn kun’n, ndɛ nga aniaan bian kun m’ɔ tran jenvie nga be flɛ i Pasifiki’n i lika kun nun’n kan kleli ngaliɛ difuɛ kun’n, ɔ kle sɔ weiin. Aniaan bian’n seli ngaliɛ difuɛ’n kɛ be ko tra jue. Kpɛkun ngaliɛ difuɛ’n tɛli i su kɛ: “Ń bá ainman nglɛmun dɔ ngwlan su.” Aniaan bian’n tɛli i su kɛ: “W’a wunman min ndɛ’n i wlɛ. Nán dɔ nga e bɔbɔ e klo kɛ é kɔ́ su’n, i su yɛ é kɔ́-ɔ. Sanngɛ dɔ nga sɛ e kɔ su’n, é ɲán jue kaka’n i su yɛ é kɔ́-ɔ.”

⁹ I wafa kunngba’n, Zezi i sɔnnzɔnfuɛ’m be kusu be boli jasin fɛ’n lika nga sran’m be o lɛ’n. Kpɛkun dɔ nga be si kɛ be kwla to sran mun’n, i su yɛ be boli jasin fɛ’n niɔn. I wie yɛle kɛ be ko boli jasin fɛ’n Ɲanmiɛn i sua’n, nin awlo mun, nin Zifu’m be Ɲanmiɛn sulɛ sua’m be nun. Kpɛkun be boli jasin fɛ’n gua’m be bo wie. (Yol. 5:42; 17:17; 18:4) E kusu, ɔ fata kɛ e si wafa nga be nga be o e jasin bowlɛ nun’n be yo be ninnge mun’n i kpa. Kpɛkun e bo jasin fɛ’n lika nga e kwla to sran’m be lɛ’n, ɔ nin dɔ nga e si kɛ e kwla to sran’m be awlo’n.—1 Kor. 9:19-23.

10. ?Ngue yɛ Zoova i anuannzɛ’n yo naan y’a kwla bo jasin fɛ’n i kpa-ɔ?

¹⁰ Ɔ fata kɛ jue trafuɛ kun ɲan jue tralɛ ninnge mun. Kpɛkun ɔ fata kɛ ɔ si be nun junman di. E kusu ɔ fata kɛ e ɲan ninnge nga e kwla fa bo jasin fɛ’n yɛ maan e si wafa nga e kwla fa be e di junman kpa’n. Zezi kannin wafa ng’ɔ fata kɛ i sɔnnzɔnfuɛ’m be bo jasin fɛ’n i ndɛ kleli be. Ɔ kleli be like ng’ɔ fata kɛ be fa’n nin like ng’ɔ fataman kɛ be fa’n, nin lika ng’ɔ fata kɛ be wɔ lɔ’n, ɔ nin ndɛ ng’ɔ fata kɛ be kan’n. (Mat. 10:5-7; Lik. 10:1-11) Andɛ’n, Zoova i anuannzɛ’n fa ninnge kwlaa nga e kwla fa bo jasin fɛ’n man e. * Kpɛkun ɔ kle e wafa nga e kwla fa  ninnge sɔ mun e di junman’n. I sɔ’n ti’n, e si jasin fɛ’n i bo kpa yɛ kɛ é bó jasin fɛ’n srɛ kunman e.—2 Tim. 2:15.

11. ?Ngue ti yɛ ɔ fata kɛ be nga be bo jasin fɛ’n be yo yakpafuɛ-ɔ?

¹¹ Ɔ fata kɛ be nga be tra jue be yo i atɛ’n, be yo yakpafuɛ. Afin ɔ ju wie’n, lika’n kwla ka lɛ kaci kpɛ kunngba. Wie liɛ kusu be di junman kɔnguɛ yɛ seke kwla ka lɛ kpɛ jenvie’n su. Be nga be bo jasin fɛ’n kusu’n, ɔ fata kɛ be yo yakpafuɛ wie. Afin kɛ e bo jasin fɛ’n i bolɛ bo mɔ e yi i nglo kɛ e ti Zoova i Lalofuɛ’n, ɔ ju wie’n e osufuɛ’m be tanndan e ɲrun, e janvuɛ’m be yo e finfin yɛ sran’m be tieman ndɛ nga e kan’n. I sɔ’n kusu boman e nuan. Afin Zezi seli kɛ be nga i sɔnnzɔnfuɛ’m bé wá bó jasin fɛ’n klé be’n, bé tánndan be ɲrun.—Mat. 10:16.

12. ?Kɛ nga Zozie 1:7-9 fa kan’n sa’n, ngue yɛ ɔ kwla uka e naan y’a yo yakpafuɛ-ɔ?

¹² ?Ngue yɛ a kwla yo naan w’a yo yakpafuɛ-ɔ? Ɔ fata kɛ a lafi su kɛ, kɛ Zezi o nglo lɔ’n ɔ nian jasin fɛ bolɛ junman’n su. (Zan 16:33; Ngl. 14:14-16) Asa ekun’n, lafi su kɛ Zoova nían wɔ lika titi. (Mat. 6:32-34) Sɛ a lafi Ɲanmiɛn su kpa’n, á yó yakpafuɛ. Kɛ Piɛli nin i janvuɛ’m be yacili jue tralɛ mɔ be suli Zezi su’n, be yili i nglo kɛ be lafi Ɲanmiɛn su tankaan kpa. Ɔ kusu sɛ a se ɔ janvuɛ mun nin ɔ osufuɛ’m be kɛ Zoova i Lalofuɛ’m be kle wɔ Biblu’n nun like naan a kɔ be aɲia’m be bo’n, á klé kɛ a ti yakpafuɛ. Asa ekun’n, e si kɛ a kacili ɔ sa ninnge wie’m be yolɛ nun naan w’a kwla  nanti Zoova i mmla’m be su. I lɛ nun’n, a yi i nglo kɛ a lafi Ɲanmiɛn su naan a ti yakpafuɛ wie. Ɔ maan a kwla lafi su kɛ “lika kwlaa nga á kɔ’n” Zoova ɔ Ɲanmiɛn “jin ɔ sin.”—An kanngan Zozie 1:7-9 nun.

13. ?Wafa sɛ yɛ ninnge wie’m be su akunndan bulɛ’n, ɔ nin Ɲanmiɛn srɛlɛ’n kwla uka Biblu’n nun like suanfuɛ kun naan w’a yo yakpafuɛ-ɔ?

¹³ ?Ngue ekun yɛ a kwla yo naan w’a yo yakpafuɛ-ɔ? Srɛ Ɲanmiɛn naan ɔ wla ɔ yakpa. (Yol. 4:29, 31) Sɛ a srɛ Zoova’n, ɔ́ tɛ́ ɔ srɛlɛ’n su, ɔ́ súan ɔ bo titi yɛ ɔ su yiman wɔ ase le. Asa ekun’n, bu wafa nga Zoova deli i sufuɛ mun laa’n i su akunndan. Kpɛkun bu wafa nga blɛ kekle nun’n Zoova ukali wɔ’n, ɔ nin wafa ng’ɔ mannin ɔ wunmiɛn naan w’a kwla kaci ɔ sa ninnge wie’m be yolɛ nun’n, be su akunndan wie. A kwla lafi su kɛ Sran ng’ɔ deli i sufuɛ mun Jenvie ɔkwlɛ nun’n, ɔ kwla uka ɔ naan w’a kaci Zezi i sɔnnzɔnfuɛ. (Tul. 14:13) Jue tofuɛ kun seli kɛ: “ Anannganman jin min sin, n sroman like fi. ?Kɛ ngue like sa yɛ sran’m be kwla yo min ɔn?” (Jue. 118:6) A kwla lafi Zoova su sɔ wie.

14. ?Ngue yɛ aniaan bla Masaye nin Tomoyo be su ndɛ’n kle e-ɔ?

¹⁴ Like ng’ɔ kwla uka wɔ ekun naan w’a yo yakpafuɛ’n yɛle wafa nga Zoova ukɛli i sufuɛ wie mɔ be sa ɲan’n naan b’a yo yakpafuɛ’n, i su akunndan bulɛ’n. Maan e kan aniaan bla Masaye i ndɛ. Ɔ sa ɲan yɛ ɔ buli i kɛ ɔ su kwlá boman jasin fɛ’n le. Afin kɛ ɔ ko yo naan ɔ nin sran ng’ɔ simɛn i’n b’a koko yalɛ’n, ɔ ti kekle mɛn i. I sɔ yolɛ’n ti i ɲrun kɛ ɔ su fu oka nglonglo kpa kun su sa. Ɔ maan ɔ seli i wun kɛ ɔ su kwlá yomɛn i sɔ le. I sɔ’n ti’n, ɔ wa suannin wafa ng’ɔ kwla yi i nglo kɛ ɔ klo Ɲanmiɛn nin sran’n, i su like kpa. Asa ekun’n, ɔ wunnin like nga ti yɛ andɛ’n ɔ ti cinnjin kɛ e bo jasin fɛ’n i wlɛ, yɛ ɔ srɛli Ɲanmiɛn kɛ ɔ ukɛ i naan w’a kwla bo jasin fɛ’n. Blɛblɛblɛ srɛ w’a kunmɛn i kun. I kpa bɔbɔ’n, ɔ wa kacili titi atin bofuɛ. Zoova kwla uka be nga be boli jasin fɛ bolɛ bo ɔ nin-a cɛman’n naan b’a yo yakpafuɛ wie. Maan e kan aniaan bla Tomoyo i ndɛ. Kɛ ɔ boli awloawlo’m be nun jasin fɛ’n i bolɛ bo’n, ɔ ko boboli bla kun i anuan. Kɛ bla’n fiteli’n, ɔ seli i ya su kɛ: “N kunndɛman kɛ e nin Zoova i Lalofuɛ mun é kókó yalɛ.” Kpɛkun gbanwun, yɛ ɔ ɲin i anuan’n niɔn. Sanngɛ i sɔ’n w’a bubuman aniaan bla’n i sa sin. I kpa bɔbɔ’n, ɔ seli aniaan bla ng’ɔ nin i be su bo jasin fɛ’n i kɛ: “?A tili ndɛ ng’ɔ kannin’n? M’an kanman ndɛ fi, sanngɛ bla’n si kɛ n ti Zoova i Lalofuɛ. I sɔ’n yo min fɛ dan.” Dɔ nga su’n, aniaan bla Tomoyo ti titi atin bofuɛ.

15. (1) ?Wafa sɛ yɛ jue trafuɛ nga be si be junman’n i di’n, be kle kɛ be mian be ɲin-ɔn? (2) ?Ngue ti yɛ ɔ fata kɛ Klisifuɛ’m be yo sɔ wie-ɔ?

¹⁵ Jue trafuɛ nga be si be junman’n i di kpa’n, be mian be ɲin be di be junman’n. Sɛ ɔ fata kɛ be yo like kun’n, be yaciman like wie fi lɛ naan ɔ tanndan be ɲrun. Be junman’n i dilɛ nun’n be jaso ndɛ kpa’n yɛ kɛ be ko bo be junman’n i dilɛ bo’n, be di i lele ɔ wie. Kannzɛ wia’n bo-o, annzɛ nzue’n tɔ-o, annzɛ sa uflɛ ju-o, be di be junman’n. I wafa kunngba’n, sɛ e kunndɛ kɛ é bó jasin fɛ’n lele é guɛ́ i ti nin i bo’n, ɔ fata kɛ e mian e ɲin wie.—Mat. 10:22.

16. ?Ngue yɛ ɔ kwla uka e naan y’a yo ninnge nga be yolɛ’n ti kekle’n niɔn?

¹⁶ Titi’n, kɛ e waan é yó like kun’n, e kunndɛ wafa nga e ko yo like sɔ’n naan i yolɛ w’a yo pɔpɔ e sa nun’n. Sanngɛ ninnge nga be ti cinnjin kpa’n be yolɛ timan pɔpɔ cɛn ngba. I sɔ’n ti’n, ɔ fata kɛ e suan e awlɛn tralɛ. Afin ɔ ju wie’n, ɔ fata kɛ be kle e like naan y’a kwla yo ninnge nga be yolɛ’n ti kekle’n. Zoova fɛ i wawɛ’n kle e like naan y’a kwla yo ninnge sɔ mun.—Gal. 5:22, 23.

17. ?Kɛ nga 1 Korɛntifuɛ Mun 9:25-27 fa kan’n sa’n, ngue yɛ Pɔlu yoli naan w’a kwla niɛn i wun su-ɔ?

 ¹⁷ Akoto Pɔlu miɛnnin i ɲin dili junman nga be fa mɛnnin i’n. Sanngɛ ɔ dili i nanwlɛ kɛ ɔ ‘niɛnnin i wun su kpa’ naan w’a kwla yo sa ng’ɔ ti kpa’n. (An kanngan 1 Korɛntifuɛ Mun 9:25-27 nun.) I sɔ’n ti’n, ɔ wlɛli i wiengu’m be fanngan kɛ be nian be wun su yɛ like kwlaa nga bé yó’n, maan be “yo i kɛ ɔ nin i fata’n sa, yɛ nán maan ɔ yo sukusuku.” (1 Kor. 14:40) E kusu ɔ fata kɛ e mian e ɲin kpa naan y’a kwla su Zoova. I wie yɛle kɛ sɛ e kunndɛ kɛ é bó jasin fɛ’n i titi naan é klé sran’m be like naan be kaci Zezi i sɔnnzɔnfuɛ’n, ɔ fata kɛ e mian e ɲin kpa.—Yol. 2:46.

18. ?Ngue yɛ ɔ fata kɛ e yo naan y’a di junman kpa Zoova ɲrun-ɔn?

¹⁸ Kɛ be nga be tra jue be yo i atɛ’n be tra jue kaka’n, i lɛ nun yɛ be se be wun kɛ be junman’n dili kpa-ɔ. Sanngɛ jasin fɛ bolɛ junman’n timan sɔ. Afin be nga e uka be mɔ be kaci Zoova i Lalofuɛ’n, sɛ be sɔnnin-o, annzɛ b’a sɔnman-o, nɛ́n i sɔ’n su yɛ e nian e se kɛ e dili junman kpa annzɛ y’a dimɛn i kpa-ɔ. (Lik. 8:11-15) Sɛ e mian e ɲin e bo jasin fɛ’n titi naan e kle sran’m be like’n, Zoova ɲrun’n e di junman kpa. ?Ngue ti-ɔ? Afin e yo like nga Zoova nin i Wa’n be se e kɛ e yo’n.—Mar. 13:10; Yol. 5:28, 29.

19-20. ?Like cinnjin kpa nga ti yɛ dɔ nga su’n ɔ fata kɛ e mian e ɲin e bo jasin fɛ’n yɛle benin?

¹⁹ Nvle wie’m be nun’n, anglo trele wie’m be nun yɛ jue trafuɛ’m be kwla tra jue-ɔ. Ɔ maan, kɛ be wun kɛ anglo sɔ’m be su wa wie’n, be mian be ɲin be di junman tra laa’n. E mɔ sɛ é kwlá sé’n, e tra sran mun kɛ nga be fa tra jue’n sa’n, ɔ fataman kɛ e ɲin kpa ndɛ nga su. Yɛle kɛ mɛn’n i awieliɛ cɛn’n w’a mantan koko kpa. Ɔ maan blɛ nga le i fa bo jasin fɛ naan sran’m b’a kwla ɲan be ti’n, w’a sɔnman kun. I sɔ’n ti’n, nán minndɛ kɛ ninnge kwlaa ti sin ya ɔ ka naan w’a bo jasin fɛ’n.—Aku. 11:4.

²⁰ Dɔ nga su’n, fua kpa kɛ á bó jasin fɛ’n, suan Biblu’n nun like titi naan wun i nun ndɛ’n i wlɛ kpa. Asa ekun’n, srɛ Zoova naan ɔ wla ɔ yakpa yɛ nian ɔ wun su kpa. Kpɛkun maan a nin Zoova i sufuɛ miliɔn mɔcuɛ tra su be bo yo kun be bo jasin fɛ’n mɛn wunmuan’n nun. Sɛ a yo sɔ’n, Zoova maan á dí aklunjuɛ. (Nee. 8:10) I sɔ’n ti’n, fua kpa kɛ á bó jasin fɛ’n lele saan Zoova w’a se kɛ w’a yo kpa sɔ. Like suanlɛ nga i sin liɛ’n nun’n, é wá kán like nsan nga e kwla yo naan y’a bo jasin fɛ’n titi’n be ndɛ.