1. Anong imbitasyon an itinao ni Jesus sa apat na parasira, asin ano an ginibo ninda?

MGA parasira an mga disipulong si Pedro, Andres, Santiago, asin Juan. Imahinara an pagkangalas ninda kan madangog ninda an imbitasyon ni Jesus: “Sumunod kamo sa sako, asin gigibuhon ko kamong mga parasira nin tawo.” * Ano an ginibo ninda? An Bibliya nagsasabi: “Binayaan tulos ninda an saindang mga hikot dangan nagsunod sa saiya.” (Mat. 4:18-22) Mababago kan desisyon na iyan an buhay ninda sagkod lamang. Imbes na mandakop nin literal na sira, “mandadakop [sinda] nin mga tawo.” (Luc. 5:10) Ngunyan, itinatao man ni Jesus an imbitasyon na iyan sa mga tawong sadiyosan an puso na namumutan an katotoohan. (Mat. 28:19, 20) Inako mo na daw an imbitasyon ni Jesus na magin parasira nin tawo?

2. Taano ta dapat niyatong seryosuhon an desisyon na magin parasira nin tawo, asin ano an makakatabang sa sato na gibuhon iyan?

² Sa pag-Bible study saimo, tibaad nag-uswag ka na abot sa puntong nagdedesisyon ka na kun baga gusto mong magin parahayag kan maugmang bareta. Kun nagduduwa-duwa kang akuon an imbitasyon ni Jesus, dai ka madisganar. An pagduwa-duwa mo posibleng marhay na nangangahulugan na aram mo kun gurano kahalaga an desisyon na ini. Totoo, sinasabi kan Bibliya na binayaan “tulos” ni Pedro asin kan saiyang mga kairiba an literal na hikot ninda. Pero, dai nagin pabigla-bigla sa desisyon na iyan si Pedro saka an tugang niya. Midbid na ninda si Jesus asin inako siya bilang an Mesiyas labi nang anom na bulan bago pa kaiyan. (Juan 1:35-42) Kaagid kaiyan, tibaad dakul ka nang nanudan  manungod ki Jehova asin ki Jesus, asin gusto mong padagos na mag-uswag sa espirituwal. Pero bago ka magdesisyon na magin parahayag, dapat na pag-isipan mo ngunang marhay iyan. Ano an nakatabang ki Pedro, Andres, asin sa iba pa may koneksiyon sa ginibo nindang desisyon?

3. Anong mga kuwalidad an makakapakusog sa saimong pagmawot na akuon an imbitasyon ni Jesus?

³ An inot na mga disipulo ni Jesus motibado, mahusay sa trabaho ninda, makusog an buot, asin may disiplina sa sadiri. An mga kuwalidad na ini siguradong nakatabang sainda na magin epektibong mga parasira nin tawo. Pag-uulayan sa artikulong ini kun paano ka magkakaigwa kan mga kuwalidad na iyan para magi kang epektibong disipulo ni Cristo.

4. Taano ta gustong-gusto ni Pedro an pagigin parasira?

⁴ Naninira si Pedro tanganing masustentuhan an saiyang pamilya, pero para saiya bako sana iyan basta trabaho. Minalataw na gustong-gusto ni Pedro an paninira. (Juan 21:3, 9-15) Nanudan man niyang mamutan an pagigin parasira nin tawo. Asin sa tabang ni Jehova, nagin mahusay si Pedro sa trabahong iyan.—Gibo 2:14, 41.

5. Basado sa Lucas 5:8-11, taano ta natakot si Pedro, asin ano an makakatabang sa sato na mahali an arog kaiyan na pagmati?

⁵ Naghuhulit kita dahil namumutan ta si Jehova; iyan an panginot na nakakamotibar sato sa gibuhon na ini. An pagkamuot niyato ki Jehova makakatabang sato na mahali an ano man na pagmati na kulang an satong kakayahan. Kan imbitaran ni Jesus si Pedro na magin parasira nin tawo, sinabi niya digdi: “Dai ka na matakot.” (Basahon an Lucas 5:8-11.) Dai natakot si Pedro sa kun ano an puwedeng mangyari pag magin disipulo siya. Kundi, nagngalas siyang marhay sa kadakul na sirang nadakop paagi sa milagrong ipinahiling pa sana ni Jesus sa sainda, kaya namatian ni Pedro na bako siyang  kuwalipikado sa imbitasyon na magtrabaho kaiba ni Jesus. Arog ni Pedro, tibaad mamatian mong dai mo kaya na magin disipulo ni Cristo pag iniisip mo an gabos na kalabot diyan. Kun arog kaiyan, pakusugon mo an saimong pagkamuot ki Jehova, ki Jesus, saka sa saimong kapwa, dangan mamomotibar kang akuon an imbitasyon ni Jesus na magin parasira nin tawo.—Mat. 22:37, 39; Juan 14:15.

6. Ano pa an nakakamotibar sato na maghulit?

⁶ Pag-isipan an iba pang dahilan na nakakamotibar sato na maghulit. Gusto tang sunudon an pagbuot ni Jesus: “Padumán kamo asin gumibo kamo nin mga disipulo.” (Mat. 28:19, 20) Naghuhulit man kita huling an mga tawo “naanitan asin napabayaan” asin nangangaipong marhay na manudan an katotoohan manungod sa Kahadian. (Mat. 9:36) Gusto ni Jehova na an gabos na klase nin tawo makaabot sa tamang kaaraman mapadapit sa katotoohan asin maligtas.—1 Tim. 2:4.

7. Paano ipinapahiling kan Roma 10:13-15 kun gurano kahalaga an gibuhon na paghuhulit?

⁷ Mapapahiro kitang isagibo an nagliligtas-buhay na gibuhon na ini pag iniisip ta an puwedeng magin epekto kan satong paghuhulit. Bakong arog nin literal na parasira na ipinapabakal o kinakakan an nadadakop niya, ‘nandadakop’ kita nin mga tawo tanganing iligtas sinda.—Basahon an Roma 10:13-15; 1 Tim. 4:16.

8-9. Ano an kaipuhan na aram nin sarong parasira, asin taano?

⁸ Kan panahon ni Jesus, kaipuhan na aramon nin sarong Israelitang parasira kun anong klaseng sira an puwede niyang madakop. (Lev. 11:9-12) Dapat na aram man niya kun sain mahahanap an sira. Sa parati, an mga sira nagdadanay sa mga parteng suno ninda an tubig asin dakul nin kakanon. Importante daw kun anong oras naninira an sarong parasira? Kun manungod sa pinakamagayon na oras nin paninira, mangnuhon an sinabi nin sarong Saksi sa sarong isla sa Pasipiko kan imbitaran niyang manira an sarong misyonero. Sinabi kan misyonero, “Maghilingan kita sa agang alas nuwebe.” Nagsimbag an brother, “Bako pong arog kaiyan. Mahali po kita pag tamang oras nang manira, bako pag tamang oras na para sa sato.”

⁹ Kaagid kaiyan, an mga parasira nin tawo kan inot na siglo nagduduman sa mga lugar na yaon an mga “sira” asin sa oras na posibleng yaon an mga iyan. Halimbawa, an mga parasunod ni Jesus naghulit sa templo asin sa mga sinagoga, sa harong-harong, asin sa saudan. (Gibo 5:42; 17:17; 18:4) Kaipuhan man niyatong magin pamilyar sa mga rutina kan mga tawo na nakaistar sa nakaasignar satong teritoryo. Kaipuhan na magi kitang madaling makibagay asin maghulit kun sain asin kun nuarin posibleng marhay na yaon an mga tawo.—1 Cor. 9:19-23.

10. Anong mga kasangkapan an itinatao sato kan organisasyon ni Jehova?

¹⁰ Kaipuhan nin sarong parasira an tamang kasangkapan asin dapat aram niya kun paano gagamiton iyan. Kaipuhan man na igwa kita kan tamang kasangkapan para sa satong gibuhon. Asin kaipuhan na aramon ta kun paano gagamiton an kasangkapan na iyan. Nagtao si Jesus nin malinaw na mga instruksiyon kun paano mandadakop nin mga tawo. Sinabi niya sa sainda kun ano an dadarahon, kun sain mahulit, asin kun ano an sasabihon. (Mat. 10:5-7; Luc. 10:1-11) Ngunyan, an organisasyon ni Jehova may itinataong Toolbox sa Pagtutukdo na diyan igwa nin mga kasangkapan na napatunayan nang epektibo. * Asin tinutukduan man kita kun paano gagamiton an mga kasangkapan na iyan. An pagsasanay na iyan nakakatabang sa sato na magkaigwa kan kumpiyansa asin kakayahan na kaipuhan ta para magin epektibo sa satong gibuhon.—2 Tim. 2:15.

11. Taano ta kaipuhan kan mga parasira nin tawo na magin makusog an buot?

¹¹ An mga parasira kaipuhan na makusog an buot. May mga pagkakataon na napapaatubang sinda sa paburubagong kamugtakan sa dagat. Sa parati, nagtatrabaho sinda sa banggi asin tibaad makaeksperyensiya sinda nin mga subasko. An mga parasira nin tawo nangangaipo man nin kusog nin buot. Pag nagpuon na kitang maghulit asin magpamidbid bilang Saksi ni Jehova, tibaad makaeksperyensiya kita nin garo subaskong mga pagkontra nin mga kapamilya, pagtuya nin mga amigo, asin pagsayumang magdangog sa satong mensahe. Pero dai kita nagngangalas diyan huling nagpatanid si Jesus na isusugo niya an saiyang mga parasunod sa sarong peligrosong kamugtakan.—Mat. 10:16.

12. Kauyon kan Josue 1:7-9, ano an makakatabang sa sato na magkaigwa nin kusog nin buot?

¹² Paano magigin makusog an buot mo? Inot, magin kumbinsido na an gibuhon na ini padagos na ginigiyahan ni Jesus sa langit. (Juan 16:33; Kap. 14:14-16) Sunod, pakusugon an saimong pagtubod sa panuga ni Jehova na aatamanon ka niya. (Mat. 6:32-34) Mantang nagkukusog an saimong pagtubod, nagkukusog man an saimong buot. Si Pedro asin an saiyang mga kairiba nagpahiling nin dakulang pagtubod kan bayaan ninda an saindang pagbuhay para sumunod ki Jesus. Kaagid kaiyan, nagpahiling ka nin dakulang pagtubod kan sabihon mo sa mga amigo asin kapamilya mo na nagpuon ka nang makipag-adal nin Bibliya sa mga Saksi ni Jehova asin mag-atender sa saindang mga pagtiripon! Siguradong naggibo ka nin dakulang mga pagbabago sa saimong paggawi asin  istilo nin pamumuhay tanganing makapamuhay kauyon kan matanos na mga pamantayan ni Jehova. Nangaipo man iyan nin pagtubod asin kusog nin buot. Mantang padagos na nagkukusog an saimong buot, makakapagtiwala ka na ‘si Jehova na saimong Diyos [kaibanan] mo sain ka man magduman.’—Basahon an Josue 1:7-9.

13. Paano makakatabang sa saimo an paghurop-hurop asin pamibi tanganing magkaigwa ka nin kusog nin buot?

¹³ Ano pa an puwede mong gibuhon para magkaigwa nin kusog nin buot? Mamibi na magin makusog an buot mo. (Gibo 4:29, 31) Sisimbagon ni Jehova an mga pamibi mo asin nungka ka niyang papabayaan. Yaon siya pirmi tanganing suportaran ka. Puwede mo man hurop-hurupon kun paano ilinigtas ni Jehova an mga lingkod niya kaidto. Isipon man kun paano ka niya tinabangan na mapangganahan an mga problema asin kun paano ka niya tinawan kan kusog na mabago an saimong pamumuhay. An Saro na naggiya sa saiyang banwaan pabalyo sa Dagat na Pula kaya ka nanggad na tabangan na magin disipulo ni Cristo. (Ex. 14:13) Papagdanayon mo an kumbiksiyon na arog kan sa salmista na nagsabi: “Si Jehova nasa kampi ko; dai ako matatakot. Ano an magigibo sa sako nin tawo?”—Sal. 118:6, NWT.

14. Ano an nanudan mo sa eksperyensiya ni Masae asin Tomoyo?

¹⁴ Magkakaigwa ka man nin kusog nin buot paagi sa pag-adal kun paano tinabangan ni Jehova an mga tawong masusupgon pero nakanuod na magin makusog an buot. Pag-isipan an eksperyensiya kan sister na si Masae. Masusupgon siya asin pagmati niya dai niya talaga kayang ipakipag-ulay sa iba an manungod sa saiyang pagtubod. Iniisip niya pa sanang makikipag-ulay siya sa dai niya kabisto, nasasakitan na siya, na garo baga halangkawon iyan na pader na dai niya kayang sakaton. Kaya naghinguwa siyang marhay na pakusugon an saiyang pagkamuot sa Diyos asin kapwa. Hinurop-hurop niya an pagigin apurado kan panahon na kinabubuhayan ta asin namibi siya na pakusugon an pagmawot niya na maghulit. Nadaog niya an saiyang takot asin nagregular payunir pa ngani. Matatabangan man ni Jehova an mga baguhan na parahayag na ‘magin makusog an buot.’ Mangnuhon an eksperyensiya kan sister na si Tomoyo. Kan magpuon siyang magharong-harong, an inot na kagharong na nakaulay niya nagkurahaw: “Habo ko sa mga Saksi ni Jehova!” dangan makusog na isinara an pinto. May kusog nin buot na sinabi ni Tomoyo sa kapartner niya: “Nadangog mo idto? Dai pa ngani ako nagtataram, tapos aram na niyang Saksi ni Jehova ako. Nakakaugma!” Naglilingkod ngunyan si Tomoyo bilang regular payunir.

15. Ano an disiplina sa sadiri, asin taano ta mahalaga iyan sa mga Kristiyano?

¹⁵ An mapangganang mga parasira may disiplina sa sadiri. An disiplina sa sadiri ilinadawan bilang an “kakayahan na piriton an sadiri mo na gibuhon an mga dapat na gibuhon.” An mga parasira dapat na disiplinahon an saindang sadiri na magmatang amay, tapuson an trabaho, asin magpadagos dawa maraot an panahon. Kaipuhan man niyato an disiplina sa sadiri tanganing makatagal asin matapos an satong gibuhon.—Mat. 10:22.

16. Paano kita magkakaigwa nin disiplina sa sadiri?

¹⁶ Dai namamana an disiplina sa sadiri. Sa parati pa ngani, an tendensiya niyato iyo na gibuhon kun ano an pinakamadali. Kaipuhan an pagpupugol sa sadiri para magkaigwa nin disiplina sa sadiri. Kaya, kaipuhan ta an tabang para sanayon an satong sadiri na gibuhon an mga bagay na tibaad dipisil para sa sato. Itinatao sa sato ni Jehova an tabang na iyan paagi sa saiyang banal na espiritu.—Gal. 5:22, 23.

17. Paano ilinadawan ni apostol Pablo sa 1 Corinto 9:25-27 an paghihinguwa niya na magkaigwa nin disiplina sa sadiri?

 ¹⁷ May disiplina sa sadiri si apostol Pablo. Pero inadmitir niya na kaipuhan niyang ‘lanugon’ an saiyang hawak tanganing magibo an tama. (Basahon an 1 Corinto 9:25-27.) Dinagka niya an iba na magkaigwa nin disiplina sa sadiri asin gibuhon an gabos na bagay sa “kagalang-galang asin aregladong paagi.” (1 Cor. 14:40) Dapat na igwa kita nin disiplina sa sadiri tanganing mapagdanay an marahay na espirituwal na rutina na diyan kaiba an regular na pakikikabtang sa simbolikong gibuhon na paninira.—Gibo 2:46.

18. Ano an dapat tang gibuhon tanganing ibilang ni Jehova na mapanggana kita?

¹⁸ An pagigin mapanggana nin sarong parasira ibinabasar niya sa kun gurano kadakul na sira an nadakop niya. Sa ibong na lado, dai ta pigsusukol an kapangganahan ta basado sa kun gurano kadakul an natabangan tang magin lingkod ni Jehova. (Luc. 8:11-15) Basta padagos kitang naghuhulit kan maugmang bareta asin nagtutukdo sa iba, ibibilang ni Jehova na mapanggana kita. Taano? Huling masinunod kita sa saiya asin sa saiyang Aki.—Mar. 13:10; Gibo 5:28, 29.

19-20. Anong espesyal na dahilan an igwa kita tanganing maghulit ngunyan?

¹⁹ Sa ibang mga nasyon, may mga bulan sana na puwedeng manira. Sa mga lugar na iyan, tibaad makamati nin mas urog na pagkaapurado an mga parasira pag patapos na an panahon na puwede sindang manira. Bilang mga parasira nin tawo, igwa man kita nin dagdag na dahilan na maghulit ngunyan: Madali nang matapos an sistemang ini nin mga bagay! Dikiton na sanang panahon an natatada para makikabtang sa nagliligtas-buhay na gibuhon na ini. Kaya dai mag-atraso o maghalat pa para sa tamang panahon o kamugtakan tanganing makikabtang sa mahalagang marhay na gibuhon na ini.—Par. 11:4.

²⁰ Humiro na ngunyan para pakusugon an saimong motibasyon na maghulit, pararumon an kaaraman sa Bibliya, magkaigwa nin kusog nin buot, asin magkaigwa nin disiplina sa sadiri. Umiba sa labing walong milyon na parasira nin tawo, asin mamamatian mo an kagaya-gayahan na itinatao ni Jehova. (Neh. 8:10) Magin determinado na lubos na makikabtang sa gibuhon na ini asin magpadagos sagkod na matapos ini. Pag-uulayan sa masunod na artikulo an tulong paagi na mapapakusog ta an satong determinasyon na magpadagos sa gibuhon na paghuhulit kan Kahadian bilang mga parasira nin tawo.