1. ?Jisas i invaetem ol fofala man blong pulum fis blong oli mekem wanem? ?Mo oli mekem wanem?

OL DISAEPOL ya, Pita, Andru, Jemes, mo Jon oli gat bisnes blong pulum fis. Ating oli sapraes tumas blong harem we Jisas i invaetem olgeta, i se: ‘Yufala i biaen long mi, bambae mi mi mekem yufala i kam man blong pulum man.’ * ?Oli mekem wanem? Baebol i se: ‘Wantaem nomo oli livim net blong olgeta, mo oli folem hem.’ (Mat. 4:18-22) Desisen ya i jenisim laef blong olgeta blong olwe. Bambae oli no moa kasem fis be oli kam “man blong pulum man.” (Luk 5:10) Tede, Jisas i mekem sem mak, hem i invaetem ol man we hat blong olgeta i stret mo we oli laekem trutok. (Mat. 28:19, 20) ?Yu yu akseptem finis invetesen blong Jisas blong kam man blong pulum man?

2. ?From wanem yumi mas tinghevi long desisen ya blong kam man blong pulum man? ?Mo wanem bambae i givhan long yumi blong mekem desisen ya?

² Ating yu yu gohed gud long Baebol stadi blong yu, mo naoia maet yu mas jusum se yu wantem kam wan pablisa blong gud nius no nogat. Sipos yu no suagud se bambae yu akseptem invetesen blong Jisas, yu no mas wari. Hemia i soemaot we maet yu yu kasemsave se desisen ya i impoten tumas. I tru we Baebol i talem se Pita mo ol fren blong hem, oli lego net blong olgeta “wantaem nomo.” Be, hemia i no min se Pita mo brata blong hem oli mekem desisen ya we oli  no tingting gud fastaem. Bitim sikis manis bifo, olgeta oli kasemsave se Jisas i Mesaea, mo oli akseptem samting ya. (Jon 1:35-42) Long sem fasin, maet yu lanem plante samting finis long saed blong Jehova mo Jisas, mo yu wantem gohed long spirit. Be yu mas tingting gud bifo we yu mekem desisen ya. ?Wanem i givhan long Pita, Andru, mo ol narafala blong mekem desisen blong olgeta?

3. ?Wanem ol gudfala fasin we bambae oli pulum yu blong akseptem invetesen blong Jisas?

³ Samting we i givhan long ol faswan disaepol blong Jisas, hemia se oli wantem mekem wok ya, oli gat save long wok ya, oli no fraet, mo oli fosem olgeta wan. I sua se ol gudfala fasin ya i halpem olgeta blong oli mekemgud wok ya blong pulum man. Stadi ya bambae i tokbaot olsem wanem yu save gat ol fasin ya, blong yu kam wan disaepol blong Kraes we i gat gudhan.

4. ?Wanem i mekem se Pita i wantem kam wan man blong fising?

⁴ Pita i gat bisnes ya blong kasem fis, be long tingting blong hem, hemia i no jes wan wok nomo. I klia se Pita i laekem tumas blong fising. (Jon 21:3, 9-15) Mo tu, hem i lanem blong laekem wok ya blong pulum man. Mo wetem help blong Jehova, Pita i gat gudhan long wok ya.—Wok 2:14, 41.

5. Folem Luk 5:8-11, ?from wanem Pita i fraet? ?Mo wanem i save givhan long yumi blong no fraet?

⁵ Yumi prij from we yumi lavem Jehova, hemia nao faswan samting we i mekem se yumi wantem mekem wok ya. Lav blong yumi long Jehova i save givhan long yumi blong winim filing ya se yumi no naf. Taem Jisas i invaetem Pita blong kam man blong pulum man, hem i talem long hem se: “Yu no fraet.” (Ridim Luk 5:8-11.)  Pita i no fraet long samting we i save hapen sipos hem i kam wan disaepol. Be nomo, hem i sapraes tumas long merikel blong Jisas we i mekem se oli kasem plante fis, nao hem i harem se i no stret we Jisas i askem hem blong wok wetem hem. Maet yu yu fraet taem yu kasemsave long wok we yu mas mekem taem yu kam wan disaepol blong Kraes. Sipos i olsem, yu mas mekem lav blong yu long Jehova, Jisas, mo ol neba blong yu, i kam strong moa, nao bambae yu wantem akseptem invetesen blong Jisas, blong kam man blong pulum man.—Mat. 22:37, 39; Jon 14:15.

6. ?Wanem sam moa risen we i mekem se yumi wantem prij?

⁶ Tingbaot sam narafala risen we i mekem se yumi wantem prij. Yumi wantem obei long komanmen ya blong Jisas se: “Yufala i mas go long ol man, . . . yufala i pulum olgeta oli kam disaepol blong mi.” (Mat. 28:19, 20) Mo tu, yumi prij from we yumi luk ol man we “ol narafala oli stap spolem olgeta mo oli no lukaot long olgeta,” ol man ya oli nidim trutok blong Kingdom. (Mat. 9:36) Jehova i wantem se ol defdefren kaen man oli mas kasem stret save long trutok, mo kasem laef.—1 Tim. 2:4.

7. ?Olsem wanem Rom 10:13-15 i soem se wok blong prij i impoten?

⁷ Sipos yumi tingbaot se man i save kasem laef from wok blong prij, bambae yumi wantem prij. Wan bisnesman i salem o i kakae ol fis we hem i kasem, be yumi no mekem olsem. Yumi “kasem” ol man blong sevem laef blong olgeta.—Ridim Rom 10:13-15; 1 Tim. 4:16.

8-9. ?Wan man blong fising i mas save wanem, mo from wanem?

⁸ Long taem blong Jisas, wan man blong fising i mas save wanem kaen fis hem i wantem kasem. (Lev. 11:9-12) Hem i mas save tu se weples hem i save faenem fis long hem. Plante taem ol fis oli laekem ples we wota i stret long olgeta, mo we i gat plante kakae long hem. ?Olsem wanem? ?I impoten we man blong fising i save stret taem blong go fising? Tingbaot samting we wan Witnes long wan aelan blong Pasifik i talem long saed ya. Hem i invaetem wan misinari blong go fising wetem hem, ale misinari ya i talem se: “Bae mi mitim yu tumoro moning long naen klok.” Nao brata i talem se: “No, i no olsem. Yumitu mas go long taem we i stret blong kasem fis, i no long taem we yumitu wantem.”

⁹ Long sem fasin, ol man blong pulum man long faswan handred yia, oli go long ol ples we i gat “fis,” mo long taem we ol “fis” ya oli stap. Eksampol, ol man blong Jisas oli prij long tempol, long ol sinagog, long ol haos wanwan, mo long ples blong maket. (Wok 5:42; 17:17; 18:4) Yumi tu yumi mas save wei blong ol man we oli stap long teritori blong yumi. Yumi mas rere blong jenisim program blong yumi, mo prij long taem mo ples we yumi save faenem man.—1 Kor. 9:19-23.

10. ?Wanem ol tul we oganaesesen blong Jehova i givim long yumi?

¹⁰ Wan man blong fising i mas gat ol stret tul mo i mas save olsem wanem blong yusum. Yumi tu yumi mas gat ol stret tul blong mekem ol wok blong yumi. Mo yumi mas save olsem wanem blong yusum ol tul ya. Jisas i givim ol klia instraksen long ol disaepol blong hem, blong oli save olsem wanem blong pulum ol man. Hem i talem long olgeta samting we oli mas tekem, weples blong prij, mo wanem blong talem. (Mat. 10:5-7; Luk 10:1-11) Tede, oganaesesen blong Jehova i givim wan Tijing  Tulboks, we insaed i gat ol tul we oli wok gud. * Mo yumi kasem trening blong yusum gud ol tul ya. Trening ya i givhan long yumi blong no fraet mo blong gat gudhan long wok ya.—2 Tim. 2:15.

11. ?From wanem ol man blong pulum man oli no mas fraet?

¹¹ Ol man we oli fising blong winim mane, oli no mas fraet. Samtaem oli fesem rabis weta long solwota. Plante taem oli mas wok long naet, mo long solwota we i save kam raf kwiktaem. Ol man blong pulum man tu oli no mas fraet. Taem yumi stat blong prij mo yumi talem se yumi Witnes Blong Jehova, maet yumi fesem sam samting we oli olsem “solwota we i raf.” Maet ol famle oli agensem yumi, ol fren oli jikim yumi, mo ol man oli agensem mesej blong yumi. Be yumi no sapraes long samting ya. Jisas i givim woning finis se bambae hem i sanem ol man blong hem oli go long ol man we oli no laekem olgeta.—Mat. 10:16.

12. Folem Josua 1:7-9, ?wanem i save givhan long yumi blong no fraet?

¹² ?Olsem wanem yu save lanem blong no fraet? Fastaem yu mas bilif se Jisas we i stap long heven, i stap lidim wok ya. (Jon 16:33; Rev. 14:14-16) Biaen, yu mas mekem bilif blong yu i strong long promes blong Jehova se bambae hem i lukaot long yu. (Mat. 6:32-34) Taem bilif blong yu i kam strong, bambae yu no moa fraet. Pita mo  ol fren blong hem oli soemaot se oli gat strong bilif, taem oli lego wok blong olgeta blong folem Jisas. Long sem fasin, sipos yu talemaot long ol fren mo famle blong yu se yu stat blong stadi Baebol wetem ol Witnes Blong Jehova, mo yu go long ol miting blong olgeta, !yu yu gat strong bilif ya! I sua se yu mekem plante bigfala jenis finis long fasin mo laef blong yu, blong yu save folem ol stret rul blong Jehova. Sipos i olsem, yu yu gat bilif mo yu no fraet. Taem yu stap gohed blong mekem se yu no fraet, yu save sua se “Jehova we i God blong yu bambae i stap wetem yu, long evri ples we yu go long hem.”—Ridim Josua 1:7-9.

13. ?Tingting dip mo prea i save givhan olsem wanem blong yu no fraet?

¹³ ?Yumi mas mekem wanem moa, blong yumi no fraet? Yumi mas prea blong gat strong tingting mo no fraet. (Wok 4:29, 31) Jehova bambae i ansa long ol prea blong yu, mo hem i neva save lego yu. Hem i stap oltaem blong givhan long yu. Mo tu, yu save tingting dip long ol samting we Jehova i mekem blong sevem ol man blong hem bifo. Mo tingbaot olsem wanem hem i givhan long yu blong winim ol traem, mo i givim paoa long yu blong jenisim laef blong yu. I sua se God ya we i lidim ol man blong hem tru long Red Si, i save givhan long yu blong kam wan disaepol blong Kraes. (Eks. 14:13) Yu mas gat sem bilif olsem man blong raetem Sam, we i talem se: “Jehova i stap long saed blong mi. Bambae mi no fraet. ?Man i save mekem wanem long mi?”—Sam 118:6, NW.

14. ?Yu yu lanem wanem long ekspiriens blong Masae mo Tomoyo?

¹⁴ Wan narafala rod blong no fraet, hemia blong save olsem wanem Jehova i givhan long ol man we oli stap sem be naoia oli no moa fraet. Tingbaot ekspiriens blong sista ya Masae. Hem i sem mo hem i harem se i no save talemaot bilif blong hem long ol man. Taem hem i tingbaot se i mas toktok long ol strenja, hem i harem se hemia i olsem wan bigfala stonwol we hem i no save klaem long hem. Nao hem i traehad moa blong lavem God mo ol neba blong hem. Hem i tingbaot se taem i sot tumas, mo i prea blong mekem se hem i wantem moa blong prij. Hem i winim fraet blong hem, mo i mekem wok blong fultaem paenia tu. Jehova i save halpem ol niufala pablisa tu blong oli “no fraet.” Tingbaot ekspiriens blong sista ya Tomoyo. Taem hem i stat blong prij long ol haos wanwan, faswan woman we hem i mitim, i singaot strong long hem se: “!Mi no wantem toktok wetem ol Witnes Blong Jehova!” biaen i satem doa strong. Tomoyo i no fraet mo i talem long fren blong hem se: “?Yu harem? Mi no talem wan samting nating, be woman ya i luksave se mi wan Witnes Blong Jehova. !Mi glad tumas!” Naoia Tomoyo i wan fultaem paenia.

15. ?Fasin ya blong fosem yu wan i minim wanem? ?From wanem fasin ya i impoten long ol Kristin?

¹⁵ Ol man blong fising we oli mekem gud wok blong olgeta, oli stap fosem olgeta wan. Fasin ya blong man i fosem hem wan, i min se “man i naf blong stretem hem wan blong mekem ol wok we hem i mas mekem.” Ol man we oli fising blong winim mane, oli mas fosem olgeta wan blong oli save girap eli, stap kasem we wok i finis, mo gohed nomo nating se weta i nogud. Yumi tu, yumi nidim blong fosem yumi wan, sipos yumi wantem stanap strong mo finisimgud wok blong yumi.—Mat. 10:22.

16. ?Olsem wanem yumi lanem blong fosem yumi wan?

¹⁶ Yumi no bon wetem fasin ya blong fosem yumi wan. Be plante taem yumi gat  fasin ya blong mekem samting we i moa isi long yumi. Yumi mas bos long tingting blong yumi, blong yumi save fosem yumi wan. Taswe, yumi mas trenem yumi blong mekem ol samting we i had blong yumi mekem. Jehova i givim tabu spirit blong hem blong givhan long yumi.—Gal. 5:22, 23.

17. Folem 1 Korin 9:25-27, ?olsem wanem aposol Pol i tokbaot fasin ya blong fosem hem wan?

¹⁷ Aposol Pol i gat fasin ya blong fosem hem wan. Be hem i talem se hem i mas “kilim” bodi blong hem, blong i mekem samting we i stret. (Ridim 1 Korin 9:25-27.) Hem i pulum ol narafala blong oli fosem olgeta wan, mo blong oli mekem olgeta samting “i stret mo i folem plan.” (1 Kor. 14:40) Yumi mas fosem yumi wan blong yumi gat wan gudfala program long spirit, we insaed long hem, yumi joen oltaem long wok ya blong pulum man.—Wok 2:46.

18. ?Wanem bambae i mekem we Jehova i luk se yumi wingud?

¹⁸ Wan man we i fising blong winim mane, hem i wingud taem hem i kasem plante fis. Be long saed blong yumi, yumi no wingud from namba blong ol man we yumi pulum i kam long oganaesesen blong God. (Luk 8:11-15) Jehova bambae i luk se yumi wingud sipos yumi stanap strong long wok blong talemaot gud nius mo yumi tijim ol narafala. ?From wanem? From we yumi stap obei long hem mo long Pikinini blong hem.—Mak 13:10; Wok 5:28, 29.

19-20. ?Wanem spesel risen i mekem se yumi wantem prij tede?

¹⁹ Long sam kantri, oli letem ol man blong oli fising long sam manis nomo. Long ol kantri olsem, taem klosap manis blong fising i kasem en blong hem, man blong fising i save harem se taem i sot tumas. Yumi ol man blong pulum man, yumi gat tingting ya taem yumi stap prij tede: !En blong sistem blong wol ya i kam klosap tumas! Yumi gat smol taem nomo i stap blong joen long wok ya blong sevem laef blong man. Yu no mas slo, o harem se yu mas wet long stret taem bifo we yu joen long impoten wok ya.—Pri. 11:4.

²⁰ Tekem aksen naoia blong mekem se yu wantem mekem wok ya, wantem save moa long Baebol, lanem blong no fraet, mo lanem blong fosem yu wan. I gud yu joen wetem moa long eit milian man blong pulum man, nao bambae yu kasem glad we i kamaot long Jehova. (Neh. 8:10) Yu mas gat strong tingting blong joen fulwan long wok ya, mo gohed kasem we yu finisimgud. Nekis stadi bambae i tokbaot tri rod, blong mekem se yumi gohed wetem strong tingting long wok ya blong talemaot Kingdom olsem ol man blong pulum man.