1. Ki lenvitasyon Zezi ti donn kat peser e ki sa bann peser ti fer?

DISIP Pyer, Andre, Zak ek Zan ti annan en biznes lapes. Imazinen ki mannyer zot ti sirprann ler Zezi ti dir zot: “Swiv mwan e mon pou fer zot lapes dimoun.” * Ki sa bann zonm ti fer? Labib i dir: “Deswit zot ti kit zot lasenn e swiv li.” (Mat. 4:18-22) Sa desizyon ti sanz zot lavi. Olye lapes pwason, zot ti “pou lapes dimoun.” (Lik 5:10) Ozordi, Zezi i envit bann dimoun senser, ki kontan laverite pour fer parey. (Mat. 28:19, 20) Eski ou’n aksepte lenvitasyon Zezi pour lapes dimoun?

2. Akoz nou devret reflesir byen avan nou vin en proklanmater e kwa ki pou ed nou fer sa desizyon?

² Petet ou’n etidye Labib pour en pe letan e ou’n fer bann sanzman dan ou lavi. Aprezan ou bezwen deside si ou pou anons sa bon nouvel. Si ou ezite pour aksepte lenvitasyon Zezi, pa dekouraze. I tre probab ki ou ezite akoz ou konnen ki sa i en desizyon vreman enportan. I vre ki Labib i dir ki Pyer ek son bann zanmi ti kit zot lasenn “deswit.” Me Pyer ek son frer pa ti’n fer sa desizyon san reflesir. Zot ti’n aprann konn e aksepte Zezi konman Mesi plis ki sis mwan avan sa. (Zan 1:35-42) Pareyman, i tre probab ki ou’n aprann bokou lo Zeova ek Zezi e ou anvi kontinyen vin pli pros avek Zeova. Me avan ou deside pour vin en proklanmater, ou bezwen reflesir byen. Kwa ki ti ed Pyer, Andre ek lezot pour fer zot desizyon?

3. Ki bann kalite ki pou fer nou anvi aksepte lenvitasyon Zezi?

 ³ Bann premye disip Zezi ti byen motive dan zot travay, zot ti konn fer li byen, zot ti kouraze e byen disiplinen. San dout, sa bann menm kalite ti ed zot pour anons sa bon nouvel byen. Dan sa lartik, nou pou vwar ki mannyer nou kapab devlop sa bann kalite pour nou kapab anons sa bon nouvel byen e ansenny lezot.

4. Kwa ki ti motiv Pyer pour lapes?

⁴ Pyer ti lapes pour pran swen avek son fanmir me pa zis sa ki ti motiv li pour fer sa travay. I paret ki Pyer ti vreman kontan lapes. (Zan 21:3, 9-15) I ti osi aprann pour kontan lapes dimoun. Avek led Zeova, Pyer ti konn fer byen sa travay.​—Akt 2:14, 41.

5. Dapre Lik 5:8-11, akoz Pyer ti per e kwa ki kapab ed nou si nou santi koumsa?

⁵ Rezon prensipal ki nou anons sa bon nouvel i akoz nou kontan Zeova. Nou lanmour pour li i kapab ed nou pour koz avek lezot lo li, menm si nou santi ki nou pa alaoter. Ler Zezi ti envit Pyer pour lapes dimoun, i ti dir li: “Pa bezwen per.” (Lir Lik 5:8-11.) Pyer pa ti per akoz sa ki i kapab arive si i vin en disip. O kontrer, i ti soke ler i ti vwar sa kantite pwason ki Zezi ti ed zot gannyen. I ti konnen ki Zezi ti’n fer en mirak e i pa ti santi li alaoter pour travay ansanm avek Zezi. Parey Pyer, ou osi ou kapab per. Petet ou enkyet konsernan bann keksoz ki ou pou bezwen fer ler ou vin en disip Kris. Si ou santi koumsa, ranforsi ou lanmour pour Zeova, Zezi ek ou vwazen, parski sa pou motiv ou pour aksepte lenvitasyon Zezi  pour lapes dimoun.​—Mat. 22:37, 39; Zan 14:15.

6. Ki lezot keksoz ki motiv nou pour anons sa bon nouvel?

⁶ Annou vwar lezot keksoz ki motiv nou pour anons sa bon nouvel. Nou anvi obei lord Zezi pour: “Al kot bann dimoun . . . e fer zot vin [son] disip.” (Mat. 28:19, 20) Nou osi anons sa bon nouvel parski dimoun pe “ganny maltrete e rezete” e zot vreman bezwen aprann laverite konsernan Rwayonm Bondye. (Mat. 9:36) Zeova i anvi ki tou sort kalite dimoun i ganny konnesans egzakt lo laverite pour zot kapab ganny sove.​—1 Tim. 2:4.

7. Ki mannyer Romen 10:13-15 i montre ki sa travay predikasyon i enportan?

⁷ Ler nou reflesir lo ki mannyer sa travay predikasyon i kapab ede pour sov lavi dimoun, sa pou motiv nou pour anons sa bon nouvel. Kontrerman avek en peser ki “atrap” pwason pour manze oubyen vann, nou nou “atrap” dimoun setadir nou fer disip pour sov zot lavi.​—Lir Romen 10:13-15; 1 Tim. 4:16.

8-9. Ki en peser i bezwen konnen e akoz?

⁸ Dan letan Zezi, en peser Izraelit ti bezwen konnen ki kalite pwason i kapab atrape. (Lev. 11:9-12) I ti osi bezwen konnen kote pour atrap sa bann pwason. Normalman pwason i reste dan bann landrwa ki ideal pour zot e kot i annan en kantite manze. Eski i enportan ki ler en peser i al lapes? En misyonner ki reste lo en zil dan Losean Pasifik ti aprann ki i annan en ler spesifik pour lapes. Ler en frer ti envit li pour al lapes, sa misyonner ti dir sa frer ki i a zwenn li son landmen ne-v-er. Me sa frer ti dir: “Ou pa konpran mwan. Nou pa al lapes ler i bon pour nou me nou al lapes ler pwason i morde.”

⁹ Pareyman, bann ki ti lapes dimoun dan premye syek ti al dan bann landrwa kot i ti annan dimoun e dan en letan kot sa bann dimoun ti la. Par egzanp, bann disip Zezi ti anons sa bon nouvel kot tanp, dan bann sinagog, kazankaz e dan bazar. (Akt 5:42; 17:17; 18:4) Nou osi nou bezwen konnen kan ki bann dimoun dan nou teritwar i kot lakour. Nou bezwen pare pour aziste nou progranm pour ki nou kapab anons sa bon nouvel avek sa bann dimoun.​—1 Kor. 9:19-23.

10. Ki zouti ki lorganizasyon Zeova i donn nou?

¹⁰ En peser i bezwen annan sa bon lekipman e i bezwen konnen ki mannyer pour servi son lekipman. Nou osi nou bezwen annan bann bon zouti pour nou kapab anons sa bon nouvel e konnen ki mannyer pour servi sa bann zouti. Zezi ti dir son bann disip ki mannyer pour anons sa bon nouvel. I ti dir zot ki pour anmennen, kote pour ale e ki pour dir. (Mat. 10:5-7; Lik 10:1-11) Ozordi, lorganizasyon Zeova i donn nou bann Zouti predikasyon ki byen efikas. * Lorganizasyon i montre nou ki mannyer pour servi sa bann zouti. Sa formasyon ki lorganizasyon i donn nou i ed nou pour vin pli konfidan dan predikasyon e nou aprann ki mannyer pour vin bann pli bon ansenyan.​—2 Tim. 2:15.

11. Akoz bann ki lapes dimoun i bezwen annan kouraz?

¹¹ Bann peser i bezwen annan kouraz  parski letan i sanze e i kapab annan bann tanpet san ki zot ekspekte. Souvan zot travay aswar dan fernwanr. Pareyman, bann disip Kris ki lapes dimoun i bezwen annan kouraz. I kapab ki ler nou konmans anons sa bon nouvel e nou dir lezot ki nou en Temwen Zeova, nou fanmir i opoz nou, nou bann zanmi i boufonn nou e lezot dimoun pa ekout nou mesaz. Sa bann keksoz i kapab parey en “tanpet” pour nou. Me sa pa sirprann nou parski Zezi ti averti ki i ti pou anvoy son bann disip anons sa bon nouvel avek bann dimoun ki opoz zot.​—Mat. 10:16.

12. Anliny avek Zozye 1:7-9, kwa ki kapab ed nou devlop plis kouraz?

¹² Ki mannyer ou kapab devlop plis kouraz? Premyerman, ou bezwen konvenki ki Zezi i dan lesyel pe diriz sa travay predikasyon. (Zan 16:33; Rev. 14:14-16) Apre, ranforsi ou lafwa dan sa promes ki Zeova pou pran swen avek ou. (Mat. 6:32-34) Pli ou lafwa i vin pli for, pli ou pou annan kouraz. Pyer ek son bann zanmi ti montre ki zot ti annan en gran lafwa ler zot ti kit zot biznes lapes pour swiv Zezi. Pareyman, ou osi ou ti montre ki ou annan en gran lafwa ler ou ti dir ou bann fanmir ek zanmi ki ou’n konmans etidye Labib avek Temwen Zeova e ou pe asiste renyon! San dout ou’n fer en kantite sanzman dan ou lavi e dan ou konportman pour ou kapab viv dapre bann standar Zeova. Sa osi i demann  lafwa ek kouraz. Anmezir ki ou kontinyen devlop plis kouraz, ou kapab asire ki “[Zeova], ou Bondye, i avek ou partou kot ou pou ale.”​—Lir Zozye 1:7-9.

13. Ki mannyer ler ou medite e priye sa i kapab ed ou devlop plis kouraz?

¹³ Dan ki lot fason ou kapab devlop plis kouraz? Priye pour ganny kouraz ek lardyes. (Akt 4:29, 31) Zeova pou reponn ou lapriyer e i pa pou zanmen abandonn ou. I toultan la pour siport ou. Ou kapab osi medit lo lafason ki Zeova ti sov lezot dan lepase. Mazin osi lo lafason ki i’n ed ou sirmont ou bann difikilte e donn ou lafors pour fer bann sanzman dan ou lavi. Ou kapab asire ki sa Enn ki ti ed son pep pour travers Lanmer Rouz, i kapab ed ou vin en disip Kris. (Egz. 14:13) Ou kapab annan konfyans dan Zeova parey sa psalmis ki ti dir: “Si [Zeova] i lo mon kote, mon pa per nanryen. Ki en zonm i kapab fer mwan?”​—Ps. 118:6.

14. Ki ou aprann avek leksperyans Masae ek Tomoyo?

¹⁴ En lot fason nou kapab devlop plis kouraz, i ler nou aprann lo lafason ki Zeova in ed bann dimoun ki timid pour devlop lardyes. Annou vwar legzanp en ser ki apel Masae. I ti en dimoun timid e i ti santi ki i pa ti pou zanmen kapab anons sa bon nouvel. I ti vwar li difisil pour koz avek bann dimoun ki i pa konnen. Pour li sa ti konmsi i pe grenp en gran miray e i ti krwar ki i pa ti pou zanmen kapab fer sa. Alor i ti fer bokou zefor pour devlop plis lanmour pour Bondye e pour son vwazen. I ti reflesir lo ki mannyer i irzan pour anons sa bon nouvel la konmela e i ti demann Zeova led pour li kapab ranforsi son dezir pour al predikasyon. Masae ti sirmont son lafreyer e in menm servi konman en pionye ordiner. Zeova i osi kapab ed bann nouvo proklanmater pour “pran kouraz.” Reflesir lo sa ki ti arive avek en lot ser ki apel Tomoyo. Ler Tomoyo ti konmans pres kazankaz, premye dimoun ki i ti zwenn ti kriye: “Mon pa anvi koz avek Temwen Zeova!” Apre i ti ferm son laport avek en lakoler. Tomoyo pa ti per e i ti dir avek son zanmi: “Eski ou’n tann sa? Mon pa ni ti bezwen dir nanryen e sa madanm ti konnen ki mon en Temwen Zeova. Mon vreman kontan!” Ozordi, Tomoyo i en pionye ordiner.

15. Ki savedir disiplin nou lekor e akoz i enportan pour en Kretyen fer sa?

¹⁵ Bann bon peser i disiplin zot lekor. Dapre en diksyonner, en dimoun ki disiplin son lekor i fors son lekor pour fer bann keksoz ki i devret fer. Bann peser i bezwen disiplin zot lekor pour zot kapab lev granmaten, travay ziska travay i fini e kontinyen lapes menm si i movetan. Nou osi nou bezwen disiplin nou lekor pour nou kapab andire e fini nou travay.​—Mat. 10:22.

16. Kwa ki kapab ed nou pour disiplin nou lekor?

¹⁶ En dimoun pa annan disiplin lo son lekor zis akoz son paran ti annan disiplin lo zot lekor. Normalman nou kontan fer sa ki pli fasil pour nou. Par kont, parfwa i difisil pour fer bann keksoz ki pli enportan. I sanmenm sa moman ki nou bezwen annan kontrol lo nou lekor. Alor, nou bezwen led pour nou kapab antrenn nou lekor pour fer bann keksoz ki difisil pour nou fer. Zeova i donn nou sa led ki nou bezwen atraver son lespri sen.​—Gal. 5:22, 23.

17. Dapre 1 Korentyen 9:25-27, ki zapot Pol ti bezwen fer pour li kapab disiplin son lekor?

 ¹⁷ Zapot Pol ti disiplin son lekor. I ti admet ki i ti bezwen tret son “lekor dir” pour li kapab fer sa ki byen. (Lir 1 Korentyen 9:25-27.) I ti ankouraz lezot pour disiplin zot lekor e pour fer tou keksoz dan en fason “annord e avek dinyite.” (1 Kor. 14:40) Nou bezwen disiplin nou lekor pour nou kapab kontinyen ador Zeova. Sa i enkli regilyerman anons e ansenny sa bon nouvel.​—Akt 2:46.

18. Ki nou bezwen fer si nou anvi Zeova i vwar ki nou pe reisi dan sa travay predikasyon?

¹⁸ En peser i reisi dan son travay si i atrap en kantite pwason. Me sa travay predikasyon i diferan. I pa depan lo lakantite dimoun ki nou ede vin Temwen Zeova. (Lik 8:11-15) Pour Zeova, nou reisi dan sa travay si nou kontinyen anons sa bon nouvel e ansenny lezot. Akoz? Parski nou pe kontinyen obei li ek son Garson.​—Mark 13:10; Akt 5:28, 29.

19-20. Ki rezon enportan nou annan pour anons sa bon nouvel la konmela?

¹⁹ Dan serten pei, i annan bann mwan ki peser i annan drwa lapes. Dan sa bann pei, bann peser i kapab santi ki i pli irzan pour atrap pwason anmezir ki sezon lapes pe fini. Konman bann ki lapes dimoun, nou annan en lot rezon enportan pour anons sa bon nouvel la konmela: Lafen sa lemonn pe vitman aprose! I pa reste bokou letan pour nou anons sa bon nouvel ki kapab sov lavi dimoun. Pa tarde oubyen espere pour tou keksoz al byen dan ou lavi avan ki ou partisip dan sa travay enportan.​—Ekle. 11:4.

²⁰ Depi la konmela, ranforsi ou motivasyon, aprann plis lo Labib, devlop plis kouraz e aprann pour disiplin ou lekor. Travay ansanm avek sa plis ki wit milyon dimoun ki pe anons sa bon nouvel partou dan lemonn e ou pou ganny sa lazwa ki Zeova i donnen. (Nee. 8:10) Determinen pour anons sa bon nouvel otan ki ou kapab e kontinyen fer li ziska ki Zeova i dir ki sa travay in fini. Dan sa lartik ki swiv, nou pou vwar trwa fason ki nou kapab ranforsi nou determinasyon pour kontinyen anons sa bon nouvel Rwayonm konman bann ki lapes dimoun.