1. Yezu ye welekan juman lo lase mɔnikɛla naani ma ani u ye mun lo kɛ?

YEZU ka kalandenw Piyɛri, Andere, Zaki ani Zan tun be mɔni lo kɛ. Miiri k’a filɛ u kabakoyara cogo min na tuma min na Yezu y’u weele ko: “Aw ka tugu ne kɔ. Ne bena aw kɛ diɲɛ mɔlaw ye ka mɔgɔw sɔrɔ.” U ye mun lo kɛ do? Bibulu b’a fɔ ko: “O yɔrɔnin kelen, u y’u ka jɔɔw to yen ka tugu a kɔ.” (Mat. 4:18-22). O desizɔn tun bena u ka ɲɛnamaya yɛlɛma pewu! U tun tɛna jɛgɛw minɛ tugun, nka u tun bena “mɔgɔw le ɲini Ala ye.” (Luka 5:10). Bi, tiɲɛn ka di mɔgɔ kɔnɔgwɛ minw ye, Yezu be welekan lase olu fana ma walisa u ka kɛ mɔgɔ ɲinilaw ye * (Mat. 28:19, 20). Yala i sɔnna Yezu ka welekan ma wa?

2. Mun na i ka ɲi ka miiri koɲuman ka sɔrɔ k’a latigɛ ka kɛ mɔgɔ ɲinila ye? Mun lo bena i dɛmɛ k’o latigɛ?

² N’a sɔrɔ i ye ɲɛtaga kɛ i ka bibulukalan na ani sisan i ka ɲi k’a latigɛ n’i bena kɛ kibaro diiman weleweledala ye. N’i be sigasigara ka sɔn Yezu ka welekan ma, kana i fari faga. N’a sɔrɔ i be sigasigara sabu i b’a lɔn k’o desizɔn kɔrɔtanin lo kosɔbɛ. Tiɲɛn lo ko Bibulu b’a fɔ ko Piyɛri n’a tɔɲɔgɔnw y’u ka jɔɔw to yen ka tugu Yezu kɔ “o yɔrɔnin kelen.” Nka, u m’o desizɔn ta u kunfɛ. U ye Yezu lɔn ani u sɔnna a ma ko ale lo ye Masiya ye, a kalo wɔɔrɔ ni kɔ ye nin ye (Zan 1:35-42). O cogo kelen na, n’a sɔrɔ i  ye koo caaman lɔn Jehova ni Yezu koo la ani i b’a fɛ ka to ka ɲɛtaga kɛ Alako ta fan fɛ. Nka, i ka ɲi ka miiri koɲuman ka sɔrɔ k’a latigɛ ka kɛ weleweledala ye. Mun lo ye Piyɛri, Andere ani tɔɔw dɛmɛ k’o desizɔn ta?

3. Jogo jumanw lo bena i lasun ka sɔn Yezu ka welekan ma?

³ Yezu ka kalanden fɔlɔw ka baara tun ka di u ye, u tun b’a kɛcogo lɔn, u jaa tun ka gwɛlɛ ani u y’u jija k’u yɛrɛ kolo, u tun b’o kɛ. Siga t’a la, o jogow y’u dɛmɛ ka kɛ waajulikɛla ɲumanw ye fana. Barokun nin bena a yira cogo min na i be se ka kɛ n’o jogow ye walisa ka kɛ Yezu ka kalanden ɲuman ye.

4. Mun lo ye Piyɛri lasun a kɛra mɔnikɛla ye?

⁴ Piyɛri tun be mɔni lo kɛ k’a ka denbaya mako wasa. Nka, o tun tɛ baara dama lo ye a fɛ. A be komi jɛgɛminɛ tun ka di a ye (Zan 21:3, 9-15). A y’a jija fana walisa waajuli ka diya a ye. Jehova ka dɛmɛ barika la, a sera waajuli la koɲuman.—Kɛw. 2:14, 41.

5. Ka kɛɲɛ ni Luka 5:8-11 ye, mun na Piyɛri tun sirannin lo? Mun lo be se k’an dɛmɛ ka see sɔrɔ siranya kan?

⁵ An be waajuli kɛ kuun fɔlɔ min kama, o ye ko an be Jehova kanu. O kanuya bena an dɛmɛ ka Jehova kofɔ tɔɔw ye, hali n’an b’a jati ko an tɛ se ka waajuli kɛ. Tuma min na Yezu y’a ɲini Piyɛri fɛ a ka kɛ mɔgɔ ɲinila ye, a y’a fɔ Piyɛri ye ko: “Kana siran.” (Luka 5:8-11 kalan). Min tun be se ka Piyɛri sɔrɔ n’a kɛra Yezu ka kalanden ye, Piyɛri tun tɛ siranna o lo ɲɛ. Yezu tun ye kabako min kɛ k’u dɛmɛ u ye jɛgɛ caaman minɛ, o lo tun  y’a kabakoya. O kama, a tun b’a jati ko nɛɛmaba lo ka kɛ Yezu ka kalanden ye ani ko ale man kan n’o ye. Ele fana be se ka siran n’i y’a faamu a kɔrɔ ye min ye ka kɛ Krista ka kalanden ye. N’o lo, dɔ fara i ka kanuya kan Jehova, Yezu ani i mɔgɔɲɔgɔnw koo la. O bena i lasun ka sɔn Yezu ka welekan ma.—Mat. 22:37, 39; Zan 14:15.

6. Kuun wɛrɛ jumanw kama an be waajuli kɛ?

⁶ An k’a filɛ kuun wɛrɛ minw kama an be waajuli kɛ. An b’a fɛ ka Yezu ka cikan nin labato: “Aw ye taga siyaw bɛɛ kɛ ne ka kalandenw ye.” (Mat. 28:19, 20). An be waajuli kɛ fana sabu mɔgɔw ‘sigɛnnin lo, u dusu kasinin lo’ ani u mako gwɛlɛ b’a la ka tiɲɛn lɔn Ala ka Masaya koo la (Mat. 9:36). Jehova b’a fɛ mɔgɔ sifa bɛɛ ka tiɲɛn lɔn ani u ka kisi.—1 Tim. 2:4.

7. Ɔrɔmukaw 10:13-15 b’a yira cogo di ko waajuli baara kɔrɔtanin lo?

⁷ An ka waajuli baara be se ka mɔgɔw kisi cogo min na, n’an miirila o la, o bena an lasun ka waajuli kɛ. Mɔnikɛla be jɛgɛw minɛ walisa k’u dumu wala k’u feere. Nka, an be mɔgɔw “ɲini” walisa u ka se ka kisi.—Ɔrɔmukaw 10:13-15 kalan; 1 Tim. 4:16.

8-9. Mɔnikɛla ka ɲi ka mun lo lɔn ani mun na?

⁸ Yezu ka wagati la, Israɛlden minw tun ye mɔnikɛlaw ye, olu tun ka ɲi k’a lɔn u tun be se ka jɛgɛ sifa minw minɛ (Lev. 11:9-12). U tun ka ɲi k’a lɔn fana u tun be se k’o jɛgɛw sɔrɔ yɔrɔ minw na. Jii yɔrɔ minw bɛnnin be jɛgɛw ma ani dumuni ka ca yen, jɛgɛw ka teli ka sɔrɔ o yɔrɔw lo la. Mɔnikɛla b’a ka baara kɛ wagati min na, o fana kɔrɔtanin lo. A kɔrɔsi Jehova Seere dɔ ye min fɔ o koo la. O balimacɛ be Pasifiki guun dɔ kan ani loon dɔ, a y’a ɲini misɔnden dɔ fɛ ko u ka taga jɛgɛ minɛ. O misɔnden y’a fɔ a ye ko: “An be ɲɔgɔn sɔrɔ sini sɔgɔma 9h wagati.” Balimacɛ ko: “A tɛ kɛ ten dɛ. Jɛgɛw be sɔrɔ wagati min na, an ka ɲi ka taga o wagati lo la, an tɛ taga wagati min k’an diya.”

⁹ O cogo kelen na, saan kɛmɛkulu fɔlɔ la, Yezu ka kalandenw tun be taga mɔgɔw ɲini wagati ani yɔrɔ min na u be sɔrɔ. Ɲɛyirali fɛ, u tun be waajuli kɛ Alabatoso ni kalansow kɔnɔ, soo ni soo ani lɔgɔfiyɛ la (Kɛw. 5:42; 17:17; 18:4). An fana ka ɲi k’a ɲini k’an ka kafo ka kiinmɔgɔw ka delinankow lɔn. An ka ɲi ka sɔn ka yɛlɛmaniw kɛ walisa ka taga waajuli kɛ yɔrɔ ani wagati min na an ka teli ka mɔgɔw sɔrɔ.—1 Kor. 9:19-23.

10. Jehova ka ɔriganisasiyɔn be baarakɛminan jumanw lo di an ma?

¹⁰ Mɔnikɛla mako be baarakɛminan ɲumanw na ani a ka ɲi k’a lɔn baara be kɛ cogo min na n’u ye. An fana mako be baarakɛminan ɲumanw na waajuli kama. An ka ɲi k’a lɔn fana baara be kɛ n’u ye cogo min na. Yezu y’a yira ka gwɛ a ka kalandenw na u ka ɲi ka mɔgɔw ɲini cogo min na. A y’a fɔ u ye u ka ɲi ka fɛɛn minw ta, ka waajuli kɛ yɔrɔ min na, ani u ka ɲi ka min fɔ mɔgɔw ye (Mat. 10:5-7; Luka 10:1-11). Bi, Jehova ka ɔriganisasiyɔn be kalankɛminan minw di an ma, u b’an dɛmɛ koɲuman an ka baara la. * Jehova ka ɔriganisasiyɔn b’an degi baarakɛcogo la n’o minanw ye. O  fɔrɔmasɔn b’an dɛmɛ an hakili ka sigi waajuli la ani an ka se mɔgɔw kalancogo la koɲuman.—2 Tim. 2:15.

11. Mun na waajulikɛlaw ka ɲi k’u jaa gwɛlɛya?

¹¹ Mɔnikɛlaw ka ɲi k’u jaa gwɛlɛya sabu u tɛ se k’a lɔn tuma bɛɛ wagati min bena kɛ. Sanji yɛrɛ be se ka bari ka daminɛ. Ka fara o kan, u ka teli ka baara kɛ sufɛ dibi la. Mɔgɔ ɲinilaw fana ka ɲi k’u jaa gwɛlɛya. N’an y’a daminɛ ka waajuli kɛ ani k’a fɔ mɔgɔw ye ko an ye Jehova Seerew ye, an somɔgɔw be se k’an kɛlɛ, an teriw be se k’an lɔgɔbɔ ani dɔw be se ka ban k’an lamɛn. Nka o tɛ bari an na. Yezu y’a ka kalandenw lasɔmi ko a bena u ci ka taga mɔgɔ minw waaju, o mɔgɔw bena u kɛlɛ.—Mat. 10:16.

12. Ka kɛɲɛ ni Zozuwe 1:7-9 ka fɔta ye, an be se ka jagwɛlɛya sɔrɔ cogo di?

¹² I be se ka jagwɛlɛya sɔrɔ cogo di? A fɔlɔ, la a la ko ka Yezu to sankolo la, a bele be waajuli baara ɲɛminɛna (Zan 16:33; Yir. 14:14-16). A filanan, la a la ko Jehova ye layidu min ta ko a bena a janto i la, a bena o dafa (Mat. 6:32-34). N’i ka limaniya barika tora ka bonya, dɔ bena to ka fara i ka jagwɛlɛya kan. Piyɛri n’a tɔɲɔgɔnw y’u ka baloɲini baara to yen walisa ka tugu Yezu kɔ. U y’a yira o cogo la k’u ka limaniya barika ka bon. Ele y’a fɔ i teriw n’i somɔgɔw ye ko i y’a daminɛ ka bibulukalan kɛ ni Jehova Seerew ye  ani ka taga u ka lajɛnw na! O cogo la, i fana y’a yira ko i ka limaniya barika ka bon! Siga t’a la, i ye yɛlɛmanibaw kɛ i sɔɔn n’i ka ɲɛnamaya kɛcogo la walisa ka se ka Jehova ka sariya tilenninw sira tagama. O tɛ ɲɛ limaniya ni jagwɛlɛya kɔ. N’i tora ka dɔ fara i ka jagwɛlɛya kan, la a la ko Jehova “i ka Ala le bena to i fɛ i taayɔrɔw bɛɛ la.”—Zozuwe 1:7-9 kalan.

13. N’i be miiri Jehova ka kokɛtaw la ani n’i b’a deli, o be se k’i dɛmɛ cogo di ka jagwɛlɛya sɔrɔ?

¹³ I be se ka jagwɛlɛya sɔrɔ cogo wɛrɛ jumanw na? Jehova deli a k’i jaa gwɛlɛya (Kɛw. 4:29, 31). A bena i ka deliliw jaabi ani a tɛna i to yen abada. A bena to k’i dɛmɛ tuma bɛɛ. Ka fara o kan, Jehova y’a sagokɛlaw kisi cogo min na galen, miiri o la. Miiri fana a y’i dɛmɛ cogo min na gwɛlɛyaw wagati la ani ka fanga di i ma i y’i ka ɲɛnamaya kɛcogo yɛlɛma. Jehova y’a ka jama ɲɛminɛ ka Kɔgɔji Wulen cɛtigɛ. Siga t’a la, a be se ka ele fana dɛmɛ ka kɛ Krista ka kalanden ye (Ɛkiz. 14:13). I jija ka kɛ ni Zaburu sɛbɛbaga ka limaniya ɲɔgɔn ye. Ale y’a sɛbɛ ko: “Masaba be ni ne ye, ne tena siran foyi ɲa. Adamadenw be se ka mun kɛ ne la?”—Zab. 118:6.

14. An be kalan juman lo sɔrɔ Masae ni Tomoyo ka koo la?

¹⁴ I be se ka jagwɛlɛya sɔrɔ cogo wɛrɛ la tugun. Miiri weleweledala dɔw koo la. Kuma tun man di u ye ani Jehova y’u dɛmɛ ka jagwɛlɛya sɔrɔ. An ka balimamuso Masae ka koo lajɛ. Komi kuma tun man di a ye, a tun b’a miiri ko a tɛna se ka waajuli kɛ abada. A tun tɛ mɔgɔ minw lɔn, a tun ka gwɛlɛ a ma kosɔbɛ ka kuma u fɛ. Ale fɛ, o tun be komi kogo jamanjan, a tun tɛ se ka min sago abada. A ye jijalibaw kɛ walisa ka Jehova n’a mɔgɔɲɔgɔnw kanu kosɔbɛ. Komi waajuli ye kɔrɔtɔko lo ye bi, a miirila o la ani a ye delili kɛ walisa waajuli ka diya a ye kosɔbɛ. A ye see sɔrɔ a ka siranya kan ani a yɛrɛ kɛra kudayi piyɔniye ye. Jehova be se ka weleweledala kuraw fana “jaa gwɛlɛya.” Balimamuso Tomoyo ka koo b’o lo yira. Tuma min na a y’a daminɛ ka waajuli kɛ soo ni soo, a ye mɔgɔ fɔlɔ min kunbɛn, ale sɔngɔra ko: “N’ t’a fɛ ka Jehova Seerew ye yan!” O kɔ, a ye daa sama ka tugu fanga la. O koo ma siranya bila Tomoyo la. A yɛrɛ y’a fɔ a ka waajulikɛɲɔgɔn ye ko: “I y’a mɛn a ye min fɔ wa? N’ yɛrɛ ma foyi fɔ, nka a y’a lɔn ko n’ ye Jehova Seere ye. O ye n’ ninsɔn diya kosɔbɛ!” Sisan Tomoyo ye kudayi piyɔniye ye.

15. K’i yɛrɛ kolo, o kɔrɔ ko di? Mun na a kɔrɔtanin lo kerecɛn k’o kɛ?

¹⁵ Mɔnikɛla ɲuman b’a yɛrɛ kolo. K’i yɛrɛ kolo, o ye “ka se ka koow kɛ, i ka kan ka minw kɛ.” Ɲɛyirali fɛ, mɔnikɛla be banba ka wuli sɔgɔma joona ka mɔni daminɛ. A be to a ka baara la fɔɔ k’a laban ani a b’a jija o la hali ni yɔrɔ ɲɛɛ man ɲi. An fana ka ɲi k’an yɛrɛ kolo walisa ka se ka muɲu ani k’an ka baara laban.—Mat. 10:22.

16. An be se k’an yɛrɛ degi yɛrɛkololi la cogo di?

¹⁶ An tɛ wolo ni yɛrɛkololi ye. An ka ɲi k’an yɛrɛ degi le a la. Tuma caaman na, a ka di an ye ka koo nɔgɔmanw lo kɛ. An tɛ se k’an yɛrɛ kolo n’an tɛ se k’an yɛrɛ minɛ. O kama, koo minw kɛ man nɔgɔ an ma, an mako be dɛmɛ na walisa k’an yɛrɛ degi u la. Jehova b’o dɛmɛ lase an ma hakili senu sababu fɛ.—Gal. 5:22, 23.

17. Pol ye jijali min kɛ walisa ka se k’a yɛrɛ kolo, a y’o lakali cogo di 1 Korɛntikaw 9:25-27 kɔnɔ?

 ¹⁷ Ciden Pol tun b’a yɛrɛ kolo. Nka, a sɔnna a ma ko walisa ka se ka koo tilenninw kɛ, fɔɔ a tun k’a “farikolo tɔɔrɔ.” (1 Korɛntikaw 9:25-27 kalan). A ye tɔɔw jija ko u k’u cɛsiri ka koo bɛɛ kɛ “ka ɲa ani ka kɛɲɛ n’o kɛcogo ye.” (1 Kor. 14:40). An ka ɲi k’an yɛrɛ kolo walisa ka to ni delinanko ɲumanw ye Alako ta fan fɛ, i n’a fɔ ka to ka waajuli kɛ tuma o tuma ani ka mɔgɔw kalan.—Kɛw. 2:46.

18. Mun lo b’a to Jehova b’an jati waajulikɛla ɲumanw ye?

¹⁸ Mɔnikɛla min be jɛgɛ caaman minɛ, o lo ye mɔnikɛla ɲuman ye. Nka, waajuli baara be dan na. An ye mɔgɔ hakɛ min dɛmɛ u kɛra Jehova Seerew ye, o lo t’a yira ko an be se waajuli la wala ko an tɛ se a la (Luka 8:11-15). N’an tora ka waajuli kɛ ani ka mɔgɔw kalan, Jehova bena a jati ko an ye waajulikɛla ɲumanw ye. Mun na do? Sabu an be mɛnni kɛra ale n’a Dencɛ fɛ.—Mariki 13:10; Kɛw. 5:28, 29.

19-20. An be waajuli kɛ kuun jɔnjɔn juman lo kosɔn bi?

¹⁹ Jamana dɔw la, mɔnikɛlaw be se ka mɔni kɛ kalo damanin dɔrɔn lo kɔnɔ. N’o wagati be ɲini ka ban, mɔnikɛlaw b’u jija kosɔbɛ jɛgɛminɛ na. An minw ye mɔgɔ ɲinilaw ye, an be waajuli kɛ kuun wɛrɛ kama bi. O ye ko duniɲa ban wagati surunyana kosɔbɛ! Wagati tɔɔ man ca walisa ka kibaro diiman fɔ, o min be mɔgɔ niin kisi. O la, kana koow bila ka suma wala k’a fɔ ko i be wagati ɲuman lo kɔnɔna walisa k’o baara kɔrɔtaninba kɛ.—Waaj. 11:4.

²⁰ Kabi sisan, a to waajuli baara ka diya i ye. A ɲini ka dɔ fara i ka lɔnniya kan Bibulu koo la walisa k’o baara kɛcogo lɔn. I jaa gwɛlɛya fana ani i jija k’i yɛrɛ kolo. Mɔgɔ miliyɔn seegi ni kɔ ye mɔgɔ ɲinilaw ye. N’i farala u kan, “nisɔndiya min be bɔ” Jehova fɛ, i bena o sɔrɔ (Neemi 8:10). I seko bɛɛ kɛ waajuli la ani to k’a kɛ fɔɔ ka taga se a laban na. Barokun nata la, an bena cogo saba lajɛ minw bena an dɛmɛ an k’an jija kosɔbɛ ka to ka waajuli kɛ ani ka mɔgɔw kalan Ala ka Masaya koo la.