1. Gbehwan tɛ Jezu ka nyi sɛ́dó hwehutɔ́ ɛnɛ? Nɛ̌ ye ka wà nǔ gbɔn?

HWEHUHUJƆ wɛ Piyɛ́ɛ, Andle, Jaki, kpo Jaan kpo nɔ wà. Kpɔ́n lee é na ko kpaca ye sɔ hwenu e Jezu ɖɔ xó elɔ é: “Mi xwedó mì; un na na kplɔ́n mi, bɔ mi na nɔ dɔn gbɛtɔ́ lɛ, lee mi nɔ nyi ɖɔ dó wlí hweví gbɔn é.” * Etɛ ye ka wà? Biblu ɖɔ: ‘Azɔn ɖokpo ɔ, ye jó akló yetɔn dó, bo xwedó è.’ (Mat. 4:18-22) Gbeta enɛ e kɔn ye wá é na ɖyɔ gbɛ̀ yetɔn kaka sɔyi. Ye sɔ́ na nɔ wlí hweví ǎ, é nyɔ́ wà ɔ, “gbɛtɔ́ lɛ wɛ [ye] na nɔ dɔn.” (Luk. 5:10) Égbé ɔ, Jezu gbló ada nú mɛylɔylɔ́ enɛ ɖokpo ɔ, bo nɔ ylɔ́ ayijlɔjlɔnɔ e yí wǎn nú nǔgbo ɔ lɛ é. (Mat. 28:19, 20) A ka ko sɔ ylɔ̌ Jezu tɔn enɛ bo nɔ dɔn gbɛtɔ́ lɛ hweví ɖɔhun à?

2. Etɛwu mǐ ka ɖó na ylɔ́ gbeta ɔ kɔn wíwá bo na dɔn gbɛtɔ́ lɛ hweví ɖɔhun ɖɔ nǔjɔnǔ? Etɛ ka na d’alɔ mǐ bɔ mǐ na ɖè afɔ enɛ?

² Vlafo ɔ, a ko yì nukɔn ɖò Biblu kplɔnkplɔn towe mɛ, bɔ dìn ɔ, é byɔ ɖɔ a ni wá gbeta ɔ kɔn bo na huzu wɛnɖagbejlatɔ́ ɖé alǒ gbɔ. Nú a ɖò nǔ xò kpɔ́n wɛ dó ylɔ̌ Jezu tɔn enɛ sísɔ́ wu hǔn, awakanmɛ ni ma kú we ó. Nǔ e xò kpɔ́n wɛ a ɖè é sixu xlɛ́ ɖɔ a tuùn ɖɔ gbeta enɛ ɖò taji tawun. Nǔgbo wɛ ɖɔ Biblu ɖɔ ɖɔ Piyɛ́ɛ kpo gbɛ̌ tɔn lɛ kpo jó ɖɔ yetɔn lɛ dó “azɔn ɖokpo.” É ɖò mɔ̌ có, Piyɛ́ɛ kpo nɔví tɔn kpo zɔn kplakpla jí bo wá gbeta enɛ kɔn ǎ. Sun ayizɛ́n jɛji jɛ nukɔn nú hwenɛnu ɔ, ye ko tuùn ɖɔ Jezu wɛ nyí Mɛsiya ɔ bo yí gbè na. (Jaan 1:35-42) Mɔ̌ ɖokpo ɔ, a sixu ko kplɔ́n nǔ gegě dó Jehovah kpo Jezu kpo wu bo jló na yì nukɔn ɖò gbigbɔ lixo. Amɔ̌, cobonu a na wá gbeta ɔ kɔn bo huzu  wɛnjlatɔ́ ɔ, a ɖó na lin tamɛ kpɔ́n ganji hwɛ̌. Etɛ lɛ ka d’alɔ Piyɛ́ɛ, Andle kpo mɛ ɖevo lɛ kpo bɔ ye wá gbeta yetɔn lɛ kɔn?

3. Jijɔ tɛ lɛ ka na na hlɔnhlɔn jlǒ e mǐ ɖó bo na sɔ ylɔ̌ Jezu tɔn é?

³ Ahwanvu Jezu tɔn nukɔntɔn lɛ ɔ, akpakpa nɔ sɔ́ ye, ye ɖó nukúnnúmɔjɛnǔmɛ, nɔ kpan akɔ́n bo nɔ lɛ́ gbɛ́ nǔ nú yeɖée. Jijɔ enɛ lɛ d’alɔ ye bɔ wɛnɖagbejijlazɔ́ ɔ bí alɔ nú ye. Xóta elɔ na ɖɔ xó dó lee a sixu sɔnǔ nú jijɔ enɛ lɛ gbɔn bo na huzu wɛnɖagbejlatɔ́ e azɔ̌ ɔ bí alɔ na é jí.

4. Etɛ ka sísɛ́ Piyɛ́ɛ bɔ é huzu hwehutɔ́?

⁴ Piyɛ́ɛ nɔ wlí hweví dó kpé nukún dó xwédo tɔn wu, amɔ̌, agbazazɔ́ ɖé kpowun wɛ hwehuhu nyí n’i ǎ. É cí ɖɔ é yí wǎn nú hwehuhu. (Jaan 21:3, 9-15) É lɛ́ kplɔ́n bo yí wǎn nú gbɛtɔ́ lɛ dindɔn hweví ɖɔhun. Kpo alɔdó Jehovah tɔn kpo ɔ, alɔ sè kpɛ́n nú Piyɛ́ɛ tawun ɖò azɔ̌ enɛ kɔn.—Mɛ. 2:14, 41.

5. Sɔgbe xá Luki 5:8-11 ɔ, etɛwu xɛsi ka ɖi Piyɛ́ɛ? Etɛ lɛ ka sixu d’alɔ mǐ bɔ mǐ na ɖu ɖò linlin mɔ̌hun lɛ jí?

⁵ Mǐ nɔ jlá wɛn ɔ ɖó mǐ yí wǎn nú Jehovah wu; nǔ nukɔntɔn e nɔ sísɛ́ mǐ dó azɔ̌ enɛ kɔn é nɛ. Wǎn e mǐ yí nú Jehovah é sixu d’alɔ mǐ bɔ mǐ na ɖu ɖò linlin ɖebǔ e mǐ sixu ɖó ɖɔ mǐ kún jɛxa azɔ̌ ɔ ó é jí. Hwenu e Jezu ylɔ́ Piyɛ́ɛ bonu é na nɔ dɔn gbɛtɔ́ lɛ hweví ɖɔhun é ɔ, é ɖɔ n’i ɖɔ: “Ado ma hu we ó.” (Xà Luki 5:8-11.) Nǔ e sixu jɛ hwenu e Piyɛ́ɛ na huzu ahwanvu é wɛ dó xɛsi i ǎ. É nyɔ́ wà ɔ, lee Jezu d’alɔ ye gbɔn bɔ ye wlí hweví gegě é wɛ jiwǔ nú Piyɛ́ɛ, bɔ é mɔ ɖɔ emi kún jɛxa bo na wà azɔ̌ xá Jezu ó. Ðò alɔ ɖevo mɛ ɔ, enyi a  mɔ nǔ jɛ nǔ e ahwanvu Klisu tɔn nyínyí byɔ é mɛ ɔ, xɛsi sixu ɖi we. Enɛ wu ɔ, nǎ hlɔnhlɔn wǎn e a yí nú Jehovah, Jezu kpo nɔzo towe lɛ kpo é, enɛ ɔ, akpakpa na sɔ́ we bɔ a na sɔ ylɔ̌ Jezu tɔn bo na nɔ dɔn gbɛtɔ́ lɛ hweví ɖɔhun.—Mat. 22:37, 39; Jaan 14:15.

6. Hwɛjijɔ ɖevo tɛ lɛ wu akpakpa ka nɔ sɔ́ mǐ dó wɛnjijlazɔ́ ɔ wu?

⁶ Kpɔ́n hwɛjijɔ ɖevo e wu akpakpa nɔ sɔ́ mǐ dó wɛnjijlazɔ́ ɔ wu lɛ é. Mǐ ba na setónú nú gbeɖiɖe Jezu tɔn e ɖɔ ɖɔ ‘mi yì bo kplɔ́n nǔ mɛ lɛ, bonu ye ni huzu ahwanvu’ é. (Mat. 28:19, 20) Mǐ nɔ lɛ́ jlá wɛn ɔ, ɖó gbɛtɔ́ lɛ ɔ, “nǔ gbɛ́ dó ye, bɔ wǔ kú ye” bɔ ye lɛ́ ɖò biba wɛ vɛnavɛna bá kplɔ́n nǔgbo ɔ dó Axɔ́suɖuto ɔ wu. (Mat. 9:36) Jehovah jló ɖɔ gbɛtɔ́ alɔkpa lɛ bǐ ni tuùn nǔgbo ɔ bǐ dégbédégbé, bo mɔ hwlɛngán.—1 Tim. 2:4.

7. Nɛ̌ Hlɔmanu lɛ 10:13-15 ka xlɛ́ ɖɔ wɛnjijlazɔ́ ɔ ɖò taji gbɔn?

⁷ Enyi mǐ nɔ lin tamɛ dó lè e wɛnjijlazɔ́ mǐtɔn sixu hɛn wá é jí ɔ, akpakpa na sɔ́ mǐ dó gbɛhwlɛngánzɔ́ enɛ wiwa wu. Hwehutɔ́ ɖé nɔ sà alǒ ɖu hweví e é wlí lɛ é, amɔ̌, mǐdɛɛ lɛ nɔ “dɔn” gbɛtɔ́ lɛ bo na dó hwlɛn gbɛ̀ yetɔn gán.—Xà Hlɔmanu lɛ 10:13-15; 1 Tim. 4:16.

8-9. Etɛ hwehutɔ́ ɖé ka ɖó na tuùn? Etɛwu?

⁸ Ðò Jezu hwenu ɔ, Izlayɛli-ví hwehutɔ́ ɖé ɖó na tuùn hweví alɔkpa e é ɖó na wlí é. (Lev. 11:9-12) É ɖó na lɛ́ tuùn fí e é sixu mɔ hweví lɛ ɖè é. Hwɛhwɛ ɔ, hweví lɛ nɔ nɔ fí e nyɔ́ nú ye ɖò tɔ̀ ɔ mɛ bɔ nǔɖuɖu sukpɔ́ ɖè é. Táan e mɛ hwehutɔ́ ɖé na yì wlí hweví é lɔ ɖò taji. Mɛsɛ́dó ɖé nɔ nɔ tɔtɛntinto Pacifique tɔn ɖé mɛ bo wá mɔ nǔ jɛ wu ɖɔ hwenu tawun ɖé tíìn bo nyɔ́ hugǎn bɔ è na yì wlí hweví. Kúnnuɖetɔ́ xá ɔ mɛ tɔn ɖé byɔ ɛ ɖɔ é na kplá emi yì hweví wlí gbé. Mɛsɛ́dó ɔ ɖɔ: “Mǐ na kpé sɔ zǎnzǎn gan tɛnnɛ mɛ.” Nɔví ɔ yí gbè n’i ɖɔ, “A mɔ nǔ jɛ mɛ ǎ. Hwenu e nyɔ́ bɔ è na wlí hweví é wɛ mǐ nɔ yì, é nyí hwenu e nyɔ́ nú mǐdɛɛ lɛ é ǎ.”

⁹ Mɔ̌ ɖokpo ɔ, mɛ e nɔ dɔn gbɛtɔ́ lɛ hweví ɖɔhun ɖò xwè kanweko nukɔntɔn ɔ mɛ lɛ é nɔ yì fí e gbɛtɔ́ lɛ ɖè é kpo táan e mɛ ye sixu ɖò finɛ é kpo. Ði kpɔ́ndéwú ɔ, ahwanvu Jezu tɔn lɛ jlá wɛn ɔ ɖò tɛmpli mɛ, ɖò kplɔ́ngbasá Jwifu lɛ tɔn lɛ, gbɔn xwégbe xwégbe, kpo axi lɛ mɛ kpo. (Mɛ. 5:42; 17:17, nwt; 18:4) Mǐ lɔ ɖó na tuùn lee mɛ lɛ nɔ wà nǔ gbɔn ɖò fí e mǐ nɔ ɖɔ Mawuxó ɖè é. Mǐ lɔ ɖó na nɔ ɖyɔ tuto mǐtɔn bo na dó sixu jlá wɛn ɔ mɛ lɛ ɖò fí e mǐ sixu yawǔ mɔ ye ɖè é kpo hwenu e mǐ na mɔ ye dó é kpo.—1 Kɔ. 9:19-23.

10. Azɔ̌wanú tɛ lɛ tutoblonunu Jehovah tɔn ka na mǐ?

¹⁰ Hwehutɔ́ ɖé ɖó na ɖó azɔ̌wanú e jɛxa lɛ é bo ɖó na tuùn lee é na zán ye gbɔn é. Mǐ lɔ ɖó hudo azɔ̌wanú ɖěɖee jɛxa azɔ̌ mǐtɔn lɛ é tɔn. Mǐ ɖó na lɛ́ tuùn lee mǐ na zán ye gbɔn é. Jezu na alixlɛ́mɛ e zawě lɛ é ahwanvu tɔn lɛ dó lee ye na dɔn gbɛtɔ́ lɛ hweví ɖɔhun gbɔn é wu. É ɖɔ nǔ e ye ɖó na hɛn é, fí e ye na jlá wɛn ɔ ɖè é kpo nǔ e ye na ɖɔ é kpo nú ye. (Mat. 10:5-7; Luk. 10:1-11) Égbé ɔ, tutoblonunu Jehovah tɔn sɔnǔ nú Azɔ̌wanúgbá Mɛkplɔnkplɔn tɔn ɖé bɔ azɔ̌wanú e nɔ w’azɔ̌ ganji lɛ é ɖ’emɛ. * Bɔ è nɔ lɛ́ kplɔ́n mǐ lee mǐ na zán azɔ̌wanú enɛ lɛ gbɔn é. Azɔ̌kplɔnmɛ enɛ nɔ d’alɔ mǐ bɔ mǐ nɔ ɖó  jiɖiɖe bo nɔ lɛ́ ɖó nǔwukpíkpé e sín hudo mǐ ɖó bo na w’azɔ̌ ɔ ganji é.—2 Tim. 2:15.

11. Etɛwu mɛ e nɔ dɔn gbɛtɔ́ lɛ hweví ɖɔhun lɛ é ka ɖó na kpankɔ́n?

¹¹ Hwehutɔ́ lɛ ɖó na kpan akɔ́n. Hweɖelɛnu ɔ, ajijimɛnú lɛ sixu jɛ ɖò tɔ̀ jí. Hwɛhwɛ wɛ ye nɔ w’azɔ̌ ɖò zǎnmɛ ɖò tɔ̀ e jí jɔhɔn syɛnsyɛn lɛ sixu bɛ́ ɖè ajijimɛ é. Mɛ e nɔ dɔn gbɛtɔ́ lɛ hweví ɖɔhun lɛ é lɔ ɖó na kpankɔ́n. Nú mǐ jɛ Mawuxó ɖɔ jí bo ɖexlɛ́ ɖɔ mǐ nyí Kúnnuɖetɔ́ Jehovah tɔn ɔ, nǔ e cí jɔhɔn syɛnsyɛn ɖɔhun lɛ é sixu wá xwetɔ́n, ɖi gbeklánxámɛ xwédo tɔn, slamɛɖɔmɛwu, kpo wɛn mǐtɔn e mɛ lɛ nɔ gbɛ́ é kpo. Amɔ̌, enɛ nɔ kpaca mǐ ǎ. Jezu ko gb’akpá nú ahwanvu tɔn lɛ ɖɔ mɛ lɛ na klán gbè xá ye.—Mat. 10:16.

12. Sɔgbe xá Jozuwée 1:7-9 ɔ, etɛ lɛ ka sixu d’alɔ mǐ bɔ mǐ na sɔnǔ nú akɔ́nkpinkpan?

¹² Nɛ̌ mǐ ka sixu sɔnǔ nú akɔ́nkpinkpan gbɔn? Nukɔntɔn ɔ, ɖeji ɖɔ Jezu kpò ɖò nukún kpé dó azɔ̌ ɔ wu wɛ sín jixwé. (Jaan 16:33; Nǔɖe. 14:14-16) Enɛ gudo ɔ, nǎ hlɔnhlɔn nǔɖiɖi e a ɖó dó akpá e Jehovah dó ɖɔ emi na kpé nukún dó wǔ we é wu é. (Mat. 6:32-34) Lě dò nǔɖiɖi towe na syɛn sɔ é ɔ, mɔ̌ dò wɛ a na lɛ́ kpan akɔ́n sɔ. Piyɛ́ɛ kpo gbɛ̌ tɔn lɛ kpo ɖè nǔɖiɖi ɖaxó xlɛ́ hwenu e ye jó agbazazɔ́ yetɔn dó bo xwedó Jezu é. Mɔ̌ ɖokpo ɔ, hwi lɔ ɖè nǔɖiɖi ɖaxó xlɛ́ hwenu e a ɖɔ nú xɔ́ntɔn towe lɛ kpo xwédo towe sín mɛ lɛ kpo ɖɔ  emi jɛ Biblu kplɔ́n xá Kúnnuɖetɔ́ Jehovah tɔn lɛ jí, lobo jɛ kplé yetɔn lɛ yì jí é. É ɖò wɛn ɖɔ a ko huzu nǔwalɔ gegě kpo lee a nɔ zán gbɛ̀ gbɔn é kpo bo na dó zán gbɛ̀ sɔgbe xá nǔgbododó jlɔjlɔ Jehovah tɔn lɛ. Enɛ ɖesu byɔ nǔɖiɖi kpo akɔ́nkpinkpan kpo. Enyi a fɔ́n bo ɖò nǔ sɔ́ nú akɔ́nkpinkpan wɛ ɔ, a sixu kúdeji ɖɔ ‘Jehovah, Mawu towe na ɖò kpɔ́ xá we ɖò fí e a na gbɔn lɛ bǐ.’—Xà Jozuwée 1:7-9.

13. Nɛ̌ tamɛ linlin kpo ɖɛ kpo ka sixu d’alɔ mǐ bɔ mǐ na sɔnǔ nú akɔ́nkpinkpan gbɔn?

¹³ Nǔ ɖevo tɛ a ka sixu wà bá dó sɔnǔ nú akɔ́nkpinkpan? Nɔ xoɖɛ bo nɔ byɔ akɔ́nkpinkpan. (Mɛ. 4:29, 31) Jehovah na na sinkɔn nú ɖɛ towe lɛ; é ka na jó we dó gbeɖé ǎ. É ɖò finɛ hwebǐnu bo na d’alɔ we. A sixu nɔ lin tamɛ dó lee Jehovah ko hwlɛn mɛɖé lɛ gán gbɔn wá yì é jí. Lɛ̌ lin tamɛ dó lee é d’alɔ we bɔ a ɖu ɖò wuvɛ̌ lɛ jí, bo lɛ́ na we hlɔnhlɔn bɔ a bló huzuhuzu lɛ ɖò gbɛzán towe mɛ gbɔn é jí. É ɖò wɛn ɖɔ Éyɛ Mɛ e nɔ nukɔn nú togun tɔn bo kplá ɛ gbɔn Xù Vɔvɔ ɔ mɛ é sixu d’alɔ we bɔ a na huzu ahwanvu Klisu tɔn. (Tín. 14:13) Ðǒ jiɖiɖe ɖokpo ɔ ɖɛhan-wlantɔ́ e ɖɔ xó elɔ é ɖɔhun: “Mawu Mavɔmavɔ ɖò jǐ ce, un ɖi xɛsi ǎ. Etɛ gbɛtɔ́ ka sixu wà nú mì?”—Ðɛh. 118:6.

14. Etɛ kpɔ́ndéwú Masae kpo Tomoyo kpo tɔn ka kplɔ́n we?

¹⁴ Ali ɖevo e nu a sixu sɔnǔ nú akɔ́nkpinkpan ɖè é wɛ nyí nǔkplɔnkplɔn dó lee Jehovah d’alɔ mɛ e nɔ kú winnya ɖò jɔwamɔ linu, bo ka wá kplɔ́n bo huzu akɔ́nkpantɔ́ lɛ é gbɔn é wu. Kpɔ́n kpɔ́ndéwú nɔví nyɔnu Masae tɔn. É nɔ kú winnya bo nɔ mɔ ɖɔ emi kún sixu jlá wɛnɖagbe ɔ gbeɖé ó. Xó ɖiɖɔ nú jonɔ lɛ cí dǒ ɖaxó e é mɔ ɖɔ emi kún sixu fán gbeɖé ó é ɖɔhun. Enɛ wu ɔ, é dó gǎn tawun bo bló bɔ wǎn e é yí nú Mawu kpo nɔzo tɔn lɛ kpo é gɔ́ngɔ́n. É lin tamɛ dó lee azɔ̌ ɔ mya nukún gbɔn ɖò hwenu e mǐ ɖè dìn é gbɔn é jí, bo byɔ ɖò ɖɛ mɛ ɖɔ Jehovah ni na hlɔnhlɔn jlǒ e emi ɖó bo na jlá wɛn ɔ é. É ɖu ɖò xɛsi tɔn jí bo tlɛ nyí gbexosin-alijitɔ́ hwebǐnu tɔn. Jehovah sixu lɛ́ d’alɔ wɛnjlatɔ́ yɔyɔ̌ lɛ bɔ ye na “kpan akɔ́n.” Kpɔ́n kpɔ́ndéwú nɔví nyɔnu Tomoyo tɔn. Hwenu e é jɛ wɛn ɔ jlá jí gbɔn xwégbe xwégbe é ɔ, xwétɔ́ nukɔntɔn e é xò gò é súxó bo ɖɔ: “Un ba na kpé nǔɖe xá Kúnnuɖetɔ́ Jehovah tɔn lɛ ǎ!” bo sú hɔn tɔn gbaa. Kpo akɔ́nkpinkpan kpo wɛ Tomoyo ɖɔ nú mɛ e kpo é kpo zɔn é ɖɔ: “A sè nǔ e é ɖɔ é à? Un ɖɔ xó ɖebǔ ǎ, bɔ é ka ko tuùn ɖɔ un nyí Kúnnuɖetɔ́ Jehovah tɔn lá. É víví nú mì kpɔ́n!” Dìn ɔ, Tomoyo nyí gbexosin-alijitɔ́ hwebǐnu tɔn ɖé.

15. Etɛ ka nyí nǔ gbigbɛ́ nú mɛɖée? Etɛwu é ka ɖò taji nú Klisanwun lɛ?

¹⁵ Hwehutɔ́ e azɔ̌ ɔ nɔ kpa lɛ é nɔ gbɛ́ nǔ nú yeɖée. Nǔ gbigbɛ́ nú mɛɖée sín tinmɛ wɛ nyí ɖɔ è ni ɖó “nǔwukpíkpé ɔ bo na bló bɔ mɛɖesunɔ na wà nǔ e è ɖó na wà é.” Hwehutɔ́ lɛ ɖó na nɔ gbɛ́ nǔ nú yeɖée bo na dó nɔ fɔ́n zǎn, nɔte kaka bo fó azɔ̌ ɔ, lobo lɛ́ ɖókan dó nǔ wu, enyi ayǐ mɛ na bo ma tlɛ nyɔ́ ǎ ɔ nɛ. Enyi mǐ ba na dɛ bo fó azɔ̌ mǐtɔn ɔ, mǐ lɔ ɖó na nɔ gbɛ́ nǔ nú mǐɖée.—Mat. 10:22.

16. Nɛ̌ mǐ ka sixu sɔnǔ nú nǔ gbigbɛ́ nú mɛɖée gbɔn?

¹⁶ Mǐ nɔ ɖu nǔ gbigbɛ́ nú mɛɖée sín gǔ ǎ. É nyɔ́ wà ɔ, nǔ e fá é wɛ mǐ nɔ yawǔ ba na wà ɖò jɔwamɔ linu. É nɔ byɔ mɛɖéejiɖuɖe bonu è na gbɛ́ nǔ nú mɛɖée. Enɛ wu ɔ, mǐ ɖó hudo alɔdó tɔn bo na kplɔ́n mǐɖée bá dó wà nǔ e sixu vɛwǔ nú mǐ lɛ é. Jehovah  nɔ dó alɔ enɛ mǐ gbɔn gbigbɔ mímɛ́ tɔn jí.—Ga. 5:22, 23.

17. Sɔgbe xá 1 Kɔlɛntinu lɛ 9:25-27 ɔ, etɛ Pɔlu ka ɖɔ ɖɔ emi bló bo na dó nɔ gbɛ́ nǔ nú emiɖée?

¹⁷ Mɛsɛ́dó Pɔlu nɔ gbɛ́ nǔ nú éɖée. É yí gbè ɖɔ emi nɔ “dóya nú” agbaza emitɔn bo na dó wà nǔ e sɔgbe é. (Xà 1 Kɔlɛntinu lɛ 9:25-27.) É ɖè wě xá mɛ ɖevo lɛ ɖɔ ye ni nɔ gbɛ́ nǔ nú yeɖée bo wà nǔ bǐ “lee é jɛxa gbɔn é; [ye] ni bló kpo tito kpo.” (1 Kɔ. 14:40) Mǐ ɖó na nɔ gbɛ́ nǔ nú mǐɖée bo na dó sixu kpò ɖò aca gbigbɔ tɔn ɖagbe ɖé ɖó wɛ; alɔ ɖiɖó hwɛhwɛ ɖò hwehuhuzɔ́ nǔjlɛdonǔwu tɔn ɔ mɛ lɔ ɖò aca enɛ mɛ.—Mɛ. 2:46.

18. Etɛ ka na zɔ́n bɔ Jehovah na mɔ ɖɔ azɔ̌ ɔ kpa mǐ?

¹⁸ Hweví nabi e hwehutɔ́ ɖé wlí é jí wɛ é nɔ zɔn dó bo nɔ ɖɔ ɖɔ hwehuhu ɔ kpa emi. Amɔ̌, mɛ nabi e mǐ dɔn wá tutoblonunu Mawu tɔn mɛ é jí wɛ mǐ nɔ zɔn dó bo nɔ ɖɔ ɖɔ azɔ̌ ɔ kpa mǐ ǎ. (Luk. 8:11-15) Nú mǐ kpò ɖò didɛ wɛ ɖò wɛnɖagbe jijla kpo nǔ kplɔnkplɔn mɛ ɖevo lɛ kpo sín azɔ̌ ɔ kɔn ɔ, Jehovah na mɔ ɖɔ azɔ̌ ɔ ɖò mǐ kpa wɛ. Etɛwu? Ðó mǐ ɖò tónú sè nú É kpo Vǐ tɔn kpo wɛ wutu.—Mak. 13:10; Mɛ. 5:28, 29.

19-20. Hwɛjijɔ taji tɛ wu wɛnjijlazɔ́ ɔ ka ɖó na mya nukún nú mǐ dìn?

¹⁹ Ðò tò ɖé lɛ mɛ ɔ, sun ɖé lɛ mɛ jɛn è nɔ yí gbè bɔ è nɔ wlí hweví. Ðò tò enɛ lɛ mɛ ɔ, enyi hweví wliwlí sín táan ɔ jló na wá vivɔnu ɔ, hwehutɔ́ lɛ nɔ mɔ ɖɔ lo wɛ azɔ̌ ɔ na lɛ́ mya nukún hugǎn nɛ. Ðó mǐ nɔ dɔn gbɛtɔ́ lɛ hweví ɖɔhun wu ɔ, hwɛjijɔ ɖevo e wu wɛnjijlazɔ́ ɔ na mya nukún nú mǐ dìn é wɛ nyí ɖɔ vivɔnu gbɛ̀ elɔ tɔn ko sɛkpɔ́ bǐ. Táan e kpò bɔ mǐ na ɖ’alɔ ɖò azɔ̌ gbɛhwlɛngán tɔn ɔ mɛ é vɔ bǐ. Ma nɔte bonu nǔ lɛ bǐ ni ɖò tɔnfinnɔɔ ɖò gbɛzán towe mɛ cobo wà azɔ̌ taji enɛ ó.—Nǔt. 11:4.

²⁰ Blǒ bonu akpakpa ni nɔ lɛ́ sɔ́ we hugǎn dìn, blǒ bonu nukúnnúmɔjɛnǔmɛ e a ɖó dó Biblu wu é ni gɔ́ngɔ́n, kpan akɔ́n, bo nɔ lɛ́ gbɛ́ nǔ nú hwiɖée. Gɔ̌ nú gbɛtɔ́ livi tantɔn jɛji e nɔ dɔn mɛ hweví ɖɔhun lɛ é, bo na dó ɖu vivǐ awǎjijɛ e Jehovah sinsɛn nɔ hɛn wá é tɔn. (Nɛɛ. 8:10) Kánɖeji bo na ɖ’alɔ ɖò azɔ̌ enɛ mɛ bǐ mlɛ́mlɛ́ kaka jɛ hwenu e é na fó dó é. Ðò xóta e bɔ d’ewu é mɛ ɔ, mǐ na ɖɔ xó dó ali e nu mǐ sixu na hlɔnhlɔn kán e mǐ kánɖeji bo na kpò ɖò wɛnɖagbe Axɔ́suɖuto ɔ tɔn jlá wɛ ɖè é atɔn jí.