1. Ki envitasyon Jézi fè 4 maren-péchè é kijan yo réyaji ?

PYÈ, André, Jak é Jan té disip a Jézi é yo té maren-péchè. Imajiné kijan sa siwprann-yo lèwvwè Jézi fè-yo envitasyon-lasa : « Vin èvè mwen é an ké fè-zòt péché moun *. » Kijan yo réyaji ? Mi sa Labib ka di : « Yo lagé filèt a yo é yo suiv-li » (Mat. 4:18-22). Désizyon-lasa té’é chanjé vi a yo bout pou bout. A pa pwason yo té’é pran ankò, men sé moun yo té’é ‘tchenbé tou vivan’ (Lik 5:10, nòt). Jòdijou osi, Jézi ka mandé moun tchè a yo sensè é ki enmé lavérité si yo vé vin disip a-y é si yo vé préché bon nouvèl-la (Mat. 28:19, 20). Ès ou aksèpté envitasyon-la i fè-w la é ès ou ka péché moun ?

2. a) Si nou désidé vin pwoklamatè, poukwa fò-nou pran désizyon-lasa oséryé ? b) Ka ki ké édé-nou pran désizyon-lasa ?

² Pétèt kè ja ka fè on bon moman kè ou ka étidyé Labib é pétèt kè ou ja byen pwogrésé. Konnyéla, ou ni on désizyon a pran. Fò ou pozé-w kèsyon-lasa : Ès ou ké vin on pwoklamatè pou fè moun konnèt bon nouvèl-la ? Si ou an 2 lidé, pa dékourajé-w ! Pétèt ou ka réfléchi pas ou sav kè désizyon-lasa, fò pa ou pran-y alaléjè. Sé vré, Labib ka di kè Pyè é sé boug-la ki té ka travay èvè-y la, lagé filèt a yo « onfwa-onfwa ». Men Pyè é frè a-y pa pran désizyon a yo si on koudtèt. Sa té ja ka fè plis ki 6 mwa kè yo té konprann kè Jézi sé Mési-la é kè yo té aprann konnèt-li (Jan 1:35-42). Pétèt kè vou osi ou aprann konnèt Jéova é Jézi byen, é kè ou anvi kontinyé pwogrésé pou vin pibon zanmi èvè Jéova ankò. Kon ou sav, kalkil fèt avan konté, alò, avan ou vin pwoklamatè, réfléchi zafè a-w byen. Ka ki édé Pyè, André é dòt moun ankò pran désizyon-lasa ?

3. Ki kalité ki ké édé-w aksèpté envitasyon a Jézi ?

 ³ Pou on moun té pé sa vin maren-péchè, fò i té vréman anvi fè travay-lasa, fò i té konnèt travay-la byen, fò i té ni kouraj, é fò i té sèryé an zafè a-y. Sé pas yo té ni tout sé kalité-lasa kè disip a Jézi vin dé zouti-filé an prédikasyon. Awtik-lasa ké montré kè vou osi ou pé travay sé kalité-lasa é vin on zouti-filé an prédikasyon.

4. Pou ki biten Pyè té ka fè lapèch ?

⁴ Pyè, sé té on maren-péchè é travay-lasa té ka pèwmèt-li nouri fanmi a-y. Lè i té k’ay lapèch, a pa té senplèman pou i té gangné sou a pen a-y, men sé on biten i té enmé fè toubònman (Jan 21:3, 9-15). I aprann enmé fè disip osi. É èvè èd a Jéova, i vin on zouti-filé an domenn-lasa (Akt 2:14, 41).

5. a) Dapré sa ki maké an Lik 5:8-11, poukwa Pyè té pè ? b) Si ou ka santi-w menmjan ki Pyè, ka ki pé édé-w ?

⁵ Nou byen désidé a kontinyé préché pas nou enmé Jéova ; dayè pou yonn, sé prèmyé rézon ki fè si nou ka pawtisipé adan aktivité-lasa. Si nou enmé Bondyé fò, sa ké édé-nou palé dè-y menmsi nou ni lenprésyon kè kò an nou po’o bon pou sa. Lè Jézi mandé Pyè si i té dakò pou i fè disip, i di-y : « Ou pa bizwen pè ankò » (li Lik 5:8-11). Pyè té sav kè si i té ka vin disip a Jézi, nenpòt biten té’é pé rivé-y men a pa sa ki té ka fè-y pè. An réyalité, Pyè pa té ka santi-y alahotè pou kolaboré èvè Jézi davwa Jézi té sòti fè on mirak èstraòwdinè toubònman : i té sòti édé-yo pran onpakèt pwason. Pétèt kè vou osi, lè ou ka sonjé tousa on disip a Jézi ni a fè, ou ni lenprésyon kè ou pé’é rivé fè sa. Ében si ou adan  sitiyasyon-lasa, fò ou fè tousa ou pé pou ou enmé Jéova, Jézi é pwochen a-w plis. Konsa, sa ké édé-w aksèpté envitasyon a Jézi ; ou ké vin on moun ki ka péché moun (Mat. 22:37, 39 ; Jan 14:15).

6. Pou ki dòt rézon ankò, nou anvi ay préché ?

⁶ Men ni dòt biten ankò ki ka fè kè nou byen désidé a préché. Ki biten ésa ? Nou k’ay préché pas nou anvi fè sa Jézi mandé. I di-nou : « Alé é fè disip » (Mat. 28:19, 20). Anplisdisa, nou ka préché pas sé moun-la ‘kòché é ponmoun pa’a pran swen a yo’ é pas yo vréman bizwen tann palé dè Wayòm a Bondyé. Pa ni biten yo pi bizwen ki sa ! (Mat. 9:36). Jéova vlé kè tout kalté moun rivé ni on konésans ègzak a lavérité é kè yo sové (1 Tim. 2:4).

7. Sèlon sa ki maké an Women 10:13-15, poukwa nou pé di kè préché sé on biten ki enpòwtan ?

⁷ Travay a prédikasyon-la ka édé moun sové vi a yo. Si nou ka pran tan réfléchi asi sa, sa ké ban-nou anvi préché plis ankò. Lè on maren-péchè ka tchenbé pwason sé pou vann-yo oben manjé-yo. Men nou, sé moun nou ka tchenbé é sé pou sové vi a yo (li Women 10:13-15 ; 1 Tim. 4:16).

8-9. Ka on péchè bizwen konnèt, é poukwa ?

⁸ An tan a Jézi, fò on péchè té sav ki kalté pwason i té pé tchenbé (Lév. 11:9-12). É fò i té sav ola i té’é pé touvé pwason. Dabitid, pwason ka rété la i ni onlo manjé é on koté yo ka santi-yo byen. Anplisdisa, on maren-péchè pa k’ay an lanmè a nenpòt ki moman. Lè-la ni enpòwtans a-y osi. On Témwen ki ka rété asi on lilèt, ki ka touvé-y an Loséan Pasifik, aprann on misyonè kè ni on lè byen prési pou ou ay tchenbé pwason. I di misyonè-la an-nou ay lapèch èvè-y é misyonè-la réponn-li : « Dakò. Nou ka pran mo pou dèmen maten a 9 è ! » Men frè-la réponn-li : « Men boug an mwen, a pa konsa sa ka maché ! Moun pa k’ay lapèch a lè-la ki ka aranjé-yo la, men yo k’ay lè pwason-la ka mòdé. »

⁹ Menmjan-la, disip a Jézi té k’ay fè disip, la yo té sav yo té’é touvé moun, é a on moman sé moun-la té’é pi fasil a kouté-yo. Sé pousa, disip a Jézi té k’ay préché an Tanp-la, adan sé sinagòg-la, dè kaz-an-kaz é asi sé plas a mawché-la (Akt 5:42 ; 17:17 ; 18:4). Nou osi, fò-nou konnèt a ki lè sé moun-la akaz a yo oben ki koté nou té’é pé rivé a touvé-yo. Fò-nou paré a chanjé pwogram an nou pou nou pé sa ay préché pou yo a lè-la ki ka aranjé-yo la é on koté nou pi fasil a touvé-yo (1 Kor. 9:19-23).

10. Ka òwganizasyon a Jéova ka ban-nou pou kò an nou vin pibon an prédikasyon ?

¹⁰ Fò on péchè ni sé bon zouti-la é fò i sav kijan pou i sèvi èvè yo. Menmjan-la, fò nou ni sé zouti-la ki fo la pou nou pé sa préché é fò-nou konnèt sèvi èvè yo. Jézi montré disip a-y kijan pou yo té préché bon nouvèl-la. I di-yo ka pou yo té pran, ki koté pou yo té ay é ka pou yo té di (Mat. 10:5-7 ; Lik 10:1-11). Jòdijou, òwganizasyon a Jéova ka ban-nou on bwèt a zouti pou anségné. Adan-y, ni piblikasyon é ni vidéo ki ka pèwmèt-nou fè on bèl travay toubònman *. É òwganizasyon a Jéova ka montré-nou kijan pou nou sèvi èvè yo. Grasa fòwmasyon-lasa, nou ka santi-nou pi alèz an prédikasyon, é nou ka anségné sé moun-la pibyen (2 Tim. 2:15).

11. Poukwa lè on moun k’ay fè disip, fò i ni kouraj ?

¹¹ Lè ou sé on maren-péchè, fò ou ni onlo kouraj. Ou pa jen sav ka ou ké jwenn lè ou k’ay an lanmè. Lanmè pé lévé mové a nenpòt ki moman. É souvantfwa, sé lannuit yo k’ay péché. Lè ou k’ay fè disip, fò ou ni kouraj osi. Lè on moun ka koumansé préché é i ka fè moun sav kè i Témwen a Jéova, i pé rivé a jwenn difikilté ki ka touvé-y kon on tanpèt : fanmi a-y pé rivé a anpéché-y sèvi Jéova, zanmi a-y pé ka fè jé èvè-y é dòt moun ankò pé rivé a rèfizé kouté mésaj-la i ka préché la. Men sa pa’a siwprann-nou. Jézi té ja di disip a-y kè yo té’é préché ba moun ki té’é vlé pèwsékité-yo (Mat. 10:16).

12. Dapré sa Joziyé 1:7-9 ka di, ka nou pé fè pou ni plis kouraj ?

¹² Ka ou pé fè pou ni plis kouraj ? 1) Fò ou sèten kè menmsi Jézi an syèl-la, i ka kontinyé dirijé travay a prédikasyon-la (Jan 16:33 ; Rév. 14:14-16). 2) Fò ou fè éfò pou ou toujou ni plis konfyans an Bondyé pas i ka pwomèt-vou kè i ké toujou pran swen a-w (Mat. 6:32-34). Pi fwa a-w ké fò, pi ou ké ni kouraj. Pyè é séla ki té èvè-y la montré kè yo té ni on fwa ki fò pas yo lagé travay a maren-péchè a yo pou suiv Jézi. Vou osi, ou montré kè ou ni on fwa ki fò lè ou di fanmi a-w é zanmi a-w kè ou koumansé étidyé Labib èvè Témwen a Jéova é kè ou k’ay an réinyon a yo. Anplisdisa, sèten ou fè onlo  chanjman an vi a-w é kè ou chanjé konpòwtasyon a-w pas ou té anvi rèspèkté prensip a Labib. Nou ka tou konprann kè sa mandé-w onlo kouraj é kè fò fwa a-w té fò toubònman pou ou té pé fè sa. Si ou ka fè tousa ou pé pou aji èvè kouraj, ou pé sèten kè « Jéova, Bondyé a-w ké èvè-w toupatou ou ké ay » (li Joziyé 1:7-9).

13. Si ou pran tan réfléchi asi Pawòl a Bondyé é si ou pran tan priyé-y, sa pé ba-w plis kouraj. Kijansa ?

¹³ Ka ou pé fè ankò pou ou pé sa ni plis kouraj ? Fò ou priyé Jéova pou mandé-y plis kouraj é fò ou médité asi Pawòl a-y (Akt 4:29, 31). Jéova ké réponn a priyè a-w é i pé’é jen lagé-w. I ké toujou la pou édé-w. Anplisdisa, pran tan réfléchi asi sa Jéova fè pou sové sèwvitè a-y antan lontan. Réfléchi osi asi tousa i ja fè ba-w : i édé-w rivé about a difikilté kè ou té ka jwenn é i ba-w fòs pou ou té pé sa fè chanjman an vi a-w. Sonjé kè Jéova fè pèp a-y travèsé lanmè wouj la. Kifè, i pé édé-w vin on disip a Kris. A pa on biten ki two fò pou-y ! (Ègz. 14:13). Fò ou ni on fwa ki kon ta moun-la ki maké Sòm 118 la. Mi sa i di : « Jéova èvè mwen ; an pé’é pè. Ka on nonm pé fè-mwen ? » (Sòm 118:6).

14. Lè nou ka gadé sa ki rivé Masae é Tomoyo, ka nou ka aprann ?

¹⁴ Ni ondòt biten ou pé fè pou pé sa ni plis kouraj. Ki biten ésa ? Fò ou pran tan ègzaminé ègzanp a sèwten pwoklamatè ki té on ti jan timid é ki rivé a ni plis kouraj grasa Jéova. An-nou palé dè Masae, on sè ki té on ti jan timid é ki té ka pansé kè i pa té’é jen rivé préché. Pou-y, i pa té’é jen pé palé pou on moun i pa konnèt. Sé konsi ou té ka mandé-y janmbé on bayè ki two ho pou-y. Men i fè on gwo éfò pou pé sa enmé Jéova plis é pou i pé sa enmé pwochen a-y plis ankò. Anplisdisa, lè i pran on tan pou réfléchi, i sonjé kè nou ka viv dènyé jou a sistèm-lasa é i mandé Jéova édé-y pou i anvi préché plis. Kifè, i pa té pè ankò é i jous vin pyonyé an ranfò. An-nou vwè ondòt ègzanp ki ka montré kè Jéova pé ba sé nouvo pwoklamatè-la ‘kouraj’ osi. An-nou palé dè on sè non a-y sé Tomoyo. Lèwvwè i koumansé préché dè kaz-an-kaz, prèmyé moun-la i jwenn la di-y konsa : « Ou Témwen a Jéova ? Sa pa ka entérésé-mwen ! », é i ba-y on koudpòt an figi a-y. Tomoyo réyaji èvè onlo sanfwa ; i di sè-la ki té ka préché èvè-y la : « Ou tann sa madanm-la di ? An pa menm ni tan di-y ayen, men limenm a-y ja konprann kè an Témwen a Jéova. A pa ti kontan an kontan ! » Jòdijou, Tomoyo pyonyé pèwmanan.

15. Si nou ni dimal a òwganizé-nou pou préché, kijan ègzanp a sé maren-péchè la pé édé-nou é poukwa fò on krétyen karé adan sa i ka fè ?

¹⁵ Fò on maren-péchè sèryé an zafè a-y. Lè on moun sèryé an zafè a-y, i ka fè éfò pou i fè tousa ki mérité fèt ; i karé adan sa i ka fè. On maren-péchè pa ni lèchwa : i oblijé lévé granbonnè, fò i kontinyé travay jistan i fè tousa i té ni a fè é fò i fè sa menmsi ni mové tan. Nou osi, fò nou karé an zafè an nou si nou vé ni fòs pou nou pé sa andiré é si nou vé fin travay-la Jéova ban-nou fè la (Mat. 10:22).

16. Kijan Jéova pé édé-nou fè sèwten biten kè nou ka touvé rèd a fè ?

¹⁶ Lè on moun karé an zafè a-y, sa bèl toubònman ! Men nou ponyonn pa’a fèt konsa. Souvantfwa, nou préféré pran chimen-la ki pi fasil la. Kifè, fò nou ni métriz pou nou pé sa karé adan sa nou ka fè. Sé pousa, nou bizwen on pal pou nou  pran labitid fè dé biten kè nou ka touvé rèd a fè. Jéova ka ban-nou èd-lasa : i ka ban-nou lèspri sen (Gal. 5:22, 23).

17. Sèlon sa ki maké an 1 Korentyen 9:25-27, ka Pòl té oblijé fè pou i té karé an zafè a-y ?

¹⁷ Lapòt Pòl té karé adan sa i té ka fè. I té ka rèkonnèt kè fò i té ‘ba kò a-y bon kou’ pou fè sa ki byen (li 1 Korentyen 9:25-27). Anplisdisa, i di sé krétyen-la kè yo osi, fò-yo karé adan sa yo ka fè é fò-yo fè tout biten « sèlon sa ki dwètèt é byen annòd » (1 Kor. 14:40). Nou osi, si nou vé kontinyé adoré Jéova kon i ka mandé, fò nou karé adan sa nou ka fè. Pa ègzanp, fò-nou pran labitid préché é anségné bon nouvèl-la (Akt 2:46).

18. Pou Jéova di kè nou fè travay-la i ban-nou fè la konm i fo, ka pou nou fè ?

¹⁸ Lè on maren-péchè pran onlo pwason, i ka di i fè on bèl pèch. Men lè nou ka chèché a fè disip, a pa konsa nou ka vwè sa : a pa kantité moun nou ké édé vin Témwen a Jéova ki ké fè si nou sé on bon pwoklamatè (Lik 8:11-15). Dépi nou ka fè tousa nou pé pou préché é pou anségné, Jéova ka aprésyé sa nou ka fè é pou-y, nou ka fè travay an nou byen konm i fo. Poukwa ? Pas nou ka kontinyé fè sa li é Gason a-y mandé-nou fè (Mawk 13:10 ; Akt 5:28, 29).

19-20. Pou ki rézon an pawtikilyé, fò-nou préché jòdijou ?

¹⁹ Adan sèwten péyi, ou ni dwa ay péché yenki pannan sèwten mwa an lanné-la. Adan sé péyi-lasa, sé maren-péchè la ka pòté plis mannèv lèwvwè sézon-la k’ay bout. Nou, sé disip nou ka fè, men nou osi, nou ni on rézon ki ka pousé-nou a pòté bon mannèv an prédikasyon : sistèm-lasa toupré bout ! Pa’a rété-nou onlo tan pou nou préché. Alò, pa atann kè tout biten vin bèl an vi a-w pou koumansé préché (Ékl. 11:4).

²⁰ Kon nou vwè, fò ou byen désidé a préché, fò ou étidyé Bib a-w pou ou préché pibyen, fò ou aji èvè kouraj é fò ou karé an zafè a-w. É sé alè, pou ou fè tout sé biten-lasa ! Ou ni plis ki 8 milyon moun ki ka préché bon nouvèl-la toupatou si latè. Si ou mété-w ka travay èvè yo, Jéova ké mété jwa a-y an tchè a-w (Néém. 8:10). Fò ou byen désidé a fè tousa ou pé pou préché jiskatan Jéova ké di arété. Adan awtik-la ki ka vin la, nou ké palé dè 3 biten nou pé fè pou nou anvi préché bon nouvèl a Wayòm-la plis ankò.