1. ¿Mbaʼe invitasiónpa Jesús ojapo umi 4 peskadórpe, ha mbaʼéichapa haʼekuéra orresponde?

UMI disípulo Pedro, Andrés, Santiago ha Juan ojededika vaʼekue péskape. Oiméne oñesorprendete rakaʼe hikuái Jesús heʼírõ guare chupekuéra: “Peju chemoirũ ha pomboʼéta pejagarra hag̃ua hénte, pejagarraháicha pira”. * ¿Ha mbaʼépa ojapo hikuái? La Biblia heʼi: “Upepete oheja hikuái irréd ha oho hendive” (Mat. 4:18-22). Upe odesidíva hikuái okambiaite hekovekuéra pára siémpre. Oiko rangue ‘ojagarra pira, haʼekuéra oikóta kuri ojagarra hénte’ (Luc. 5:10). Koʼág̃arupi Jesús oinvita umi ipyʼaporãvape ha ohayhúvape pe añetegua ojapo hag̃ua avei upéicha (Mat. 28:19, 20). ¿Ndépa reaseptáma Jesús invitasión rejagarra hag̃ua hénte ojejagarraháicha pira?

2. ¿Mbaʼérepa repensa porã vaʼerã oikótapa ndehegui puvlikadór, ha mbaʼépa nepytyvõta rejedesidi hag̃ua?

² Oiméne nde restudiáma reikóvo la Biblia peteĩ tiémpore, ha heta mbaʼépe rekambiáma nde rekovépe, ha koʼág̃a tekotevẽta redesidi oikótapa ndehegui puvlikadór. Oiméramo nereñanimái hína reasepta Jesús invitasión, aníkena reñedesanima. Upéva ohechaukánte hína nde reikuaaha iñimportantetereiha ko desisión. Jaikuaa ningo la Biblia heʼiha Pedro ha iñamigokuéra oheja hague “upepete voi” umi rred. Péro Pedro ha iñermáno ndodesidíri upéva opensa porãʼỹre. Haʼekuéra oikuaa ha ogueroviáma vaʼekue voi Jesús haʼeha pe Mesías mas de 6 mésema upe mboyve (Juan 1:35-42). Upéicha avei, oiméne nde reaprendéma heta mbaʼe Jehová  ha Jesúsgui, ha resegise remombareteve nde jerovia. Péro redesidi mboyve oikótapa ndehegui peteĩ puvlikadór, repensa porã vaʼerã hese. ¿Mbaʼépa oipytyvõ rakaʼe Pedro, Andrés ha umi ótrope ojedesidi hag̃ua?

3. ¿Mbaʼe kualidápa nepytyvõta oiko hag̃ua ndehegui Cristo disípulo ikatupyrýva?

³ Jesús disipulokuéra ypykue ikyreʼỹ vaʼekue, oikuaa porã mbaʼéichapa ojapo vaʼerã hembiapo, ipyʼaguasu ha isakrifikádo vaʼekue. Koʼã kualida oipytyvõ chupekuéra opredika porã hag̃ua. Ko artíkulope jahecháta mbaʼépa ikatu nde rejapo reguereko hag̃ua avei umi kualida, ndekatupyry hag̃ua repredika ha reporomboʼévo.

4. ¿Mbaʼérepa Pedro ojededika vaʼekue péskape?

⁴ Pedro ojededika vaʼekue péskape omantene hag̃ua ifamília, péro upéva ndahaʼéi vaʼekue traváhonte chupe g̃uarã. Amalisia Pédrope ogustaiterei vaʼekue la péska (Juan 21:3, 9-15). Upe rire ogustaiterei vaʼekue avei chupe upe traváho orekóva ojagarrávo hénte ojejagarraháicha pira. Ha Jehová oipytyvõ rupi chupe, haʼe ikatupyryeterei vaʼekue ojapóvo upéva (Hech. 2:14, 41).

5. Heʼiháicha Lucas 5:8-11, ¿mbaʼérepa Pedro okyhyje vaʼekue, ha mbaʼépa ikatu nepytyvõ anive hag̃ua rekyhyje?

⁵ ¿Mbaʼépa prinsipálmente ñanemomýi japredika hag̃ua? Ñande jajapo upéva jahayhúgui Jehovápe. Jahayhúramo Jehovápe, upéva ñanepytyvõta ñañeʼẽ hag̃ua ótrope hese, ñapensáramo jepe nañandevaleiha jajapo hag̃ua upéva. Jesús oinvitárõ guare Pédrope ojagarra hag̃ua hénte ojejagarraháicha pira, heʼi chupe: “Ani rekyhyje” (elee Lucas 5:8-11). Pédrope nomongyhyjéi vaʼekue umi mbaʼe oikótava hese haʼe haguére Jesús disípulo. Upéva rangue, haʼe oñesorprendeterei ohechávo hetaiterei pira ojagarraha hikuái Jesús oipytyvõ  rupi chupekuéra. Haʼe oikuaa Jesús ojapo hague peteĩ milágro, ha upévare opensa haʼe nomereseiha ombaʼapo Jesús ndive. Ikatu oime nde rekyhyje avei Pedro okyhyje haguéicha. Por ehémplo, ikatu rejepyʼapy entéro mbaʼe rejapo vaʼerãre oiko hag̃ua ndehegui Cristo disípulo. Oiméramo upéicha, reñehaʼã vaʼerã rehayhuve Jehovápe, Jesúspe ha umi nde rapichakuérape. Upéva nemomýita reasepta hag̃ua Jesús invitasión rejagarra hag̃ua hénte ojejagarraháicha pira (Mat. 22:37, 39; Juan 14:15).

6. ¿Mbaʼérepa avei ñande japredika?

⁶ ¿Mbaʼépa avei ñanemomýi japredika hag̃ua? Ñande ñaneñeʼẽrenduse Jesúspe. Haʼe omanda vaʼekue: ‘Tapeho pemboʼe umi héntepe oiko hag̃ua chuguikuéra che disípulo’ (Mat. 28:19, 20). Ñande japredika avei pórke ‘oñemaltrata umi héntepe ha isarambipa hikuái’, ha oikotevẽterei oikuaa pe Rréinogui (Mat. 9:36). Jehová ningo oipota voi opaichagua persóna oikuaa porã pe añetegua ha ojesalva (1 Tim. 2:4).

7. ¿Mbaʼéichapa Romanos 10:13-15 ohechauka iñimportanteha pe predikasión?

⁷ Ñande ñapensávo mbaʼéichapa umi hénte ikatu ojesalva pe predikasión rupive, ñanemomýita japredikase hag̃ua. Peteĩ peskadór ningo ovende térã hoʼu pe pira ojagarra vaʼekue, péro ñande “jajagarra” umi héntepe térã ñaipytyvõ chupekuéra oiko hag̃ua Jesús disípuloramo ikatu hag̃uáicha ojesalva hikuái (elee Romanos 10:13-15; 1 Tim. 4:16).

8, 9. ¿Mbaʼépa oikuaa vaʼerã peteĩ peskadór, ha mbaʼérepa?

⁸ Jesús tiémpope, peteĩ peskadór oikuaa vaʼerã mbaʼeichagua pirápa oityse hína (Lev. 11:9-12). Avei oikuaa vaʼerã moõpa oĩ jepi la pira. Umi pira oĩ jepi ogustahápe chupekuéra pe y ha oĩháme heta hembiʼurã. Pe peskadórpe g̃uarã iñimportánte avei mbaʼe órapa oho peskádape. Peteĩ misionéro oikóva peteĩ ísla del Pacíficope oaprende kuri iñimportanteha mbaʼe órapa ojeho péskape. Peteĩ ermáno upepegua oinvita chupe oho hag̃ua hendive peskádape, ha pe misionéro heʼi chupe: “Jajotopána koʼẽrõ pyhareve las 9”. Ha pe ermáno ombohovái chupe: “Chéverõ g̃uarã nde nderepillái hína, jaha ningo japeska hoʼaha órape la pira ha ndahaʼéi opyta porãve jave ñandéve”.

⁹ Upéicha avei Jesús disipulokuéra oho vaʼekue “peskádape” umi lugár ha umi óra oĩháme jepi umi hénte. Por ehémplo, Jesús segidorkuéra opredika vaʼekue pe témplope, umi sinagógape, ogahárupi ha umi merkádope (Hech. 5:42; 17:17; 18:4). Ñande avei tekotevẽ jaikuaa mbaʼe órapa umi hénte ñande territoriopegua oĩ jepi hógape, térã moõpa oĩ jepi hikuái ikatu hag̃uáicha japredika chupekuéra. Tekotevẽ jajadapta umi héntere ikatu hag̃uáicha japredika chupekuéra umi lugár ha jatopataha órape hesekuéra (1 Cor. 9:19-23).

10. ¿Mbaʼe erramiéntapa Jehová organisasión omeʼẽ ñandéve?

¹⁰ Peteĩ peskadór oreko vaʼerã umi mbaʼe oikotevẽva opeska hag̃ua ha oipurukuaa vaʼerã umíva. Ñande avei tekotevẽ jareko ha jaipurukuaa umi erramiénta oĩva japredika hag̃ua. Jesús heʼi vaʼekue idisipulokuérape mbaʼéichapa opredika vaʼerã umi notísia porã. Haʼe heʼi chupekuéra mbaʼépa ogueraha vaʼerã, moõpa opredika vaʼerã ha mbaʼépa heʼi vaʼerã (Mat. 10:5-7; Luc. 10:1-11). Koʼág̃arupi Jehová organisasión omeʼẽ ñandéve pe kit de enseñanza orekóva umi erramiénta ideprovechoitéva. * Ha ñanemboʼe avei mbaʼéichapa jaipuru vaʼerã umíva. Upéva ñanepytyvõ jajerovia hag̃ua ñandejehe japredika ha oiko hag̃ua ñandehegui peteĩ mboʼehára katupyry (2 Tim. 2:15).

11. ¿Mbaʼérepa tekotevẽ ipyʼaguasu umi opredikáva umi notísia porã?

¹¹ Umi ojededikáva péskape ningo tekotevẽ ipyʼaguasu. Haʼekuéra sapyʼánte ndoikuaái mbaʼéichatapa la tiémpo, ha derrepénte ikatu ojagarra chupekuéra peteĩ torménta, térã pyʼỹinte ombaʼapo vaʼerã hikuái pyharekue. Umi opredikáva umi notísia porã tekotevẽ avei ipyʼaguasu. Ñañepyrũ jave japredika ha jajekuaauka testígo de Jehováramo, ikatu hína ñambohovái peteĩ “torménta”, ñane hentekuéra oñemoĩ jave ñane kóntrape, ñane konosidokuéra oñembohory jave ñanderehe ha oĩ jave umi nohenduséiva umi notísia porã. Péro upéva ningo nañanesorprendéi. Jesús oavisa vaʼekue voi omondotaha isegidorkuérape opredika hag̃ua umi ndaijaʼéiva hesekuéra apytépe (Mat. 10:16).

12. Heʼiháicha Josué 1:7-9, ¿mbaʼépa ikatu nepytyvõ ndepyʼaguasuve hag̃ua?

¹² ¿Mbaʼépa ikatu rejapo ndepyʼaguasuve hag̃ua? Primeroite, reime vaʼerã segúro Jesús osegiha odirihi yvága guive pe predikasión (Juan 16:33; Apoc. 14:14-16). Upéi remombarete vaʼerã nde jerovia Jehová promésare oñangarekotaha nderehe (Mat. 6:32-34). Nde jerovia imbaretevévo, ndepyʼaguasuvéta. Pedro ha iñirũnguéra ohechauka vaʼekue ijerovia mbareteha ojedehárõ guare pe péskagui osegi hag̃ua Jesúspe. Upéicha avei nde rehechauka ndejerovia mbareteha remombeʼúrõ guare ne amígo ha ne hentekuérape, reñepyrũ hague restudia la Biblia umi Testígondi, ha reho rreunionhápe. Katuete oiméne nde rejapóma heta kámbio ne kondúktape ha reiko lájape ikatu hag̃uáicha reiko Jehová oipotaháicha. Ha rejapo hag̃ua upéva tekotevẽ avei kuri rejerovia ha ndepyʼaguasu.  Resegi aja reñembopyʼaguasuve, ikatu rejerovia ‘Jehová nde Jára oĩha nendive reho rehohápe’ (elee Josué 1:7-9).

13. ¿Mbaʼéichapa reñemboʼe ha rejepyʼamongetáramo nepytyvõta ndepyʼaguasuve hag̃ua?

¹³ ¿Mbaʼépa avei ikatu nepytyvõ ndepyʼaguasuve hag̃ua? Rejerure vaʼerã Jehovápe tanembopyʼaguasu (Hech. 4:29, 31). Jehová okontestáta ndéve umi ne ñemboʼe ha núnka nanderejareimoʼãi. Haʼe siémpre oĩ nde ykére nepytyvõ hag̃ua. Ikatu avei rejepyʼamongeta mbaʼéichapa Jehová osalva vaʼekue isiervokuérape ymave. Epensa avei mbaʼéichapa haʼe nepytyvõma rehasárõ guare umi situasión ijetuʼúva, ha nemombarete ikatu hag̃uáicha rekambia reiko lája. Haʼe ningo odirihíma vaʼekue ipuévlope ohasa hag̃ua pe Mar Rojo, upéicharõ haʼe ikatúta avei nepytyvõ oiko hag̃ua ndehegui Cristo disípulo (Éx. 14:13). Nde ikatu rejerovia Jehováre pe salmístaicha, heʼírõ guare: “Ndakyhyjemoʼãi asy pórke Jehová oĩ che ykére, ¿mbaʼe piko ojapóta cherehe peteĩ persóna cheichagua?” (Sal. 118:6).

14. ¿Mbaʼépa reaprende Masae ha Tomoyo rembiasakuégui?

¹⁴ Ikatu avei ndepyʼaguasuve reikuaávo mbaʼéichapa Jehová oipytyvõma ipyʼaguasu hag̃ua isiervokuéra hiʼotĩvape. Jahechami peteĩ ermána hérava Masae rembiasakue. Haʼe ningo hiʼotĩ ha opensa vaʼekue núnka ndaikatumoʼãiha opredika. Ijetuʼueterei vaʼekue chupe oñeʼẽ hag̃ua umi extráñondi, ha chupe g̃uarã haʼete vaʼekue voi ku ohasátava peteĩ murálla ijyvatetereíva. Upévare haʼe oimoʼã ndaikatumoʼãiha voínte ojapo upéva. Upémarõ haʼe oñehaʼãmbaite ohayhuve Ñandejárape ha hapichakuérape. Haʼe ojepyʼamongeta mbaʼeichaitépa koʼág̃a iñurhénte japredika, ha oñemboʼe Jehovápe oipytyvõ hag̃ua chupe omeʼẽ hag̃ua chupe pe deséo opredikase hag̃ua. Haʼe osupera umi mbaʼe omongyhyjéva chupe ha hiʼarive oservi jepe de prekursóra rregulár. Jehová ningo ikatu avei oipytyvõ umi puvlikadór pyahúpe ‘ipyʼaguasu hag̃ua’. Jahechamína avei peteĩ ermána hérava Tomoyo rembiasakue. Haʼe oñepyrũrõ guare opredika ogahárupi, pe primer ogajára oñatende vaʼekue hese, osapukái chupe: “¡Ndaikuaaséi mbaʼeve testígo de Jehovágui!”, ha omboty hováre pe okẽ. Tomoyo opyta rangue okyhyje, pyʼaguasúpe heʼi pe iñirũme: “¿Nde piko ehendu la heʼíva?, haʼeʼỹre mbaʼeve haʼe oikuaáma che haʼeha testígo de Jehová. ¡Avyʼaiterei ningo!”. Tomóyogui koʼág̃a oiko prekursóra rregulár.

15. ¿Mbaʼépa heʼise peteĩ persóna isakrifikadoha, ha mbaʼérepa upéva iñimportánte kristianokuérape g̃uarã?

¹⁵ Umi peskadór ivaléva ningo isakrifikádo. Peteĩ persóna isakrifikádova ojeovliga ijupe voi ojapopa hag̃ua umi mbaʼe tekotevẽva ojapo. Umi ojededikáva péskape ojesakrifika opuʼãvo voi, opyta otermina meve itraváho, ha osegi opeska ivaíramo jepe la tiémpo. Ñande avei tekotevẽ ñandesakrifikádo ikatu hag̃uáicha ñaaguanta ha ñatermina ñande traváho (Mat. 10:22).

16. ¿Mbaʼépa ñanepytyvõta jajapo hag̃ua umi mbaʼe ijetuʼúva ñandéve?

¹⁶ Ñande ningo ndahaʼéi ñanasére ñandesakrifikádomava. Upéva rangue, jajapose jepi heta mbaʼe ifasilveháichante ñandéve. Péro umi mbaʼe iñimportánteva jajapo, sapyʼánte ndahaʼéi la ifasilpáva. Upévare tekotevẽ ñaaprende jajejokokuaa ñandesakrifikádo hag̃ua. Upéicha rupi ñaikotevẽ ajúda jajapo hag̃ua umi mbaʼe ijetuʼúva ñandéve, ha Jehová ñanepytyvõ ijespíritu sánto rupive upearã (Gál. 5:22, 23).

17. Heʼiháicha 1 Corintios 9:25-27, ¿mbaʼépa apóstol Pablo heʼi tekotevẽ hague ojapo isakrifikádo hag̃ua?

¹⁷ Apóstol Pablo ningo isakrifikádo vaʼekue. Péro haʼe orrekonose tekotevẽ hague ‘odomina’ hete ikatu hag̃uáicha ojapo pe oĩ porãva  (elee 1 Corintios 9:25-27). Haʼe omokyreʼỹ vaʼekue ótrope ojekorrehi hag̃ua ijupe voi, ha ‘ojapo porã hag̃ua entéro mbaʼe ha ani sarambikuépe’ (1 Cor. 14:40). Tekotevẽ ningo ñande ñandesakrifikádo jasegi hag̃ua jaadora Jehovápe, por ehémplo jasegi hag̃ua japredika ha ñaporomboʼe umi notísia porã (Hech. 2:46).

18. ¿Mbaʼépa Jehová oreko enkuénta heʼi hag̃ua ñanderehe jajapo porãha ñane rembiapo?

¹⁸ Peteĩ ojededikáva péskape heʼi oho porãha hese oity jave heta pira. Péro ñande ndajaʼéi oho porãha ñandéve jagueru haguérente heta hénte Jehová organisasiónpe (Luc. 8:11-15). Jasegíramo japredika umi notísia porã, ha ñamboʼe ótrope, Jehová heʼíta ñanderehe jajapo porãha ñane rembiapo. ¿Mbaʼérepa? Pórke ñaneñeʼẽrendu hína chupe ha Itaʼýrape (Mar. 13:10; Hech. 5:28, 29).

19, 20. ¿Mbaʼérepa koʼág̃arupi koʼýte japredika vaʼerã?

¹⁹ Oĩ umi país oñepermitihápe ojepeska unos kuánto méserente. Umichagua lugárpe peteĩ peskadór oiméne ojapuravéntema opeska hag̃ua opa pota vove ohóvo pe tiémpo oñemeʼẽva chupekuéra. Ha ñande ñaime avei upéva upe situasiónpe, koʼýte jaikuaa tekotevẽha japredika pórke ko múndo aña oñehundi potaitéma. Saʼipaitéma ningo hemby pe tiémpo jarekóva japredika ha ñaipytyvõ hag̃ua umi héntepe ikatu hag̃uáicha ojesalva. Upévare aníkena ehaʼarõ ne situasión iporãmbaite raẽ eñepyrũ hag̃ua ko tembiapo iñimportantetéva (Ecl. 11:4).

²⁰ Koʼag̃aite voi reñehaʼãve vaʼerã epredikase, eaprende hetave mbaʼe la Biblia omboʼévagui, eñembopyʼaguasuve ha ndesakrifikadove. Embaʼapo umi mas de 8 millón opredikávandi umi notísia porã ko yvy tuichakuére, ha péicha reñandúta pe vyʼa Jehová omeʼẽva (Neh. 8:10). Ejerresolvékena epredikataha ikatuháicha entéro, ha esegitaha rejapo Jehová heʼi peve ojejapopamaha ko traváho. Pe artíkulo oúvape jahecháta mbohapy mbaʼe ñanepytyvõtava jajerresolve hag̃ua ñande pyʼaite guive jasegitaha japredika umi notísia porã oñeʼẽva Ñandejára Rréinore.