1. ¿Jesukwe nitre nibokä gwakitaka nübaibare dre nuainne aune dre nuainbare kwetre?

PEDRO, Santiago, Andrés aune Juan ja mikadre ja tötikaka Jesukwe ye känenkri nämänentre gwa gain rürübäinkäre. “Mun brän tibe amne munta gwa gaen ño, ye kwrere tikwe mun mikadi ni ngwianka Ngöböye” Jesukwe niebare ietre ngwane töi namanintre niä kukwe yebätä raba ruin nie. * ¿Akwa dre nuainbare kwetre? Biblia tä niere: “Ye btäräbe, niaratre käkwe krade kitani temen, bti nikani Jesube” (Mat. 4:18-22). Kukwe diani kwetre nuaindre jai ye köböire rabaitre sribi bä jene nuainne. Nämänentre gwa gain ye bitikäre rabaitre nitre kain kukwe ja üairebiti (Luc. 5:10). Kä nengwane, nitre töi bökän tä kukwe metre tarere ye Jesuta nübaire sribi ye nuainkäre arato (Mat. 28:19, 20). ¿Jesuta mä nübaire nitre kain kukwe ja üairebiti ye mä niena kain ngäbiti ya?

2. ¿Nitre kadre kukwe ja üairebiti ye ñobätä nikwe diandre nuaindre jai aune dre käkwe ni dimikai nuainne?

² Mä niena ja tötike Bibliabätä kä ruäre te aune mäkwe ja mikadre kukwe driekä o ño yebätä mätä töbike raba ruin nunye. Jesuta ni nübaire yebätä ja ñaka nüke törö mäi ngwane ñan ja di ngwan nekä. Mätä töbike kore ñobätä ñan aune kukwe ye diandre jai ye ütiäte krubäte gare mäi yebätä. Pedro aune nitre mada käkwe krade tuanimetre “bengwairebe” ye Biblia tä mike gare. Akwa Pedro aune eteba kwe Andrés ñaka kukwe ye diani nuaindre jai jötrö ngwarbe ñobätä ñan aune sö nikanina krä ti ta Jesús nämäne gare ietre aune kani ngäbiti kwetre Mesías erere (Juan 1:35-42). Ye erere arato, kukwe niena gare mäi Jehová aune Jesús yebätä aune mä tö ririai kukwe ja uairebiti. Akwa mäkwe  kukwe ütiäte diaindre jai ye känenkri mäkwe töbikadre kwin käne. ¿Dre käkwe Pedro, Andrés aune nitre mada dimikani kukwe ütiäte ye den nuaindre jai?

3. ¿Kukwe meden ketabokä raba ni dimike nemen sribikä kwin Jesukwe?

³ Nitre ja tötikaka kena Jesukwe töi nämäne gwakitabätä. Sribi ye nämäne gare kwin ietre, ñan nämänentre kä jürä ngwen jabätä aune rabadre dre dre nuainne ye nämänentre nuainne. Kukwe ye käkwe niaratre dimikani nitre kain kukwe ja üairebiti arato. Kukwe ja tötikara ne käkwe ni dimikai ja ngwen niaratre erere.

4. ¿Ñobätä Pedro töi nämäne gwakitabätä?

⁴ Pedro nämäne gwakite mräkätre kwe ngübakäre, akwa ñaka nämäne sribi ye nuainne nierare, ñakare aune sribi ye nämäne tare kwe yebätä (Juan 21:3, 9-15). Nitre kadre kukwe ja üairebiti ye namani tare kwe arato aune Jehová diebiti sribi ye nuain namani gare kwin ie (Hech. 2:14, 41).

5. a) Lucas 5:8-11 tä niere erere, ¿dre jürä namani Pedrobätä? b) Pedro ye erere jata nemen ruin mäi ngwane, ¿dre käkwe mä dimikai?

⁵ Nita Jehová tarere yebätä nita kukwe driere. Aisete ja ñan rükadre törö nie ngwane Jehová tareta nikwe ye käkwe ni dimikadre sribi ye nuainne. Jesukwe Pedro nübaibare nitre kain kukwe ja üairebiti ngwane niebare kwe ie: “Ma ñan rekwetaka” (ñäkädre Lucas 5:8-11 yebätä). ¿Ñobätä Jesukwe kukwe ye niebare ie? ¿Akräke rabadre ja tötikaka Jesukwe ye jürä namani Pedrobätä? Ñakare. Köbö yete Jesukwe niaratre dimikani gwa gain krubäte. Aisete Jesukwe Pedro nübaibare nitre kain kukwe ja üairebiti ngwane, Pedro töi namani ñan krütare aune niara ñan ai käkwe sribidre Jesube namani ruin ie, yebätä “ma ñan rekwetaka” Jesukwe niebare ie. ¿Ye erere jata nemen ruin mäi? Mä rabai ja tötikaka Jesukwe ngwane, ¿dre rabai  nuaindre mäi ye tä mä ngwen töbike krubäte? Ye erere akräke, mäkwe ja töi mika Jehová, Jesús aune nitre tarere bäri. Yekwe mä töi mikai Jesuta ni nübaire nitre kain kukwe ja üirebiti ye kain ngäbiti (Mat. 22:37, 39; Juan 14:15).

6. ¿Kukwe meden medenbätä ni raba ja töi mike kukwe driere bäri?

⁶ Kukwe mada raba ni töi mike kukwe driere bäri ye ani mike gare jai. Keteiti ne abokän Jesukwe kukwe niebare ne ni tö mikai täte: “Mun nän, amne nitre [...] mika ja töitikaka siba tibe” (Mat. 28:19, 20). Kukwe mada raba ni töi mike kukwe driere bäri ye abokän nitre tä bobre aune tuanimetre kaibe tuin nie. Aisete tätre Gobran Ngöbökwe kukwei ye ribere krubäte jai (Mat. 9:36). Ne madakäre, Jehová tö ni jökrä tuai kukwe metre mike gare jai aune nemen kwäre (1 Tim. 2:4, TNM).

7. ¿Kukwe driedre ye ütiäte krubäte ye Romanos 10:13-15 tä mike gare ño?

⁷ Kukwe madabätä mä raba kukwe driere bäri ye abokän kukwe drieta ye köböire kukwe meden kwin tä nemen bare yebätä mäkwe töbikadre. Ni gwakitaka tä gwakite kwetakäre o rürübäinkäre, akwa ni abokän tä nitre kain kukwe ja üairebiti rabadre kwäre yekäre (ñäkädre Romanos 10:13-15 yebätä; * 1 Tim. 4:16).

8, 9. ¿Kukwe meden tädre gare ni gwakitaka ie aune ñobätä?

⁸ Jesús näire, gwa meden kita raba aune nämäne medente ye tädre gare nitre gwakitaka yei (Lev. 11:9-12). Gwa ye tä nüne ñö kwin te aune mrö tärä yekänti. Akwa ora meden kwin gwakitakäre ye ütiäte arato. Ora tärä bäri kwin gwakitakäre ye namani gare misionero iti ie. Ja mräkä iti nünanka isla del Pacífico sur yete niara nübaibare gwakite jabe, ye ngwane misionerokwe niebare ja mräkä ie: “Nikwe ja tuai jetebe 9 dekä”. Akwa ja mräkä käkwe niebare ie: “Ñan nü gare mäi nibi tuin tie, ñongwane ni törba niken ye ngwane ñan rikadre, ñakare aune ñongwane gwata kütü kwete nie ye ngwane ni rikadre”.

⁹ Ye erere arato, nitre ja tötikaka Jesukwe namani nitre kaka kukwe ja üairebiti. Ora meden bäri kwin te aune medente nitre raba kwen ietre yekänti nämänentre niken kukwe driere. Ñodre, nitre ja tötikaka Jesukwe nämänentre kukwe driere templote, sinagogate, ju ju te aune jondron rürübäin nämäne yekänti (Hech. 5:42; 17:17; 18:4). Nitre gwakitaka erere nikwe ja ngwandre. Ñodre, nitre ni käite tä dre nuainne aune ja ngwen ño ye nikwe mikadre gare kwin jai kukwe driekäre ietre. Kukwe jene jene ükadrete jai ne kwe ñongwane aune medente nitre raba kwen bäri nie ye ngwane ni rabadre kukwe driere ietre (1 Cor. 9:19-23).

10. ¿Juta Ngöbökwe tä dre dre bien nie kukwe driekäre?

¹⁰ Dre dre ribeta gwakitakäre ye jökrä tädre ni gwakitaka kwe aune gwakitata ñobiti ye tädre gare ie arato. Nita jondron ribere jai kukwe driekäre nitre madai aune nikwe kukwe driedre ñobiti ye nikwe mikadre gare jai arato. Nitre ja tötikaka Jesukwe rabadre nitre kain ño kukwe ja üairebiti ye Jesukwe driebare ietre. Dre jänrikadre kwetre, dre ñaka jänrikadre kwetre, dre niedre kwetre aune medente kukwe driere kwetre ye Jesukwe niebare ietre (Mat. 10:5-7; Luc. 10:1-11). Kä nengwane juta Ngöbökwe tärä aune video dirikäre bäri ye biani nie kukwe driekäre aune diridre ñobiti ye drieta kwe nie. Dre dre biani nie kukwe driekäre ye tä ni dimike krubäte. * Jondron yebiti diridre ño ye drieta  nie ye köböire nita sribi Ngöbökwe ye nuainne jäme aune kwin (2 Tim. 2:15).

11. ¿Ñobätä ni nitre kaka kukwe ja üairebiti ja ngwandre dite?

¹¹ Gwakitakäre ñaka kä jürä ngwandre jabätä ñobätä ñan aune mren raba nemen romon drekebe ngwarbe aune ñü jobe muriebe minimini raba nakainkä mrente. Aune ruäre ngwane gwakitata dibire ta. Ni nitre kaka kukwe ja üirebiti ñan rabadre kä jürä ngwen jabätä arato. Nita kite kukwe driere aune ni testiko Jehovakwe nita mike gare ngwane, “ñü jobe muriebe minimini” tä kite nakainkä ni bäre, ye abokän ni mräkätre tä ja mike ni rüere, ja ketamukotre nikwe tä ni kötaire aune nitre ie nita kukwe driere ñan tö ni kukwei kain ngäbiti. Akwa kukwe ye ñan tä ni mike nekwetekä ñobätä ñan aune Jesukwe ni juain lobo ngätäite niebare kwe (Mat. 10:16).

12. Josué 1:7-9 tä niere erere, ¿dre käkwe ni dimikai ja ngwen dite?

¹² ¿Dre käkwe mä dimikai ja ngwen dite? Kena, Jesús tä kukwe drie ne jie ngwen kä nengwane ye tädre gare metre mäi (Juan 16:33; Apoc. 14:14-16). Arato Jehovakwe mä ngübai käbämikani kwe yei mäkwe tödekadre bäri (Mat. 6:32-34). Mäkwe tödekai bäri ngwane mä täi bäri dite. Pedro aune nitre sribikä ben gwakita tuanimetre nänkäre Jesube, yebiti nämänentre tödeke krubäte bämikani kwetre. Ye erere mäkwe nuainbarera arato. Mä jatani ja tötike Bibliabätä nitre testiko Jehovakwe ben aune näin gätäbätä ye mäkwe niebare ja ketamuko  mäkwe ie aune mä mräkätre ie. Akwa ye ñan ngöräbe, kukwe keta kabrebätä mäkwe ja töi kwitanina nünankäre Jehovakwe kukwe ükaninte ye ererebätä. Yebiti mätä tödeke aune ja ngwen dite mäkwe bämikani. Mäkwe ja ngwain dite ñan kä jürä ngwankäre jabätä ngwane, mä täi medente erere känti Jehová täi mäbe yei mä raba tö ngwen (ñäkädre Josué 1:7-9 yebätä). *

13. ¿Oradre aune töbikadretari ye raba mä dimike ño ja ngwen bäri dite?

¹³ ¿Dre mada raba mä dimike ja ngwen dite? Mäkwe ja ngwandre dite ye mäkwe kärä Jehovai orasionte (Hech. 4:29, 31). Niarakwe orasion mäkwe kukwe nuai aune mä ñan tuainmetre kaibe kwe, käre täi mä ken mä dimikakäre. Jehovakwe nitre niara mikaka täte mekerabe mikani ño kwäre aune mä dimikani ño ja tuakäre kukwe tare yebe aune ja di biani kwe mäi ja töi kwitakäre yebätä mäkwe töbikadre. Niarakwe nitre israelita dimikani näin Mar Rojo yete ta, ye tä mike gare niara raba mä dimike nemen ja tötikaka Jesukwe tädre gare metre mäi (Éx. 14:13). Mäkwe tö ngwan salmista erere, niarakwe niebare: “Jehová tä tikri, kä jürä ñaka rabai tibätä. ¿Se ni kä nebätä raba dre nuainne tibätä?” (Sal. 118:6).

14. ¿Kukwe namani bare Masae aune Tomoyo yebätä ye tä dre mike gare mäi?

¹⁴ Nitrebätä kä jürätä nemen ye Jehovakwe dimikanina ño yebätä mäkwe töbikadre ngwane ye raba mä dimike. Jehovakwe meri testiko kädekata Masae dimikani ño ye ani mike gare jai. Kä jürä nämäne nemen krubätebätä yebätä ñan blitai kwe jire nitre ngwärekri nämäne ruin ie. Blitadre ni ñaka gare ie yebe ye ñaka nämäne nemen nuäre kräke, dikadrekä ngutuä mentebätä kunkwäre ye kwrere. Aisete ja di ngwani kwe Ngöbö tarere bäri aune nitre mada tarere bäri. Kä ño näire nita nüne yebätä töbikataribare kwe aune Jehovakwe töi mikadre kukwe driere bäri ye ribebare kwe orasionte ie. Ye köböire Masae kä jürä dianinkä jabätä aune sribi prekursor regular nuainbare kwe. Josué 1:7, 9 tä niere erere, nitre kukwe driekä mrä mrä ye Jehovata dimike ja ngwen dite arato. Meri testiko Tomoyo nikani kukwe driere kena ngwane dre namani barebätä ye ani mike gare jai mada. Ju kena kukwe driebare kwe yete biyo iti käkwe ngratebare kröröbiti: “Ti ñan tö blitai jire ni testiko Jehovakwe ben” aune jukwe kitaninkä klakabe kwe jite. Kukwe ye ñaka Tomoyo di nianinkä, ñakare aune töi jämebiti niebare kwe kukwe drie muko ie: “Kwre tua, ti ñan krörö nini ie aune ti testiko Jehovakwe nibira gare ie. ¡Kä nibi nuäre tibätä!”. Nengwane Tomoyo ye prekursora regular.

15. ¿Nitre gwakitaka kwin tä dre dre nuainne ja gobrainkäre aune ye ñobätä ütiäte ni kristiano kräke?

¹⁵ Ni gwakitaka kwin rabadre ja gobraine rükakäre dekä ngwärbe ngwäte. Ja di ngwen käbä rabadre yekäre aune kä käme yete ta ja di ngwen gwakitakäre jankunu. Ja gobraindre ye ütiäte krubäte ne kwe dre dre tä nuaindre nie ye ngwankäre krüte. Ni kristiano rabadre ja gobraine sribi tä nuaindre nie ngwankäre krüte yekäre (Mat. 10:22).

16. ¿Kukwe ñan nuäre tä nuaindre nie ye dre raba ni dimike nuainkäre?

¹⁶ Ni ñaka ja gobraine nierare, ñakare aune nita ja kite nuainkäre. Ni töi nierare ñan ja di ngwanbätä. Käre jondron bäri nuäre nuainkäre  ye ni töta nemen nuainbätä. Akwa jondron ütiäte ütiäte tä nuaindre nie ye ñan nuäre nuainkäre, ye medenbätä ni rabadre ja gobraine. Aisete kukwe ñan nuäre tä nuaindre nie ye ni tö rabadre nuainbätä ngwane ni dimikadre ye nita ribere jai. Aune Jehová raba ni dimike kukwe yebätä üai deme kwe yebiti (Gál. 5:22, 23).

17. 1 Corintios 9:25-27 tä niere erere, ¿ja gobrainkäre dre nuaindre niebare Pablokwe?

¹⁷ Apóstol Pablo ye nämäne ja töi gobraine, akwa ruäre ngwane nämäne ja bä mete kukwe kwin nuainkäre niebare kwe (ñäkädre 1 Corintios 9:25-27 yebätä). Nitre kristiano ja gobraindre aune jondron jökrä nuaindre kwin “jirere ja täri” niebare kwe (1 Cor. 14:40, NGT). Ye erere nikwe nuaindre nitre kakäre kukwe ja üairebiti sribi Ngöbökwe nuainkäre jankunu (Hech. 2:46).

18. Sribi nuainta nikwe yebätä kä tädre juto Jehovabätä yekäre, ¿nikwe dre nuaindre?

¹⁸ Ni gwakitaka tä gwakite krubäte yebätä gwakitaka kwin nieta. Akwa ye erere ñan kukwe ja üairebiti. Nitre nibe ni jatadre ngwena juta Ngöbökwe yete ye ñan aibätä ni ni kaka kwin kukwe ja üairebiti nieta (Luc. 8:11-15). Nikwe kukwe driei jankunu aune nitre tötikai ngwane, sribi nuainta nikwe yebätä kä täi juto Jehovabätä. Ñobätä ñan aune nita niara aune Monso kwe ye kukwei mike täte (Mar. 13:10; Hech. 5:28, 29).

19, 20. ¿Ñobätä nikwe kukwe driedre bäri kä nengwane?

¹⁹ Juta ruäre känti, sö ruäre aibe te kä bianta gwakitakäre. Yebätä sö ye tä kite krüte ngwane nitre gwakitaka tä ja di ngwen bäri gwakite. Kukwe keteitibätä ni rabadre ja di ngwen kukwe driekäre bäri nitre kakäre kukwe ja üairebiti. Ye abokän, nitre käme gadrete ye kitera nüke ja ken yebätä. Kä nemen chitani nitre dimikakäre nemen kwäre. Kä kwin rabadre mäkwe ye ñan mäkwe ngübadre sribikäre siba (Ecl. 11:4).

²⁰ Dre tä mä töi mike kukwe driere ye nengwane mäkwe mika gare kwin jai. Mäkwe kukwe mika gare bäri jai Bibliabätä, mäkwe ja ngwan dite aune mäkwe ja gobraindre. Nitre 8 millón kä jökräbiti tibien nitre kaka kukwe ja üairebiti ye ngätäite ja mike siba, ye köböire kä juto Jehovakwe rabai mäkwe (Neh. 8:10). Ja töi mike kwatibe kukwe driere jankunu nememe Jehovakwe nibira debe niedi ngwane. Kukwe ketamä raba ni töi mike kukwe driekäre jankunu ye rabai gare nie kukwe ja tötikara mada yekänti.