1. Iesu ese haoda taudia foa dekenai dahaka boiboi herevana ia gwauraia, bona dahaka idia karaia?

HAHEDIBA taudia Petero, Andrea, Iamesi, bona Ioane be mai edia haoda bisinesi. Iesu ena boiboi herevana idia kamonai neganai idia hoa, badina ia gwau: “Lau murinai umui mai, bona taunimanima haoda henia taudia ai umui do lau halaoa.” * Unai tatau be dahaka idia karaia? Baibel ia gwau: “Maoromaoro edia reke idia rakatania, bena ia murinai idia raka.” (Mat. 4:18-22) Unai abia hidi ese edia mauri do ia haidaua. Idia be gwarume totona do idia haoda lasi, to ‘taunimanima do idia haoda henia.’ (Luka 5:10) Hari, Iesu ese hereva momokani idia ura henia kudou-maoro taudia dekenai unai boiboi herevana ia gwauraia danu. (Mat. 28:19, 20) Oi be Iesu ena boiboi herevana oi abia dae, a?

2. Daidia ese abia hidi do idia karaia taunimanima haoda henia taudia ai idia lao totona, bona dahaka ese idia do ia durua?

² Reana Baibel stadilaia karana oi goadalaia noho bona hari abia hidi oi ura karaia sivarai namona oi harorolaia totona. Bema unai abia hidi karaia totona oi daradara, namona be oi gari lasi. Oi daradara badina oi diba unai be abia hidi badana. Momokani, Baibel ia gwau Petero bona ena turadia be “maoromaoro” edia reke idia rakatania. To, Petero bona ena tadikaka be idia laloa namonamo guna, bena unai abia hidi idia karaia. Hua siks gunanai, Iesu idia diba bona idia abia dae ia be Mesia. (Ioa. 1:35-42) Unai hegeregerena, reana Iehova bona Iesu oi diba namonamo vadaeni, bona oi ura Iehova  kahirakahira oi lao noho. To pablisa ta ai oi do lao lasi neganai, namona be oi laloa namonamo guna. Dahaka ese Petero, Andrea, bona ma haida ia durua abia hidi idia karaia totona?

3. Edena kara namodia ese oi do idia durua Iesu ena boiboi herevana oi abia dae totona?

³ Iesu ena hahediba taudia ginigunadia be mai ura bada ida idia gaukara, edia gaukara idia diba namonamo, idia gari lasi bona sibona biagua karana idia hahedinaraia. Unai kara namodia ese idia ia durua taunimanima haoda henia taudia namodia ai idia lao totona. Inai atikol ese unai kara idauidau oi hahedinaraia diba dalana bona Keriso ena hahediba tauna namona ai oi lao dalana do ia herevalaia.

4. Dahaka ese Petero ena ura ia habadaia haoda tauna ai ia lao totona?

⁴ Petero be ia haoda ena famili ia ubua totona, to ia dekenai unai be gaukara ta sibona lasi. Petero be haoda gaukarana ia ura henia bada. (Ioa. 21:3, 9-15) Taunimanima haoda henia gaukarana ia ura henia bada danu. Bona Iehova ena heduru amo Petero be unai gaukara ia karaia namonamo.​—Kara 2:14, 41.

5. (a) Luka 5:8-11 ena hereva bamona, dahaka dainai Petero ia gari? (b) Dahaka ese ita do ia durua ita gari lasi totona?

⁵ Iehova ita lalokau henia dainai, unai ese ita ia hagoadaia haroro gaukara ita karaia totona. Iehova lalokau henia karana ese ita ia durua diba bema ita laloa ita be hegeregere lasi. Iesu ese Petero ia boiria taunimanima haoda henia tauna ai do ia lao neganai, ia hamaoroa: “Oi gari lasi.” (Luka 5:8-11 duahia.) Petero be hahediba tauna ai ia lao neganai do ia vara gauna dainai, ia gari lasi. To, Petero ia itaia Iesu be hoa dalanai idia ia durua bona gwarume momo idia abia, unai dainai ia laloa ia be hegeregere lasi Iesu ida ia gaukara totona.  Reana Keriso ena hahediba tauna ai oi lao totona do oi karaia gaudia ibounai oi laloa neganai, do oi lalohekwarahi. Namona be emu lalokau, Iehova, Iesu bona emu neiba taudia totona oi habadaia, unai amo do oi ura Iesu ena boiboi herevana oi abia dae bona taunimanima haoda henia tauna ai oi lao.​—Mat. 22:37, 39; Ioa. 14:15.

6. Dahaka badina haida dainai ita ura haroro?

⁶ Mani ita ura haroro ena badina haida ita herevalaia. Ita ura Iesu ena hahegani ita badinaia: “Umui lao, bese ibounai taudia be hahediba taudia ai umui halaoa.” (Mat. 28:19, 20) Ita haroro badina taunimanima momo be “haida ese idia haberoa bona idia dadaraia,” bona unai bamona taudia ese Basileia ena hereva momokani idia diba be namo. (Mat. 9:36) Iehova ia ura taunimanima idauidau ese hereva momokani ena diba maoromaoro do idia abia bona do idia roho mauri.​—1 Tim. 2:4.

7. Edena dala ai Roma 10:13-15 ese ia hahedinaraia haroro gaukara be mai anina bada?

⁷ Ita diba iseda haroro gaukara ese taunimanima ia hamauria neganai, do ita ura ita haroro noho. Haoda tauna be ia abia gwarume ia hoihoilaia eiava ia ania, to ita be taunimanima ita “haoda” henia bona hahediba taudia ai ita halaoa.​—Roma 10:13-15 duahia; 1 Tim. 4:16.

8-9. Haoda tauna be dahaka ia diba be namo, bona dahaka dainai?

⁸ Iesu ena negai, Israela tauna be do ia abia gwarume idauidau ia diba be namo. (Lev. 11:9-12) Danu gwarume edia noho gabudia do ia diba. Nega momo gwarume be idia ura henia gabuna bona aniani momo gabuna ai do idia noho. Nega maorona ai do ia haoda be mai anina bada. Pacific motumotu ta ai ia noho misinari tadikaka ta ia dibaia gauna be, gwarume momo veria totona, nega maorona ai oi haoda be namo. Unai hanua tadikaka ta ese ia boiria do idia haoda neganai, misinari tadikaka ia gwau, “Daba nain o’klok do ita hedavari.” To unai tadikaka ia haere, “Oi be oi diba lasi. Nega maorona ai gwarume ita lao tahua be namo. Ita sibona iseda ura negana ai do ita lao lasi.”

⁹ Unai hegeregerena, Iesu ena hahediba taudia be nega maorona bona taunimanima idia noho gabudia dekenai idia lao idia “haoda” henidia totona. Hegeregere, Iesu ena murinai idia raka taudia be dubu helaga, sinagoga, ruma-ta-ruma-ta, bona maketi gabudia ai idia haroro. (Kara 5:42; 17:17; 18:4) Ita danu be iseda teritori ai idia noho taudia edia kara ita diba be namo. Namona be iseda haroro dalana ita haidaua bona taunimanima idia noho gabudia bona nega maorodia ai ita haroro.​—1 Kor. 9:19-23.

10. Iehova ena orea ese ita dekenai edena tulu idauidau ia henia?

¹⁰ Haoda tauna be tulu maorodia ia abia hidi bona gaukaralaia daladia do ia diba be namo. Ita danu be haroro gaukara totona tulu maorodia do ita abia, bona gaukaralaia daladia ita diba be namo. Iesu be ena hahediba taudia dekenai taunimanima haroro henia dalana ia hadibaia namonamo. Idia ia hamaoroa dahaka gaudia do idia abia, edeseni do idia haroro, bona dahaka hereva do idia gwauraia. (Mat. 10:5-7; Luka 10:1-11) Hari, Iehova ena orea be ita idia durua totona Hadibaia Gaukara Ena Tulu Idauidau ia henia bona ita dekenai unai tulu gaukaralaia daladia ia hadibaia. * Unai treinini amo diba ita abia  dainai, mai gari lasi ida ita haroro diba.​—2 Tim. 2:15.

11. Dahaka dainai taunimanima haoda henia taudia idia gari lasi be namo?

¹¹ Haoda taudia be do idia gari lasi be namo, badina nega haida lai gubana do ia mai negana idia diba lasi. Bona nega momo hanuaboi ai dibura lalonai idia gaukara. Taunimanima haoda henia taudia danu idia gari lasi be namo. Ita haroro matamaia bona ita hahedinaraia ita be Iehova ena Witnes taudia neganai, reana iseda famili be ita do idia inai henia, iseda turadia be ita do idia kirikirilaia bona ma haida be ita harorolaia sivaraina do idia dadaraia. To edia kara dainai do ita gari lasi. Iesu be ena murinai idia raka taudia ia hadibaia idia be dagedage taudia huanai do ia siaidia.​—Mat. 10:16.

12. Iosua 1:7-9 ena hereva bamona, edena dala ai gari lasi karana ita habadaia diba?

¹² Edena dala ai gari lasi karana oi hahedinaraia diba? Ginigunana, namona be oi abia dae Iesu be guba amo haroro gaukara ia hakaua noho. (Ioa. 16:33; Apok. 14:14-16) Iharuana, Iehova ia gwauhamata oi do ia naria karana do oi abidadama henia. (Mat. 6:32-34) Emu abidadama ia goada neganai, do oi gari lasi. Petero bona ena bamodia be idia abidadama dainai, edia haoda bisinesi idia rakatania bona Iesu murinai idia raka. Unai hegeregerena, oi danu be abidadama oi hahedinaraia vadaeni, badina emu turadia bona famili taudia oi hamaorodia, oi be Iehova ena Witnes taudia ida Baibel oi stadilaia bona edia hebou dekenai oi lao noho! Danu, emu mauri lalonai  gau haida oi haidaua vadaeni, Iehova ena kara maoromaoro taravatudia oi badinaia totona. Unai be abidadama bona gari lasi karana. Emu gari lasi karana oi habadaia noho lalonai, namona be oi abia dae Iehova, ‘oiemu Dirava, ese oi loaloa gabudia ibounai dekenai oi do ia bamoa noho.’​—Iosua 1:7-9 duahia.

13. Edena dala ai laloa dobu bona guriguri karana ese oi ia durua oi gari lasi totona?

¹³ Edena dala ma haida ai gari lasi karana oi habadaia diba? Do oi goada bona oi gari lasi totona oi guriguri be namo. (Kara 4:29, 31) Iehova ese emu guriguri do ia haerelaia bona oi do ia rakatania lasi. Nega ibounai ia noho hegaegae oi ia durua totona. Danu, Iehova ese guna ma haida ia hamauria sivaraidia oi laloa dobu. Ma danu, hekwakwanai negadiai oi ia durua, bona emu mauri lalonai gau haida oi haidaua totona oi dekenai goada ia henia karana, oi laloa dobu be namo. Oibe, Keriso ena hahediba tauna ai oi lao totona, Davara Kakakakana ai ena taunimanima ia hamauria Diravana ese oi ia durua diba. (Eso. 14:13) Namona be emu abidadama be salamo torea tauna ena bamona, ia gwau: “[Iehova] be lau dekenai ia noho, vadaeni lau gari lasi. Taunimanima be edena bamona lau do idia hadikaia diba?”​—Sal. 118:6.

14. Masae bona Tomoyo edia ekspiriens amo dahaka oi dibaia?

¹⁴ Gari lasi karana oi habadaia totona, dala ma ta be Iehova ese idia hemarai taudia ia durua bona idia goada dalana oi dibaia be namo. Mani taihu Masae ena ekspiriens oi laloa. Ia be hemarai kekenina bona ia auka taunimanima vairanai ena abidadama ia gwauraia hedinarai totona. Ia mamia idau taudia hereva henia karana be ororo badana ta do ia daekau bamona, bona ia mamia ia hegeregere lasi. Unai dainai, ia hekwarahi Dirava bona ena neiba taudia lalokau henia karana ia habadaia totona. Ia laloparara ita be nega dokona ai ita noho bona haroro gaukara be mai anina bada, unai dainai Iehova ia noia iena ura haroro gaukara totona do ia habadaia. Masae be ena gari karana ia hanaia bona regula painia gaukara ia karaia danu. Iehova ese pablisa matamata taudia ia durua diba ‘idia goada’ totona. Mani taihu Tomoyo ena ekspiriens oi laloa. Ruma-ta-ruma-ta haroro gaukara ia matamaia neganai, ia davaria ruma hahine ginigunana be ia boiboi: “Lau ura lasi Iehova ena Witnes taudia lau hereva henia!” bona iduara ia koua. Tomoyo be mai gari lasi ida ena haroro turana dekenai ia gwau: “Unai oi kamonai, a? Lau moale badina hereva ta lau do gwauraia lasi, to ia diba vadaeni lau be Iehova ena Witnes ta!” Hari, Tomoyo be regula painia ta.

15. Sibona iseda ura biagua karana be dahaka, bona dahaka dainai Keristani taudia dekenai unai be mai anina bada?

¹⁵ Haoda taudia namodia be sibona edia ura idia biagua. Diksenari ta ia gwau, unai kara ena anina be “ta be sibona ia doria ia ura karaia gaudia ia hagugurua totona.” Haoda taudia be sibona idia doria daba maragi idia noga, idia gaukara ela bona edia gaukara idia hagugurua, bona herevana nega ia namo eiava ia dika to idia haoda noho. Ita haheauka bona iseda gaukara ita hagugurua totona, sibona iseda ura ita biagua be namo.​—Mat. 10:22.

16. Edena dala ai sibona iseda ura biagua karana ita hagoadaia diba?

¹⁶ Ita be sibona iseda ura biagua karana ida ita vara lasi. Oibe, nega momo ita ura auka lasi dalanai gau ta ita karaia. To, nega haida ita ura karaia mai anina bada gaudia be auka. Unai dainai, sibona iseda ura biagua karana ita hagoadaia  be namo. Bona Iehova ese ena lauma helaga amo unai heduru ia henia diba.​—Gal. 5:22, 23.

17. Korinto Ginigunana 9:25-27 ai, Paulo be dahaka ia karaia sibona ena ura ia biagua totona?

¹⁷ Aposetolo Paulo be sibona ena ura ia biagua. To ia gwau, kara maorona ia badinaia totona ena tauanina ia “botaia.” (1 Korinto 9:25-27 duahia.) Ia ese ma haida ia hadibaia sibona edia ura do idia biagua bona gau ibounai do idia ‘karaia namonamo bona dala maorona ai do idia karaia.’ (1 Kor. 14:40) Namona be sibona iseda ura ita biagua unai amo Iehova ita tomadiho henia noho diba, anina be hanaihanai sivarai namona ita harorolaia bona hadibaia gaukarana do ita karaia.​—Kara 2:46.

18. Dahaka ita karaia diba, unai amo Iehova ena matanai ita be haroro taudia namodia?

¹⁸ Haoda tauna be gwarume momo ia abia neganai unai ese ia hahedinaraia ia be haoda tauna namona. To, haroro gaukara be idau. Dirava ena orea lalonai taunimanima hida ita abia vareai be gau badana lasi. (Luka 8:11-15) Bema sivarai namona harorolaia bona hadibaia gaukarana dekenai ita haheauka, Iehova ena matanai ita be haroro taudia namodia. Dahaka dainai? Badina ita be Iehova bona ena Natuna edia hereva ita badinaia noho.​—Mar. 13:10; Kara 5:28, 29.

19-20. Dahaka dainai hari ita haroro be namo?

¹⁹ Tano haida ai, gwaumaoro idia henia hua haida sibona lalonai taunimanima idia haoda diba. Unai bamona tanodia ai bema haoda tauna ia diba haoda negana be kahirakahira do idia koua, do ia ura dikadika haoda totona ia lao. Ita be taunimanima haoda henia taudia dainai, ita haroro ena badina be: Inai nega oromana ena dokona be ia mai haraga noho! Nega be bada lasi inai taunimanima hamauria gaukarana ita karaia totona. Oi naria lasi eiava oi laloa lasi nega maorona ai inai mai anina bada gaukarana do oi durua.​—Had. 11:4.

²⁰ Namona be hari emu ura oi habadaia, emu diba Baibel dekenai oi habadaia, oi gari lasi, bona sibona emu ura oi biagua. Namona be taunimanima 8 milioni mai kahana ida taunimanima haoda henia gaukarana umui karaia, unai amo Iehova ese ia henia moalena do oi mamia. (Neh. 8:10) Namona be haroro gaukara oi karaia noho ela bona Iehova ia gwau inai gaukara be ia ore. Stadi atikol 37 ai, taunimanima haoda henia gaukarana ita karaia daladia toi do ita herevalaia. Unai dala toi ese ita do idia hagoadaia Basileia harorolaia gaukarana ita karaia noho totona.