XTUUTYUM ARTIKEL 36
Pist tuu fërtich fer een fixer fon mënxe wëre?
“Los noo pang se hon. Fon yets am forem tuust tuu mënxe fange.” (LUCAS 5:10)
LIIT 73 Yeehoowa, xenk uns muut
WAS TUUN MER SIIN? *
1. Was fer inlaatung hot Yeesus fer fier fixer kemacht, un was hon se kemacht?
TI TISIPELE Pheeter, Antrë, Tyako un Yoohan hate een fixeray kexeft. Iwerlee tich wii hon se sich ferwunert wën Yeesus tëne in kelaat hot: “Keet mich noo un ich mache tas teyer fixer fon mënxe wërt.” * Was hon se tan kemacht? Ti Piipel saat: “Tii hon klaych ti netse hiner kelos un sin tëm noo kang.” (Mat. 4:18-22) Tiise ëntxlus hot sayn leepe fer imer keënert. Xtats fixe fange, teete se “mënxe fange”. (Luc. 5:10) Hayt, tuut Yeesus te selwich inlaatung mache fer eerliche layt woo ti woerheet liipe. (Mat. 28:19, 20) Host tuu xon Yeesus sayn inlaatung aan kenom, fer fixer fon mënxe wëre?
2. Warom sole mer ti ëntxlus ërnst nëme fer fixer fon mënxe wëre, un was tuut uns helfe tiise ëntxlus mache?
2 Fiilaycht tuu host xon ti Piipel fer een tsayt xtutiirt un host xon ënerunge in tayn leepe kemacht. Awer yets prauchst tuu ëntxlise ops tuu wilst een puplikatoer fon te kuute oter wëre. Wëns tuu tuust tich net kans sicher fine fer Yeesus sayn inlaatung aan nëme, tuu net oone muut plaype. Tas tuut woerxaynlich petayte tas tuu weest wii wichtich tiise ëntxlus is. Es is woer tas ti Piipel saat tas Pheeter un sayn froynte hon ti netse uf een mool neewer kelos. Awer Pheeter un sayn pruuter hon net tiise ëntxlus soo flot kemacht. Tii hate xon Yeesus wii Mesias khëne kelërnt un aan kenom mee wii seks moonate tsurik. (João 1:35-42) Eenlich wii tas, tsiimlich sicher host tuu xon fiil iwer Yeehoowa un Yeesus kelërnt, un tuu wilst wayter forem in kaystlich aat keen. Awer eeps tuu ëntxlist een puplikatoer wëre, tuu must iwer tas triwer noo tenke. Was hot Pheeter, Antrë un anere keholef sayn ëntxlus mache?
3. Was fer kwaliteete tuun tayn wunx fer Yeesus sayn inlaatung aan nëme, xtërker lose?
3 Yeesus sayn eyerste tisipele waare muutich, wuste wii sayn aarwayt kuut mache, waare koraajich un hon sich aan kextrengt fer se mache was kemacht must wëre. Tiise selwiche kwaliteete hon sicher tëne keholef aach kuute fixer fon mënxe wëre. Tiise artikel tuut xpreche iwer wii khanst tuu tiise kwaliteete ëntwikele, tas tuu aach eene kuute tisipel fon Kristus wërst.
FERXTËRK TAYN MUUT
Pheeter un anere sin fixer fon mënxe kep. Tiise wichtich aarwayt tuut hayt wayter keen (Kuk ti apsetse 4-5.)
4. Weeche was is Pheeter fixe kang?
4 Pheeter hot kefixt fer sayn familye soriche. Awer tas waar mee wii ploos een aarwayt tsu tëm. Es siit aus tas Pheeter hat iwer kërn fixe keen. (João 21:3, 9-15) Eyer hot aach kelërnt es kërn hon een fixer fon mënxe wëre. Un, mit Yeehoowa sayn hilef, Pheeter is aarich kuut in tiise aarwayt kep. (Atos 2:14, 41)
5. Tëm noo Lucas 5:8-11, weeche was hat Pheeter angst, un was khan uns helfe torich eenliche xpiirunge triwer wech khome?
5 Meyer preetiche wayl mer Yeehoowa liipe. Tas is tas haupste uersach weeche was mer tiise aarwayt mache. Unser liip fer Yeehoowa khan uns helfe fer ti anere iwer tëm fertseele, soo kaar wën mer xpiire tas mer net kuut kenuuch sin. Wën Yeesus hot Pheeter in kelaat fer mënxe fixe, tee hot iim kesaat: “Los noo pang se hon.” (Lees Lucas 5:8-11.) * Pheeter hat net angst weeche was khont pasiire wën eyer een tisipel weyer. Xtats tas, hot eyer sich mechtich ferwunert mit te wunerlich fixeray woo Yeesus tëne kep hot un hot sich net kuut kenuuch kefun fer mit Yeesus xafe. Khan sin tas, soo wii Pheeter, tuust tuu tich ëngstlich fine wëns tuu tenkst aan ales was tepay is aan Yeesus sayn tisipel wëre. Wën soo, ferxtërk tayn liip fer Yeehoowa, Yeesus un fer tayn neekste. Tan, tuust tuu tich muutich fine fer Yeesus sayn inlaatung aan nëme fer een fixer fon mënxe wëre. (Mat. 22:37, 39; João 14:15)
6. Was noch tuut uns uf muute fer preetiche keen?
6 Es kept noch anere uersache woo uns uf muute fer preetiche keen. Meyer wole Yeesus sayn kepoot aan heere: “Keet un macht tisipele.” (Mat. 28:19, 20) Meyer tuun aach preetiche wayl ti layt ‘sin ferhunst un fon een sayt tsu te aner kexupt’, un tii prauche wërklich fiil ti woerheet fom Raych lërne. (Mat. 9:36) Yeehoowa wil tas ale sorte layt een kenau khëntnis fon te woerheet kriin un keret wëre. (1 Tim. 2:4)
7. Wii tuut Romanos 10:13-15 tsayche tas ti preetich aarwayt wichtich is?
7 Wën mer tenke tas unser preetich aarwayt khan ti mënxe sayn leepe rete, tas tuut uns uf muute fer preetiche keen. Anerste wii een fixer, woo tuut ferkhaafe orer ese ti fixe woo eyert fangt, meyer tuun ti mënxe “fange” fer tëne sayn leepe rete. (Lees Romanos 10:13-15; * 1 Tim. 4:16)
LËRN MEE IWER WII PREETICHE
8-9. Was mus eene fixer wise, un weeche was?
8 In Yeesus sayn taache, eene israelite fixer must wise was fer sort fix khont eyer fange. (Lev. 11:9-12) Tee praucht aach wise woo hin khent eyer tiise fixe fine. In te meyerst tsayt, ti fixe plaype in een plats im waser woo tëne tiint un woo se khene sich kuut fitere. Macht es unerxiit wanee tuut te fixer sayn aarwayt mache? Een misyoneer, woo leept in een Pasifik Insel, hot kelërnt tas es kept een spetsiifix xtun woo peser is fer fixe fange. Eene pruuter woo fon tat heyer is, hot tëm in kelaat fer fixe keen. Te misyoneer hot kesaat: “Ich trefe tich moye frii, 9 uer.” Te pruuter hot keantwort: “Tuu host net ferxtan. Meyer keen wën es ti richtich tsayt fer ti fixe is, net wën es ti richtich tsayt fer uns is.”
9 Kraat soo, ti fixer fon mënxe in te eyerste yoer hunert, sin tsu te pletse kang woo ti “fixe” teete sin un in te tsayt woo tii tsiimlich sicher tat weyere. Tsum payxpiil, Yeesus sayn nookeener hon kepreeticht in tëm thempel, in te sinakook, haus tsu haus un in tëm kexefte plats. (Atos 5:42; 17:17; 18:4) Meyer prauche aach ti kewoonheete khëne fon te layt woo in unser teritoryum leepe. Meyer prauche wilich sin fer unser pleene ënere tas mer khene preetiche keen woo hin un wanee tuun mer tsiimlich sicher ti layt fine. (1 Cor. 9:19-23)
KUUTE FIXER . . . 1. xafe wan un woo tii khene woerxaynlich fixe fine (Kuk ti apsetse 8-9.)
10. Was fer feramente tuut Yeehoowa sayn orkanisatsyoon uns kepe?
10 Eene fixer praucht ti richtiche feramente hon un mus es wise wii tëne penutse. Meyer prauche aach ti richtiche feramente hon fer se preetiche un wise wii tiise feramente penutse. Yeesus hot taytliche orientiirunge fer sayn tisipele kep iwer wii khente se mënxe fixe. Tee hot tëne kesaat was solte se mit nëme, woo hin preetiche un was se saan solte. (Mat. 10:5-7; Luc. 10:1-11) Hayt, Yeehoowa sayn orkanisatsyoon kept uns ti Inlërnung Kit, woo feramente hot woo tuun kuut in te preetich pariire. * Un mer sin in kelërnt wii tiise feramente penutse. Tiise iipung heleft uns uns sicher fine un ti apiliteet kriin fer unser aarwayt kuut mache. (2 Tim. 2:15)
KUUTE FIXER . . . 2. wise wii ti richtiche feramente penutse (Kuk te apsats 10.)
SAY KORAAJICH
11. Warom mise ti fixer fon mënxe koraajich sin?
11 Ti persoone woo mit fixeray xafe prauche koraajich sin. Tii tuun manich mool unkereechentne situatsyoone im meer mit mache. Tii tuun oft nacht oomt xafe, in pletse woo unkewaartne weter xtorme khene khome. Fixer fon mënxe prauche aach koraaj hon. Wën mer aan fange se preetiche un fer ti layt saan tas mer Yeehoowa sayn Tsayer sin, khene mer aach “weter xtorme” mit mache — unser familye khan sich keeche uns xtele, unser froynte khene fon uns xpooteray mache, un welche tuun tas pexeet net aan nëme. Awer tas ferwunert uns net. Yeesus hot aan kesaat tas eyer teet sayn tisipele xike preetiche fer layt woo teete sich keeche tëne xtele. (Mat. 10:16)
12. Tëm noo Josué 1:7-9, was khan uns helfe unser koraaj ferxtërke?
12 Wii khanst tuu tayn koraaj ferxtërke? Eyerst, say tich sicher tas Yeesus tuut wayter tiise aarwayt fom himel fiire. (João 16:33; Apo. 14:14-16) Noo heyer, ferxtërk tayn klaape in Yeehoowa sayn ferxpreche tas eyer tuut tich uf phase. (Mat. 6:32-34) Woo xtërker tayn klaape wërt, woo xtërker tayn koraaj wërt. Pheeter un sayn froynte hon fiil klaape ketsaycht wën tii hon sayn fixeray kexeft hiner kelos — woo tëne fersoricht hot — fer Yeesus noo keen. Tuu host aach fiil klaape ketsaycht wiis tuu fer tayn froynte un familye kesaat host, tas tuu hast aan kefang ti Piipel xtutiire mit Yeehoowa sayn Tsayer un in tëne sayn fersamlunge keen! Sicher, tuu host kroose ënerunge in tayn aanxtelung un in tayn leepe kemacht fer tich hale unich was Yeehoowa saat richtich is. Tas hot aach klaape un koraaj ferlangt. Soo lang wiis tuu tayn klaape ferxtërkst, tuu khanst tich sicher sin tas “Yeehoowa tayn Kot is mit tich, ekaal woos tuu hin keest”. (Lees Josué 1:7-9.) *
KUUTE FIXER . . . 3. koraajich xafe in unkewaartne situatsyoone (Kuk ti apsetse 11-12.)
13. Wii triwer noo tenke un peete khan tich helfe tayn koraaj ferxtërke?
13 Was noch khanst tuu mache fer tayn koraaj ferxtërke? Ferlang koraaj im kepeet. (Atos 4:29, 31) Yeehoowa tuut tayn kepeete antworte un tich nii im xtich lose. Eyer is imer uf tayn sayt fer tich xtitse. Tuu khanst aach triwer noo tenke aan wii hot Yeehoowa etliche keret in te friirixe tsayte. Tenk aach iwer wii hot Yeehoowa tich keholef torich tayn kefoere triwer wech khome un tich ti kraft kep fer ti ënerunge in tayn leepe mache. Sicher, Tee woo sayn folek torich tas Roote Meer kelënkt hot tuut tich helfe een tisipel fon Kristus sin. (Êxo. 14:13) Tuu te selwich fertraung aan Yeehoowa hale wii te salmist, woo kesaat hot: “Yeehoowa is uf mayn sayt — ich tuun khee pang hon. Was khan te mënx mich mache?” (Sal. 118:6)
14. Was host tuu kelërnt mit te speryense fon Masae un Tomoyo?
14 Een aner aat fer unser koraaj ferxtërke is lërne iwer wii hot Yeehoowa etliche pleet layt keholef koraajich wëre. Kuk ti speryens fon een xwester woo Masae heest. Tii waar pleet un hot kemënt tas tii khent nii in te preetich aarwayt xafe. Tii hot kexpiirt tas es waar seer xweyer mit frëmte layt xpreche — soo wii een kans hooch mauer krapele —, un tii tacht tas se khont nii soo was mache. Soo, hot se een ekstra aanxtrengung kemacht fer sayn liip tsu Yeehoowa un sayn neekste ferkreese. Tii hot triwer noo ketenkt iwer wii aylich hayt preetich is un hot in kepeet ferlangt tas Yeehoowa sayn wunx fer se preetiche ferxtërke teet. Masae hot torich sayn pang triwer wech khom un hot soo kaar wii hilef pyoneerin ketiint. Yeehoowa khan aach naye puplikatoore helfe koraajich sin. Kuk ti speryens fon te xwester Tomoyo. Wën se hot aan kefang haus tsu haus preetiche, ti eyerst pewooner woo se ketrof hot, hot kexraayt: “Ich wil niks se tuun hon mit Yeehoowa sayn Tsayer!” un hot ti teer foxt tsu keklopt. Xtats pang hon, Tomoyo hot fer sayn froyntin kesaat: “Host tuu tas kesiin? Ich praucht niks saan un tii wust xon tas ich Yeehoowa sayn Tsayer waar. Ich sin soo froo!” Tomoyo tuut yets wii een rekulaar pyoneerin tiine.
XTRENG TICH AAN FER SE MACHE WAS KEMACHT MUS WËRE
15. Wën ti preetich aarwayt xweyer fer uns is, wii khene mer wii een fixer sin, un warom is tas wichtich fer ti kriste?
15 Kuute fixer tuun sich aan xtrenge fer se mache ti tinge woo kemacht mus wëre. Tii mise sich tswinge fer frii uf xtaye, plaype pis ti aarwayt fërtich is, un aus hale soo kaar wën te weter xlecht is. Meyer prauche aach wii tiise fixer sin, tan tuun mer es aus hale un unser aarwayt fërtich mache. (Mat. 10:22)
16. Was khan uns helfe ti tinge mache woo fiilaycht xweyer fer uns sin?
16 In te meyerst tsayt, fine mer es peser ti tinge mache in te laychter aat. Awer, manich mool, fer ti tinge woo wichtich sin mache es kept khee laychte weech. Tan prauche mer selepst kontrol hon. Tes weeche, mer prauche hilef hon fer uns traan iipe ti tinge mache woo khene xweyer fer uns sin. Yeehoowa kept uns tiise hilef torich te hayliche kayst. (Gál. 5:22, 23)
17. In 1 Coríntios 9:25-27, wii tuut te aphostel Phaul pexraype sayn aanxtrengung fer se mache was richtich is?
17 Te aphostel Phaul hot sich aan kextrengt fer se mache was kemacht mus wëre. Awer tee hot erkhënt tas eyer praucht sayn “aychne khërper haue” fer se mache was richtich is. (Lees 1 Coríntios 9:25-27.) * Tee hot ti anere uf kemuut fer tiise selwich aanxtrengung mache, un ales “aanxtëntich un mit ortnung” mache. (1 Cor. 14:40) Meyer mise xtram xafe fer wayter Yeehoowa aan peete — too tepay, reeklich mënxe fixe keen. (Atos 2:46)
TUU NET TAS FERXUPE
18. Weeche was tuut Yeehoowa uns wii kuut aan nëme?
18 Eene fixer wërt wii kuut aan kenom tëm noo wii fiil fixe eyer fangt. Awer ti preetich aarwayt is kans anerste. Mer wëre net wii kuut aan kenom weeche wii fiil layt hon mer keholef tsu Yeehoowa sayn orkanisatsyoon khome. (Luc. 8:11-15) Wën mer wayter ti kuute oter preetiche un ti anere in lërne, wëre mer fon Yeehoowa kuut aan kenom. Warom? Wayl mer tee un sayn Soon aan heere tuun. (Mar. 13:10; Atos 5:28, 29)
19-20. Was fer ekstra uersach hon mer fer hayt preetiche keen?
19 In welche lënter, ti mënxe sin ploos erlaupt in phaar moonate fixe. In tiise lënter, eene fixer fiilaycht fint es noch aylich fixe keen wën ti tsayt neekst aans ën keet. Als fixer fon mënxe, meyer hon tiise ekstra uersach fer hayt preetiche keen: tas ën fon tiise sisteem tuut fiks khome! Ti tsayt woos noch kept fer ti kuute oter preetiche — un soo leepe rete — is kans khorts. Tuu net tas ferxupe orer ti perfëkt situatsyoon in tayn leepe waarte fer tayn teel mache in tiise wichtich aarwayt. (Ecl. 11:4)
20 Yets is ti tsayt fer tayn muut ferxtërke, fer mee iwer ti Piipel lërne, fer tayn koraaj ferxtërke un tich aan xtrenge fer se mache was kemacht mus wëre. Xaf tepay mit mee wii 8 milyoone fixer fon mënxe, un tuu tuust ti frooheet woo fon Yeehoowa khomt xpiire. (Nee. 8:10) Say pextimt fer tayn pestes in tëm preetich mache pis wan Yeehoowa saat ti aarwayt fërtich is. Awer, un tii woo xon fixer fon mënxe sin? Was khan tëne helfe wayter fest in tiise aarwayt plaype? Te neekste artikel tuut tray aate tsayche fer tas se mache.
LIIT 66 Vamos declarar as boas novas
^ parágrafo 5 Yeesus hot teemuutiche un flaysiche fixer in kelaat tëm sayn tisipele wëre. Hayt, tuut Yeesus wayter layt in laate mit tiise selwiche kwaliteete fer fixer fon mënxe wëre. Tiise artikel tuut xpreche iwer was prayche ti Piipel xtutënte mache woo tuun sich net kans sicher fine fer Yeesus sayn inlaatung aan nëme.
^ parágrafo 1 TUU PESER FERXTEEN: Ti wërter “fixer fon mënxe” hon se tuun mit tëne al woo ti kuute oter preetiche, un anere in lërne Yeesus sayn tisipele wëre.
^ parágrafo 5 (Lucas 5:8-11) Wën Simon Pheeter tas kesiin hot, hot eyer sich foer Yeesus sayne kniie kepikt, un hot iim kesaat: “Hër, kee wech fon mich, wayl ich eene sintiche mënx sin.” 9 Wayl tee un ti mëner woo mit tëm waare hon sich mechtich ferwunert weeche ales woo se kefixt hate, 10 un tas selwiche is mit Tyako un Yoohan pasiirt, ti soone fon Sepeteu, woo hon tas kexeft mit Simon uf kephast. Awer Yeesus hot fer Simon kesaat: “Los noo pang se hon. Fon yets am forem tuust tuu mënxe fange.” 11 Soo, hon se ti xife tsurik tsum lant kenom, ales hiner kelos un sin tëm noo kang.
^ parágrafo 7 (Romanos 10:13-15) Wayl “al tii woo Yeehoowa sayn naame aan ruufe, wëre keret”. 14 Awer wii tuun se tee aan ruufe wën se net aan tëm keklaapt hon? Un wii tuun se aan tëm klaape wën se net iwich tëm keheert hon? Un wii tuun se heere wëns nimant kept fer se preetiche? 15 Un wii tuun se preetiche wën se net kexikt waare? Soo wiis kexrip xteet: “Wii xeen sin ti fiis fon tëne woo kuute notisye fon kuute tinge pekhant mache!”
^ parágrafo 10 Kuk te artikel “Ensine a verdade”, in tëm piichelche A Sentinela fon Oktooper 2018, sayte 11-16.
^ parágrafo 12 (Josué 1:7-9) “Ploos say koraajich un aarich xtark, un heer aan mit acht tas kanse Kesets woo Mooses, mayne tiiner, tich kexikt hot. Lënk tich fon tëm net ap — net fer ti rechts sayt orer fer ti links sayt — soo tas tuu tich mit kluucheet aan xtelst, ekaal woos tuu hin keest. 8 Tas puuch fom Kesëts sol imer uf tayne lipe sin; un tuu solst es mit layse xtim taach un nacht leese, fer kuut aan heere ales was too kexrip xteet. Soo, wërt es teyer kuut keen in tayn weech, un tan tuust tuu mit kluucheet um keen. 9 Hon ich net tich kexikt koraajich un xtark sin? Tuu khee pang orer angst hon, wayl Yeehoowa tayn Kot is mit tich, ekaal woos tuu hin keest.”
^ parágrafo 17 (1 Coríntios 9:25-27) Al tii woo een teel in een xpring hon, tsayche tas se selepst kontrol in ales hon. Sicher, tii tuun tas mache fer een kroon woo ferkeet kriin, awer meyer, fer eene woo net ferkeet kriin. 26 Tan, tuun ich net oone tsiil xpringe orer khëmpfe wii wën ich ti luft haue teet. 27 Awer, ich tuun mayn aychne khërper haue un mache tëm mayn sklaaw, tas ich net ti tsuxtimung ferliire noo tas ich fer ti anere kepreeticht hon.
