1. Anni i imbitasion ni Jesus ta appa nga gumaggimmanango, anna anni i reaksiodda?

MAGIMMANANGO i disipulos nga da Pedro, Andres, Santiago, anna Juan tapus ilakuda. Yatutta nakaddag ira turi ta inimbita ira ni Jesus: “Tumuttul kamu niakan ta tudduat-takamu nu kunnasi na pangà tu totolay, embes tu manango.” * Anni i reaksiodda? Kagian na Biblia: “Pinanawad-da insigida i iko da anna siminuttul ira sa.” (Mat. 4:18-22) Megafu tatun, nanguli ngana i pattoleda. Imbes tu manga ira tu manango, ‘totolay ngana i apadda.’ (Luc. 5:10) Ta maddaggun, iimbitan gapa ni Jesus danuri mapia i giffutuadda nga totolay nga mangaya ta kinakurug nga kunnatun gabbalaman i kuadda. (Mat. 28:19, 20) Inalawa mu ngana kari i imbitasion ni Jesus nga magimmanango tu totolay?

2. Ngatta ta pannonopattam tu mapia i pabbalin tu publisher, anna anni i makoffun nittam tapenu makapaddesision?

² Posible nga nabayag ka ngana nga maggiggigiammu tu Biblia anna aru ngana i inulim ta pattolem. Sangaw, mawag tu desisionammu nu kayà mu ngana i mabbalin tu publisher. Ari nakuan makkafi i nono mu nu magalangakka nga alawatan i imbitasion ni Jesus. Normal laman yatun nga matageno mu megafu ta ammum nu kunnasi ka-importante yaw nga desision. Kagian na Biblia nga “insigida” nga pinanawan da Pedro anna na kokkofunna i ikoda. Ngem ari tu gavva-gavva nga kingngua yatun da Pedro anna na wagina. Maturu tu annam nga vulan ngana i nappasa turi ta nakilala anna inalawada si Jesus bilang Mesias. (Juan 1:35-42) Baka aru ngana gapa i ammum meyannung kani Jehova anna kani Jesus anna kayà mu gapa nga tulu-tuloy  nga mapprogreso ta espiritual. Ngem nige mu nga maddesision nga mabbalin tu publisher, nonopammu nakuan tu mapia yatun. Anni i nakoffun kada Pedro, Andres, anna tanakuan tapenu makapaddesision ira?

3. Anni ira nga kualidad i makoffun tapenu alawatammu i imbitasion ni Jesus?

³ I ollu ira nga disipulos ni Jesus ay kakayàda i mallayyagayya, maabilidad, magutu, anna disiplinadu. Danatun gabbalaman nga kualidad i nakoffun nira tapenu mabbalin ira tu malalaki ta pangilayyagayya ta mapia nga dumug. Magigiammu taw nga artikulo nu kunnasi makultiba danatun nga kualidad tapenu mabbalikka tu malalaki ta pallayyagayya anna panuddu ta tanakuan.

4. Ngatta magimmanango si Pedro?

⁴ Magimmanango si Pedro tapenu suportan i familiana ngem ari laman tu trabahu yatun para nisa. Kakayà ni Pedro i magimmanango. (Juan 21:3, 9-15) Nagustuanna ngana gapa i magimmanango tu totolay. Ta uffun ni Jehova, nabbalin tu malalaki si Pedro tatun nga trabahu.​—King. 2:14, 41.

5. Segun ta Lucas 5:8-11, ngatta naganassing si Pedro, anna anni i makoffun nittam nu makatageno ittam tu kunnatun?

⁵ I pinakamamaguyu nittam nga mallayyagayya ay i aya tam kani Jehova. Megafu tatun nga aya, layyagayyattam i tanakuan maski nu matageno tam nga ari ittam nga malalaki tatun. Turi ta inimbita ni Jesus si Pedro nga magimmanango tu totolay, kinagina nisa: “Ari ka nga maganassing.” (Bibbigan i Lucas 5:8-11.) Ngatta maganassing si Pedro? Ari yayya maganassing nga mabbalin tu disipulo. Ngem matagenona gare nga ari yayya mepangngo nga magalan nga makipattrabahu kani Jesus. Ngatta? Megafu ta kababalin laman ni Jesus nga nammilagro nu sitaw aru  nga manango i kinannada. Baka makatageno ka gapa tu kunnatun nu nonopammu nu anni i nelagum ta pabbalin tu disipulo ni Cristo. Nu padakallammu i pangaya mu kani Jehova, kani Jesus, anna ta kasittolem, mapaguyu ka nga alawatan i imbitasion ni Jesus nga magimmanango tu totolay.​—Mat. 22:37, 39; Juan 14:15.

6. Anni paga i karuan nga rason nu ngatta mallayyagayya ittam?

⁶ Egga paga i karuan nga rason nu ngatta mallayyagayya ittam. Kayà tam nga tuppalan yaw nga nibilin ni Jesus: ‘Umay kamu anna mangngua kamu tu disipulos.’ (Mat. 28:19, 20, NW ) Fuera paga tatun, mallayyagayya ittam megafu ta ‘awan tu awa-awayya na totolay anna napagurayan’ ira yatutta kuruga kawagadda nga mannammuan i kinakurug meyannung ta Pappatulan. (Mat. 9:36) Kayà ni Jehova nga makannammuan na ngamin nga klase na totolay i fustu nga pakannammu ta kinakurug tapenu mapaliag ira.​—1 Tim. 2:4.

7. Segun ta Roma 10:13-15, ngatta importante i pallayyagayya?

⁷ Nu ammu tam nga makepaliag ta totolay i pallayyagayya tam, mapaguyu ittam nga kuan yatun. Ari tu kagitta na literal nga gumaggimmanango nga mallaku onu kananna i manango nga nakannana, magimmanango ittam tu totolay tapenu mapaliag i inangoda.​—Bibbigan i Roma 10:13-15; 1 Tim. 4:16.

8-9. Anni nakuan i ammuan na gumaggimmanango, anna ngatta?

⁸ Mawag tu ammuan na Israelita nga gumaggimmanango nu anni nga klase na manango i makannana. (Lev. 11:9-12) Mawag gapa tu ammuanna nu sitaw nga makaleg tu manango. Maddian ira i manango nu sitaw magustuadda i danum anna nu sitaw aru i makan. Importante kari nu kanni ira nga magimmanango? Nagigiammu na tadday nga misionero nga maddian ta isla ta Pacific nga egga i kapianan nga tiempo nu kanni nga magimmanango. Mittan, inimbita yayya na tadday nga Saksi nga taga-tari tapenu magimmanango. Kinagi na misionero, “Massingatta sonu umma ta alas nuebe.” Ngem kinagi nisa na brother, “Ari tu kunnari. Umay itta magimmanango sonu egga ngana tari i manango. Ari tu sonu kayà ta ngana i umay.”

⁹ Kunnatun gapa i kingngua na magimmanango tu totolay ta ollu siglo. Umay ira ta lugar anna ta oras nu sitaw egga tari i totolay. Angngariganna, nallayyagayya i disipulo ira ni Jesus ta templo anna ta sinagoga, ta gibbalayan, anna ta plasa. (King. 5:42; 17:17; 18:4) Mawag gafu tu ammu tam nu sitaw onu nu kanni nga egga ira i totolay ta teritoria tam. Makibagay ittam nakuan anna mallayyagayya nu kanni nga matiempuattam nga egga tari i totolay.​—1 Cor. 9:19-23.

10. Anni ira nga rimienta i niyawa nittam na organisasion?

¹⁰ Mawag gapa tu ammu na gumaggimmanango i mepangngo nga rimienta nga usanna anna nu kunnasina nga usan yatun. Kunnatun gapa nittam ta pallayyagayya. Mawag tu mepangngo gapa i usattam nga rimienta anna ammu tam nu kunnasi nga usan danatun. Manawag gapa i instruksion nga niyawa ni Jesus ta disipulosna nu kunnasi nga mallayyagayya. Kinagina nira nu anni i ivuluda, nu sitaw ira mallayyagayya, anna nu anni i ikagida. (Mat. 10:5-7; Luc. 10:1-11) Nangiyawa i organisasion ni Jehova tu Teaching Toolbox nga makoffun nittam. * Matudduan ittam gapa nu kunnasi nga usan danatun. Megafu tatun,  komfiansa ittam nga mallayyagayya anna malalaki ittam nga manuddu.​—2 Tim. 2:15.

11. Ngatta mawag nga maggutu danuri gumaggimmanango tu totolay?

¹¹ Mawag tu maggutu i gumaggimmanango ira. Ngatta? Manguloli gare i tiempo ta bebay anna nu mittan gavva nga mabbagiu. Maruddu gapa nga ta gabi ira nga mattrabahu. Mawag gapa nga maggutu i gumaggimmanango ira tu totolay. Oras tu mallayyagayya anna ipakilala tam i baggi tam nga Saksi ittam ni Jehova, baka kontran ittam na familia tam, uyu-uyawan ittam na kokkofuttam, onu manakida nga ginnan i mensahe tam. Ngem ariattam ngana nakuan nga makaddagan tatun. Dati ngana nga kinagi ni Jesus ta disipulosna ira nga kontran ira danuri na layyagayyadda.​—Mat. 10:16.

12. Segun ta Josue 1:7-9, kunnasi ittam nga maggutu?

¹² Kunnasi ka nga maggutu? Ollu, mawag tu kumbinsidu ka nga maski nu egga si Jesus ta langi, igiggiyana lagapa i pallayyagayya. (Juan 16:33; Nep. 14:14-16) Tapus mattalo ka ta promesa ni Jehova nga tangngallan naka. (Mat. 6:32-34) Nu mas massikan i pangurug mu, mas nga maggutu ka. Daka-dakal nga pangurug i nipasingan da Pedro anna na kakavvuluna turi ta pinanawadda i pattolayadda tapenu tuttulan si Jesus. Kunnatun i nipasingammu turi ta kinagim ta kokkofummu anna ta kafamiliam nga makipaggigiammu ka tu Biblia ta Saksi ira ni Jehova anna magata-atende ka ngana ta study-da ira. Siguradu nga inulim ngana gapa i  konduktam anna i pattolem tapenu matuttul mu i matunung ira nga estandarte ni Jehova. Nagawag yatun tu pangurug anna gutu. Durante nga mappursigi ka nga maggutu, makasiguradu ka nga “si Jehova nga Dios mu ay egga nikaw maski sitaw i angayammu.”​—Bibbigan i Josue 1:7-9.

13. Anni i meyuffun na pannono tu mapia anna na pakimallo tapenu maggutu ka?

¹³ Anni paga i kuammu tapenu maggutu ka? Ikiddom yatun ta pakimallo. (King. 4:29, 31) Tattabbagan ni Jehova i pakimallo mu ira anna arian naka vuluvuga nga pagurayan. Kanayun naka nga uffunan. Nonopammu i pinanguffun ni Jehova ta totolena ta nappasa maski i pinanguffunna nikaw turi ta egga ira i problemam anna turi ta kawagammu nga ulian i pattolem. Nu nawayya ni Jehova nga ipaliag i totolena ta Uzzin nga Bebay, moffunan naka gapa nga mabbalin tu disipulo ni Cristo. (Ex. 14:13) Kumbinsidu ka nakuan gitta na salmista nga nakkagi: “Ari ngà maganassing, ta i YAFU i kavulu ku; anni i makua na tolay niakan gafu?”​—Sal. 118:6.

14. Anni i magigiammum ta ekspiriensa da Masae anni Tomoyo?

¹⁴ Maggutu gapa ittam nu ammuattam nu kunnasi nga pinaggutu ni Jehova danuri dati nga minappasiran gitta ni Sister Masae. Abbona nga arianna vuluvuga nga makapallayyagayya. Mariga para nisa nga kibbidan i estrangheru ira anna negittana yatun ta pakkalay ta atatannang nga pader nga imposible nga makuana. Yatutta nappursigi yayya nga mas ayatan i Dios anna i kasittolena. Pinannonopanna tu mapia nu ngatta importante nga mallayyagayya ta maddaggun anna nakimallo yayya tapenu mas nga magustuanna yatun. Ari ngana yayya nga maganassing anna nappayunir paga lagu yayya. Moffunan gapa ni Jehova i bagu ira nga publisher tapenu “maggutu.” Kunnaw i ekspiriensa na sister nga mangngagan tu Tomoyo. Ta gafuna nga mallayyagayya, kinukkulletan yayya na ollu nga makabbalay. Kinagina: “Manaki ku i makibbida ta Saksi ira ni Jehova!” tapus niserrana tu masikan i puerta. Ngem magutu nga kinagi ni Tomoyo ta partnerna: “Naginnam yari? Awan paga tu kinagì ngem ammuna ngana nga Saksi ngà. Kitessaya ngà!” Regular payunir ngana sangawe si Tomoyo.

15. Anni i disiplina ta baggi, anna ngatta importante yatun ta Cristiano ira?

¹⁵ Danuri malalaki nga gumaggimmanango ay disiplinadu. Tumukoy i disiplina ta baggi ta “abilidad nga fuersan i baggi nga kuan i ganna-gannug nga mawag nga balinan.” Kawagan na gumaggimmanango ira nga disiplinan i baggida nga masikkag tu ummumma, balinan i trabahuda, anna tulu-tuloy nga magimmanango maski nu marake i tiempo. Kawagattam gapa nga disiplinan i baggi tam tapenu makapagattam anna mabalin i trabahu tam.​—Mat. 10:22.

16. Kunnasi ittam nga mabbalin tu disiplinadu?

¹⁶ Ariattam nga mamana i disiplina ta baggi. Gagangay laman nga manaki na totolay i marigatan. Kawagan i pangifugag ta baggi tapenu mabbalin tu disiplinadu. Yatutta kawagattam i uffun tapenu sanayan i baggi tam nga kuan i ganna-gannug nga mariga para nittam nga kuan. Iyawa ni Jehova yatun nga uffun gukaban na masanto nga espirituna.​—Gal. 5:22, 23.

17. Ta 1 Corinto 9:25-27, anni i kingngua ni Pablo tapenu disiplinan i baggina?

¹⁷ Disiplinadu si apostol Pablo. Ngem aminanna nga mawag tu ‘penamanna i baggina nga magattam’ tapenu makuana i fustu. (Bibbigan  i 1 Corinto 9:25-27.) Pagarammanna gapa i tanakuan nga disiplinan i baggida anna kuadda i ngamin nga gannug “ta kunna mepangngo anna egga i unnug na.” (1 Cor. 14:40) Mawag tu egga i disiplina tam ta baggi tapenu mattalupaddian i makasta nga rutina tam ta espiritual, nelagum i regular nga pakiparte tam ta pallayyagayya anna panuddu ta tanakuan.​—King. 2:46.

18. Para kani Jehova, sitaw nga nakadepende i kasta na nattuppalattam?

¹⁸ Makagi tu makasta i pagimmanango nu aru i manango nga nagafu. Ngem ari tu kunnatun i trabahu nga pallayyagayya. Ari nga nakadepende i kasta na nattuppalattam ta karu na totolay nga noffunattam nga mabbalin tu Saksi ni Jehova. (Luc. 8:11-15) Adde ta ilayyagayya tam i mapia nga dumug anna tudduattam i tanakuan, makasta lagapa i nattuppalattam ta imamma ni Jehova. Ngatta? Megafu ta ari ittam magimmang nga kuan i ikikkiddaw ni Jehova anna na Anana nga kuattam.​—Mar. 13:10; King. 5:28, 29.

19-20. Anni paga i rasottam nga mallayyagayya sangawe?

¹⁹ Ta karuan nga nasion, egga laman ira i vulan nga mepamavulun i pagimmanango. Yatutta baka paspasan na gumaggimmanango i manga tu manango nige nga mangultimu danatun nga vulan. Bilang gumaggimmanango na totolay, egga paga i rasottam nga mallayyagayya sangawe: Araranni ngana i panuppalan naw nga sistema! Balabaddi ngana laman i nabattang nga tiempo para taw nga makepaliag-inango nga trabahu. Ariammu nga italattan yatun onu iddaggan pagalaman nga mabbalin tu perfekto i ngamin nga situasion ta pattolem nigem nga kuan yaw nga importante nga trabahu.​—Ecl. 11:4.

²⁰ Sangawe ngana i tiempo tapenu mas magustuammu i mallayyagayya, ammungan i pakannammum ta Biblia, maggutu, anna mabbalin tu disiplinadu. Makipattrabahu ka ta maturu tu walu million nga gumaggimmanango na totolay tapenu maekspiriensam i pagayayya nga iyawa ni Jehova. (Neh. 8:10) Determinadu ka nakuan nga kuan i adde na mawayyam nga mallayyagayya anna ari nga magimmang adde ta kagian ni Jehova nga nabalin ngana i trabahu. Magigiammu ta tumunug nga artikulo i tallu nga kuattam tapenu mas determinadu ittam nga tulu-tuloy nga ilayyagayya i mapia nga dumug na Pappatulan.