1. Be bhọ Jesu tie ikpea enẹn ne gbe ehẹn nin ele dọ lu? Be bhọ ele ki lu yẹ?

ENE gbe ehẹn khiẹn, ọle edibo nesi Jesu natiọle Peter, Andrew, James, bi John ha khin. Be bhọ ele ki lu yẹ ẹghe nin Jesu rẹ tie ele nin ele dọ deba ọle ha koko ẹbho ne ha yi edibo nesọle? Baibo da taman mhan ghe, ele da wo re osukpa zẹ ọgan nọnsele obọ rẹkhan ọlẹn. (Matt. 4:​18-22) Ọne emhin nin ele lu nan dẹ wo fi iẹnlẹn nọnsele denọ sẹsẹsẹ, ranmhude, ọ iyẹ yi ehẹn ele ha gbe, sokpan ẹbho ele ha ki ha koko khian ne dọ kiẹn edibo nesi Jesu. (Luke 5:10) Ẹlẹnan nian, Jesu yẹ wo tie ẹbho ne mhọn ọkhọ nọn diale, ne yẹ hoẹmhọn ẹmhọanta, ne dọ rẹkpa ẹbho kiẹn edibo nesọle. (Matt. 28:​19, 20) Uwẹ be muegbe nin uwẹ rẹ miẹn ọne ẹsọn nan?

2. Bezẹle nọn da khẹke nin uwẹ riale nọnsẹn ọkuẹsẹ uwẹ zegbere dọ deba ha tẹmhọn Osẹnobulua? Be ha rẹkpa uwẹ rẹ lu ọnan?

² Asabọmiẹn uwẹ wo lu re alo bhi Baibo nin uwẹ luẹ. Sokpan, uwẹ be sẹ muegbe nin uwẹ rẹ deba dọ ha tẹmhọn Osẹnobulua man ẹbho? Ahamiẹn uwẹ riale ghe uwẹ bha sẹ muegbe, hẹi ji ọle ha ba uwẹ bhi egbe. Asabọmiẹn ranmhude uwẹ lẹn ghe ọnan iyi iwẹnna nan ha re obọ ikpẹghẹdẹ mun, ọle zẹle nin uwẹ da riale uwẹ bha sẹ muegbe. Ẹmhọanta nọn ghe, Baibo tale ghe Peter bi ibo ọle da wo re osukpa zẹ ọgan nin ele rẹ gbe ehẹn obọ rẹkhan iJesu. Ọrẹyiriọ, ọ iyi otua iPeter bi obhio ọle rẹ lu ọnan. Ranmhude Baibo rẹman ghe, ọ gbera uki ehan nin ele lẹn ghe Jesu hi Mezaya, ọkuẹsẹ Jesu tie ele. (John 1:​35-42) Asabọ yẹ miẹn ghe, uwẹ wo luẹ emhin ne bunbun rẹji Jehova bi Jesu, ghe uwẹ sẹ yẹ wo  guanọ nin uwẹ ha sikẹ iJehova, sokpan ọkuẹsẹ uwẹ zegbere rẹ dọ ha tẹmhọn Osẹnobulua man ẹbho, ọkhẹke nin uwẹ ria ọne ẹmhọn nọnsẹn. Be rẹkpa iPeter, Andrew, bi enekẹle rẹ zegbere nin ele rẹ miẹn ọne ẹsọn nan?

3. Ikpẹ nela ha rẹkpa uwẹ rẹ sabọ ha tẹmhọn Osẹnobulua man ẹbho nọnsẹn?

³ Edibo nesu Jesu wo ha mhọn ohubhudu rẹ ha lu iwẹnna nin ele lu. Ele wo lẹn ẹlo ọne iwẹnna yẹ ha mhọn izebhudu. Sẹyẹ, ele wo ha mun egbe ọbhi ibẹẹ. Ene ikpẹ nan yẹ wo rẹkpa ele, nin ele da sabọ ha tẹmhọn Osẹnobulua man ẹbho nọnsẹn. Bhi ọne uhọnmhọn-ọta nan, mhan dẹ zilo nyan ebi uwẹ ha rẹ ha mhọn ene ikpẹ nan yẹ nin uwẹ da sabọ yẹ ha tẹmhọn Osẹnobulua man ẹbho nọnsẹn.

4. Bezẹle nin Peter da ha gbe ehẹn?

⁴ Peter bha wo gheghe ha gbe ehẹn khiẹn nin ọle da miẹn ebi ọle ha rẹ ha gbẹloghe azagba-uwa nọnsọle, ọ wo ha yẹẹ ọle rẹ ha gbe ehẹn. (John 21:​3, 9-15) Mhan dẹ sabọ yọle ghe, ọle yẹ wo ha mhọn oyẹẹ rẹ ha tẹmhọn Osẹnobulua man ẹbho nin ele da kiẹn edibo nesi Jesu. Ranmhude Jehova wo ha rẹkpa iPeter, ọle da sabọ guẹ ebi a rẹ lu ọne iwẹnna nọnsẹn yẹ.​—Acts 2:​14, 41.

5. Beji Luke 5:​8-11 rẹman, bezẹle nin ofẹn da ha mun iPeter? Be imhan ha rẹ sabọ khọn ofẹn nọn mun mhan yẹ?

⁵ Oyẹẹ nin mhan mọn da iJehova, ọle zẹle nin mhan da tẹmhọn ọlẹn man ẹbho. Ọne oyẹẹ nan dẹ rẹkpa mhan nin sẹyẹ ha tẹmhọn ọlẹn man ẹbho, aharẹmiẹn mhan riale ghe mhan bha sẹ ọria nọn ha lu ọne iwẹnna nan. Jesu da taman iPeter ghe, nin ọle hẹi ji ofẹn mun ọlẹn ẹghe nọn rẹ taman ọlẹn nọn vae dọ deba ọle ha re ẹbho kiẹn edibo. (Tie Luke 5:​8-11.) Ofẹn bha ha mun iPeter ranmhude ebi ha sunu ji ọle sade ọle dọ kiẹn odibo nọnsi Jesu. Sokpan, ọle da ha riale ọle bha sẹ ọria nọn ha ne iJesu wẹnna ranmhude emhin ọhan-ilo nin Jesu lu, nọn rẹ rẹkpa  ele rẹ gbe ehẹn ne bunbun. Ẹlẹnan nian, ofẹn sabọ rẹ ha mun uwẹ sade uwẹ ria ẹmhọn iwẹnna kẹkẹ nin ọria nọn kiẹn odibo nọnsi Jesu lu. Ahamiẹn iriọ ọ dia rẹji uwẹ, ziẹn oyẹẹ nin uwẹ mhọn da iJehova, Jesu, bi ibo ẹ. Bhiriọ, uwẹ ki ha mhọn oyaya rẹ miẹn ọne ẹsọn nin Jesu mun nin ene rẹkhan ọlẹn ghe nin ele dọ re ẹbho kiẹn edibo.​—Matt. 22:​37, 39; John 14:15.

6. Emhin ebhebhe nela zẹle nọn da hu mhan bhi udu rẹ dọ tẹmhọn Osẹnobulua?

⁶ Bha ji mhan zilo nyan emhin ebhebhe ne zẹle nọn ha da ha hu mhan bhi udu rẹ ha tẹmhọn Osẹnobulua. Mhan guanọ nin mhan re obọ rẹkhan uhi nin Jesu gbe ẹghe nin ọle rẹ yọle: “Bha ha khian dọ re ẹbho kiẹn edibo.” (Matt. 28:​19, 20) Ẹbho ne bunbun wo bibi yo bibi re bọsi ihuan ne imhọn ọnọn re ele kọn. Bhiriọ, ọkhẹke nan man ele ẹmhọn Agbejele nọnsi Osẹnobulua. (Matt. 9:36) Jehova guanọ nin ọrebhe dọ ha mhọn ilẹnmhin nọn gbale nin ele da sabọ miuhọnmhọn.​—1 Tim. 2:4.

7. Be Romans 10:​13-15 rẹ rẹman yẹ ghe, iwẹnna kpataki ọle iwẹnna itẹmhọn Osẹnobulua khin?

⁷ Ahamiẹn mhan ria eria nyan ebi ẹmhọn Osẹnobulua nin mhan taman ẹbho rẹ rẹkpa ele yẹ, ọ ki ha hu mhan bhi udu rẹ ha lu ọle. Mhan bha diabe ẹbho ne gbe ehẹn khiẹn la ene gbe ehẹn le, ọkpakinọn, nin ẹbho da sabọ miẹn iẹnlẹn ọsi ighegheghe, ọle zẹle nin mhan da rẹkpa ele kiẹn edibo nesi Jesu.​—Tie Romans 10:​13-15; 1 Tim. 4:16.

8-9. Be ọkhẹke nin ọria nọn gbe ehẹn lẹn? Bezẹle?

⁸ Ẹghe ẹdẹlẹ, ọkuẹsẹ ọbhokhan Izrẹl kpanọ nin ọle dọ gbe ehẹn, ọkhẹke nin ọle ka lẹn unan ehẹn nin ọle ha gbe. (Lev. 11:​9-12) Ọ yẹ khẹke nin ọle lẹn ejela ọle ha da miẹn ọne ehẹn gbe bhi ẹdẹ. Eji egbe da fu ele re, bi eji ele ha da manman miẹn ebale, ọle ehẹn kẹ dia bhi ẹkẹ ẹdẹ. Ọnan be rẹman ghe ẹghe nọn ghọn ọnọn gbe ehẹn, ọle hi ọle ha rẹ kpanọ dọ gbe ehẹn bhi ẹdẹ? Ọta nin obhio mhan ọkpa taman imisiọnari bhi Pacific island re ewanniẹn ọbhi ọne inọnta nin. Ẹghe nin ọle rẹ tie ọne imisiọnari nin ọle dọ rẹkhan ọlẹn gbe ehẹn, ọne imisiọnari da taman ọlẹn yọle: “Mẹn dẹ bu uwẹ re bhi agogo isinlin ọsi ewewiẹ akhọ nin mhan ko ha khian.” Ọne obhio mhan da taman ọlẹn yọle: “Ọ iyi iriọ. Ẹghe nin mhan ha rẹ miẹn ehẹn gbe, ọle mhan ha rẹ ha khian, ọ iyi ẹghe nọn ghọn mhan.”

⁹ Iriọ yẹ nọn rẹji edibo nesi Jesu bhi ore nin ọhẹnhẹn, eji ele ha da ke ẹbho re bi ẹghe nan rẹ ke ele re, ọle ele rẹ bu ele re dọ ha tẹmhọn Osẹnobulua man ele. Bhi ọsi ijiẹmhin, ele wo ha tẹmhọn Osẹnobulua man ẹbho bhi ẹkẹ uwa oga, rẹ na uwa rẹ sẹbhi uwa, bi bhi ẹki. (Acts 5:42; 17:17; 18:4) Ẹlẹnan nian, ọ yẹ khẹke nin mhan lẹn eji a da ke ẹbho re bhi idunmhun nin mhan da tẹmhọn Osẹnobulua, bi ẹghe nan rẹ ke ele re. Bhiriọ ọkhẹke nin mhan muegbe rẹ fi emhanmhan nọnsẹmhan denọ, nin mhan da sabọ dọ ha tẹmhọn Osẹnobulua man ẹbho bhi ẹghe bi eji a da ke ele re.​—1 Cor. 9:​19-23.

10. Be agbotu lu nọn ha sabọ rẹkpa mhan rẹ manman guẹ ebi a rẹ tẹmhọn Osẹnobulua man ẹbho yẹ?

¹⁰ Ọkhẹke nin ọria nọn gbe ehẹn ha mhọn emhin kẹkẹ nan rẹ gbe ehẹn. Ọ yẹ khẹke nin ọle lẹn ebi a rẹ noo ene emhin yẹ. Iriọ ọ yẹ rẹ khẹke nin mhan ha mhọn emhin kẹkẹ nan rẹ tẹmhọn Osẹnobulua yẹ lẹn ebi a rẹ noo ele yẹ. Jesu taman edibo nesọle ebi ele ha rẹ ha tẹmhọn Osẹnobulua man ẹbho yẹ. Ọle da taman ele ebi ele ha mun mhọnlẹn, eji ele ha da tẹmhọn Osẹnobulua, bi ebi ele ha ta. (Matt. 10:​5-7; Luke 10:​1-11) Ẹlẹnan nian, agbotu nọnsi Jehova zẹ emhin kẹkẹ egbe dagbare ne ha rẹkpa mhan rẹ ha tẹmhọn Osẹnobulua man ẹbho nọnsẹn. * A yẹ man mhan ebi mhan ha rẹ ha noo ene emhin nan yẹ. Ọnan wo rẹkpa mhan rẹ manman guẹ ebi  a rẹ tẹmhọn Osẹnobulua man ẹbho yẹ, yẹ ha re izebhudu lu ọle.​—2 Tim. 2:15.

11. Bezẹle nọn da khẹke nin edibo nesi Jesu ha mhọn izebhudu?

¹¹ Ọkhẹke nin ẹbho ne gbe ehẹn ha mhọn izebhudu ranmhude ọ iyi ẹghe rebhe ọ rẹ lẹkhẹ nin ele rẹ ha gbe ehẹn. Bhi ọsi ijiẹmhin, eso dagbare dọ ha gbe ehẹn ọsasọn. Sẹyẹ, efi sabọ wo ha fi bhi ọne ẹdẹ bhi ẹghe nin ele bha mun ọkhọle ọ hiehie. Iriọ ọ yẹ rẹ khẹke nin ene tẹmhọn Osẹnobulua rẹ ha mhọn izebhudu. Asabọrẹmiẹn ẹghe nin mhan wo rẹ la ha deba Esali Jehova tẹmhọn Osẹnobulua, ẹbho ne ribhi azagba-uwa nọnsẹmhan da wo ha kpokpo mhan, imọẹ mhan da ha zuọzuọ mhan, sẹyẹ, ẹbho eso bha ha re ehọ ọbhi ebi mhan ta. Sokpan, ọnan bha han mhan ilo ranmhude Jesu ka tale ghe a dẹ wo kpokpo edibo nesọle.​—Matt. 10:16.

12. Beji Joshua 1:​7-9 rẹman, be ha rẹkpa mhan rẹ sabọ ha mhọn izebhudu?

¹² Be ha rẹkpa ẹ ha mhọn izebhudu? Nin uwẹ rẹ sabọ ha mhọn izebhudu, ọkhẹke nin uwẹ ka rẹọbhọ ghe, Jesu tobọle na bhi okhun dia ọne iwẹnna itẹmhọn Osẹnobulua nin mhan lu nan. (John 16:33; Rev. 14:​14-16) Sẹyẹ, ọkhẹke nin uwẹ ha mhọn urẹọbhọ ghe, Jehova de gbẹloghe ẹ beji ọle vele. (Matt. 6:​32-34) Ahamiẹn uwẹ ziẹn urẹọbhọ nọnsẹ, uwẹ ki sabọ manman ha mhọn izebhudu. Peter bi ibo ọle da wo rẹman ghe ele mhọn urẹọbhọ nọn ziẹnlẹn ẹghe nin ele rẹ wo re osukpa zẹ ilọnmhọn ehẹn nin ele lu obọ nin ele da rẹkhan iJesu. Urẹọbhọ nọn ziẹnlẹn  uwẹ yẹ rẹman ẹghe nin uwẹ rẹ taman ibo ẹ bi ene ribhi azagba-uwa nọnsẹ ghe, uwẹ munhẹn ha deba Esali Jehova luẹ iBaibo yẹ yo ikolo oga. Edandan iribhọ ghe uwẹ wo fi iẹnlẹn nọnsẹ denọ nin uwẹ da sabọ ha re obọ rẹkhan uhi nesi Jehova. Urẹọbhọ bi izebhudu nin uwẹ mhọn, ọle re uwẹ lu enan. Beji uwẹ ha rẹ ha bọn izebhudu nọnsẹ okhun, ha mhọn ọlẹn bhi ọkhọle ghe, Jehova nin Osẹnobulua nọnsẹ re uwẹ bhi ikeke bhi eji ọ hi ki rẹ ha khin nin uwẹ ye.​—Tie Joshua 1:​7-9.

13. Be erọnmhọn ha rẹ sabọ rẹkpa ẹ ha mhọn izebhudu yẹ? Bezẹle nin uwẹ ha da ha mhọn izebhudu sade uwẹ ria eria nyan uwedẹ nin Jehova sẹ rẹ rẹkpa ẹ bi ẹbho nekẹle?

¹³ Emhin ọbhebhe nela ha rẹkpa ẹ rẹ sabọ ha mhọn izebhudu? Erọnmhọn. Nan erọnmhọn ji Jehova nin ọle re izebhudu nin uwẹ. (Acts 4:​29, 31) Jehova dẹ wanniẹn ọne erọnmhọn, ọle ida fi ikeke gbe ẹ. Ọle dẹ wo ha rẹkpa ẹ. Ha ria eria nyan uwedẹ nin Jehova rẹ miẹn ẹbho nesọle fan bhi ẹghe ẹdẹlẹ. Sẹyẹ, ria eria nyan ebi ọle sẹ rẹ rẹkpa ẹ khọn ọnọghọ kẹkẹ miotọ yẹ, bi ebi ọle sẹ rẹ rẹkpa ẹ fidenọ bhi iẹnlẹn yẹ. Bhi ọsi ẹmhọanta, Osẹnobulua nọn sabọ wa okpẹdẹ a nin ẹbho nesọle, dẹ sabọ rẹkpa ẹ kiẹn odibo nọnsi Jesu. (Ex. 14:13) Ha mhọn urẹọbhọ nọn diabe ọsi ọria nọn gbẹn ebe iPsalms nọn yọle: “Jehova ri mẹn bhi ikeke; Ofẹn ida ha mun mẹn. Be ọria ha sabọ lu mẹn yẹ?”​—Ps. 118:6.

14. Be uwẹ miẹn luẹ bhi ijiẹmhin ọsi Masae bi Tomoyo?

¹⁴ Uwedẹ ọbhebhe nin mhan ha rẹ sabọ ha mhọn izebhudu hi, mhan ki ha luẹ ẹmhọn uwedẹ nin Jehova rẹ rẹkpa ẹbho nin ẹkhọle rẹ ha lo, rẹ dọ ha mhọn izebhudu. Bha ji mhan zilo nyan ijiẹmhin ọsi obhio mhan natiọle Masae. Ọria nin ẹkhọle lo ọle ha khin rẹ sẹbhọ ghe, ọle da ha riale ghe, ọle ida sabọ deba lu iwẹnna itẹmhọn Osẹnobulua hiehie. Ọle da yọle ghe, nan rẹ ha ne ọriọbhe talọ diabe ogbe nin ọle ida sabọ san. Be ki rẹkpa ọle? Ọle da dọnmhegbe nin ọle rẹ ziẹn oyẹẹ nin ọle mhọn da Osẹnobulua bi ibo ọle. Ọle ki dọ riale ghe obhi ẹghe khere ki kẹre nin ọne agbọn nan rẹ kpẹn, ọle da nan erọnmhọn ji Jehova nọn rẹkpa ọle nin ọle rẹ ha mhọn ohubhudu rẹ dọ ha tẹmhọn ọlẹn. Bhiriọ, ọle da sabọ khọn ẹkhọle nọn lo ọle. Ọle da sabọ yẹ zegbere rẹ lu iwẹnna ọkanẹfan ọsi ẹghe rebhe. Jehova dẹ yẹ sabọ rẹkpa ene la munhẹn ha deba tẹmhọn ọlẹn nin ele da ha mhọn izebhudu. Bha ji mhan fẹ ijiẹmhin ọsi obhio mhan natiọle Tomoyo ghe. Ẹghe ọhẹnhẹn nin ọle rẹ deba dọ tẹmhọn Osẹnobulua rẹ na uwa rẹ sẹbhi uwa, ọria ọhẹnhẹn nin ọle miẹn da de vahiẹn ọlẹn yọle: “Mẹn imhọn ebi mẹn re Esali Jehova lu!” Bhiriọ, ọne ọria da re ohu bi odẹ gbe. Ranmhude izebhudu nin Tomoyo ha mhọnlẹn, ọle da taman ọne ele ko ha tẹmhọn Osẹnobulua yọle: “Uwẹ be họn ebi ọle ta yẹ? Ọ wo ti mẹn bhọ ghe arẹmiẹn mẹn bha ta ukpọta ọkpa man ọlẹn, ọle da wo lẹn ghe Ọsali Jehova mẹn khin.” Ẹlẹnan nian, ọkanẹfan ọsi ẹghe rebhe Tomoyo ki khin.

15. Be a re ọle ta nan rẹ ha mun egbe ọbhi ibẹẹ? Bezẹle nọn da khẹke nin edibo nesi Jesu ha mun egbe ọbhi ibẹẹ?

¹⁵ Nin ọria rẹ sabọ ha gbe ehẹn nọnsẹn, ọkhẹke nin ọle ha mun egbe ọle bhi ibẹẹ. Ọria nọn sabọ mun egbe ọle bhi ibẹẹ, ọle hi ọria nọn sabọ man egbe ọle emhin rẹ ha lu emhin nọn khẹke. Ọkhẹke nin ene gbe ehẹn khiẹn man egbe ele ebi a rẹ kẹ riọ bhi owe ọsi ewewiẹ yẹ, ebi a rẹ rẹtẹ bhi ọne iwẹnna yẹ aharẹmiẹn emhin bha dia nọnsẹn bhi ọne ẹdẹ nin ele da gbe ehẹn. Bọsi edibo nesi Jesu, ọkhẹke nin mhan yẹ ha mun egbe mhan ọbhi ibẹẹ nin mhan da sabọ ha rẹtẹ ha miẹn ọne ẹsọn nin ọle mun nin mhan, yẹ lu ọle sotọ.​—Matt. 10:22.

16. Be ha rẹkpa mhan nin mhan da sabọ ha lu emhin ne nọghọ mhan rẹ lu?

¹⁶ A bha biẹ mhan bi imun-egbe-ọbhi-ibẹẹ. Sokpan, ẹgheso, emhin ne lu uhọnmhọn emhin nẹ bhi iẹnlẹn nọnsẹmhan ilẹkhẹ nan rẹ lu. Bhiriọ,  ọkhẹke nin mhan man egbe mhan ebi a rẹ situa lu ene emhin nan yẹ. Jehova dẹ noo ahu ẹlinmhin nọnsele rẹ rẹkpa mhan lu ọle.​—Gal. 5:​22, 23.

17. Bhi 1 Corinthians 9:​25-27, be iPaul tale ghe ọle lu yẹ, nin ọle da sabọ ha lu iwẹnna oga?

¹⁷ Paul nin odibo wo ha mun egbe ọle ọbhi ibẹẹ. Ọle tale ghe, ọle wo ha wẹnna kaka nin ọle rẹ dia egbe ọle ha lu ebe gbale. (Tie 1 Corinthians 9:​25-27.) Ọle da yẹ taman enekẹle ghe, nin ele ha mun egbe ele ọbhi ibẹẹ yẹ lu emhin rẹkhan emhanmhan bi uwedẹ nọn gbale. (1 Cor. 14:40) Bhiriọ, ọkhẹke nin mhan wẹnna kaka nin mhan rẹ ha deba lu ilọnmhọn oga, bọsi nan rẹ ha tẹmhọn Osẹnobulua ẹghe rebhe.​—Acts 2:46.

18. Be ha re iJehova tale ghe iwẹnna itẹmhọn Osẹnobulua nin mhan lu kiẹn ọlẹn?

¹⁸ Eka ehẹn nin ọria nọn gbe ehẹn sabọ gbe, ọle ha tare si iwẹnna nọnsọle kiẹn ọlẹn nanlẹn. Sokpan, iwẹnna itẹmhọn Osẹnobulua iyi iriọ. Ọ iyi eka ẹbho nin mhan rẹkpa dọ kiẹn Esali Jehova ha tare si iwẹnna itẹmhọn Osẹnobulua nin mhan lu kiẹn ọlẹn. (Luke 8:​11-15) Ahamiẹn mhan rẹtẹ ha lu iwẹnna itẹmhọn Osẹnobulua nin Jesu bi Aba ọle mun nin mhan nin mhan lu, ọle hi ghe ọne iwẹnna kiẹn ọlẹn nin mhan bhi ẹlo nọnsi Jehova.​—Mark 13:10; Acts 5:​28, 29.

19-20. Bezẹle nọn da khẹke nin mhan manman situa bhi iwẹnna itẹmhọn Osẹnobulua nin mhan lu ẹlẹnan nian?

¹⁹ Bhi agbaẹbho eso, ọ iyi ẹghe rebhe ene gbẹloghe rẹ ji ene gbe ehẹn da ha gbe ehẹn. Bhi ene agbaẹbho nan, ahamiẹn ẹghe nan re nin ene gbe ehẹn rẹ ha gbe ehẹn bu ọkpẹnlẹn, ele ki wo re ẹjẹje ha lu iwẹnna nọnsele. Iriọ ọ yẹ rẹ khẹke nin mhan ha re ẹjẹje lu iwẹnna itẹmhọn Osẹnobulua ẹlẹnan ranmhude ọne agbọn nan bu ọkpẹnlẹn. Ẹghe iyẹ manman ribhọ nin mhan rẹ ta ọne uhọnmhunje nọn ha rẹkpa ẹbho miuhọnmhọn. Bhiriọ, hẹi mundia khẹ ukpe nin emhin rebhe ha rẹ dia nọnsẹn bhi iẹnlẹn nọnsẹ, ọkuẹsẹ uwẹ deba ha lu ọne iwẹnna nan.​—Eccl. 11:4.

²⁰ Ejayenan nian ọ manman khẹke nin mhan ziẹn ohubhudu nin mhan mhọnlẹn rẹ ha tẹmhọn Osẹnobulua, nin mhan manman lẹn Baibo nọnsẹn, nin mhan ha mhọn izebhudu, yẹ ha mun egbe ọbhi ibẹẹ. Ẹlẹnan nian, Esali Jehova ne ribhi otọ agbọn rebhe bun gbera ẹbo elẹnlẹn. Dọnmhegbe ha deba ele tẹmhọn Osẹnobulua. Bhiriọ, uwẹ ki miẹn eghọnghọn nọn na obọ iJehova vae. (Neh. 8:10) Muegbe nin uwẹ rẹ lu eka nin uwẹ ha sabọ lu bhi ọne iwẹnna nan, rẹ dọ sẹbhi ẹghe nin Jehova ha rẹ re ọkpẹnlẹn ọbhọ. Bhi uhọnmhọn-ọta nọn ki sẹ ọle bhi egbe, mhan dẹ zilo nyan uwedẹ ea nin mhan ha rẹ sabọ ziẹn ohubhudu nin mhan mhọn rẹ lu iwẹnna itẹmhọn Osẹnobulua sẹbhi ọkpẹnlẹn.