1. Inki Yezu songaka balobi-mbisi iya mpi nki bo salaka?

BALONGOKI yai: Piere, Andre, Yakobo mpi Yoane vandaka balobi-mbisi. Bo yitukaka mingi ntangu Yezu songaka bo nde: “Beno landa mono, ebuna mono ta kumisa beno balobi-bantu.” * Inki bo salaka? Biblia ke tuba nde: “Na mbala mosi, bo yambulaka babukondi na bo mpi landaka yandi.” (Mat. 4:18-22) Lukanu yina sobaka luzingu na bo. Na kisika ya kukanga bambisi bo kumaka ‘kukanga bantu ya moyo.’ (Luka 5:10) Bubu yai, Yezu ke binga bantu ya ntima masonga yina ke zolaka kieleka na kusala mutindu mosi. (Mat. 28:19, 20) Keti nge me ndimaka emvitasio ya Yezu ya kukuma mulobi-bantu?

2. Sambu na nki beto fwete yindula mbote-mbote na ntwala ya kubaka lukanu ya kukuma balobi-bantu mpi nki ta sadisa beto na kubaka lukanu yango?

² Mbala ya nkaka nge ke longukaka Biblia, nge me sobaka bikalulu na nge mpi ntangu yai, nge ke zola kukuma nsamuni ya nsangu ya mbote. Kana nge ke wa boma ya kundima emvitasio ya Yezu, kulemba nitu ve. Mbala ya nkaka nge ke wa boma sambu nge ke bakisa nde kukuma nsamuni kele lukanu mosi ya mfunu kibeni. Ya kieleka, Biblia ke tuba nde Piere mpi banduku na yandi, yambulaka babukondi na bo “na mbala mosi.” Kansi, Piere ti mpangi na yandi yindulaka ntete mbote-mbote na ntwala ya kubaka lukanu yina. Bangonda kuluta sambanu na ntwala, bo zabaka Yezu mpi bo ndimaka nde yandi kele Mesia. (Yoa. 1:35-42) Mutindu mosi mpi ti nge, mbala ya nkaka nge me longukaka  mambu mingi ya Yehowa mpi ya Yezu mpi nge ke zola kulanda kuyela na kimpeve. Kansi, nge fwete yindula ntete mbote-mbote na ntwala ya kukuma nsamuni. Inki sadisaka Piere, Andre mpi bantu ya nkaka na kubaka lukanu ya kulanda Yezu?

3. Inki bikalulu ta kumisa ngolo mpusa na nge ya kundima emvitasio ya Yezu?

³ Balongoki ya ntete ya Yezu vandaka ti nzala ya ngolo ya kusamuna, longukaka mambu mingi ya Biblia, vandaka kikesa mpi bo vandaka kusala bibansa. Ntembe kele ve nde bikalulu yai sadisaka bo na kusala mbote kisalu na bo ya kuloba bantu. Disolo yai ta tubila mutindu nge lenda yedisa bikalulu yina sambu na kusala mbote kisalu ya kusamuna mpi ya kulonga nsangu ya mbote.

4. Inki sadisaka Piere na kumaka ti mpusa ya ngolo ya kukuma mulobi-bantu?

⁴ Piere vandaka kuloba bambisi sambu na kusansa dibuta na yandi. Yo vandaka kisalu ya mbote sambu na yandi. Yo ke monana nde yandi vandaka kuzola mingi kisalu ya kuloba. (Yoa. 21:3, 9-15) Yandi kumaka mpi kuzola mingi kisalu ya kuloba bantu. Yehowa sadisaka yandi mpi yandi kumaka kusala mbote kisalu yai.—Bis. 2:14, 41.

5. Mutindu Luka 5:8-11 ke monisa yo, sambu na nki Piere waka boma mpi nki lenda sadisa beto na kukatula boma bonso yandi?

⁵ Beto ke samunaka sambu beto ke zolaka Yehowa, yo kele kikuma ya ntete ya ke pusaka beto na kusala kisalu yai. Zola na beto sambu na Yehowa ke pusaka beto na kusonga bantu ya nkaka mambu na yandi ata beto ke yindula nde beto me fwana ve. Ntangu Yezu bingaka Piere na kukuma mulobi-bantu, yandi songaka yandi nde: “Kuwa diaka boma ve.” (Tanga Luka 5:8-11.) Piere waka ve boma sambu na mambu yina lendaka kukumina yandi kana yandi kuma longoki ya Yezu kansi yandi yitukaka mutindu  Yezu sadisaka bo na kukanga bambisi na mutindu ya kuyituka. Yandi zabaka nde Yezu salaka kimangu, yo yina yandi yindulaka nde yandi me fwana ve ata fioti na kusala ti Yezu. Bonso Piere nge lenda wa boma ya mambu yina yo ta lomba nde nge sala kana nge me kuma longoki ya Kristu. Kana yo kele mutindu yina, kumisa ngolo zola na nge sambu na Yehowa, Yezu mpi bantu sambu yo ta pusa nge na kundima emvitasio ya kukuma mulobi-bantu.—Mat. 22:37, 39; Yoa. 14:15.

6. Inki bikuma ya nkaka ke pusaka beto na kusamuna?

⁶ Beto tadila bikuma ya nkaka ya ke pusaka beto na kusamuna. Beto ke samunaka sambu beto ke zolaka kulemfuka na nsiku yai ya Yezu: “Beno kwenda mpi beno kumisa bantu . . . balongoki.” (Mat. 28:19, 20) Beto ke samunaka mpi sambu bantu ke ‘niokwama mpi ke yungana’ mpi bo kele na nzala ya ngolo ya kulonguka kieleka ya me tala Kimfumu. (Mat. 9:36) Yehowa ke zolaka nde bantu ya mitindu yonso kukuma ti nzayilu ya sikisiki ya kieleka mpi kuguluka.—1 Tim. 2:4.

7. Inki mutindu Baroma 10:13-15 ke monisa nde kisalu ya kusamuna kele mfunu?

⁷ Kana beto ke yindula mambote yina kisalu ya kusamuna ke natilaka bantu, yo ta pusa beto na kusamuna mingi. Mulobi-mbisi ke tekaka mpi ke diaka bambisi yina yandi ke kangaka. Kansi, beto ke “kangaka” bantu sambu na kugulusa luzingu na bo.—Tanga Baroma 10:13-15; 1 Tim. 4:16.

8-9. Inki mulobi-mbisi fwete zaba mpi sambu na nki?

⁸ Na bilumbu ya Yezu, yo vandaka kulomba nde muntu ya Israele yina vandaka kuloba, kuzaba bambisi yina yandi fwete kanga. (Levi 11:9-12) Diaka, yo vandaka kulomba nde yandi zaba kisika bambisi yango kele. Mbala mingi bambisi ke vandaka na kisika yina bo ke kudiwa mbote mpi kisika madia kele mingi. Yo kele mpi mfunu nde mulobi-mbisi kuzaba ntangu yina yandi fwete kanga bambisi. Na yina me tala ntangu ya mbote ya kukanga bambisi, beto tala mambu ya mpangi mosi yina ke zingaka na kisanga ya Pacifique tubaka ntangu yandi bingisaka mpangi mosi ya misionere sambu bo kwenda kuloba. Mpangi ya misionere tubilaka mpangi yina nde: “Beto ta kutana mbasi na suka na 9h00.” Mpangi yina vutudilaka mpangi ya misionere nde: “Nge ke bakisa ve. Beto fwete kwenda na ntangu yina beto fwete kanga bambisi kansi ve ntangu yina kele mbote sambu na beto.”

⁹ Mutindu mosi na mvu-nkama ya ntete, balongoki ya Yezu yina kumaka balobi-bantu vandaka kukwenda kisika yina bantu kele mpi na ntangu yina bo lenda kuta bo. Mu mbandu balongoki ya Yezu vandaka kulonga na tempelo, na basinagoga, na nzo na nzo mpi na zandu. (Bis. 5:42; 17:17; 18:4) Beto mpi fwete zaba mbote bantu ya teritware na beto. Beto fwete soba bantangu na beto ya kusamuna, kusamuna na kisika yina bantu kele mpi na ntangu yina beto lenda kuta bo.—1 Bak. 9:19-23.

10. Inki bisadilu dibundu ya Yehowa me pesaka beto?

¹⁰ Mulobi-mbisi ke vandaka na mfunu ya bisadilu ya mbote mpi yandi fwete zaba mutindu ya kusadila yo. Beto mpi fwete vanda ti bisadilu ya mbote sambu na kusamuna. Beto fwete zaba mpi mutindu ya kusadila yo. Yezu pesaka balongoki na yandi bansiku ya pwelele na mutindu ya kuloba bantu. Yandi songaka bo bima yina bo fwete nata, kisika ya kusamuna mpi mambu yina bo fwete tuba. (Mat. 10:5-7; Luka 10:1-11) Bubu yai, dibundu ya Yehowa me pesaka beto bisadilu sambu na kulonga mpi bisadilu ya nkaka me butaka mbuma ya mbote. * Bo  ke longaka beto mpi mutindu ya kusadila yo. Yo me sadisaka beto na kuwa ve boma ntangu beto ke samuna mpi yo ke sadisaka beto na kusamuna mbote.—2 Tim. 2:15.

11. Sambu na nki balobi-bantu fwete vanda kikesa?

¹¹ Balobi-mbisi ke vandaka kikesa. Sambu bantangu ya nkaka bo ke kutanaka ti mambu ya kukonda kukana na nzadi. Mbala mingi bo ke lobaka na mpimpa mpi bo ke kutanaka ti mupepe ya ngolo. Balobi-bantu mpi fwete vanda kikesa. Ntangu beto ke yantikaka kusamuna mpi ke songaka bantu ya nkaka nde beto kele Bambangi ya Yehowa, beto lenda kutana ti “mipepe ya ngolo,” disongidila mbangika ya bantu ya dibuta na beto, banduku lenda seka beto mpi bantu ya nkaka lenda buya kuwa nsangu na beto. Kansi, yo fwete yitukisa beto ve. Sambu Yezu songaka balongoki na yandi nde bantu ta bangika bo.—Mat. 10:16.

12. Mutindu Yozue 1:7-9 ke monisa yo, nki ta sadisa beto na kuvanda kikesa?

¹² Inki ta sadisa nge na kuvanda kikesa? Ya ntete, nge fwete ndima nde Yezu ke twadisa kisalu yai banda na zulu. (Yoa. 16:33; Kus. 14:14-16) Ya zole, nge fwete ndima kibeni nde Yehowa ta tanina nge mutindu yandi me silaka. (Mat. 6:32-34) Kana nge kumisa lukwikilu na nge ngolo, nge ta vanda kikesa. Piere mpi banduku na yandi monisaka lukwikilu ya ngolo ntangu bo yambulaka kisalu na bo sambu na kulanda Yezu. Mutindu mosi, nge monisaka lukwikilu ya ngolo ntangu nge songaka banduku na nge mpi bantu ya dibuta na nge nde nge me yantika kulonguka Biblia ti Bambangi ya  Yehowa mpi kukwenda na balukutakanu na bo. Ntembe kele ve nde, nge salaka bansoba ya ngolo na luzingu na nge sambu na kulemfuka na minsiku ya Yehowa. Yo lombaka lukwikilu mpi kikesa. Kana nge landa kuvanda kikesa, nge ta ndima nde “Yehowa Nzambi na nge kele ti nge konso kisika yina nge ke kwenda.”—Tanga Yozue 1:7-9.

13. Inki mutindu kuyindulula mingi mpi kisambu lenda sadisa nge na kuvanda kikesa?

¹³ Inki ta sadisa nge diaka na kuvanda kikesa? Samba sambu Yehowa kupesa nge kikesa. (Bis. 4:29, 31) Yehowa ta pesa mvutu na bisambu na nge mpi ta yambula nge ve ata fioti. Yandi ta landa kusadisa nge. Diaka, nge lenda yindula mingi mutindu yandi sadisaka bansadi na yandi na ntangu ya ntama. Yindula diaka mutindu yandi sadisaka nge na kununga mambu ya mpasi yina nge kutanaka ti yo mpi yandi pesaka nge kikesa ya kusoba bikalulu na nge. Mutindu yandi sadisaka bansadi na yandi na Nzadi-Mungwa ya Mbwaki, yandi ta sadisa nge mpi na kukuma longoki ya Kristu. (Kub. 14:13) Nge lenda kuma ti lukwikilu bonso ya muyimbi-bankunga yina tubaka nde: “Yehowa kele na lweka na mono; mono ta wa boma ve. Muntu lenda sala mono nki?”—Nk. 118:6.

14. Inki dilongi nge me baka na mbandu ya mpangi Masae mpi Tomoyo?

¹⁴ Diambu ya nkaka yina ta sadisa nge na kuvanda kikesa kele kulonguka mutindu Yehowa me sadisaka bantu yina ke vandaka nsoni-nsoni na kukuma kikesa. Beto tadila mbandu ya mpangi-nkento Masae. Yandi vandaka nsoni-nsoni mpi yandi vandaka kukuka ve ata fioti kusamuna na kisika ya bantu mingi. Kusolula ti bantu yina yandi me zaba ve, vandaka diambu ya mpasi kibeni sambu na yandi. Yandi vandaka kumona yo bonso nde yandi ke mata na kibaka mosi ya nda mpi yandi vandaka kuyindula nde yandi ta kuka ve kusala yo. Yo yina, yandi salaka bikesa ya ngolo sambu na kukuma kuzola mingi Nzambi mpi bantu. Yandi yindululaka mpi bakisaka nde kisalu ya kusamuna fwete salama nswalu na bantangu yai ya beto ke zinga mpi yandi sambaka Yehowa na kusadisa yandi na kukumisa ngolo mpusa na yandi ya kusamuna. Yandi katulaka boma mpi kumaka mupasudi-nzila ya ntangu yonso. Yehowa lenda sadisa mpi bansamuni ya mpa na ‘kuvanda kikesa.’ Beto tala diambu yina kuminaka mpangi-nkento Tomoyo. Ntangu yandi yantikaka kusamuna nzo na nzo, na nzo ya ntete yina bo kotaka, munkwa nzo basikaka mpi nganinaka bo nde: “Mono ke zolaka ve kusolula ti Bambangi ya Yehowa!” mpi yandi kangaka kielo. Na kikesa yonso Tomoyo songaka mpangi yina bo samunaka ti yandi nde: “Nge me wa, mono me tuba ve ata kima kansi nkento yina me bakisa nde mono kele Mbangi ya Yehowa. Mono kele na kiese.” Bubu yai Tomoyo kele mupasudi-nzila ya ntangu yonso.

15. Kusala bibansa ke tendula nki mpi sambu na nki yo kele mfunu sambu na beto?

¹⁵ Bantu yina ke lobaka mbote ke salaka bibansa sambu bo sala kisalu na bo mbote. Kusala bibansa ke tendula “kusala bikesa sambu na kusala mambu mutindu yo fwete salama.” Balobi-mbisi ke salaka bibansa sambu na kutelema na suka, kulanda kuloba tii na nsuka ya kisalu ata ntangu ke ngolo, mupepe ke bula to mvula. Beto mpi fwete sala bibansa sambu na kukanga ntima mpi kulanda kusamuna ti na nsuka.—Mat. 10:22.

16. Inki mutindu beto lenda kuma ti kikalulu ya kusala bibansa?

¹⁶ Yo ke lombaka bikesa sambu na kuyedisa kikalulu ya kusala bibansa sambu mbala mingi beto ke zolaka kusala mambu yina kele ve mpasi. Yo yina, beto ke vandaka ti mfunu ya lusadisu  sambu na kusala mambu yina kele mpasi. Yehowa ke pesaka beto lusadisu yina na nzila ya mpeve santu na yandi.—Bag. 5:22, 23.

17. Na 1 Bakorinto 9:25-27, Polo ke tuba nde yandi vandaka kusala nki sambu na kusala bibansa?

¹⁷ Ntumwa Polo vandaka kusala bibansa mingi yo yina yandi ke tuba nde yandi vandaka ‘kubula’ nitu na yandi sambu na kusala mambu ya mbote. (Tanga 1 Bakorinto 9:25-27.) Yandi siamisaka bantu ya nkaka na kusala bibansa sambu na kusala mambu yonso “na mutindu ya mbote mpi na ndonga.” (1 Bak. 14:40) Beto fwete sala bibansa sambu na kulanda kusadila Yehowa, mu mbandu beto fwete samuna mpi kulonga nsangu ya mbote.—Bis. 2:46.

18. Inki ta sadisa Yehowa na kumona nde beto ke sala kisalu na yandi mbote?

¹⁸ Mulobi-mbisi ke zabaka nde yandi me sala kisalu na yandi mbote kana yandi me kanga bambisi mingi. Kansi, kisalu ya kusamuna kele ve mutindu yina. Beto lenda tuba ve nde beto ke samuna mbote kana beto me kumisa bantu mingi Bambangi ya Yehowa. (Luka 8:11-15) Kansi, kana beto ke landa kusamuna nsangu ya mbote mpi kulonga bantu ya nkaka. Yehowa ta mona nde beto ke sala kisalu mbote. Sambu na nki? Sambu beto ke lemfukila yandi mpi Mwana na yandi.—Mar. 13:10; Bis. 5:28, 29.

19-20. Inki kele kikuma ya nkaka yina ke pusa beto na kusamuna?

¹⁹ Na bansi ya nkaka, bo ke tudilaka bantu yina ke lobaka bangonda yina bo fwete loba bambisi. Na bansi yina, balobi-mbisi ke salaka kisalu na bo nswalu kana bo ke zola kukuma na nsuka ya nsungi yina bo tudilaka bo. Beto mpi fwete sala kisalu ya kusamuna nswalu sambu nsuka ya nsi-ntoto yai me kuma kibeni pene. Ntangu me bikala fioti kibeni sambu na kusala kisalu yai ya kugulusa bantu. Yo yina, kusukinina ve to kuyindula ve nde nge fwete kinga ntangu ya mbote sambu na kusala kisalu yai ya mfunu.—Lon. 11:4.

²⁰ Kumisa ngolo nzala na nge ya kusamuna, longuka mambu mingi ya Biblia, vanda kikesa mpi sala bibansa. Samuna ti balobi-bantu kuluta bamilio nana yina kele na ntoto ya mvimba mpi nge ta baka kiese yina Yehowa ke pesaka. (Neh. 8:10) Baka lukanu ya kusamuna mingi kibeni tii kuna Yehowa ta tuba nde yo me lunga. Na disolo yina ke landa, beto ta tadila mitindu tatu yina lenda sadisa beto na kukumisa ngolo lukanu na beto ya kulanda kusamuna nsangu ya mbote ya Kimfumu.