1. Иса Мәсиһ чар мәʹсигьрарʹа чь гот, у ԝана чь кьр?

ПӘТРУС, Әндраԝьс, Аԛуб у Йуһʹәнна ише мәʹсигьрийе дькьр. Рʹожәке, Иса Мәсиһ ԝанрʹа ӧса гот: «Ль пәй мьн ԝәрьн! Әзе ԝә бькьм нечʹирванед [мәʹсигьред] мәрьва». * Гәло ԝана чь кьр? Кʹьтеба Пироз ӧса дьбежә: «Ԝан жи дь щида тʹорʹед хԝә һиштьн у ль пәй ԝи чун» (Мәт. 4:18-22, ИМ). Жь ԝе рʹожева, жийана ԝана бь тʹәмами һатә гӧһастьне, у әԝана ида бун «мәʹсигьред» симболик (Луԛа 5:10). Иро жи, Иса Мәсиһ гази кәсед дьлпʹак дькә кӧ әԝана ви иши бькьн (Мәт. 28:19, 20). Гәло тә әв тʹәглифа Иса Мәсиһ ԛәбул кьрийә?

2. Һьнә кәс чьма дьфькьрьн кӧ әԝ һазьр ниньн бьбьн мьзгинван, у чь дькарә али ԝан бькә кӧ әԝ ве ԛьраре бькьн?

² Дьбәкә тӧ Кʹьтеба Пироз рʹьнд һин буйи, у ида ԝәхт һатийә кӧ тӧ ԛьраре бьди ԝәки бьби мьзгинван. Һәгәр тӧ дьфькьри кӧ тӧ һе һазьр нини, хәмгин нәбә. Дьбәкә сәбәба дӧдьлийа тә әв ә кӧ тӧ зани ԝәки әв йәк ԛьрарәкә пʹьрʹ фәрз ә. Рʹаст ә Пәтрус у һәвалед ԝи дәрберʹа тʹорʹед хԝә һиштьн, ле Пәтрус у бьре ԝи зу нәгьһиштьбун ве ԛьраре. Ԝана ида шәш мәһа зедәтьр Иса нас кьрьбу у фәʹм кьрьбу кӧ Мәсиһ әԝ ә (Йуһʹн. 1:35-42). Бәлки тә жи дәрһәԛа Йаһоԝа у Иса Мәсиһ пʹьрʹ әʹламәти стандийә, у тӧ дьхԝази жь алийе рʹӧһʹанива һе зедә пешда һәрʹи. Ле бәле, пешийа кӧ тӧ ԛьрар  бьки ԝәки бьби мьзгинван, ԝе баш бә кӧ тӧ ль сәр ве ԛьраре рʹьнд бьфькьри. Гәло чь али Пәтрус у кәсед дьн кьр кӧ әԝ ве сафикьрьне бькьн?

3. Жь бо кӧ әм тʹәглифа Иса Мәсиһ ԛәбул бькьн, әм һʹәԝщәйи чь нә?

³ Шагьртед Иса Мәсиһ ише хԝә бь рʹәзәдьли, һостәти, мерхаси у бь дисиплин дьани сери. Ве йәке бешьк али ԝан дькьр кӧ әԝ бьбьн мьзгинванед пешдачуйи. Ве готареда, әме бьвиньн кӧ әм ча дькарьн хԝәстьн, һостәти, мерхаси у дисиплина хԝә зедә кьн ԝәки әм дь ише бәлакьрьна мьзгинеда пешдачуйи бьн.

4. Пәтрус чьма ише мәʹсигьрийе дькьр?

⁴ Пәтрус жь бо әʹбура малбәта хԝә бькә, мәʹси дьгьртьн. Бь сәрда, әԝи ви иши пʹьрʹ һʹьз дькьр (Йуһʹн. 21:3, 9-15). Паши кӧ әԝ бу шагьрте Мәсиһ Иса, ԝи ида дәст бь ише мәʹсигьрийа симболик кьр. Бь аликʹарийа Йаһоԝа, Пәтрус дь ви ишида жи пʹьрʹ пешдачуйи бу (Кʹар. Шанд. 2:14, 41).

5. Ль гора Луԛа 5:8-11, Пәтрус чьма дьтьрсийа, у чь дькарә али мә бькә кӧ әм тьрсед ӧса жь дьле хԝә дәрхьн?

⁵ Әм мьзгине бәла дькьн, чьмки әм Йаһоԝа һʹьз дькьн. Сәбәба мә йа һәри мәзьн әв ә. Һʹьзкьрьна Йаһоԝа дькарә али мә бькә, ԝәки әм нәтьрсьн кӧ һʹӧнӧред мә тʹера мә накьн әм ви иши бь аԝайәки баш биньн сери. Гава Иса Мәсиһ гази Пәтрус кьр, әԝи жерʹа гот: «Нәтьрсә!» (Луԛа 5:8-11 бьхунә). Иса Мәсиһ чьма ӧса гот? Гәло Пәтрус дьтьрсийа кӧ һәгәр әԝ бьбә шагьрте Иса, тьштәки хьраб ԝе бе сәре ԝи? На. Пәтрус у мәʹсигьред дьн бь аликʹарийа Иса  гәләк мәʹси гьртьн. Гава Пәтрус әв йәк дит, әԝ әʹщебмайи ма у фькьри кӧ әԝ һежа нинә тʹәви Иса Мәсиһ һәвкʹарийе бькә. Дьбәкә һьнә тьрсед тә жи һәнә. Мәсәлә, дьбәкә тӧ дьфькьри кӧ нькари ве щабдарийе һьлди сәр стуйе хԝә. Ләма, сәва хԝәстьна тә зедә бә кӧ тӧ тʹәглифа Иса Мәсиһ ԛәбул бьки, ԝе баш бә кӧ тӧ һʹьзкьрьна һьндава Йаһоԝа, Иса Мәсиһ у инсана дьле хԝәда зедә бьки (Мәт. 22:37, 39; Йуһʹн. 14:15).

6. Чь дькарә хԝәстьна мә зедә бькә кӧ әм мьзгине бәла бькьн?

⁶ Һьнә тьштед дьн жи дькарьн хԝәстьна мә зедә бькьн. Мәсәлә, әм дьхԝазьн гӧһ бьдьн ве тʹәмийа Иса Мәсиһ: «Һәрʹьн у һʹәму мьләта бькьн шагьртед мьн» (Мәт. 28:19, 20, ИМ). Ӧса жи, әм мьзгине бәла дькьн, чьмки мәрьв «мина мийед бе шьван йед шашбуйи у бәлавбуйи» нә, у һʹәԝщәдарийа ԝан һәйә кӧ рʹастийа дәрһәԛа Пʹадшатийеда һин бьбьн (Мәт. 9:36, ИМ). Йаһоԝа «дьхԝазә һʹәму мәрьв хьлаз бьн у рʹастийе нас кьн» (1 Тимтʹ. 2:4).

7. Рʹомайи 10:13-15 чаԝа нишан дькә кӧ бәлакьрьна мьзгине ишәки фәрз ә?

⁷ Гава әм тиньн бәр чʹәʹве хԝә кӧ хьзмәта мә чаԝа дькарә ль сәр мәрьва һʹӧкӧм бькә, әв йәк жи дькарә хԝәстьна мә зедә бькә. Мәʹсигьр мәʹсийед кӧ әԝ дьгьрьн, дьхԝьн йан жи дьфьрошьн, ле әм мәрьва «дьгьрьн» ԝәки ԝана хьлаз бькьн (Рʹомайи 10:13-15 бьхунә; 1 Тимтʹ. 4:16).

8-9. Гәрәке мәʹсигьр чь бьзаньбьн, у чьма?

⁸ Рʹожед Иса Мәсиһда, лазьм бу ԝәки мәʹсигьр бьзаньбьн кӧ бәʹреда чь щурʹә мәʹси һәнә (Ԛан. Кʹаһ. 11:9-12). Ӧса жи, лазьм бу ԝәки әԝ рʹьнд бьзаньбьн кӧ мәʹси ль кʹӧ дәре һәнә. Ниве зәʹф мәʹси щийед ӧса һʹьз дькьн кʹидәре ав хԝәш ә у хԝарьн пʹьрʹ ә. Жь бо мәʹсигьрийе, ԝәхт жи фәрз ә. Мәсәлә, ль гьравәкә Пасифике, бьраки гази мисйонерәки кьр кӧ әԝ бь һәврʹа бәʹреда мәʹсийа бьгьрьн. Әв мисйонер ӧса гот: «Баш ә, бьра әм дь сьһʹәта 9-да дәркʹәвьн!» Бьра ӧса щаб да: «На, ӧса набә! Гәрәке әм ԝәʹде ӧса һәрʹьн кӧ жь бо мәʹсигьртьне баш ә, нә кӧ чахе мәрʹа дәст дьдә».

⁹ Ԛьрʹна йәкеда, шагьртед Иса ль ԝәхта һәри баш дьчун ль ԝедәре кʹидәре кӧ «мәʹси» һәбун. Мәсәлә, ԝана мьзгин пʹарьстгәһеда, кʹьништада, мал бь мал у базареда бәла дькьр (Кʹар. Шанд. 5:42; 17:17; 18:4). Гәрәке әм жи бьзаньбьн кӧ кʹижан ԝәхт бона мәрьвед мьһала мәда баш ә у һазьр бьн планед хԝә бьгӧһезьн ԝәки мәрьва бьвиньн (1 Корн. 9:19-23).

10. Тʹәшкиләта Йаһоԝа кʹижан һащәта һазьр дькә?

¹⁰ Мәʹсигьр һʹәԝщәйи һьнә һащәта нә, у гәрәке әԝана бьзаньбьн кӧ ван һащәта чаԝа бьдьнә хәбате. Жь бо кӧ әм карьбьн ише хԝә бькьн, әм жи һʹәԝщәйи һьнә һащәта нә, у гәрәке әм бьзаньбьн кӧ ван һащәта ча бьдьнә хәбате. Иса Мәсиһ рʹебәрикә зәлал да шагьртед хԝә кӧ әԝ чаԝа «мәʹсийа бьгьрьн». Әԝи ԝанрʹа гот кӧ гәрәке әԝ чь хԝәрʹа бьбьн, мьзгине ль кʹӧ дәре бәла бькьн у мәрьварʹа чь бежьн (Мәт. 10:5-7; Луԛа 10:1-11). Иро, тʹәшкиләта Йаһоԝа Һащәтед бона Һинкьрьне һазьр дькә у мә һин дькә кӧ гәрәке әм ван һащәта чаԝа бьдьнә хәбате. * Әв һинкьрьн али  мә дькә кӧ әм ише хԝә бь аԝайәки баш у бь һостәти биньн сери (2 Тимтʹ. 2:15).

11. Әм чьрʹа һʹәԝщәйи мерхасийе нә?

¹¹ Ише мәʹсигьра һеса нинә. Гәләк мәʹсигьр ниве шәве бь ԛәйикед хԝә дәрдькʹәвьн бәʹре, у щарьна фьртонә ньшкева дәстпедьбә. Ләма, мәʹсигьр һʹәԝщәйи мерхасийе нә. Мина ԝан, әм жи һʹәԝщәйи мерхасийе нә. Гава әм дәст бь ише бәлакьрьна мьзгине дькьн у дьбежьн кӧ әм Шәʹдед Йаһоԝа нә, щарьна «фьртонә» рʹадьбә. Мәсәлә, дьбә кӧ малбәта мә мьԛабьли мә дәре йан жи һәвалед мә ԛәрфед хԝә мә бькьн. Ӧса жи, һьнә кәс нахԝазьн гӧһ бьдьн мә. Ле бәле, гава тьштед ӧса дьԛәԝьмьн, әм әʹщебмайи наминьн, чьмки Иса Мәсиһ жь бәреда готьбу кӧ әме рʹасти ԝан тьшта бен (Мәт. 10:16).

12. Ль гора Йешу 1:7-9, чь дькарә али мә бькә кӧ әм мерхасийа хԝә зедә бькьн?

¹² Тӧ чаԝа дькари мерхасийа хԝә зедә бьки? Йа йәке, гәрәке тӧ баԝәр би кӧ Иса Мәсиһ жь әʹзмана рʹебәрийа ви шьхӧли дькә (Йуһʹн. 16:33; Әʹйан. 14:14-16). Йа дӧда, гәрәке тӧ бь соза Йаһоԝа баԝәр би кӧ әԝе тә хԝәй бькә (Мәт. 6:32-34). Баԝәрийа тә чьԛас ԛәԝи бьбә, тӧйе һаԛас мерхас бьби. Гава Пәтрус у һәвалед ԝи ише хԝә һиштьн кӧ пәй Иса һәрʹьн, ԝана баԝәрикә мәзьн әʹйан кьр. Мина ԝан, тә жи баԝәрикә мәзьн әʹйан кьр гава тә һәвал у  мәрьвед хԝәрʹа гот кӧ тә дәстпекьрийә Кʹьтеба Пироз һин би у ида дьчи щьвинед Шәʹдед Йаһоԝа. Бешьк тә пʹьрʹ хирәт кьр кӧ рʹабун у рʹуньштьна хԝә ль гора хԝәстьна Йаһоԝа бьгӧһези. Жь бо ве жи баԝәри у мерхаси лазьм бу. Һәр кӧ тӧ мерхасийа хԝә зедә бьки, баԝәр бә кӧ «Хԝәдайе тә Хӧдан, дь һәр дәре кӧ тӧ бьчи, ԝе бь тәрʹа бә!» (Йешу 1:7-9 бьхунә).

13. Фькьрандьна кʹур у дӧа чаԝа дькарьн али тә бькьн кӧ тӧ мерхасийа хԝә зедә бьки?

¹³ Хенщи ве, тӧ чаԝа дькари мерхасийа хԝә зедә бьки? Дӧа бькә кӧ Йаһоԝа мерхасийе бьдә тә (Кʹар. Шанд. 4:29, 31). Йаһоԝа ԝе щаба дӧайед тә бьдә, у әԝе тә тʹӧ щара тʹәне нәһелә. Әԝе һәр тʹьм пьштгьрийа тә бькә. Ӧса жи, бинә бәр чʹәʹве хԝә кӧ дь дәмед бәреда, Йаһоԝа кәсед баԝәрмәнд чаԝа хьлаз дькьрьн. Ле әԝи ԛә али тә жи нәкьрийә кӧ тӧ сәри бь тәнгасийед хԝәрʹа дәрхи у жийана хԝә бьгӧһези? Гәло йе кӧ хьзмәткʹаред хԝә дь бәʹра Соррʹа дәрбаз кьрьбун ԝе али тә нәкә кӧ тӧ бьби шагьртәки Иса? (Дәркʹ. 14:13) Бьра баԝәрийа тә мина баԝәрийа зәбурбеж ԛәԝи бә, йе кӧ ӧса готьбу: «Хӧдан тʹәви мьн ә, әз натьрсьм, инсане чь ль мьн бькә?» (Зәб. 118:6)

14. Сәрһатийед Масаә у Томойойе чь мә һин дькә?

¹⁴ Бь аликʹарийа Йаһоԝа, кәсед шәрмокә жи дькарьн мерхасийе әʹйан бькьн. Гәло Йаһоԝа чаԝа али ԝан дькә? Сәрһатийа хушкәкә бь наве Масаә бинә бәр чʹәʹве хԝә. Әԝ йәкә шәрмокә бу, у әԝ дьфькьри кӧ әԝ нькарә мьзгине бьдә кәсед нәнас. Ләма әԝе пʹьрʹ хирәт кьр кӧ һʹьзкьрьна Хԝәде у һʹьзкьрьна мәрьва дь дьле хԝәда зедә бькә. Әԝе ани бәр чʹәʹве хԝә кӧ бәлакьрьна мьзгине чьма ишәки һаԛас фәрз ә, у әԝе дӧа кьр ԝәки Йаһоԝа хԝәстьна ԝе зедә бькә кӧ әԝ мьзгине бәла бькә. Бь ви аԝайи, әԝ жь тьрсед хԝә фьльти у бу пешәнга һәртʹьм. Йаһоԝа дькарә али мьзгинванед ну жи бькә кӧ әԝана мерхасийе зедә бькьн. Әв йәк жь сәрһатийа хушкәкә бь наве Томойо әшкәрә йә. Щара пешьн кӧ әԝ чу мал бь мал, жьнькәке дәри вәкьр у ӧса кьрә ԛирини: «Әз нахԝазьм Шәʹдед Йаһоԝарʹа хәбәр дьм!», у бәр позе ԝе дәри гьрт. Томойойе мерхасийа хԝә ӧнда нәкьр, ле һәвала хԝәрʹа гот: «Тә бьһист? Пешийа кӧ мьн тьштәк гот, әԝе фәʹм кьр кӧ әз Шәʹде Йаһоԝа мә. Әз пʹьрʹ ша мә!» Томойо ньһа пешәнга һәртʹьм ә.

15. Дисиплин чь йә у чьма фәрз ә?

¹⁵ Жь бо кӧ мәʹсигьр пешдачуйи бьн, дисиплин лазьм ә. Ль гора фәрһәнгәке, мәʹна дисиплине әв ә кӧ мәрьв «зоре ль хԝә бьдә кӧ тьштед һʹәԝщә бькә». Мәсәлә, мәʹсигьрарʹа дисиплин лазьм ә кӧ әԝ зу рʹабьн, ише хԝә дь нивида нәһельн у ль бәр һәԝайа хьраб жи ише хԝә нәһельн. Мина ԝан, әм жи һʹәԝщәйи дисиплине нә сәва әм сәбьр бькьн у ише хԝә хьлаз бькьн (Мәт. 10:22).

16. Әм чаԝа дькарьн дисиплина хԝә зедә бькьн?

¹⁶ Дисиплин хԝә бь хԝә пешда найе, у гәләк кәс нахԝазьн зәʹмәте бькʹьшиньн. Ле бәле, һьнә ишед фәрз бе зәʹмәт ченабьн. Ләма, мәрʹа аликʹари лазьм ә ԝәки әм дисиплина хԝә зедә бькьн у хԝә һин бькьн кӧ әм ишед чәтьн жи биньн сери. Бь сайа рʹӧһʹе пироз, Йаһоԝа ве аликʹарийе дьдә мә (Галт. 5:22, 23).

17. Ль гора 1 Корьнтʹи 9:25-27, Паԝлосе шанди чаԝа хирәт кьр кӧ дисиплина хԝә зедә бькә?

 ¹⁷ Паԝлосе шанди жь алийе дисиплинева мәсәләкә баш бу. Диса жи, лазьм бу кӧ әԝ ‹щәфайе бьдә› бәдәна хԝә, ԝәки тьштед рʹаст бькә (1 Корьнтʹи 9:25-27 бьхунә). Әԝи кәсед дьн һелан дькьрьн кӧ әԝ һәр тьшти «бь тʹәрбәт, щи бь щи у маԛули бә», демәк бь дисиплин бькьн (1 Корн. 14:40). Бәле, жь бо кӧ әм мьзгине бь дьл у щан бәла бькьн у дь ишед дьнда жи щабдарийед хԝә йед рʹӧһʹани биньн сери, әм һʹәԝщәйи дисиплине нә (Кʹар. Шанд. 2:46).

18. Жь бо кӧ Йаһоԝа мә ԝәк «мәʹсигьред» сәркʹәти һʹәсаб кә, гәрәке әм чь бькьн?

¹⁸ Мәʹсигьрәки кӧ гәләк мәʹсийа дьгьрә, ԝәк мәʹсигьрәки сәркʹәти те һʹәсабе. Ле сәркʹәтибуна мә, ве йәкева гьредайи нинә кӧ чьԛас мәрьв әм дькьн шагьртед Иса (Луԛа 8:11-15). Һʹәта әм ише бәлакьрьн у һинкьрьна мьзгине бәрдәԝам дькьн, Йаһоԝа ԝе мә мина кәсед сәркʹәти һʹәсаб бькә. Гәло чьма? Чьмки гава әм ви иши дькьн, әм гӧһ дьдьн ԝи у Кӧрʹе ԝи (Марԛ. 13:10; Кʹар. Шанд. 5:28, 29).

19-20. Чьма фәрз ә кӧ әм мьзгине ньһа бәла бькьн?

¹⁹ Һьнә ԝәлатада, дәԝләт изне дьдә кӧ тʹәне һьнә мәһа мәʹси бен гьртьн. Ван ԝәлатада, гава дәмсала мәʹсигьртьне һеди-һеди дьԛәдә, мәʹсигьр дь ише хԝәда һе зедә хирәт дькьн. Һʹале мә жи ӧса йә. Хьлазийа ве система хьраб ль бәр шемике йә. Ԝәхт һьндьк майә кӧ әм мьзгина хьлазбуне бьгьһиньн мәрьва. Ләма хԝә паш нәхә! Жь бо кӧ тӧ ви ише фәрз бьки, нә лазьм ә кӧ һʹал у дәрәщед тә һәри баш бьн (Ԝаиз 11:4).

²⁰ Бәле, хԝәстьн, һостәти, мерхаси у дисиплина хԝә тʹьме зедә бькә. Тʹәви зедәтьри 8 милйон «мәʹсигьред» дьн һәвкʹарийе бькә. Һәгәр тӧ ӧса бьки, Йаһоԝа ԝе дьлхԝәшийе бьдә тә (Нәһәм. 8:10). Һʹәта хьлазийе бь дьл у щан бьхәбьтә. Готара дьнда, әме дина хԝә бьдьн се тьштед кӧ дькарьн али мә бькьн ԝәки әм ише бәлакьрьна мьзгине бьхирәт бәрдәԝам бькьн.