1. Ni kokya lyahi eryo Yesu aha ababbaliya bbani, kandi mubakolhaki?

ABIGHA ya Petero, Anderea, Yakobo na Yoane babya babbaliya. Thalengekania nga mubasweka bungahi bakowa erikokya lya Yesu lino: “Munyikwame, naghe nasyabayira mo basohi b’abandu.” * Mubakolhaki? E Biblia yithi: “Neryo-neryo mubasighania ebisohi byabo, mubakwama Yesu.” (Mt. 4:18-22) Erithwamu eryo mulyahindulha engebe yabu yosi. Omwakanya k’eribya bakasoha amahere, mubabya ‘bakasoha abandu.’ (Lk. 5:10) Munabwire, Yesu akinakokaya abandu ab’emithima myolho abanzire ekwenene. (Mt. 28:19, 20) Wunewaligha erikokya lya Yesu ery’eribya musohi w’abandu?

2. Busana naki thutholere ithwalhangira erithwamu eribya basohi b’abandu mwa kindu kikulhu, kandi ni kyahi ekyanga thuwathikya erikolha ekyo?

² Obundi wabirikulha-kulhana omw’igha lyawu lye Biblia n’erihika okwa kiika ky’erithwamu nga wubye muthuliri w’engulhu yuwene. Wamabya iwukinathika-thikira eriligha erikokya lya Yesu, isiwahwa amani. Erithika-thika lyawu lyanganabya irikakanganaya ku wunasi ngoku erithwamu eri ni likulhu. Ni kwenene, e Biblia yikabugha yithi Petero n’abo abya nabu mubalhuaho ibasighania ebisohi byabo. Aliwe, ekyo mubathakikolha buthalengekania. Babya ibamabirighunza mezi awalhabire oku mukagha baliminyire n’eriligha Yesu nga Masiya. (Yn. 1:35-42) Kuthya nawu, wanganabya iwabirigha bingyi oku Yehova na Yesu, neryo iwanza erilholha embere erikulha-kulhana bunyakirimu. Aliwe wuthe wathwamu wutholere  iwatsuka erilengekania ndeke oko mwatsi oyu. Ni kyahi ekyawathikaya Petero, Anderea, n’abandi erithwamu?

3. Ni mibere yahi eyanga ghumya eriyisunza lyawu ery’eriligha erikokya lya Yesu?

³ Abigha ba Yesu ab’erimbere ibawithe omuhwa, ibasi erikolha ndeke omubiiri wabu, ini bathubaha, kandi ibakayikasa. Ahathe erithika-thika emibere iyaneyo muyabawathikya eribya basohi b’abandu. Omwatsi ono akendi kania ngoku thwangabya n’emibere eyo eribya bigha ba Kristo abasi ndeke omubiiri w’erithulira.

4. Ni kyahi ekyahira omu Petero mw’omuhwa ow’eribya musohi?

⁴ Petero iniakasoha nuku awathikaye eka yiwe, aliwe kandi isyalikolha eby’obusohe habw’erithabya iw’omubiiri wiwe. Kikalhangirika ngoku Petero aby’anzire eby’obusohe. (Yn. 21:3, 9-15) Kandi mwigha erianza eribya musohi w’abandu. Neryo busana n’obuwathikya bwa Yehova, Petero mwathoka ndeke omubiiri oyo.​—Emib. 2:14, 41.

5. Ngoku kiri omu Luka 5:8-11, ni kyahi ekyaswekaya Petero, kandi ni kyahi ekyanga thuwathikya eriyilhusyamo eriyowa ng’eryo?

⁵ Thukathulira kundi thwanzire Yehova; ekyo kya kindu kikulhu ekikathuhira mw’omuhwa w’erikolha omubiiri oyu. Erianza Yehova lyangana leka ithwayilhusyamo amalengekania w’eriyowa nga sithutholere. Yesu abere akakokya Petero eribya musohi w’abandu, mwamubwira athi: “Sighubahe.” (Soma Luka 5:8-11.) Petero mwathahwerya amalengekania wiwe okw’isagha ebyangabya amabya mwigha. Omwakanya k’ekyo, mwasweka akalhangira ekithiko-thiko ekyo Yesu akolha eky’eribawathikya erihamba amahere mangyi, kandi Petero mwayowa isyatholere  erisabwa indi akole haghuma na Yesu. Nawu iwanganasagha wukaminya ebikayithaghisibawa eribya mwigha wa Kristo. Kyamabya ikwa kiri kithya, kamathaya olhwanzo olhwa wuwithire Yehova, Yesu, n’abataka, neryo iwukendibya mw’omuhwa w’eriligha erikokya lya Yesu ery’eribya musohi w’abandu.​—Mt. 22:37, 39; Yn. 14:15.

6. Ni bindi byahi ebikathuhira mw’omuhwa w’erithulira?

⁶ Thulebaye ebindi ebikathuhira mw’omuhwa w’erithulira. Thwanzire erighendera okwa kihano kya Yesu kino: “Mughende, muyire abigha.” (Mt. 28:19, 20) Kandi thukathulira kundi abandu ‘bakaghalhawa n’erilhuha ng’esyombuli sithawithe mulisya’ kandi bakayithagha eriminya ekwenene eyihambire oko Bwami. (Mt. 9:36) Yehova anzire abandu b’emisindo yosi bathunge eriminya erihikire ery’ekwenene n’erilhamibwa.​—1 Tim. 2:4.

7. Abanya Roma 10:13-15 hakakanganaya hathi omughaso w’omubiiri w’erithulira?

⁷ Eriminya omubiiri w’erithulira oyu ku akendi leka abandu ibalhamibwa, kikendi leka ithwanza erikolhagho. Mbaghane n’omusohi oyukasoha amahere habw’erighulya kutse erirya, ithwe thukasoha abandu nuku thulhamaye esyongebe syabu.​—Soma Abanya Roma 10:13-15; 1 Tim. 4:16.

8-9. Ni kyahi ekya omusohi atholere iniaminya, kandi busana naki?

⁸ Omwa biro bya Yesu, omusohi Omuisraeli iniakabya inianasi omulingo w’esiswe esyo akayithagha. (Law. 11:9-12) Kandi iniatholere eriminya aho syanga banika. Mughulhu mungyi esiswe sikabya ahali amaghetse agho atholere okw’isyo n’ahali ebyalya ebikaghunza. Mbwino okwa musohi, endambi nina kindu kikulhu? Bikahika oko ndambi eyitholere ey’erisoheramo esiswe, lebaya ekyo Omwema mughuma w’okwa kitsinga kye Pacific abugha akabwira omumisyonare mulebe athi bayasohe. Omumisyonare mwabugha athi, “Ngendisyakuhikako omungya omwangyakya saha isathu.” Mughalha wethu mwamusubirya athi, “Siwubyasi. Thukaghenda okwa saha eyo esiswe sikabanikiramo butsira okwa buthuku bwethu.”

⁹ Kuthya, n’abasohi b’abandu ab’omwa kighana ky’erimbere ibakaghenda omwa myanya eyikabanika mw’abandu n’okwa ndambi eyo bangabera mw’eyo. Ng’eky’erileberyako, abigha ba Yesu mubathulira omo hekalu n’omwa syosinagogi, nyumba okwa nyumba, n’omo kathali. (Emib. 5:42; 17:17; 18:4) Nethu kuthya thutholere ithwaminya emibere y’abandu ab’omwa bulhambu bwethu. Thutholere ithwaghenda-ghendania n’emibere eyiriho n’erithulira ahakabanika abandu n’okwa ndambi eya bakabanikirako.​—1 Kor. 9:19-23.

10. Ni bindu byahi ebyo ekithunga kya Yehova kikathuha?

¹⁰ Omusohi akayithagha eby’erikolesya ebitholere kandi atholere iniaminya eribikolesya. Nethu thutholere ithwabya n’eby’erikolesya omwa mubiiri wethu ebitholere. Kandi thutholere ithwaminya eribikolesya. Yesu mwaha abigha biwe b’obusondoli obuwene ngoku bangasoha abandu. Mwababwira eby’erithendi heka, aho bakendi thulira, n’ebyo banga bugha. (Mt. 10:5-7; Lk. 10:1-11) Munabwire, ekithunga kya Yehova kikathuha Ebya Thukakolesaya Thukakangirirya ebiri mw’ebindu ebikakolha ndeke. * Kandi thukakangiriribawa ngoku thwangabikolesya. Erithendeka eryo likaleka ithwasika n’erithunga amenge agho thukayithagha omwa mubiiri wethu.​—2 Tim. 2:15.

11. Busana naki abasohi b’abandu batholere ibabya bathubaha?

¹¹ Ababbaliya bakayithagha eribya bathubaha. Okwa bundi buthuku bakabana emibere eyikalire omwa ngetse. Mughulhu mungyi bakakolha omwa kiro kandi n’ebihunga byanganasa kitsumbukirania. Abasohi b’abandu nabu bakayithagha obuthubaha. Thukabya thukatsuka erithulira n’eriyiminyikalya ng’Abema ba Yehova, thwangana bana “ebihunga” by’erihakanisya ebikalhua okwa bahughu, akasekereryo k’abanywani, n’abandu erighana omwatsi wethu. Aliwe eki sikirithuswekaya. Yesu mwabugha athi angathumire abigha biwe omwa bandu ababaponire.​—Mt. 10:16.

12. Ngoku kiri omu Yosua 1:7-9, ni kyahi ekyanga thuwathikya erighumya obuthubaha bwethu?

¹² Wangabya wuthi muthubaha? Eky’erimbere, ligha ngoku Yesu anemusondolha omubiiri ono iniane elhubulha. (Yn. 16:33; Erib. 14:14-16) N’ekindi ghumaya erikirirya lyawu omwa mulhaghe wa Yehova ow’erikutsomana. (Mt. 6:32-34) Erikirirya lyawu likabya linemwongera, kwa wukan’ongera wuthya eribya muthubaha. Petero n’abo abya nabo mubakangania erikirirya erighumire bakasighania ebisohi byabo erikwama Yesu. Kuthya nawu, muwakangania erikirirya linene wukabwira abanywani n’abahughu bawu ngoku wabiritsuka erigha e Biblia n’Abema ba Yehova n’erihindana okwa mihindano yabu!  Ahathe erithika-thika, wabirikolha esyombinduka nyingyi omwa mibere n’omwa ngebe yawu nuku wughendere okwa bihano bya Yehova ebithunganene. Ekyo nakyo mukyayithagha erikirirya n’obuthubaha. Wukendibya wunemulholha embere erighumya obuthubaha bwawu, wukendiyikethera ngoku Yehova “Nyamuhanga wawu ali haghuma nawu ehosi wukaya.”​—Soma Yosua 1:7-9.

13. Erighanirya n’erisaba byanga kuwathikya bithi erighumya obuthubaha bwawu?

¹³ Ni bindi byahi ebyanga kuwathikya eribya muthubaha? Saba Yehova akuhe obuthubaha n’obulhume-lhume. (Emib. 4:29, 31) Yehova akendi subirya emisabe yawu kandi syendi syakusighania. Mughulhu wosi anayitheghekire erikusighika. Kandi, wangana ghanirya okwa mibere Yehova alhamirayamo abandi kera. Nibya kandi, lengekanaya okwa mibere akuwathikirayamo erisingura ebitsibu birebe n’erikuha amaaka w’erikolha esyombinduka omo ngebe. Ahathe erithika-thika, oyuwasondolha abandu biwe erilhaba omwa Ngetse y’Engulha angana kuwathikya eribya mwigha wa Kristo. (Eri. 14:13) Nawu wangan’ikirirya omu Yehova ng’omwimbi w’esyonyimbo oyuwabugha athi: “Omwami Mukulhu ali haghuma naghe, sindiendisyubaha; Kw’abandu basyanyikolhaki kwehi?”​—Esy. 118:6.

14. Eky’erileberyako kya Masae na Tomoyo kyamakweghesyaki?

¹⁴ Eyindi nzira eyanga kuwathikya eribya muthubaha ly’eriminya ngoku Yehova abiriwathikya abandu ababya b’esisoni eribya bathubaha. Lebaya eky’erileberyako kya mwali wethu ya Masae. Ini w’esisoni kandi iniakayowa nga syangathulira. Iniakayowa erikania n’abo athasi iriri ng’ekithwe kiri-kiri neryo iniayowa isyangathoka. Neryo mwahiraho akaghalha erikamathya olhwanzo olhw’awithire Nyamuhanga n’abaliranwa biwe. Mwalengekania kutsibu okwa mubiiri wethu w’erithulira ngoku ni w’erikolha omwa byalhuba lino n’erisaba erighumya eriyisunza liwe ly’erithulira. Mwayihamo obuba kandi nibya mwakolha ng’omutemburi w’omughulhu wosi. Yehova kandi angana wathikya abathuliri abahyaka eribya “n’amaaka.” Lengekanaya okwa ky’erileberyako kya mwali wethu ya Tomoyo. Abere akatsuka erithulira nyumba okwa nyumba, omwinye nyumba w’erimbere mwatsuruma athi: “Singanzire erikania n’Abema ba Yehova!” neryo mwahinda olhuyi. Omwa buthubaha Tomoyo mwabwira oyo babya nayu athi: “Muwukanowa ekyo? Isindi nabugha n’ekinywe, mwakalhuaho iniaminya kw’indi Mwema wa Yehova. Namatsema kutsibu!” Lino Tomoyo ni mutemburi w’omughulhu wosi.

15. Eriyikasa niki, kandi busana naki ni mubere ogho Abakristayo bakayithagha?

¹⁵ Abasohi abakathoka ndeke bakayikasa. Eriyikasa “w’amaaka w’erithoka erikolha ebitholere ibyakolhwa.” Ababbaliya batholere ibayikasa eribuka omo ngyakya-ngyakya, ibakolha erihika aho omubiiri akendi hwera, n’erilholha embere erisoha obuthuku nomubwangabya isi buwene. Nethu erithoka eriyiyinia n’erighunza omubiiri wethu thutholere ithwayikasa.​—Mt. 10:22.

16. Thwangabya thuthi abandu abakayikasa?

¹⁶ Sithuli sighalhaya omubere w’eriyikasa. Aliwe, mughulhu mungyi ni kya buhangiranwa erianza erikolha ebindu ebitheko erihiraho akaghalha. Thukayithagha eriyikakirya erithoka eribya abandu abakayikasa. Neryo, thukayithagha obuwathikya erigha erikolha ebindu ebithukalire erikolha. Yehova akathuha obuwathikya obo erilhabira omwa mulimu wiwe abuyirire.​—Gal. 5:22, 23.

17. Ngoku kiri omwa 1 Abanya Korinto 9:25-27, omukwenda Paulo mwabugha athi iniakakolhaki erithoka eriyikasa?

 ¹⁷ Omukwenda Paulo iniasi eriyikasa. Aliwe akabugha athi ‘iniakaghalhaya’ omubiri wiwe erithoka erikolha ekihikire. (Soma 1 Abanya Korinto 9:25-27.) Mwahira omwa bandi mw’omuhwa w’eriyikasa n’ow’erikolha emyatsi yosi “omw’itheghekania n’erithondekaniayo.” (1 Kor. 14:40) Thutholere ithwayikasa eribya n’endegheka eyuwene ey’obunyakirimu imwamuli erisangira mughulhu wosi omwa mubiiri w’erisoha abandu.​—Emib. 2:46.

18. Thwanga kolhaki thwamabya thwanzire Yehova athulhangire ng’abakakolha ndeke omubiiri wethu?

¹⁸ Omubbaliya akaminya ng’anasohire ndeke erikwamana n’obungyi bw’esiswe esyo alyasoha. Mbaghane n’ekyo, sithuli minya nga thwamasoha ndeke erikwamana n’omughanzo w’abandu abo thwamawathikya eriasa omwa kithunga kya Nyamuhanga. (Lk. 8:11-15) Thwamalholha embere eriyiyinia omwa mubiiri w’erithulhughania engulhu yuwene n’erikangirirya abandi, Yehova iniakendi thulhangira ngabanemuthoka. Busana naki? Kundi thukakolha ekyo Yehova na Mughalha wiwe banzire ithwakolha.​—Mk. 13:10; Emib. 5:28, 29.

19-20. Ni nzumwa yahi ey’embaghane eyangaleka ithwongera erithulira lino?

¹⁹ Omwa bindi bihugho, erisoha likalighirawa omwa mezi malebe masa. Omwa bihugho ng’ebyo, omusohi iniakendi ongera erikolha kutsibu okw’ihwererera ly’obuthuku bw’erisoha. Ithwe ng’abasohi b’abandu thukongera erithulira kutsibu lino: Enduli y’omughulhu ono yinemuseghera hakuhi-kuhi! Obuthuku obusighereyo obw’erisangira omwa mubiiri w’erilhamya esyongebe sy’abandu ni buke kutsibu. Isiwalindiriraya kutse eriyowa nga wutholere iwalinda obuthuku obuwene obw’erisangira omwa mubiiri mukulhu oyu.​—Omu. 11:4.

²⁰ Yira ekya wukakolha lino eryongera omuhwa wawu, erithunga eriminya erihikire erye Biblia, eribya muthubaha, n’eriyikasa. Yiyunge okwa basohi b’abandu abalhabire oku miliyoni munani, kandi wukendiyilhangirira obutseme bwa Yehova. (Neh. 8:10) Ithwamu erisangira omwa buswire omwa mubiiri oyu n’erilholha embere erikolhagho erihika aho akendisyahwera. Omwatsi ow’akakwamako akendi syakania okwa nzira isathu esyo thwanga ghumiryamu erithwamu lyethu ery’erilholha embere omwa mubiiri w’erithulhughania Obwami ng’abasohi b’abandu.