1. Ntia musamu Yezu katêla bilobi bia biyà mbila, mpe ntia mvutu bayizi hana?

PIERE, Andre, Zaki na Za nkari ya teka mbizi beri tâka. Banza’eti mpila yi bapamukina bu bawâ mbila ya Yezu yeri tâka ti: ‘Kundandeno ngatu nalutitula bilobi bia bantu.’ * Ngano ntia mvutu bahana? Bibila ditêle ti: ‘Ho nkatika bendo, basisa [filet] zawu, bamulanda.’ (Mat. 4:18-22) Nzengolo yo mbo yaketi sobesa luzingu lwawu ntangu zazansoni. Kani babâ bilobi bia mbizi mbo baketi kwizi bâ ‘[bilobi] bia bantu.’ (Like 5:10) Lumbu ti Yezu bantu bê na bunsungu mpe bazololo matieleka kata tâ mbila mu sarila bo. (Mat. 28:19, 20) Ngano mbila ya Yezu ya watamburi ya kwizi bâ tilobi tia bantu?

2. Mu bungu dia nti tufweti bongela nzengolo ya kwizi bâ bilobi bia bantu na bunsungu bwabwansoni, mpe nti bitubakisa mu bonga nzengolo yo?

² Kampe tuka ntama longokaka Bibila mpe wasiri nsobolo mu luzingu lwaku. Bwawu bu we naku wabonga nzengolo ya kwizi bâ tisamuni tia nsangu za mbote. Tala ti bunkuta bwe naku bwa tambula mbila ya Yezu, kunôkandi. Kampe bunkuta bwe naku mu bungu ti, zebi ti, nzengolo yo mfunu yena. Wa matieleka, Bibila mbo ditâka ti ‘ho nkatika bendo’ Piere na ndiku zandi basa sisa filet zawu. Kâ, Piere na mpangi zandi batoko banza ntete babonga nzengolo yo. Ngonda 6 ntete ntangu yi batambula mbila yo, batizabila mpe batambula ti Yezu ni Masiya. (Za 1:35-42) Mpila  mosi mpe, misamu miamingi walongokele mitariri Yehova na Yezu mpe zololo wakula mu timpeve. Kâ ntete wabonga nzengolo ya bâ tisamuni, fweti tomo banza. Ngano nti biabakisa Piere, Andre, na bantu bakaka mu bonga nzengolo yo?

3. Ntia bifu bikwizi yika ngolo nsatu’aku ya tambula mbila ya Yezu?

³ Milongoki mia ntete mia Yezu nsatu yeri nawu ya sala, tisalu tiawu tia batomo zaba, butindi bweri nawu mpe tifu tia tiyimina tieri nawu. Bifu bio biayizi ba bakisa mu kwizi bâ bisari bia mbote mu tisalu tia samuna. Timoko ti mbo tizonzela mpila yi lendi kwizi bêla tisari tia mbote mu tisalu tia samuna nsangu za mbote na tia longesa bantu bakaka.

4. Mu bungu dia nti Piere keri tilobi tia mbizi?

⁴ Piere mbo keri salaka tisalu tia loba mbizi mu kipa kanda diandi, kâ ka tieri’â kwa tisalu tia mpamba ko mu bungu dia yandi. Kampe, Piere tisalu tia loba mbizi tia keri tomo zoloko. (Za 21:3, 9-15) Wayizi longoka mpe mu zolo tisalu tia loba bantu. Mpe na lubakusu lwa Yehova, Piere wayizi bâ tisari tia mbote mu tisalu tio.​—Bis. 2:14, 41.

5. Mu nzonzolo ya Like 5:8-11, mu bungu dia nti Piere kayizi bêla na bunkuta, mpe nti bilendi tu bakisa mu telamana mbanzulu za mpila yo?

⁵ Musamu wa ntete wututumaka mu samuna ni luzolo lweto mu Yehova. Luzolo lweto mu Yehova mbo lutubakisa mu mu zonzela kwe bantu bakaka ni bu sa ti mbo tubanzaka ti ka tulendi’â tasamuna bubote ko. Yezu bu katâ Piere mbila mu kwizi bâ tilobi tia bantu, wamutêla ti: ‘Katula bunkuta mu nitu.’ (Tanga Like 5:8-11.) Piere ka bâ na bunkuta ko mu mio miaketi mu turila bu kaketi kwizi bâ mulongoki wa Yezu. Piere wayizi yituku mu mbizi zazingi zi  bayizi loba na lubakusu lwa Yezu. Yandi wazaba ti Yezu timangu kasa, mpe wamona ti ka fwanakana ko mu sala tintwari na Yezu. Ntiana Piere lendi bâ na bunkuta. Kampe lwaka lwe naku mu bungu dia misamu miamiansoni mi lendi sa mu bâ mulongoki wa Kristo. Tala ti mbanzulu ni zo ze naku, yika ngolo luzolo lwaku mu Yehova, mu Yezu na mu bampwana’aku mpe mbo kwizi bâ na nsatu ya tambula mbila ya Yezu ya kwizi bâ tilobi tia bantu.​—Mat. 22:37, 39; Za 14:15.

6. Ntia misamu miakaka miyikaka ngolo nsatu’eto ya samuna?

⁶ Tataluzula misamu miakaka miyikaka ngolo nsatu’eto ya samuna. Tuzololo tatumamana ntumunu ya Yezu yitâka ti: “Yendeno [. . .] kubikeno milongoki.” (Mat. 28:19, 20, NWT) Mbo tusamunaka mpe mu bungu ti bantu “babaniekona mpe babayambirika,” mpe nguria nsatu ye nawu ya longoka matieleka matariri Timfumu. (Mat. 9:36, NWT) Yehova zololo ti bantu ba mpila na mpila bavuka mpe babaka luzabu lwa matieleka.​—1 Tim. 2:4.

7. Bwe verse ya Bisi-Rome 10:13-15 yisongelaka ti tisalu tia samuna mfunu tiena?

⁷ Bu tubanzaka ka bwe tisalu tieto tia samuna tilendi bakisila mu vukisa bantu, mbo tukwizi zoloko mu samuna. Ka twena ntiana tilobi tia mbizi ko, titekaka mpe tidiaka mbizi zi kalobaka, kâ beto mbo “tulobaka” bantu ngatu babâ milongoki mpe bavukisa luzingu lwawu.​—Tanga Bisi-Rome 10:13-15; 1 Tim. 4:16.

8-9. Tilobi tia mbizi nti tifweti zaba, mpe mu bungu dia nti?

⁸ Mu ntangu ya Yezu, Musi-Israele wafweti zaba ka ntia mpila mbizi kaketi loba. (Lev. 11:9-12) Wafweti zaba mpe mbuka yi kaketi bakila mbizi. Mbizi mbo zivulu bâka ha tibuka tie mamba ma bazololo mpe he bidia biabingi. Tilobi tifweti zaba ntangu yi kafweti kwe loba mu bungu ti mfunu yena. Misionere yimosi yeri bâka ku Île ya Pacifique yayizi bakula ti mbizi mu ntangu yifwanakane balobaka zo. Mpangi yimosi ye Mbangi ya Yehova yayizi mu tâ mbila mu kwe loba mbizi tintwari. Misionere yatâ, “Tamonana mbazi mu 9h ya pari.” Mpangi yo yamutêla ti, “kuta tomo bakula ko. Mbo tukwe lobaka mu ntangu yifwanakane mu bungu dia mbizi, kâ ka mu ntangu’â ko yifwanakane mu bungu dia beto.”

⁹ Mpila mosi mpe, milongoki mia Yezu, miayizi bâ bilobi bia bantu, mbo mieri kwendaka mu mbuka zeri bâka bantu na mu ntangu yi baketi kwe ba bwana. Mu tifwani, milongoki mia Yezu mbo mieri samunaka mu Tempelo, mu sinagoge, mu nzo na nzo na ku mazandu. (Bis. 5:42; 17:17; 18:4) Beto mpe tufweti zabaka ntangu yi bâka bantu ku nzo zawu mpe tufweti zabaka bibuka bi tulendi ba bwana mu ba samunina. Tufweti bâ ba kubama mu sobaka programe’eto mu kwe samuna mu ntangu na mu bibuka bi tulendi kwe bwana bantu.​—1 Kor. 9:19-23.

10. Ntia bisalulu organizasio ya Yehova yituhanaka?

¹⁰ Tilobi tia mbizi tifweti bâ na bisalulu bifwanakane mu bungu dia tisalu tiandi mpe fweti zaba mu sarila bio. Beto mpe tufweti bâ na bisalulu bia delakana mu bungu dia tisalu tia samuna. Mpe tufweti zaba mu sarila bio. Yezu wahana malongi matariri mpila ya samunina kwe milongoki miandi. Wabatêla nti bafweti nata, kwe bafweti kwe samunina mpe ntia musamu bafweti kwe tâ. (Mat. 10:5-7; Like 10:1-11) Lumbu ti, organizasio ya Yehova mbo yituhanaka bisalulu bia ndongosolo bitubakisaka mu baka ndandu za zibote mu tisalu tia samuna. * Mpe organizasio yo mbo yitulongesaka bwe tusarila bisalulu bio. Ndongosolo yo mbo yitubakisaka  mu bâ na lukwikulu mu beto beni na mu bâ milongi mia mibote.​—2 Tim. 2:15.

11. Mu bungu dia nti bilobi bia bantu bifweti bâ na butindi?

¹¹ Bilobi bitekaka mbizi bifweti bâ na butindi. Ntangu zakaka mbo babwabanaka na misamu mi balembo kekoloko mu kati dia mamba. Mbo bavulu salaka mu mpimpa mpe mu mamba balendi bwabana na bitembo bia ngolo. Bilobi bia bantu mpe bifweti bâ na butindi. Bu tubatikaka mu samuna mpe bu tubatikaka mu tâ kwe bantu ti beto Mbangi za Yehova zena, kanda dieto dilendi tu telamana, “ndiku zeto zilendi tu sehesela mpe bantu bakaka” balendi kala mu wâ nsangu ze neto. Kâ ka tupamukaka ko bu tubwabanaka na misamu mio. Yezu walwengesa ti mbo kaketi tambika milongoki miandi mu kwe samuna kwe bantu babatelamana.​—Mat. 10:16.

12. Mu nzonzolo ya Yoswa 1:7-9, nti bilendi tu bakisa mu yika butindi bweto ngolo?

¹² Bwe lendi yikila butindi bwaku ngolo? Musamu wa ntete, fweti bâ na lukwikulu ti Yezu tatamana kata tatamana mu twarisa tisalu tia samuna tuka kuna mazulu. (Za 16:33; Nza. 14:14-16) Musamu wa nzole, yika timinu tiaku ngolo mu kani dia Yehova dia ku kipa. (Mat. 6:32-34) Bu kwe yiki timinu tiaku ngolo, mbo tomo kwizi bâ na butindi. Piere na ndiku zandi basongela ti timinu tia ngolo tieri nawu bu basa sisa nkari’awu ya mbizi mu landa Yezu. Mpila mosi mpe, wasongele ti timinu tia ngolo tie naku bu watêle kwe ndiku zaku na kwe kanda  diaku ti wabatikiri mu longoka Bibila na Mbangi za Yehova, mpe ku tukutakanu twawu ta kwendaka! Kampe, nsobolo zazingi wasiri mu luzingu lwaku ngatu wadiatila mu mitieno mia buderede mia Yehova. Mu sila bo, wafwanakane wabâ na timinu mpe na butindi. Bu kwe tatamane mu kwe yiki butindi bwaku ngolo, mbo kwizi bâ na lukwikulu ti “Yehova Nzambi’aku ni ke naku kwakwansoni ku kwenda.”​—Tanga Yoswa 1:7-9.

13. Bwe dimbitila na lusambulu bikubakisila mu yika butindi bwaku ngolo?

¹³ Bwe lendi vutu yikila ngolo butindi bwaku? Sambila mu baka butindi. (Bis. 4:29, 31) Yehova mbo kahanina tusambulu twaku mvutu. Mbo kabâ naku ntangu zazansoni. Mpe, lendi dimbitila mu mpila Yehova yi kavukisila bantu bakaka mu ntangu ya ntama. Banza mpe mpila yi kakubakisila bu weri mu mpasi mpe mu mpila yi kakuhanina ngolo za sa nsobolo mu luzingu lwaku. Wa matieleka, Yandi wabakisa kanda diandi mu sabuka Mubu wa Mbwaki (mer Rouge) lendi ku bakisa mu bâ mulongoki wa Kristo. (Ndu. 14:13) Buna lendi bâ na lukwikulu lumosi na titsoniki timosi tia Mikunga tiatâ ti: “Yehova ni ke nani; ka nibâ na bunkuta ko. Ngano muntu nti wulendi kundirika?”​—Mik. 118:6.

14. Ntia musamu longokele mu tifwani tia Masae na tia Tomoyo?

¹⁴ Mpila yakaka ya yikila butindi ngolo ni ya longoka bwe Yehova kabakisila bantu bayembama, bayizi longoka mu bâ na butindi. Tabongeno tifwani tia mpangi yimosi ya yikento yi batâka nkumbu Masae. Yandi weri wa yembama mpe mbo keri banzaka ti ka keti’â lenda ko mu sala tisalu tia samuna. Mbo keri monaka ti zonza na banzenza musamu wa mpasi weri, ntiana yandi weri yêlaka mu naka tibaka tia tila mpe mbo keri banzaka ti ka keti’â lenda ko. Kâ, wayizi sarila ngolo zazingi mu yika luzolo lwandi mu Nzambi na mu bampwana’andi ngolo. Bu kayizi tomo banza, wayizi bakula ti yi ni ntangu yi tufweti samuna na manzangu mamansoni. Mpe wasambila mu yika ngolo nsatu’andi ya samuna. Watelamana bunkuta bwandi mpe wayizi bâ mupasuri-nzila wa ntangu zazansoni. Yehova lendi bakisa mpe bisamuni bia môna mu “bâ na butindi.” Tavutu bonga tifwani tia mpangi ya yikento yi batâka nkumbu Tomoyo. Bu kabatika mu samuna mu nzo na nzo, muntu wavwa nzo ya ntete yi baye kota wabadumina: “Ka ndiena na nsatu ya zonza na Mbangi za Yehova ko!” Ha manima, wakanga mwelo wa nzo’andi mu ngolo. Tomoyo ka bâ na bunkuta ko mpe watâ kwe mpangi yi beri samunaka tintwari ti: “Ngano wa wiri? Ka ntele’â na kani musamu ko kâ zebi ti meno Mbangi ya Yehova yena. Nsayi yayingi ye nani!” Lumbu ti, Tomoyo mupasuri-nzila wa ntangu zazansoni wena.

15. Ngano tifu tia tiyimina ni nti, mpe mu bungu dia nti tie mfunu?

¹⁵ Bilobi bilendaka tisalu tiawu mbo bisarilaka ngolo mu yirika misamu mifweti yilama. Mu tifwani, “bifweti vumbuka nkatika pari mu sala na tii ntangu yiwa tisalu ni bu sa ti ntangu ka yena ya yibote ko.” Beto mpe nsatu tifu tia tiyimina ye neto tala ti tuzololo tatatamana mpe tamanisa tisalu tieto.​—Mat. 10:22.

16. Nti bilendi tu bakisa mu yirika misamu milendi bâ mpasi kwe beto?

¹⁶ Ka tubutukaka na tifu tia tiyimina ko. Vula-vula mbo tuzoloko mu yirika misamu mu mpila yilembolo mpasi. Kâ, ntangu zakaka misamu miyôkele mfunu, milendi bâ mpasi mu yirika. Ntiangu tufweti longoka mu kuna tifu tia tiyimina. Buna, lubakusu lwe neto nsatu mu longoka mu yirika misamu milendi bâ mpasi kwe beto. Yehova mbo katuhanaka lubakusu lo mu nzila ya mpeve santu’andi.​—Nga. 5:22, 23.

17. Tintwari na 1 Bisi-Korente 9:25-27, ntia ngolo ntumwa Paulo kafweti sarila mu kuna tifu tia tiyimina?

 ¹⁷ Ntumwa Paulo tifu tia tiyimina tieri nandi. Kâ watâ ti nitu’andi “nkuba” keri kwe ya hani ngatu kayirika misamu mia mbote. (Tanga 1 Bisi-Korente 9:25-27.) Watindisa mpangi zakaka mu tiyiminaka bawu beni mpe mu yirika misamu ‘mu buzitu na mu bunkete.’ (1 Kor. 14:40) Tufweti sarila ngolo mu tatamana mu hanaka nsambululu kwe Yehova; mo kati dia nsambululu mo mwe na tisalu tia vulu samunaka na tia longesaka nsangu za mbote.​—Bis. 2:46.

18. Nti bisa ti Yehova kamona ti tulendele?

¹⁸ Tilobi mbo tilendaka tisalu tiandi tala ti bakiri mbizi zazingi. Kâ tisalu tia samuna tia swaswana tiena. Lenda kweto mu tisalu tia samuna, ka kutarilaka lutangu lwa bantu ko ba tubakisaka mu kwizi bâ Mbangi za Yehova. (Like 8:11-15) Bu tukwe tatamane mu samuna nsangu za mbote na mu kwe longese bantu bakaka, Yehova mbo kamona ti tulendele tisalu tieto. Mu bungu dia nti? Mu bungu ti tumama tuta tumama kwe Yehova na kwe Mwana’andi.​—Mak. 13:10; Bis. 5:28, 29.

19-20. Ntia misamu mia nzitukulu mita tu tuma mu samuna bwawu bu?

¹⁹ Ku nsi zakaka, tisalu tia loba mbizi ka basalaka tio ko mu ngonda zazansoni. Ku nsi zo, bilobi mbo bisaka manzangu mu sala tisalu tiawu bu babâka penepene na ntangu yi bayiminaka tisalu tiawu. Bu twe bilobi bia bantu, dema die neto dia kulu samuna bwawu bu mu bungu ti: Nsuka ya nza yi yeka nguria penepene! Ntangu ka yayingi’â ko yisiri mu samuna nsangu za mbote zilendi vukisa luzingu lwa bantu. Kulembeketandi peleko kubanzandi ti misamu miamiansoni mifweti bâ mia lunga mu sala tisalu tio tia mfunu.​—Ekl. 11:4.

²⁰ Bwawu bu yika nsatu’aku ya samuna ngolo, longoka mu tomo zaba mpila za samuna, yika butindi bwaku ngolo mpe kuna tifu tia tiyimina. Yiza wasala tintwari na bantu yôka milio 8 basamunaka mu nza ya mukaka, mpe mbo baka nsayi yi hanaka Yehova. (Neh. 8:10) Bonga nzengolo ya samunaka bwabwingi mpe tatamana mu sarila bo na tii ntangu Yehova yi kakwizi tâ ti tisalu tiwiri. Mu timoko tita landa mbo tuzonzela misamu mitatu milendi tu bakisa mu yika ngolo nzengolo’eto ya samuna nsangu za mbote za Timfumu.